مشكورين يا اهل قطر اكرمتونا بالعصي والضرب ولا احلى ( حسبي الله ونعم الوكيل )

[3need]

السلام عليكم ورحمة الله وبركاته

اليوم وصلت من قطر وليتني ما رحت لقطر ولا فكرت اروح لها والله ياخذ الساعه اللي قكرت لها

اتمنى انه تقرون كلامي كامل لانه متت من القهر وحرقة القلب .. طبعا ً انا من الامارات
قالوا لنا في اكتتاب في الريان وسرنا لقطر ... اول شي الحدود 7 ساعات خيسونا كانه بندخل على قصر ملكي .. مع انه لو داخل ما بتاخر هالوقت وسرنا على طووول الملعب لنشاهد المباراه .. قصدي نكتتب وللاسف اللي راقد على الرصيف واللي راقد تحت السياره وعلى الرمل وعلى وعلى وعلى ( طبعا ً القطريين ما يبي لهم شرح لانهم يعرفون كل شي )

سرنا ندور على شقه فاضيه وقلنا لهم والله بندفع 2000 ريال لليوم ولا لقينا ولفينا يمين ويسار وحتى الصراف ما حول النا فلوس الامارات الى قطريه للاسف طبعا ً وبدووون احراج اقولها لكم نمت في السياره والمطاعم كانه داخل مطعم هندي والله تعبنا معاناه ما يعلم فيها غير رب العباد والله ثم والله لو ندري بهذا الشكل ما وطوطنا حتى

شغل الواسطات قام يستوي من 4 العصر الى 8 العشاء اخر ساعه في الاكتتاب طبعا ً

لا تنظيم + ظلم + مصخره + ضيق المكان والموظفين + واسطات + مذله + اهانة كرامة الانسان والخليجي بالاخص + استغلال وبيع استمارات وارقام الدخول وانا اشتريت رقم ولا قدرت ادخل ولا قدرت اكتتب للاسف كل هذا = اكتتاب الريان الاسلامي في قطر

:eek3: :eek3: :eek3: خسرنا بدل ما نربح

ملاحظه :- الشرطه ما يدخلون احد في القاعه للاكتتاب تعرفون ليش لانه يبغون الناس تبقى اكثر واكثر في قطر ويستفيدون منهم حتى لو على مصالحنا نحنا الفقارى

سرت ابغي اخذ طلبين فقط للاكتتاب وللاسف لقيت هذا الشرطي اللي ياي صوبي وانا في الطابوور والله العظيم ويضربني بالعصى والله ضربني ضربه على صدري وقتها مر في مخيلتي اقول هذي هي قطر اللي يقولون عنها هذا هو القطري اللي يضربني لاني ياي قطر ابغي اكتتب يهيني ويكرمني بالعصى ومن عقبها طبعا كملت 5 ايام ابغي اكتتب ولا قدرت ومن عقبها طلعت اشوف النادي وقطر وارسل لها رساله واقول لها ان شاء الله لو شفتيني يا قطر مره ثانيه هذا ويهي لانه بدل ما يضيفونا قاموا وضربونا

والله ما اقول هالكلام الا من اللي شفته من القهر لا حكومه تتكلم ولا اداره ولا ولا ولا ولا :eek3:

اه يا قطر ...

طبعا ً ما قلت لكم كل اللي صار لي لانه يبي له صفحات وصفحات 5 ايام ما ارقد فيها الا ساعه ولا ساعتين في السياره لكن حسيت بالقهر وكتبت هالموضوع

[الامير]

يا طيب طول بالك مني انا شخصين اسموح قولي انت في قطر لان ارجو ترد علي

[عضو المنتدى]

.



يأخي التنظيم في بدايه الأمر الكل أمدحه


لكن للأسف :


بعد مازادت الأعداد ... زادت الفوضى .... والتحرش في النساء ...وكسر زجاج

النادي .....والأعتداء على الشرطه من بعض الخليجيين كل هاذي الأمور

أصبحت الشرطه القطريه لم تتحمل الوضع !!!





.

