مطلوب ترشيح شركة مقاولات لبناء بيت العمر !!

[الســـهم]

الموضوع باين من عنوانه ..

يرجى التكرم بترشيح شركات المقاولات لبناء بيت العمر , واهم شي تكون بحكم تجربه سابقه او حالية , شامل اعمال الكهرباء والماء والصرف الصحي (اعزكم الله) والخدمات ..

مع الشكر الجزيل لاهتمامكم ..

[سوق واقف]

المنطقة ممكن

[الســـهم]

هلا اخوي سوق واقف ..

حزم المرخيه , وشاكر لك اهتمامك بالموضوع ..

[عابر سبيل]

السؤال شكله بسيط اخوي السهم
بس جوابه حقيقة من اصعب الاجوبه
لان اختيار المقاول اول شي توافيق من رب العالمين
و بعدين مهما قالو لك الناس عن المقاول
حقيقة موب كل شي ينخذ من حكي الناس....سلبي كان و لا ايجابي.

احيانا حد ايسب المقاول و لا ايعذرب فيه منيه لين يوم القيامه..
لما تعرف التفاصيل تحصل هالمالك نفسه هو الظالم و المقاول
يمكن هو المظلوم...

و بالعكس...تحصل لك حد يمدح المقاول و ايقول فيه انه نازل من السما...
ملك موب مقاول...و لما تروح لبنيانه و اتشوف بنفسك تعرف ان ناصحك
هو غشيم و موب عارف حق البنيان اصلا!

نعم الواحد يسأل و ينشد و ايتحرى قد ما يقدر..
بس في الاخير هو بيتك و صعب اني اتحمل بكره ملامه
لاني نصحتك بشركة اما تنغش بها او تاخر بنيانك او تنكسر معاك او او..

اهم شي حقيقة...هو صاحب الشركة...
يعني..الشركات بتحصلها كلها باسم حد اقطري
فلا تنغش ان هاي شركة راعيها فلان الفلاني من البيت لفلاني
فهاس اكيد انها زينه...او العكس!
موب هاي المقياااااس

انا اقول راعي الشركة الفعلي..التنفيذي...
قطري كان او مصري او بتاني!

لما تعرف هالشي..عالاقل 50% من معاناة البحث تخف عليك!
ان كان تبين لك انه زين ...فاهم شغله و ما ينخاف من امانته و انصافه
مع زباينه...تكمل..و تسال اكثر عن شركته
و و و

ان كان لا...فانت و بصرك تتحمل عيوبه
و لا اتدور عن منهو احسن منه

[سما الوطن]

السلام عليكم ورحمه الله وبركاته

من باب التجربه

شركه الأتحاد للبناء والتطوير
أتعامل معهم الأن وقرب ينتهي البيت
جدا محترمين وشغلهم ممتاز
ويمشون على الوقت ما يتأخرون
والتعامل معهم جدا مريح
مدير الشركه قطري
و المهندس المسؤول اسمه مهندس جوس
ويمكنك ان تطلع على اخر مشاريعهم وأن تتصل بهم كما فعلنا نحن

لو تحب معلومات إضافيه ممكن أرسله لك

والله يوفقك

تحياتي

[الســـهم]

هلا بالأخ العزيز عابر سبيل , اللي مروره ومشاركاته تعطر اجواء المواضيع ..

فعلا رضا الناس غاية لاتدرك , وياما ناس ماعجبهم شغل مقاولين واعرفوا قدرهم لما شافوا شغل غيرهم , بس فعلا في مقاولين يستاهلون انهم ينذكرون حتى لو انت ماشتغلت لكن شفت تجربة الغير معاه , يعني مب شرط بس اللي اشتغل مع مقاول يذكره بالعكس , في بيوت فلل نمر عليها ونقول الله على هالشغل والله يهني راعيها بها ويجعله منزل مبارك ..

شاكر لك مرورك الكريم عزيزي ..

[الســـهم]

هلا اخوي سما الوطن ..

