المصروف الشهري..هل أنت مع أم ضد ؟؟

[هتـان قطر]

حبيت استشيركم في أمر تربوي يخص الاولاد والبنات

تعودوا عيالنا على التبذير والاسراف..اللي ما له حد

جوالات..البلاك بري ..لاب توبات..الكترونيات..اشرطة البلاي استيشن

ما لهم عدد من كثرهم..قلت في نفسي لابد من وضع حد لهذا الشي



فكرت في " المصروف الشهري " هل بيكون هو الحل لتعويدهم

على اهمية المال في حياتهم..وكيف يصرفونه وعلى ايش يصرفونه؟؟


الله يبارك فيهم..عندي اللي في سن المراهقة..وعندي اللي بعده صغير

كيف اقدر اوفق بينهم..وما اخلي الصغار يحسدون اللي اكبر منهم

اذا كان مصروفهم اكثر..؟؟

وكم تتوقعون بيكون مصروف كل شخص منهم؟؟

وهل المصروف الشهري يعتبر حل جيد للحد من التبذير..؟؟


ابي من اصحاب الخبرة يساعدوني ويرشدوني الى طريقة

ترضينا كأباء وأمهات وترضي عيالنا بحيث ما يحسون ان

احنا مقصرين عليهم في شي..


وتقبل الله منا ومنكم صالح الاعمال في هالشهر الفضيل

[المزن الرياني]

موضوع كبييييييييير ويهم شريحه كبيره من المجتمع
أهنيج أختي على الاختيار

بالنسبه لي عيالي للحين تحت 4 سنوات ,,, فالموضوع بالنسبه لي مشاهده لتجارب أخواني وخواتي ممن سبقوني

بالتوفيق ان شاءالله

[miss-qatr]

هلا اختي هتان...


عسى ربي يبارك فيهم واتشوفينهم أحسن الناس قولي آآمين :)


لاتقولين الحين مس ماعندها خبره وقاعدتلي اتفلسف :weeping:


سمعت مره البرفسور في الطب النفسي بس مب متذكره اسمه اللي عنده برنامج بالإمارات ( شي حبيب )

كان يتكلم عن تمرد المراهقين ونصح بشي وقال أنا أطبقه شخصياً

اعط طفلك مساحة من الحرية منذ الصغر سواء كان بالمصروف أو بإتخاذ القرارات

لأن إن حصل الطفل مساحة الحرية فماراح يحتاج عند دخوله للمراهقة بالتمرد على الوالدين


ومن رأيي الشخصي ( المتواضع ) أقنعني كلامه وهو مفيد بنواحي عده


خلهم يتعلمون إنهم لي بغو حاجه لازم اتكون من عنده مب يترسخ مصطلح ( باخذ من أمي ولا أبوي )

<هم ما ياخذون من بير :omen2:>

[مشاكل]

من واقع تجربه

اعتمدي نظام المكافائات افضل بكثير
مثلا
المواظبه على الصلاه لها مكافئه
النوم بدري له مكافئه
حل الواجبات
السمع والطاعه
حفظ سور من القران الكريم
واي شي تبين ترسخينه في عيالج يكون بمكافئه غير مشروطه مسبقاّ ( يعني من خاطرج ومافيها اتفاق مسبق حتى لاتؤخذ مفهوم التجاره من قبل الابناء )

وبذلك تكونين ضربتي عصفورين بحجر

اما بالنسبه لنظام المصروف الشهري انا ماأييده لأنه في كثير من الأحيان يخطئ ابنائنا التصرف في هذه الأموال وخصوصا قبل سن ال18

الله يحفظ لج عيالج ويبلغج فيهم

[Riku3]

على اهمية المال في حياتهم..وكيف يصرفونه وعلى ايش يصرفونه؟؟
الفلوس في يد الطفل مب مشكلة .. ولكن المشكلة لو تعلم انه يصرفها على امور تافهه وسريعة ..

مثلاً .. انا يوم كنت اصغر كان عندي مصروف شهري وكنت اصرف فيه على اكل المدرسة والباقي اجمعه علشان اشتري اشرطة بلاي ستيشن والا شي في خاطري وماكنت اصرفه على اشياء مالها داعي مثل تبديل التلفونات كل شهرين او مصاريف فواتير التلفون ..

فأنا مب ضد انه يشتري ملابس جديدة في خاطرة او كمبيوتر او بلاي ستيشن او حتى تلفون .. بس لازم يحس بقيمة الاشياء الي شراها ويعرف انها ماجات بسهولة .

اما عيال هالايام صارت الفلوس عندهم لعبة للاسف والسبب هو انه يشوف الي اكبر منه يبذر يمين ويسار بدون اي قيود حتى لو ماعنده فلوس ..

وكل مايطلب من اهله يعطونه زيادة ! .. وهو يصرف لين ما يكبر ويوصل عمر 20 سنة وهو عقله عقل 15 ومايعرف يتصرف في الفلوس وتحصلونه مديون قبل لا يحصل على وظيفة .

كيف اقدر اوفق بينهم..وما اخلي الصغار يحسدون اللي اكبر منهم

اذا كان مصروفهم اكثر..؟؟

وكم تتوقعون بيكون مصروف كل شخص منهم؟؟
لازم يتعلم الصغير ان الكبير مصاريفه اعلى علشان كذا فلوسه اكثر والسالفة مب سالفة حسد ولا شي !! .. عمرنا مافكرنا بهالطريقة وكلنا كنا مب متساويين في المصروف .

فلازم تحطين جدول .. عمر كذا الى كذا = السعر الفلاني .. وهكذا ويكون جدول وبتلاقين الولد جاييج يوم ميلاده يقولج زيدي المصروف ترى صرت ترقيت من جنير واللحين سنير .

بس لازم ماتفرقين بينهم في الامور الثانية مثل تفصيل الثياب او اذا بتشترونلهم نعاله جديدة الله يعزج .. فمب تاخذون الصغير سوق واقف ياخذ نعال والثاني من كاراتيه .


وهل المصروف الشهري يعتبر حل جيد للحد من التبذير..؟؟
مب شرط .. ممكن يجي واحد يصرف كل الفلوس اول 5 ايام بكل شهر .. مثل شبابنا الله يهديهم وبعدها يجيكم يتشكى ويطلب زيادة :) .. فلازم الشروط بالاول وبعدها الفلوس .

وفي حل ان يكون المصروف كل 15 يوم وليس 30 .. وبكذا مابيكون المبلغ كبير كثير ومابيتعود على ان الفلوس كثيرة ومالها قيمة .. ويقدر يتعلم يمسك نفسه شوي .

ابي من اصحاب الخبرة يساعدوني ويرشدوني الى طريقة

ترضينا كأباء وأمهات وترضي عيالنا بحيث ما يحسون ان

احنا مقصرين عليهم في شي
انا مب خبير .. ولاعندي عيال وتوني متزوج من اقل من سنة ..

بس كان عندنا نظام طويل عريض في البيت والحمد لله بسبب هالنظام كل اخواني عندهم حرص جيد للفلوس وطريقة صرفها .. وبنفس الوقت مانقصر على انفسنا واهلنا والحمد لله بيتنا خالي من الديون .

تحياتي :)

[ANONYMOUS]

جربي مصروف اسبوعي..

عقب زيدي المده كل فتره..

لين تحسين ان الابن صار كفؤ وقام يسوي كنترول على يده ومصروفه ويوفر و يقسم و و و .. لين مايكون المبلغ شهري..

واذا مانفع معاه.. عطيه ريالين في اليوم.. وطقيه على علباه .. وقولي له روح البس قحفيه :p

ولا نستغنى عن الرد اعلاه تبع الاخ اركيو.. كلامه منطقي..

