لعوزنا بوناصر مايعرف يجامل

[عروة]

دخل بوناصر المجلس على الشباب وسلم وقبل مايجلس قال حق الى جنبه وبصوت عالي وش فيك مطير الشنب مريض والا تتعالج كيماوي وانحرج صاحب الشأن وتلعثم وماقدر يرد عليه وقبل مايتكلم اي حد ثاني واجه صاحب المجلس وقال له وش السالفة ماعندكم الا قهوة نبي شاي نبي عصاير وانحرج الرجال وقام طلع يلبي طلباته علشان يفتك من لسانه وبعد فترة صمت رجع اخونا في الله يتكلم ويوجه كلامه لواحد ثاني ويقول له ماشاء الله عليك يابوفلان من يوم شريت السيارة الجديدة واشوف خشمك بالسماء تمر علينا ولا تسلم شكلها السيارة غيرتك على ربعك ابتسم راعي الشأن وقال شدعوة مانتغير احنا على ربعنا الله يسلمك ورفيجنا ماخلاه يكمل على طول عطاه وقال له لا لا تغيرت عيل امس تمر تشوفني صوب الجمعية وتسوي نفسك ماتشوفني تلعثم صاحبنا وقال يشتري راسه احسن شيء وسكت وانشغل بجواله وتم بوناصر ماكل الجو بالمجلس يعلق على هذا وذاك وقبل مايستئذن علشان يمشي رفع يده كنه صدام حسين ايام عزه وقال يلا ياجماعه انا استئذنكم الحين ولحد يحط في خاطره ترا انا من النوع الى احب اطلع الى في قلبي والى في القلب على اللسان على طول واذا غلطنا في حد سامحونا قبل مانطلع ترا الدنيا حياة وموت ردوا عليه كلهم الله يحفظك ولسان الحال عكس القول

فهل تصرفات بوناصر صحيحة
وهل الكلام في الوجه حتى لو كان جارح اسلوب سوى والا اسلوب معقدين
وهل لما الانسان يعطى وجهه نظره في شخص معلقا على شكله والا تصرفاته يدخل في العيب وانتقاص الناس والا ممكن يكون من طيبة قلبه وعفويته
وهل انتوا تعطون كاش والا تجملون رايكم في الناس ومواضيع الحياة

وسلامتكم

[الرميله]

الصراحه بوناصر
هذا يبي واحد يرد عليه علشان ياكله مليون مره
وانا اشوف ان الحقران يقطع المصران
وحال بوناصر حال كثيرين مثله
عندهم اسلوب اخوانا المصريين
ياكلون المجلس بلسانهم
والله المستعان

[الخفي]

غير أنَّ هناك من الناس صنفًا تستهويهم شهوة الكلام، فلا يملُّونه أبدًا، فيسلِّطون ألسنتهم على شئون الناس، وعلى حقائق الدين، فيُشَوِّهون هذه وتلك، وقد سخط الإسلام أشدَّ السَّخَطِ على هذا الفريق الثرثار المتقعِّر، قال r: "إِنَّ أَبْغَضَ الرِّجَالِ إِلَى اللَّهِ الأَلَدُّ الْخَصِمُ"[3].

[pure]

" الكلمه الطيبه صدقه "

بدال ما يركز بو ناصر على السلبيات في الناس

يركز على الايجابيات اللي فيهم ويمدحهم

او اذا يبي يعلق ,, بعلق بس بطريقه غير مباشره او اتيكيت

عشان الناس تحب وجوده بينهم

ومثل ما اهو قال

الدنيا قصيره

ما تسوا اني ازعل الناس مني واخليهم يكرهون وجودي

[غناتي1]

الله يهديه -- ويصلحه

الدعاء لمثل هالحالات واجب

[ولد شرق]

يا اخي
في ناس ماتفرق بين قلة الأدب والصراحه مع اللي بينها اشعره فقط

كل انسان خطّء ومافي انسان معصوم عن الخطأ يعني بوناصر ذيه مايغلط؟
الانسان لما يغلط لازم ناخذ بيده وننصحه علشان ماينفر منا ومن نصايحنا

(ولو كنت فظا غليظ القلب لانفضوا من حولك فاعف عنهم واستغفر لهم)

اما اللي ياكل الناس بلسانه الصراحه عيب عليه... (وهل يكب الناس في جنهم إلا حصائد السنتهم)

اتمنى يرجع بوناصر لضميره اشوي وياكثر من اللي على شاكلة بوناصر...

[اللورد]

جزاه الله خير بوناصر
اللي عجبني فيه انه سلم على الجميع قبل مايطلع من عندهم ويطلب السموحه منهم..
وكلامه واضح ويعطي كاش على قولتك ...
بس ياليت كان مغير اسلوبه في الحديث بدل الطنايز اللي يحذفها بدون حسبان ...