مادري شركة الاتحاد اللي تقصدها هي نفسها اللي بالمنتزه , وهل اسعاره مقارنه بالسوق تعتبر جيده ..

[الســـهم]

يهمني ياشباب بالموضوع ان المقاول يكون مصنف , شغل بالباطن ما ابغي ولا ابغي شركات تلقط عمال من كل حدب وصوب , وينثرهم ببيتي وخذ شغل وقتها ..

[سما الوطن]

هلا اخوي سما الوطن ..

مادري شركة الاتحاد اللي تقصدها هي نفسها اللي بالمنتزه , وهل اسعاره مقارنه بالسوق تعتبر جيده ..


أخي الكريم

لا موب هي

شركه الأتحاد اللي أقصدها هي بشارع الخليج
وعلى فكره هي مصنفه
وأسعارها جيده
أنت جرب قدم لهم مشروعك وشوف سعرهم
بس أنا اضمن لك تقيدهم بالوقت ...حسن معاملتهم والسهوله بالتعامل ....الجوده
جداً محترمين

والله يوفقك

[المدهش]

مرحبا اخوي السهم
انا عن نفسي ارشح لك شركة وارث للتجارة والمقاولات
بنيت عندهم 4 فلل خاصة والعام الماضي مسلم 70 موقع
اذا انت حاب اتشوف مستوى بناءه الفلل في الخيسه
واذا العقد مدته 8 شهور يخلص لك في 6 شهور
واذا بغيت سعر ممتاز حاضر لك يالسهم

[الوفي]

أنا أرشــــــح لك كالتالي:
1- شركـــــــة المانع للمقاولات ((مصنف)).....3 اعرف بنوا معاه وكلهم مايعرفون بعض.....وهم ربعي كلهم.....وماشي معاهم بالاوكيه وبناهم على النظام القديم أعطيه...من (( 80%-75% ))....عيب الشركة غاليه شوي وبطيئ بالمشروع
المدير أردني...رجل قابلته فهمان وصريح وينصح الزبون بكل شي.....
2- شركة المعمار للمقاولات ((مصنف))......2 اعرف بنوا معاه وكلهم مايعرفون بعض...وهم ربعي....ماشي معاهم اوكيه بالبناء بناه معقول بس لاحظت بناه بالنظام التجاري ......يصب الخرسانات وبعدين يصف الطابوق يعني مايلتحم الطابوق بالخرسانة من البدايه سواء السقف او الجدار...اعطية: ((70%-65% ))
مدة أنجاز المشروع: معتدل الى بطيئ
المدير: باكستاني..مرة يهتم ومرة مايرد عليك بس متفاهم.....
3- شركــــــــة النعيمي للتجارة والمقاولات....
((مصنف)) 10 بنوا معاه وأنا واحد منهم كلهم ربعي وماشي معاهم بالاوكيه وبناهم على النظام القديم أعطيه...من (( 80%-75% ))....الشركة سعرها مناسب جدا لان المقاول قنوع.....بنا ريع بس للأسف مع السمعة قام ياخذ مشاريع وايد وصار بطيئ شوي
المدير بنغالي...رجل قابلته متعاون حتى بعد العقد يزيدك ماينقصك......بس مشكلته كله مشغول اذا اتصلتله مايطول بالمكالمة ماخذ نظام رجل الاعمال عطني الزبده وبسكر بويهك.....أذا تبي حقك بالمكتب

[RAHA]

الموضوع باين من عنوانه ..
يرجى التكرم بترشيح شركات المقاولات لبناء بيت العمر , واهم شي تكون بحكم تجربه سابقه او حالية , شامل اعمال الكهرباء والماء والصرف الصحي (اعزكم الله) والخدمات ..
مع الشكر الجزيل لاهتمامكم ..