[سهم123]

كلامك مبالغ فيه

مع ان كلامك في من الواقع

بس ماتوصل للضرب الى أذا تعديت حدودك وعملت فوضى أو ماشابه ذلك

[المخلب]

عطني راسك

اموووووح

هذي بوسه على راسك

شدعوه جمعت اهل قطر بالضرب

المهم مايصير خاطرك الا طيب


كلكم حبايبنا

والله الي صار يزعل بس انت عارف هذا اول اكتتاب للخليجيين في قطر

سامحنا على القصور

وتعوذ من ابليس

وفكر بالجانب الاخر من قصتك

لما تكبر بتذكر مواقف صادفتك وتقول اي والله كانت ايام حلوه

تحياتي لك وعساك راضي بس الحين

[jajassim]

يا طيب طول بالك مني انا شخصين اسموح قولي انت في قطر لان ارجو ترد علي


ما اعتقد انه في قطر على حد قوله ( اليوم وصلت من قطر ) :shy:

[منصور]

ملاحظه :- الشرطه ما يدخلون احد في القاعه للاكتتاب تعرفون ليش لانه يبغون الناس تبقى اكثر واكثر في قطر ويستفيدون منهم حتى لو على مصالحنا نحنا الفقارى
================================================== ==
بالله عليك وش يستفيدون من الخليجي غير الزحمه

للعلم فقط قطر بها استثمارات تقدر بلمليارات وليسو بحاجه لمكتتبين ينعشون الاقتصاد القطري
لان الاقتصاد القطري ليس اقتصاد تايلند

الهدف كان افادة المواطن الخليجي ولو حسبتها جيدا سارى ان قطر ستخسر اكثر مما ستربحه لان الاموال اللتي ستخرج من قطر بعد طرح مصرف الريان في البورصه ستكون اكبر ولو كانت القضيه استفاده لطرح البنك للقطريين فقط ولبقيت الاموال في قطر

والعتب ليس على اللجنه التاسيسيه بل من تسبب بهذه المشكله هم مجموعه من الفوضويين اللذين تسببو
في احداث هذا الارتباك
حيث باعو الارقام والطلبات وسمسرو على انجاز معاملات الغير نظير رسوم مدفوعه مسبقا

وهؤلاء اتو من خارج قطر

وبالنسبه للفنادق فالغرف متوفره وانا حجزت لاحد اصدقائي اللذي اتى للاكتتاب في مصرف الريان

اما قصة ضربك من رجال الامن فلتعلم باننا في بلد القانون ولو حدثت هذه الواقعه مع اني استبعد ذلك
فبئمكانك ان تشتكي على من ظربك

[المشترك]

سلام عليكم


يا اخي المشاكل كلها وللاسف اقولها من جنسية معينة


مشكورين يااهل قطر علي الكرم وحسن ظيافة ومشكور للمنظمين من المدنين والعسكرين


علي الجهد من تسهيل امر الاكتتاب



تحياتي لكم

[Dana]

اللي شفناه ان الكل يشكر

والتنظيم رائع واللي يقدرون عليه سووه
بس للأسف الناس مب منظمين

والسموحه ياخوي

[3need]

كلامك مبالغ فيه

مع ان كلامك في من الواقع

بس ماتوصل للضرب الى أذا تعديت حدودك وعملت فوضى أو ماشابه ذلك

انا كلامي مبالغ فيه ؟؟ طيب ادخل النادي وانتظر تاخذ استمارات في الطابور ويوم يصير التدافع شوف شو بيصير علشان ينضمون المكان والله ثم والله عندهم عصي سودا وهراوات دفعني ( خال اسود لابس نظاره سودا والظهر وقت الحر ) على صدري لين طحت على الارض والله انه الغبنه في صدري ليش انا هنا ليش انا اذل نفسي على شي ما يسوى وتراجعت وطلعت من النادي وانا والله حزين على اللي صار لي :eek3:

انا في الامارات اخوي الامير

[مستثمر تحت التعليم]

فديت قطر والله ان بلادنا ما قصرت مع الكل .

[عبدالمحسن]

السلام عليكم


عندي بعض الملاحظات

..

تقول زحمه ولا فيه مكان وبتدفع 2000 عشان تسكن !!؟؟


انا استغرب مع ان الفنادق الخمس نجوم يتوفر فيها السكن وبأقل من 2000 ريال

..

تقول الماصرف مافيها تبديل عملات !! غير معقول ابدا والبنوك فاتحه ابوابها

..

تقول تنظرب !! ابي اسأل وشو السبب !! ؟؟ معقوله تنظرب بدون سبب !! وتسكت بعد !!؟؟ العجب اكبر


ولو كان بدون سبب كنت تقدر تشتكي عند اقرب ضابط موجود او في اي مركز شرطه .. بس شوف انت شمسوي


..


وبعدين تقول انظربت في عز الحر !!؟؟؟ يا سيد الايام اللي مرت كلها شتا مافيه حر وهذا يدل على عدم مصداقيه


..

وتقول اذا بدا التزاحم .. فأنت تقصد من المكتتبين .. بمعنا ان عدم التنظيم هو من قبل المكتتبين وليس من قبل الترتيب.



