قصة وليده اللحظة من تأليفي مع الاشعار :-).......يشرفني مروركم

[شاعر اللحظات]

صراحه طرأت علي هالفكره قصه وقصيدة معها بعض الابيات المصاحبه للموقف وهي باللهجه العامية وانشالله تعجبكم ....وكلها تأليفي وأبي رايكم :-)


القصه عن شخص متعدد المواهب اسمه صويلح .....وصويلح هذا خريج ثانويه مع مرتبه الشرف وحب الخشوم .... من النوع اللي ماياخذ دور ثاني الا في الانجليزي مايحب شي اسمه لغه انجليزية .....المهم اخونا في الله بعد ماخلص الثانويه كان طموحه مدير عام واذا مافيه واسطه مساعد مدير ..... ولكنه تفاجاء بالواقع لحد ماتقلص طموحه وصار حارس أمن في احدى الابراج المتناثر في اطراف الكورنيش ...
وفي يوم من الايام وكان الاخ ماسك زام ليل وجالس يقراء مجله شعبية معروفه طبعه 1992 لانه يحب المجلات الشعبيه القديمه واذا سألته ليش يقول الشعر من اول غير .... مسوي فيها ناااااااقد الاخ ....
وكان عليه قطات شعريه حلوه المهم وهو جالس غمض عينة ورجع الكرسي على ورا وحط رجوله على الطاوله وقال :-
ياهم ماترحم صدور الرجاجيل
حارس امن وانا مخلص دراسه
وغيري محصلها من الحط للشيل
مافيهم اللي يقدح الطيب رااااسه

وفجاء وبدون سابق انذار ومع التأثيرات الصوتيه السينمائية :nice: رد عليه صوت على شكل صدى وقال :

ياللي شكيت الهم شب القناديل
لايزعجك انك موظف حرااااسه
لايام تمضي والبقا في المقابيــل
ماعاد ندري ويش تعني ونـــاسه

ومع نهايه القصيدة وتلاشي الصدى رفع صويلح رجله من الطاوله وطاح من الكرسي على جنبة وقوم مره ثانيه وانبطح بعد ماطلع المسدس وهو يقول سلم نفسك سلم نفسك خخخخخخ متأثر بالافلام المصرية :tease:

ورد عليه الصدى وقال : بلا بشكلك انت قالب المسدس ....وبعدين مافيه رصاص تقص علينا
وقام صويلح يتفحص المسدس الا فعلا مافيه ولا طلقة وبعدها رجع وراء شوي شوي لحد ماوصل لزاويه الغرفه وقام يسحب نفسه الي تحت وجلس جلسه القرفصاء وحط يده على راسه (( حركاااااات يبي يكسر خاطر الصدى لووول ))
وقال بصوت متكسر وحزين .....

ياصدى تكفى ترى قلبي حزين
لاتسوي شي يعمل لي فضايح

ورد عليه الصدى وقال :

ياصويلح وانت محبوب ورزين
بس انا موجود اهدي لك نصايح
وبعدها قال صويح تكفى ياصدى انت اكتروني ولا طبيعي (( ياحبه للفلسفة حتى وهو خايف ))

وهنا ضحك الصوت وقال انا مارد الغوري ....

قاااااااال صويلح مارد الغووووووووري اي غوري ......
قال غوري الكرك اللي عندك على الطاوله (( وهز المارد الغوري هزتين )) وقال : هاه شرايك

قال صويلح يعني انت مثل مارد المصباح اللي ينفذ الطلبات ويحقق الامنيات

قال مارد الغوري : انت افرك خشه الغوري خلني اطلع وعقبه نتفاهم
قال صويلح :
اول حـــــــاجه كان فعلا تستطيع
نفذ اللي قبل تـــــــــطلع بطلبــــــة
كان تبغي تشوف هالكون الوسيع
حقــــــــــق اللي بالورق لك بكتبه

وكتبت طلباته كلها على ورقة صغيره وقام يدخلها مع خشم الغوري على المارد وقعد ينتظر شوي الا الورقه طالعه عليه من نفس المكان ومكتوب فيها

يالمفهي ... ماقدر اسوي لك وانا في الغوري ومع ذلك بارد عليك :