بالنسبه لي عيالي تو صغار وانشالله راح اسوي نظام في المستقبل

[م. عبدالعزيز]

موضوع رائع ،، بكون متابع :)

[البارح]

فكرة المصروف الشهري لا باس بها
وسئتابع الردود

[أبو راكان]

تبون عيالكم يحسون بقيمة الفلوس
لاتجعلوها رخيصه في ايديهم

[بدور]

عن واقع تجربه عيالنا يا هتان من صغرهم يتوفر لهم كل ما يطلبونه على طبق من ذهب

ظناً نوفر لهم طلباتهم حتى مانكسر خاطرهم .. وكل ما اكبروا زادت طلباتهم بلا مبالاه

مهما يكون الطلب ضروري يتنفذ مهما يكون سعره يتنفذ 500 ريال ماتسوى ريال عندهم

اذا راحوا مجمعات للسينما او مطاعم ويطلبون مبلغ اكبر 500 ماتكفيهم وهم صغار

تعود خطأ وتربيه مبالغ فيها بالرفاهيه والآن لايفيد الندم

المفروض تعويد الابناء من الصغر على اهمية قيمة المال وليس كل ما يطبلون يتم توفيره لهم

ليس بخلاً ولكن للتعود على عدم الاسراف والاعتماد على الوالدين في الكبر حتى يحس

بضبط النفس .. صدقيني هتان والله احنا نعاني من الدلال الزايد

المصروف الشهري هو الافضل حتى يحس بالمسئوليه و بقيمة المبلغ وعليه ينظم صرفه الى بقية الشهر

[بولينجر]

نظام المصروف الشهري او النصف شهري ممتاز وتربينا عليه.... وهو الافضل لانه يعلم قيمة المال.... العيال لما يمسكون الفلوس في يدهم ويعرفون وش ممكن تسوي لهم بيصير عندهم حافز يجمعونها وما يصرفونها الا للضرورة.... واللي يحافظ على مصروفه اكثر ويدخر منه يعطونه مكافأة....

ورد اخوي Riku3 يكفي ويوفي جزاه الله خير....

[ASK2]

طبعاً المصرف الشهري هو اللي بعلمهم قيمة المال وكيف التصرف فيه ولازم تكون هناك توجيهات من الاب والام ويفهمونهم ان هذا المصروف في يوم واحد انت تتحمل باقي الشهر ..

[_بوشهاب_]

والله ياخوي انا من صف اول اعدادي والمصروف في يدي والحمدلله
وهالحركه تعلم الواحد اشلون يمسك ويحافظ على مصروفه مب في يوم وليله يظيع تعب شهر

_بوشهاب_

[هتـان قطر]

موضوع كبييييييييير ويهم شريحه كبيره من المجتمع
أهنيج أختي على الاختيار

بالنسبه لي عيالي للحين تحت 4 سنوات ,,, فالموضوع بالنسبه لي مشاهده لتجارب أخواني وخواتي ممن سبقوني

بالتوفيق ان شاءالله

مادام عيالك صغار الله يحفظهم لك

تابعنا وفالك طيب

:)

[هتـان قطر]

هلا اختي هتان...


عسى ربي يبارك فيهم واتشوفينهم أحسن الناس قولي آآمين :)


لاتقولين الحين مس ماعندها خبره وقاعدتلي اتفلسف :weeping:


سمعت مره البرفسور في الطب النفسي بس مب متذكره اسمه اللي عنده برنامج بالإمارات ( شي حبيب )

كان يتكلم عن تمرد المراهقين ونصح بشي وقال أنا أطبقه شخصياً

اعط طفلك مساحة من الحرية منذ الصغر سواء كان بالمصروف أو بإتخاذ القرارات

لأن إن حصل الطفل مساحة الحرية فماراح يحتاج عند دخوله للمراهقة بالتمرد على الوالدين


ومن رأيي الشخصي ( المتواضع ) أقنعني كلامه وهو مفيد بنواحي عده


خلهم يتعلمون إنهم لي بغو حاجه لازم اتكون من عنده مب يترسخ مصطلح ( باخذ من أمي ولا أبوي )

<هم ما ياخذون من بير :omen2:>


تسلمين مس قطر عسى ربي يرزقك الزوج الصالح والذرية الصالحة..


اعجبتني هالجمله " ما ياخذون من بير " ياليت نفهمها عيالنا

ويكونون قنوعين باللي في يدهم ..

كلام الدكتور سليم..لابد ان نعطي حيالنا فرصة علشان يجربون

عقولهم ويشغلونها بما هو مفيد..ترى كل شي احنا نسويه عنهم

حتى التفكير في مستقبلهم احنا نفكر عنهم..

بجد المسألة كبيرة ومحتاجها علاج..والاولى بالعلاج ..نحن الاباء :(

[بوالفاروق]

نظام المصروف الشهري او النصف شهري ممتاز وتربينا عليه.... وهو الافضل لانه يعلم قيمة المال.... العيال لما يمسكون الفلوس في يدهم ويعرفون وش ممكن تسوي لهم بيصير عندهم حافز يجمعونها وما يصرفونها الا للضرورة.... واللي يحافظ على مصروفه اكثر ويدخر منه يعطونه مكافأة....

ورد اخوي Riku3 يكفي ويوفي جزاه الله خير....

:nice: ماقصرتم والله ..

والوالد كان معودين على هالشي من ايام الاعدادية المصروف الشهري
لين الحمدلله كبرنا وصرنا شلون نوفر ونصرف
ودووم يمدحني الوالد قدام اخواني :shy: ..

ورد اخونا Riku3 ممتاز جداً

والله يحفظ عيالج ويهديهم

:)

[هتـان قطر]

من واقع تجربه

اعتمدي نظام المكافائات افضل بكثير
مثلا
المواظبه على الصلاه لها مكافئه
النوم بدري له مكافئه
حل الواجبات
السمع والطاعه
حفظ سور من القران الكريم
واي شي تبين ترسخينه في عيالج يكون بمكافئه غير مشروطه مسبقاّ ( يعني من خاطرج ومافيها اتفاق مسبق حتى لاتؤخذ مفهوم التجاره من قبل الابناء )

وبذلك تكونين ضربتي عصفورين بحجر

اما بالنسبه لنظام المصروف الشهري انا ماأييده لأنه في كثير من الأحيان يخطئ ابنائنا التصرف في هذه الأموال وخصوصا قبل سن ال18

الله يحفظ لج عيالج ويبلغج فيهم


اخوي مشاكل مبدأ المكافأت نطبقه في كثير من الاحيان

خصوصا بعد كل نجاح في المدرسة

ومع ذلك اصبح العيال يستغلون هالنقطة ويتشرطون

اذا نجحنا نبي كذا..ونبي كذا..حتى لو كان مهب مناسب لسنهم

احيانا نرضخ للامر..واحيانا نرفض وهنا بتجي المقارنة

بينا وبين الاباء الاخرين..ليش ابو فلان شرى لولده

وانا ابوي ما شرى لي..والبنت كذلك..وبنقعد ندور حول نفس القضية

انا من وجهة نظري يكون له مصروف شهري..واذا الولد او البنت

انجزوا عمل جيد او نجاح..تكون المكافأة في هالحالة

[هتـان قطر]

الفلوس في يد الطفل مب مشكلة .. ولكن المشكلة لو تعلم انه يصرفها على امور تافهه وسريعة ..

مثلاً .. انا يوم كنت اصغر كان عندي مصروف شهري وكنت اصرف فيه على اكل المدرسة والباقي اجمعه علشان اشتري اشرطة بلاي ستيشن والا شي في خاطري وماكنت اصرفه على اشياء مالها داعي مثل تبديل التلفونات كل شهرين او مصاريف فواتير التلفون ..

فأنا مب ضد انه يشتري ملابس جديدة في خاطرة او كمبيوتر او بلاي ستيشن او حتى تلفون .. بس لازم يحس بقيمة الاشياء الي شراها ويعرف انها ماجات بسهولة .

اما عيال هالايام صارت الفلوس عندهم لعبة للاسف والسبب هو انه يشوف الي اكبر منه يبذر يمين ويسار بدون اي قيود حتى لو ماعنده فلوس ..

وكل مايطلب من اهله يعطونه زيادة ! .. وهو يصرف لين ما يكبر ويوصل عمر 20 سنة وهو عقله عقل 15 ومايعرف يتصرف في الفلوس وتحصلونه مديون قبل لا يحصل على وظيفة .

لازم يتعلم الصغير ان الكبير مصاريفه اعلى علشان كذا فلوسه اكثر والسالفة مب سالفة حسد ولا شي !! .. عمرنا مافكرنا بهالطريقة وكلنا كنا مب متساويين في المصروف .

فلازم تحطين جدول .. عمر كذا الى كذا = السعر الفلاني .. وهكذا ويكون جدول وبتلاقين الولد جاييج يوم ميلاده يقولج زيدي المصروف ترى صرت ترقيت من جنير واللحين سنير .

بس لازم ماتفرقين بينهم في الامور الثانية مثل تفصيل الثياب او اذا بتشترونلهم نعاله جديدة الله يعزج .. فمب تاخذون الصغير سوق واقف ياخذ نعال والثاني من كاراتيه .


مب شرط .. ممكن يجي واحد يصرف كل الفلوس اول 5 ايام بكل شهر .. مثل شبابنا الله يهديهم وبعدها يجيكم يتشكى ويطلب زيادة :) .. فلازم الشروط بالاول وبعدها الفلوس .