فأنا اقول نحن كقطريين نطالبك بالأعتذار لتشويه سمعتنا من خلال منتدانا ( منتدى الجميع )

كما هي الدوحه( دوحة الجميع)

تحياتي

[دنيا الاسهم]

انا كلامي مبالغ فيه ؟؟ طيب ادخل النادي وانتظر تاخذ استمارات في الطابور ويوم يصير التدافع شوف شو بيصير علشان ينضمون المكان والله ثم والله عندهم عصي سودا وهراوات دفعني ( خال اسود لابس نظاره سودا والظهر وقت الحر ) على صدري لين طحت على الارض والله انه الغبنه في صدري ليش انا هنا ليش انا اذل نفسي على شي ما يسوى وتراجعت وطلعت من النادي وانا والله حزين على اللي صار لي :eek3:

انا في الامارات اخوي الامير
حسبي اللة ونعم الوكيل ليش وصل الموقف لهذة الدرجة :eek3:
يا جماعة الرجال جاي يكتتب مو يشحت
شسالفة ؟ وبعدين انت ياخوي ليش ما اشتكيت يوم كنت موجود ليش تكلمت بعد ما سافرت
واللة العالم يمكن شافوا فئة من الناس ما تفهم غير هالاسلوب وعمموا على الجميع
وسامحنا يا خوي وحقك علينا احنا بروحنا مدري وش السالفة :(
واللة حزنت عليك

[المراقب]

يا اخوي، أعداد الناس كانت هائلة، وهم من سبب الفوضى والعشوائية وبيع الأرقام و و و وتكثير الزجاج والمزاحمة ...

ولم يكن بوسع الشرطة إلا التدخل.

[falconer69qa]

السلام عليكم ورحمة الله وبركاتة
اسمح لى ضيفنا اخ عنيد ناخذ كلامك جزء جزء
1-وقوفك 7ساعات ناتج عن الاعداد الكبيرة على مركز الحدود لانة بعد اخوان واخوات ضيوفنا واصلن مثلك من دولهم وطبعا لاننسا نشكر اخوانا فى الحدود على عملهم الجبار من بداية الاكتتاب الى يومك عزيزى للعمل تشرفنا بزيارة حوالى 700000 شخص من بداية الاكتتاب والدليل بلسانك هل كنت جالس على الحدود 7ساعات لوحدك ام كان هنالك الاف السيارت
2- اشكرك انك تعتبر قطر قصر ملكى وهاى نظرتنا كلنا فى الخليج لدولنا ان كانت الكويت -السعودية -البحرين-قطر-الامارات-عمان نعم ولان هاى الدول قصورنا جميعا لازم انحافظ على النظام ونمشى حسب تعليمات المسؤلين مش كل واحد ابى اخلص الان ولا على من غيرى ولو ما صار هشكل بزعل
3-الشقق مليانة فى الدوحة وفاضية بغض النظر عن السعر وعلى كل احنا فيها لو انت فى الدوحة فى هاى الحظة بيتى مفتوح لك اوصلك الان محلك وتجلس لين يطيب خاطرك ولا انخليك تطلع من الدوحة لين اهلك يدفعون فدية ايش رايك هههههههه
4-اسمح لى مافى اى واسطة فى موقع الاكتتاب اخوى العالم بالاف محد فاضى يتوسط وبعدين بالعقل معظم اخواننا واخواتنا ضيوف لااول مرة فى ديرتهم قطر كيف واسطة هاى تبى شرح منك
5-اخيرا الشرطة الله يعطيها 1000عافية ماقصرت ولا بتقصر النظام واجب وشرحنا هاى فى النقطة فوق وللعلم الاكتتاب ينتهى يوم الاحد بغض النظر عن العدد الباقى ونعم مانبى احد يترك دوحة الخير اخوى انت اشلون اخليك اتروح بس هشكل من غير واجبك تددل وشوف كم واحد بيرد عليكى من هاى المنتدى تفضل جرب
اخيرا اتمنى لك اكتتاب موفق والله يرجع لاهلك معافى وبخير ولو تحتاج اى شيئ وقف اى شخص وقطر مفتوحة للعالم كلة اهلا فيك ويوم سعيد

[falconer69qa]

ملاحظة اخيرة كل الحوادث التى ذكرت هاى امور متفرقة وتحصل فى اى دولة فى العالم شوفو اكتتاب بنك البلاد فى السعودية او دانة غاز او فى البحرين كلنا بشر وكلنا نخطى ونصيب

[كش ملك!!]

..

تقول زحمه ولا فيه مكان وبتدفع 2000 عشان تسكن !!؟؟
استغرب مع ان الفنادق الخمس نجوم يتوفر فيها السكن وبأقل من 2000 ريال

..