كان تبغي الخير مع رد الصنيع
واي شي في خيالك تحســـــــبه
ابشر انه صار يالوجه الشنيع
واللي تكسب به توكل والعــبه

وبعد ماقراء صويلح القصيده فهم من معناها ان المارد يبي يطلع من الغوري
وانه ماراح ينفذ طلباته الا لما يطلعه
المهم صويلح مسك الغوري وقام يمسح على جنب الغوري ويمسح ويمسح والمارد ماطلع
واندبلت كبد المارد وفتح غطاء الغوري وقال له ..... ياأأأخي ماتعرف تسوي كذا :eek5:
خخخخ يعني قصده افتح الغطاء وانا بطلع وش له تمسح على جنب الغوري .....

قال صويلح على بالي مثل المصباح .....
قال المارد : ياااغبي هذا النظام القديم الحين تغير السستيم افتح الغطاء وانا اطلع طول

وشال صويلح غطاء الغوري الا المارد طالع وكان شكله عجيب غريب

كان لابس غتره عاصبها على راسه ومسوي سكسوسه وفاتح جيبه وفي يده سلسه يلعب فيها ...صراحه شكله عربجي ....
قام صويلح يطالع فيه و قاااال صراااااااااااحه شكلك عجيب بس عندي سؤال : شلون كنت تحدد السكسوكه في الغوري (( خخخخ يموت في الفلسفه )):nice:وبعد ذلك .....


تابعونا البقية بعد ماناخذ راحه

[البنـدري]

ههههههههههههههههه

( ياحليل صويلح )

شاعر اللحظات عشنا معك لحظات جميلة

بانتظار تكملة القصه والمحاورة الشعرية

[Sari]

ههههههههههه
خانه الحظ صويلح والمسكين مخلص ثانوية:shy:

[شاعر اللحظات]

وبعــــــــــــــــــــــــــد ذلك ..... بعد الردود الطيبه

ترى القصيده كلها وليده اللحظه لوووووووول

[عابر سبيل]

وبعــــــــــــــــــــــــــد ذلك ..... بعد الردود الطيبه

ترى القصيده كلها وليده اللحظه لوووووووول


و ان ما جاك الا ردود "عبط"!!!
تهقا....بينفذ المارد وعوده
و لا "بيزنط" صويلح!:happy:

---

قبل ما امشي...
امي تسلم عليكم و تقول نبي "فلج"
و سجله علبينا سلفescape

ما فييييييييييييييييييييييييك حيله....
باتظارك ليييين اخر ال"لحظات"!

[لامار]

\
/


إبــــداع يــســتــحــق الــوقـــوف أمـــامــهـ . .

نــص جـمــيــل بــل رائــــع . .

شــكــراً لـكـ




لامــــار


\
/

[شاعر اللحظات]

تكملة ...




قال المارد لصويلح .....الحين أمر تدلل ويش تبغي ياصويلح ......

وبسرعه وبدون تفكير قال صويلح : تكفى يامارد ابغي كامري 2006 ( وجه فقر )
ضحك المارد وقال : وليش 2006 ماتبي اصفار
ابتسم صويلح وقال : اول مره اشوف مارد غبي ..... ياااااخي علشان ماحد يشك (( روووح ياصويلح يابو الفلسفة ))

قام المارد يحك راسه وقال : ياصويلح صراحه ماقدر .. الاسهم نازله والحاله حاله ....وفودا فون خيبت ضني .... اذا بطبطه بحااااااااااول ....وترى بكسر الوديعه علشانك

قال صويلح : الشرهه ماهيب عليك الشرهه علي اللي طلعتك من الغوري المفروض اخليك تخيس فيه ...
مارد ومارد وتهايط علي واخرتها تقول لي بكسر لك وديعه واشتري لك بطبطه

وتنفس صويلح الصعداء وقال :

عزالله ان الوقت ماهوب مضبوط
حتى انت يالمارد من الضيق مشنوق
والله مالومك لاضرب وقتك السوط
مدام يحكم حالتك حالة الســـــــــوق

ونزل المارد راسه وقال :