وفي حل ان يكون المصروف كل 15 يوم وليس 30 .. وبكذا مابيكون المبلغ كبير كثير ومابيتعود على ان الفلوس كثيرة ومالها قيمة .. ويقدر يتعلم يمسك نفسه شوي .

انا مب خبير .. ولاعندي عيال وتوني متزوج من اقل من سنة ..

بس كان عندنا نظام طويل عريض في البيت والحمد لله بسبب هالنظام كل اخواني عندهم حرص جيد للفلوس وطريقة صرفها .. وبنفس الوقت مانقصر على انفسنا واهلنا والحمد لله بيتنا خالي من الديون .

تحياتي :)

Riku3 اسأل الله ان يبارك لك في رزقك ويرزقك بالذرية الصالحة

اعتقد راح استفيد من ردك كثير..جدا كان وافي وشامل

بما انك مجرب المصروف الشهري..تقدر تقولي او تحدد لي

كم اعطي ولد في الثانوية والاخر في الاعدادية..؟؟؟

واكون شاااكرة لك

:omen2:

[الجوكر90]

السلام عليكم
انا يوم كنت صغير ابوي كان يمشي لي راتب اسبوعي
بس يوم كبرت كل مافلوسي تخلص اخذ منه وهالشي خلاني ماقدر امسك الفلوس
اي متى احصل الفلوس ع طول تنصرف
بس احسن حل المصروف الاسبوعي
واذا ع العمر الكبير لازم ياخذ اكثر من الصغير
والله يخليهم لج

[Riku3]

riku3 اسأل الله ان يبارك لك في رزقك ويرزقك بالذرية الصالحةالجميع ان شاء الله .. والله يخليلج عيالج ويبارك فيهم .

بما انك مجرب المصروف الشهري..تقدر تقولي او تحدد لي
كم اعطي ولد في الثانوية والاخر في الاعدادية..؟؟؟
يفرق اختي بين عائلة وعائلة .. فلو العائلة ميسورة الحال فلازم الولد يكون عنده اكثر شوي من حاجياته الاساسية ولكن بدون تفريط .. اما لو كانت العائلة فقيرة او متوسطه فلازم ياخذ على قد حاجته وشوي زيادة بس ..

انتي المفروض تحسبينها شوي ..

شنو ياكل في المدرسة ؟ .. على ايامي كانت 3 ريال عز في اليوم >_< .. اما اللحين سمعت ذاك اليوم واحد في الدوام يقول بيروح البنك يسحب عشرات حق مدارس اليهال !!! .. كل يوم عشر ليييش ان شاء الله ! .

لازم تحسبين كم ياكل وتضربينه على عدد الايام .. طبعاً 5 ايام مب 7 في الاسبوع ! .. وتحسبين كم عشى برع مع ربعه على شوية حاجيات يبيها او بترول سيارته على كم تذكرة سينما ..

بس لازم تعرفين ان ايامنا غير وايامهم غير فما اقدر احكم الا لو كنت صاحب خبرة بنفسي في هذا الجيل :) ..

على ايامي كانوا الطلاب الي عندهم ليسن ينعدون على الاصابع واللحين شباب في الثانوية وعندهم سيارة وثنتين وثلاث .. وذيك الايام مافي شي اسمه جوال او انترنت وما ادري ايش ومصاريف .. ويكفي ان فاتورة التلفون تحصلينها عندهم فوق 300 ريال في الشهر وهذا تريبل الي كنت اخذه في الاعدادية .

فلازم يكون المصروف على قد كل هالظروف الجديدة .. وانتوا ادرى .

[هتـان قطر]

جربي مصروف اسبوعي..

عقب زيدي المده كل فتره..
لين تحسين ان الابن صار كفؤ وقام يسوي كنترول على يده ومصروفه ويوفر و يقسم و و و .. لين مايكون المبلغ شهري..

واذا مانفع معاه.. عطيه ريالين في اليوم.. وطقيه على علباه .. وقولي له روح البس قحفيه :p

ولا نستغنى عن الرد اعلاه تبع الاخ اركيو.. كلامه منطقي..

بالنسبه لي عيالي تو صغار وانشالله راح اسوي نظام في المستقبل


في البداية عطيتنا فكرة حلوة انونيموس..وبعدين خرتها

ليش اطقه على علباه واقول له البس قحفية..:rolleyes2:

:nice:

[هتـان قطر]

الجميع ان شاء الله .. والله يخليلج عيالج ويبارك فيهم .

يفرق اختي بين عائلة وعائلة .. فلو العائلة ميسورة الحال فلازم الولد يكون عنده اكثر شوي من حاجياته الاساسية ولكن بدون تفريط .. اما لو كانت العائلة فقيرة او متوسطه فلازم ياخذ على قد حاجته وشوي زيادة بس ..

انتي المفروض تحسبينها شوي ..

شنو ياكل في المدرسة ؟ .. على ايامي كانت 3 ريال عز في اليوم >_< .. اما اللحين سمعت ذاك اليوم واحد في الدوام يقول بيروح البنك يسحب عشرات حق مدارس اليهال !!! .. كل يوم عشر ليييش ان شاء الله ! .

لازم تحسبين كم ياكل وتضربينه على عدد الايام .. طبعاً 5 ايام مب 7 في الاسبوع ! .. وتحسبين كم عشى برع مع ربعه على شوية حاجيات يبيها او بترول سيارته على كم تذكرة سينما ..

بس لازم تعرفين ان ايامنا غير وايامهم غير فما اقدر احكم الا لو كنت صاحب خبرة بنفسي في هذا الجيل :) ..

على ايامي كانوا الطلاب الي عندهم ليسن ينعدون على الاصابع واللحين شباب في الثانوية وعندهم سيارة وثنتين وثلاث .. وذيك الايام مافي شي اسمه جوال او انترنت وما ادري ايش ومصاريف .. ويكفي ان فاتورة التلفون تحصلينها عندهم فوق 300 ريال في الشهر وهذا تريبل الي كنت اخذه في الاعدادية .

فلازم يكون المصروف على قد كل هالظروف الجديدة .. وانتوا ادرى .


الله يعطيك الف عافية على اثرائك للموضوع اخوي ريكيو3


في هالزمن كثرت طلبات العيال وما عادت مثل ايامنا قبل

مثل ما تفضلت ريكيو الولد اللي في الثانوية بسيارته

وجواله فاتورة والثاني هلا..ولاب توب ونت مفتوح على طول

وكل ما قال عطوني حطينا يدنا في المخبا وطلعنا..هذا غير السفرات

مع الربع..احنا ما نبي نضيق عليهم ولا نحرمهم

لكن نبيهم يحسون ان الفلوس اللي تجيهم بسهولة

ما تجي حق ابوهم الا بتعب وعمل طول اليوم..

العيال في هالوقت يحسون انه اجباري على الاهل يلبون طلباتهم

والا بيكونون اهل قح ما يطلعون الفلوس الا بعد طلعة روح..


اللي ابيه..انهم يحسون بقيمة الفلوس اللي في يدهم

وفي وين بينفقونها..وايش هي الضروريات وايش هي الكماليات

الله يهديهم وينور بصيرتهم

كل الشكر لك اخوي ريكيو

[قطر دزاين]

يجب عليك يا ولاي الامر دام ابنك في امرك ان تختار انت له ما يريد والمناسب لسنه
وعدم ترك الحبل على القارب
كل شي يكون بعنايه وتقدر انت شخصيآ ماذا يريد اولادك وتعودهم على عدم التبذير والاهم ان لا يقول لك فلان عنده وانا ما عندي هنا دور التربيه على الوالدين

الله يصلح ابنائنا وابنأكم

[ANONYMOUS]

في البداية عطيتنا فكرة حلوة انونيموس..وبعدين خرتها

ليش اطقه على علباه واقول له البس قحفية..:rolleyes2:

:nice:

اقصد

في حالة عدم الجدوى من اعطائه مصروفه وحسن تدبيره

خلاص استعملي معاه اسلوب ثاني

[doha70999]

لا انا ماحب المصروف الشهري،،، عيالنامن حقهم انهم يستانسون وياخذون اللي بخاطرهم بس بعقل ، ممكن الواحد يحدد لهم مبلغ مايتعدونه بس يكون عند الاب بس لازم يكون بيدهم خرده حق التيك اواي والطلعات ويا ربعهم :)

[دلة الرسلان]

هتان الأخوان كلهم عيالهم صغار باين بس انا وانتي ديناصورات المنتدى:unsure:

عيالنا لهم مصروف شهري ولكن اشوف ابوهم يدفع فواتير الجوالات والدوبي ومخالفة

السيارات وكل شيء تقريبا !!