أخي الكريم هو ليس بالترشيح
لازم تستخير ربك
استخير أولا ثم استشر

بالنسبة للمقاوله شركة مصنفة و غير مصنفه
هذا كله يعتمد على المدير التنفيذي و حجم العمل و عدد العمال
فمن المهم انك تسأل عن العمال و المهندس و خبرات المهندس
لأنك راح تدفع مبلغ و قدره و لازم تأخذ فتره في البحث
أعملك جدول لا تستعجل خذ شهر كامل في البحث


لا تبحث عن الأرخص و لا تأخذ الغالي
أبحث عن المعقول
عمرك ما راح تحصل مقاول بنفس سعر المقاول الثاني
و اسعارهم راح تتفاوت على حسب وضع الشركة

ضع لك ميزانيه محدده للعظم و ميزانيه للتشطيب و ميزانية للتأثيث
و ضع لك جدول زمني محدد بين السنة و السنتين

من الأساسيات الغائبة عن أغلبية الملاك
الخطة المالية و الزمنيه
ضع لك خطة مالية و زمنية لتنفيذ المشروع

لأن في ملاك يبني بيت أكبر من سيولته و يتوهق سنه و سنتين و ثلاث
و في ملاك بنى بيت على قد سيولته في سنه أو سنتين
و أحسب حسبة المخاطر مع المقاول أو الظروف الخاصة

طبعا بتقول ما عندي خبره
و لكن بالسؤال و البحث و مقابلة اصحاب الشركات و المهندسين
و قراءة العقود و مناقشة التفاصيل راح تحصل على الخبرة

بحطلكم إن شاء الله الأيام الجايه موضوع
عن عقد المقاولة و المواصفات كانت عظم ام تشطيب

و لكم مني تحياتي

[الســـهم]

عزيزي سما الوطن ..

شاكر لك اهتمامك ورأيك احترمه جدا ..

ان شاء الله راح تكون لي زياره للشركه الاسبوع القادم ..

[الســـهم]

هلا اخوي المدهش ..

ماشاء الله عليك كفيت ووفيت ..

راح اراسلك عالخاص ببداية الاسبوع الجاي بإذن الله , والله يكتب اللي فيه الخير ..

[الســـهم]

اخوي الوفي ..

ماشاء الله عليك رد شافي ووافي ..

بإذن الله الواحد الأحد تكون لي لهذي الشركات قريب ..

بس ولا عليك أمر لو تعطيني أرقامهم أو مواقعهم ؟

[الســـهم]

منور اخوي العزيز راحه ..

ماشاء الله عليك نصوح وتحب الخير يعم على الجميع..

اتمنى اني اقابلك واعرض عليك مشروعي , وبنفس الوقت اطلع على بعض مشاريعك ..

[شموخ دائم]

,

,


شكرا لصاحب الموضوع

واتمنى الفائده للجميع

حبيت اوضح على تعليق اخوي الوفي
في مداخلته بخصوص طريقه البناء واقتبس منه هذه الاسطر
بناه بالنظام التجاري ......يصب الخرسانات وبعدين يصف الطابوق يعني مايلتحم الطابوق بالخرسانة من البدايه سواء السقف او الجدار

اخوي الكريم انا مداخلتي للتوضيح على كلمه ( تجاريه )

اخوي الكريم مايصح نقول عنها تجاريه لانها تعطي القارىء مفهوم انها طريقه فيها خطاء او غلط العمل بها وممكن تحط المتابع الي يبني بها في اشكاليه مع المقاول وهذا غير صحيح
احنا نشتغل بهذي الطريقه اذا كان عندنا عمال مهره نجارين وحدادين
لان العمال الغير مهره مايقدرون يعمولنها
وايضا الشغل بها نظيف جدا وكميات الخرسانه تطلع نفس الخريطه مايصير عندنا ( لوز ) او خساره بالكونكريت مايتسرب في الجدران والطابوق

وهي الطريقه التي تفضلها الدوله في بناء المدارس والمستشفيات نعمل الهيكل كامل
وبعدها نكسيه طابوق ومو معقوله الدوله توافق في مشاريعها على طريقه تجاريه

بالنسبه لموضوع التقاء الطابوق بالاعمده نستخدم الشبك والاسمنت من الناحيتين
وباذن الله ما يطلع اي مشاكل فيها