ارجوك ياصويلح قبل اقطع الشوط
ثمن كلامــــــــــك زين ياقمه الذوق
الصدر من همه غدى قدر مضغوط
حتى الفرح من عين ماردك مسروق

وبعدها قام المارد يبكي ودموعه اربع اربع
وهنا انكسر خاطر صويلح وراح للمارد وقام يلمه ويبكي معاه
ويقول بس بس قطعت قلبي الله يسامحك

خلاص بسلفك :omg:

قام المارد ومسح دموعه بطرف غترته وقال : تسلم ياصويلح انا مابيك تسلفني بس انا لازم اخدمك مممممممم شرايك ادير لك محفضتك في السوق وتعطيني 10 في الميه من الارباح

توقعاتكم ويش قاااااال صويلح يتبع

[عابر سبيل]

تكملة ...



يتبع [/SIZE]


و احن ناطرين....ليييين اخر مقطع...

"خخخخخخخخخخخ" و الله مدري الورطه صويلح
و لا هالمارد بو قفل...و راسه اقرع:omg:

سيروا و نحن "نقرقع" من وراكم;)

[هتـان قطر]

عجييييب يا شاعر اللحظات..

صح السانك..

شكل صويلح احسن حال من المارد..

وما اتوقع ان المارد بينفع صويلح..الا بالعكس

ناطرينك

[مطيع الله]

أخيراً.....
اكتشفنا حسنة للشركات الأمنية

شكراً يا مبدع

[عابر سبيل]

توقعاتكم ويش قاااااال صويلح يتبع [/SIZE]


اتوقع ان المارد
بيقدم حق صويلح لعبة Lego "تركيب"

http://www.tabletownonline.com/images/aladdin/aladdin01.jpg



مطلوب اكمال المشهد في الحال
و العاجل القريب...

تقريبا..5 سنين ما ضحكت مثل الضحك اللي جاني
من ورى هالقصة...

الله ياجرك كل خير ي خوي شاعر اللحظات

[شاعر اللحظات]

اتوقع ان المارد
بيقدم حق صويلح لعبة lego "تركيب"

http://www.tabletownonline.com/images/aladdin/aladdin01.jpg



مطلوب اكمال المشهد في الحال
و العاجل القريب...

تقريبا..5 سنين ما ضحكت مثل الضحك اللي جاني
من ورى هالقصة...

الله ياجرك كل خير ي خوي شاعر اللحظات



هههههههههه اخوي عابر .... شكلي باخلية مسلسل مكسيكي هههههه

لاتخاف انا الحين اتكتك الباقي

[شاعر اللحظات]

تكملة ...

قال صويلح ... ياولد فكني في شرك ... مابيك تدير لي محفظة ولا غيرة ... مالعب في السوق الا انت واللي مثلك ...

انا عندي طلب .. صح انك مارد وتقدر تروح اي بلد بدون حجز تذاكر وخرابيط ... يعني ترجع خطوتين وراء وعقبها تشلع روحك بالهواء مره في لندن ومره مصر ..

المارد غمض عين وفتح عين بطريقة المترقب ... وهو يقول ايه كمل كمل

قال صويلح : شرايك يالمارد انا اجازتي تبدء اول شهر تسعه ابغيك توديني النمسا يقوولون اهل قطر مطيحين فيها وان جوها بارد ...

بقق المارد عيونه وقال : وانشالله على حسابي ..

اسمع ياصويلح انت صراحه خوش رجال وطيب وحبوب بس مشكلتي ماقدر اوديك معي

قال صويلح ليشششششششششششش

قال المارد : مايسمحون لي بالعفش الزايد .. اذا تبغي تروح الحسا انا حاااااااضر ...وعلى سيارتي بعد

وهنا قال المارد :

صلوح اسف على حضوري
شكلي معك بفقد اعصابي
طلعتني جد عن طـــــــوري
تبغي تسافر على حســـابي ؟؟؟؟؟؟؟

وهنا رد صويلح في الحال وقال :

لاتقول اسف ولا ســـوري
ياماردً صـــــار نصـــــــابي
محبوس في داخل الغوري
والضن في ماردي خـــابي


