المساعد الشخصي الرقمي

مشاهدة النسخة كاملة : اخطاء في البناء او الديكور ندمت عليها بعد الانتهاء.. شاركنا بتجرتك !!



الـخـور
07-08-2009, 03:23 PM
http://static.howstuffworks.com/gif/5-diy-mistakes-1.jpg

السلام عليكم ورحمة الله وبركاته


من منا لايخطئ .. والانسان صراحة يتعلم من اخطائةه

احب افتح هذا الموضوع للنقاش حتى نستفيد من اخطائنا واخطاء من سبقونا في البناء
وراح اتكلم عن تجربتي مع بيت الوالد الي انا ساكن فيه حاليا واخطاء ماكانت بالحسبان

بحيث يتفاداها كل من هو مقبل على البناء
واتمنى الجميع يشاركون بتجربتهم وجزاكم الله خير

.. يتبع

الـخـور
07-08-2009, 03:32 PM
الخطا الاول ..
وجود السخانات خارج البيت على الطوفه المقابله للحمام اعزكم الله
صراحة هذا الخطا اتعبني ويفضل لو الواحد يخلي السخان داخل البيت لان السخان خارج البيت تتعرض له اشعة الشمس وتلاقيه بسرعى السخان يخترب او يصدي


الخطا الثاني
اذا كنت تملك اطفال في البيت (ينصح باستخدام الاسبرنق على نهاية الباب عشان الباب مايرضخ ويخرب الطوفه او صبغ البيت

الخطا الثالث
قمنا بعمل غرفة نصها من الزجاج مع ابيام منن الحديد وصراحة ماتصلح لانها حارة اغلب الوقت
لذلك ما انصح حد يكثر من الزجاج في الغرفه لانها بتكون حارة اغلب الوقت

الـخـور
07-08-2009, 03:35 PM
الخطا الرابع
بالنسبة للزرع تم تمديد المياه بحيث تكون الانابيب النحاسية مخفيه تحت السماد
هذا الخطا اتعبني لان احيانا لما يكون في تسريب ماتدري من وين وراح تضطر تحفر تحت الارض عشان تدور وين المكان الي يليك
ياحبذا لو يكون انبيب المياه في الخارج عشان لما يليك يبين من وين يليك


الخطا الخامس
اتمنى من كل واحد يتاكد من موقع المكيف في الغرفه لان بعض الاحيان الواحد يتفاجئ السرير مايجي الا والمكيف على وجهك (وهذي صراحة شغله تمرض)
لابد الواحد يحدد وين بيحط مكيفه وين بيحط سرير النوم اثناء التخطيط

الـخـور
07-08-2009, 03:42 PM
قريت في احد المواضيع خطا صراحة ماكان بالحسبان
http://tbn3.google.com/images?q=tbn:Atmrkov31Q32sM:http://www12.0zz0.com/2008/12/16/12/684062858.jpg

بالنسبة للبيوت الي فيها شبابيك كبيرة في واجة البيت
هنا نجد انه من الصعوبه تنضيف الزجاج الخارجي لذلك ياحبذا لو الواحد الي يبي يعمل درايش كبيرة على واجة البيت انه يخلي مثل جسر او بلكونه صغيره عشان يقدر ينظف الدرايش من الخارج


هذا ماعندي اليوم واتمنى انشوف تجاربكم واخطاء في البناء

الزيبق
07-08-2009, 03:42 PM
شوف بعد عندك تمديدات الحمامات الله يعزكم لا تخلونها في الطوفه من داخل علشان لوكان هناك ليك اتشوفه وتصليح ما يكلف مع انه منظرهم مب حلو وحاول قد ماتقدر اتخلي الحمامات فوق بعض في الخرائيط لتوفير في التمديدات من ناحيه ومن ناحيه ثانية ايكون لو ليك اتكون الخساره بسيطه ما تكون قاعد في الصاله مثلا اوالمجلس وفوق راسك رطوبه

الـخـور
07-08-2009, 03:53 PM
شوف بعد عندك تمديدات الحمامات الله يعزكم لا تخلونها في الطوفه من داخل علشان لوكان هناك ليك اتشوفه وتصليح ما يكلف مع انه منظرهم مب حلو وحاول قد ماتقدر اتخلي الحمامات فوق بعض في الخرائيط لتوفير في التمديدات من ناحيه ومن ناحيه ثانية ايكون لو ليك اتكون الخساره بسيطه ما تكون قاعد في الصاله مثلا اوالمجلس وفوق راسك رطوبه

فعلا اخوي الزبيق نصيحتك من ذهب
هالكلام ماراح يبين في البيوت الجديدة لكن مع الزمن تلاقي اطراف البيبات قد يصيدها نوع
من التسرب وهنا تكمن المشكله

اخبر واجهتني مشكلة التسريب لما حاولت اغير دينمة الماي
وجبت دينما اقوى ولكن ليتني ماغيرتها ..ا طلعت علي اغلى من بيع السوق
لان كثير من الولفات بدت تسرب خصوصا لما يكون ضغط الماء في البيابات اكثر من السابق

ضوى
07-08-2009, 03:57 PM
الصراحة موضوع روووووووووووووعة

وان شاء الله باكتشف الاشياء اللي سويتها خطأ في بنيان بيتي

شموخ دائم
07-08-2009, 03:59 PM
,

,

شكرا على الموضوع الطيب والمفيد


باب الصاله الرئيسي اذا كان مقابل للشمال راح يدخل الغبار بسهوله الى البيت وممكن المطر يتسرب الى الداخل لان الهواء يدفعه ناحيه الداخل
لذلك الرجاء الانتباه من نوعيه الباب وطريقه تسكيره او عمل حمايه للباب من المنيوم
او تسكير البرنده بالكامل بالمنيوم او حديد مشغول وزجاج

كراج السياره البعض يسترخص النوعيه والتركيب خاصه الـ الكيربي
وبعد ما يسكن ويستخدم الكراج يلاقي يسرب الرطوبه على شكل نقط في مكان معين فوق السياره ومع الوقت يحصل صدى وتأكل في جسم السياره
وايضا اذا كان مقابله للشرق تلاقي الشمس من بعد الظهر بشوي على السياره لذالك مراعاه اتجاه الكراج ضروري


النصيحه الاخيره

اذا اشتريت سيراميك او رخام ( لاتبحث عن شخص رخيص للتركيب )
يا اخواني التركيب ونظافه الفنشينج هو شي مهم بالبيت وحتى ما يخرب جمال الرخام وندفع سعر غالي ونركبه اي كلام ويصير منظر البيت جدا تعبان للاسف الرجاء الانتباه لهذي الامور
بس علشان نقول حصلنا واحد رخيص يركب ومحد يقص علينا :)

الانتباه للبلاستر ضروري جدا احضار ايدي ماهره بالمنزل حتى يطلع شغلهم مرتب
خاصه بعد ( الصبغ ) تطلع عيوب البلاستر بكل وضوح وتشوه البيت للاسف

عمل تمديدات جيده للهاتف والرسيفر tv بكل مكان بالمنزل ضروري التشييك عليها ووضع خيوط بداخلها من قبل الشخص الي قام بعمل التمديد الاولي حتى نتجنب اي انسداد وقت تدخيل الوايرات من الفني لما نريد نسكن المنزل وما نتفاجا ان الاماكن مغلقه والبيبات مكسوره
ونضطر الى تكسير او نمرر الويرات من فوق المنزل وادخالها من الشباك او من فتحات التكييف او عمل ثقوب بالحائط لتمرير الوايرات


وشكرا لكم

,

,


اخوكم



شموخ دائم

ضوى
07-08-2009, 04:05 PM
الخطأ اللي ندمت عليه هو اني سويت بلاط الحمام لين ثلاثة ارباع الطوفة على اساس اركب انتردوجلاس ، وتميت سنين وانا ناسية الموضوع ويوم قررت لقيت انه السخان بيعترض الموضوع لانه نص السخان عالبلاط والنص الثاني عالطوفة الغير مبلطة ، بس اللي ركب لي الانتردوجلاس خبى لي السخان ومايبين بس المشكلة الحين لو اخترب السخان اشلون ابدله ؟؟؟؟

غناتي1
08-08-2009, 12:24 AM
,

,

شكرا على الموضوع الطيب والمفيد


باب الصاله الرئيسي اذا كان مقابل للشمال راح يدخل الغبار بسهوله الى البيت وممكن المطر يتسرب الى الداخل لان الهواء يدفعه ناحيه الداخل


لذلك الرجاء الانتباه من نوعيه الباب وطريقه تسكيره او عمل حمايه للباب من المنيوم
او تسكير البرنده بالكامل بالمنيوم او حديد مشغول وزجاج

كراج السياره البعض يسترخص النوعيه والتركيب خاصه الـ الكيربي
وبعد ما يسكن ويستخدم الكراج يلاقي يسرب الرطوبه على شكل نقط في مكان معين فوق السياره ومع الوقت يحصل صدى وتأكل في جسم السياره
وايضا اذا كان مقابله للشرق تلاقي الشمس من بعد الظهر بشوي على السياره لذالك مراعاه اتجاه الكراج ضروري


النصيحه الاخيره

اذا اشتريت سيراميك او رخام ( لاتبحث عن شخص رخيص للتركيب )
يا اخواني التركيب ونظافه الفنشينج هو شي مهم بالبيت وحتى ما يخرب جمال الرخام وندفع سعر غالي ونركبه اي كلام ويصير منظر البيت جدا تعبان للاسف الرجاء الانتباه لهذي الامور
بس علشان نقول حصلنا واحد رخيص يركب ومحد يقص علينا :)

الانتباه للبلاستر ضروري جدا احضار ايدي ماهره بالمنزل حتى يطلع شغلهم مرتب
خاصه بعد ( الصبغ ) تطلع عيوب البلاستر بكل وضوح وتشوه البيت للاسف

عمل تمديدات جيده للهاتف والرسيفر tv بكل مكان بالمنزل ضروري التشييك عليها ووضع خيوط بداخلها من قبل الشخص الي قام بعمل التمديد الاولي حتى نتجنب اي انسداد وقت تدخيل الوايرات من الفني لما نريد نسكن المنزل وما نتفاجا ان الاماكن مغلقه والبيبات مكسوره
ونضطر الى تكسير او نمرر الويرات من فوق المنزل وادخالها من الشباك او من فتحات التكييف او عمل ثقوب بالحائط لتمرير الوايرات


وشكرا لكم

,

,


اخوكم



شموخ دائم





عين العقل يا شموخ -- هالمشكلة نواجه كل بيت

الـخـور
08-08-2009, 01:21 AM
اشكركم على المشاركات الطيبه ..

فعلا اخطاء التركيب مكلفه .. لذلك ينبغي الي يركب شيء لازم يجيب ناس خبره بالتركيب
واجهتني نفس المشكله في تركيب بلاط الحمامات ... المصري كان يمسح على البلاط خرب لون البلاط
هذا غير عيوب في الترتيب



كذلك من الضروري تمديد وايرات الكبل من النوع الزين
احد المشاكل الي واجهتها هو ردائة الكبل المستخدم ..
مثلا عند دينمة الماء وصلت كبل من النوع العادي مع كثرة الاستخدام اشتعل الكبل
واضطريت اخذ واحد ثاني يستحمل الاشتغال مدة اطول ومايسخن

حتى كبل التلفزيون نفس الشي يمكن مرتين او ثلاث اضطريت اغيره لين صفيت على نوعية جيده
لابد ايضا تحديد مكان التلفزيون وياحبذا لو يكون هناك فيش للتلفزيون موزعة في اكثر من مكان
وذلك من باب الاحتياط

RAHA
08-08-2009, 01:41 AM
الخطا الاول ..
وجود السخانات خارج البيت على الطوفه الماقابله للحمام اعزكم الله
صراحة هذا الخطا اتعبني ويفضل لو الواحد يخلي السخان داخل البيت لان السخان خارج البيت تتعرض له اشعة الشمس وتلاقيه بسرعى السخان يخترب او يصدي

هذا النظام يستخدم في البحرين و له غطاء خارجي خاص من البلاستيك يحمي السخان من اشعة الشمس و الرطوبه
و لكن يخرب من جمالية البيت و الأفضل هنا تركيب سخان مركزي
او ممكن يركب سخان عادي افقي علوي و يعمل له سقف جبس


\\

الخطا الثاني
اذا كنت تملك اطفال في البيت (ينصح باستخدام الاسبرنق على نهاية الباب عشان الباب مايرضخ ويخرب الطوفه او صبغ البيت

في شيء اسمه ستوبر وينباع في محلات النجاره و هي قطعه بلاستيك يتثبت في الأرض بحيث يوقف الباب و ما يخليه يرضخ الطوفه

الخطا الثالث
قمنا بعمل غرفة نصها من الزجاج مع ابيام منن الحديد وصراحة ماتصلح لانها حارة اغلب الوقت
لذلك ما انصح حد يكثر من الزجاج في الغرفه لانها بتكون حارة اغلب الوقت

نعم بالنسبة للبيوت لا ينصح بتركيب النوافذ الكبيره و إذا تم تركيب نوافذ كبيره لا لد ان تكون معزوله و هذا راح يزيد من تكلفة البيت



و لكم تحياتي

RAHA
08-08-2009, 01:49 AM
الخطا الرابع
بالنسبة للزرع تم تمديد المياه بحيث تكون الانابيب النحاسية مخفيه تحت السماد
هذا الخطا اتعبني لان احيانا لما يكون في تسريب ماتدري من وين وراح تضطر تحفر تحت الارض عشان تدور وين المكان الي يليك
ياحبذا لو يكون انبيب المياه في الخارج عشان لما يليك يبين من وين يليك

يجب وضع النحاس المعزول او ممكن لفه بعازل او تركيب انابيب ppr إذا كان التمديد في الزرع و من ثم توصيله بحنفيات مغطيه ببايب بلاستيك كبير و تثبيت البايب البلاستيك و من ثم إدخال بايب السباكة النحاس
هناك عدة طرق لعزل الأنابيب لأن تدفق المستمر لري المزروعات راح يتلف بايبات النحاس

الخطا الخامس
اتمنى من كل واحد يتاكد من موقع المكيف في الغرفه لان بعض الاحيان الواحد يتفاجئ السرير مايجي الا والمكيف على وجهك (وهذي صراحة شغله تمرض)
لابد الواحد يحدد وين بيحط مكيفه وين بيحط سرير النوم اثناء التخطيط

هذا من أساسيات التخطيط لبيت العمر لذلك من المفروض ان الواحد يسأل و يدور حتى يستفيد من اخطاء الأخرين


الموضوع مشوق

RAHA
08-08-2009, 01:58 AM
شوف بعد عندك تمديدات الحمامات الله يعزكم لا تخلونها في الطوفه من داخل علشان لوكان هناك ليك اتشوفه وتصليح ما يكلف مع انه منظرهم مب حلو وحاول قد ماتقدر اتخلي الحمامات فوق بعض في الخرائيط لتوفير في التمديدات من ناحيه ومن ناحيه ثانية ايكون لو ليك اتكون الخساره بسيطه ما تكون قاعد في الصاله مثلا اوالمجلس وفوق راسك رطوبه

هذا لا أؤيدك فيه
الأن تطور السباكة و صار لها تقنيه و ضمان في البايبات
من قبل كانت المشاكل في بايبات النحاس حيث كان يتجمع فيه الكلس و الجير مما يؤدي في نخر سطح النحاس و يحصل ترسب الماء او ما يسمى باليك
اما الأن فأنابيب السباكة يتم فحصها تحت ضغط عالي لتجنب الترسب
لذلك فمن الأفضل إدخاله داخل الحائط ليعطي جماليه أكثر

Chambray
08-08-2009, 02:06 AM
اخوي راحه
هل الجبس يتركب في الحمام ؟ ماراح يتأثر الجبس بالرطوبه الي بالحمام ؟
ولا هناك نوعيه خاصه ؟؟

RAHA
08-08-2009, 02:08 AM
فعلا اخوي الزبيق نصيحتك من ذهب
هالكلام ماراح يبين في البيوت الجديدة لكن مع الزمن تلاقي اطراف البيبات قد يصيدها نوع
من التسرب وهنا تكمن المشكله

اخبر واجهتني مشكلة التسريب لما حاولت اغير دينمة الماي
وجبت دينما اقوى ولكن ليتني ماغيرتها ..ا طلعت علي اغلى من بيع السوق
لان كثير من الولفات بدت تسرب خصوصا لما يكون ضغط الماء في البيابات اكثر من السابق

انا لا انصح بتركيب برشر عند وجود بايبات النحاس في البيوت القديمه فراح يصير تسرب او ليك في كل الأنابيب حتى السخانات ممكن تليك من كل صوب حتى من الأعلى و ذلك لأن السخان يكون فيه هواء و ماء و مصدي من الداخل بعد فترة استعمال

سهم قطر
08-08-2009, 02:15 AM
اخوي راحه
هل الجبس يتركب في الحمام ؟ ماراح يتأثر الجبس بالرطوبه الي بالحمام ؟
ولا هناك نوعيه خاصه ؟؟


تسوي الجبس وتصبغة بصبغ ابيض عازل للماء ( واتر بروف ) وانا مسويه من سنين ولاتغير

منتهى الحكمة
08-08-2009, 02:41 AM
ياليت عندي خطأ واحد بيتي كله أخطاء ومع هذا نزلته والتصليح جاري فيه وكل مرة بقول لكم عن بعض الأخطاء لأني أنسى بعضها من كثرها :
1- غلطت يوم خليت باب الحوش في وجه باب الصالة فضيحة مكشوفين.
2-البيت مقابل جهة الغرب وذبحتنا شمس الظهر وتكمل عليها شمس العصرمن الحرالبيت مولع.
البقية تأتي......

RAHA
08-08-2009, 02:43 AM
تسوي الجبس وتصبغة بصبغ ابيض عازل للماء ( واتر بروف ) وانا مسويه من سنين ولاتغير

نعم صحيح الجبس ينصبغ بصبغ
و تقدر تخفي الساخن تحت الجبس و تركب سبوت لايت نفس الفنادق

الـخـور
08-08-2009, 11:45 AM
اخوي راحة صراحة جزاك الله خير على النصائح القيمة

بخصوص السباكة والضغط العالي هل الشغل يعني يكون مضمون للابد ؟
عادتا التسرب مايبين في السنوات الاولى .. وهنا الخوف ..

صراحة الليك الداخلي مكلف جدا جدا .. وتعبني في اماكن وايد .. اصعب شي تحديد مكان الليك الداخلي

انا صراحة كنت ناوي اخلي تمديدات الماء تكون خارج البيت والبيابات ظاهره والا شرايك !! هل فيه تكنلوجيا مضمونه؟ خصوصا في اطراف البيب لان عادتا البيب المستقيم مايليك لكن اطراف البيب هي الي تخوف

RAHA
08-08-2009, 11:52 AM
اخوي راحة صراحة جزاك الله خير على النصائح القيمة

بخصوص السباكة والضغط العالي هل الشغل يعني يكون مضمون للابد ؟
عادتا التسرب مايبين في السنوات الاولى .. وهنا الخوف ..

صراحة الليك الداخلي مكلف جدا جدا .. وتعبني في اماكن وايد .. اصعب شي تحديد مكان الليك الداخلي

انا صراحة كنت ناوي اخلي تمديدات الماء تكون خارج البيت والبيابات ظاهره والا شرايك !! هل فيه تكنلوجيا مضمونه؟ خصوصا في اطراف البيب لان عادتا البيب المستقيم مايليك لكن اطراف البيب هي الي تخوف

هل الليك إلي حاصل معاك من بيبات نحاس و لا ppr

جوال 11
08-08-2009, 11:53 AM
مهما عملت ستلاحظ أخطاء أو غش من المقاول والعمال ولا بد من سؤال من سبقك بالبناء قبل أن تبدأ البناء ،
الشيبان يقولون أول بيت بيعه وثاني بيت أجره وثالث بيت أسكنه
والأخطاء المذكورة يمكن تلافيها .

الـخـور
08-08-2009, 12:18 PM
ياليت عندي خطأ واحد بيتي كله أخطاء ومع هذا نزلته والتصليح جاري فيه وكل مرة بقول لكم عن بعض الأخطاء لأني أنسى بعضها من كثرها :
1- غلطت يوم خليت باب الحوش في وجه باب الصالة فضيحة مكشوفين.
2-البيت مقابل جهة الغرب وذبحتنا شمس الظهر وتكمل عليها شمس العصرمن الحرالبيت مولع.
البقية تأتي......

صحيح عندي انا نفس مشكلة باب الحوش .. في النهار عادي لان الجامات عندي عاكسه
بس المشكله في الليل
وحتى لو بتركب ستيار على الباب .. ماراح اتعرف من الجاي


ذكرتني بشيء ايضا مهم جدا
بخصوص البيبان الالمونيم والي تكون على البيت من الخارج وتفتح داخل البيت
هذي صراحة ابواب فاشلة خصوصا المقابض التجاريه
واغلبها تسرب هوى من الاطراف لذلك حذاري من هذا النوع من الابواب لانها تدخل هوى
حار للبيت وبكمية رهيبة


وايضا المقابض التجارية مع المدة تصير ماتسكر عدل ويصير الباب مايسكر عدل

http://www.3roos.com/uploaded2008/263914/01215256834.jpg

الـخـور
08-08-2009, 12:28 PM
هل الليك إلي حاصل معاك من بيبات نحاس و لا ppr

هلا اخوي راحة

البيت كله ممدود بيبان نحاس وعمر البيت تقريبا 10 سنوات

الحين افكر اجدد التمديد من اول وجديد لان صراحة الدينما عندي شغاله 24 ساعة
مادري من وين يهرب في البيت ..

ماسمعت سابقا عن ppr بس اتوقع اكيد افضل من النحاس

RAHA
08-08-2009, 12:53 PM
هلا اخوي راحة

البيت كله ممدود بيبان نحاس وعمر البيت تقريبا 10 سنوات

الحين افكر اجدد التمديد من اول وجديد لان صراحة الدينما عندي شغاله 24 ساعة
مادري من وين يهرب في البيت ..