___________________

امس واحد من الشباب راح فندق شيراتون ولا لقى سكن :deal:

____________________
تقول الماصرف مافيها تبديل عملات !! غير معقول ابدا والبنوك فاتحه ابوابها

أول امس واحد من الشباب الخليجين راح بنك قطر الوطني فرع الريان ولا لقى صرف :deal:

___________________

[سهم مسموم]

مكتتب خليجي يقضي حاجته في مدرجات نادي قطر!

الدوحة -الراية: فوجيء أحد رجال الأمن أثناء قيامه بجولة تفقدية بنادي قطر الرياضي للاطمئنان علي سير عملية الاكتتاب في مصرف الريان يوم أمس بقيام أحد المكتتبين من إحدي الدول المجاورة بقضاء حاجته علي مدرجات النادي في وضح النهار غير عابيء بوجود عشرات الآلاف من المكتتبين حوله، وعندما نهره رجل الأمن علي تصرفه المقزز فما كان من المكتتب الا ان رد عليه بكل وقاحة وبلهجته العامية: أنا لا أشلح علي راسك«!..


،،، وتقول اضربونا ،، او او ...... ،، من بيتحمل ،، حتى الحريم ماسلمو منهم وتحرشوا فيهم ( اقصد غير التحرش بالكلام )

على العموم لي كلمه وباقولها ( ياغريب خلك اديب ) وانا ما خصيت عميت


وتحياااتي ولاحد يزعل

[عبدالمحسن]

..

تقول زحمه ولا فيه مكان وبتدفع 2000 عشان تسكن !!؟؟
استغرب مع ان الفنادق الخمس نجوم يتوفر فيها السكن وبأقل من 2000 ريال

..



___________________

امس واحد من الشباب راح فندق شيراتون ولا لقى سكن :deal:

____________________
تقول الماصرف مافيها تبديل عملات !! غير معقول ابدا والبنوك فاتحه ابوابها

أول امس واحد من الشباب الخليجين راح بنك قطر الوطني فرع الريان ولا لقى صرف :deal:

___________________




الحين متصل لفندق الانتر وفيه حجز






..


والفلوس بالهبل في البنوك ياخي انت تتكلم عن دوله

[3need]

السلام عليكم


عندي بعض الملاحظات

..

تقول زحمه ولا فيه مكان وبتدفع 2000 عشان تسكن !!؟؟


انا استغرب مع ان الفنادق الخمس نجوم يتوفر فيها السكن وبأقل من 2000 ريال

وين السكن وانا اماراتي ما اعرف وين اسير اصلا ً كل ما سرت فندق يقول لي ما في مكان ولا يقول لي شهري مب يومي ..

تقول الماصرف مافيها تبديل عملات !! غير معقول ابدا والبنوك فاتحه ابوابها

سرت لصراف مرتين والحمدالله انه الله سرت وقاموا يقبلون العمله الاماراتيه..

تقول تنظرب !! ابي اسأل وشو السبب !! ؟؟ معقوله تنظرب بدون سبب !! وتسكت بعد !!؟؟ العجب اكبر


ولو كان بدون سبب كنت تقدر تشتكي عند اقرب ضابط موجود او في اي مركز شرطه .. بس شوف انت شمسوي

اكررها لك كنت واقف في الطابور وصا تزاحم وقام الشرطي يضرب الكل انزين انا شو ذنبي انتوا قلتوا طابور ووقفنا ننتظر نستلم الاستمارات والارقام
..


وبعدين تقول انظربت في عز الحر !!؟؟؟ يا سيد الايام اللي مرت كلها شتا مافيه حر وهذا يدل على عدم مصداقيه

الفجر برد بشكل فضيح لكن الظهر في حراره اخوي وخاصه عقب الساعه 12 ونحنا ننتظر من 8 الصبح في الملعب لين 3 الظهر بدون نتيجه
..

وتقول اذا بدا التزاحم .. فأنت تقصد من المكتتبين .. بمعنا ان عدم التنظيم هو من قبل المكتتبين وليس من قبل الترتيب.

شو سبب عدم التنظيم من المكتتبين قولي السبب ؟ لازم التنظيم اولا ً من قبل الاداره
فأنا اقول نحن كقطريين نطالبك بالأعتذار لتشويه سمعتنا من خلال منتدانا ( منتدى الجميع )

كما هي الدوحه( دوحة الجميع)

اعتذر ؟ وليش انا شو قلت ؟ اهاا صح كلمة الحق ينزعل منها اسف اخوي واسف لكل المواطنين لانه الحق عمره ما عجب احد لازم نجامل وانا ما قلت اللي قلته وكتبته الا من القهر اللي فيني انتظر الاكتتاب من شهر واخرتها ما اسوي اي شي حتى ...

