أبي آرائكم ونصايحكم .... خدامات هالزمن وش السواة معاهم ؟؟؟ موضوع هاااام للمناقشة [الأرشيف]

مشاهدة النسخة كاملة : أبي آرائكم ونصايحكم .... خدامات هالزمن وش السواة معاهم ؟؟؟ موضوع هاااام للمناقشة

نور الحور

09-08-2009, 04:13 AM

السلام عليكم ورحمة الله وبركاته،،
اخواني واخواتي ..
بغيت اشركم في همي وآخد رايكم وبكل صراحة وصدق وشفافية في موضوع الخدم والمربيات .. وتحملوني لأني اكتب اللي في بالي من غير ترتيب افكار...
الخدامات صار الواحد ما يقدر يستغني عنهم ..
لا تقولون لنا امهاتنا ما اعتمدوا عليهم ومادري شنهو..
كل زمن وله خصوصيته .. البيوت كبرت والاهتمام بالنظافة والترتيب زاد، ومتطلبات العيال كثرت
بس موضوعي ما له علاقة بالتصويت للي يأييد وجود الخادمة والمربية (مع تحفظي على لقب مربية)ولا لا ..
موضوعي متعلق بناحية ثانية أنا شخصيا اعاني منها واااااااااااااايد ..
طبيعتي احب احدد للخادمة دورها لأنها في الأول والأخير هي مساعدة سواء في شغل البيت أو رعاية الأطفال
يعني افصلها تماما عن خصوصياتي، واحاول (قدر الامكان) ما خلي عندها اليهال بروحهم في البيت
ولا احبها تمسك لي رضيع صغير (احسه يتعود على ريحتها ) يعني باختصار هي بيبي ستر للمسااااااااااااعدة والعون .. تلعب معاهم تراعيهم لمن يروحون الالعاب لكن ما تتدخل في اساسيات حياتهم ..
ومع اني تنازلت في احيان كثيرة عن هالمبدأ (احيانا بسبب الظروف واحيانا لأسباب خاصة ) لكني قد ما اقدر احاول احدد دورها وصلاحياتها ..

المهم .. اني قمت اواجه مشكلة ان الخدم ما يعجبهم هالوضع .. زيادة على طلباتهم .. تجي الوحدة تتشرط ابي جوال وابي ازور رفيجتي وابي وابي ....وما تحب حد فوق راسها يوجهها او يعلمها او ينتقد عملها..

انا عارفة واشوف قدامي انه اغلب اللي يعمرون عندهم الخدم (ما شاء الله ) من اللي يعطونهم صلاحيات كبيرة مع قلة التدقيق وتوفير الجوال والتلفزيون والسماح لهم بالزيارات والطلعات ...الخ يعني باختصار ما عطينهم على الكيف..

بغيت لو سمحتوا رايكم في الموضوع .. انا ما اقول نمنع الخادمة من كل شي .. لا طبعا ..
لكن سياستي اقولها من اول يوم انه ما في جوال ، وادا بغيتي تكلمين هلج من عيوني بس قوليلي واعطيج تلفون البيت وعلى حسابي بعد..
بغيتي شي من الجمعية وصيني عليه وبجيبه لج على حسابي ..
بغيتي تروحين السوبر ماركت او الدكان اللي يمنا ماعليه بس عطيني خبر ..
منزعجة من شي او ما تقدرين تشتغلين او تبين تاجلين الشغل بس قوليلي وانا براعيج ...دايما اقول لهم خلي بينا حوار ..
لكنهم ما يعمرون عندي ..اللي تطق وما تبي تشتغل واللي تشرد واللي تطلع من وراي او تاخد لها جوال او تفتر في الفريج زيارات ولا اللي ماتمت جمعية ما شرت منها وراي واللي واللي...الخ

انا احيانا احلل الموضوع بيني وبين نفسي ..أقول صح انا ادقق وايد في الشغل والنظافة واحبهم يلتزمون بجدول معين واتضايق لما ما يلتزمون فيه وما ادمجهم معاي في تفاصيل حياتي لكن احاول ان تكون القنوات بيني وبينهم مفتوحة ودايما اقول اللي تبي شي تقوله ..مو تسويه من وراي يعني انا باطقها ؟؟؟ حدي بكلمها كم كلمة بحدة لين سوت شي غلط ..