هنا قام المارد يحك راسه ويلعب في سكسوكته وقااااااااااال :

[هتـان قطر]

وش قال ..؟؟؟

:secret:

ذكرتنا بديده حبابه وجودر

:nice:

[محمد السالم]

وش قال ؟

[لوجين098]

كل التوفيق

[العذبي]

وش قال

متابع عن بعد

[البرجوازي]

وش قال ويا سكسوكته

[البنـدري]

شقااال :anger1:

[qatar.1995]

وش قااااااااااااااال

[شويهينــه]

ههههههههههههههههه

والله انك عجيب

كمل شقال المارد

[شاعر اللحظات]

قــــــــــــــــــــــــــــــــــــــال :

ياهـــــــــوة لاتكثر هروووجك
مقـــــرود والاخ يــــــتمـــــيلح
ياقــــــو راسك ويــــــاعـوجك
الغــــــوري أرحم من صويلح

وسكت شوي وثم قـــــــــــــــــــــال :

صويلح اسمع انا عندي حل وصدقني بيعجبك وبتشكرني عليه ... لان هالحل هو اللي بيضمن مستقبلك الضايع

قال صويلح : تكفى يالمارد الحقني ترى والله اني ضايق وحالتي حاله

قال المارد : شرايك في هالبرج اللي انت تشتغل فيه ..

قـــــال صويح بذهول : لايكون ناوي تعطيني اياها ولا تسجله بسمي .... الكامري ماقدرت عليها بتقدر على البرج

قال المارد : يالدلخ من قال بعطيك اياها ... انت شايفني بنك ....

قال صويلح : زين وش فيه البرج

قال المارد : شرايك اخليك مدير ادارة وفي المكان اللي تبيه .

قال صويلح : تتكلم من جدك ..بس انا ماعندي مؤهلات ماعندي الا ثانويه وبالدز بعد ..

قال المارد : ومن قال لك ان مدير الادارة يحطونه في هالمنصب علشان مؤهلاته ..
قال صويلح : عيل علشان شنو ..

قال المارد : علشان علاقاته ...والمثل يقول اذا حبتك عيني ماضامك الدهر ... وياكثرهم مدراء الادرات اللي مايعرفون ويش الطبخه وانت طبعا بتكون مثلهم بعد ماضبطك طبعا .

قال صويلح : شلوووووووووون

قال له المارد : عندي ولد عم شقردي مضبط مع المدير العام وللعلم المدير العام ماعنده الا ابتدائية
قال له صويلح : وانا بتحطني مدير عام .... قال المارد : لا طبعا مدير عام صعبه بحطك رئيس قسم بالوكاله

قال صويلح ويش معنى ولد عمك ساعد الشخص اللي صار مدير عام

قال المارد : ياخوي انت شفيك الزمن تغير هذا ايام الطفرة ... الحين الوقت تغير الجهات الرقابية مبققه عيونها

قال صويلح ااااه الحين عرفت ..

وترجل بهالابيات :

ياعين لاتبكين ياعــين ياعين
الـــــدمع مهما صار لتذرفينه
انا مواطن منكسر عاتقي دين
مدري المواطن كيف بيسد دينه
فرد عليه المارد قائلا والدمعه في حايرة في عينه :

جلست والخوف بعينيها ،، تتأمل فنجاني المقلوب

قالت يا ولدي لا تحزن ،، فالهم عليك هو المكتوب
خخخخخ لالا امزح معكم .... المارد قال .... بس لاتعلمون احد :

الاجنبي راتبه فـــــــوق الثلاثين
وصلوح سبع الاف عقب الزيادة
دامك مواطن انت ملزم بهمين
هم الديون. وهم ذبح الااردة

وهنا سكت صلوح شووووي وقال

[هتـان قطر]

وش قال صويلح بعد..؟؟




:telephone:



شاعر اللحظات ..احييك على هالاسلوب اللي باسميه

السهل الممتنع..:)




بعد الويكند بنشوف صويلح وش قال

[عابر سبيل]

قال له صويلح : وانا بتحطني مدير عام .... قال المارد : لا طبعا مدير عام صعبه بحطك رئيس قسم بالوكاله
قال صويلح ويش معنى ولد عمك ساعد الشخص اللي صار مدير عام

قال المارد : ياخوي انت شفيك الزمن تغير هذا ايام الطفرة ... الحين الوقت تغير الجهات الرقابية مبققه عيونها

قال صويلح ااااه الحين عرفت ..