ماسمعت سابقا عن ppr بس اتوقع اكيد افضل من النحاس

ppr بايبات بلاستيك مقوى و يلحم بواسطة الحراره و يفضل استخدامه داخليا و الخارجي يتم نحاس او ppr إذا بتصبغ البيبات
هذه البايبات تعمل كأنها وصله واحده و في منها أنواع
الألماني و الإيطالي و التركي و الصيني
أفضلهم الألماني و الإيطالي

بوحارب
09-08-2009, 02:44 AM
اكبر خطأ في بيتي الباب اللي تحت الدرج

ماسويت حساب الدرج وصار ارتفاع الباب صغير والواحد لما يدخل لازم يدنع شوي :(

والخطا في البنيان وااارد سواء من المقاول او الأستشاري او المالك نفسه:waiting:


مهما عملت ستلاحظ أخطاء أو غش من المقاول والعمال ولا بد من سؤال من سبقك بالبناء قبل أن تبدأ البناء ،
الشيبان يقولون أول بيت بيعه وثاني بيت أجره وثالث بيت أسكنه
والأخطاء المذكورة يمكن تلافيها .

يا سلام على الرد الشرير :D

تحداني
09-08-2009, 03:58 AM
.. اخطاء اسمع الوالد دائما يكررها في بيتنا ..

بلاكونات البيت جدا كبيره ..
لا يوجد باب خارجي يستطيع الواحد الركوب اليه ..
للذهاب للسطح وعليه المرور من الداخل ..

هناك بعض غرف النوم في الطابق العلوي ..

على شكل حرف اليو باللغه الانجليزيه
u اي الشخص الذي تقع غرفته في النص محبوس ..

المجلس يقع امام منظر خلاب .. اما صاله البيت عكس ذلك ..

لا توجد غرفه للسائق ويكون مدخلها من الشارع ..( لذلك استغنينا عن السائق )

لا توجد غرفه في السطح للخادمه ..


بس بيتنا حلو ويعجبكم ..
:)

الله يسعدك
وشكرا على هذا الموضع الراااائع

هذا القسم واااااااااايد حلو .. كل يوم راح اجي

الســـهم
09-08-2009, 09:59 AM
.. اخطاء اسمع الوالد دائما يكررها في بيتنا ..

بلاكونات البيت جدا كبيره ..
لا يوجد باب خارجي يستطيع الواحد الركوب اليه ..
للذهاب للسطح وعليه المرور من الداخل ..

هناك بعض غرف النوم في الطابق العلوي ..

على شكل حرف اليو باللغه الانجليزيه
u اي الشخص الذي تقع غرفته في النص محبوس ..

المجلس يقع امام منظر خلاب .. اما صاله البيت عكس ذلك ..

لا توجد غرفه للسائق ويكون مدخلها من الشارع ..( لذلك استغنينا عن السائق )

لا توجد غرفه في السطح للخادمه ..


بس بيتنا حلو ويعجبكم ..
:)

الله يسعدك
وشكرا على هذا الموضع الراااائع

هذا القسم واااااااااايد حلو .. كل يوم راح اجي



تقريبا كل الملاحظات اللي ذكرتها اختي تحداني الزمن انا متلافيها , ودرج الخدمة عندي اهم من درج الفيلا , اقدر اقول انه اساسي في تصميمي ..

بس المشكله الوحيده اللي ممكن تصادفني اذا احتجت غرفه سادسه , اعتقد يبيلي اقلب مخي بوقتها ان شاء الله عشان تضبط معاي ..

Some-One
09-08-2009, 12:00 PM
انا خطيء صراحة في التصميم حيث اني
كل ما حبيت اكبر مثلا في اعزكم الله الحمام مثلا نص متر
قال لي المصمم هذا بيطلع عليك غالي لا تزيد .

وايضا اذا حبيت اضيف عمود قال لي مثل قبل بيكلف عليك غالي جدا .

لكن بعد البدء في البناء ومن خلال سؤالي للمقاول تبين انه الاضافات ماراح تكلف
بالدرجة الي ذكرها لي المصمم .

لذلك انصح الاخوان قبل ان يعتمد الخرائط من البلدية عرضها على المقاول واجراء
التعديلات عليها بكل سهولة وايضا راح تعرف التكلفة الحقيقية .

ضوى
09-08-2009, 12:11 PM
من الاخطأء في البنيان اني ماعملت حساب اني ممكن اركب وحدات تكييف سبيلت يونيت ، وبالتالي اضطريت اركب بالصالة والمطعم كسرت الطوفة وصار شكل الهوز برع البيت مو حلو لانه امتد للسطح

عابر سبيل
09-08-2009, 02:21 PM
الموضوع حلو و فكرته ممتازه!.
بارك الله فيك يالخور و كل من شارك..
صج الناس افكارها متشابهه و يا حظ من يحصل له
اللي ينصحه.

و دي حقيقة اسمع اي حد عنده تجارب عن برك السباحه.

حقيقة..كنت مخطط لهالشي بس عقب ما شفت ان حد من الاهل
حطوا لهم البركه الجاهزة(حق اليهال) مالت الصيف....
و صار عندهم يهال يغرقون و يشرقون بالماي و مشاكل...
رغم ان الخدامات حولهم..بس الشطانة و عمايلها...

صج محد صار له شي غير الشرقة و دق من هالماي (غير النظيف!)...
بس في طبيب اطفال قال لنا ان الياهل لو غفلتوا عنه
لمدة كمن دقيقة غرقان و ما جا مخه اكسجين....اذا ما مات يتسبب هالشي
في كثير من المشاكل و العاهات العقلية الخ الخ و و و ( عافانا الله و اياكم منها)...
و هو شايف كمن حالة اهنيه في قطر بهالسبب..

من هالشكل...انا متردد اني احط حوض سباحه...
الا اذا حد عنده خبرات ممتازه في هالمجال و ايفيدنا...
وجزاكم الله خير.

بوحارب
09-08-2009, 02:25 PM
مرحباااااا عابر سبيل

بالنسبة لبرك السباحة

اخوي كانت عنده بركة في بيته ومل منها

وراح اشترى تريب دفان وكته داخل البرجه ههههههههههههههههه وقال استغل المساحة احسن من البرجه

هذا اللي اقدر افيدك به عن البرك

واذا قررت وسويت بركه سباحة داخل البيت لاتنسى تناديني اسبح عندك

ضوى
09-08-2009, 02:28 PM
اخوي عابر سبيل

والله بركة السباحة كانت ببالي وفي مخططي ، بس هونت لاني خفت من الكلام اللي تقوله بذاك الوقت ، والحين ودي بس والله رديت فكرت صيفنا كله غبرة والتنظيف لازم يكون مستمر حتى مايتضررون اليهال ومب عارفة شاسوي ، مع انه ولدي يروح بيت الجيران وبركتهم حسب مايقول ماتنوصف من ......... ومع ذلك يتسبح فيها وماتتخيل التعيقم اللي اعقمه اياه عقب مايرد بس شنسوي

الـخـور
09-08-2009, 03:01 PM
الله يجزاكم خير على المشاركات الطيبه

بخصوص بركة السباحة .. في طريقة ان الواحد يخلي البركة على مستوين ..
مستوى للصغار ومستوى للكبار بحيث يفصل بينهم حاجز ... بركة السباحة تعطي شعور حلو
ورياضة وخصوصيه للبيت .. بس يبغالها عنايه ويفضل انها تكون داخليه ومحوطه (يعني داخل البيت مثلا)
او مثلا تكون كملحق خارجي تقدر تقفل الباب وتخلي محد يجيها

حلو حق الي عندها مساحات فاضية في البيت وفي ديكورات عجيبه


http://www.seedecor.com/home/modules/Gallery/data/thumbnails/9/0.36459011516982.jpg

http://www.1stlebanon.net/liban/mainguy/images/bigpics/contemporary2.jpg

السيل
09-08-2009, 04:00 PM
قريت الموضوع كامل
مشوق ومفيد

بالتوفيق .

أم وضحى
09-08-2009, 05:13 PM
فعلا الموضوع مفيد


بخصوص بركة السباحه نفس مخاوف عابر سبيل ناقشني فيها زوجي وقال ماتناسبنا .. خصوصا ان عيال خواتي وعيال اخوانه على طول عند عيالي .. يعني بيصير غرق جماعي :rolleyes2:


النقطة الثانية : المصعد .. بعد خوفني منه زوجي :( قال بيسكر على عيالج وبيختنقون ..ودوري حد يفتحه لج ..سواء نص الليل او الظهر ..

الظاهر مب حاطه شي في بيتي لين يكبرون العيال ويتزوجون .. والله يعيني على احفادي بعدها :anger1:


اللي عنده تجربه بهالشي ياليت يفيدنا..

عابر سبيل
10-08-2009, 12:59 AM
السلام و التحية لجميع...
و الله لحد الحين شكلها البركة..ستبقى في عالم الحلام...
و الحيطة و الحذر من اركان الحكمة..مع الايمان و اليقين بان كل شي
مقدر و مكتوب...

بو حارب...و الله فكره ممتازه حق اليهال..
السباحه في تريب رمل.....اعتقد انها فكرة مش بطالة!

اختي ضوى...
و الله بعد كلامج و خاصة في مسألة عبالة التنظيف...
هاي ما كانت في الحسبان اصلا... كلّه من هالاعلام...
معيشنا كانا في كولورادو و لا مدري اي ولاية و لا حتى المكسيك..
و نسينا اطنان التراب اللي تتوزع تقريبا طول السنة عندنا...
و الله حوشنا على قدنا...و الصبيان اهلكو من الغسيل.. و ما فيه
فايده... يتجمع الرمل من ثاني يوم!

اخوي الخور...و الله انت عاد تبي تعيشنا في مكان الواحد ما يطلع منه...
تدري لو عندي هالبركة..يمكن حتى ما اشبك عالنت و لا بروح
للدوام!.

بس فكرتك عن بركة مغطاة او في غرفة مغلقة جديرة بالاهتمام..
و لو اني كنت افكر ببركة مفتوحة...للوناسة و لتزيين الحديقة
في نفس الوقت...

و نتمنى ان نسمع من ايفيدنا عن تجاربة (خاصة من ناحية الامان)
في بركة مغلقة في البيت؟.


اختي ام وضحى...
شنسوي...هاي لعيال...الواحد ايحس احيانا
انه موب عايش حق نفسه...بس حقهم...
و موب المنة عليهم....تدرين ليش...
لان امهاتنا و ابهاتنا..اعتقد كانوا عالاقل مثلنا
الحين و يمكن اكثر..يوم كانت الايام صعبة حيل...
بس دبرونا احسن تدبير بحمد الله...الله يجزي كل اب و/او ام
الجنة على ما بذلوه و يبذلونه في تربية اعيالهم...
يعني الواحد يتذكر حياة "بعدين".....تهون عليه!

عالعموم..عن الاصنصيرات في البيت...
فيه لها حلول كثيرة...اعتقد ان التخوف شوي ممكن
ازالته باكثر من طريقه..

يعني...جعل ابواب المصعد زجاج...فهاي بيخلي الامر
مكشوف لو ما صار عطل فيه لاي سبب...و اللي برع بيشوفون
من هو متعلق داخله.
ثانيا...بالذات في الاصنصيرات..اللي ايفكر ايحط
لازم ما يروح للرخيص....لان مسألة السلامة و الكفاءة
مهي بهينة عشان الواحد يستكثر له 20 و لا 30 الف ريال
فرق السعر بين الجيد و الردي...

و من تجربة مع العيايز و الشياب اللي ما حطوا اصنصيرات يوم انهم
شباب...حقيقة ...تالي تم هجران الطوابق العلوية للبيت...
بسبة لركب و هلم جرا...

اعتقد ان المصاعد من الشركات المعروفة و الممتازة...
فيها درجات عالية من الامان (بعد التوكل على الله)...

متسوبيشي عندهم نظام يضمن هبوط المصعد في حال اي انقطاع للكهرباء
و فتح الابواب...اظن اسمه MELDS
"Mitsubishi Emergency Landing System"
او ما معناه..نظام متسوبيشي لنزول المصعد عند الطوارئ...
و هو ببساطة نوع من البطارية اللي تشتغل اوتوماتيكي لما تفصل
الكهرباء عن المصعد..هاي شفته في العمارة اللي فيها وكالة الرنج
لما كانت شركة الاولى مكاتبها هناك..و حقيقة مدري عن تكلفته.

و من تجارب في عمارات....موب صعبة ترى هالايام التعامل
(مع التدريب) مع تعليقات الاصنصير و فتحه...

شخصيا..اعتقد انه يسوى الواحد ايفكر به هالايام
عشان لو الواحد حتى في حالة اصابة و لا الولادة للحريم
و لا و لا ..يقدر بكل سهولة ايروح غرفته فوق و ما يحول
للنوم في الصالة و لا المجلس...غير عن انه
يعطي اشوية رزة و ديكور و فخفخة للبيت.

و ننطر نسمع ممن عنده سابق خبرة...المزيد!

و بالتوفيق.

عابر سبيل
10-08-2009, 01:12 AM
سؤال جديد...
ممكن حد ايفيدنا باخطائه او خططه الدقيقة مع "الميزانية" حق البيت؟

هاي اعتقد انها مسألة....لو مافيها اي خصوصية
بتكون مفيدة جدا...لان الحين الواحد موب عارف...
يتمنى كل شي يبي ايسويه...بس عند الدفع
تتغير الحسبات...

حقيقة اتمنى اسمع من كل من سبق تجربته في ضبط
ميزانية البيت...و كم كان الفرق (سلبا و لا ايجاب)...

يعني عدت الميزانية ب 10% او 50 %
و لا حد قدر ايوفرمنها و يبني باقل مما حط
في ميزانيته:(

بن رومي
10-08-2009, 05:09 AM
حاول اتخلي مدخل السيارة منفصل عن الحوش

الله يحفض الاعيال من هلي توفو ياهلين بسبب السياره

و عندك ارتفاع الغرف تحمل المقاول يقول بنشل طابوقة بيطلع لك ارخص

تري بيسير البيت يظيق الصدر

وعندك اسلوب الصطح عشان المطر خله اتجاه واحد على حسب الرغبة

تمديد الانتر كم

اذا ناوي تسوي مجلس أو ملحق في المستقبل خل الكهربائي يطلع بيب من المجمع على برع
عشان تمديد الكيبل

حطلك خزان ماي كبير سفلي و خاصه اذا عندك زراعة

اذا بتركب اسبلت شيك على بيبات الماااااي عدل قبل لا يسكرونه بالسراميك

اقتراح

عن عوار الراس والبايب فيتر طالع وداخل ومخيس الدرب حطلك مجمع صخان + مبرد + فلتر ماي فوق البيت


وسسسسسع المطبخ لانه اتخبر بنترس كبتات وثلاجات وخير ( عشان تستانس ام العيال )

وصراحة مروحة الشفط الاستيل اتسوي شغل بس أهم شي تقوله ابي مروحة صوتها خفيف

وشيك على توزيع الليتات الخارجيه لان بعض المرات يحطون توزيع اي كلام

خل باب الصالة حديد مشغول صج اغلى بس احلى وأأممن من الالمنيوم ( عن الحراميه )

عندي ملاحظات وااااااااااااايد

بس

طولت عليكم


اخوكم الغالي


بن رومي

وحش قطر
11-08-2009, 02:17 AM
من الخطا انك تخلي طبيلة البيت بالشكل الطولي

يعني سيارتين ورا بعض

بن رومي
11-08-2009, 03:52 PM
من الخطا انك تخلي طبيلة البيت بالشكل الطولي

يعني سيارتين ورا بعض



ذكرتني في بيتنى القديم :)

كانت عندنى طبيله تشل 4 سيارات ورى بعض :eek5:

وشوف اذا واحد سيارته اول شي :anger1:

اتسيررررررررر حوووووووووسه :rolleyes2:


ههههههههههههههه

MLAAS
11-08-2009, 04:38 PM
:) زين اني قريت الموضوع قبل البنيان ..

بس ابي اضيف كم خطا وبعض الناس مايعطونها اهتمام الي هي

1- الغرفه او المجلس : اذا كان طول الغرفه 5 او 6 متر وخلونا نتكلم عن الطول الايمن .. وفي نص هاي الامتار يكون باب الحمام وانتو بكرامه .. انا اشوف هالشي خطأ لانك مابتقدر ترتب الاثاث بالشكل المناسب يعني كأنك بتأثثر الغرفه على شكل u .. بس لو كان باب الحمام وانتوا بكرامه على الطرف او على العرض هني بتكون المساحه اكبر في الغرفه للتأثيث . وانا طبعا اتكلم عن استغلال كل زاويه وطول في الغرفه

2- في اقفال انا اشوف البلدان الاجنبية يستخدمونها .. علشان اليهال مايقفلون على عمارهم وتعال كسر الباب علشان تطلع الياهل .. الي يميز اقفالهم انه فيها طريقه من برع اذا الياهل قفل على نفسه يقدر اي احد يفتح الباب بالضغط او تحريكه بالظفر او اي شي صغير الحجم .. وتنفع للغرف بعد

وبالنسبه الي كان يقول انه الياهل لو غرق في البرجه دقايق يموت او تصيبه عاهه والله يبعد عنا وعنكم كل مكروه ... ازيدك من الشعر بيت .. المخ لو ماجاه اكسجين يكفيه لمده 8 ثواني الخلايا تموت .. يدخل في غيبوبه كم يوم بس مافيها فايده لانه المخ ميت ويموت الشخص بعد كم يوم او نفس اليوم .. وان نجى فألله كاتب له طيله العمر ..

بوحمد2
15-08-2009, 12:35 AM
للاسف نسيت اسوي مداخل الغرف قمريه

الـخـور
15-08-2009, 03:56 PM
اشكر كل من شارك في هذا الموضوع

بالنسبة لطبيلة السيارات فعلا من الخطا انها تكون بالشكل الطولي .. وهذا الخطا يرتكبه اكثر الناس
يمكن ايضا ضيق الحوش يخلي الواحد ماعنده مجال الا انه يسوي طبيله طويله


هناك ايضا خطا يقع فيه الكثير ..بالنسبة للمجلس الخارجي بعض الناس تخلي الحمام اعزكم الله
خارج المجلس .. يعني الي يبي يروح الحمام لازم يطلع من المجلس ويروح للحمام ..
ويكون الحمام حااار ورطوبه ومغبر اغلب الوقت
ياحبذا لو يكون باب الحمام في زاوية او في اخر المجلس بحيث لايظطر الضيف الى الخروج من المجلس لدخول الحمام
ويكون مكيف او على الاقل يصل الهواء البارد للحمام

الـخـور
15-08-2009, 04:05 PM
اخوي عابر سبيل

انت صراحة تطرقت لنقطة مهمة وايد وهي السيوله ..

فعلا في ناس تكون مخططة لاشياء كثيرة تبي تسويها ولكن لما يجي وقت الدفع نجد ان الواحد
يشطب ارخص شي ويشتري اي شي بهدف انه يبي يخلص ويسكن بسرعه

لابد الواحد يحدد كم تكلفة الشغله الي يبي يسويها قبل لايطلبها خصوصا لو كانت الشغله جديدة
مثل مصعد .. او بركة داخليه .. او حركات وديكور .. هاي كلها محتاجة دراسة وتقيم سعر قبل اعتماد المخططات

ياحبذا الي يبني بيت العمر يكون يبنيه ومب مستعجل في السكن يعني عادي لو يطول او انه يكون مرتاح بالكاش
ومايحاتي كم بتكلفة هالشغله الي يبي يسويها ..

لو بنحسب قرض التنمية بنلقى ان اقصى حد يقدر يسويها لنا مليون وميتين مع تشطيب ممتاز
هي لمساحة بناء ماتتعدى 600 متر برع

وصراحة هالمساحة صغيرة لارضي الدولة الي تكون مساحتها 1200 متر مربع

اغلب بيوت كبار الموظفين تكون مساحة البناء عندهم فوق 800 متر مربع
يعني يادوب قرض التنمية يكفي لبناء بيت عضم
لهذا لابد يكون هناك حسابات دقيقة من البداية

اسيرالدوحه
17-08-2009, 09:17 PM
السلام عليكم اخوي الخور ...

اولا مبرووك تثبيت الموضوع ....

ثانيا ... من الاخطاء اللي الواحد ممكن يسويها فالبيت ... غرفة طعام ...

الواحد لازم يفكر في مكان لتناول الطعام لأهل البيت ...

وتكون هذي الغرفة مجزة بتلفزيون ....

واحسن شي لو تكون بجانب المطبخ الخارجي ...

عشان ريحة الاكل .... وتكون الغرفة هي هي المقعد اليومي لأفراد الاسرة ...

شي ثاني ... تغطية مابيت المطبخ الخارجي والبيت ...

بعض الناس ... يسووون صبية ... لكن الصبية تكون محدودة في مكان معين ...

وايضا تعتبر مخالفة تخالف عليها البلدية ...

في افكار كثيرة الواحد يقدر يسويها ...

مثلا ... يسكر المكان بنفس طريقة الطبيلة اللي عند كويك سبان ... ((الجزيرة لليو بي في سي )) ....

وفي ايضا .... ممكن عمل شيت من البلاستيك الشفاف ... مقوس ...

منظرهم حلو ...

وتكلفتهم تقريبا معقوله ...