ياليت تنصحوني لأن خدامتي شاردة في ظروف الله العالم فيها ،وحابه استفيد من نصايحكم وخبراتكم وآرائكم .. شاسوي مع الخدامة اللي بتجي .. خاصة اني افكر اطلب وحدة ثانية بيبي ستر (ما احب اقول مربية) لعيالي عشان يخف الشغل عليهم ويكون لكل وحدة ونيس وفي نفس الوقت يسدون حاجتي مع اني ما احب جمعتهم ولا احبهم لين اكثروا ...
انصحوني هل اغير سياستي .. اعطيها مثلا جوال وتلفزيون واخف من الحدود بيني وبينها ؟؟؟؟ شنهي القوانين اللي لازم اتمسك فيها وشنهي الأمور اللي ممكن اتساهل فيها ..
اسلوبي بالكلام معاهم شلون ؟؟؟ لأني بصراحة انا جدية معاهم .. محتاااااااااااارة
ادعوا لي تكفون ان الله يسخر لي خدامات طيبات بنات حلال يريحوني من هالتعب والمخاسير ... دعوة من القلب ارجوكم لعل من فيكم من اقسم على الله لأبره .....
انتظركم .. وانتظر آرائكم ونصايحكم بالتفصيل الممل لأني والله تعبببببببببببببببببببببت
وجزاكم الله خير ....

هذلان

09-08-2009, 04:16 AM

لي عوده للموضوع بعد قرائته كامل ..

بالنسبه لي بعد تجربه مريره بكل اسف انتظر في الايام المقبله خادمه سيرلانكيه مسيحيه
للاسف المسيحيات من تجربه هم افضل من المسلمات و مشاكلهم اقل و مايسوون خرابيص السحور و الطبوب

نحول

09-08-2009, 04:30 AM

QTR-SOUL

09-08-2009, 04:41 AM

انا تعذبت في الخدم والدريوليه لاحول ولا قوه الا بالله شفت امثله وايد ولقيت وحده من الاهل شتسوي تمسك عليهم معاش 3او5شهور وتهددهم فيه والله يمشون مثل الساعه جنود في البيت احسن خدم شفتهم لان اهم شي الماده لاكن احنا نقول لاحرام مساكين واخر شي شوفي النتيجه والجوال عند الخدامه مش مويد لكم يفضل تلفون عادي في المطبخ عشان تحس بخصوصيه
وانصح بس بالخدامات الاثيوبيات والفلبينيات المسحيات فقط دمارهم اقل من غيرهم والخدم حظوظ

بوعلي-Qtr

09-08-2009, 04:57 AM

بالنسبة للخدم

اختي بقولج :الطيب يغلب بس بحدود

من اكبر الاخطاء تعطين الخدامة حريتها المطلقة

تعطينها الحرية لكن تحت عينج

مثلا: لي وديتيها السوق خليها هي تشتري عشان تحس بقدرها وقيمتها عندج وتاكدي راح تحفظ لج هالشي

في بعض الشغلات لازم اتغاضين عنها

مثلا:انتي عطيتيها كم شغلة خلصت اكثر الشغل ونست الباقي تسامحي وياها بس مب دوم

وبالنسبة للمعاملة حاولي ماتهينيهم ولا ترخين لهم الحبل فالتعامل يعني خلج وسط فكل شي

مرة شدي ومرة ارخي الحبل ..

شاركيهم همهم لاتجحدينهم تحسسينهم بالفرق والله بيخدمونج فوق ماتتصورين وهالكلام مب فلسفة مني لكن عن تجربة .. مثلا: لي كنتي معاها فالمطبخ تكلمي وياها ناقشيها خل تفتح لج قلبها وبتشوفين نتيجة هالشي مع الايام ..