يعني لو جبنا عمال من الشارع ما بيعرفون بناء الهيكل لانه فوق امكانياتهم
ولكن بكل سهوله راح يبنون النظام القديم

حبيت اوضح ان الطريقتين من الناحيه الهندسيه مافيها اي شي غلط وعلى العكس طريقه الهيكل تدل على وجود عمال مهره لدى الشركه وخاصه النجارين لانها تطلب دقه
وعدم حدوث اي ميلان بالاعمده بجسم المشروع

اذا نفضل الطريقه القديمه فهو رغبه شخصيه وليس تعني هناك خطاء في الطريقه الثانيه وهناك من الاستشارين يشترط علينا ان نبني بنظام الهيكل النظام الجديد
حتى يتاكد من نظافه الشغل وسرعه الانجاز ايضا


للتوضيح فقط للاخوان الاعضاء المقصود بالطريقه

http://cool.majed.googlepages.com/52-2-4-1430.jpg

هنا العمل النهائي للنجارين بامكان الان الاستشاري يعاين الاعمده قبل الصب ويتاكد من عدم
وجود ميلان لان هناك خيوط نازله من اعلى العمود الى الاسفل توضح اذا كان في ميلان من عدمه
http://cool.majed.googlepages.com/53-4-4-1430.jpg

بعد فك الخشب يرش جيدا بالماء ونلاحظ اكتمال الاعمده

لا يوجد شي اسمه تجاري بالموضوع نهائيا

اتمنى الفائده لي ولكم

,

,


اخوكم


شموخ دائم

[رحال]

شركة جاســــم للهندسة والمقاولات

المكان : دوار المجنون بتجاه المطار

الدور الثالث فوق سفريات آسيــــا

بصراحة بنيت عندهم انجاز سريع ومتعاون

عند تغير أي نقطة وأسعار ممتازة ..

والله يوفقك ...

[Chambray]

أنا أرشــــــح لك كالتالي:
1- شركـــــــة المانع للمقاولات ((مصنف)).....3 اعرف بنوا معاه وكلهم مايعرفون بعض.....وهم ربعي كلهم.....وماشي معاهم بالاوكيه وبناهم على النظام القديم أعطيه...من (( 80%-75% ))....عيب الشركة غاليه شوي وبطيئ بالمشروع
المدير أردني...رجل قابلته فهمان وصريح وينصح الزبون بكل شي.....
2- شركة المعمار للمقاولات ((مصنف))......2 اعرف بنوا معاه وكلهم مايعرفون بعض...وهم ربعي....ماشي معاهم اوكيه بالبناء بناه معقول بس لاحظت بناه بالنظام التجاري ......يصب الخرسانات وبعدين يصف الطابوق يعني مايلتحم الطابوق بالخرسانة من البدايه سواء السقف او الجدار...اعطية: ((70%-65% ))
مدة أنجاز المشروع: معتدل الى بطيئ
المدير: باكستاني..مرة يهتم ومرة مايرد عليك بس متفاهم.....
3- شركــــــــة النعيمي للتجارة والمقاولات....
((مصنف)) 10 بنوا معاه وأنا واحد منهم كلهم ربعي وماشي معاهم بالاوكيه وبناهم على النظام القديم أعطيه...من (( 80%-75% ))....الشركة سعرها مناسب جدا لان المقاول قنوع.....بنا ريع بس للأسف مع السمعة قام ياخذ مشاريع وايد وصار بطيئ شوي
المدير بنغالي...رجل قابلته متعاون حتى بعد العقد يزيدك ماينقصك......بس مشكلته كله مشغول اذا اتصلتله مايطول بالمكالمة ماخذ نظام رجل الاعمال عطني الزبده وبسكر بويهك.....أذا تبي حقك بالمكتب
المعمار ناس واجد اعرفهم بنوا عنده مامدحوه لي ، وتقييمك له 65% اعتقد مناسب :)

[الســـهم]

شكرا لكل من نور الموضوع سواء بمداخلة ولا نصيحه او رأي ..