وهنا سكت صلوح شووووي وقال



المفروض ايقول صويلح...
الا ممن رداة حظي ...
غوري كرك و تطلع منه انت يا الجني المجنون..
و ينشد ايقول:

كل ما دقيت في ارض وتد
من رداة الحض وافتني حصاة

من قبل عامين معطيني وعد
للأسف اليوم ينكر ما حكاه

ليتني ما زلت طفل بالمهد
لاهي ساهي عن الهم وبلاه


لكن تدري....حمار الجت و اسمي رئيس قسم بالوكالة..
احسن من ناطور...ماله وزن و لا ينسمع مقاله!

-------------


(و تسلم يا وسيع الصدر...
شوفني انا 24 اورز ناطرك بس ....)


توكل على الله يا ملهم "اللحظات"! شبيقول صويلح
هالتلخ....الله يستر ...شكله بيفشل هالمارد و بيبهدل
الادارة اللي بيحطه فيها...
نصيحه للمارد..هالنوعية ان عطيتهم ويه....بطوا البرمة!

يعني يمكن ينسجن هالمارد بسبة صويلح...و يطلع ال"شقردي"
و ربعه سالمين:secret:

[راشد محمد]

ننتظر الباااااااااااااقي

[محمد السالم]

ووش قال صويلح ؟

[بوراجي]

ابداع ياشاعر اللحظات

وننتظر وش قال صويلح

[bshayer]

وبعدها قال صويح تكفى ياصدى انت اكتروني ولا طبيعي (( ياحبه للفلسفة حتى وهو خايف ))

ههههههههههههههههههه:nice:

فنان .:victory:..
كاني اشوف فليم مناحي ..:nice:

..............

لاتتأخر نبي نعرف ويش قال صويلح ..

[البنـدري]

الله عليك ياشاااعر

والله اني اعيش جو ثاني كل ما اقرا قصتك

بانتظار القصه المكسيكيه للنهاية ^.^

ياخوفي يجي عيد الاضحى اذا الله أحيانا وعاد القصه ماخلصت :d

[oldqtr]

ياشــاعر اللحظات وينك من ايام . . . . .
. . . . . نبغي علوم صويلح ووش حصل له
عاده معا غوري ومارد وأحلام!؟ . . . . .
. . . . . وإلاّ تحـــقّـــق كـــل مـاراد .. كــلّه

[شاعر اللحظات]

ياشــاعر اللحظات وينك من ايام . . . . .
. . . . . نبغي علوم صويلح ووش حصل له
عاده معا غوري ومارد وأحلام!؟ . . . . .
. . . . . وإلاّ تحـــقّـــق كـــل مـاراد .. كــلّه


هــــذا صويــــلح يزرع الواقع الغام
لاشــــك في بعض المـــــواضيع علة
ربــــي عطاه الرزق من أول العــــام
وحـــظة تردى عقب مــــــاكان فــــــلة

[شاعر اللحظات]

احم احم
تكملة ......واعذروني على التأخير .....



وبعد ماقال المارد ابياته المعهودة ..
سكت صويلح شوي ونزل راسه واطبق جفنية وجلا ---------> روح يالعربي ههههه
وقال :

الاجنــــبي في ديرته مسكنه طيــــن
بيمــــوت ماشاف الرخــــا في بلادة
يعنــــي لانه يرطن الانجلش زيـــــن
فكـــــوا عليه من النعايم مـــــدادة
وقـــــال : يالمارد خلها على الله .... ويش تبغينا نسوي لاتعليم زي الناس ولا واسطه تعدل الوضع

قــــال المارد : ياصويلح انت صراحه شقردي وحبوب وطيب ... بس تبغي الصدق انا لو انا مدير عام بذمتي ماحطك حتى فراش