الـخـور
17-08-2009, 10:45 PM
اشكر الادارة على تثبيت الموضوع

اخوي اسير الدوحة .. انت تطرقت لشغله مهمه وايد هي تغطية المساحة الفاضية بين المطبخ الخارجي والبيت
سواء بضله او باي طريقه ثانيه

هالشغله صراحة ضروريه وراح اقولكم الاسباب

اول سبب : ستر للبيت (غالبا الجار يكون يقدر يطل على المساحة الفاضية بين المطبخ وبين البيت
ومثل مانتو عارفين الاهل او العيال او الزوجة متوجدين قريب من المطبخ
لهذا تاكدو ان هالمساحة مايدقدر الجار يطل عليها من الشبابيك او من سطح بيته

السبب الثاني طبعا : يلطف الجو خصوصا وقت الظهرية او كذلك وقت الامطار



بالنسبة للمطعم اخوي اسير الدوحة مثل ماقلت
يفضل المطعم يكون بالجهة الي فيها المطبخ
وكذلك يكون هناك مغاسل في المطعم قريبه عشان الواحد يغسل وياكل على طول

شكرا اخوي اسير الدوحة

القيادي
18-08-2009, 03:00 PM
السلام عليكم ورحمة الله وبركاته
من الأخطاء الغير متوقعه والتي عانيت منها هو السيراميك او البورسلان بكل انواعه الارضي او الحائط وذلك في حال تركيبه عليكم بالضرب عليه اليوم الثاني بأخذ كذا عينه وان اصدر صوت فجوه فهذا يدل على تكسره او خروجه في ايام معدوده وعليه يجب على المقاول في الحال تغيره او تكسيرة وستبداله وأن راح المقاول وخذا احسابه فطلب العوض من الله والله يعينك على تبليط من جد وجديد

بولينجر
18-08-2009, 07:53 PM
جزاك الله خير على الموضوع المفيد....متابع

المستقل
23-08-2009, 05:56 PM
موضوع جميل

hady_qatar
23-08-2009, 09:32 PM
مرحبا جميعا
من الاخطاء اللي طاح فيهاا واحد من الربع انه سوه غرفة النوم الماستر فوق غرفة الالعاب مالت اليهال
عاد وانت شوف الازعاج والدوشة اللي يسونها والتطقطق اللي مايخلي الواحد ينام

الـخـور
24-08-2009, 01:45 AM
مرحبا جميعا
من الاخطاء اللي طاح فيهاا واحد من الربع انه سوه غرفة النوم الماستر فوق غرفة الالعاب مالت اليهال
عاد وانت شوف الازعاج والدوشة اللي يسونها والتطقطق اللي مايخلي الواحد ينام

صحيح اخوي

نبهتنا لشغله ماكانت بالحسبان

تدري ان غرفة الماستر اسرار .. واحيانا بين الازواج تحصل خلافات وغيره وزعاج

لابد ان غرفة الماستر تكون لها خصوصيه او تكون منعزله نوعا ما عن باقي الغرف

وكذلك لابد من اختيار نوع من الطوف الي يكون فيها عزل جيد للصوت والحرارة

جزاك الله خير على مشاركتك

حقل الشمال
05-09-2009, 02:07 AM
اخواني الاعزاء
للعلم سويت بركة ولاكـــــــــــــــــــــــــــــــــــــــــن اضهرت قربال وحوسة
تتتتتتتتتتتتتتتــــــــوبة

الوفي
05-09-2009, 03:23 AM
بالنسبــــــــــــة للبركة.........عندي نسيبي ماشاء الله عليه مسوي قبو بالارض ومخليها جلسة للرياضه والنقاهة وفيها بركـــــــة سباحة واجهزة جري ومطعمها بمكيفات سبليت يونت وغير هذا لها درايش ضيقة تطل بالحوش وباب واحد ومغفله وهنا الواحد يكون مطمئن وماتفتح الا وقت استخدام البركة والرياضة وتكون للكبار فقط.......والا اشفايدتها بالحديقة حق المنظر الخيالي.......الافلام تورينا فلل فيها برك كبيرة مع حركاتها وديزايناتها بس سكان البيت يكونون من كبار السن ورجال الاعمال وحنا نطبق هذا الشي ببيوتنا ولانحسب عواقب هذه البرك لعيالنا المساكين الي مايدركون نوع الخطر يشوفون البركة من الشكل السطحي الازرق ولايدرون ان تحتها قبة طويلة تؤدي للقبور يكفينا الشر........

HIGHNESS
06-09-2009, 12:55 AM
يعطيكم العافية ... ماشاء الله ماقصرتوا ...
شكراً اخوي الخور :)

الـخـور
11-09-2009, 06:23 PM
اعجبتني مشاركة احد الاخوان ونصيحته بخصوص المصاعد المنزلية
وصراحة هذي نصائح قيمة وهنا اقتباس لمشاركته


من خلال التجربة في منزلي اشوف ان الmitsubishi افضلهم من جميع النواحي خصوصا الصيانة و التعامل و الاداء بحيث ان الاعطال تكاد تكون معدومة و الحمدلله بفضل الصيانة الشهرية للمصعد من قبل الشركة 0

* يفضل ان يكون اختيارك للشركة قبل عمل الخرائط و الشروع في البناء لأن كل حجم مصعد يحتاج الى مقياس و عمق معين عند الحفر و عمل الخرسانات و ذلك عن طريقة زيارة مقر شركة المصاعد مع مهندسك الاستشاري و اخذ جميع المقاسات قبل البدء في عمل الرسومات الهندسية 0

* نصيحة في حال اختيارك للمصعد الافضل ان تختار مصعد حجم 8 اشخاص اوسع و اشرح لك خصوصا انك ستقوم بعمل ديكورات داخلية للمصعد فكل هذا سيأخذ حيز بعد التنفيذ 0

* طريقة اختيار المصعد من الداخل ستكون عبارة عن خيارات موجوده عند الشركة و كل خيار له سعر معين يزيد و يقل حسب نوعية اختيارك 0

* اذا رغبت بعمل ارضية رخام للمصعد من الداخل فيجب ابلاغ شركة المصاعد قبل التصنيع لان الارضية اللي يركب عليها الرخام تكون مختلفة عن الارضية العادية 0

* يفضل عمل درج خارجي للمنزل لعمال المصعد لتفادي دخولهم المتكرر كل شهر لعمل الصيانه0

* غرفة المصعد فوق السطح يفضل ان تكون مكيفة للتبريد على مكينة المصعد هذا على حسب طلب مهندس المصاعد 0


لا تترد بتركيب الاجود حتى لو كان السعر غالي شوي

كل التوفيق لك اخي الكريم

المريش
15-09-2009, 04:41 AM
جزاكم الله خير على موضوعك الطيب ويعطيك العافيه ويعطي العافيه كل من شارك في هذا الموضوع وهو مشاركة الأعضاء بأخطائه أثناء البنيان، عشان الواحد ما ينطبق عليه المثل
أول بيت تبنيه بيعه، وثاني بيت أجره وثالث بيت أسكنه
وين الواحد عنده فلوس يبني لين يوصل لأتم شي
وجزاكم الله خير أخواني أنتم قصرتم علينا المسافه أحنا اللي ما بنينا لسا

بكل هدوء
16-09-2009, 08:35 AM
جزاكم الله خير على هذا الموضوع اللي انا استفدت منة كثير

شرايكم نتظرق اللى موضوع سلامة الاطفال في المنزل انا عندي درابزين الدرج حديد وفيه تشكيلة ورود من الداخل اذكر ان ولدي الصغير الله يحفظة دخل راسة في فتحات الحديد وجلست دقيقتين لين قدرت اطلع راسة وبعدها على طوول جبت تبع الدرابزين وركب لي مثل لوح بلاستيكي على حديد الدرج من الداخل عشان ماتكرر السالفة معاي
السالفة مرة ثانية ، اتمنى كل واحد صار له مثل هالموقف يكتبة عشان كل الاخوان والاخوات يستفيدوون

al.wajbah
16-09-2009, 11:03 AM
موضووع فوووق الممتاز

تشكر عليه أخوي

وجزاك الله خير

اسيرالدوحه
19-09-2009, 10:23 PM
جزاكم الله خير على هذا الموضوع اللي انا استفدت منة كثير

شرايكم نتظرق اللى موضوع سلامة الاطفال في المنزل انا عندي درابزين الدرج حديد وفيه تشكيلة ورود من الداخل اذكر ان ولدي الصغير الله يحفظة دخل راسة في فتحات الحديد وجلست دقيقتين لين قدرت اطلع راسة وبعدها على طوول جبت تبع الدرابزين وركب لي مثل لوح بلاستيكي على حديد الدرج من الداخل عشان ماتكرر السالفة معاي
السالفة مرة ثانية ، اتمنى كل واحد صار له مثل هالموقف يكتبة عشان كل الاخوان والاخوات يستفيدوون

السلام عليكم ..

وضع لوح البلاستيك قد يشوه منظر الدرابزين ....

احسن حل قد يكون في النقشه والتشكيله نفسها ....

لما تختار التشكيلة ... احرص على ان تكون المساحات فالتشكيله ... صغيرة ...

يعني مايكون فيها فراغ كبير... وواسع ...

بحيث ما يقدر الياهل يدخل راسه ...

يعطيكم العافية ...

فتى الجود
21-09-2009, 10:45 PM
للاسف نسيت اسوي مداخل الغرف قمريه

السلام علييكم

ولايــــهـــمــك

بالنسبة لهذا الموضوع واجهتنى نفس المشكلة
لما وصلت مرحلة العظم
صار في خاطر ى أسوى من فوق هلالية أو على قولتك قمرية

فشسويت ؟؟

الفريم اللى أعلى الباب يسوية بطريقة هلالية أو قمرية وتم تثبيتة على الطابوق


ومحد راح يكتشف أنه خلفة طابوق

أوصلت الفكرة ؟

رآعية البورش
22-09-2009, 12:00 AM
مشكوووور آخوي كل آغلب المشآكل اللي وآجهتآ لقيـــــت حل لهآآآآ

والبركــه في موضوعك المميـــــز

الـخـور
25-09-2009, 09:39 PM
اشكر الجميع على الكلام الطيب

حبيت هنا ان احط رابط لمشاركة احد الاخوان
ذكر فيها ملاحظات مهمة لمراعاة القبلة في البناء وغيرها
http://qatarshares.com/vb/showthread.php?t=298999

صراحة جزاه الله خير اخوانا تاجر الذهب
حيث تطرق الى نقطة مهمة لمراعاة القبلة في تصميم الحمامات
ينبغي ان لانتهاون في هذا الموضوع

بو علي
26-09-2009, 05:22 AM
السلام عليكم. جزاكم الله خير على هالموضوع المفيد واللي جاي في وقته. خصوصا مع نزول اسامي المنتفعين من القروض العقاريه من فتره واللي الحمد لله كنت بينهم.

مشاركتي بسيطه وهي عباره عن نصيحه قالها لي كذا واحد من الشباب اللي بنو. وهي انه اللي يبغي يبني اهم شي ما يسترخص لما يسوي الخرايط.

لازم يكون واثق ان المكتب يكون ممتاز. لأن اي غلطه في الخريطه يكون تعديلها جدا مكلف في البنيان.

وعسى الله يوفق الجميع ان شا الله.

طير شلوى
27-10-2009, 01:24 AM
موضوع مفيد
اهم شى انك تشوف مكتب استشاري زين ينصحك
وهذا البنيان وبلاويه

QAT2020
04-11-2009, 11:54 PM
جزاكم الله خيرا على الموضوع المفيد ...
متابع لاهمية الموضوع ..

الـخـور
13-12-2009, 01:06 PM
تحديث جديد لهذا الموضوع وبما اننا في موسم امطار
اليوم عندي بعض الملاحظات المهمة

اول شي بخصوص دينمة المنزل (برشر الماي )
من قبل كم يوم صار عندي التماس بسبب ان الدينمة مكشوفة .. لهذا عند تمديد الكهرباء لدينمة البيت
لابد التاكد انها مغطية تماما وان الماء لايصل الى الدينمة وحتى الشمس ايضا

شغله ثانية وهي ليتات الداخلية للبيت
عندي كذا ليت نيون داخل البيت والمعروف ان هالليت مكشوف .. صراحة هالنوع من الليتات اثب فشله في المطر لهذا لابد اخذ الحيطة والحذر واختيار اللمبات الي تكون ضد المطر

شغله اخيرة

لابد التاكد من ان التمديدات الي على سور البيت وغيره من التمديدات الكهرباء الخارجية لايصلها المطر
يعني تكون مغطية تماما .. خصوصا لمبات سور البيت

اسيرالدوحه
16-12-2009, 06:48 AM
تحديث جديد لهذا الموضوع وبما اننا في موسم امطار
اليوم عندي بعض الملاحظات المهمة

اول شي بخصوص دينمة المنزل (برشر الماي )
من قبل كم يوم صار عندي التماس بسبب ان الدينمة مكشوفة .. لهذا عند تمديد الكهرباء لدينمة البيت
لابد التاكد انها مغطية تماما وان الماء لايصل الى الدينمة وحتى الشمس ايضا

شغله ثانية وهي ليتات الداخلية للبيت
عندي كذا ليت نيون داخل البيت والمعروف ان هالليت مكشوف .. صراحة هالنوع من الليتات اثب فشله في المطر لهذا لابد اخذ الحيطة والحذر واختيار اللمبات الي تكون ضد المطر

شغله اخيرة

لابد التاكد من ان التمديدات الي على سور البيت وغيره من التمديدات الكهرباء الخارجية لايصلها المطر
يعني تكون مغطية تماما .. خصوصا لمبات سور البيت

يعطيك العافية اخوي الخور ...

بس حبيت اعلق على نقطة ليتات النيون ...

في نوع ينباع فالسوق ... يجيك محمي ببلاستيك متين ...

يحمي ليت النيون من تغيرات الجو ....

سعره غالي مقارنة بليت النيون العادي ...

انا مركب منه فالحوش .... ولا اروع ....

بخصوص تمديدات ويرات الكهرباء خارج البيت ...

من الضروري ... انك تكون مخطط لهذا الشي ... وقت البنيان ....

لان وقتها ... يتم تمديد البيبات داخل الطوفة ... ومن خلال الاعمدة اللي فالسور ...

فإن شاء الله مافي خوف او خطر من اي التماس ...

وبخصوص دينمة الماي ... كلامك صحيح 100% ....

يجب تغطيتها وحمايتها من الشمس والمطر ...


موضوعك رائع اخوي ...

ويعطيك العافية يا رب ...

الـخـور
16-12-2009, 07:15 AM
مرحبا اخوي اسير الدوحة ..

مشكلة الواحد لما يبني وحزة التشطيب يكون يدور على ارخص شي او شغل سريع عشان يبتدي يسكن
وهالاشياء فعلا الواحد لابد ياخذ منها الحيطة والحذر لانها تخلي بدال التكلفة تكلفتين

تسلم على مشاركتك في هذا الموضوع

أم وضحى
17-12-2009, 02:57 PM
موضوع توزيع فيشات الكهربا في جميع انحاء البيت


امر مهم جداً ,, لتجنب تمديد الوايرات بشكل يخرب على المنظر الجمالي للبيت .

الـخـور
20-12-2009, 09:10 PM
موضوع توزيع فيشات الكهربا في جميع انحاء البيت


امر مهم جداً ,, لتجنب تمديد الوايرات بشكل يخرب على المنظر الجمالي للبيت .

ام وضحى شكرا على المشاركة

توزييع الفيش الكهرباء والتلفون والتلفزيون ايضا

اكثر البيوت حاليا مايحطون اعتبار لتمتديدات الدش وصراحة شكل الوير لما يكون ممدود ن السطح مو حلو كلش

لابد الواحد يحط باعتباره ان يعمل تمديدات للدش ويستخدم افضل انواع الكيابل
لان الكيابل بعضه له عمر افتراضي سنة وبعضة سنتين وبعضه 10 سنوات

ولابد يكون في مجال لتبديل الكيبل وتغيره بكيبل اخر

بويوسف
30-12-2009, 01:02 PM
نصيحة لكل مقبل على البناء ..

مراجعة الخرائط الهندسية بشكل تفصيلي مع مهندس مختص ..

يعني خرايط الكهرباء مع مهندس كهربائي ويتم مراجعة التفاصيل والحمل الكهربائي وغيره من امور مهمة ..
خرايط الصرف ايضا ..

وتكون هذي الخرايط قبل البدء بالبناء بدل مايقعد المقاول ويسوي اللي على كيفه وخصوصا ان المصمم او المكتب الاستشاري عادة يكون مسوي شغل لمجرد الحصول على رخصة وبيع الخرايط وتكون خرائط اولية بحاجة الى عدة مراجعات ..

rashid700
03-01-2010, 10:05 PM
عندي ثلاث ملاحظات انا بنفسي طحت فيها في بيتنا الأول
1 ـ على أيام التناكر حطيت الخزان في واجهة البيت وكل يومين جاي راعي التنكر وكاشف بيتنا وتعال فكك.
2ـ لازم يكون بلاط الحوش له اسلوب على الباب الخارجي على الشارع سيده
3ـ ارتفاع جميع الأبواب لازم يكون أكثر من مترين وانا أفضل مترين ونص حد أدنى لإرتفاعها

المرعب
12-01-2010, 06:54 AM
موضوع مفيد للكل
عندي بعض الامور
1-لما تسوي الخريطه وتروح حق مهندس الكهرباء يقولك وين تبيني وهو بيسويلك شغل اي كلام عشان يخلص بس وانت وزع بكثرا في كل مكان سواكت الكهرب وتلفون وتلفزيون وخاصه المكيفات حط في كذا مكان يمكن لك رغبه تغير مكان المكيف قبل تسكن واهم شي الكيبل الي داخل شوف له مكان صاد لاتخليهم على كيفهم
2- يمكن تجيك حاله نفسي تبي ترفع مستوى البيت الدور الارضي وتسير مشكله عندك في الدرج يسير عالي وصعب الركب الدور الثاني لاني مسوي رتفاع 4.85 م وقبل كان 4م الافضل مايتعدا 4.20م
3-واهم شي توزيع الايضائه صح لو فيها تكلفه عاليه لانك مراح تخسر وافضل اليتات هي نوع الفيليبس الهولندي لان عمرها طويل
4-نتبه من تركيب الالمنيوم الدرايش شيك عليهم لازم يحطون الفوم بين الالمنيوم والطوفه ويسكره بسليكون عشان الغبار مايدخل عليك لو نلحض الغرف مسكره ويجينا غبار يدخل علينا ماندري من وين ويفضل انك ماتركب الدرايش السحاب
5- فريم البيبان بعد نفس الطريقه يحطلك فوم بينه وبين الطوفه عشان الارضه وحراره ماتخرب في مقاس البيبان مرات نلحض بعد فتره طويله الباب مايسكر عدل تحس انه يبيله حك والبيبان حاول انك تخذ قطه كامله خشب لان اكثرهم يجبون البيبان كذا قطعه ويلزقونها وينصبغ ومايبين عليه الى بعد فتره تسير فيه تشققات
6- الخلاط يعني الولفات ومغاسل عليك بجوده عاليه لانها مستهلكه واجد
7-وحاول انك توفر في البنيان اذا انت على قدك لان التشطيب يكل اقل شي نفس قيمه العضم البلستر
8-واذا تبي تبني بيت ارضي فوق 400 متر تراه مكلف يعني يعني لو تبني فله من200 الين 250 م بيطلع اقل تكلفه لان المقاول يستانس اذا الدور الارضي كبير لانه فيها خرسنات اكثر واعمده على قولتهم هذي هي الكيك الفايده فيها اكثر
9- المقاول بيحفر البيت فوق 40الف واذا انتي حفر البيتسعر السوق من 10ريال المتر الين 15 اذا ارضك وعره نفرض مساحه البيت 400 بنخذ الافرج بنحسب المتر 13 وبنخذ متر زياده في الطول والعرض مايتعد 7800ريال
ولنا بقيه فما بعد ان شاءالله

موضي قطر
15-01-2010, 10:51 AM
مشكورين على نقل تجاربكم لتعم الفائدة

Fahad Alqahtani
20-01-2010, 01:46 AM
والله ثم والله ان هذا الموضوع افادني خاصة اني اسوي خرايط البيت الحين بيض الله وجه كل من شارك في هذا الموضوع وفاد اخوانه

نور الحور
26-01-2010, 02:32 AM
موضوع روعة ومفيد جدا ..
بالنسبة لي عندي بعض الملاحظات اللي ممكن تفيد البعض :

1. افضل الملاحق (المطبخ الخارجي والمخزن وغرفة الخادمة ....الخ) انها تكون مشبوكة بالبيت عشان ما تكشف هذا اولا وعشان تستغل المساحة فوقها في البنيان..

2. افضل حسب حساب تركيب المصعد مستقبلا حتى لو ماتم تركيبه في الوقت الحالي ومتى ما الواحد احتاج عدين يركبه يركب..

3. بالنسبة للبرك ما افضلها بتاتا .. الا لوكان فيه مساحة كافية ويكون سكان البيت من الكبار ..

4. بالنسبة لشكل الدائري لبعض الصالات اعتقد انها مزعجة شوي في اختيار شكل الأثاث والستائر ممكن يتحول شكلها لدائري مضلع .

5.مراعاة وجود مصادر جيدة للتهوية الطبيعية للغرف والصالات والتقليل من الشبابيك المواجهة لجهة الشمال .

6. مراعاة ان يكون المطبخ مواجها للجنوب للتقليل من كمية الروائح الداخلة للمنزل ..

لكن عندي سؤال ..بالنسبة لتصاميم الفلل اللي يكون الدور الثاني فيها مفتوح على الأول شنهي تدابير السلامة فيها للأطفال ...؟؟؟؟ ياليت الي مجرب يفيدنا...

بويوسف
31-01-2010, 07:58 PM
من المهم جدا التأكد من توافق الخرائط المعمارية مع الخرائط الانشائية والتأكد من اماكن القواعد والاعمدة وعدم تعارضها مع المساحات الداخلية .

ماضي
08-02-2010, 06:28 PM
غلطة وندمان عليها هي اني ما بنيت بيسمنت قبو تحت الارض كان ارتحت من اشياء كثيرة بس الحمدلله على كل حال.

الـخـور
09-02-2010, 08:06 AM
احد الاخطاء الي اكتشفتها من كم يوم هو عدم وجود استور في البيت

ضروري يا اخوان يكون هناك استور داخلي وكذلك استور خارجي

الاستور الخارجي يكون مغطى ومرتب لوضع الاشياء الكبيرة ..ويكون تقدر تقفله

اما الاستور الداخلي فهو لاشياء استهلاكية مثل السكاريب والبكرات والوايرات وغيرها

السد
16-02-2010, 08:12 AM
موضوع مهم وفي غاية الاهمية
غلطتي

المجلس الخارجي والملحق الخارجي
لم انتبه لارتفاعات
الارتفاع 2 متر و 75 سم
يجب ان يكون الارتفاع اكثر من 3 متر

فالغلطة غلطة المصمم
اما المقاول فلم ينبهني او يستشيرني
فقال لي ان امشي على حسب الخرائط
اما الاستشاري الله يسامحه فقال لي اني اهتم بالقياسات الخارجية

وفي الاخير السالفة انا اكلتها


نقطة ثانية
يجب عليك ان تحدد ماذا تريد ان تركب من انواع من المكيفات
مكيف شباك او مكيف سبليت
مكيف شباك على الخرائط سمك واير الكهرباء 4 ملم
مكيف سبليت على الخرائط سمك واير الكهرباء 6 ملم
فحبيت اغير مكيف واحد ويندو في الطابق الارضي واستبدله بسبليت
قال لي المقاول عليك بدفع قيمة الواير 6 ملم مع بايبات الصرف للمكيف
ويجب اظهار الوايرات خلف الطوفة الخارجية لان عمل صبية فصعب يكسر الصبية

الشي الثاني
يحبذ استخدام مكيف ويندو للمطابخ لان المكيف السبليت يتجمع فيه دهن القلي
هذا لللعلم
ودعواتكم لاكمل بيت العمر

حياة
24-02-2010, 12:58 AM
جزاكم الله خير ان شاء الله
انا والله استفدت مع العلم ان حنا ابتدينا في الاساسات للبيت
وحبيت اسئل اذا حد يعرف بايب فيتر عدل وشغله زين علشان التمديدات تعرفون لازم تكون من البدايه مع البناي
والبيت كبير واندور على واحد شغله عدل وبيباته اصليه علشان مايكون هناك اخطاء
ياليت اللي يعرف مايبخل علينا وجزاه الله الف خير

@ بوفيصل@
24-02-2010, 02:21 AM
منكم نستفيد

الصيـاد
24-02-2010, 02:54 AM
شيكو علي الخرائط عدل لا تثقوا في المصمم راح جاب تصميم درج من خريطة سابقة وركبها بخريطتي

وطلعت الدرجات صغيرة عقب عدلتة ب 4000 ريال

- فتحة المكيف الاسبلت خل من يمنية ويسارة علي الاقل متر ونص لانة صار عندي خطأ حطيت فتحتين قريب

من الدريشة ذيك الايام يوم انسوي الخرائط ما نعرف الاسبليت لانة طول الاسبليت عندك اعتقد 10و1 متر

خليفـة
25-02-2010, 05:13 PM
موضوع محترم بمعنى الكلمة

ملاحظة صغيرونه :
ابواب الحمامات اعزكم الله .. يفضل تكون من الألمونيوم
الخشب مع مرور الوقت يتشرب بالماء ولونه يتغير ويشوه المنظر الجمالي للحمام
خصوصا
اذا كانت الحمامات نوعية جيدة ومتعوب عليها .