اعتز بكم جميعا , لا خلى ولا عدم ..

وشكر خاص لكل من راسلني عالخاص , وابدا اهتمام بتقديم اي خدمه ان احتجت او تزويدي بارقام مقاولين ..

الله لا يحرمنا من الطيبين شرواكم ..

[الفا برافو]

,

,


شكرا لصاحب الموضوع

واتمنى الفائده للجميع

حبيت اوضح على تعليق اخوي الوفي
في مداخلته بخصوص طريقه البناء واقتبس منه هذه الاسطر
بناه بالنظام التجاري ......يصب الخرسانات وبعدين يصف الطابوق يعني مايلتحم الطابوق بالخرسانة من البدايه سواء السقف او الجدار

اخوي الكريم انا مداخلتي للتوضيح على كلمه ( تجاريه )

اخوي الكريم مايصح نقول عنها تجاريه لانها تعطي القارىء مفهوم انها طريقه فيها خطاء او غلط العمل بها وممكن تحط المتابع الي يبني بها في اشكاليه مع المقاول وهذا غير صحيح
احنا نشتغل بهذي الطريقه اذا كان عندنا عمال مهره نجارين وحدادين
لان العمال الغير مهره مايقدرون يعمولنها
وايضا الشغل بها نظيف جدا وكميات الخرسانه تطلع نفس الخريطه مايصير عندنا ( لوز ) او خساره بالكونكريت مايتسرب في الجدران والطابوق

وهي الطريقه التي تفضلها الدوله في بناء المدارس والمستشفيات نعمل الهيكل كامل
وبعدها نكسيه طابوق ومو معقوله الدوله توافق في مشاريعها على طريقه تجاريه

بالنسبه لموضوع التقاء الطابوق بالاعمده نستخدم الشبك والاسمنت من الناحيتين
وباذن الله ما يطلع اي مشاكل فيها

يعني لو جبنا عمال من الشارع ما بيعرفون بناء الهيكل لانه فوق امكانياتهم
ولكن بكل سهوله راح يبنون النظام القديم

حبيت اوضح ان الطريقتين من الناحيه الهندسيه مافيها اي شي غلط وعلى العكس طريقه الهيكل تدل على وجود عمال مهره لدى الشركه وخاصه النجارين لانها تطلب دقه
وعدم حدوث اي ميلان بالاعمده بجسم المشروع

اذا نفضل الطريقه القديمه فهو رغبه شخصيه وليس تعني هناك خطاء في الطريقه الثانيه وهناك من الاستشارين يشترط علينا ان نبني بنظام الهيكل النظام الجديد
حتى يتاكد من نظافه الشغل وسرعه الانجاز ايضا


للتوضيح فقط للاخوان الاعضاء المقصود بالطريقه

http://cool.majed.googlepages.com/52-2-4-1430.jpg

هنا العمل النهائي للنجارين بامكان الان الاستشاري يعاين الاعمده قبل الصب ويتاكد من عدم
وجود ميلان لان هناك خيوط نازله من اعلى العمود الى الاسفل توضح اذا كان في ميلان من عدمه
http://cool.majed.googlepages.com/53-4-4-1430.jpg

بعد فك الخشب يرش جيدا بالماء ونلاحظ اكتمال الاعمده

لا يوجد شي اسمه تجاري بالموضوع نهائيا

اتمنى الفائده لي ولكم

,

,


اخوكم


شموخ دائم

جزاك الله خير على هالشرح....
وفيت وكفيت

تحياتي

[الفا برافو]

انا بنيت فلتي عند شركة ريفيرا اللي في العسيري
المدير الفعلي والمقاول هو مصري .... والصراحه انسان خايف الله وحقاني
خذ حقك وعطني حقي.. حتى عقب ماستلمت الفيلا كان باقي علي مبلغ من المال وصبر علي لين الله يسر لي ودفعت له جزاه الله خير.