ابي شوركم ورايكم في سالفة اللوزتين ؟؟؟؟؟؟؟؟؟؟؟؟؟؟؟

[Me&OnLy]

انا اللوزتين تلتهب عندي اكثر من 5 مرات في السنه ولا اعرف شسوي فيها
هل اشيلها او اخليها سويت بحث عن الموضوع في قوقل ولقيت عالم يقولون شلناها
ومتنا والي يقول شلتها وتلعوزت والي يقول لاتشيلها واشياء كثيره
الحين انا اطرح الموضوع بين ايديكم ونبي ناس عن تجربه يتكلمون او شخص يعرف اخ او اخت
او اس شخص يصير له او يقرب له مو مهم صلة القرابه المهم ان الشخص يكون واثق من الكلام الي يقوله لاني جدا متخوف من هذي المسألة
تحياتي

[وطن]

أنا شايلتها من 13 سنة تقريبا
واهلي بعد شايلينها ورفيجتي
والحياة طبيعيه وحلوة



مافهمت اخوي انت من شنو خايف بالضبط ؟

[genesis]

هلا أخوي ، هل يكون مصاحبها إرتفاع حرارة؟
كم يوم يستمر ألم البلعوم؟هل في طعم مرورة في فمك؟هل أنت مدخن؟
هل من خلال الاستشارة الطبية، اقترح طبيبك قيامك بالتحليل عن بكتيريا المعدة H. Pylori

[Me&OnLy]

خايف امتن وخايف اتغربل عقب كم سنه لاني شايلهم وخايف من العمليه نفسها وبعدين 13 سنه كنتي صغيره اكيد انا مب صغير


:rolleyes2:

[وطن]

لا اخوي ما كنت صغيره كنت في ثالث ثانوي
:)

وبعدين المتن ماله علاقه باللوز
الفكرة هي ان اللوز لين متضخمة تمللك وانت تاكل فما تكثر

وانت اذا اساسا معدتك متعودة على كمية اكل ما اظنك بتقدر تزيدها بس عشان سلكوا لك بلاعيمك ;)

[بولينجر]

والله وايد شايلينها وعايشين طبيعي.... انا ما شلتها.... كلما مرضت اخذ مضاد هستامين وخلاص الحمدلله.... شوف وش يقول لك الدكتور....

[غزلان]

انا ماشلتها الحمد لله لكن اعرف كثير شايلينها من هلي مامتنوا ولا شي

[شاي كرك]

انا عندي اللوزتين :) ومتردد في اني استأصلهم ..
لان الوالدة تقول ان الوالد من يوم ما شال اللوزتين ما شاف الصحة .. "وجهة نظر "

منتظر باقي الآراء ..

[Me&OnLy]

والله ماعاد عرفنا وطن تقول شيل وغزلان تقول شي وشخص يقول راجع دكتور وانت تقول ابوك الله يحفظه لك ماشاف العافيه عقب ماشالها الحين الوضع شلون طبعا الدكتور سؤاله كم مره تلتهب عليك ؟ اذا اكثر من 4 مرات في السنه شيلها بس انا خايف اشيلها واتوسدها بالعربي نبي كلام طيب يخفف علينا ويخليني جريئيين ونروح نشلها ونخلص والا نخليها ونخلص

[هتـان قطر]

انصحك تروح للدكتور اسامة البكري استشاري انف واذن وحنجرة

اتذكر مرة قال لاختي راح يوصلني جهاز جديد لاستأصال اللوز

وانتي جالسه بدون عمليه وبدون تخدير كلي..

روح له زيارة وشو شيقول لك..

[PRINCESS]

انا شايلتهم من سنين واخواني واختي وكل شي عادي مافي اي مشاكل
اذا مأذيتك توكل على الله وشيلهم وارتاح بلا الم وبلا حراره ...والعمليه اسهل مايكون لاتقلق

[حراير قطر]

انا شلتها حق ولدي عقب معاناة

من الالتهابات اكثر من 5 مرات بالسنة

وكثرة المضاد اتقل المناعة بالجسم

وتوكل على الله وشلهم بترتاح والله ...

عند الدكتور عبدالعزيز الجفيري

والله يشفيك ان شاء الله

[رهج السنابك]

امي شايلتها من اكثر من خمسين سنة :) والحمدلله رب العالمين ماشافت شر بس ايام الغبار تحس صدرها يصك عليها مدري من اللوز ولا شي ثاني بس نصيحه الدكتور لك افضل لأن كثرة التهابات اللوز البكتيرية تضر صمامات القلب :) وتضر الكلى بعد .. الالتهابات البكتيرية مو شي سهل او يستهان فيه فلذلك سألك الطبيب كم مرة في السنة تلتهب عليك عشان يعرف مدى تكرار الالتهاب على الأمد الطويل لانه خطير .. ولو عندك تقرير طبي ارسلة بالايميل لأطباء تايلند المستشفى الامريكي وخلال ثلاث ايام بالكثير يرد عليك الاستشاري وماتشوف شر

[رهج السنابك]

ايه ونسيت اقولك استشير أفضل استشاري بالكون .. رب العالمين .. صلي استخارة دامك محتار وشوف شنو راح يتيسر لك العملية او تركها كما هي وامشي فيه

[عزتي سمو ذاتي]

أنا صار لي من 8 سنين شلت اللوز وكان وقتها عمـري 20 سنة

الصراحـة زاد وزني بس موكثير لأن قبل كنت ميته ضعيفه كأني مريضة بس الحين الحمدالله صحتي حلوة

وأنا شلتها لأني كنت وااااايد اتعب منها وهي عمليه سهله مايبيلها شي توكل على الله وقبل شوف كم دكتور

والأهــم من هاااي كله لاتسمع كلام الناس صل كم مرة استخارة وأعرف أن جسم عن جسم يفرق اللي صار لغيرك مستحيل يصر لك

[سهم مديون]

جرب عسل مع غذاء ملكة النحل وإذا تبي مكان بيع العسل موجود طرشي على الخاص اعطيك عنوانه !