ويعطيك الف عافيه على طرح الموضوع اخوي عروه

[قطر love]

تصرفات بوناصر عيب في عيب واذا الي في قلبه على لسانه مايفشل الرجال جدام الربع يقدر ياخذه شوي بعيد ويكلمه وينصحه اذا هو يبي مصلحته بس الله يهداهم في ناس صايرين مثل بوناصر

[وتبقى الدنيا حلوه]

اذا مصخها اعطيه كاااش

[فلفل حار]

اسلوب الصراحه جميل وحلوو الواحد يصارح الثاني وينصحه

لكن مهما كان لازم يكون بأسلوب وسنع ...

ان شفت عيب في رفيجي اخذه على صوب واكلمه وانصحه بيني وبينه

شفته اصطلب كان بها ... وان ماصطلب اكرر معاه المحاوله بطريقه ثانيه دامه رفيجي ويعز علي لازم اكون قد الرفجه ... اهم شي ابري ذمتي ...!

لكن ألي مايعرف السنع .... الباب يوسع جمل ... ^0^



يعطيكـ العافيه اخــووي ... :)

[المشط]

بو ناصر من النوع اللى تقبضه باب المجلس ولا تتحسف عليه

لان هذي الاشكال اللى ماتحشم الرجاجيل في مجالس الرجاجيل مب وجه حشيمه

[ali-alhamadi]

والله انا امشي على المثل الي يقول ( استح من الي يستحي منك . لاتستحي من الي ما يستحي منك )

[الكواري]

والله انا امشي على المثل الي يقول ( استح من الي يستحي منك . لاتستحي من الي ما يستحي منك )


خوووش مثل ....
خخخخخ بس اول مره اسمعه:telephone:

[هداف]

عاااااااااش بو ناصر عجبني يوم انه احرج بو شنب مخوضر !! يعني كان فيه شنب لأن ها لموضه البايخه
بدت تنتشر وياشين الوجيه في ذمتي !!

لكن الباقي انا ضده في موقفه من فوالة المجلس وغيره والانتقاد يكون بطريقه مهذبه اكثر من التهجم ورفع الصوت

[متسبب]

هذا بوناصر ابتلشتوا فيه
وحتى لو طردتوه من الباب شكله بيدش من الشباك
فمالك الا تسكر المجلس بالشمع الاحمر :)

[براتزية برازيلية]

انا ماحب المجاملات
بس في اسلوب ثاني و تعامل بو ناصر نو :(

[عروة]

الصراحه بوناصر
هذا يبي واحد يرد عليه علشان ياكله مليون مره
وانا اشوف ان الحقران يقطع المصران
وحال بوناصر حال كثيرين مثله
عندهم اسلوب اخوانا المصريين
ياكلون المجلس بلسانهم
والله المستعان

الله يعين وشكله بوناصر يبيله بوناصر مضاد علشان يعدل الميزان المايل ونوصل للاتزان شاكر لك المشاركة


غير أنَّ هناك من الناس صنفًا تستهويهم شهوة الكلام، فلا يملُّونه أبدًا، فيسلِّطون ألسنتهم على شئون الناس، وعلى حقائق الدين، فيُشَوِّهون هذه وتلك، وقد سخط الإسلام أشدَّ السَّخَطِ على هذا الفريق الثرثار المتقعِّر، قال r: "إِنَّ أَبْغَضَ الرِّجَالِ إِلَى اللَّهِ الأَلَدُّ الْخَصِمُ"[3].

جزاك الله خير وصدق شهوة الكلام بلوة وخطيرة ومحد يقدر عواقبها والله المستعان شاكر لك المشاركة


" الكلمه الطيبه صدقه "

بدال ما يركز بو ناصر على السلبيات في الناس

يركز على الايجابيات اللي فيهم ويمدحهم

او اذا يبي يعلق ,, بعلق بس بطريقه غير مباشره او اتيكيت

عشان الناس تحب وجوده بينهم

ومثل ما اهو قال

الدنيا قصيره

ما تسوا اني ازعل الناس مني واخليهم يكرهون وجودي

يمكن لانه الناس تعودت انه الايجابيات لازم تكون موجوده في الى حولهم بعكس السلبيات بس يمكن الخجل او الاحراج مايخلينا نوصل لهم انه هالسلبيات موجوده فيهم ويمكن محتاجين اسلوب بوناصر بس بطريقة ارقى شوي شاكر لك المشاركة

[ناصح لكم]

المفروض راعي المجلس يكلمه على انفراد ويحذره انه يغلط على الضيوف
وان ما تاب يقبضه الباب

[BuFaisal]