بالنسبة للخدم المسيحيات انه اشوفهم افضل بوايد من المسلمات ومشاكلهم اقل

عسى الله يسخرها لكم واعذريني عالاطالة
:nice: :nice:

ــــــــــــــــــــــــــــــــــــــــــــــــــ ــــــــــــــــ

واهم شي يشتغلون لج ويسونلج اللي تطلبينه ..
يعني باقولج مثال ..
في بيوت يقولون حق الخدامة لازم تقومين الساعه 6 او 5 الصبح ..
وهم ماعندهم شغل .. يعني اكيد بيكرهونج ..
الحمدلله خداماتنا ولله الحمد زينيييين وطيبات لين ابعد الحدود
يعني لا ماعطينهم جوال ولا شي
والوالده وايد متساهله معاهم ..
يعني في الصيف يقومون وينزلون تحت الساعه 8 او 9 الصبح ..
واحنا ماعندنا مشاكل .. اذا انجزو اشغالهم
اما ينزلون الساعه 9 ومايسون شي .. لا والف لا
يعني لازم يعرفون انه الاكل لازم يكون جاهز الساعه 1 ونص ..
ساعات يتاخرون شوي .. بس عادي .. ولازم تكلمنها
وبخصوص اللبس .. قوليلها انه عاداتنا وتقاليدنا ووو ولازم تحتشمين .. ووديها معاكم السوق .. وخلها تختارلها بروحها ..
وصدقيني بيمشون معاج .. وبيحبونج وبيقدرونج ..
اهم شي لاتنتقدينها قدام اليهال او اي حد .. خذيها بروحها وقوليلها انج سويتي شي غلط ..
وفالنهاية
الله يرزقج خدامه محترمه وتعرف ربها ..

نور الحور

09-08-2009, 05:17 AM

جزاكم الله خير على الردود وعلى الدعوات الحلوة
الله يسمع منكم ..
انا كنت ما جيب الا مسلمات وللأسف (علل) .... على كثر ما نظم لهم الجدول اليومي والأسبوعي عشان اريح نفسي واريحهم ماااااااااااافي فايدة كسل واهمال وكدب ... اتقول لي سويت وهي ماسوت اشيك اشوف بلاوي
جربت وحدة مسيحية فلبينية كبيرة بالعمر .... لمدة شهرين تقريبا بعدين قالت انا تعبانة وما اقدر اشتغل ، ابي اروح المكتب عشان يمدي تغيريني وانا اغير ... يحيها على الأقل ماراح علي الضمان ...وكانت بصراحة محترمة ..
اما الباقيين اغلبهم يبيلهم قطعة قلب ومتابعة دايمة ولا كسلوا ...وعلى اتفه سبب يقولون بنسافر
الله يعلم شكثر خسرنا عليهم وما استفدنا غير حرقة القلب وضياع وقتنا في تعليم ناس ما يستاهلون ...

لكن عشان ما اظلمهم اقول لازم الواحد فيه اخطاء لازم يتداركها عشان تعمر عنده خدامة وحده على الأقل
شسوي يعني لين قالت ابي جوال ؟؟ كل الخدم عندهم
اقولها بس انت ما تحتاجينه انا سامحة لج لو تبين تتصلين على حسابي من تلفون البيت
ولا تقول ابي ازور بنت عمة خالة يدتي !!!!!!! شسوي في هالمواقف ؟؟؟؟
جزاكم ربي كل الخير مرة ثانية على دعواتكم الحلوة ونصايحكم

نور الحور

09-08-2009, 05:21 AM

على فكرة اخوي بوعلي ..
على طاري قومة الصبح
انا كنت اقولها ابي الحاجة الفلانية الساعة الفلانية يعني مثلا الغداء
واحدد لها الشغل الباقي اللي تسويه يوميا بس من غير احدد الوقت
يعني مثلا ... لازم يوميا تنظيف الصالة بالمكنسة مع غسيل الحمام الله يكرمكم وكوي الملابس
وهي عندها الصبح بطوووووووووووووووله ماعندها غير شغل البيت تنظم نفسها مثل ماتبي ان شاء الله ترقد الضحى كله ما همني اهم شي الانجاز للي حددته من اعمال
لكن للاسف من تجربتي ما يعرفون ينظمون نفسهم ويتراكم الشغل

هذلان

09-08-2009, 03:08 PM

السلام عليكم مره ثانيه ..

نور الحور .. الي فهمته من ماذكرتي انه انتي موظفه و ام لاطفال الله يحفظهم .

اتوقع فيه خلل وهو ان الخدم اكثر من الشغل .. يعني يقعدون فاظيين وهذا شي مش زين.