قال صويلح : ليش يامال العـــــافية انت شايف فيني قصور ... والله اني قدها وقدود على الاقل احسن منك ....
انت لو فيك خير ماحطوك في غوري ... ياتفلة اللبتن

هنا قال المارد : صويلح ياصويلح لاتصير بزر ترد بسرعه ... خلك جنتل ورد بعد عشر دقايق ربع ساعه ماهوب شرط في الحال ترد ..
انا قصدي ياصويلح بالعربي ولا تزعل مني... انت شكل يفشل ... انت شفت وجهك اول مره اشوف واحد يسوي تسريحه حق حواجبه ... ولا اسنانك كأنهم بزران يركضون نازلين من طعس ...انت شفت شنبك ياصويلح ... كأنه شبك ابو عقيدة ...
ياصويلح انا ماسبك ولا استلمك ياخوووي سمكر وجهك علشان الناس تنفتح نفسهم لما يشوفونك ... انا ترى اول ماشفتك بغيت ارجع للغوري لانه الغوري ارحم ...بس شاسوي السيناريو يلزمني انفذ طلباتك ..

قال صويلح : يالمارد يالعلة انت وش عرفك بــ dirty face (( روووح ياصويلح والله مانت بسيط )) هو اعجبه ال dirty face لانه أأأأوفر خخخخ

وهنا قال صويلح :

وشفيك يالمارد تعلــــــــق علينا
ماتشوف شكلك ياحمار القوايل
حنا اللي منا غزينـــا غزينــــــــا
ماردنـــا صعب الزمن والهـــوايل
قال المارد

ماني بحلو لاشك فينــــا وفينا
لمســـات حلوه بالشكل والجدايل

وهنا قال المارد : بليز ستوووب خلاص ياصويلح ... مابي اتقاشر معك

خلني اساعدك واتوكل على الله ..

قال صويلح زين متى اعطيك اوراقي ..

قال المارد : ههههه شدعوه اوراق كلها ورقة وحده ولعن خيرها تصوير لووووول
المهم عطني الاوراق وانا بكره رايح لهم وانت تأمر امر ياصويلح

قال صويلح : اشهد انك ذيب يالمارد ... اول مره اشوف مارد شقردي .... (( بالعدااااال الاخ مطيح معاهم هههه ))

ولما جاء بكــــرة وراح المارد علشان يتوسط لصويلح ... تدرون ويش صار

[البنـدري]

شصااار..؟


تدري كلهم كوم وهذا بكوم


ولا اسنانك كأنهم بزران يركضون نازلين من طعس


هههههههههههههههههه عجبني :p اتخيل شكله

[be.happy]

ههههههههههههههههههههههههههههههههههههههههههههههههه
والله انت عجيب ..... وفنان ... انت كذا تحمسنا ... وتغرينا ... لانه فعلا ابداع ... وبنطالبك بعدين بيوميات المارد وصويلح ...

[عابر سبيل]

اذا ترخص لي يا شاعر اللحظات...
انا سجلت في كمبيوتري كل هالحوار..

ان ما كان عندك مانع...بحتفظ فيه..
بس اذا تحب تحتفظ في حقك..فهو من حقك..

و ان تبي ندفع لك...و لا ايهمك..اطلب من مارد الغوري
خله يصرف لك كل يوم 5 كرك...
و خله يحاسبني عالكردت كارد...
ماستر (جولد) و لا فيزا (رنقول)..
بس لين الحين ما عندي
دينرز كلب:weeping:.

[شاعر اللحظات]

اذا ترخص لي يا شاعر اللحظات...
انا سجلت في كمبيوتري كل هالحوار..

ان ما كان عندك مانع...بحتفظ فيه..
بس اذا تحب تحتفظ في حقك..فهو من حقك..

و ان تبي ندفع لك...و لا ايهمك..اطلب من مارد الغوري
خله يصرف لك كل يوم 5 كرك...
و خله يحاسبني عالكردت كارد...
ماستر (جولد) و لا فيزا (رنقول)..
بس لين الحين ما عندي
دينرز كلب:weeping:.