بوناصر سلم اول ما دخل لكنه ما فهم السلام وهو ان يسلم الناس من لسانه وشره
النصح بالعامه لا يعتبر نصح وانما احراج وتأكد ان الانسان يرفض هذا النصح امام الناس
اسلوب مرفوض واذية المسلم لا تجوز ولو يحب ينصح ينصحهم على جنب
هذا الانسان مريض نفسيا ويحب يحسس الناس انه افضل منهم وهذه تسمى عقدة النقص
اعرف ناس من هنالوع لكني ابدا لا اجلس معهم ولا اتشرف بهم
واذا احد من هالنوع جا صوبك حاول تجاهله او تنبه عليه وتوقفه عند حده
وان ما تسنع رد عليه رد قوي وقبضه الباب لانه ماهو وجه حشيمة

[شموخ العز]

عروه

جعله الزززين فيهم فيه ناس فيهم كبر .. حى السلام ماعاد يسلمون


فيهم غرور فيهم حقد فيهم حسد على شنو على دنيا زائله الله عفوووك

بوناصر تعال عندنا؟؟ عينات محتاجين مثلك

[جهام]

يبيله رفسه ..الواحد يفكر قبل لايتكلم ..وانا الصراحة ماعرف اجامل بس مو دفش

[_بوشهاب_]

ياخوي وينه بوناصر هذا هذا من نوعي المفضل بس خله يحاسب معاي:tease:

[ابـو مــحــــمـــــد]

قال حق الى جنبه وبصوت عالي وش فيك مطير الشنب مريض والا تتعالج كيماوي

وسلامتكم

ول ياكثر الي مر على ها الفقره ولا كنه شافها :nop:

[وطن]

اللي يستاهل الحشيمه الواحد يحشمه

لكن اذا جاني حد ويكلمني بهالاسلوب برد عليه باسلوب يخليه يطبخ وهو مكانه من القهر
مثل ماهو عنده لسان احنا بعد عندنا

:)

[غير البشر]

المجلس يتعذرك :secret::(

[!الشايمه!]

هههههههههههههههههههههههههههههههههههههههه
عجيب الرد........بيدخل لكم من الدريشة هههههههههههه

بصراحة انا حبيت بوناصر....وهالنموذج ياكثر مانشوفه بين
الشيبان والعجايز....وايد منهم دوغري....وستريت....

المشكلة اذا عندك حد غريب...يغربلونك يلتهونك ......ودك تشرد من تشوفهم مقبلين :)

انا بالنسبة لي....هالنوعية اهستر وياهم من الضحك...ادري ان صراحتهم
ماوراها خبث او لئامة.......عادي اقلب الموقف لمزح.....وكلنا نضحك......

لكن مافي مانع....اني بيني وبينهم اقول لهم...باباتي بطل حركات
الاحراج الموقوتة :) .....ولو اني اعرف ان هذا
طبع وصعب تغييره......بالعادة الناس حول هالاشخاص....
يعرفونهم ومايزعلون من اسلوبهم....

مع ملاحظة....ان هناك فرق بين الخبيث اللي يتعمد...الاحراج
ويدور لك الزلة....لاجل يطلع اخلاقه عليك.....

لكن.....بس تساؤول ......

بعيد عن المجاملة....وان الشخص لازم يكون ذرب مع الناس....والمفروض
انه مايصدمهم....بصراحتة.....انا معك في هذا الشئ....المفروغ منه.

ولكن لو نظرنا حولنا......لعالمنا العربي.....تخصص نفاق....نميمة...غيبة...مجاملة
يدخل الشخص....الكل يضحك بوجهه.....ويجاملونه ويجاملونه.....حتى
يحس الكل انهم بيختنقون من المجاملة......

ومن يطلع هذا الشخص....تصور كمية النميمة....والغيبة....واكل لحمه...

طيب انت ياللي تدفع ضريبة المجاملة....بالنميمة...
ليش ما تكون صريح كفاية....انك تكلم هذا الشخص....ستريت...
وتقول له عن اخطائه....وماتعتب عليه.....

لا اقول ان يكون هذا باسلوب منفر او محرج....ولكن مجرد وجود
فكرة الصراحة.....والوضوح...تعتبر فضيلة...
في مجتمع آكلي لحوم البشر.........!؟

.....

اما عني.... اجامل في المواقف العادية.....ولكن حين يتحول الموقف....
الى كذب ممل.....ونفاق مقيت......وقتها اعطي كاش..ما الضير
ان الشخص يقول الشئ الصحيح....في الوقت اللي
الكل يريد يخبي راسه......!

الموقف يطلب صاحبه....!