[وطن]

والله ماعاد عرفنا وطن تقول شيل وغزلان تقول شي وشخص يقول راجع دكتور وانت تقول ابوك الله يحفظه لك ماشاف العافيه عقب ماشالها الحين الوضع شلون طبعا الدكتور سؤاله كم مره تلتهب عليك ؟ اذا اكثر من 4 مرات في السنه شيلها بس انا خايف اشيلها واتوسدها بالعربي نبي كلام طيب يخفف علينا ويخليني جريئيين ونروح نشلها ونخلص والا نخليها ونخلص

اخوي تتوسدها ليش !!
اللوز ترى مالها علاقه بالشهية
اذا انت شهيتك مفتوحه للأكل هذا شي ثاني

وبخصوص العافية
ابشرك الحمدلله كل اللي اعرفهم ومسويينها بصحة وعافية وما عليهم شر

:victory:

[مسفر2]

ماتشوف شر انشاءالله

اخوي عنده نفس المشكله ودايمآ مريض وعقب شار عليه واحد جزاه الله خير بالطب البديل

وعلاجه بسيط وسهل مايستغرق من الوقت دقيقه وحده ومن غير تكلفة ماليه بعد ....

العلاج بالكي . واذا تبي مساعده اكثر اكتب رقمك على الخاص . وانا بتصل لك

صدقني راح اتحس بالفرق .

وتقبل مروري

[قطريه ماركه]

نفس حالتي وااايد يجيني التهاب اللوز و أسخن واتلعوز واقول باشيلها بس خل يروح الالتهاب ..

بعدين أخاااف أمتن و أقول الله أكيد حطها لهدف في الجسم و أتردد :( :(

[ورقــة أمــل]

انا شلتها من عشر سنوات

بس مب قايلة كم كان عمري ذاك الوقت عشان بتعرفون عمري الحين خخخخ

المهم شلتها في الهند مب هني وتلعوزت شوي في البداية كان يجيني الم فظيع في اذني

تم اسبوعين تقريبا اكيد يعتمد على الحالة طبعا

قصوا علي قالو لي بيجيبون لي عسكريم بعد العملية ولا شفته بعد :(

ومامتنت ولاشي الحمدلله وزني طبيعي

مع ان انا ماكنت اصخن وامرض وايد بس يوم سويت فحص هناك قالي الدكتور لازم اشيلها وشليتها

[بوعلي2]

الله يشفيك ويسهل عليك ويبلغك مرادك اللهم امين

[Toomy]

انا شلتهم بس مت من الألم شهر و انا مب مع الناس و ترى تختلف من شخص لشخص وا لدكتور قال لي انتي ثاني حالة عندي تتعب جذي..بس صج ألم عمري ما شفته..لكن الحمد لله الحين وايد احسن من قبل كنت وايد اتصخن و أترقد في المستشفى و مغذي و مضاد في الوريد..الواحد يتوكل على الله و ما يصير الا الخير إن شاء الله


بس ترى كلش مالها خص بالمتن جسمي مثل ماهو لا تغير ولا شي بس أحس زادت عندي الحساسية من كل شي ما أدري من العملية أو من شي ثاني..يعني تقريبا ما صارت عندي مناعه والاحتقان ترى موجود مايروح يعني مب ان شلنا اللوز مش جاينا احتقان لا..بس بعد اهون من قبل.

[xxQatariaxx]

مرحبااا

انا شايلتهم من سنتين والحمدلله حالتي وايد احسن كنت وايد تعبانه منهم

وانا رحت للمستشفى وطلبت منهم يسون لي العمليه من كثر المعاناه اللي كنت اعانيها مع ان الدكتور فالبدايه

نصحني اني ما اسويها لان فيها تعب عالكبير مب مثل الصغار

بصراحه انا تعبت من الالم لمده شهر تقريبا عقب العمليه

بس الحين انا وايد مرتاحه الحمدلله نسيت شي اسمه سخونه واحتقان

بالنسبه للوزن الكل قال لي اني بمتن عقب العمليه لكن انصدموا يوم وزني نزل وووايد عقب العمليه

[منتهى الحكمة]

أخوي يسمون اللوزتين مقبرة الجسم لأنها هي المسؤولة عن محاربة الجراثيم وقتلها عشان كذي تقل مناعة الجسم من غيرها وهذا سبب كلام والدتك عن صحة والدك بعد ماشالها بس نصيحتي تآخذ راي أكثر من دكتور بعد ما تشرح له أعراضك والله يشفيك إنشاء الله

[بنت الصقور]

اسال د اسامه البكري

[تميم بن خالد]

والله انا نفسك اعاني منها كثير حتى العطر اتحسس منه والسجائر عذاب بالنسبه لي .. ابتعد قدر الاكان عن اماكن المدخنين ... ومدحوا لي دكتور هندي في مستشفى حمد .. ورحت له وقال تعالي بعد العيد انا مسافر