لو انا اللي ماسكة الميزانية يمكن احكر لهم بس زوجي يعاتب الواحد على اسرافه وهو يمد

له بطاقة الصراف . انا مع المصروف الشهري ولكن بحزم هذا مصروفك دبر نفسك به .

[اعالي الجنان]

جدا عجبني الموضوع تسلمين للفكره اختي هتان
انا افضل اكون متابعه لان عيالي توهم بالابتدائيه والروضه وماعرف افيدكم بشي
ضحكتني دلة الرسلان اضحك الله سنها

[دلة الرسلان]

جدا عجبني الموضوع تسلمين للفكره اختي هتان
انا افضل اكون متابعه لان عيالي توهم بالابتدائيه والروضه وماعرف افيدكم بشي
ضحكتني دلة الرسلان اضحك الله سنها

تعرفين اول كانوا يزوجونا اهلنا مبكر يعني انا وهتان في اول اعدادي ..تدرين خليها

خامس ابتدائي اذرب :shy:

[فهد الخاطر]

حبيت استشيركم في أمر تربوي يخص الاولاد والبنات

تعودوا عيالنا على التبذير والاسراف..اللي ما له حد

جوالات..البلاك بري ..لاب توبات..الكترونيات..اشرطة البلاي استيشن

ما لهم عدد من كثرهم..قلت في نفسي لابد من وضع حد لهذا الشي



فكرت في " المصروف الشهري " هل بيكون هو الحل لتعويدهم

على اهمية المال في حياتهم..وكيف يصرفونه وعلى ايش يصرفونه؟؟


الله يبارك فيهم..عندي اللي في سن المراهقة..وعندي اللي بعده صغير

كيف اقدر اوفق بينهم..وما اخلي الصغار يحسدون اللي اكبر منهم

اذا كان مصروفهم اكثر..؟؟

وكم تتوقعون بيكون مصروف كل شخص منهم؟؟

وهل المصروف الشهري يعتبر حل جيد للحد من التبذير..؟؟


ابي من اصحاب الخبرة يساعدوني ويرشدوني الى طريقة

ترضينا كأباء وأمهات وترضي عيالنا بحيث ما يحسون ان

احنا مقصرين عليهم في شي..


وتقبل الله منا ومنكم صالح الاعمال في هالشهر الفضيل
افضل شيء يا اختي هتان
بان يتم اعطاء كل واحد فيهم مبلغ شهري ليتصرف به ويكون الصرف في حدود المبلغ الحاصل عليه ولا يتعود على التبذير
كانت المرحومه الله يرحمها عودتني بانه لي مبلغ شهري وانا طالب في المدرسه
كل شهر مبلغ ثابت وهذا الكلام كان في عام 98
وكانت دائما تنصحني بان اتصرف بعقلانيه وعدم تبذير الاموال في الاشياء التي لا تعود بالنفع
وكانت تقول باستمرار اعرف تتصرف في الفلوس الشهرية لانه لين اخلصت قبل الوقت تحمل نتائج الصرف اذا كان على امور ما تسوى

[ســـهم]

والله ياخت هتان اذا الكبار مبذرين شلون شباب في سن المراهقه الله يحفظهم

اذا تعود شخص على شي ما

فصعب انه يتأقلم على رتم جديد وخاصة اذا كان مثل الشباب اللي عندتس .. :)

بالاضافه اننا نعيش في زمن الغنى

يعني اذا قصرتي عليهم راح يسمونج شحيفان :)

[فهد الخاطر]

موضوعج روعه
وايضا دعينا من خلال موضوعج نجعله عام
لانه حقيقه بعض الكبار ايضا يتصرفون بالاموال كطريقة الانسان الذي لا يعلم ما الذي يفعله في المال ويرميه يمين ويسار
فافضل طريقه ايضا
لهذا النوع من الناس
1-يتم تجزئة المبلغ الشهري او المداخيل السنوية ويحدد كل شخص من خلال مدخوله الشهري اهداف يصل اليها الى صورة ايجابيه ان شاء الله
وبالنسبة للمدخول السنوي واقصد به عوائد لا تاتي سوى مره واحد في السنه مثل البورصة او الارباح البنكية
دعينا نذكر على سبيل المثال
600 الف مدخول سنوي
يتم تقسيمه على الشكل الاتي:
150 الف للسفر
250 الف يتم اعادة استثمارها و200 الف تبقى في البنك للحاجة
حقيقه موضوع يشجع
واهنيج عليه يا هتان قطر
تسلم يمينج
أخوج فهد

[ام لولوه]

انا اقول صعبه الحين تعودينهم على مبلغ معين يلتزمون فيه وخصوصا اذا كانوا صغار
لان الاطفال بطبيعتهم متطلبين ويبون كل شي
انا اقول جربي اسبوع اذا ضبطت ضبطت واذا لا شيلي الفكره من رأسج وانا استبعد ان يتقيدون
الحين في المولات على العاب وسينما ومطعم الصرف يكون مو اقل من الف الله المستعان

[Bu Rashid]

يعطيج العافيه اختي هتان على الموضوع القيم

صديقي استخدم هذه الطريقه مع جميع اعياله
ويقول النظام حلو ولكن للاسف بدؤا يبخلووون على انفسهم
ولهذى يحتاج بعض التعديل او تصحيح افكار الاطفال من ناحيه كيفيه الصرف ومتي يصرفوا

[هتـان قطر]

موضوع رائع ،، بكون متابع :)




فكرة المصروف الشهري لا باس بها
وسئتابع الردود


تابعونا وفالكم طيب :nice:


تبون عيالكم يحسون بقيمة الفلوس
لاتجعلوها رخيصه في ايديهم


صدقت..من لا يعرف قيمة المال لن يعرف كيف ينفقه وفيما ينفقه

[هتـان قطر]

عن واقع تجربه عيالنا يا هتان من صغرهم يتوفر لهم كل ما يطلبونه على طبق من ذهب

ظناً نوفر لهم طلباتهم حتى مانكسر خاطرهم .. وكل ما اكبروا زادت طلباتهم بلا مبالاه

مهما يكون الطلب ضروري يتنفذ مهما يكون سعره يتنفذ 500 ريال ماتسوى ريال عندهم

اذا راحوا مجمعات للسينما او مطاعم ويطلبون مبلغ اكبر 500 ماتكفيهم وهم صغار

تعود خطأ وتربيه مبالغ فيها بالرفاهيه والآن لايفيد الندم

المفروض تعويد الابناء من الصغر على اهمية قيمة المال وليس كل ما يطبلون يتم توفيره لهم

ليس بخلاً ولكن للتعود على عدم الاسراف والاعتماد على الوالدين في الكبر حتى يحس

بضبط النفس .. صدقيني هتان والله احنا نعاني من الدلال الزايد

المصروف الشهري هو الافضل حتى يحس بالمسئوليه و بقيمة المبلغ وعليه ينظم صرفه الى بقية الشهر


اتفق مع كل اللي قلتيه بدور..

اتذكر يوم كنا صغار كانوا بنات المدرسات العربيات يدرسون معنا

وما كنا نسمع عن المصروف الا عندهم او في مجلة ماجد :eek5:

ولله الحمد عيالنا من فتحوا عيونهم على الدنيا ورغباتهم وطلباتهم ملباه

لكن لابد ان لكل شي حد..لازم نفتح عيونهم على مبدأ جديد قد يكون غريب

عليهم في البدايه لكن بيكون في صالحهم..

اللي الاحظه الحين في شبابنا واللي حوالينا الاعتماد الكلي على الاب

الاب هو اللي بيدفع المهر..وهو اللي بيجهز له مكان له ولزوجته المصون

من ..الى..كله على الاب..والولد وييييين..؟؟؟ للاسف ما تعود..تعود ان الاهل

شايلينه على كفوف الراحة..ويطلب منهم يشيلون زوجته وعياله اللي بيلفون

على الدنيا...طيب وبعدين الاهل متى بيخلص دورهم وبيلتفتون لانفسهم

وبيعيشون حياتهم مرتاحين..

لذلك لابد ان عيالنا من الان نوعيهم ونحط هدف امام اعينهم..

لابد انهم يتحملون في سبيل مستقبلهم ويعرفون كيف يتصرفون

[هتـان قطر]

نظام المصروف الشهري او النصف شهري ممتاز وتربينا عليه.... وهو الافضل لانه يعلم قيمة المال.... العيال لما يمسكون الفلوس في يدهم ويعرفون وش ممكن تسوي لهم بيصير عندهم حافز يجمعونها وما يصرفونها الا للضرورة.... واللي يحافظ على مصروفه اكثر ويدخر منه يعطونه مكافأة....

ورد اخوي riku3 يكفي ويوفي جزاه الله خير....