موضوع ماعجبني الا وهو .. اكبر خطا الخدامه تطلع من البيت و تروح دكان او زيارات .. خطا واضح و مشاكله معروفه (تشرد + تبوق من البيت و تعطي العمال الي برى ).

الخدامه ماتنعطا جوال نهائيا الا اذا كانت تسوق .

من الاخطاء الي نسويها غالبيتنا وهذا الخطا قليل الي ينتبهله .. الطيبه الزايده و الكرم الزايد هذا هو دمار العماله اذا الخدم بطروا و حسو بالراحه و الاكتفاء المادي انقلب حالهم .

مثل ماذكرت حاليا انتظر خادمه (سيريلانكيه) .. قالي الموظف الي في المكتب (سيريلانكي) معاشها ٦٠٠ و اثناء الحوار بعد ماخصلت الاوراق و دفعت قالي معاشها ٦١٠ !! قلت له ليش ١٠ زياده قالي عشان تكلم اهلها كل شهر بـ ١٠ ريال (طبعا ابدا مش بخل مني ولكن حرص و تدارك لاخطائي السابقه) قلت له هل هو منصوص عليه في العقد قالي لا بس سوه طيب منك . قلت له هذا شي انا احدده و هذا طلب مرفوض و اذا بسويه بسويه من نفسي وانت يا صاحب المكتب مالك اي حق تقترح علي او تقول للخدامه اي شي يخصني انا او يخص بيتي .. خاف و قالي كلامك صحيح وانا اسف ولا لي علاقه للخادمه .

بصراحه انا اشوفج جدا مرخيه و المفروض تشدين اكثر بكثير من طريقتج الحاليه و نهائيا لاتكونين مطمع للخادمه .. لسبب واحد انتي اقتنعي من التجارب السابقه لو اسلوبج صحيح كان استمرو معاج الخادمات و ماسوو مشاكل .. و وصلوج لاحساس انج انتي محتاجه لهم .. هم جايين عشان يشتغلون و يكسبون رزق و قبل لايدخلون البيت هم متوقعين اسوا معامله .

فيه عقاب اشوف الاهل يستخدمونه مع الخادمات في حال بدر منهم تصرفات سيئه او تجاوز محضور . من تسوي مشكله الخدامه يطردونها من المطبخ و ينبذونها و يقولون لها اقعدي في غرفتج ولا نشوفج الا اذا فيه شي ضروري.. يوم يومين على هذي الحاله لين الخدامه تعرف ان الله حق وتعرف خطاها وتعتذر ولا تكرره مره ثانيه.

كل شهر وقعيها على استلام معاشها و امسكي عليها معاش ٣ شهور او اربع مع الانتباه انج ماتوقعينها على معاش ما استلمته و قوليلها المعاش هذا محفوظ عندي و اذا خلصت مدتج و بغيتي تسافرين اعطيج اياه وحاليا احتفظ فيه عندي في حال سويتي خرابيط عشان يكون فلوس التذكره.

وترى لكل انسان شخصيه مختلفه و اسلوب مختلف عن الشخص الاخر ولكن الاكيد في موضوع الخدم بأن الدلع الزائد و ترك الحبل على الغارب و عدم التشديد عليهم هي اسباب تخرب اي خادمه حتى لو كانت من اساسها زينه.

بعدين مهما كان لرجل البيت هيبه .. لا يتدخل في الخادمه نهائيا الا في الحالات المستعصيه ليضل هو البعبع الي تخاف منه الخدامه.

في النهايه الله يوفقج ويستر عليج انتي وخادماتج

ناصر العمادي

09-08-2009, 04:27 PM

وعليكم السلام ورحمة الله وبركاته

شوفي أختي الخدامه مهما قلنا فهي بشر مثلنا ممكن تحمل الحب لنا وممكن تحمل الشر والحقد وهذا يعتمد على طريقة تعاملنا معها ..
الخدامه المفروض ماتشدين عليها وايد ولا ترخين لها على الأخر خلج وسط معاها ..
حاولي تكسبينها بالكلمه الطيبه لأنك لو كسبتيها راح تعطيج أحلى شغل وبكل ذمه وضمير ..