تحية

[شيط ويط]

ماله حل بوناصر :rolleyes2:

[بومحمد911]

كل واحد عنده عيوب محد كامل غير وجه الله

امثال بوناصر ياكثرما انشوفهم في حياتنا اليومية

الله يهديهم

[الجزيـرة $]

المجلس يتعذرك :secret::(

:nice::nice::nice::nice::nice::nice:

[حلم قطري]

السلام عليكم ورحمة الله وبركاته
ابوناصر وتيكثر اللي مثله يحب ينتقد الناس ويدوّر عيوبهم خاصة اذا فيه شيبان يابلفيت انه هو اللي على صح وكامل من العيوب اما لو كان ابوناصر معه ربعه الخاصين قروبه عادي ولا فيها شئ ولا احد يزعل من المزح
لكن اذا كان المجلس من كل شكل ولون الشرهه مب على ابوناصر الشرهه اللي اللي خلاه يتمادى وهو ان كل ما ابوناصر تطنز على واحد انسدح من الضحك والمسيكين ابوناصر معتقد انه مسوي جو يواصل (( ماحب هالأشكال )) وعلى فكره ترى غلطان من اعتقد ان ابوناصر ينصح تفكيره انه يضحك الموجودين ومن كثر مزحه قلّت هيبته.
تسلم ياصاحب الموضوع والله يوفقك.

[Mansour_qa]

صـراحة راعـي الشنـب يشتـاهل وراعـي الموتـر الجديـد بعـد يستـاهل ولكـن لو غـير الإسلوب للنصـح بيكون أفضـل ..

وعـن الفوالـه صـراحة مالـة حـق لـو يبي عصـير الله لايهينة يمـر علـى التمويـن وياخذ للمجلـس مافيهـا شـي ..

[عروة]

الله يهديه -- ويصلحه

الدعاء لمثل هالحالات واجب

ندعي لكل المسلمين الى يشافيهم ويشيل من قلوبهم كل امراض الحياة شاكر لك المشاركة


يا اخي
في ناس ماتفرق بين قلة الأدب والصراحه مع اللي بينها اشعره فقط

كل انسان خطّء ومافي انسان معصوم عن الخطأ يعني بوناصر ذيه مايغلط؟
الانسان لما يغلط لازم ناخذ بيده وننصحه علشان ماينفر منا ومن نصايحنا

(ولو كنت فظا غليظ القلب لانفضوا من حولك فاعف عنهم واستغفر لهم)

اما اللي ياكل الناس بلسانه الصراحه عيب عليه... (وهل يكب الناس في جنهم إلا حصائد السنتهم)

اتمنى يرجع بوناصر لضميره اشوي وياكثر من اللي على شاكلة بوناصر...

مشكلة الناس الخيط الى تتكلم عنه يقصونه باستمرار لحد مايجي يوم الخيط مايكون له وجود وشاكر لك المشاركة


جزاه الله خير بوناصر
اللي عجبني فيه انه سلم على الجميع قبل مايطلع من عندهم ويطلب السموحه منهم..
وكلامه واضح ويعطي كاش على قولتك ...
بس ياليت كان مغير اسلوبه في الحديث بدل الطنايز اللي يحذفها بدون حسبان ...

ويعطيك الف عافيه على طرح الموضوع اخوي عروه

الله يعافيك اخوي اللورد والاراء تختلف الى يشوف بوناصر طيب والى يشوفه مجرم واحنا نتابع ونشوف ارائكم وشاكر لك على المشاركة


تصرفات بوناصر عيب في عيب واذا الي في قلبه على لسانه مايفشل الرجال جدام الربع يقدر ياخذه شوي بعيد ويكلمه وينصحه اذا هو يبي مصلحته بس الله يهداهم في ناس صايرين مثل بوناصر

النصيحة في السر هي الطريق الى القلوب بس في ناس مايفيد معاهم لا سر ولا علن وشاكر لك المشاركة


اذا مصخها اعطيه كاااش

داوها بالتي هي الداء شاكر لك المشاركة


اسلوب الصراحه جميل وحلوو الواحد يصارح الثاني وينصحه

لكن مهما كان لازم يكون بأسلوب وسنع ...

ان شفت عيب في رفيجي اخذه على صوب واكلمه وانصحه بيني وبينه

شفته اصطلب كان بها ... وان ماصطلب اكرر معاه المحاوله بطريقه ثانيه دامه رفيجي ويعز علي لازم اكون قد الرفجه ... اهم شي ابري ذمتي ...!