تحياتي

فوق كل هذا تتهمني بالكذب مو مشكله خلاص انا كذاب يا جماعه واكبر جذاب بعد واللي قلته كله ما صار ابدا ً لانه ما بيصدق كلامي الا شخص واحد هو الخليجي اللي عانى مثلي

[سهم صائب]

عنيد هذي حبة خشم عشان ماتزعل انت اخو وعزيز

[qnet]

الاخ العنيد يبي ياخذها بارده مبرده صراحه مع حترامي للجميع انت ما عندك سالفة

تقول وقوفك 7ساعات اكيد تبي تطوف العالم الي قدامك وتدخل قبلهم ليكون الناس الي قدامك يعني عيال الغساله ؟
عجيب امرك بعد

بعدين وين بتدفع 2000 ريال وفنادق 5 ستار مشالله فيها غرف مدري يمكن انك تدور فنادق بو 150 ريال شكلك

واسطه يحليك ولله اكيد تقصد الخليجين الي يبعون الارقام :)

بس فعلا مثل ما قلت ما يسوى عليك زين كان من البداية ونت اعلم بما صار عندكم في الامارات يعني
من اكتتاب دانة غاز يعني خذت العبره منها

في النهاية بعد ما عندك سالفة صراحه

[بنت عز]

حسبي اللة ونعم الوكيل ليش وصل الموقف لهذة الدرجة :eek3:
يا جماعة الرجال جاي يكتتب مو يشحت
شسالفة ؟ وبعدين انت ياخوي ليش ما اشتكيت يوم كنت موجود ليش تكلمت بعد ما سافرت
واللة العالم يمكن شافوا فئة من الناس ما تفهم غير هالاسلوب وعمموا على الجميع
وسامحنا يا خوي وحقك علينا احنا بروحنا مدري وش السالفة :(
واللة حزنت عليك

انا اضم صوتي لك يادنيا الاسهم

بالفعل كان هناك سوء تصرف من البعض وليس الكل

وصدقني اخوي كاتب المقال , اذا لك حق راح تاخذه وعتبي عليك انك مااشتكيت من اللي صار لما كنت في الدوحة , وتكلمت لما رجعت للامارات الحبيبة وصدقني لو انك مشتكي كنت راح تاخذ حقك فوالله محد يرضى بالمهانة لا لك ولا لاي خليجي في هالبلاد الطيبة

واسمحوا لنا عالقصور يااخواننا الخليجيين وحقكم علينا وانتوا اصحاب المكان والله يرزقنا وياكم

ولا تزعل نفسك اخوي , الغلط وارد لكن النية طيبة ان شا الله

[Orbit]

ياجماعة انتو تصدقون واحد ينضرب من دون سبب ويسكت ؟

عنيد سؤال ليش سكت يوم نضربت من دون سبب ؟

[3need]

الاخ العنيد يبي ياخذها بارده مبرده صراحه مع حترامي للجميع انت ما عندك سالفة

تقول وقوفك 7ساعات اكيد تبي تطوف العالم الي قدامك وتدخل قبلهم ليكون الناس الي قدامك يعني عيال الغساله ؟
عجيب امرك بعد

بعدين وين بتدفع 2000 ريال وفنادق 5 ستار مشالله فيها غرف مدري يمكن انك تدور فنادق بو 150 ريال شكلك

واسطه يحليك ولله اكيد تقصد الخليجين الي يبعون الارقام :)

بس فعلا مثل ما قلت ما يسوى عليك زين كان من البداية ونت اعلم بما صار عندكم في الامارات يعني
من اكتتاب دانة غاز يعني خذت العبره منها

في النهاية بعد ما عندك سالفة صراحه

ما عندي سالفه ؟ صحيح نعم ما عندي سالفه لانه الاهانه يتني انا ما يتك انته وليت الاكتتاب كان قطري بالكامل والله 100% بدل ما يدخلون الخليجيين

لكن عيب عليك تقول لي هالكلام كله وهذا واانا ياي اشكي مشكلتي ترد علي جذه لو يايك في قطر شو بتسوي فيني ؟ الله المستعان

[3need]

عنيد هذي حبة خشم عشان ماتزعل انت اخو وعزيز

الله يخليك يا رب وقطر الغاليه قبل كل شي والله
اخوي اوربت اكررها للمره الثالثه اخوي ... انا واقف في الطابور ونافذة الاستمارات مغلقه ننتظر من 8 الصباح لين 1 الظهر وبعدها فتحوا النافذه وفتحوا التوزيع وبعدها صار تدافع جدام بدوا مكافحة الشغب يضربون اللي جدام بالعصى والهراوات حليبيه لونها ووقفوا تسليم الاوراق وبعدها بدأ التنظيم لكن بالضرب وانا كنت في النص ووصل عندي الشرطي وضربني على صدري دفعني دفعه لين طحت نشيت وشليت اوراقي وطلعت هذا بالشرح التفصيلي