أما سالفة الجوال والطلعه من البيت وزيارة مادري من هاذي أساس الدمار للشغاله ..
عطيها تلفون البيت خليها تكلم أهلها ..
لاتقصرين معها في الأكل والملبس
حسسيها أنها مهمه في البيت وليست خادمه
أذا العيال غلطوا في حقها خذي حقها من العيال جدامها
لاتعطينها شغل أكثر من طاقتها لأنها أنسانه ولها قدره محدوده على العمل
صدقيني الأمور هاذي راح تخليج تكسبين الخدامه وراح تريحج على الأخر

والله يوفقك وتلاقين وحده تكون لج عون وتريحك يارب

وعسى ربي يريح قلبك وينور دربك وييسر أمرك دنيا وأخره أن شاء الله

كل الشكر والتحيه والتقدير والأحترام مني لك

نور الحور

10-08-2009, 12:49 AM

هذلان ، هامور كويتي، بوعلي، قطر سول ، ناصر العمادي .. كلكم جزاكم الله خير على آراءكم وتجاربكم ودعواتكم اللي تبرد القلب ..ولكم بمثل إن شاء الله
أخوي هذلان ..ترى يمكن الانطباع اللي تركته من اللي كتبته قبل اني مرخية ... لا بالعكس انا جادة وايد في التعامل معاهم وسييييييييييييييده ما حب اللف والدوران والكذب ..
اقول لهم من البداية اهم شي الصدق والامانة
وبالنسبة لطلعات الدكاكين ترى ما قلت لهم هالشي الا لمن تعبت من روحتهم من وراي
لكن الانطباع الغالب انهم دايما خايفين مني ويخشونعني مع اني اقول لهم مليييييييييون مرة انا سيدة وما احب الدوران... كسرتي شي مثلا قوليلي وتأسفي وتحملي تنبيه مني وخلصنا
قلنا لج سوي هالجدول ارتاحي وريحينا.. مشكلتهم ما يسوون
وبالنسبة للشغل انا اشوف انه الشغل في البيت محتاج خدامتين مع اني من قبل مو مقتنعة لكن شفت التاخير وتغاضيت عنه بسبة مساعدتها لي في اليهال واحدد لها الحد الدنى المفروض تخلصه كل يوم على الأقل ...
وبالنسبة للتوقيع على استلام الراتب انا اخليها توقع حفظا لحقها وحقي .. بس ما قط مسكت راتبها الا مرة وحدة جاتني خدامة وبالاتفاق معاها مسكته عليها ... وسافرت بعد ما كملنا المبلغ وقطعنا التذكرة ..بس هل تجوز هالحركة ولا لا؟؟ اقصد شرعا ...ما نبي نظلم احد صراحة
والله يسمع منك اخوي ..تراني للحين بدون خدامة للحين انتظر طلتها البهية ...اللهم اني اسالك خيرها وخير ما جبلت عليه واعوذ بك من شرها وشر ما جبلت عليه
اللهم لقينا خيرها واكفنا شرها ...آميييييييييييييييييييييييين

هذلان

10-08-2009, 01:34 AM

ههههههههههه نور الحور والله اني ضحكت على الدعاء الي ذكرتيه في الاخير اتذكر قريته على راس زوجتي ليله الدخله :app:

ولكن عدلولي ترى صحيح ينقرا على الخدامه اول ماتوصل :shy:

ابي ارد على موضوع مشروعيه حركه انج تمسكين راتب الخدامه .. شرعا لا يجرز .. الحديث الشريف بما معناه .. اعط الاجير اجره قبل ان يجف عرقه.

واذكر واحد من الاخوان طرشلي على الخاص انه لا يجوز تسوي هالشي بعد ماذكرت هالحركه في احد المواضيع .
ولكن والله اعلم و تقدرين تسئلين الدعوه و الارشاد عن هالشي في حال انج اتفقتي معاها على هذي النقطه و هي رضت اتوقع يجوز.

موفقه خير

نور الحور

10-08-2009, 01:27 PM

ههههههههههههههههه
صح هالدعاء ينقال للزوجة ليلة العرس .. زوجي كان كاتبه على ورقة فاين عشان ماينساه هههههه بس اعتقد معناه عام يعني اي شخص تترجى خيره وكفاية شره بدليل المعنى ..
بس انا مادري تأكد احسن ...
انا اسمع امي دايما تقول هالدعاء لما تجيب خادمة ولا دريول ...وتعلمت مثلها ..
جزاك الله خير على اهتمامك ونصايحك جعلها في ميزان حسناتك ..