لكن ألي مايعرف السنع .... الباب يوسع جمل ... ^0^

ياهو الباب بيوسع

يعطيكـ العافيه اخــووي ... :)

الله يعافيك يافلفل حار وياهوو الباب بيمر عليه قطيع مب جمل واحد بس وشاكر لك المشاركة

[وحيد المشاعر]

الله يهديه -- ويصلحه

[عروة]

بو ناصر من النوع اللى تقبضه باب المجلس ولا تتحسف عليه

لان هذي الاشكال اللى ماتحشم الرجاجيل في مجالس الرجاجيل مب وجه حشيمه

ممكن لكن احيانا حتى لو قبضته الباب بيرجع لك ولا كنه شيء صار الرجال قلبه ابيض وشاكر لك على المشاركة


والله انا امشي على المثل الي يقول ( استح من الي يستحي منك . لاتستحي من الي ما يستحي منك )

خوش مثل والعين بالعين والسن بالسن وشاكر لك المشاركة


عاااااااااش بو ناصر عجبني يوم انه احرج بو شنب مخوضر !! يعني كان فيه شنب لأن ها لموضه البايخه
بدت تنتشر وياشين الوجيه في ذمتي !!

لكن الباقي انا ضده في موقفه من فوالة المجلس وغيره والانتقاد يكون بطريقه مهذبه اكثر من التهجم ورفع الصوت

عاااش بوناصر شكله بدا يجمع المؤيدين وشاكر لك على المشاركة


هذا بوناصر ابتلشتوا فيه
وحتى لو طردتوه من الباب شكله بيدش من الشباك
فمالك الا تسكر المجلس بالشمع الاحمر :)

توني اقول حق اخوي المشط لو قبضته الباب مرده بيرجع لك ولا باذنه ماي وهو يضحك وشاكر لك المشاركة


انا ماحب المجاملات
بس في اسلوب ثاني و تعامل بو ناصر نو :(

المجاملات احيانا يكون وقتها مناسب واحيانا مالها لزوم الذكاء بالانسان الى يعرف متى يستخدمها

[عروة]

المفروض راعي المجلس يكلمه على انفراد ويحذره انه يغلط على الضيوف
وان ما تاب يقبضه الباب

احيانا راعي المجلس ينحرج يكلم حد بمجلسه وخصوصا انه ماوصل بكلامه لدرجة التجريح الصارخ وشاكر لك المشاركة



بوناصر سلم اول ما دخل لكنه ما فهم السلام وهو ان يسلم الناس من لسانه وشره
النصح بالعامه لا يعتبر نصح وانما احراج وتأكد ان الانسان يرفض هذا النصح امام الناس
اسلوب مرفوض واذية المسلم لا تجوز ولو يحب ينصح ينصحهم على جنب
هذا الانسان مريض نفسيا ويحب يحسس الناس انه افضل منهم وهذه تسمى عقدة النقص
اعرف ناس من هنالوع لكني ابدا لا اجلس معهم ولا اتشرف بهم
واذا احد من هالنوع جا صوبك حاول تجاهله او تنبه عليه وتوقفه عند حده
وان ما تسنع رد عليه رد قوي وقبضه الباب لانه ماهو وجه حشيمة

شكلكم كلكم تبون تقبضونه الباب شاكر لك المشاركة المميزة اخوي بوفيصل


عروه

جعله الزززين فيهم فيه ناس فيهم كبر .. حى السلام ماعاد يسلمون


فيهم غرور فيهم حقد فيهم حسد على شنو على دنيا زائله الله عفوووك

بوناصر تعال عندنا؟؟ عينات محتاجين مثلك

شكلي بدليه بيتكم وهو يتصرف مع العينات الى عندكم وشاكر لك المشاركة

[عروة]

يبيله رفسه ..الواحد يفكر قبل لايتكلم ..وانا الصراحة ماعرف اجامل بس مو دفش

الله يعين واذا جاك اكثر من بوناصر بالمجلس وش بتسوي وشاكر لك المشاركة



ياخوي وينه بوناصر هذا هذا من نوعي المفضل بس خله يحاسب معاي:tease:

بطرش لك رقمه على الخاص يابوشهاب وبعدين عطنا التفاصيل وشاكر لك المشاركة


ول ياكثر الي مر على ها الفقره ولا كنه شافها :nop:

لاحظت وايد مروا شكلهم ماقروا الموضوع كامل او انه غمضوا عيونهم وشاكر لك المشاركة

[عروة]

اللي يستاهل الحشيمه الواحد يحشمه

لكن اذا جاني حد ويكلمني بهالاسلوب برد عليه باسلوب يخليه يطبخ وهو مكانه من القهر
مثل ماهو عنده لسان احنا بعد عندنا

:)

عاد في ناس ماعندهم القدرة على الاخذ والعطاء وهذا الى مشجع بوناصر على انه يتمادى او مانقول يتمادى يمكن هذي طبيعته ونحاول نتقبله ونعدل من اسلوبه وشاكر لك المشاركة


المجلس يتعذرك :secret::(

صعبة تقولها له ياغير البشر نعطيه فرصة يمكن الرجال قلبه ابيض ومايقصد وشاكر لك المشاركة

[عروة]

هههههههههههههههههههههههههههههههههههههههه
عجيب الرد........بيدخل لكم من الدريشة هههههههههههه

بصراحة انا حبيت بوناصر....وهالنموذج ياكثر مانشوفه بين
الشيبان والعجايز....وايد منهم دوغري....وستريت....