قواكم الله
:)

الصيـاد
25-02-2010, 08:56 PM
موضوع محترم بمعنى الكلمة

ملاحظة صغيرونه :
ابواب الحمامات اعزكم الله .. يفضل تكون من الألمونيوم
الخشب مع مرور الوقت يتشرب بالماء ولونه يتغير ويشوه المنظر الجمالي للحمام
خصوصا
اذا كانت الحمامات نوعية جيدة ومتعوب عليها .

قواكم الله
:)



واللة يا خوك احترت مرة اقول بسوي خشب علشان يطلع ديزاين واحد مع ابواب الغرف

مع السلبية التشرب وتغير اللون

ومرة اقول المنيوم عملي
الاحظ اغلب البيوت الجديدة مسوين خشب وطالع متناسق مع ابواب الغرف لا مريت بس المشكلة بعدين
ولا زلت محتار !

عرٍيب الساس
27-02-2010, 05:39 AM
جزاكم الله خير على الموضوع الطيب والمفيد .. متابع ان شاءالله

amen
01-03-2010, 11:40 PM
جزاك الله كل خير عالموضوع الرائع

السد
03-03-2010, 10:58 PM
واللة يا خوك احترت مرة اقول بسوي خشب علشان يطلع ديزاين واحد مع ابواب الغرف

مع السلبية التشرب وتغير اللون

ومرة اقول المنيوم عملي
الاحظ اغلب البيوت الجديدة مسوين خشب وطالع متناسق مع ابواب الغرف لا مريت بس المشكلة بعدين
ولا زلت محتار !

الشيخ يوجد المنيوم بنفس لون الخشب
:nice::nice::nice::nice::victory::victory::victory ::victory:

القلم الصريح
14-03-2010, 09:20 AM
السلام عليكم
بالنسبة لارتفاع الباب .. عندي لكم طريقة حلوه وبسيطه وسهله جدا لتحديد الطول المناسب جدا للباب

احسب 11 طابوقة من تحت لين فوق وبعدها حط صبية الباب .. شوف الصورة
http://www5.0zz0.com/2010/03/14/05/245207728.jpg

الا شخبار البنت هاوس وياك يالسد :nice:

msd313
15-03-2010, 12:34 AM
بالنسبــــــــــــة للبركة.........عندي نسيبي ماشاء الله عليه مسوي قبو بالارض ومخليها جلسة للرياضه والنقاهة وفيها بركـــــــة سباحة واجهزة جري ومطعمها بمكيفات سبليت يونت وغير هذا لها درايش ضيقة تطل بالحوش وباب واحد ومغفله وهنا الواحد يكون مطمئن وماتفتح الا وقت استخدام البركة والرياضة وتكون للكبار فقط.......والا اشفايدتها بالحديقة حق المنظر الخيالي.......الافلام تورينا فلل فيها برك كبيرة مع حركاتها وديزايناتها بس سكان البيت يكونون من كبار السن ورجال الاعمال وحنا نطبق هذا الشي ببيوتنا ولانحسب عواقب هذه البرك لعيالنا المساكين الي مايدركون نوع الخطر يشوفون البركة من الشكل السطحي الازرق ولايدرون ان تحتها قبة طويلة تؤدي للقبور يكفينا الشر........

انا مسوي في التصميم قبو وفيه حمام سباحه وغرف للرياضه والساونا وغيرها
والله يعينا على البناء ومشاكله
واشكر صاحب الموضوع على هالفكره الرائعه
والله يجعلها في ميزان حسناتك

خالد_
15-03-2010, 11:36 AM
السلام عليكم

انا ان شاء الله ببني بيسمنت (قبو) هل في احد عنده فكره او خلفيه عن الاخطاء الواجب تجنبها مثل

1 كيف اعمل الحوائط الجانبيه للقبو هل من خرسانه او طابوق محشي بخرسانه لان دشيت قبو مسوي حركه الطابوق المحشي بخرسانه

2 في واحد من الشباب يقول لاتسوي اي دوره مياه في القبو لان بتدخل في مشاكل التصريف
وفي مهندش يقول اعمل حفره لصرف الصحي مخصوصه لهالحمام

3 واللفت هل اخليه ينزل للقبو او يكفي الى الارضي افضل


ومنكم نستفيد

bluelion
16-03-2010, 12:36 AM
عندي قبو خرسانة ... وعندي فيه حمام ما طفح والحمد لله ... بس ورا البيت حفرة لمجاري القبو فيها بمب من نوع خاص.

لو عندي لفت كنت خليته من القبو للسطح ...

خالد_
16-03-2010, 11:17 AM
عندي قبو خرسانة ... وعندي فيه حمام ما طفح والحمد لله ... بس ورا البيت حفرة لمجاري القبو فيها بمب من نوع خاص.

لو عندي لفت كنت خليته من القبو للسطح ...

شاكر لتفاعلك
القبو عندك هل لاحظت اي تسربات وما هو نوع العوازل التي استخدمتها مع الخرسانه
وبالنسبه لحفره المجاري هل هي بمستوى الحوش وشنهي المضخه المستخدمه او شنهي ماركتها او صناعتها

شكرا لك

bluelion
16-03-2010, 02:13 PM
الأرض فيها مياه جوفيه بهدلتني لما حفرنا للأساسات وتسربت داخل القبو من كم سنة (ارتفاع 2 سم من أرضية القبو) ... بس خلال كم يوم اختفت.

حفرة المجاري بمستوى أنزل من أرضية القبو بشوي وفيه مضخة ألمانية "submersible pump" وهي مضخة توضع داخل ماء المجاري في الحفرة وتضخه للمجاري العادية... القبو فيه حمامين وغسالة وما فيهم مشاكل مجاري والحمد لله خلال الست سنوات الماضية منذ بناء البيت...

السد
17-03-2010, 08:33 PM
السلام عليكم
بالنسبة لارتفاع الباب .. عندي لكم طريقة حلوه وبسيطه وسهله جدا لتحديد الطول المناسب جدا للباب

احسب 11 طابوقة من تحت لين فوق وبعدها حط صبية الباب .. شوف الصورة
http://www5.0zz0.com/2010/03/14/05/245207728.jpg

الا شخبار البنت هاوس وياك يالسد :nice:

على كيف كيفك
بسويه كوفي شوب :nice::nice::nice::nice:

The Watcher
28-03-2010, 02:37 PM
موضوع مفيد جداً واكثر من رائع

السندان
07-04-2010, 03:51 PM
يعطيكم العافيه

sultanqtr
24-04-2010, 10:45 AM
موضوع روعة

الله يوفق الجميع

بو نايف
25-04-2010, 01:33 AM
موضوع مفيييييييد

q6ryah
13-06-2010, 06:01 PM
يعطيكم العافية الصراحة موسوعة واقعية للبنيان

بوخالد911
29-06-2010, 01:39 PM
تسلموون كلكم

والله يسهل علييكم

قطري33
15-07-2010, 11:51 AM
مشكورين جميعا وماقصرتوا كلكم ... لازلت متابع وبقوه

Qa10
18-07-2010, 01:09 AM
ماشي ان شاء الله

اهم شي بيت جديد ومريح بالنسبة لي

قاسي بطبعي
13-08-2010, 03:20 PM
موضوع رااااائع

مشكوووورين

منهم وفيهم
13-08-2010, 03:35 PM
الموضوع بصراحه يستحق التثبيت

saud580
17-08-2010, 03:03 AM
بالنسبة لبرك السباحة اعتقد نستعيظ بالبحر اللي محاوطنا من ثلاث جهات ابرك وافود من مشاكل برك السباحة

saud580
17-08-2010, 03:07 AM
يا جماعة الخير نصيحة للي يبي يسوي بلاط رخام سراميك بورسلان اللي سطحه فيه شوي خشونه اياني واياكم تخلون اللي يركب يصب الروبه صب ويمسح البلاط كله تراه بيخرب لون البلاط وبيلصق بالسطح الخشن والحل ان تقولون له بس بكل تركيز حط الروبه فقط بين الشقوق والفتحات اللي بين البلاطه والثانيه وخاصه اذا كان اللي يركب مصري لانهم ما يقتنعون بالنصيحة لما تطلب منهم ويقولون لك ان هذا عملهم وهم ادرى به وحتى لما تجيب لهم البلاطه الجديده وتراويهم الاخلاف بينها وبين اللي راكبه من ناحية اللون صدقوني ما يعترفون بالخطاء فرجاء لا تخلون اللي يركب يخرب عليكم البلاط بها الطريقة

saud580
17-08-2010, 03:20 AM
بالنسبه لتركيب السبلت يونت المكيف بالنسبه للقطعه الخارجية يجب الاهتمام بان تكون متوازية مع البايب الخارج من الجدار يعني بعض اللي يركبون يحط الجهاز الخارجي اقصى اليمين وتلقى الهوز طالع من الجدار اقصى اليسار وبالنهايه تشوف الهوز مخرب المنظر نصيحة بان يكون الجهاز الخارجي يغطي على الهوز يعني تشوف فقط الجهاز وما تشوف الهوز == واذا ركبت على ستاند نأكد ان الاستاند بالضبط ورى المكيف ومتوازيه وقريبه من مخرج الهوز حق الغازما يكون بعيد حتى ما يخرب المنظر وتطول عملية التبريد وبالتوفيق

باحث علم
21-09-2010, 04:19 PM
بخصوص السيراميك والبلاط والرخام

خذ باك اب من كل نوعية
يعني لازم يكون عندك في الاستور بلاط احتياط على الاقل خمس بلاطات من كل نوع

بو نايف
26-09-2010, 09:50 AM
ارتفاع المجلس عن مستوى الشارع ,, كنت اتمنى لو رفعته اكثر’’

um nawaf
26-09-2010, 11:03 AM
يعطيكم العافية .. الموضوع فكرته حلوة ..

يا ريت الأعضاء يضيفون بعض المزايا والأشياء اللي ما تحسفوا عليها خلال أو بعد البنيان

الله يقويكم ويهنيكم في بيت العمر وأنا وياكم ان شاء الله :)

العمراني
04-10-2010, 03:16 PM
مشكور اخوي على هالموضوع المفيد

انا اول مرة ادش على هالموضوع ويمكن ملاحظاتي تكون مكررة لكن كلها مصلحة

اول خطاء كان اختيار المقاول على اساس السعر دون التركيز على الجودة ( من تهاون باللحم خانت به المرقة )
اخترت استشاري شخصي وهذا زاد الطين بله وياليتني مختار المكتب اللي قام بالتصميم

المواصفات لازم تكون بالتفصيل الممل كل صغيرة وكبيرة بالنوع وجهة الصنع والمقاسات وحدود السعر واللي لازم يكون اكثر من سعر السوق بما لا يقل عن 10% ولا زم تستشير اللي بنوا حتى تتلافى النواقص

الابواب الرئيسية اذا كانت مقابله الشمس افضل تكون من الالمنيوم المشغول ( غالية لكنها قوية وتعمر وما تصدي مثل الحديد )

توزيع نقاط الكهرباء لازم يكون مدروس حسب الحاجة بدل ما تترس الجدران بدون حاجة ونفس الشي نقاط التلفون والدش .

اذا فلل ملتصقة لازم يكون جدارين وبينهم عازل

لا تخللي المصمم يعمل لك تخطيط فيه مناور لانها بلوى كبيرة خاصة وقت المطر .

بالنسبة للحمامات اعمل اغلبها بدون بانيو وخلل الشاور على السيراميك وكنسل البيدية لانه حسارة فلوس وياخذ مساحة بالحمام والشطافة اسهل منه

كفاية اليوم هالملاحظات ونشوفكم في الزيارة الجاية

همر
10-10-2010, 11:08 AM
نصائح من ذهب:

- لا تشتغل مع عرب..
مش تجني ولا افتراء ولكن من عدة تجارب اثبتت لي ان هذولا اهم شي بالنسبه لهم كيف يدخل من وراك ريال زياده باي طريقه وخلوكم من العواطف.. وابعدوا عن المصممين اللبـ .. طبعا معروفين .. خايييي ...كلام حلو.. ويرويك شغل حلو.. وصار لي سنه معاه شطبت البيت ولي الحين ما خلص لي التصميم ! طبعا مافي غيرهم يشتغل بالتصميم الداخلي :) تدرون ليش؟ اسهل شغله تبيع فيها كلام وزباينك معظمهم حريم :telephone:

- لا تحاول تخلي آسيوي يسوي شي يعرفه بطريقه مايعرفها..
اذا قالك انا يسوي هاي شكل انا ما يسوي هاي شكل.. ترى بيعفس لك البطح وصدقوني شي علمي.. هذولا عقلياتهم تطبيقيه بحته (اللي تعلمه في يوم بيطبقه طول 30 سنه) ومافي مجال للابداع او الابتكار.. ماعدا الفلبينيين والصينيين.. اذا مايعرف يقولك ماعرف وعندهم شوية ابداع..

- لا تشتغل مع صديقك او قريبك ولا حتى اخوك..
حتى لو شي بسيط وما يستاهل بس بعد مايسوى انك تخسر هالشخص بسبة شغله ماتسوى.. دائما تعامل مع ناس ماتربطك بهم اي صله.. لو صار ما صار.. دور على غيره..

- استشير الناس وقط بحر..
اسأل واستفسر وابحث وتقصى براحتك بس اذا مقتنع بشي سوه ولا تخلي حد يأثر عليك خصوصا الاهل :anger1: في النهايه انت اللي بتسكن البيت مب هم..

- تحرا الحلال.. واتق الله.. وانتبه تبخس اي عامل حقه..
ما دام طلب ووافقت عطه.. حتى لو تدري او دريت بعدين انه قص عليك.. بعض الشباب الله يهداهم يقولك خله يخلص بس وارويك فيه مب معطيه ولا ريال.. صدقني ماراح ترتاح في هالبيت طول عمرك اذا فيه طابوقه وحده بالحرام..

احس اني طولت.. :rolleyes2:

ابو سلطان11
15-10-2010, 12:30 AM
جزاك الله خير وكثر الله من امثالك

ابو علاوي
15-10-2010, 01:18 AM
الصراحة الموضوع يستحق التعليق من كثر ماشوف الاغلاط الموجودة في البناء وخصوصا فيما يتعلق بشغلتي وهي تركيب وتوريد الحجر الطبيعي في قطر
اللي ابغي اتكلم عنه اليوم هو انه بعض الاخوان يبنون الفيلا ويكثرون الديكورات الكونكريتية مثل عمل ديكور حول النوافذ او الابواب او عمل الوارش اللي فوق بسماكة كبيرة
وبعد فترة يجي يبغي يركب حجر
اول شي لازم نكسر كل الخرسانات اللي عاملهم صاحب الفيلا
حتى نركب ديكور حجر خاص بالنوافذ
الشي الثاني الوارش اللي فوق مستحيل يتركب حجر ولو تم تركيبه سيكون مكلف جدا لان يحتاج قطع حجر صغيرة لتلبيسه او نحته والنحت مكلف
ويكون المالك اصلا دفع ثمن الوارش الكونكريتي
الشي الثالث الاعمدة : دائما يسوون الاعمدة بقطر كبيرة ولما نجي نركب حجر يكبر محيط العمود ونصف قطره حوالي 16 سم
فيكون العمود ثخين وغير متناسب مع الفيلا
انا انصح اللي يبي يسوي حجر بالتالي:
لايسوي اي ديكور بالكونكريت لان مصيره التكسير
والاعمدة يصغرها شوي ويحسب حساب انها بتكبر بعد الحجر
نافذة قبل وبعد الحجر

منابر خالده
09-11-2010, 10:17 PM
متابع جيد
مشكور اخوي على الموضوع

N.QTR
15-11-2010, 10:53 PM
نصائح من ذهب:

- لا تشتغل مع عرب..
مش تجني ولا افتراء ولكن من عدة تجارب اثبتت لي ان هذولا اهم شي بالنسبه لهم كيف يدخل من وراك ريال زياده باي طريقه وخلوكم من العواطف.. وابعدوا عن المصممين اللبـ .. طبعا معروفين .. خايييي ...كلام حلو.. ويرويك شغل حلو.. وصار لي سنه معاه شطبت البيت ولي الحين ما خلص لي التصميم ! طبعا مافي غيرهم يشتغل بالتصميم الداخلي :) تدرون ليش؟ اسهل شغله تبيع فيها كلام وزباينك معظمهم حريم :telephone:



:eek5::eek5::weeping:
الله يسامحك اخوي ليش جذيه بس
انا مصممــه ديكــور قطريــه والحمدلله سويت شغلي وخلصته باكمل وجه ، وفي الوقت المحدد للتسليم.. :victory:
اصابع يدك مش سوا،، :shy:

واسمحولي عالمداخله،،

نمـر
22-11-2010, 08:08 AM
العازل للحمامات الله يكرمكم سوو عند شركه معروفه حتى لو كانت غالي والتمديدات البيبات للحمامات خارجيه

BonBons
23-11-2010, 07:36 AM
اسجل حضوري ومتابعتي ،، موضوع جد مفيد

rashid700
30-11-2010, 10:38 PM
نصيحه انا سويت خطأ وتحسفت عليه
الا وهو اني بنيت الملاحق خلف البيت والمفروض تكون جنب البيت من اليمين او اليسار أهم شي ما تكون مقابل مدخل البيت الرئيسي علشان يصير فيه زياده في المساحه امام البيت(الحوش) وبيرجع البيت ورى

فجر جديد
09-12-2010, 06:51 PM
السلام ,
اولا - الحوش اغلب البيوت ما يخلون فيه مساحة اما بالزرع او كراجات وهذا يحرمهم استئجار نطاطية او زحلاقية عند اقامة حفلة . ( يمكن ما يهمكم بس انا توهقت لما قالوا لي ما تدخل النطاطية ) .
ثانيا - غرفة السايق تكون خارج البيت او مش مواجهة الحوش حتى ما يكشف اهل البيت .
ثالثا - مراعاة الميلان حتى ماتظل بقع ماء في الحمامات ( وانتم بكرامة ) + تمديد للمكيفات اسلاك او بايبات حتى ما يدخل الماء في الطوفة ( تقشر الصبغ ورطبت الطوفة ) . وبعد ينزل ماء المكيف على الحوش وصاير خط اخضر وتحول الى اسود وما يروح مع غسيل الحوش .
اخيرا - مراعاة ان لا يستقبل الحمام ( المرحاض ) ولا يستدبر القبلة . وايضا ان لا يكون ضيق فالبعض يسخسر المساحة فيه . ومحاولة الاستفادة من المساحة بعدم وضع ( البيديه ) الذي لا فائدة لة الا شكليا كطقم وهو يضيق المكان .

السلفي
07-01-2011, 10:47 PM
جزا الله من شارك ونفع اخوانه خير الجزاء

همر
19-01-2011, 07:17 AM
:eek5::eek5::weeping:
الله يسامحك اخوي ليش جذيه بس
انا مصممــه ديكــور قطريــه والحمدلله سويت شغلي وخلصته باكمل وجه ، وفي الوقت المحدد للتسليم.. :victory:
اصابع يدك مش سوا،، :shy:

واسمحولي عالمداخله،،


دامج قطريه ما منج خوف .. وانا اتكلم عن بياعين الكلام في موضوع التصميم الداخلي .. واذا انتي تنفذين بعد بعطيج بيتي تنفذينه :nice:

بن غنيّم
04-02-2011, 06:01 PM
موضوع استفدت منه يعطيكم العافيه

ZURICH
14-02-2011, 03:01 PM
موضوع رائع وكل يوم استفيد منة خاصة أني في دورة تأسيسية في بنيان بيتي

ZURICH
14-02-2011, 03:45 PM
موضوع محترم بمعنى الكلمة

ملاحظة صغيرونه :
ابواب الحمامات اعزكم الله .. يفضل تكون من الألمونيوم
الخشب مع مرور الوقت يتشرب بالماء ولونه يتغير ويشوه المنظر الجمالي للحمام
خصوصا
اذا كانت الحمامات نوعية جيدة ومتعوب عليها .

قواكم الله
:)

مرحباً بوخليفة

في طريقة تقدر تعزل الماي الي داخل الحمام ومايوصل للباب

وهي تلبيس الباب بالكامل من الداخل بالبلاستيك وكأنة زجاج

وانا افضل باب الحمام يكون مطابق لجميع ابواب الغرف ..

q6r.10
17-02-2011, 09:00 PM
السلام عليكم

وومساكم الله بالخير

أكـثر شي ندمت عليه هو ارتفاع سقف المجلس الخارجي ( مجلس الرجال )

الارتفاع المسمووح في البلديه تقريبا 3.75 واكثر الاستشاريين يخلوون الارتفاع 3.30

بس هالارتفاع مب ارتفاع مجالسنا ياهل قطر اللي متعودين عليها .