ANONYMOUS

10-08-2009, 10:07 PM

الخادمه نفس الزوجه.. واثنينهم نفس البطيخه..

ياما تطلع هبت ريح.. ولا عله ضمن العلل

MLAAS

10-08-2009, 10:38 PM

السلام عليكم .. حبيت اني اشاركم في خبرات الوالده الله يطول بعمرها بالخدامات

1- مخلتنها مطراش هههههه
2- شارتلها مبايل علشان تتصل في حالات الطواري او البيت محد فيه او انها ماسكه العيال ومحد عندها
2- تخليهم وقت معين يشوفون التلفزيون علشان الخدامه بشر تمل وتزهق من الروتين اليومي ف تخليهم يتسلون شوي
3- لو محد في البيت يبي اكل معين سواء كان غدى او عشى الخدامه تتفنن براحتها
4- ينامون من وقت يعني ماتخليهم يطولون من الصبح لين فليل كله شغل في شغل .. لا تخليهم يرتاحون بس الساعه 6 واعيات ولا ايتسطرن ههههه ايتسطرن= اتهاوشها بس بعبط <<< هذي معناتها عند الوالده
5- الحريم دايمن مايعجبهم شي بطبيخ الخدامات الي يعرفن يطبخن كله ناقص ملح وزايد بزار وهاي السوالف في كل بيت
6- ساعات يوم الوالده راضية عليها تمدح شغلها
7- ماتهاوشها حتى لو اكسرت او احرقت او او او لو كانت من اول مره .. بس تنبيه والمره الثانية تنبيه بالحذر .
8- الخدامه مسيحية وامينه لأبعد الحدود الريال ماتشيله واذا تبون تعرفون طيبة الخدامه شوفو عيالكم يستانسون عليها او مرتاحيلها ولا لا .. وماعليكم من سوالف تربية خدامه ( مصير الولد يكبر وعقله في راسه ويعرف من امه ومن ابوه ) وشو يعني الخدامه او البيبي ستر

:) وشكرا

أمير المحبه

10-08-2009, 10:46 PM

انا عن نفسي اقولج الخدامه المسيحيه احسن من المسلمه عن تجربه

الحين عندنا وحده سيريلنكيه وفلبينيه

بس السيريلنكيه هبة ريييح شغلها حلو ومرتبه ودوم تتعطر

انصحج اب خدامه سيريلنكيه مسيحيه اجوفها احسن

قبلها يبنا ثنتين مسلمات ماكملو سنه وسفرناهم

بس الخدامه مثل الطفل عامليها بلطف ولاتصارخين عليها

تشتغلج من قلبها

لاكن زاعقي عليها بتعاند وطلع عينج والله

الله يوفقج يارب وتلاقين خدامه طيبه اتريحج

وتلاقين بنات يريحونج ياااااااااارب

+_+

نور الحور

13-08-2009, 10:37 PM

انونيموس وملاس وامير المحبة شاكرة لكم مشاركتكم ودعواتكم الحلوة وآرائكم اللي راح آخدها في الاعتبار إن شاء الله

أمير المحبة توقيعك مرررررررررررررررررعب ... صج خوفتني من هالنظرات الله يكافينا شرها والتعليق مخيف .....يمممممه بسم الله اللهم احفظنا

اعقل مرجوجه

15-08-2009, 02:39 AM

الخادمه نفس الزوجه.. واثنينهم نفس البطيخه..

ياما تطلع هبت ريح.. ولا عله ضمن العلل

الله يعين اللي بتاخذها شلون بتستحملك :eek5:

توني شايفه ردك في موضوع ثاني وصدمني ههههه

ياناس لاتقارنون الخدم في الزوجات ترانا مانرضاها على نفسنا

وعلى طاري الدعاء والله قالها لي زوجي بعد قراها يوم عرسنا من بطاقه خاشينها في الغرفه ههههه

أمير المحبه

15-08-2009, 02:43 AM