المشكلة اذا عندك حد غريب...يغربلونك يلتهونك ......ودك تشرد من تشوفهم مقبلين :)

انا بالنسبة لي....هالنوعية اهستر وياهم من الضحك...ادري ان صراحتهم
ماوراها خبث او لئامة.......عادي اقلب الموقف لمزح.....وكلنا نضحك......

لكن مافي مانع....اني بيني وبينهم اقول لهم...باباتي بطل حركات
الاحراج الموقوتة :) .....ولو اني اعرف ان هذا
طبع وصعب تغييره......بالعادة الناس حول هالاشخاص....
يعرفونهم ومايزعلون من اسلوبهم....

مع ملاحظة....ان هناك فرق بين الخبيث اللي يتعمد...الاحراج
ويدور لك الزلة....لاجل يطلع اخلاقه عليك.....

لكن.....بس تساؤول ......

بعيد عن المجاملة....وان الشخص لازم يكون ذرب مع الناس....والمفروض
انه مايصدمهم....بصراحتة.....انا معك في هذا الشئ....المفروغ منه.

ولكن لو نظرنا حولنا......لعالمنا العربي.....تخصص نفاق....نميمة...غيبة...مجاملة
يدخل الشخص....الكل يضحك بوجهه.....ويجاملونه ويجاملونه.....حتى
يحس الكل انهم بيختنقون من المجاملة......

ومن يطلع هذا الشخص....تصور كمية النميمة....والغيبة....واكل لحمه...

طيب انت ياللي تدفع ضريبة المجاملة....بالنميمة...
ليش ما تكون صريح كفاية....انك تكلم هذا الشخص....ستريت...
وتقول له عن اخطائه....وماتعتب عليه.....

لا اقول ان يكون هذا باسلوب منفر او محرج....ولكن مجرد وجود
فكرة الصراحة.....والوضوح...تعتبر فضيلة...
في مجتمع آكلي لحوم البشر.........!؟

.....

اما عني.... اجامل في المواقف العادية.....ولكن حين يتحول الموقف....
الى كذب ممل.....ونفاق مقيت......وقتها اعطي كاش..ما الضير
ان الشخص يقول الشئ الصحيح....في الوقت اللي
الكل يريد يخبي راسه......!

الموقف يطلب صاحبه....!

تحية


مع ملاحظة....ان هناك فرق بين الخبيث اللي يتعمد...الاحراج
ويدور لك الزلة....لاجل يطلع اخلاقه عليك.....


نعم في فرق بين الخبيث المتعمد الى يدور الزله علشان الطنازة وانتقاص الناس وبين الطيب الى في قلبه على لسانه لانه الطيب حتى لو علق مابيضرك بعكس الخبيث مابيخلي كلمة مابيقولها وبينشرها على وكالات الانباء العالمية علشان يشفى صدره المريض


ولكن لو نظرنا حولنا......لعالمنا العربي.....تخصص نفاق....نميمة...غيبة...مجاملة
يدخل الشخص....الكل يضحك بوجهه.....ويجاملونه ويجاملونه.....حتى
يحس الكل انهم بيختنقون من المجاملة......


لماذا صرنا كعرب كذا ؟ من مستوى الفرد الغلبان المسكين والعلاقات الاجتماعية الى مستوى الوزراء والعلاقات السياسية وعلاقاتنا ببعضنا البعض اقول الله اعلم يمكن الله له حكمة في هالشيء


اما عني.... اجامل في المواقف العادية.....ولكن حين يتحول الموقف....
الى كذب ممل.....ونفاق مقيت......وقتها اعطي كاش..ما الضير
ان الشخص يقول الشئ الصحيح....في الوقت اللي
الكل يريد يخبي راسه......!

الموقف يطلب صاحبه....!