بولينجر..ريكيو 3 ..انتوا الاثنين مثال حي للي ناويه اطبقه على عيالي

وان شالله يتحقق المرجو من ذلك..

كل الشكر لكم :)

[ابوعلي]

يعطيج العافية أختي على الموضوع

وعن تجربه في المصروف الشهري وكنت اعطي العيال مبلغ حسب العمر ولاحظت

الولد اخر العنقود طلع نصاب لأنه ياخذ من والدته ويحط على فلوسه اذا انقصت ويبين انه ما يصرف الا في المفيد

وواحد منهم يصرفهم على طول وخاصة في الأمور الترفيهيه وبعضها مالها داعي

والبنات وحده كانت تمسك فلوسها والثانية صرفها حسب الحاجة والمفيد

والله يستر عليهم وعلى اعيالكم والله يوفقنا ويقدرنا على حسن تربيتهم

[ناصح لكم]

من تجربه شخصيه ومستمره

فتح حسابات توفير بالمصرف الأسلامي
تحويل مبلغ 500 شهريا لكل واحد
صرف بطاقة سحب آلي لكل واحد وحفظها مع الأم

الصرف من المبلغ يكون في الأمور التي لا تدخل ضمن نطاق مسئوليتهم
كوجبات المدارس والملابس والأحذيه والكتب والقرطاسيه الأساسيه كوني أتكفل بها وطبعا الجمعيه

طبعاً راح تتفاجئون أن منهم الذي سيصرف فلوسه أول بأول ومنهم من سيوفر ومنهم من سينافس الآخر يما عنده في البنك ومنهم من سيسلف الآخر ومنهم من سيشتري وجبه من المطعم بفلوسه في حالة ما عجبه أكل البيت

لكن اللي لاحظته أن الجميع يستخدم فلوسه عند السفر لشراء ما يرغب فيه من أكسسوارات أو أغراض غير ضروريه

طبعا مصروف المدرسة لا يدخل ضمن ميزانيتهم بل يتم التكفل به

أنا أعتبر هذا تمرين عملي طويل لتعليمهم التعامل مع المال

الأولاد والبنات إذا عرفوا يتعاملون مع الفلوس فلن يسبب لهم ذلك مشكله حين يبدؤون في العمل وستعطيهم خبرة متراكمه منذ الصغر في كيفية الأنفاق خاصه كم قلت أن البطاقات عند الأم

الفكره لا زالت تحت التجربه وأرى أنها مفيده لجعلهم يفكروا في تنظيم الميزانية الخاصه بهم

شكرا

[عابر سبيل]

اختنا الكريمة/هتان..
بارك الله بج و اعانج الله على امور التربية..

للاسف كثييير من الاباء مخلينها على عواهنها
و ما ينتبهون لسلوكهم اللي في الاخير هو ما يؤثر على ابنائهم.

المسألة شائكة و صعب ان يوجد لها معادلة..
اعتقد انها تعتمد على التجربة...يعني نجرب..ان صابت
و لا نغير من النهج!

هالمسألة اخت/هتان انا سمعتها في احدى حلقات
برنامج "بيوت مطمإنه"...
(لو تحبين هو على هالرابطhttp://www.qatarshares.com/vb/showthread.php?t=283803)

تصدقين ان الضيف قال ان به بيوت (في بلدهم) قدرتها
على الحد...و يعطون بنتهم ريال واحد يوميا و هي جامعيه!

القصد..ان كل بيت و بيئه لها احكامها...
و الاباء مسؤوليتهم ما تنتهي يالتوفير...
لا بد من تتبع التأثير...ان كان ايجابي و لا لا بد التغيير.

عن نفسي اختي هتان....اذا سمح لي المقام للاختلاف...
انا استغرب حقيقة ان به اعيال ياخذون بلاك بيري!

في احدى جهات العمل...و في اكثر من اداره...
المسؤولين تلاحق بعض الموظفين بالبلاك بيري
و هم رافضينه...يعني عارفين شرباكته و اهلاكه للوقت
فما بغوه!

اسف يمكن هاي تدخل في شي خاص..بس القصد ان احنا مو بس
ننتبه على كم بيزات نعطيهم...ايش اللي نوفره لهم
و بايش بينفعهم او بيضرهم هاي هم بيأثر على
كثير من حياتهم و و حجم مصروفهم!

عالعموم...انا اشوف لعيال في الابتدائي غالبا
صعب تسيير امورهم بالمصروف الشهري...
مصروف يومي مثل مصروف المدرسه( و اذا به حاجه
لزود...ينزاد في يومها)...
و لو بتساويينهم باللي اكبر منهم...بتكون بطره..
بزر بو 6 سنين تعطينه كم(ن) امية ريال عشان
ايصير مثل اخوه اللي بالاعدادي و لا الثانوي؟؟.

و اخيرا....المصروف ع البنت و الولد..
متساوي و لا به فرق؟؟؟

همممممم ..خلني :secret::secret: احسن!

[eXpert*]

فكرة المصروف ممتازة ،، خصوصاً في الدول العربية نفتقر لمادة تسمى الادخار والاستثمار ،،

فالدول الغربية يتم تدريس الطالب على ان افضل وسيلة للاستثمار هي الادخار وكيفية تقليل المصاريف الشهرية بل و أحيانا اليومية.

من رأيي خصص لكل طفل مصرف سواء يومي / شهري ولكن لا تسلميه للطفل كاملاً انما يكون معك ، ويتم اعطاء الطفل على حسب الحاجة .

اجلسي معه بين فتره واخرى واشرحلي له مال له وما عليه و كم بقى له من مصروف لهذا الشهر وكم صرف منها . ليعلم مقدار المال المتاح له لبقية الشهر ،، و شهراً بعد شهر ستجدينه يتحسن من نفسه و يقلل من مصاريفه شيئاً فشيئاً كي يستطيع ان يوازن بين مصروفه و الـ 30 يوم في الشهر .

اطفال هذا الجيل نبهاء ولكن يحتاجون من يأخذ بيدهم ،، لاتعاملون الطفل على انه طفل بل على انه فرد واعٍ يمكن الاعتماد عليه وتحمل المسؤولية ،، وبأذن الله ستجنون حصاد زرعكم في المستقبل .

[العين مليانة]

متابع

ويعطيكم العافية

[هدوء الصباح]

مساء الخير هتون..ورمضان مبارك عليج..
(لا تسأليني وينج عشان ما ينحذف الرد:rolleyes2:)

موضوع تربوي رائع وقلةمن يفكر بهذه الطريقة ,فالاسراف هو عنوان الجيل الجديد وعدم معرفة قيمة المال..
طبعا انا مع المصروف الشهري ..ونظام المكافأة جيد..والادخار ايضا قيمة مهمة لنربي اطفالنا عليها..

[براتزية برازيلية]

عيالي لحين صغار بس من سن العاشر لحد ال18 او لحد مايتوظفون اكيد اعطيهم مصروف شهري و المبالغ تتفاوت و عشان ما خلي الصغير يحسد اخوه الكبير ما اخلي التفاوت كبير يعني الفرق 100 ريال فقط و كل سنة ازيدهم 100 ريال و هكذا
بس اذا عطيتهم المصروف الشهري مايشوفون مني اي حاجة ثانية غير الاكل و الشرب (وجبات رئيسية فقط) و تكاليف المدرسة و السكن طبعا ههه
العاب - مستلزمات الدراسة - ملابس جديدة - حلويات - اي شي ثاني خاطرهم فيه كله من مصروفهم و بحط الفلوس بإيدهم و كيفهم يصرفون منه على اي شي يبونه
بتقولون اني قاسية? هذي الطريقة الوحيدة اللي بتخليهم يفهمون قيمة الفلوس و ان الفلوس مانجيبها من الشارع انما نكد و نتعب و نداوم و نشتغل بغض النظر عن الحالة المادية ميسورة او لا
بتقولون الياهل مابيفكر يشتري لروحه ثياب جديدة او مابيهتم يشتري مستلزمات الدراسه من مصروفه حتى يدخر الفلوس للالعاب او اي شي ثاني? هالشي بيصير اول شهر بس بعده بيحس انه بيحتاج يوفر حق اغراض مهمة مثل الكتب و ادوات الدراسة شنطة دفاتر اقلام و اكيد بربيهم من هم صغار ان الدراسة لازم تكون الأولى على اللسته لأن الدراسة بتحدد مستقبلهم المهمل بيشقى بعدها في البحث عن العمل الذي سيجلب له المال ليأكل و يشرب و يلبس و يعيش و المجتهد الحاصل على افضل الدرجات في دراسته بيكون ناجح و مرتاح بحياته في المستقبل

[ضوى]