ههههه اشكرك على المتابعه ياعابر ... وتعجبني تعليقاتك الحلوه
اما بالنسبة للقصة وراعي القصة فدوووووه يالغالي

بس حط صورتي اخر الغلاف مع كلمه المؤلف ههههههه

[ROSE]

رااااااااااااائع ماشاء الله عليك

فعلا مبدع في السرد وفي القصيد

متابعه ولا تطول

الله يجزيك الخير خليتنا نضحك ونتابع ونتشوق عشان الجديد :nice:

[هتـان قطر]

شاعر اللحظات يالمبدع..

مازلنا بالانتظار..فعلا تشوييييييق :)


ويش صار للمارد لما راح يتوسط للمقرود صويلح..؟؟؟

[عابر سبيل]

ههههه اشكرك على المتابعه ياعابر ... وتعجبني تعليقاتك الحلوه
اما بالنسبة للقصة وراعي القصة فدوووووه يالغالي

بس حط صورتي اخر الغلاف مع كلمه المؤلف ههههههه


و هاي المتوفر عندي من احدث صور المؤلف

http://crazedwriter.lbbhost.com/stills/sultan.jpg

ليقوتك الغوري الاصلي عاد...
ليشوفه المارد بيشرد تراه عن اصويلح!
و انتم احنا معلقين اهنيه
:pic::tomato:

[شاعر اللحظات]

على بركة الله نبدء :nice:


المهم المارد قرر انه يتوسط لصويلح .... واتفق معاه يخلية رئيس قسم ... والمارد قايل حق صويلح اني باخليك حاليا رئيس قسم بالوكاله علشان عيون الناس ....
وصويلح شارط على المارد انهم يعدلون وضعه ... ولازم يخلونه من كبار الموظفين بغض النظر عن قانون الموارد ..

وفي الصباح الباكر لوووول (وش حليلي وانا اتكلم بالفصحى) :victory:
قام اخونا المارد من النوم وعنده النيه ينفذ طلب صويلح .....

وطلع في الشارع وركب اول باص حق كروه وتمشكل معاهم المسكين لان الفلوس اللي عنده
على عصر السلطان سليمان العثماني طبعه سنه 946 هجري بس كان فيه بنغالي ذكي دفع حساب المارد واخذ الفلوس اللي عنده (( وعلى طول المتحف الاسلامي )) يعرفون صيداتهم

ونزل المارد المسكين من الباص وهو يتمتم ويقول :

لبست من برد الشقا الف فــــروة
وعثرت من همــــي وانا كنت عالي
صارت مشاويري على باص كروه
ويدفع حساب الذيب هندي وبنـــغالي

واسمعه باكستاني وقـــــــال :

رفيق انتا جد معلوم واجد زين
لكن هازا وقت واجد بروبلم
راحه نهي فلوس كلوا دين دين
لازم من المشكل تعيش وتعلم

المهم المارد نزل على الكورنيش وركب مع تاكسي علشان يوصله للبرج اللي يشتغل فيه صويلح

هذا ماصار مع المارد

اما صويلح ...

فالاخ طنش للدوام والاحلام الورديه تقدح في راسه ..

يتصل له مسؤول الزام ... الووووو صويلح وثول وينك من الدوام
يرد صويلح مرخم الصوت : خير خير ... وشو له متصل هالحزه اشهد انك فاضي

المسؤول : صويلح اذا ماداومت ترى بنخصم عليك ثلاث ايام

صويلح : اقول يالاثول اذا ماصكرت التليفون الحين ولا ترى بطلب منهم يسوون لك نقل الي مضخه التناكر اللي في الصناعيه .... شكلك ماتدري من تكلم...اقراء التعميم اللي بينزل بكره وابلع العافيه

هنا سكت المسؤول وهو يبلع ريقه وقام يفكر ويقول في نفسه : تعميم ...اكيد فيه شي بيصير
وهالوزارة كل شي جايز فيها .... لايكون بيحطونه وكييييييييييل ..... ياوووووووووويلي
لازم اضبطه قبل لاخربها معها

وهنا قال المسؤول : خلاص صويلح اعذرني اعذرني انا اسف كنت معصب شوي
عموما افا والله عليك انا بغطي عليك اسبوع