صدقتي في المقولة الموقف يطلب صاحبه وعلى قدر الموقف والتقييم الانسان يحدد كيف يكون الرد

شاكر لك المشاركة القيمة

[عروة]

ماله حل بوناصر :rolleyes2:

ماله حل نهائيا وشاكر لك المشاركة


كل واحد عنده عيوب محد كامل غير وجه الله

امثال بوناصر ياكثرما انشوفهم في حياتنا اليومية

الله يهديهم

اللهم امين اخوي بومحمد وشاكر لك المشاركة


السلام عليكم ورحمة الله وبركاته
ابوناصر وتيكثر اللي مثله يحب ينتقد الناس ويدوّر عيوبهم خاصة اذا فيه شيبان يابلفيت انه هو اللي على صح وكامل من العيوب اما لو كان ابوناصر معه ربعه الخاصين قروبه عادي ولا فيها شئ ولا احد يزعل من المزح
لكن اذا كان المجلس من كل شكل ولون الشرهه مب على ابوناصر الشرهه اللي اللي خلاه يتمادى وهو ان كل ما ابوناصر تطنز على واحد انسدح من الضحك والمسيكين ابوناصر معتقد انه مسوي جو يواصل (( ماحب هالأشكال )) وعلى فكره ترى غلطان من اعتقد ان ابوناصر ينصح تفكيره انه يضحك الموجودين ومن كثر مزحه قلّت هيبته.
تسلم ياصاحب الموضوع والله يوفقك.
الله يسلمك ياحلم قطري ويوفقنا جميع للخير وانا معاك بكل كلمة قلتها وهذي من مساوى بعض المجالس وخصوصا لما يصير بالسالفة تصفية حسابات او لما يحب بعضهم انه يسوي اكشن على حساب غيره هنيه يقع المحظور وشاكر لك المشاركة

[عروة]

صـراحة راعـي الشنـب يشتـاهل وراعـي الموتـر الجديـد بعـد يستـاهل ولكـن لو غـير الإسلوب للنصـح بيكون أفضـل ..

وعـن الفوالـه صـراحة مالـة حـق لـو يبي عصـير الله لايهينة يمـر علـى التمويـن وياخذ للمجلـس مافيهـا شـي ..

راعي الشنب مسوي شغل بالموضوع وشاكر لك على المشاركة اخوي منصور

[عروة]

الله يهديه -- ويصلحه

اللهم امين ويصلحنا ويصلح امة المسلمين وشاكر لك المشاركة

[J & N]

ياكثرهم

لوعه الواحد مايتمنى يتصبح بوجيهم

[مستثمر بسيط]

اخوي الكريم صاحب الموضوع بارك الله فيك
نقطة مهمة:
هناك فرق بين عدم المجاملة و بين الافتقار الى ابسط وسائل الاتصال مع الاخرين، وعلى راسهم احترام مشاعر الاخرين
تحياتي

[مرتبش]

اسلوب بوناصر يتبعه الكثير.. مايحشمون حد واخرتها يقول لك انا اللي على لساني اقوله.. يقول كل اللي في خاطره ويسب ويشتم بعدين بس في نفس الوقت لاتلوموني,, دلالة على الخبث والمكر اللي يغطيه بالغشامة والسذاجة والطيبة.

وعجبني المثل اللي ذكره اخونا الحمادي " استح من اللي يستحي منك ولا تستحي من اللي مايستحي منك"

[الحبتور]

والله يالربع عندنا واحد في المجلس مثله .. ودوم ماكل الجو !!!

ومسوي فيها ( ابو العريف )

[عروة]

ياكثرهم

لوعه الواحد مايتمنى يتصبح بوجيهم

الله يعين وشاكر لك المشاركة


اخوي الكريم صاحب الموضوع بارك الله فيك
نقطة مهمة:
هناك فرق بين عدم المجاملة و بين الافتقار الى ابسط وسائل الاتصال مع الاخرين، وعلى راسهم احترام مشاعر الاخرين
تحياتي

معاك على الاقل نحافظ على ادني حد من احترام مشاعر الاخرين وشاكر لك المشاركة


اسلوب بوناصر يتبعه الكثير.. مايحشمون حد واخرتها يقول لك انا اللي على لساني اقوله.. يقول كل اللي في خاطره ويسب ويشتم بعدين بس في نفس الوقت لاتلوموني,, دلالة على الخبث والمكر اللي يغطيه بالغشامة والسذاجة والطيبة.

وعجبني المثل اللي ذكره اخونا الحمادي " استح من اللي يستحي منك ولا تستحي من اللي مايستحي منك"


شكله المثل بيشتهر عن طريق المنتدى وصدقت كل واحد نعامله بمثل اسلوبه بس اهم شيء لا يطغى عقب اسلوبه علينا ويخربنا وشاكر لك المشاركة


والله يالربع عندنا واحد في المجلس مثله .. ودوم ماكل الجو !!!

ومسوي فيها ( ابو العريف )

ابو العريف هذا جايه الدور عندنا واحد بهالاسم جايه بموضوع ثاني ان شاء الله وشاكر لك المشاركة

[قناص الخليج]

يوم قريت اسم ابو ناصر شكيت بعمري :)

انا برائي بعض المواقف لازم تعطي كاش تكون ابو ناصر ثاني

اما في مواقف لازم المجامله احتراما لشعور الاخرين وعدم احراجهم :victory:

[ام سلمى]

كفو ((( شنب ))) اي والله ليش حات شنبك الواحد منهم كنه بنت حلال ماتفرق بينه وبين اخته وهذاك ليه ماسلم((امحق سياره)) ,,, وهذاا ليه مايكرم ضيفانه جعله الساحق ..