[3need]

ياجماعة انتو تصدقون واحد ينضرب من دون سبب ويسكت ؟

عنيد سؤال ليش سكت يوم نضربت من دون سبب ؟


اخوي والله ما عندي سلطه ولا اقدر اقوله ليش تضرب بيقول انظم المكان هل تتوقف بيصدقوني وبيجذبونه

انا ياي اكتتب وارجع بلادي وارتاح مب ياي اضارب واشتكي واسوي مشاكل ولو اشتكيت كم يوم بتم في قطر انتظر و و و و وانا حتى شقه ما لقيت هل تتوقف اشتكي وبيصدقوني على طوول ؟

[MEGAMIX]

اخوي العنيد .... سسسسسسسسسسسسسسسسسسسسسسااااا محنا و حقك علينا ...

ربما كانت غلطة بسيطة وسو ء فهم احنا كلنا اعيال فريج واحد (((( الخليجيين))) و انشاء الله نشوفك في اكتتابات لا حقة و لا تزعل و يصير خاطرك الا طيب .....

تراك من ديرة الحي الى من ضاق صدرة يتونس بأ را ضيها (:

[كش ملك!!]

الحين متصل لفندق الانتر وفيه حجز






..


والفلوس بالهبل في البنوك ياخي انت تتكلم عن دوله


اليوم غير امس واول امس

وانا قلت اللي شفته بعيني :court:

[qnet]

للمره الثانيه بعد اصر واقولك ما عندك سالفة ويا ريت المشرفين هنا يتصرفون مع موضوعك هذا

من كلامك صيحيح قولك ما عندك سالفة ابد
تقول انت

(( ... اول شي الحدود 7 ساعات خيسونا كانه بندخل على قصر ملكي .. ))

شنو بتدخل على قصر ملكي يعني احترم الناس الي جاية قبلك يعني تشوف قدامك طوابير
بذمتك يعني تبيهم ياخذونك على جنب ويخلصونك وباقي الناس يذلفون ؟


انا ابي اعرف منك انت ( شغل الواسطات )
أي وساطاااات تكلم عنها يعني ياخذون الناس الي يعرفونهم ويدخلونهم
كلامك غير منطقى ابي

يعني قولك خيسوك بس انت شكلك تبي كل شي يجيك لين رجيلك (( عدل ))

(( واللي راقد تحت السياره وعلى الرمل وعلى وعلى وعلى ))
صراااحه ماعندك سالفة خير شر بعد يعني نسيت الي صار عندكم في ((( دانة غاز )))
واعتقد بأنة دولة الامارات فيها فنادق اكثر من قطر
وليش العالم كانت نايمة (( راقد تحت السياره وعلى الرمل وعلى وعلى وعلى ))
ما سئلت نفسك هذا السؤال يعني

[3need]

للمره الثانيه بعد اصر واقولك ما عندك سالفة ويا ريت المشرفين هنا يتصرفون مع موضوعك هذا

من كلامك صيحيح قولك ما عندك سالفة ابد
تقول انت

(( ... اول شي الحدود 7 ساعات خيسونا كانه بندخل على قصر ملكي .. ))

شنو بتدخل على قصر ملكي يعني احترم الناس الي جاية قبلك يعني تشوف قدامك طوابير
بذمتك يعني تبيهم ياخذونك على جنب ويخلصونك وباقي الناس يذلفون ؟


انا ابي اعرف منك انت ( شغل الواسطات )
أي وساطاااات تكلم عنها يعني ياخذون الناس الي يعرفونهم ويدخلونهم
كلامك غير منطقى ابي

يعني قولك خيسوك بس انت شكلك تبي كل شي يجيك لين رجيلك (( عدل ))

(( واللي راقد تحت السياره وعلى الرمل وعلى وعلى وعلى ))
صراااحه ماعندك سالفة خير شر بعد يعني نسيت الي صار عندكم في ((( دانة غاز )))
واعتقد بأنة دولة الامارات فيها فنادق اكثر من قطر
وليش العالم كانت نايمة (( راقد تحت السياره وعلى الرمل وعلى وعلى وعلى ))
ما سئلت نفسك هذا السؤال يعني

ما قول الا الله لا يسامحك على الكلام اللي تقوله لي واللي يزيد القهر قهر
في الامارات كان اكتتاب الدانه غاز وفي نفس الوقت كان معرض جيتكس والعالم كلها موجوده من غير الاكتتاب
ما قلت يخلصون لي كل شي ياخوي انا قلت ليش 7 ساعات على الحدود المفروض يكون في سرعه اكثر من جذه يعني معقوله ما تهيئوا وعملوا كل هالامور والاستعدادات للعالم اللي بتيهم من كل دول الخليج