قال صويلح : يالله فارق ولا عاد تزعجني

وسحب البطانيه من فوق بطنه وحطها على راسه وانطبح يبي يكمل نومه العميق
وهو يترنم ويقول :

بكره يزين الحظ واصير مســــــؤول
ويمكن اذا طورت شــــــغل الوزارة
اللي اريده ايتنفذ على طــــــــــــــول
ويمكن اصير اطلق شنب في الادارة

وقبل لاتغفى عين صويلح الا جواله يرشخ رنه وتسكيرة

وشاف الرقم وطنشه يبي يكمل نومه واحلامه الورديه

الا ذاك المسج واصله مكتوب فيه : صويلح رد انا المارد

ويقوم صويلح من السرير ويطيح على جنبه وهو يرقص ويقول سواها قلبي ههههه اوه قصدي يقول سوااااااها المارد سواها المارد يحيى العدل يحيى العدل

المسكين المارد ماعنده رصيد يتصل لصويلح (( المارد مقحط ))

المهم اتصل صويلح على المارد وهو متلهف يبي يشوف اي قسم بيعطونه

ويرد المارد : هلا صويلح

قال صويلح : بشر ياحلى مارد

قال المارد : تكفى ياصويلح افزع لي

قال صويلح : شفيك

قال المارد وصوته حزين : انا يوم ركبت التكسي كان فيه نقطه تفتيش عند الدوار
وامسكوني الشرطه وخذوني للابعاد يقولون ماعندي اقامه وااعتبر هارب ولازم يحضر كفيلي
تكفى ياصويلح ماعرف الا انت
وترجل المارد بهالابيات :
تكفى وتكفى يارفيق المعزه
دمعي تحدر فوق عيني سكايب
لو كان في راسك مكاسيب عزه
طلع رفيقك من سجون المصايب

وقااااااااام يبكي والضابط يقحز له .. والمارد يقول تكفى يالضابط انا مارد الغوري امر تدلل باخليك عقيد بس طلعني

وصويلح المسكين عيونه شاغرة ويطالع في السقف ويقول :

جيتك ياعبدالمعين تعين .............................. والباقي اكملوا الفراغ


وهنا خلصت القصه والمارد المسكين للحين في سجن الابعاد وصويلح صكوه بخصم عشرين يوم لوووووول

[شاعر اللحظات]

ارجو من ادارة المنتدى نقل الموضوع الي استراحه المنتدى

[البنـدري]

:omg:

هو مارد شلون صار له هيك :tease:

شاعر اللحظات

عيشتنا معك أجمل لحظات .. وشوقتنا صراحه عشنا اللحظه بوقتها :)

شاعر اللحظات

نبي منك توعدنا بقصه جديده أحلى ومافيها كسر للخواطر :(

[المهاجر]

ارجو من ادارة المنتدى نقل الموضوع الي استراحه المنتدى


تم النقل اخوي

يعطيك العافيه على الموضوع الممتع والشيق

[عابر سبيل]

جزاك الله خير...
فرحتنا بعودة الموضوع بكبره...
و احزنتنا بانتهائه!!!..

في انتظارك و انتظار ابداعك يا شاعر اللحظات..
و كل اللي في جيبك و عبقريتك...هاااااااات.

*
*
،،

اقتصادي سياسي دبلوماسي عسكـري داهيـة وريـادي
فكاهي و جاد خفيف الظل يا شاعر اللحظاتي!

[أمير المحبه]

رووووووووووووووووووووووووووووووووووووووووووووووووو وووووووعه

ماشالله عليك ياشاعر اللحضات

وننتضر قصه جديده يا فنااااااااان :victory:

[شاعر اللحظات]

انتظروا الجديد

[ROSE]

ههههههههههههههههههههه

حسافة كملت القصة كانت فعلا ممتعه وجميله جدا

وعليه عليه صويلح ولا اول مره اشوف مارد بجوال بدون رصيد ههههههههههه

[بوخالد911]

تسلم اخووي

ولاهنت

[شويهينــه]

هههههههههههههههههههه

عيل المارد طلع عبدالمعين

الا يامن شرى له من حلاله عله

يعطيك العافيه ياشاعر اللحظات

وننتظر جديدك في رمضان