هلا وغلا اختي هتان وبارك الله فيج وبعيالج اللهم امييييييييييين وعسى ربي يبلغج فيهم اميييييييين

المصروف شئ اساسي لازم يتعود عليه الطفل ولازم يكون محسوب بشكل دقيق جدا ، راح اذكر تجربتي الشخصية بهالشئ عسى ان شاء الله تكون الاستفادة عامة

عيالي ربيتهم على شئ واحد مب كل شئ بيد غيرهم يبونه ، ولا كل شئ يتمنونه يبونه ، كل شئ حسب المقدرة والحاجة ، ماعندي والله يمه نبي نشتري هالشئ والا هالشئ والا بنغير الجوال والا السوني ، الشئ اشتريه بمزاجي وبناء على معطيات سلوكية منهم ، مانكر احيانا ابوهم يتجاوز هالشئ كنوع من كسر القيود وماخالفه بهالشئ بس مو باشياء كبيرة يعني اشياء عادية جدا

ولدي المراهق بو 16 سنة له مصروف شهري 1000 ريال ، مصروف شخصي غير الكسوة الاعتيادية ، يعني يبي يشتري عشا ، يبي يروح مطعم يبي يروح سينما مع ربعه يبي يشتري كماليات هذا هو حر فيه وبشرط مايطلب اي ريال عقب هالمصروف
الصغير ماله اي طلبات تذكر الا اذا يبي جمعية او رصيد بوعشر فهذا اموره سهالات ومن فترة لفترة ياخذ له لعبة والا شريط سوني بس
البنوتة واه من البنوتة قاصة علي شوي وادري انا ضعيفة معاها في طلباتها ، مصروف ماعطيها بس لما تروح معاي السوق ماشاء الله عليها كله اكسسوارات وصابون بشرة وخلافه ، بس الشهادة لله مانروح السوق وايد لذلك اخليها تاخذ اللي تحب يوم نتسوق وغير هذا الجمعية لما تجي معاي تاخذ حلويات بسيطة مع شوية شوكولاته بس ، وغير هذا مالها اي طلبات فديتها

الخلاصة م كل شئ يبيه الولد ويصر عليه ياخذه لازم يكون فيه احساس يقيمة الشئ ومسؤولية تجاه الفلوس ، يعني من كم يوم ولدي المراهق يقول لي باشتري بلاك بيري بفلوسي طبعا قلت له اعمالك الوايد اللي ماتخلص الا بالبلاك بيري خلصها بالبيت مب لازم تشغل نفسك بها طبعا اتنهزر عليه وقلت له مش بوزك من هالسالفة وان شفته في البيت كسرته فوق راسك وعن الخرابيط اللي مالها داعي
ونفس هالمراهق جاني وقال لي ابي اطلع خط فودافون قلت له ليش ان شاء الله قال لي رفيجي عنده قلت له ويعني ؟؟ سكت وقلت له انسى الموضوع ونساه

حالياً ولدي الصغير يحن يبي تلفون جديد قلت له ليش وانت اصلا التلفون مايكون عندك الا فترات بسيطة والحين المدارس بتفتح وبتنخش الجوالات ؟؟ قال لي متفق مع ولد جارتنا اشتريه منه قلت له لا والله تقرر بنفسك وتحدد بنفسك ، قال لي تلفون ابوي وايد قديم يفشل ، بيني وبينج هتان كسر خاطري وقلت له باعطيك تلفوني هذا ايش رايك فيه وهو قديم ترى مب جديد قال ايه والله ابيه ، قلت له خلاص ليلة العيد باعطيك اياه وللحين يحلم بهاليوم يشوف تلفوني ويكلمه ويقول كلها ايام وتكون لي :rolleyes2:

المفيد فكرة المصروف ممتازة جدا بس اذا ارتبطت بفلان عنده وانا ماعندي فهذا الشئ غلط ولازم يكون فيه تصرف وردة فعل اخرى تجاه المصروف

تحياتي لج هتان وعسى ربي يوفق عيالنا ويهديهم لطريق الصواب وسائر ابناء امة محمد عليه افضل الصلاة والسلام

[عابر سبيل]

عيالي ربيتهم على شئ واحد مب كل شئ بيد غيرهم يبونه ، ولا كل شئ يتمنونه يبونه ، كل شئ حسب المقدرة والحاجة ، ماعندي والله يمه نبي نشتري هالشئ والا هالشئ والا بنغير الجوال والا السوني ، الشئ اشتريه بمزاجي وبناء على معطيات سلوكية منهم ،


الخلاصة م كل شئ يبيه الولد ويصر عليه ياخذه لازم يكون فيه احساس يقيمة الشئ ومسؤولية تجاه الفلوس ، يعني من كم يوم ولدي المراهق يقول لي باشتري بلاك بيري بفلوسي طبعا قلت له اعمالك الوايد اللي ماتخلص الا بالبلاك بيري خلصها بالبيت مب لازم تشغل نفسك بها طبعا اتنهزر عليه وقلت له مش بوزك من هالسالفة وان شفته في البيت كسرته فوق راسك وعن الخرابيط اللي مالها داعي ونفس هالمراهق جاني وقال لي ابي اطلع خط فودافون قلت له ليش ان شاء الله قال لي رفيجي عنده قلت له ويعني ؟؟ سكت وقلت له انسى الموضوع ونساه





قواعد ذهبية عسى الله ايبارك في انامل كاتبتها
....و اسال الله انج تشوفين اخت/ضوى
تعبج ...بياض وجه في اعيالج و اعيالهم بعد:nice:.

قد يرى اختي ضوى... البعض ( و ما اكثر من اعرفهم)
ان هذا تشدد او تقتير او حجر على لعيال...

انقول لهم...عشنا و شفنا..
شفنا اخرة الدلال و عدم المحاسبة و توفير
كل ما لا يخطر على بال للعيال..عشان ما يحسون
ان حد احسن منهم:omg:..

طلعوا لنا "ذكور" ما يقدرون ايدبرون
شؤون اعمارهم...و لين الحين (بعد ما زوّجوهم)
قاعدين في بيوت ابهاتهم
لانهم ما يعرفون يفتحون لهم بيت!

مثال كان بعض الشيبان ايرددونه..
اللي ما يعرف ايدبر "ماchلة" البيت
و ايروح ايشل له يونية العيش و الاودام
من شبرة السمج و لا الذباح من سوق الغنم..
لا تتكل عليه(هاي كلام الشيبان!)

بيفقد كثييير من الملكات و حسن التعامل و تدبير الشؤون..
اللي لا بد له منها...بسيطة بس اساسية!.

موب القصد انه على طول يروح هو يجيب هالاغراض...
القصد انها تجارب لابد من تعلمها لاي واحد
يراد له ان يكون رجال و قد المسؤولية في قادم الايام!.

[الفهد1]

الحمدالله على النعمة ولدي خمسة من الابناء اثنان بالثانوية العامة واثنان بالمرحلة الاعدادية واحد بالابتدائي الصراحة عملت عدة تجارب عن كيفية المصروف وكلها باتت بالفشل الا طريقة واحدة وبعد عناء استطعت ان اتكيف معاها وهم راظين بكل الرضاء عن كيفية منحهم المصروف اليومي

[هتـان قطر]

طبعاً المصرف الشهري هو اللي بعلمهم قيمة المال وكيف التصرف فيه ولازم تكون هناك توجيهات من الاب والام ويفهمونهم ان هذا المصروف في يوم واحد انت تتحمل باقي الشهر ..

يعني انت تؤيد المصروف الشهري..

كل الشكر لك اخوي ask2


والله ياخوي انا من صف اول اعدادي والمصروف في يدي والحمدلله
وهالحركه تعلم الواحد اشلون يمسك ويحافظ على مصروفه مب في يوم وليله يظيع تعب شهر

_بوشهاب_

بوشهاب جزاك الله خير لابداء رأيك وتأييدك للفكرة

كونك من اللي خايضين التجربة من قبل..

[حراير قطر]

متابعة فقط

عيالي صغار

تعتقدين اختي هتان

السن المناسب لهم في المصروف الشهري .. وكم يكون المصروف ؟...

[شاهيناز]

موضوع قيم اختي هتان مثل ماتعودنا على مواضيعك

متابعه ماعندي تجارب في الموضوع
بس انا ضعيفه جدام اليهال اختي تمشي نظام مع عيالها
بس لين شفتهم خربت النظام كله

والله يخلي لك عيالك يارب

[هتـان قطر]

:nice: ماقصرتم والله ..

والوالد كان معودين على هالشي من ايام الاعدادية المصروف الشهري
لين الحمدلله كبرنا وصرنا شلون نوفر ونصرف
ودووم يمدحني الوالد قدام اخواني :shy: ..