خلو الارتفاع 4 امتار واذا كلمتو البلديه يمشون وعادي تبنون ز

وسلامتكم

darkuae
18-02-2011, 02:19 AM
من الأشياء اللي انصح بيها

* تسوون بانتري أو مطبخ تحضيري في كل طابق (الأرضي يكفيه لو في خارجي ومتصل بالفيلا) والأول والبنت هاوس

* تسوون أكثر من مخزن وذلك حسب المواد المخزنة:

- مخزن رئيسي خارجي
- مخزن داخلي للمكنسة وأجلكم الله النعل والجواتي وأنصح بيه يكون تحت الدرج
- مخزن للفرش والملابس الموسمية وانصح يكون في البنت هاوس
- مخزن للمعلبات والعيش والسكر وميرة البيت وانصح ان يكون مكانه في المطبخ

* نصيحة عامة انكم تدققون في الخريطة عدددددل :eek5: وتحطون فيها كل كبيرة وصغيرة ولا تقولون عقب وقت البنيان باكلم المقاول يسووي كذا وكذا، عشان اذا عطيتوا المقاول الخريطة وسافرتوا وقت البيان فترة او ما تقدرون تتابعون البنيان كل يوم بيومه او ما تنسوون بعض النقاط

* نصيحة اخيرة حاولوا انكم توزعون سويكات الاضاءة بطريقة مزدوجة في بعض الأماكن وعلى سبيل المثال:

- إضاءة الدرج خلوا سويكات تحت الدرج واعلى الدرج للإضاءة والاغلاق لنفس الليتات
- عند باب المجلس الخارجي وعند الباب الداخلي للمجلس (عشان ما تقعد تتحسس الطوفة فالليل وانت رايح تفتح باب المجلس:rolleyes2:
- عند باب غرفة النوم وعند السرير (حركات الفنادق):victory:

كبير المتداولين
21-02-2011, 10:09 AM
انا توني ماخلصت بنيان بس تحسفت اني ماكبرت الحمام وانتو بكرامه اهم شي الواحد يكبر الحمام

بو الجوري
21-02-2011, 10:41 AM
صادق أخوي كبير المتداولين :.. أهم شي بيت الراحه يكون وسيع :.. :)
أنا سويت الحمامات تكرمون تقريبا 3*2.8 :.. و أحس للحين صغار :.. :(


و مثل ماقال أخونا darkuae :.. ركزوا على المخطط عدل :..:omen2:
شوفو كل كبيره و صغيره :.. عشان ترتاحون عقب :..:nice:
حتى أماكن السويتشات و المكيفات وكل شي :.. و دريشة الحمام :..

انا في أشياء ما ركزت عليها وايد :.. و وقت البنيان إكتشفتها :..:weeping:
بعضعا سهل تغييرها أو تعديلها :..:victory: لكن في أشياء إضطريت إني أكسر و أزيد فلوس عشان التعديل :..:weeping:


فالنهايه الله يوفقكم و يعينكم على البنيان :..:discuss:

وحش الصناعات
24-02-2011, 12:59 PM
جهد متعوب عليه بصراحه
وتمت الاستفادة والحمدلله لله
ثاااااااااااانكس للجميع

بوسياف
23-03-2011, 02:00 AM
جزاكم الله خير الجزاء جميعااا....

وماقصرتوا على الموضوع والخبرات المميزة ..

اخواني واخواتي في شئ ماتكلمتوا عنه التمديدات الكهربائية والبيب فيتر والصرف الصحي
شنو افضل انواع التمديدات وبشنو تنصحوني ...
ونوعية الدينومات وكيفية ترتيب العملية ....:rolleyes2:

اما بالنسبة للخرائط ولله الحمد توفقت:victory: لانه اطلع عليها اكثر من عشر اشخاص توهم ساكنين بيوتهم ومن اصحاب الخبرة ....

انتظر اجاباتكم ونصائحكم....

الـخـور
03-04-2011, 01:48 PM
جزاكم الله خير الجزاء جميعااا....

وماقصرتوا على الموضوع والخبرات المميزة ..

اخواني واخواتي في شئ ماتكلمتوا عنه التمديدات الكهربائية والبيب فيتر والصرف الصحي
شنو افضل انواع التمديدات وبشنو تنصحوني ...
ونوعية الدينومات وكيفية ترتيب العملية ....:rolleyes2:

اما بالنسبة للخرائط ولله الحمد توفقت:victory: لانه اطلع عليها اكثر من عشر اشخاص توهم ساكنين بيوتهم ومن اصحاب الخبرة ....

انتظر اجاباتكم ونصائحكم....

مرحبا اخوي بوسياف

اسمحلي على الرد المتاخر .. افضل شي في التمديدات انك تستخدم ال ppr
وهي مثل البلاستيك المقوى ويتم شبكه بالحراره عشان مايليك

اما بالنسبه للدينمو يفضل انك تخلي وحدة للزرع اذا كان عندك زرع والثانيه حق البيت
ولاتنسى تخليها في مكان مغطى مايصيدها المطر والشمس عشان ماتتهبدل ويضرب شوط ويتم البيت بدون برشر وقت المطر


اما بالنسبة لتمديدات الكهرباء فانا انصح ان في كل متر او مترين تسوي فيشة عشان ماتتبهدل عند تحريك الاثاث ويكون عندك كهربى في كل اطراف الغرفه
ودائما استعمل الوايرات الاصليه في الكهرباء عشان ماتسخن او تخترب
هذا مالدي وبيت عامر ان شاء الله

Miss WoW
04-05-2011, 02:32 PM
الله يعطيكم العافيه

PGR
05-05-2011, 02:11 PM
متابع للموضوع والله يجزاكم خير

محد فيكم تكلم عن مكيفات السيمي سنترال؟؟؟ محد فيكم جربها ؟؟ لانها انا بركبها في بيتي يعني مع التشطيبات فحبيت اعرف من اللي مركبينها شنو خبرتهم مع هالنوع ,, انا بقولكم مميزات هالنوع الاساسيه:
- اول شي سرعة التبريد اذا كان عندك مساحات كبيره تبرد بسرعه مب مثل السبيلت ياخذ وقت
- بالنسبه لغرف النوم المكيف ما يضرب في ويهك لانه يكون موزع في السقف مب على الطوفه
- اذا كنت تحتاج 3 مكيفات سبيلت للمساحات الكبيره وتبي تشغل كل واحد هالنوع بس يونت واحد ويشغلك المساحه بكبرها
-بالنسبه لاستهلاك الكهرباء اقل بوايد من السبيلت
-المنظر الجمالي طبعا

السلبيات :
- تكلفتها ضعف السبيلت تقريبا
- لازم تعمل حسابه لما تسوي الخرايط وتنبه المصمم انك تبي هالنوع عشان يخلي ارتفاع السقف زياده

هذا اللي عندي وتقبلوا تحياتي

شواروفسكي
14-05-2011, 05:21 PM
موضوع ممتاز وجاي في وقته
يعطيكم العافية

همسـات
16-05-2011, 07:40 PM
اكثر شي ندمنا عليه
مادققنا في الخريطة عدل
الخريطة ثم الخريطة ثم الخريطة

وسلامتكم ومشكورين

بنـ ابوها ـت
20-06-2011, 02:22 PM
متابعة ومنكم نستفيد

إشراقة قلم
20-06-2011, 04:58 PM
موضوع قيم فعلا

بايع بايع
24-06-2011, 06:04 PM
موضوع جدا رائع

الحـ قطر ــب
24-06-2011, 06:34 PM
ودي ابني بيت مساحتة الاجمالية 500 متر فودي اعرف :-
مدة استخراج رخصة البناء.
مدة الانتهاء من المخطط.
مدة الانتهعاء من البنيان يعني من اول الحفر لين اخر تشطيب.

xyounasx
02-07-2011, 12:51 AM
موضوع جدا رائع

خبير صيانة
02-07-2011, 07:06 PM
هعلق علي شي واحد من اللي فات مع العلم ان كل ماسبق فعلا مهم
توزيع بايبات الزراعه قبل كل شئ لابد من اخذ مقاسات الاحواض جيد وقبل الزراعه فيه شيئين مهمين
اولا لابد من عزل حوائط الاحواض من الداخل جيد حتي لاتسرب ماء وتخترب الحوائط المشتركه او القريبه من احواض الزراعه
ثانيا افضل البايبات البلاستيك في عمل شبكه الري لعده اسباب من اهمها رخص ثمنها اللي يشجعك ان تغيرها كل 3 سنوات اواقل وتحافظ علي تجديدها باستمرار

الغـــيور
10-07-2011, 07:14 AM
السلام عليكم
شكرًا جزيلا عالموضوع الاكثر من راءع
المهم....

اكرر اهم نقطه مراجعة الخراءط تكرار ومرار وإقامة التعديلات اول باول هالخراءط

ثاني شي فعلا حسفني الغرفه الماستر صايره بالنص ويمينها غرفة التبديل والحمام بيسارها !!!

عدم ترك مساحات كافيه للتوسعه المستقبليه مثلا

حاكر المجلس الخارجي البيت من الخلف ومن اليسار محطة كهربا ومن اليسار الحمام تكرمون و الحمام صاير بالنص بين المقلط والمجلس

الاخيره مكثر الدرايش ومكبرهم

للأسف ماعندي مجال اعدل هالاخطاء مع اني للحين ماشطبت

بوالبيض
17-07-2011, 11:41 PM
والله مشاكل البيت ما تخلص انا قريب واشطب وكل اشوي شي يطلع والله المستعان

نور الحور
18-07-2011, 01:33 PM
نقطة أحسها وايد مهمة ..

بالنسبة لشبابيك الحمامات (أكرمكم الله ) .. من الأفضل إنها تكون جانبية وصغيرة نسبياً ، لأن الهدف منها التهوية ودخول الشمس .. لكن أحياناً الواحد منا يغفل ويسويها كبيرة وفي النص وهذا ماراح يوفر فرصة الاستفادة من الجدار لوضع أرفف أو تجاويف جدارية ..الخ ، وكبر حجمها يدخل كمية كبيرة من الغبار ..
ملاحظة أحببت ذكرها :)


ملحوظة ثانية : الكل أكيد عارف حجم التعب اللازم الواحد يبذله عشان يبني بيت ويأثثه ، والزمن المستغرق لهذا كله ..
لكن كثيراً ما نغفل إن قراءة سورة الإخلاص (قل هو الله أحد) 10 مرات تضمن لك ((قصراً)) في الجنة .. تخيلوا .. قصر .. وفي الجنة .. وفي ثواني معدودة .. ماأكرمك يارب << للذكرى . .فإنها تنفع المؤمنين :)

نور الحور
02-08-2011, 09:35 AM
امتداداً لموضوع الحمامات (وأنتوا بكرامة ) ياليت يكون تسليك المغاسل وكراسي المرحاض والبديه في الجدار مو في الأرض أنظف وأجمل :)

وبالنسبة للقبب .. لازم تكون مساحتها متوافقة نسبياً مع المكان اللي موجودة فيه ومتناسبة مع حجم البيت ككل .. لآن أحياناً نشوف قبب كبييييرة لمكان صغير ..فيطلع شكلها غلط وتدخل حرارة وضوء بكمية كبيرة ..أو العكس ..
أما بالنسبة لنوعيتها فإذا كان ستايل البيت مودرن أو أقرب للمودرن فالأفضل تماشياً معاه القبب الزجاجية، أما القبب الخرسانية فهي أنسب مع الفلل اللي استايلها كلاسيك أو قريب منه :)

بوخالد911
02-08-2011, 10:11 AM
هلا

بخصوص المطبخ الخارجي كانت مساحته 5 *5

وبما إنني توني ببداية الحفر ووضع القواعد ؛ عدلت ع المساحة لتصبح 5 * 7

وباخذ موافقة بلدية الريان

دعواتكم بس

مســـك
04-09-2011, 01:39 AM
السلام عليكم ورحمة الله وبركاته
اشكر كاتب الموضوع وهنياله على الاجر الي حصلة من هالموضوع الاكثر من ممتاز بصراحه
الامر الاخر اسمحوا لي اخواني ان انقل لكم تجربتي التي مازالت مستمرة وخلصت العظم كامل مع التمديدات والحين انا في طور الديكور الداخلي

الامر الاول انا من عشاق التراث وصممت بيت على فكري البسيط و جعلت المهندس المعماري يكمل الباقي بطرقهم الفنية المعهود واضع مع هذه المشاركة خرائط المنزل لربما تفيد احدكم او يستخدمها للاسترشاد بها وان شاء الله الفائدة تعم .

الامر الاخر انا وضعت بيتي مؤهلا له خدمات ذوي الاحتياجات الخاصة و التوسعة المستقبليه لذلك قمت ببناء بيت من طابع واحد على اساس ثلاثة طوابق مستقبلية ان شاء الله .

ايضا انا اهتم بعمليات التخزين جدا لذلك اهلت جميع الغرف للتخزين بشكل خاص لضمان نظام المنزل ونظافته وترتيبه بشكل مستمر ان شاء الله وايضا وضعت كل الغرف لامكان تحويلها في المستقبل بعمليات بسيطه الى غرف نوم كامله الخدمات

وسأخذ معكم الاقسام حسب تخطيطي لها :
قسمت المنزل لثلاث مناطق رئيسية و منطقة ثانوية
المنطقة الاولى الضيافه وشملت المجلس وغرفة الطعام للضيافه و بعدها صالة كبيرة و ستور صغير بجنب مطبخ مقابل للمطبخ الخارجي وسيكون فيه ان شاء الله جلوس العائلة للوجبات اليومية .

المنطقة الثانية هي منطقة اهل البيت وتتكون من خمس غرف نوم كل غرفه بها حمام الله يعزكم و غرفة ملابس صغيرة وصالة تجمع الغرف جميعا و مخرج غير المخرج الرئيسي كي اتجنب وجود النساء في الصالات الرئيسية ولا اتقيد بالملابس والترتيب وقت دخولي للمنزل .

المنطقة الثالثة وهي منطقة الخدمات فيها غرفة خدم وملحقاتها + منطقة غسيل عامة + مطبخ رئيسي كبير + مخزن

المنطقة الرابعة هي سطح المنزل بها غرفة الدرج وبها غرفة غسيل ا لملابس و سأقوم ان شاء الله عقب توفر المادة المناسبه بتبليط السطح بالكامل و وضع جلسات مبسطه للشتاء والربيع وايام المطر المعدودة .

ملاحظات على البناء :
استخدمت فوارق الجدار للتحكم في الضلال بين سطح المنزل الخارجي من جميع الجهات وليست العملية مكلفه بصراحه + ارتفاع المنزل عن الارض تم ترفيعة عن الشارع العام بالاضافه ان ارتفاع غرف المنزل جميعها اربع امتار تقريبا لانني مؤمن بالديكور والثريات الكبيرة و ارتفاع الحرارة للاعلى وانخفاظ الجو البارد للاسفل .

التبريد والسخونه للماء سيكون مركزي للسخونه اي عدم وجود سخانات في الحمامات وانتم بكرامه اضافه الى الخزان الكبير الخارجي سيكون عليه اجهزة تبريد من تدمر ان شاء الله سيضمن وجود ماء ساخن وبارد بكامل ايام الاسبوع ان شاء الله

التوصيلات :
وضعت قابس مشترك في كل طوفه في كل غرفه + مصدر هاتف + مصدر شبكة الكترونية

النوافذ :
صممت النوافذ من الـ upvc حسب ما ارغب بهم و وضعت اطار كما في سوق واقف للخارج ليحمل الحماية الخارجية للمنزل ويعطي الطابع التراثي له

لن اضع حديقة لكثرة الحشرات بها رغم محبتي لها سأكتفي بمستطيل عرض مترين وطول 9 متر لأضع في اشجارنا الحبيبه من لوز و منجا و كنار و ليمون وبرتقال و تمر خلاص وبحاول ازرع عجوة المدينة .

الاضاءه الخارجية للحائط الخارجي ستكون فقط عباره عن فناره بسيطة تراثية + بعض الاعمال البسيطة بالــ grc .

وضعت سلوب لذوي الاحتياجات الخاصة في المداخل وستكون الاضاءه مخفية في كل الدراج الداخلية والخارجية اضافة الى عوامل خشونه للاسطح لعدم الانزلاق .

الحمامات وانتم بكرامه ستكون مبسطه جميعها ستحمل شكل مقارب من البلاط وافكر بالاحتفاظ بعدد من البلاط لحلات الضروره في المستقبل و تقريبا 4 حمامات ستكون موحده ان شاء الله .

الابواب ستكون من الكبس تيك وتقريبا مع المجموعه سيكون سعر الباب مع الاكسسوارات 1100 ريال

الابواب الخارجية ستكون الحديد المشغول مناسبا لشكل البيت التراثي

الاصباغ ستكون غالبيتها باللون الابيض لتعطي مساحه اكبر في الداخل بالاضافه الى اللون الاوف وايت الرملي للخارج ليتعتق مع الايام ويعطي جماليه اكبر .

الارضيات نصف المنزل سيكون رخام والنصف الاخر سيكون سجاد لغرض المعيشية الرئيسية ماعدا طبعا ارضيات الحمامات وانتم بكرامه والمطبخ الداخلي والخارجي .

وقريبا سأضع لكم اذا الله وفقني تفاصيل الديكور وخبرتي بما اطلعت عليه .
لمن يبحث عن ارضيات للحوش فكروا كثيرا في ارضيات الانترلوك شكل الفراشه على ان يكون القسم الذي سيكون موقف للسيارات باللون الاسود كي لا تظهر علامات السيارات
وانصح ان تكون الطبيلة من البنيات الاسمنتي ومفتوحه من الصوبين لضمان التهويه وعدم تعفن الروائح .

اخواني وخواتي ضعوا في بالكم الامور التالية :
مكان الشباك يجب ان يكون مواجهه لاشعة الشمس خلال اليوم على اقل تقدير نص ساعه لضمان نظافه البيت من الحشرات التي تموت بضوء الشمس واشعته .
ضعوا في حسبانكم كما ذكر الاخوان مكان المكيف في الغرفه ان يكون تحت السرير او على الجنب البعيد لكي لا يواجه وجهه النائم فيقوم بأنفلونزا دائما .
حطوا في بالكم التخزين فهو مهم وضعوا على الاقل لكل فرد حسب اتحياجاته الخاصة غرفة ملابس ملائمة قابله للتطوير مثل الخزائن المبتكرة و كذلك للاخوات لا تنسون اماكن المجوهرات والساعات الثمينة و للاخوه الذين لديهم احتياجات خاصة من ادويه وماشابه يضعوا في حساباتهم ثلاثة بقفل في الخزانه لكي لا تصل ليد الاطفال .
لا تنسون اخواني ان تضعوا اتجاه رؤوسكم في السرير اتجاه القبله يكون افضل بكثير .
وفقني الله انني بجوار جامع كبير فلا احتاج لطريقة لاشهار الاذان في المنزل اما لمن لم يوفقه الحظ في هذا عليه بوضع مكبرات صوت في الجبس في كل الغرف وبعدها تكريبها جميعا بجهاز بسيط مثل الاي باد ليعلن الاذان تلقائيا او حتى جوال قديم .
نقطه مهمه فكروا في كبار السن او لحظات العجز والمرض لا تجعلون منازلكم اماكن يصعب الحركة فيها او يكون فيها عزل لجميع قاطني المنزل .
ونقطه انا مؤمن فيها احد اكثر امور الانفصال وعدم التفاهم الاسري بيوتنا من طابقين او ثلاث كل واحد فينا مايدري عن الثاني للاسف الشديد الا نلاحظ سيارته طلعت ولا لا !! لو عددكم قليل حتى على حسبه 5 او 10 سنين مستقبلا فكروا نصيحه اخ في المنزل ذات الطابق الواحد والله ان اجمل والكل يشعر بالاخر وتذكروا شلون كانت بيوتنا الشعبيه قديما ومدى توالفنا مع بعضنا البعض والفرقه في البيوت الحديثة .
الدرج الي يطلع للسطح فكروا جيدا في اضائته وفكروا جيدا في توسعته لربما احتجتوا في المستقبل للكرسي المتحرك الذي يرفعك للاعلى وهو افضل وارخص في التكلفه والصيانه من المصعد .
فكروا خلف المنزل كما هو امام المنزل فحن لا نبني للاخرين لنتفاخر ولكن لنسمتع في منازلنا فلا تهملوا اي زاويه في المنزل واحلوا حتى بحاويات الاشجار ومكان وضعها والاضاءه اين ستوضع وكيف سيكون مكانها .
في الاخير صمموا ما يناسم ميولكم وليس كما يصمم الناس , صمموا كما تحبون ان ترتاحوا في المنزل وليس كما يقول الاشخاص الله والله حلو وجميل ومكلف لنبعد عن المظاهر ونصنع راحتنا ففي الحياه امور جمعه تكدر صفوها فلا نحرم انفسنا من مايساعدنا على سعادة انفسنا

وشكرا للجميع واعتذر على الاطالة

qatari1
04-09-2011, 08:11 AM
موضوع جميل ومفيد جداً...

الأخ المسك...

مشاركتك وملاحظاتك قيمة للغاية...

يعطيك العافية.

عناد2009
28-09-2011, 09:08 AM
وفقني الله انني بجوار جامع كبير فلا احتاج لطريقة لاشهار الاذان في المنزل اما لمن لم يوفقه الحظ في هذا عليه بوضع مكبرات صوت في الجبس في كل الغرف وبعدها تكريبها جميعا بجهاز بسيط مثل الاي باد ليعلن الاذان تلقائيا او حتى جوال قديم .


مرحبا اخوي ..
ممكن تفيدني عن هالسماعات من يركبها ومتى التركيب وهل انا اللي اشتريها او يوفرها لي العامل المختص..
وهل تنصحني في احد معين مختص وجزاك الله خير

بوسياف
29-11-2011, 09:23 AM
السلام عليكم جميعاا...

من 8 شهور كنت استفسر وناوي ابنئ بيت ... ولله الحمد والمنه اليوم البيت انبنئ وجاهز عظم ..

ببدأ معاكم من النية والتفكير ...

قبل كل شئ استخير الرحمن سبحانه مرة. ثنتين. ثلاث. عشر. عشرين الين تستقر النية وتطمئن للي انت مقبل عليه

نبدأ الان وبشكل نقاط .. ومن خبرتي المتواضعه جدااا...

اولا: اجلس مع نفسك عن البيت مؤقت دائم كم عدد الاولاد انت وزوجتك ،، فكر بصوت عالي جدا.. بحيث دائما تستمع بشكل جيد الي تقتنع فيه ويعجبك تنوته عندك والي غيره طاف..