هذي الرجاجيل السنعه.... الا انتو اللي صرتو تشوفون الغلط وتسكتون لمصالح شخصيه ولا لو انت اقوى منه ولا مالك عنده حاجه كان قلت اللي فخاطرك فوجهه ....

بس صرتو ناس ماتهمكم الا المصالح الشخصيه...

وعلى قولتك الايجابيات اذا كلكم سكتو ماراح يكون فيه ايجابيات...


كفو يابو ناصر ((( يصب السمن على يمناك )))..............

[الكلاسيكي]

والله انه رجال في ذمتي
والي يدل على ذلك ياجماعة الربع صراحته وعدم مجاملته للحضور، وغريبة ان الناس فقط يستحون من بعض بعضهم وليس من ربهم، هو رجل صريح ومتربي على الصراحة وماعنده سوالف الحش والقرض والغيبة والنميمة والي للاسف مجالسنا قامت تتميز بها.

مثل شخصية بوناصر يقولون عنه انه ملغ او بذي ....الخ
وليش مايقولون عنه صريح يعطي بالصميم.

[عروة]

يوم قريت اسم ابو ناصر شكيت بعمري :)

انا برائي بعض المواقف لازم تعطي كاش تكون ابو ناصر ثاني

اما في مواقف لازم المجامله احتراما لشعور الاخرين وعدم احراجهم :victory:

الاتزان والوسط حلو واحيانا الشدة مطلوبة في بعض المواقف وبعض الاشخاص وشاكر لك المشاركة

[عروة]

كفو ((( شنب ))) اي والله ليش حات شنبك الواحد منهم كنه بنت حلال ماتفرق بينه وبين اخته وهذاك ليه ماسلم((امحق سياره)) ,,, وهذاا ليه مايكرم ضيفانه جعله الساحق ..

هذي الرجاجيل السنعه.... الا انتو اللي صرتو تشوفون الغلط وتسكتون لمصالح شخصيه ولا لو انت اقوى منه ولا مالك عنده حاجه كان قلت اللي فخاطرك فوجهه ....

بس صرتو ناس ماتهمكم الا المصالح الشخصيه...

وعلى قولتك الايجابيات اذا كلكم سكتو ماراح يكون فيه ايجابيات...


كفو يابو ناصر ((( يصب السمن على يمناك )))..............

الموضوع كل واحد يشوفه من زاوية ووجه نظر يا ام سلمى الى فلان يشوفه صح 100% غيره بيشوفه خطأ او فيه تقصير وهذي طبيعة الانسان مختلف ولكل واحد رايه ومبادئه فيمكن يكون تصرف بوناصر من وجهه نظرك صح وهو المطلوب وغيرك يشوفه خطأ بس نرجع ونقول الاتزان مطلوب وخصوصا في ايامنا هذي الى فيها المقلوب صار معدول بنظر البعض وشاكر لك المشاركة الطيبة

[عروة]

والله انه رجال في ذمتي
والي يدل على ذلك ياجماعة الربع صراحته وعدم مجاملته للحضور، وغريبة ان الناس فقط يستحون من بعض بعضهم وليس من ربهم، هو رجل صريح ومتربي على الصراحة وماعنده سوالف الحش والقرض والغيبة والنميمة والي للاسف مجالسنا قامت تتميز بها.

مثل شخصية بوناصر يقولون عنه انه ملغ او بذي ....الخ
وليش مايقولون عنه صريح يعطي بالصميم.

ترا انا قلت في الموضوع او المشاركات انه مب شرط البعض يفسر تصرفات بوناصر على انها تجريح او انتقاص من الاشخاص ممكن نفسرها مثل مافسرتها انه انسان الى في قلبه على لسانه وارجع اقول نفس المشاركة الى فوق هذي الاتزان طيب وتوصيل الملاحظات بسيط لكن الطريقة الى تفرق بين البشر وشاكر لك المشاركة الطيبة

[الموضوعي]

انا مره جاني واحد المجلس شخص مثل نوعية بو ناصر عطيته فنقر مع الباب هالاشكال مالها الا النعال

[عروة]

انا مره جاني واحد المجلس شخص مثل نوعية بو ناصر عطيته فنقر مع الباب هالاشكال مالها الا النعال

شاكر لك المشاركة والله يعينه مالحق ياكل الجو

[احمــــد]

يعطيك العافية

[عروة]

يعطيك العافية

الله يعافيك وشاكر لك المشاركة