[بنت عز]

للمره الثانيه بعد اصر واقولك ما عندك سالفة ويا ريت المشرفين هنا يتصرفون مع موضوعك هذا

من كلامك صيحيح قولك ما عندك سالفة ابد
تقول انت

(( ... اول شي الحدود 7 ساعات خيسونا كانه بندخل على قصر ملكي .. ))

شنو بتدخل على قصر ملكي يعني احترم الناس الي جاية قبلك يعني تشوف قدامك طوابير
بذمتك يعني تبيهم ياخذونك على جنب ويخلصونك وباقي الناس يذلفون ؟


انا ابي اعرف منك انت ( شغل الواسطات )
أي وساطاااات تكلم عنها يعني ياخذون الناس الي يعرفونهم ويدخلونهم
كلامك غير منطقى ابي

يعني قولك خيسوك بس انت شكلك تبي كل شي يجيك لين رجيلك (( عدل ))

(( واللي راقد تحت السياره وعلى الرمل وعلى وعلى وعلى ))
صراااحه ماعندك سالفة خير شر بعد يعني نسيت الي صار عندكم في ((( دانة غاز )))
واعتقد بأنة دولة الامارات فيها فنادق اكثر من قطر
وليش العالم كانت نايمة (( راقد تحت السياره وعلى الرمل وعلى وعلى وعلى ))
ما سئلت نفسك هذا السؤال يعني

اخوي كيو نت عذرا على المداخلة

بس ليش هالاسلوب العنتري هذا؟ تفتكر يعني ابهالاسلوب تقدر اتدافع عن بلادنا وتحسن صورتها؟ ولا تعطي انطباع سئ اكثر؟؟؟

صدقني ماراح اتكون غيرتك على قطر الغالية اكثر مني او من الاخوان اللي ردوا , ومع هذا ردينا بادب واحترام , وبعدين الاخ عنيد شرح موقف تعرض له وتكلم بكل ادب واحترام وماغلط على احد

ولا ليش ان الكلام ماجا على هواك اخوي؟ تبي تسمع مدح وبس؟؟

اخوي احنا معترفين ان صارت اخطاء وهذا شي وارد , لكن هل هذا يعني ان كل القطريين نفس الشي؟؟؟ طبعا لا

وارجع واقول للاخ عنيد حقك علينا والمكان مكانك اخوي وصدقني محد يرضى لك بالمهانة
وهاذي اول مرة يصير فيها عندنا اكتتاب للخليجيين فاكيد راح اتكون في اخحطاء وان شا الله اللي جاي افضل باذن الله

[كش ملك!!]

ما قول الا الله لا يسامحك على الكلام اللي تقوله لي واللي يزيد القهر قهر
في الامارات كان اكتتاب الدانه غاز وفي نفس الوقت كان معرض جيتكس والعالم كلها موجوده من غير الاكتتاب
ما قلت يخلصون لي كل شي ياخوي انا قلت ليش 7 ساعات على الحدود المفروض يكون في سرعه اكثر من جذه يعني معقوله ما تهيئوا وعملوا كل هالامور والاستعدادات للعالم اللي بتيهم من كل دول الخليج

خلاص يخوي خل قلبك كبير وانسى اللي فات

والخطأ شي وارد


لا جينا عندكم الامارات افلعنا :eek2:


والله لو اقول لك سالفه عن اماراتيات جو الدوحه علشان يكتتبون وشسووا
والله تكره نفسك وما تتمنى تكون اماراتي

لكن دايم نقول كل بلد فيها مقبره
ومثل مافيه ناس فيها خير
فيه ناس مافيها خير

[منصور]

ارجو من المشرف العام حذف الموظوع لان به تمادي واستهزاء بلبلاد

[qnet]

بنت العز الاخ داخل على (( طنازة )) شنو يعني يقصد داخل قصر ملكي

وبعدين اعتقد في ابو سمرة مفتوح لهم عدد خمس خطووط والجماعة هناك يعطيهم العافيه
مش مقصرين بس الاخ شكله مش عاجبه العجب موب شايف طابور السيارات الي واصله لين منفذ سلوى


وبعدين هذا مش عنتره ولا شي
بس انه يتطنز ويقول انه داخل قصر ملكي وارجع وقول بعد الاخ ما عنده سالفة ابدا


ولا بعد يقول (( اكرمتونا بالعصي والضرب ولا احلى ))

اعتقد محد يضرب بدون سبب منه والدرب شدعوا وين صارة هذي

ابيه يعطيني او يقول ليش طقوووووووووووووه

[mosahm]