ثانيا : اعمل مسح كامل لامكانياتك المالية وادرس وضعك بشكل جيد وتوقع الأسواء وتوقع التكلفه الكبر
يعني اعمل دراسة وكانك داش مشروع ..

ثالثا: اوصيك ونفسي بدراسة الخرائط وتعديلها لو مليون مرة وخذ وقتك لو تاخذ سنه على الخرائط لانها اهم شئ اهي الاساسات الي بتحصل صعوبة كبيرة في تعديلها .وللعلم البنت هاوس موب بس غرفة خليها غرفتين وحمامين شالمشكلة أقل شئ تستفيد استور فوق السطح .. واهم شئ انتبه لخرائط الخدمات بعد موب تقول موب مهمه وانا مستعجل ولا تنسى تضيف كيابل التلفزيون والانترنت والانتركم والنظام الصوتي داخل البيت(السماعات) ..

رابعا: اقرأ ،، كل ماتحصل وقت اقرأ جالس بعيادة ، تغسل موترك ، مسافر بطل جوالك واعمل بحث واقرأ
صدقني اكثر من 50% من الي انتبهت له او سويته كأن عن طريق اخواني اصحاب التجارب من قبلي سواءً بهذا المنتدى المميز او بمنتدى أخر .

خامسا: اختيار شركة المقاولات ،، لاتستعجل في الأختيار ولا تستعجل في العقد ،،ولاتأخذ الأرخص بل خذ الاجود الانسب وأسال عن الشركة وياحبذا لو تكون مجربها من قبل وعارف شغلها وكفاءتها .. وعند صياغة العقد تذكر وتأكد بأنك انت الاقوى ضع شروطك وبالتفصيل الممل ولاتنحرج او تستحي انت تدفع فلوس وهو يخدمك بفلوسك موب صدقة .. وتذكر وتاكد ان ارباحه لاتقل عن 25% من المبلغ ....

سادسا: ركز عليهم بالأساسات واختار المكتب الاستشاري المشرف بكل عناية

سابعا: دائما استبق الخطوة القادمة بخطوة او اثنتين اقل شئ ،، يعني تو المقاول بداء بالاساسات ابحث عن شركات الكهرباء والماء والنجارة الجيدة ماراح تخسر شئ اقل الايمان اذا جاء وقت الكهرباء والماي تكون جاهز وحتى لو توقع العقد قبل اشهر ...

ثامنا: انتبه لحجم الدرايش والابواب من الطابق الارضي ونصيحتي لك اشتغل على النظام البلدي بالبنيان لانك تعرف حجم الريشة والباب قبل لايصب ..والسقف الارضي لايقل عن 4 امتار يكون ارتفاعه لان الصالات والمجالس والابداع يكون فيها من ديكور ولوحات ولمسات فنية تحتاج للمساحة ....

تاسعا: اي شئ مايعجبك عدله حتى لو تزيد فلوس من جيبك ، ولاتعتمد على رأي الاستشاري او المقاول فقط لازم يكون عندك اكثر من شخص للرجوع اليهم واستشارتهم...

عاشرا: اماكن ديبيات الكهرباء انتبه لها واحلى شئ تكون تحت الدرج وبعدها تكون ببيت الدرج بالطابق الاول والبنت هاوس ، وحدد للكهربائي اماكن الافياش الكهربائية وكيابل التلفزيون والانتركم والتلفون والسماعات انتبه نبه المقاول الكهربائي مايسوي شئ الين يرجع لك لان الي بيسويه اهو الالاماكن النهائية للكهرباء والتوصيلات .

هذي الملاحظات الي طرت علي وحبيت اشاركها وياكم ،، بالنسبة للتشطيب من ابلش فيه بأذن الله راح اكتبها لكم بأذن الله ...

(اهم شئ اخواني واخواتي ارجع اذكركم الاستخارة بكل صغيرة وكبيرة ،، والله لها فوائد عظيمة وعجيبه من تواظب عليها بتعرفها..)

اتمنى لكم التوفيق ....

الفرحه
12-12-2011, 01:26 PM
مجهود تشكرون عليه ويعطيكم العافية .

Amer
11-02-2012, 06:00 PM
الاهتمام بجوده المواد و متانة التنفيذ أساسية لكل مالك ...

" يا مسترخص اللحم عند المرق تندم "

المهندس عبدالعزيز
11-02-2012, 06:50 PM
أكبر خطأ وجميع الملاك يقعون فيه ويسبب بزيادة سعر البناء 10% هو التسليح الزائد للمبنى من الناحية الانشائية

Chambray
26-02-2012, 05:15 AM
انا في مرحله ( للصبر حدود ) خخخخخخخخخخ
تعبت من المقاولين والتعب النفسي
وانتظر متى اخلص هالبيت
والاخطاء موجوده لامحاله .. لكن الحمد لله بعض الساعات الواحد يرضى بالاخطاء الموجوده

اكبر خطأ متحسف عليه لحد الآن هو ارتفاع السقف للبنت هاوس .. ومب محصل له حل :(
وفي اشياء الحمد لله عدلت عليها قبل صبيه السقف ..

يونيك ^ قطر
07-03-2012, 07:45 PM
بصراحه ماقصرت على هل التنبية وفي اشياء وايد المفروض الواحد يحسبلها الف حساب
مثل ما تفضلت وذكرتهم وان شاء الله ان الكل يستفيد من هل الاخطاء وأولهم أنا لاني في بداية البنيان والله يوفق الجميع ان شاء الله ....

معماري قطري
26-04-2012, 03:08 AM
الخطأ اللي ندمت عليه هو اني سويت بلاط الحمام لين ثلاثة ارباع الطوفة على اساس اركب انتردوجلاس ، وتميت سنين وانا ناسية الموضوع ويوم قررت لقيت انه السخان بيعترض الموضوع لانه نص السخان عالبلاط والنص الثاني عالطوفة الغير مبلطة ، بس اللي ركب لي الانتردوجلاس خبى لي السخان ومايبين بس المشكلة الحين لو اخترب السخان اشلون ابدله ؟؟؟؟


إخت ضوى الحل بسيط وسهل .. من هالأيام ممكن تسوين صيانة شامله أقصد إلغاء السخانات الفردية لكل حمام والإتجاه لنظام فلترة وتسخين وضغط مركزي لكامل البيت وبحيث تبنين غرفة فوق السطح تحمي هذي المعدات وترتاحين بالكامل ... الحمد لله لي ست سنين من سويت هالنظام وللحين ما واجهتني مشاكل الا مع العوامه وتبديلها سهل وأشوف انه حان الوقت لصيانة فلتر الماء المركزي

ابو جمال
27-04-2012, 05:13 PM
موضوع رائع جداً الى الامام ..... متابع بقوه

معماري قطري
28-04-2012, 02:00 AM
انا في مرحله ( للصبر حدود ) خخخخخخخخخخ
تعبت من المقاولين والتعب النفسي
وانتظر متى اخلص هالبيت
والاخطاء موجوده لامحاله .. لكن الحمد لله بعض الساعات الواحد يرضى بالاخطاء الموجوده

اكبر خطأ متحسف عليه لحد الآن هو ارتفاع السقف للبنت هاوس .. ومب محصل له حل :(
وفي اشياء الحمد لله عدلت عليها قبل صبيه السقف ..



شوف إخوي بعض المرات احنا نكبر المشكلة بكثرة تفكيرنا فيها كل ما نلاحظها ونتخيلها خطأ كبير وما نقدر نعيش معاه، أتوقع سقف البنتاهاوس مب أقل من مترين ونص وهو إرتفاع معقول، والمصممين غالباً يركزون على زيادة الإرتفاع في الدور الأرضي والأول بسبب إنه فيه تحديد لإجمالي ارتفاع البيت من التخطيط العمراني لحد معين ما يزيد عنه وأتوقع 12 متر مع حساب حايط السقف، يعني تبي أقل شيء حايط السقف 40 أو 50 سم للبنتاهاوس وبعدين سمك السقف بيكون قول 30 سم وخل نفترض إرتفاع البنتاهاوس 2 ونص بنكون خلصنا من ال 12 متر 3 متر و30 سم وبيبقى عندنا 8 متر و70 سم، قول منها ارتفاع البيت 45سم وسمك الأسقف الإثنين خلنا نكون ماخذين السمك الأدنى 25 سم بيطلع لنا 50 سم للإثنين، ولو خصمناها بيبقى لنا للدور الأول والأرضي في حدود 3 متر و88 سم لكل دور ولو كان ارتفاع البنتاهاوس 3 بيقل الباقي للأدوار الأهم ولو كان البيت مرتفع في أرضية الدور الارضي ... بعضهم يوصلون ارتفاعه الى متر ... بتصفي على إرتفاع وايد أقل.

ولا تنسى البنتاهاوس قليل تستخدمه وما فيه داعي تسوي جبس ممكن كورنيش كفايه، وهذي القوانين لازم تتعدل وتزيد الإرتفاعات بس الله يهدي بعض العقليات في التخطيط تطبيق مباشر للقانون بدون أي تعديل وبدون إستثناء، مع اننا بعض الأحيان نشوف بيوت شامخه فوق ال12 متر بوايد ومرات نشوف ملحق دورين ساد أنفاس الجار.

حاول تخلي البنتاهاوس غرفة رياضة أو صالة تلفزيون أو سوها على شكل مسرح منزلي بنظام صوت ومضادات للصدى، أو مخزن أو غرفة خدم بس ادرس كل السلبيات والإيجابيات، وبالتوفيق إن شاء الله

معماري قطري
28-04-2012, 02:14 AM
أنا يا إخوان أسأت بتغليب اللمحة الجمالية والفخامية على درج الصالة الرئيسي على اللمحة الخدمية والإقتصادية، فبالغت في تصميم درج فاخر بإرتفاع مريح وبتفاصيل جميلة، وبإضاءَة في عتبات الدرج، ووحده الدرابزين كلفني حول 60 الف ريال، والرخام كلف ما يقارب من ال 65 الف ريال، والمنظر طلع جذاب وعطى روح للبيت، لكن الآن أُفكر لو أنني عملت درج خفيف ومغلق على جنب الصالة، وبدون درابزين أو بدرابزين ألمنيوم بسيط وعملت مصعد جنبه لكان أوفر وعملي أكثر لي، وسأُوافيكم بصور عن هذا الدرج وتوضيحات أكثر وأجزم أن الغالبية سيقولون الوضع الآن أحلى وأنفع

ضوى
29-04-2012, 09:18 AM
إخت ضوى الحل بسيط وسهل .. من هالأيام ممكن تسوين صيانة شامله أقصد إلغاء السخانات الفردية لكل حمام والإتجاه لنظام فلترة وتسخين وضغط مركزي لكامل البيت وبحيث تبنين غرفة فوق السطح تحمي هذي المعدات وترتاحين بالكامل ... الحمد لله لي ست سنين من سويت هالنظام وللحين ما واجهتني مشاكل الا مع العوامه وتبديلها سهل وأشوف انه حان الوقت لصيانة فلتر الماء المركزي

ممكن الغائها في الوقت الحالي وانا ابني الطابق الثاني ؟؟؟

معماري قطري
29-04-2012, 06:09 PM
يا جماعة الخير نصيحة للي يبي يسوي بلاط رخام سراميك بورسلان اللي سطحه فيه شوي خشونه اياني واياكم تخلون اللي يركب يصب الروبه صب ويمسح البلاط كله تراه بيخرب لون البلاط وبيلصق بالسطح الخشن والحل ان تقولون له بس بكل تركيز حط الروبه فقط بين الشقوق والفتحات اللي بين البلاطه والثانيه وخاصه اذا كان اللي يركب مصري لانهم ما يقتنعون بالنصيحة لما تطلب منهم ويقولون لك ان هذا عملهم وهم ادرى به وحتى لما تجيب لهم البلاطه الجديده وتراويهم الاخلاف بينها وبين اللي راكبه من ناحية اللون صدقوني ما يعترفون بالخطاء فرجاء لا تخلون اللي يركب يخرب عليكم البلاط بها الطريقة

أُف لهالدرجه؟ أنا صدقني دوم أحذر من العرب ومن العمالة قليلة الخبرة ... العربي دوم هو صح وانت غلط ما ادري شيتوقعون منا، والعمالة قليلة الخبرة ما يسمع الكلام بيضرك بيضرك ... مره ركبت بورسلان إيطالي ناعم ولماع وإستخدمت مونه خاصة ... إيبوكس أسود من يبقى نص ساعه ما يطير لازم يمسحون البلاط أول بأول وحذرت العمال وكانوا ما شاء الله خبره، بس لسوء الحظ تأخروا شوي بالمسح ولزق بعض ال grout وخذ معاي حول سنة لين طار شوي شوي بالغسيل، يعني تخيلوا بلاط بيج وفيه شوية ظلال أسود، بس حظي انه كان في حجرة جانبيه

معماري قطري
29-04-2012, 06:39 PM
السلام عليكم جميعاا...

من 8 شهور كنت استفسر وناوي ابنئ بيت ... ولله الحمد والمنه اليوم البيت انبنئ وجاهز عظم ..

ببدأ معاكم من النية والتفكير ...

قبل كل شئ استخير الرحمن سبحانه مرة. ثنتين. ثلاث. عشر. عشرين الين تستقر النية وتطمئن للي انت مقبل عليه

نبدأ الان وبشكل نقاط .. ومن خبرتي المتواضعه جدااا...

اولا: اجلس مع نفسك عن البيت مؤقت دائم كم عدد الاولاد انت وزوجتك ،، فكر بصوت عالي جدا.. بحيث دائما تستمع بشكل جيد الي تقتنع فيه ويعجبك تنوته عندك والي غيره طاف..

ثانيا : اعمل مسح كامل لامكانياتك المالية وادرس وضعك بشكل جيد وتوقع الأسواء وتوقع التكلفه الكبر
يعني اعمل دراسة وكانك داش مشروع ..

ثالثا: اوصيك ونفسي بدراسة الخرائط وتعديلها لو مليون مرة وخذ وقتك لو تاخذ سنه على الخرائط لانها اهم شئ اهي الاساسات الي بتحصل صعوبة كبيرة في تعديلها .وللعلم البنت هاوس موب بس غرفة خليها غرفتين وحمامين شالمشكلة أقل شئ تستفيد استور فوق السطح .. واهم شئ انتبه لخرائط الخدمات بعد موب تقول موب مهمه وانا مستعجل ولا تنسى تضيف كيابل التلفزيون والانترنت والانتركم والنظام الصوتي داخل البيت(السماعات) ..

رابعا: اقرأ ،، كل ماتحصل وقت اقرأ جالس بعيادة ، تغسل موترك ، مسافر بطل جوالك واعمل بحث واقرأ
صدقني اكثر من 50% من الي انتبهت له او سويته كأن عن طريق اخواني اصحاب التجارب من قبلي سواءً بهذا المنتدى المميز او بمنتدى أخر .

خامسا: اختيار شركة المقاولات ،، لاتستعجل في الأختيار ولا تستعجل في العقد ،،ولاتأخذ الأرخص بل خذ الاجود الانسب وأسال عن الشركة وياحبذا لو تكون مجربها من قبل وعارف شغلها وكفاءتها .. وعند صياغة العقد تذكر وتأكد بأنك انت الاقوى ضع شروطك وبالتفصيل الممل ولاتنحرج او تستحي انت تدفع فلوس وهو يخدمك بفلوسك موب صدقة .. وتذكر وتاكد ان ارباحه لاتقل عن 25% من المبلغ ....

سادسا: ركز عليهم بالأساسات واختار المكتب الاستشاري المشرف بكل عناية

سابعا: دائما استبق الخطوة القادمة بخطوة او اثنتين اقل شئ ،، يعني تو المقاول بداء بالاساسات ابحث عن شركات الكهرباء والماء والنجارة الجيدة ماراح تخسر شئ اقل الايمان اذا جاء وقت الكهرباء والماي تكون جاهز وحتى لو توقع العقد قبل اشهر ...

ثامنا: انتبه لحجم الدرايش والابواب من الطابق الارضي ونصيحتي لك اشتغل على النظام البلدي بالبنيان لانك تعرف حجم الريشة والباب قبل لايصب ..والسقف الارضي لايقل عن 4 امتار يكون ارتفاعه لان الصالات والمجالس والابداع يكون فيها من ديكور ولوحات ولمسات فنية تحتاج للمساحة ....

تاسعا: اي شئ مايعجبك عدله حتى لو تزيد فلوس من جيبك ، ولاتعتمد على رأي الاستشاري او المقاول فقط لازم يكون عندك اكثر من شخص للرجوع اليهم واستشارتهم...

عاشرا: اماكن ديبيات الكهرباء انتبه لها واحلى شئ تكون تحت الدرج وبعدها تكون ببيت الدرج بالطابق الاول والبنت هاوس ، وحدد للكهربائي اماكن الافياش الكهربائية وكيابل التلفزيون والانتركم والتلفون والسماعات انتبه نبه المقاول الكهربائي مايسوي شئ الين يرجع لك لان الي بيسويه اهو الالاماكن النهائية للكهرباء والتوصيلات .

هذي الملاحظات الي طرت علي وحبيت اشاركها وياكم ،، بالنسبة للتشطيب من ابلش فيه بأذن الله راح اكتبها لكم بأذن الله ...

(اهم شئ اخواني واخواتي ارجع اذكركم الاستخارة بكل صغيرة وكبيرة ،، والله لها فوائد عظيمة وعجيبه من تواظب عليها بتعرفها..)

اتمنى لكم التوفيق ....


ما شاء الله ما قصرت في شيء

انا معاك في كل النقاط الا " ثامنا: انتبه لحجم الدرايش والابواب من الطابق الارضي ونصيحتي لك اشتغل على النظام البلدي بالبنيان لانك تعرف حجم الريشة والباب قبل لايصب .." بالنسبة لطريقة البناء فالأفضل هو بناء الهيكل الخرساني وبعدين بناء قواطع الطابوق، ولا تنسى إن مواصفات البناء القطرية تنص على أن أي نقطة إتصال بين الطابوق والخرسانة يجب أن تربط بروابط حديدية خاصة، بحيث أن فيه نوعيات للحديد المغلفن تثبت في الخرسانة بمسامير مسدس وتغمس نهاياتها داخل مونة الإسمنت بين الطابوق وهي رطبة فعندما تجف تكون ثابتة مع الطابوق ونقطة وصل بين الحائط والعمود أو العارضة الخرسانية، وبالنسبة لأماكن الدرايش والأبواب يكون تحديد مكانها أسهل في هذي المرحلة وأدق ولازم بعد حوافها تُملى بالخرسانة علشان تكون متماسكة وتمسك فيها براغي تثبيت الأبواب والألمنيوم أو اليو بي في سي.

وعن موضوع الدرايش والإنارة الطبيعية نصيحة لازم نستفيد من شمس بلادنا بعمل قبب إنارة أو سكاي لايت هرمي، في الصالات والمجالس إن أمكن مهمه هذي الإنارة وحتى في حمام الغرفة الرئيسي فوق، صدقوني تغير الجو في البيت كله مع بداية طلوع الشمس إلى مغيبها، سويت عندي في البيت 4 سكاي لايتات وكنت متخوف من كبر بعضها ومن الحرارة، وحتى مهندس التكييف حط لي 6 مكيفات في الصالة كل واحد 2 طن، والحين أشغل نصها لأن المكان منور وبارد في نفس الوقت، ما ادري يمكن غلط اننا نحط عازل فوي السطح ونترك الحوائط بدون عازل حراري، لأن تنفس البيت الطبيعي البرودة أكثف تنزل من فوق لتحت والحرارة ترتفع لفوق، ولو حصلت درايش وقبب بتطلع منها بسهوله، ولو حصلت سقف معزول العازل يشتغل في الإتجاهين ويخلي الحرارة متكدسة فوق وتنزل على رؤوس الساكنين في عز الحر والمكيفات تجرخ وما تلحق ونقول مركبين عازل بس بدون جدوى.

ودمتم سالمين، ولنا عودة مع موضوع العزل الحراري.

ثابت
01-05-2012, 12:48 PM
المشاكل الي اكتشفتها بعد البنيان

1- عدم عزل موقف السيارات من حوش البيت وهذا خطاء كبير دخول وخروج السيارة حوش البيت.
2- عدم بناء غرفة خارجية للسواق واطريت احط بورتكبن واكسر واخرب واعفس
3- تمديد الحمامات داخلية وبهذلتني لنة لو صار تسريب لازم تكسر
4- عدم وضع سواكت كهرباء في كل الجدران مما جعلني لا استطيع ان اتحكم بترتيب الغرف كثروا سواكت الكهرباء ويفضل بكل الجدران بالغرفة
5- مساحات الحمامات صغيرة وسع قد ماتقدر
6- لا تفكر بالحديقة لنها مكلفة والمشكلة الشمس تحرق كل شي والله دفعت مرة بشهر 18000 ريال علشان بس يعيد ترتيب الحديقة وفي الاخير كنسلتها وسويت احواض وزرعت نخل ومشكلة الحر والعشب يجمع النامس والحشرات يعني جونا مايصلح حديقة في البيت

معماري قطري
02-05-2012, 01:08 AM
ممكن الغائها في الوقت الحالي وانا ابني الطابق الثاني ؟؟؟


ما فهمت طال عمرج شتقصدين، هل البيت غير مسكون للآن؟ أو تبنين طابق ثاني على بيت جاهز؟ وفي كل حالة ممكن تلغينها وتركبين المركزية وأتوقع تحتاجين خط ماي حار بجانب الخط البارد... يعني فيها شوية شغل وتكلفه بس تسوى وبتكون راحة بال لج .. خصوصاً إذا سويتي غرفة فوق وحاولي تخلينها واسعة كفاية وحطي النظام المتكامل من عند تدمر أو الطيب أو غيرهم بس أشوف تدمر شغلهم يبين أنظف وهم يركبون... مري قبل عليهم عند جسر مدماك واسئلي عن شيحتاجون منج تسوين وتوكلي على الله ... انا لي ست سنين مركب هالنظام من شركة الطيب والحمد لله مشاكل العوامة بس وحان وقت تنظيف الفلتر أشوف الماي أوقات مصفر، لكن السخانات وضعهم زين للحين وأشغلهم صيف وشتاء في الصيف وحده بس الشتاء ثنتين، وفي الصيف عشان مبرد الماي يبرد زياده وأوقات تخلطين معاه شوي حار علشان يجي معتدل.