ورد اخونا riku3 ممتاز جداً

والله يحفظ عيالج ويهديهم

:)

ماشالله عليك شي طيب انك توفر من مصروفك

عسى التجربة تنفع مع عيالي ان شالله من الشهر

الجاي راح نتبع معهم المصروف الشهري

جزاك الله خير بوالفاروق على الدعوة الطيبة

[هتـان قطر]

السلام عليكم
انا يوم كنت صغير ابوي كان يمشي لي راتب اسبوعي
بس يوم كبرت كل مافلوسي تخلص اخذ منه وهالشي خلاني ماقدر امسك الفلوس
اي متى احصل الفلوس ع طول تنصرف
بس احسن حل المصروف الاسبوعي
واذا ع العمر الكبير لازم ياخذ اكثر من الصغير
والله يخليهم لج

:secret: تقدر تقول ان التجربة فشلت معاك..؟؟

المصروف الاسبوعي بيعودهم على الصرف اكثر

ما ادري احس الشهري افضل

[هتـان قطر]

يجب عليك يا ولاي الامر دام ابنك في امرك ان تختار انت له ما يريد والمناسب لسنه
وعدم ترك الحبل على القارب
كل شي يكون بعنايه وتقدر انت شخصيآ ماذا يريد اولادك وتعودهم على عدم التبذير والاهم ان لا يقول لك فلان عنده وانا ما عندي هنا دور التربيه على الوالدين

الله يصلح ابنائنا وابنأكم


بالعكس اخوي زد بصدودك..لا خاب من استشار

انا هنا اطرح الموضوع واطلب من اصحاب التجارب يضعون تجربتهم

للتحليل ..لنرى هل التجربة مفيدة وناجحة ام لا..

شاكرة لك ردك وتجاوبك معنا

:)

[برشلوني قطر]

بس سؤال يطرح نفسه...

عطتهم مصروف شهري..والولد فالثانويه...وصرف المبلغ لاي سبب كان..من عشيات من طلعات من ومن..

هل بتخليه باقي الشهر من غير راتب ؟؟ << اعتقد صعب بتخلي يروح المدرسه بدون افلوس..

اعتقد التربيه وحسن التصرف..وفالنهايه اعتقد ان العيال يمشون ع البيئه الي عايشين فيهااا..

يعني اذا كان الاب والام مسرفين شي اكيد بيكون ماشي ع اسلوب معيشتهم

[مالي ومال الناس]

الحمدالله على النعمة ولدي خمسة من الابناء اثنان بالثانوية العامة واثنان بالمرحلة الاعدادية واحد بالابتدائي الصراحة عملت عدة تجارب عن كيفية المصروف وكلها باتت بالفشل الا طريقة واحدة وبعد عناء استطعت ان اتكيف معاها وهم راظين بكل الرضاء عن كيفية منحهم المصروف اليومي

الله يخليهم لك ويخليك لهم ان شاءلله

ممكن تفيدنا بتجربتك المفيدة ؟ :telephone:

[شبربوش]

اول شي احب اشكر صاحبة الموضوع الهام والهادف لعيالنا الغالين والله يحفظهم لنا يارب

انه اايد المصروف الشهري بس ابـ شرط متابعتهم ومناقشتهم والمصروف يترتب عليه اشياء مثل

اتشوفين ردت الفعل هل عاجبه الوضع ام لا بين الشهر والاخر
اتشوفين هل مصروف في وين راح بالمناقشه الوديه
اتشوفين هل وفر شي حق نفسه وتشجيعه بان التوفير سيشتري بها هديت نجاحه او يقدر يوفر حق سفرت الصيف اذا خاطره اب شي ( مع العلم انكم ما راح اتقصرون معاهم في هديت النجاح و سفرت الصيف ) ابسطها انج اتشاركينه في افلوس هديته كمثال هو يدفع نص القيمه او ربعها وانتي عليج الباقي كتشجيع

في اول الشهور بتتعبين وياهم لانه اول مره يمسكون مصروف شهر تقريبا بينصرف بداية الشهر بس كثر الامكان من متابعتج معاهم انهم ما يصرفونه الين اخر يوم

هذه من واقع تجربه والحمد لله نجحت

[صوت الضمير]

الصراحه بقولك من واقع تجربه

يوم كنت باعدادي كنت ابي اشياء واجد .. وكله اقول لامي عطيني

بعدها امي سوت معنا انا وخواتي معاهده كانت تعطينا اذا قربت المدرسه 500 ريال

وتقول كيفك اشتري فيها كل اغراض المدرسه .. فصرت احاسب على الريال واشتري

شي قد فلوسي .. بحيث يبقى منها بعد

فانتي عطيهم حرية الاختيار وعطي كل واحد مبلغ معين قولي اشتر اغراضك وانتي معاه

ولو صرفتها بشي ثاني ماراح اعطيك...

نقطة مصروف الاكل المدرسه على حسب انتي كم تعطينهم باليوم

اجمعي المبلغ وعطيهم شهريا وقولي هذا مصروفك حق شهر .. ولو خلصتها مالي شغل فيك

هو راح يجمع ويوفر فلوس...

صدقوني امي كانت تعاملني انا وخواتي كذا

اللحين والحمدلله انا طالبه بالجامعه .. واخذ راتب من الجامعه

وحاول اوفر واشتري اي شي ابيه... وفيها كل شي بدون مااطلب من اهلي

هذا الشي علمني ... القناعه وانا موب كل شي ابيه بحصله..


من الشهر الجاي عامليهم كأنهم كبار وعطيهم مصروف معين ..
وهالمصرف حق كل شي .. كرت تعبئه + اذا يبي يطلع يروح ملاهي+ اذا يبي يشتري من مطعم

واذا خلصها قبل مايخلص الشهر .. قالوا انا عطيتك مصروفك .. ولاتعطينه غيرها

بيتعاقب مره لكن بعدها بيحس .. وبيحاول يقتصد...

تدرين على ايام الثانوي كان تو العالم منتشر عندهم الاب توب

وخاطري افيه اشوفه في الجريده كل يوم .. قالت لي امي انا واختي اذا نجحتوا من الثانويه وبنسبه

بتكون هدية نجاحكم لاب توب.. نجحت بنسبه انا وااختي ودخلنا الجامعه.. وعطتنا الهديه :)

تدرون اللحين على المصروف اللي اخذه من الجامعه 1500 وهذا فيه كل شي
:) ملابس للجامعه + كروت تعبئه+ اذا ابي اطلع سينما والا اتمشى+ اذا بشتري من مطعم
الجوال انا شريته بمصروفي.. وشريته مستعمل.. واللحين يوم نجحت الكورس اللي طاف كأفت نفسي وشريت من مصروفي جوال جديد

فوق هذا كله اوفر منه .. :) واي حد يبي سلف يحصل عندي

انصحكم تعاملوا مع اولادكم بهالطريقه .. وحتى لو زعلو وتضايقوا لاتستسلمون اصروا على الموقف

بالختام فديت امي الله يحفظها ويخليها لي

هذه الطريقة تنفع للبنت والولد

والسموحه على الاطاله

العنود

[هتـان قطر]

اقصد

في حالة عدم الجدوى من اعطائه مصروفه وحسن تدبيره

خلاص استعملي معاه اسلوب ثاني

اللي هو الضرب على علباه..؟؟؟؟

:nice:


لا انا ماحب المصروف الشهري،،، عيالنامن حقهم انهم يستانسون وياخذون اللي بخاطرهم بس بعقل ، ممكن الواحد يحدد لهم مبلغ مايتعدونه بس يكون عند الاب بس لازم يكون بيدهم خرده حق التيك اواي والطلعات ويا ربعهم :)

ممكن اعرف كم عمرك؟؟؟

:omen2:

[هتـان قطر]

هتان الأخوان كلهم عيالهم صغار باين بس انا وانتي ديناصورات المنتدى:unsure:

عيالنا لهم مصروف شهري ولكن اشوف ابوهم يدفع فواتير الجوالات والدوبي ومخالفة

السيارات وكل شيء تقريبا !!

لو انا اللي ماسكة الميزانية يمكن احكر لهم بس زوجي يعاتب الواحد على اسرافه وهو يمد

له بطاقة الصراف . انا مع المصروف الشهري ولكن بحزم هذا مصروفك دبر نفسك به .


تعرفين اول كانوا يزوجونا اهلنا مبكر يعني انا وهتان في اول اعدادي ..تدرين خليها

خامس ابتدائي اذرب :shy:


هلا والله بالديناصورة دلة :nice:

مبين عليتس حارة وصلبة مع العيال وتقدرين تعسفينهم:anger1:

دلة اذا العيال بيدفعون فواتيرهم والدوبي وطلعاتهم ودخلاتهم

وش بيبقى من المصروف..؟؟ ترى مصروفهم مهب راتب وزير!!