الاخ عنيد صادق ولايشعر بشعورة الا اللي ذاق المر بالانتظار
كيف تريد منة ان يشتكي ويجلس ايام ينتظر البت بالدعوى وهو اصلا لة ايام مالقى سكن
المطلوب من الاخ عنيد ان ينسى لان ذلك الوضع الذي كان استثنائي والاخوة القطريين ماتوقعوا الاعداد الهائلة من المكتتبن وهي تجربة نطالب الجميع بالاستفادة منها
المشكلة كلها تكمن ان الاكتتاب كان بمكان واحد وسط البلد بشوارع يجرى بها اصلاحات وعدد موضفي البنك كان محدود ولايتناسب مع الاعداد التي اتت للاكتتاب
كل التوفيق للاخوة

[العجمىq8]

السلام عليكم
انا اكتتبت يوم الاحد ولله الحمد وخلص ورجعت يوم الاثنين
وكل الامور سهله
وسكنت في فندق فور سيزن حاجزه من الكويت 1700 ريال ادفع تسكن
وماشفت الى تقولونه والله كريم
واشكر اهل الدوحه وال :app: :app: :app: شرطه ولجنه وكل القطريين

[ليمت اب]

أولا قطر أكبر من القصر الملكي اللي تتكلم عنه وأعظم ... ولو عندك كرامه أو ذرة كرامه كان ما قعدت عقب ماأضربك الشرطي بخمس أيام...واللي بيته من الزجاج لايرمي الناس من حجر... والا تبي أذكرك بدانه غاز والمسخره اللي ستوت هناك...واللي مايحشم قطر ترى والله مانحشمه...مع أحترامي لأهل الخليج كلهم...بس هالاشكال ماينفع معاها الا هالرد ..وصدقني لو انت محترم ماتعرض لك الشرطي ( قطـــــــــــــر تـــــــــاج على رؤوس الاوطان)

[صدى الآهات]

سلام عليكم


يا اخي المشاكل كلها وللاسف اقولها من اخوانا الســــــــــــــعودين



مشكورين يااهل قطر علي الكرم وحسن ظيافة ومشكور للمنظمين من المدنين والعسكرين


علي الجهد من تسهيل امر الاكتتاب



تحياتي لكم


ياااااااخي المشترك ارجوا الا تعم الصالح مع الطاااااااالح فكل دولة يوجد فيها الطالح والصالح

[3need]

ولو عندك كرامه أو ذرة كرامه كان ما قعدت عقب ماأضربك الشرطي بخمس أيام...

مشكور وجزاك الله خير ... انا يتكم قطر لانه انتوا دعيتونا لكن مشكور مره ثانيه على كلامك اللي والله ما اقول الا حسبي الله ونعم الوكيل

قصدي دخولي للقصر الملكي انه في التاخير مو قصدي اتمصخر على قطر لا والله ومستحيل لو الموت ما فكرت ياخوي بالعكس قطر غاليه ولا تنسى في يوم من الايام انه قطر والامارات كانت دوله وحده ولا نسيت ... قصدي هو التاخير كانه بدخل قصر وليس قصدي الاستهزاء على قطر ... كل قطر واهلها غاليين ولا يهونون وانا اسحب هالكلمه بمى انك فهمتها غلط

[daaark]

موضوع تافه

[المخلب]

عنيد بلاك حبيبي بسنا راسك مارضيت كل هذا تغلي وله ناويها شر ؟؟

لا تخلينا نتكلم عن دانه غاز ومذلت الامارات

خلنا حبايب ابرك قلنا اسفين قل خلاص على راسي

صح وله شلون ؟

[SALMAN]

:looking: :looking:

[3need]

عنيد بلاك حبيبي بسنا راسك مارضيت كل هذا تغلي وله ناويها شر ؟؟

لا تخلينا نتكلم عن دانه غاز ومذلت الامارات

خلنا حبايب ابرك قلنا اسفين قل خلاص على راسي

صح وله شلون ؟

والله ما قلت شي اخوي بس ارد على اللي يردون علي والله يخليك وما قصرت ابدا ً وخلاص فالك طيب والله يعطيكم الف عافيه وسلام عليكم

[جوكر البورصة]

والله ما قلت شي اخوي بس ارد على اللي يردون علي والله يخليك وما قصرت ابدا ً وخلاص فالك طيب والله يعطيكم الف عافيه وسلام عليكم

:nice: :nice: :nice: :nice: :nice: :app: :app: :app: :app: :app: :nice: :nice: :nice: :nice: :nice:

[سهم عتيج]

أعتقد ان وجهة نظرك قلتها بكل حرية وبدون تدخل منا,, ولكن أعتقد ان اغلاق الموضوع أصبح ضروريا حتى لا يتحول الى منحنى آخر

ونرجو من أصحاب الشأن والمنظمين قراءة موضوعك لأخذ الملاحظات منه..

والله الموفق