ضوى
02-05-2012, 09:31 AM
ما فهمت طال عمرج شتقصدين، هل البيت غير مسكون للآن؟ أو تبنين طابق ثاني على بيت جاهز؟ وفي كل حالة ممكن تلغينها وتركبين المركزية وأتوقع تحتاجين خط ماي حار بجانب الخط البارد... يعني فيها شوية شغل وتكلفه بس تسوى وبتكون راحة بال لج .. خصوصاً إذا سويتي غرفة فوق وحاولي تخلينها واسعة كفاية وحطي النظام المتكامل من عند تدمر أو الطيب أو غيرهم بس أشوف تدمر شغلهم يبين أنظف وهم يركبون... مري قبل عليهم عند جسر مدماك واسئلي عن شيحتاجون منج تسوين وتوكلي على الله ... انا لي ست سنين مركب هالنظام من شركة الطيب والحمد لله مشاكل العوامة بس وحان وقت تنظيف الفلتر أشوف الماي أوقات مصفر، لكن السخانات وضعهم زين للحين وأشغلهم صيف وشتاء في الصيف وحده بس الشتاء ثنتين، وفي الصيف عشان مبرد الماي يبرد زياده وأوقات تخلطين معاه شوي حار علشان يجي معتدل.

جزاك ربي الجنة اخوي الكريم ، ماقصرت

معماري قطري
02-05-2012, 12:10 PM
جزاك ربي الجنة اخوي الكريم ، ماقصرت

آمين .. ولج بمثل ما دعيتي يا رب

معماري قطري
02-05-2012, 04:27 PM
المشاكل الي اكتشفتها بعد البنيان

1- عدم عزل موقف السيارات من حوش البيت وهذا خطاء كبير دخول وخروج السيارة حوش البيت.
2- عدم بناء غرفة خارجية للسواق واطريت احط بورتكبن واكسر واخرب واعفس
3- تمديد الحمامات داخلية وبهذلتني لنة لو صار تسريب لازم تكسر
4- عدم وضع سواكت كهرباء في كل الجدران مما جعلني لا استطيع ان اتحكم بترتيب الغرف كثروا سواكت الكهرباء ويفضل بكل الجدران بالغرفة
5- مساحات الحمامات صغيرة وسع قد ماتقدر
6- لا تفكر بالحديقة لنها مكلفة والمشكلة الشمس تحرق كل شي والله دفعت مرة بشهر 18000 ريال علشان بس يعيد ترتيب الحديقة وفي الاخير كنسلتها وسويت احواض وزرعت نخل ومشكلة الحر والعشب يجمع النامس والحشرات يعني جونا مايصلح حديقة في البيت

هلا إخوي وإسمح لي بهالمداخلة

1. دخول السيارة للبيت إذا كان الحوش واسع برستيج ويعطيك أمان أكثر بس ركب جهاز فتح الباب الكهربائي، وركز على إنك تسوي أرضية قوية للسيارات وركب بلاط مايل للون الرمادي الغامق وشبه أملس لسهولة غسيله وعدم وضوح تواير السيارات عليه. أما إذا الحوش صغير فعمل مواقف سيارات لها باب خارجي أجدى وعملي بس حلو لو تخليها جوانب طابوق ومن فوق كي سبان المقوس وتسوي باب حديد ينقفل بين البيت وموقف السيارة وتحط باب سحاب على فوق كهربائي برموت كنترول حق دخول وخروج السيارة، ومقاس 3 في 6 للسيارات العادية جيد وممكن تسوي أرفف حديد على جنب لتخزين بعض المواد، وحتى البعض يدلعون سياراتهم بمكيف.
2.هذي معاك فيها وكارثية والأفضل تسويها كافية لشخصين مع حمام تكرم 2 في 2 متر ومع كسرة بسيطة حق فرن وثلاجة للسايق.
3. وشحادك تكسر الا إذا بتسويها داخلية مرة ثانية ولا بتسوي تجديد للحمام، لكن إذا بتحط الجديدة خارجية تحتاج يسوون فتحات بالدريل ويدخلون البايبات الجديدة ويخلصها لك الشاطر ممكن في يوم واحد.
4.معاك 100% مع ان فيه لها حلول، وفيه نوعيات الحين من الوايرات تجي مثل اللزقة تلزقها على الحايط وتصبغ فوقها وتركب المفتاح الكهربائي في أي مكان تبي بس بتضطر تزيد يمكن سمك سلك الكهرب الداخلي وتزيد قوة البريكر أو الفاصل.
5. مساحة أي حمام تعتمد على شتبي من قطع فيه وحق شاور عادي ومغسلة وتكرم مرحاض 2 في 2 مساحة كافية وبزياده، وحتى ممكن 1.8 في 1.8 متر، لكن لو تبي تزيد قطع وتسوي ديكور يختلف لكل حمام مساحته بعدين، وركزوا على عدم المبالغة في تصغير درايش الحمام كبروها بحدود بحيث تنشر نور الشمس بدون تأثير على الخصوصية.
6. الا فكر في الحديقة وفكر وفكر، انا بيتي مساحة حوشه 1200 والبيت ماخذ جزء كبير من المساحة، سويت فيه دوار ومواقف كافية حق 8 سيارات مظللة، وسويت فيه عدد 7 أماكن للزراعة تفصل طريق مرور السيارة عن البيت وتفصل الدوار بأقواس حلوة، وعملت التمديدات لها قبل تركيب بلاط الحوش وسويت نظام التنقيط وما شاء الله الحين الزراعة مجملة البيت وصوت الطيور مونسني، وحتى جدام البيت زرعت سدر وقرط مزهر ونخله وداخل زرعت نخل ونوعيات شجر مختلفة وزرعت ست واشنطينا اللي تطلع مثل النخله طويلة وبدت الحين تبين من برا وهذي على الدوار وأشوفها روعة ولا لها تأثير الا الجيد بس حشرات مثل النمل لها مكافحة خاصة وقليلة والله.

نوت
25-05-2012, 01:45 PM
6. الا فكر في الحديقة وفكر وفكر، انا البيت وتفصل الدوار بأقواس حلوة، وعملت التمديدات لها قبل تركيب بلاط الحوش وسويت نظام التنقيط وما شاء الله الحين الزراعة مجملة البيت وصوت الطيور مونسني، وحتى جدام البيت زرعت سدر وقرط مزهر ونخله وداخل زرعت نخل ونوعيات شجر مختلفة وزرعت ست واشنطينا اللي تطلع مثل النخله طويلة وبدت الحين تبين من برا وهذي على الدوار وأشوفها روعة ولا لها تأثير الا الجيد بس حشرات مثل النمل لها مكافحة خاصة وقليلة والله.بيتي مساحة حوشه 1200 والبيت ماخذ جزء كبير من المساحة، سويت فيه دوار ومواقف كافية حق 8 سيارات مظللة، وسويت فيه عدد 7 أماكن للزراعة تفصل طريق مرور السيارة عن


اخوي معماري قطر
ممكن نشوف صور لحديقة
البيت

معماري قطري
26-05-2012, 03:45 AM
6. الا فكر في الحديقة وفكر وفكر، انا البيت وتفصل الدوار بأقواس حلوة، وعملت التمديدات لها قبل تركيب بلاط الحوش وسويت نظام التنقيط وما شاء الله الحين الزراعة مجملة البيت وصوت الطيور مونسني، وحتى جدام البيت زرعت سدر وقرط مزهر ونخله وداخل زرعت نخل ونوعيات شجر مختلفة وزرعت ست واشنطينا اللي تطلع مثل النخله طويلة وبدت الحين تبين من برا وهذي على الدوار وأشوفها روعة ولا لها تأثير الا الجيد بس حشرات مثل النمل لها مكافحة خاصة وقليلة والله.بيتي مساحة حوشه 1200 والبيت ماخذ جزء كبير من المساحة، سويت فيه دوار ومواقف كافية حق 8 سيارات مظللة، وسويت فيه عدد 7 أماكن للزراعة تفصل طريق مرور السيارة عن


اخوي معماري قطر
ممكن نشوف صور لحديقة
البيت


إن شاء الله يا أخ نوت أو إخت نوت الإسم شوي يضيع .. صورت من فوق بس ما ظهرت الصور واضحة .. ونوعية الأشجار عادية ما تنسمى حديقة بالمعنى الصحيح اللي هي منسقة وتفتح النفس صراحة يبي لها حد متفرغ .. وجزء من الحديقة، من السبع أقسام يعني، صورته وحطيته في موضوع بناء حوض سباحة مغلق، وكان ودي أسوي موضوع متكامل عن الحديقة وتصوير يكون مرتب ومن كم جهة وواضح .. باحط اللي عندي وإن شاء الله أرتب لموضوع متكامل في المستقبل وأتمنى اللي عنده صور يشارك ويشرح لنا للإستفادة.

وتفضلوا الصور وسامحوني على عدم الوضوح وإن البيت لازمته صيانة وتجديد صبغ خارجي..

http://im29.gulfup.com/2012-05-26/1337988487191.jpg (http://www.gulfup.com/show/Xmj5s2zgwgwg8g)

وهذي الصورة يبين فيها جزء من الدوار وواحد من ثلاث أقواس تحدد الدوار ومسار السيارة من أطراف الدوار.

http://im26.gulfup.com/2012-05-26/1337988748491.jpg (http://www.gulfup.com/show/X1vlu0zhovf660)

وهذي صورة توضح حوض جانبي على جنب الباب وفيه غيره بعد في إرتداد البيت ال 3 أمتار من الجنب مثله تقريباً.

http://im25.gulfup.com/2012-05-26/1337989350181.jpg (http://www.gulfup.com/show/X1vmgr0h6thhql)


هذي توضح القوس المحدد للدوار اللي بجانب البيت، ويبين طابوق الحماية اللي لازم يكون بعمق حفرة الزراعة علشان يبعد تأثير الأملاح والماء عن حايط البيت.

وسامحوني على القصور.

almaf1a
30-05-2012, 11:13 AM
يجب اخذ الوقت الكافي في دراسه الخرائط وتوزيع الغرف
هناك خطئين وقعت فيهم
اول خطأ وقعت فيه كلفني مبلغ اضافي وكنت اقدر اتفاداه
وهو عمل غرفه للخدامه وغرفه للكوي ومكان لغسيل الملابس في الملاحق الخارجيه
ومازلت مقتنع بفكره استغلال البنت هاوس كغرفه للخدامه و لغسيل وكوي الملابس حتى نشر الثياب في السطح افضل من الحوش مع عمل صبيات في السطح على الاجناب لستر الملابس المنشوره
لكن ام العيال الله يحفظها عليها طلعات تقول مابي الخدامه في الفيلا رايحه وراده علينا

والخطأ الثاني هو ان دريشه من درايش البيت راح تكون اصغر من الباقي لان بيكون عليها مغسله للمطبخ الداخلي واذا كانت المغسله على الدريشه دايركت وهو الي افضله يجب ان يكون الارتفاع لحد الدريشه 6 طابوقات وليست خمس

معماري قطري
01-06-2012, 03:06 PM
يجب اخذ الوقت الكافي في دراسه الخرائط وتوزيع الغرف
هناك خطئين وقعت فيهم
اول خطأ وقعت فيه كلفني مبلغ اضافي وكنت اقدر اتفاداه
وهو عمل غرفه للخدامه وغرفه للكوي ومكان لغسيل الملابس في الملاحق الخارجيه
ومازلت مقتنع بفكره استغلال البنت هاوس كغرفه للخدامه و لغسيل وكوي الملابس حتى نشر الثياب في السطح افضل من الحوش مع عمل صبيات في السطح على الاجناب لستر الملابس المنشوره
لكن ام العيال الله يحفظها عليها طلعات تقول مابي الخدامه في الفيلا رايحه وراده علينا

والخطأ الثاني هو ان دريشه من درايش البيت راح تكون اصغر من الباقي لان بيكون عليها مغسله للمطبخ الداخلي واذا كانت المغسله على الدريشه دايركت وهو الي افضله يجب ان يكون الارتفاع لحد الدريشه 6 طابوقات وليست خمس

إخوي اللي عندك ما تُعتبر أخطاء نهائياً

وعادي جداً تحصل نافذة شوي مرتفعه وثانية نازلة حتى لو للأرض، لكن المهم من فوق يكونون في مستوى فوق طول الإنسان العادي وحتى ممكن يكون إرتفاعهم أكثر من إرتفاع الباب من فوق، وبالنسبة للبنتهاوس كثير منا يسويه وما يستغله لأن أصلاً نبالغ نسوي 5 غرف وإحنا عددنا ما يزيد عن 6 أشخاص كل 2 في غرفة وتبقى غرفتين فاضيات، والبعض يبالغ أكثر وأكثر ومجالس كبيرة محد يدخلها وصالات وغير كثير.. عني انا سويت غرفة جانبية تحت للخدامات وسويت لهم مكان للكوي والغسيل في مدخل الغرفة، وسويت مكان للغسيل قريب المطبخ الخارجي، وما يُستخدم للآن والغسالة اللي فيه تماتيك ما يعرفون لها بس المهم الوضع ماشي،، لكن نصيحة الواحد يسوي درج متصل من قرب المطبخ للبنتهاوس حتى يقدر يستغل الدرج كدرج خدمات إضافي وكممر هروب في حال لا قدر الله حريق.

وسلامتكم جميعاً.

نوت
08-06-2012, 03:36 PM
لدي حمام بدون شباك محصور بين الغرف ,كنت ابحث عمن يعمل له شباك في السقف ولم نجد سؤال الأن هل ممكن عمل شباك في السقف بعد ما عملنا العازل للسطح وهل بيكلف كثير , رايت الشباك في السقف في مسجد محطة السدره من يعرف مين ممكن ينفذ لنا هذا الشباك وباقل الخساير

معماري قطري
08-06-2012, 03:48 PM
لدي حمام بدون شباك محصور بين الغرف ,كنت ابحث عمن يعمل له شباك في السقف ولم نجد سؤال الأن هل ممكن عمل شباك في السقف بعد ما عملنا العازل للسطح وهل بيكلف كثير , رايت الشباك في السقف في مسجد محطة السدره من يعرف مين ممكن ينفذ لنا هذا الشباك وباقل الخساير


لو قبل كانت فيه حلول لكن الحين إرضوا بقسمة الله،، والتهويه ممكن تسوون لها دكت للشفاط يوصل للخارج من فوق الجبس والدرويش عندهم نوعيات شفاط راقية، ووايد حمامات وسطية وتهويتها جيدة وممشية الحال لتهتم وايد.

نوت
08-06-2012, 04:28 PM
لو قبل كانت فيه حلول لكن الحين إرضوا بقسمة الله،، والتهويه ممكن تسوون لها دكت للشفاط يوصل للخارج من فوق الجبس والدرويش عندهم نوعيات شفاط راقية، ووايد حمامات وسطية وتهويتها جيدة وممشية الحال لتهتم وايد.

ولأضاء الطبيعيه والتهويه وبالنسبه لبخار الماء الي يتكاثف بعد الشور وش الحل

معماري قطري
09-06-2012, 03:35 AM
ولأضاء الطبيعيه والتهويه وبالنسبه لبخار الماء الي يتكاثف بعد الشور وش الحل


الشفاط القوي ينفع بس الإضاءَة الطبيعية بتكون شغلة ألحين،، يعني فيها هدم أو قص السقف وبعدين عمل جزء خرساني شوي مرتفع وهذا يحتاج تدعيم انشائي .. وفيه حل ثاني بس المشكلة مب متوفر في قطر، وهذا الحل تمديد بعد دكت تحت السقف الخرساني وفوق السقف المستعال وعمل فتحة سواءً في السقف أو جانبية وتحتاج تمرر فيها تيوب خاص من داخل عاكس وهذا ينقل نور الشمس من حتى لو التيوب ذيه ملتف من الخارج للداخل .. شوف جرب تطلبه من النت لو تبيه بتكون أول واحد يستعمله في قطر... سو بحث في اليوتيوب عن solar tube وخذ فكره عن شاقصد، وهذا تركبه فوق أو من فتحه في الحايط ينقل النور للداخل وخصوصا عندنا الشمس طالعه ليل نهار

رامي خوري
12-09-2012, 04:54 PM
بصراحة يا جماعة فرحت بموضوعكم لأنه فعلا مفيد وأنا مستعد لأي نصيحة تريدونها

K.A
22-02-2013, 11:11 AM
من ناحيتي يوجد كم شغله ولكن ليس خطأ او عيب في البنيان
هي بالمختصر لما تأسس صح وتكون عارف شلون البيت بكل نواحيه راح يكون البيت بدون اخطاء

انا سنه ونص على الخرايط وبدلت 3 مرات لين آخر شي اقتنعت في الشكل والتوزيع
خطط صح بترتاح والمقاول بيرتاح
لما تجي على عماها تبي جي وجي وجي في لحظات لا تسمح بالرجوع مشكله تكلفه وتكسير وعوار راس

معماري قطري
22-02-2013, 02:14 PM
من ناحيتي يوجد كم شغله ولكن ليس خطأ او عيب في البنيان
هي بالمختصر لما تأسس صح وتكون عارف شلون البيت بكل نواحيه راح يكون البيت بدون اخطاء

انا سنه ونص على الخرايط وبدلت 3 مرات لين آخر شي اقتنعت في الشكل والتوزيع
خطط صح بترتاح والمقاول بيرتاح
لما تجي على عماها تبي جي وجي وجي في لحظات لا تسمح بالرجوع مشكله تكلفه وتكسير وعوار راس



صدقت إخوي الكريم دوم حطوا في بالكم التصميم المتوازن والمدروس صح يعتبر خطة بناء تمشي عليها للنهاية بدون رجوع للخلف أو لف لأي جهة وخربطة لأسباب تافهة.

ضوى
09-03-2013, 11:43 PM
من الاخطاء اللي سويتها بالطابق الثاني اني ماحطيت بانيوهاات كله شاورات بلاط وقطعةرخام وقطعة زجاج بس الماي يتجمع ومايمشي بسرعة للبالوعة وهالشي ضايقني وايد وخلاني اصرف نظرتماما عن الشاورات وافكر في البانيوهات مرة ثانية

معماري قطري
12-03-2013, 03:12 PM
من الاخطاء اللي سويتها بالطابق الثاني اني ماحطيت بانيوهاات كله شاورات بلاط وقطعةرخام وقطعة زجاج بس الماي يتجمع ومايمشي بسرعة للبالوعة وهالشي ضايقني وايد وخلاني اصرف نظرتماما عن الشاورات وافكر في البانيوهات مرة ثانية

هذي ممكن تتصلح بسهولة بس يبي لها حد يسوي سلوب صح للتصريف .. والمفروض قبل فتحة التصريف تكون شوي كبيرة.

ضوى
12-03-2013, 08:19 PM
هذي ممكن تتصلح بسهولة بس يبي لها حد يسوي سلوب صح للتصريف .. والمفروض قبل فتحة التصريف تكون شوي كبيرة.

ايه غصبا عنه المقاول بيسويه على حسابه وهو يضحك ، اتفقت معاه بعد مايخلص التجديد تحت وانتقل تحت يكسر هالجزءويسويه موزاييك ترا هو قالمب انا خخخخخ مايسوى عليه 40الف اللي عندي له

معماري قطري
13-03-2013, 12:25 PM
ايه غصبا عنه المقاول بيسويه على حسابه وهو يضحك ، اتفقت معاه بعد مايخلص التجديد تحت وانتقل تحت يكسر هالجزءويسويه موزاييك ترا هو قالمب انا خخخخخ مايسوى عليه 40الف اللي عندي له

طلعتي شاطره ومنتبهه وهذا المهم مسك مبلغ على المقاول حتى يكمل اللي عليه صح.

بن غيث
13-03-2013, 12:30 PM
صدقني معماري .. لو كنت ماسك مبلغ على المقاول وكنت تظن أنك ممكن تجبره على شئ .. غلطان

ممكن يخسرك أكثر من المبلغ الي ماسكه له .. وينسحب من المشروع .. وتطلع انت في النهاية .. خسران

ضوى
13-03-2013, 12:55 PM
صدقني معماري .. لو كنت ماسك مبلغ على المقاول وكنت تظن أنك ممكن تجبره على شئ .. غلطان

ممكن يخسرك أكثر من المبلغ الي ماسكه له .. وينسحب من المشروع .. وتطلع انت في النهاية .. خسران

كلامك صحيح اخوي بن غيث بس اتوقع في المراحل الاولية في المشروع ، بس لما تبقى تناتيف صغيرة ماتوقع يقدر ينسحب لانه اللي بيسويه وايد اقل من المبلغ اللي عليه

بن غيث
13-03-2013, 01:00 PM
أختي ..

لو باقي له يوم ويخلص .. يقدر يخرب الشغل .. وفي شغلات يسونها المقاوليين عديمي الذمة والضمير " لا أستطيع أن أقولها " لكن يخلي حياتكم جحيم .. وتكرهون البيت .. وأحتمال كبير تبيعونه حتى لو بخساره

معماري قطري
13-03-2013, 01:47 PM
أختي ..

لو باقي له يوم ويخلص .. يقدر يخرب الشغل .. وفي شغلات يسونها المقاوليين عديمي الذمة والضمير " لا أستطيع أن أقولها " لكن يخلي حياتكم جحيم .. وتكرهون البيت .. وأحتمال كبير تبيعونه حتى لو بخساره

صدقت يا بن غيث اللي فيهم طبع الإنتقام يسونها بس المفروض الواحد يكون حقاني معاهم وما يطلب المستحيل وما يطلب شيء مب موجود في العقد ويتفاوض بالحق ويعطيهم حقهم.

وصج الدخلاء على هذي المهنة يمكن حتى يدمرون البيت.

بن غيث
13-03-2013, 01:50 PM
متى بتبني .. معماري .. :vampire:

معماري قطري
13-03-2013, 01:54 PM
يكلمني مقاول محترم من أيام ويذكر لي إنه اتفق وصاحب مجمع سكني وبدأ يحفر للأساسات، وفي طرف الأرض والأرض كانت تبين منبسطة وسهله حصل الأرض سهلة الحفر، وشوي طلعت مخلفات بناء وكشره وتواير وتم يحفر لين وصل فوق 5 أمتار، ويقول خسرنا وايد في الدفان وفي الخرسانات وعلى مساحة كبيرة، وما عوضنا صاحب البنيان، لكن خذناه درس بأن نحط في العقد الحفر لعمق معين وبعدين إن طبيعة الأرض استلزمت يكون أكثر فعلى المالك.

بن غيث
13-03-2013, 02:02 PM
العقد شريعة المتعاقدين .. لكن .. توجد أعراف في كل مهنة

ومن المفروض أن يدرك المالك أنه يجب تعويضه عن الخسائر .. ولو يتناصفونها

ودائماً نذكر في العقود بند مهم جدا.. وهو .. الظروف الخارجه عن الارادة او عن الطبيعة العادية للعمل
وارتفاع الاسعار المفاجئ في المواد نتيجة لاي ظرف قهري او غير طبيعي

ضوى
14-03-2013, 11:15 AM
عاد لا تخرعوني كلها دور ونص اللي بانيتهم عنده :(

البحار00
21-03-2013, 01:25 AM
سويت فتحه لقبه ألمنيوم وياليتني ماسويتها

خايف من مشاكلها بعد كم سنه


انقذوني شنو الحل بنظركم

معماري قطري
21-03-2013, 06:53 AM
سويت فتحه لقبه ألمنيوم وياليتني ماسويتها

خايف من مشاكلها بعد كم سنه


انقذوني شنو الحل بنظركم

الحل يا اخوي في التفاصيل وفي الشغل الزين

شوف شركة المناعي متضامنه مع شركة الزامل للقبب على ما اذكر .. وشركة الزامل لها كان مكتب في قطر في شارع الريان ألحين طلعوا منه وإحتمال راحوا مكان ثاني أو طلعوا بالكامل سوق قطر ميت.

عندك يا اخوي بعد شركة قطر لليو بي في سي بس ألحين إدارتهم تعيسة .. سووا لي زجاج قبة 8 قطع بس بينهم خرسانه وثابتين وللحين ما فيهم مشاكل الحمد لله .. وسووا سكايلايت هرمي تم تصنيعه في الشارقه وشحنه للدوحه.

البحار00
21-03-2013, 08:14 AM
الحل يا اخوي في التفاصيل وفي الشغل الزين

شوف شركة المناعي متضامنه مع شركة الزامل للقبب على ما اذكر .. وشركة الزامل لها كان مكتب في قطر في شارع الريان ألحين طلعوا منه وإحتمال راحوا مكان ثاني أو طلعوا بالكامل سوق قطر ميت.

عندك يا اخوي بعد شركة قطر لليو بي في سي بس ألحين إدارتهم تعيسة .. سووا لي زجاج قبة 8 قطع بس بينهم خرسانه وثابتين وللحين ما فيهم مشاكل الحمد لله .. وسووا سكايلايت هرمي تم تصنيعه في الشارقه وشحنه للدوحه.

المشكله ياخوي خايف ان محد يضبطها وتطلع عيوبها بعد كم سنه

والطامه الكبرى اني ماسويتها خرسانه

ونفس الوقت خايف اني اسكر الفتحه بخرسانه ويصير بعدها عندي نزول في السقف

والله احترت ولاني بعارف شسوي

معماري قطري
21-03-2013, 08:44 PM
المشكله ياخوي خايف ان محد يضبطها وتطلع عيوبها بعد كم سنه

والطامه الكبرى اني ماسويتها خرسانه

ونفس الوقت خايف اني اسكر الفتحه بخرسانه ويصير بعدها عندي نزول في السقف

والله احترت ولاني بعارف شسوي

إذا سويت الفتحة بحواف خرسانة مرتفعه وهو المفروض يكون ما بتكون عندك مشكلة وممكن تسكر الفتحة بفيبر غلاس على شكل قبة يتصنع خصيصاً لها، وبحيث يغلف البروز الخرساني ويتصل معاه العازل المائي أو يتركب بعد ما يغلف العازل المائي البروز الخرساني المرتفع.

وإذا كانت فتحة دائرية في سقف البيت وهذا أتوقع صعب يسونه إنشائياً بتحتاج ترفع الأطراف بخرسانة جديدة تسويها، وبحيث تركب قطع حديد ينحفر لهم في الخرسانة المصبوبة قبل وتسوي بروز مرتفع 30 سم وبعدين تركب الفايبر غلاس أو تركب فريم الألمنيوم مع الزجاج وتكون عندك قبة مسكته.

حل ثاني عندك مصانع تصنع قبب بوليكاربونيت من قطعة وحده، وكان فيه واحد من الإخوان عارض إن شركته عندها وكاله لمصنع يسوي قبب من هذا النوع والمصنع في السعوديه .. على ما اذكر إسمه (محمد) بين قوسين مثل ما كتبته جرب وشوف مواضيعه، ولا بتحصل له ذكر في موضوع انا كتبته عن الزجاج كمادة بناء عمرانية، وبتستفيد إنك إستغليت القبة للإنارة الطبيعية، وصدقني بترتاح لها و3 أمتار ولا شيء يمكن تخوفت من كثرة الآراء والتخويف توكل على الله وعلمنا شصار معاك.

الـخـور
23-05-2013, 01:41 PM
السلام عليكم...

نرجع لهذا الموضوع .. باخطاء جديدة


1- عند عمل غرفة خدامة لابد من التاكد بان الاحتياج هو ليس للوقت الحالي
وعمل مساحة الغرفة لعدد كافي من الخدم للاحتياجات المستقبليه

اغلب الناس تسوي غرفة الخدامة صغيره جدا لكن في المستقبل تجد نفسها ماعندها مكان
لعدد 2 او 3 خدم

لهذا لابد الواحد ينتبه ويخطط لغرفة الخدامة بحيث تكون لاقصى حدد من الخدم الي تتوقعه للمستقبل



2- عند وضع غرفة لغسيل الملابس كملحق خارجي ينبغي الانتباه بحيث يكون بعيد عن المطبخ
ولابد من الانتباه لمكان نشر الملابس بحيث تكون بعيد عن المطبخ عشان ماتلزق رائحة الاكل في الملابس



3- عندما يكون المطبخ الاساسي داخل البيت لابد من عمل باب وممر ثم بان بحيث لو انفتح باب المطبخ لايدخل رائحة الاكل على الصالة وداخل البيت .. ويحبذ دائما ان المطبخ الداخلي يكون فقد للاشياء السريعة الي ماتكون لها رائحة والمطبخ الاساسي يكون خارج البيت

الـخـور
23-05-2013, 01:42 PM
4- احب انبه بان الدرج الحلزوني الي يودي للسقف صعب الركوب فيه ويمكن الاستغناء عن هذا الدرج بشكل افضل وهو كالتالي

http://qatarshares.com/vb/attachment.php?attachmentid=83378&stc=1&d=1369302088

مضارب دوسري
25-05-2013, 12:15 AM
افكر اسوي مثل الغرفة الزجاجيه في الحديقه ويكون سقفها كويك سبان واحط فيها مكيف
لان طول السنه جونا خار ماعدا شهرين او ثلاثه

إعلامي قطر
06-09-2013, 02:56 AM
..

من ملاحظاتي على أخطائي وأخطاء بعض الأصدقاء يحضرني التالي:

1-وضع البيت بمنتصف الأرض وبالتالي عدم القدرة مستقبلاً على بناء ملاحق
إضافية للأبناء أو لأي غرض وذلك لضيق المساحة يمين ويسار البيت !

2-تضييق المنزل بشكل عام والإهتمام بالمظهر الخارجي فقط لاغير
على حساب السعه الداخليه وكأن أهل المنزل بيسكنون بالحوش !

3-عدم المتابعة الكافية مع الكهربائي ونسيان تمديد الوايرات بعمدان
الطوف الخارجيه !

4-عدم وضع ساكتات كهرباء كافيه بالغرف خاصة يمين ويسار
سرير النوم وبالزوايا المقابله !

5-عدم تمديد كابلات التلفزيونات بشكل داخلي وعدم رفعها بالقدر الكافي
"مثلاً 6 طابوقات" ليكون التلفزيون بمستوى النظر ويغطي التمديدات أيضاً !

6-عدم وضع ساكتات دبل بجانب كابلات التلفزيون وهالشي راح يكشف تمديدات
الكهرباء ويشوّه الطوفه أو تحت التلفزيون على الأقل إذا كان معلق أو مرتفع !

7-عدم التأكد من إرتفاع الدور الأرضي بالشكل الكافي لإعطاء منظر
جمالي للمنزل وأعتقد 4 متر و 20 سم معقوله ومناسبه جداً !

8-عدم تخيل توزيع ديكورات المنزل بشكل تقريبي يسبب توزيع عشوائي
لساكتات الكهرباء ويشوه بعض الطوف وبالمقابل ينقص في بعض الزوايا !

9-عدم سؤال الاستشاري عن موقع كابل الكهرباء وأحياناً يكون الدي بي
بمنتصف الصاله أو غرفة الطعام مع إنه من الأفضل يكون تحت الدرج !

10-عدم سؤال الإستشاري عن الجسور النائمه وبالتالي تكون بعض
الجسور نازله بشكل يضيع المساحه ويخلي المالك يضطر يغطيه
بالجبس وينزل مستوى السقف بشكل يضايق أحياناً !

وهذي بالأخير وجهات نظر تحتمل الصواب والخطأ وللأمانه عندي
نقاط أخرى لكن أكتفي بهذي النقاط على الأقل بالوقت الحالي..

وشكراً للجميع على تفاعلهم واستفدت من عدة ردود
وشكراً لصاحب الموضوع أيضاً..

..

بوخالد911
06-09-2013, 03:05 AM
حالياً
عندي صالة مساحتها ٧ * ٥ ومالها سقف
لو رفعت راسك بتشوف السماء
والهدف بركب قبة

الخطأ اني لو صغرت من فوق حجم القبة
مثلاً لو خليتها بمساحة ٤ * ٤
يكفي
لان القبة بتكللللللللفني

تأملات
03-10-2013, 04:45 PM
انا اكبر خطا عندي أني كبرت مساحة البنيان على حساب الارض. وبهذا خسرت الحوش. وزادت التكلفة علي. وأنصح كل اخ تكون مساحة. البنيان بما لا يزيد عن550متر مع مراعة واجهة البيت تكون مناسبة. وهذا بصراحة محتاج مهندس استشاري. يعمل بضمير وهذا مفقود عندنا.

معماري قطري
03-10-2013, 10:30 PM
انا اكبر خطا عندي أني كبرت مساحة البنيان على حساب الارض. وبهذا خسرت الحوش. وزادت التكلفة علي. وأنصح كل اخ تكون مساحة. البنيان بما لا يزيد عن550متر مع مراعة واجهة البيت تكون مناسبة. وهذا بصراحة محتاج مهندس استشاري. يعمل بضمير وهذا مفقود عندنا.

هذا اللي دوم أنصح به .. فيه ناس ما يركزون على البناء العمودي وتوزيع الأدوار حسب الحاجة .. الدور الأرضي للجلوس والطبخ والإستقبال وغيره .. وبين 300 إلى 400 متر مربع كمساحة مسطحة بتخلي باقي من الأرض اللي مساحتها 900 متر حول 600 إلى 500 متر .. وأي واحد ينوي يبني لازم يفكر في ظروف أرضه وطريقة استفادته من الأرض أولاً، ويكون عنده مبدأ عن إحتياجاته وعن توزيعة الحوش المبدئية وياخذ هذي الطلبات لعدة استشاريين مختارين بعناية ويشوف من يكون أنسبهم ويتوكل على الله.

معماري قطري
03-10-2013, 10:42 PM
حالياً
عندي صالة مساحتها ٧ * ٥ ومالها سقف
لو رفعت راسك بتشوف السماء
والهدف بركب قبة

الخطأ اني لو صغرت من فوق حجم القبة
مثلاً لو خليتها بمساحة ٤ * ٤
يكفي
لان القبة بتكللللللللفني

القبة يا اخوي لها تصميم انشائي معقد ووزن خيالي .. شوف فيه مبنى قديم قرب القيادة العامة في رميلة .. ما اذكر هل هو قصر التشريفات ولا اللي جنبه على ما اعتقد اللي كان بيت مستشار .. من هوامير لأول .. المهم سقفه جاي منحني بتقوس للأعلى وفيه فتحات صغيرة مربعة أو دائرية وكل فتحة فيها قزاز .. قطرها تقريباً 40 - 50 سم أو متغيرة .. هذي صايدها بالعين من بعيد وودي أدخل المبنى بس ما اعرف المفتاح عند من.

شفت من أيام سقف زجاجي كامل بميلان على جهة وحدة وميلان بسيط .. والممر عبارة عن مكان مفتوح ومزروع بين مبنيين بارتفاع دورين ومفتوح للسماء عبر القزاز الفوقي .. مثبت بعوارض ألمنيوم كبيرة .. ولعرض 5 أمتار ممكن عملها بسهولة بس شوف شركة مختصة مثل الزامل للقبب والسكايلايت وغيره .. عندنا شوف شركات الألمنيوم واليو بي في سي .. بس مؤكد بيكلفك .. انا عندي 6 في 9 قالوا لي بيكلف حول 120000 من شركة الإختيار الألماني .. إنت عندك أسهل وبيجي الهيكل الحامل عبارة عن مربعات ألمنيوم مقوى بالحديد من داخل وتعطي شكل حلو وظلال خفيف.

معماري قطري
03-10-2013, 10:57 PM
..

من ملاحظاتي على أخطائي وأخطاء بعض الأصدقاء يحضرني التالي:

1-وضع البيت بمنتصف الأرض وبالتالي عدم القدرة مستقبلاً على بناء ملاحق
إضافية للأبناء أو لأي غرض وذلك لضيق المساحة يمين ويسار البيت !

لازم تكون فيه خطة .. وحلو تسوي البيت تدخله السيارة وتخطط أماكن متعددة للزراعة .. مب شرط كل شيء ينبني مع البيت ممكن على مراحل بس يكون المكان محدد ومعروف ومسوي الاحتياطات.

2-تضييق المنزل بشكل عام والإهتمام بالمظهر الخارجي فقط لاغير
على حساب السعه الداخليه وكأن أهل المنزل بيسكنون بالحوش !

كل ما كان المنظر بسيط وبدون بروزات تسبب تلوث الحائط بالغبار مع نزول المطر كل ما كان أحلى .. حتى فيه طرق عمل للبلاستر بشكل غير منتظم وبنقوشات بسيطة تعطي المبنى جمال وشكل غير وتكون عملية سهلة ورخيصة.

3-عدم المتابعة الكافية مع الكهربائي ونسيان تمديد الوايرات بعمدان
الطوف الخارجيه !

ما فيه شيء يكفي عن خطة مدروسة وتصاميم ومهندس متابع ينفذ كل شيء ولا يغفل شيء .. أما المتابعة الشخصية والتصميم الناقص فهذا لابد بيسوي متاعب وبيدخل الواحد في متاهات .. ممكن الشخص العادي يتابع بس تصميم واضح ومحدد كل شيء وكل الخطوات بحيث لو لاحظ نقص يقول للمقاول .. والمقاول الفاهم بيدرس الخرايط صح وبينفذ كل اللي فيها.

4-عدم وضع ساكتات كهرباء كافيه بالغرف خاصة يمين ويسار
سرير النوم وبالزوايا المقابله !

5-عدم تمديد كابلات التلفزيونات بشكل داخلي وعدم رفعها بالقدر الكافي
"مثلاً 6 طابوقات" ليكون التلفزيون بمستوى النظر ويغطي التمديدات أيضاً !

6-عدم وضع ساكتات دبل بجانب كابلات التلفزيون وهالشي راح يكشف تمديدات
الكهرباء ويشوّه الطوفه أو تحت التلفزيون على الأقل إذا كان معلق أو مرتفع !

7-عدم التأكد من إرتفاع الدور الأرضي بالشكل الكافي لإعطاء منظر
جمالي للمنزل وأعتقد 4 متر و 20 سم معقوله ومناسبه جداً !

8-عدم تخيل توزيع ديكورات المنزل بشكل تقريبي يسبب توزيع عشوائي
لساكتات الكهرباء ويشوه بعض الطوف وبالمقابل ينقص في بعض الزوايا !

9-عدم سؤال الاستشاري عن موقع كابل الكهرباء وأحياناً يكون الدي بي
بمنتصف الصاله أو غرفة الطعام مع إنه من الأفضل يكون تحت الدرج !

10-عدم سؤال الإستشاري عن الجسور النائمه وبالتالي تكون بعض
الجسور نازله بشكل يضيع المساحه ويخلي المالك يضطر يغطيه
بالجبس وينزل مستوى السقف بشكل يضايق أحياناً !

يحي بعض الإستشاريين الفاهمين كل شيء ينحل في إجتماعات بسيطة ومحضر إجتماع ويحطون النقاط على الحروف .. أما استشاري حنعملها بعدين وما أل لي وأُولت له ما ينفعون كلش .. أبسط شيء عمل توزيعة أثاث يوافق عليها المالك ومنها يتطور توزيع كهربي جيد .. حتى ألحين إستوت الكاميرات الأمنية ونظام إنذار الحريق شيء أساسي في المباني كلها.

وهذي بالأخير وجهات نظر تحتمل الصواب والخطأ وللأمانه عندي
نقاط أخرى لكن أكتفي بهذي النقاط على الأقل بالوقت الحالي..

وشكراً للجميع على تفاعلهم واستفدت من عدة ردود
وشكراً لصاحب الموضوع أيضاً..

..

نبي المزيد بالعكس لإستفادة الكل وفي رايي هذا الموضوع أهم المواضيع للإطلاع

الكواري 1972
08-10-2013, 11:04 PM
ماشاءالله عليكم

بيض الله اوجيهكم ع حرصكم

دروس مجانية

يعطيكم العافيه

رضى
17-10-2013, 12:02 PM
السلام عليكم ورحمة الله وبركاته

مشاركتي البسيطه وهي اقتراحات فقط ..

ويجب ان تكون الخطوات الاساسية هي ..

1/ إختيار مكتب استشاري ممتاز
2/ تجلس مع كل مصمم لحاله وترتب معه كل شي
( المصمم العمراني
* ترتب المساحات وتراعي مكان الفيلا والمحلق والمجلس مثلاً تترك خلف الفيلا 3 متر وتخليها مبرح للملابس والصوب الثاني الملحق بينه وبين الفيلا 2م وتغطية مستقبلا بطبيلة وتكون بها فتحات لدخول الشمس والجهة الجانبية الاخرى حسب المتبقي من الارض والامام حسب المساحة المتوفرة
* وتنتبه في ارتفاع الملحق حاول أن يكون مرتفع وذلك لمديدات دكتات الشفط
* وتراعي بأن يكون المحلق مكون من غرفة خدامة بحمامها وغرفة بمقاس الحمام وتكون لغسالات الملابس فقط وغرفة اخرى لاتقل مساحتها 4*4 وتكون استور للفيلا من " شنط وملابس شتوية وفرش واي شي ترجعون له وقت الحاجة" وبعده يأتي مخزن للثلاجات والمونه حق المطبخ ويفتح داخل المطبخ والمطبخ ويكون مساحة كبيرة لان بالمستقبل راح يزيد عدد افراد الاسرة ان شاء الله ويجب مراعاة ان يكون بكل غرفة بالملحق مروحه بالوسط للتهوية
* وبالنسبة للفيلا تراعي المساحة في الغرف بأن لا تقل عن 5*5م وذلك للمستقبل
* والحمام لا يقل عرضة عن 2م
*وان تجعل في الطابق العلوي مطبخ تحضيري بعرض الحمام
* وبالنسبة لوارش الفيلا حبذا لو ترفعه لإستغلال السطح جلسه خاصة
* وتراعي مكان الشبابيك وحجمها
* وايضاً مكان وارتفاع الابواب وعرضة يفضل تكبيرها ليزيد سعة بالبيت كامنظر
* وان تنتبه لدكتات صرف الحمامات حتى تغطيها مستقبلاً بالجبس
* واحاول ان ترفع الفيلا بحيث يكون عدد الدرجات لمدخل الفيلا لا يقل عن 5 درجات بقياس 75م اجمالي
* وان يكون هناك مخرج اخر للفيلا صوب الملحق)

المصمم الكهربائي
* تراعي بأن يكون الكيبل 150 اللي ممدد من السور لداخل الفيلا لان كهرماء توصل اعتقد 90 او 95 للطوفة
* وان تراعي امكان التليفون والنت والدش بأن يكونوا بمكان واحد ولا تنسى ان تجعل معها بنفس المكان سوكتات كهرب لتشغيلها وتكون محدد مكان التلفزيون وان ترفعه 1م من الارض
* وان تجعل في كل طوفة في الغرفة ساكتين كهرب
* وان تجعل في كل غرفة مكان الثرياء مروحه لتهوية المكان
* وتراعي مكان المكيفات
* وفي الحمامات تحط سوكتات احتياط للاستشوار او غسالة صغيرة خاصة او مكينة حلاقة وتختار مكان المغاسل والجلسات والمسابح
* وحبذا لو ترفع الشباك بحيث ان اللي برا مايشوف زول الشخص اللي بالحمام حتى لو انفتحه الشباك
* واذا حاب تركب كاميرات مراقبة اختيار مكانها خراجي وادخلي ويكون تحكمها بإحدا الغرف واذا حاب بعد تركب سماعات بعد حدد مكانها ومكان التحكم يكون مع الكاميرات
* ولا تنسى الانتركم ونقطة جرس داخليه وساكتها عند الباب في حالة اذا ماراح تركب انتركم
* ولا تنسى تركب نقطة تلفزيون وتليفون في غرفة الخدامة والمطبخ
* وان تحط نقاط كهرباء خارج الملحق والفيلا للاحتياط)

هذا ماعندي اليوم من ملاحظات استكمالها ان شاء الله عندما يسمح الوقت

حسن الاحمد
15-12-2013, 01:57 AM
انا عندي نصيحة مهمة جدا لأي واحد يبغي يركب حجر .. لا يسوي اي ديكور بالخرسانة او وارش خرسانة فوق الفيلا لانه كله يصير بالحجر وإذا كان خرسانة لازم نكسره علشان نقدر نشتغل الديكورات .
والأعمدة اللي في المداخل ياريت لحد يكبرها لان رح يجي الحجر عليها وتكبر بعد ويصير منظرها قبيح.
وإذا في اي عواميد جنب بعض ياريت تكون بعيدة عن بعض اقل شي 50 سم علشان يكمل المنظر .
وإذا في اي دريشة معاكسة الديكور مفروض من اول شي ينحسب حسابها .
والأعمدة بعد مرة اخرى اذا كان فوقها صبية او بلكونة او مدخل ياريت ترجع للوراء وللجنب اقل شي 40 سم حتى مايبرز التاج لبره ويخترب المنظر.
وشكرا

ام روز
02-09-2014, 11:11 PM
ارتفاع الاسقف�� يكون 4 ولا يقل