انا معك ..معليه يحكر لهم شوي مع المخالفات ويخليهم يرنون شوي

لانه في الاخير اكيد هو اللي بيدفعها بس علشان يحسون انهم

اغلطوا ولابد يتحملون خطاهم..

دلة تعبونا العيال وكبرونا واحنا بعدنا صغار..وش الدبرة :omen2:

[قطريه فديتني]

الموووضوووع عجييييييييييب وانا استفدت منه وايد

وان شاء الله اطبقه على عيالي في المستقبل الحين ماعندي غير ولد واحد صغنون وراتبي كلللللللله اصرفه عليه كله دلع وخرابيط يمكن لانه بكري وماقدر اقاوم محلات اليهال اذا مريت جدامها

بس في المستقبل ان شاء الله بغير هالشي اذا صار عندي اكثر من ولد

مشكوره اختي على الموضوع

[قناص الخليج]

اعتقد المصروف الشهري افضل فكره لتدريب الابناء على ترتيب مصاريفهم

[الجني]

اشكر صاحبة الموضوع على فكرة طرح هذا الموضوع الهادف جداً

و انا اضعه في خانة مهمه تدخل في نمط حياتنا و لا ادري كيف اعقب

و اتمنى ان يكون لي تعليق مطول في فرصة اخرى

اتفق كثيراً مع الأخت ضوى في طرحها و اود ان اضيف

عندما يطلب مني ابني فلوس

الولد: يبه ابي فلوس
الجني: كم تبي . في البدايه كنت دائما اسئله "كم تبي؟"
الولد: ما دري !!!
الجني: طيب خذ هذا ريال

الى ان عرف كم يبغي من مبلغ

بعدين اتحاور معاه في الأولويات "يا يبه هذا وايد غالي"

في الألعاب مستحيل اشتري لعبه جماعية لكل ولدلعبه ,
بل لعبه واحده يتشارك فيها الجميع خلوهم يتهاوشون
و يتشاركون و لا تخلونهم يستغنون عن بعض

جربت المصروف الاسبوعي فوجدتهم لا يأكلون في المدرسة
و يوفرون المصروف لشراء امور قد تكون تافهه على حساب الأكل
في المدرسة

عندما يطلب الولد او البنت شراء شي اماّ أن يكون :

شيء استهلاكي او
شيء يتعلم منه مهاره (فلا بتخلي عليه في تعلم المهارات)

مره طلب ولدي يروح مكتبة جرير و سألني
بكم اشتري يبه؟
قلت له الشيك مفتوح اشتري كل اللي تبيه
و كنت معاه اوجهه يشتري الغرض الأمثل/الأرخص

و بعد ان خرجنا من جرير طلب يشتري شيء بسيط
و رخيص فرفضت

فسألني ليش في جرير دفعت 1,000 ريال
و ما تبي تعطيني الحين 5 ريالات؟

فقلت له "اي شيء تتعلم منه الحساب مفتوح"

المشكله تكمن مع عيال العمومه "ليش هم عندهم و انا
ما عندي" فأحاول اعطائهم اشياء ليست عند الغير

الحديث يطول و يعمق

الله يهدي عيالنا و عيال المسلمين

[هتـان قطر]

جدا عجبني الموضوع تسلمين للفكره اختي هتان
انا افضل اكون متابعه لان عيالي توهم بالابتدائيه والروضه وماعرف افيدكم بشي
ضحكتني دلة الرسلان اضحك الله سنها



مادام عياتس صغار ..تابعي نقاشاتنا للاخر

وان شالله تطلعين بفايدة

حياتس الله اعالي الجنان

[دلة الرسلان]

مساء الخير هتان حبيت اذكرك بنقطة الحين فيه ابناء وبنات يدرسون في الجامعة ولهم بعثة

دراسية فتمشي لهم رواتب اكثر من حاجتهم بكثير وذيلا مشكلتهم اكبر لأنهم يشوفون أن هذا

حلالهم وفي نفس الوقت تخاف عليهم من التبذير والخرابيط اللي بتنتج عنه هنا فعلا ايش يسوي

ولي الأمر .

[هتـان قطر]

مساء الخير هتان حبيت اذكرك بنقطة الحين فيه ابناء وبنات يدرسون في الجامعة ولهم بعثة

دراسية فتمشي لهم رواتب اكثر من حاجتهم بكثير وذيلا مشكلتهم اكبر لأنهم يشوفون أن هذا

حلالهم وفي نفس الوقت تخاف عليهم من التبذير والخرابيط اللي بتنتج عنه هنا فعلا ايش يسوي

ولي الأمر .

صدقتي دله..حتى اللي بعثاتهم في الخارج وهم عادهم صغار

يلعبون لعبتهم ..مشتريات مالها اي داعي ومحد يقدر يقولهم شي

بدعوى انهم احرار في مالهم..لانهم من هم صغار ما تعودوا

كيفية انفاق المال صح..

دلة الامر اكبر مما نتصور..انا لما اشوف برنامج خطوات في اليابان

اتحسر على حياتنا ونظامنا وتخبطنا..هم يبدون من الصغر ويهتمون

بالنشئ والمدرسة دورها اكبر من دور الاهل..

يعودونهم على كل شي عملي وليس تلقين فقط

تلاقين طفل ما يتعدى عمره سبع سنوات..هو اللي يدفع ثمن مشترياته

وعارف بكم بيشتري وكم بيبقى عنده..

حنا يبيلنا وقت طويل جدا لين نعيد تأهيل انفسنا قبل تأهيل عيالنا

[همس1]

جزاكم الله خير على هالموضوع

بالنسبة لي موضوع المصروف الشهري وايد مهم .. أنا ولدي عمره سنتين تو الناس عليه

على سالفة المصروف..

بس أبوي وأمي الله يحفظهم كانوا يمشون لي ولأخوي وخواتي مصروف وكل واحد على حسب

عمره ومستواه الدراسي ، وما زعلنا على ان المصروف مو متساوي لان كانوا يفهمونا ليش

المصروف مو متساوي.. موضوع المصروف علمنا شلون نقسم المصروف بحيث يكفينا للشهر

وكلنا صرنا قد المسؤولية وكبرنا واشتغلنا وكان موضوع المصروف سبب في احساسنا

بالمسؤولية.. تعلمنا التوفير وتعلمنا شلون نصرف المعاش بحكمة مو بإسراف ..

وترا الأجانب يستخدمون طريقة (المصروف الشهري) مع عيالهم وإذا واحد من عيالهم قصر

في شي ولا غلط يعاقبونه بحرمانه من المصروف وهاي المفروض اللي احنا نسويه

لأن عيال هالزمن وايد متعلمين الدلع والأسراف وما يحسون بقيمة الفلس لان ما اتعبوا فيه

واذا تعلموا دايما يحصلون اللي يبونه والفلوس دايما في يدهم بالهبل صدقوني إذا ضاقت عليهم

الظروف ما بيعرفون يعيشون ولا بيعرفون يتصرفون ... وهالكلام اقوله من تجربتي الخاصة

وتجربة ناس حولي..

وخصوصا المراهقين لازم الواحد يعرف شلون يتعامل معاهم من ناحية المصروف لأن بطبعهم

يكونون مسرفين وكل شي يبونه ... اذا عيالكم بغوا شي مو تروحون السوق وتاخذونه على

طول لازم تعلمون عيالكم شلون يستحقون هالشي .. مثلا إذا نجحوا في مادة ممكن كهدية

تقدمون لهم هالشي.. وإذا عندكم عيال لسانهم طويل وما يحترمون احد،

ما راح يتعلمون إلا اذا خليتوهم يذوقون الحرمان بعدها بيعرفون وبيحسون..

ولا تقولون احنا الله منعم علينا وما نبي نقصر على عيالنا.. وانا اقول لا تقصرون وكل الناس

يبون يدلعون عيالهم ، بس بعد لازم تحاسبون لان تعاملكم مع عيالكم اهو اللي بيحدد شخصية

عيالكم بالمستقبل .. ولا تنسون نتيجة الدلع الزايد والمشايخ الله يحفظهم دايم يقولون

قصص كانت سببها الدلع الزايد للأبناء والبنات..


والله يخلي لكم عيالكم ويجعلهم من الصالحين والصالحات..


ولكم اطيب تحية

[المتألم]

اليهال بهالوقت محتاجين من يلزمهم بطريقه ونظام عشان يتعلمون ويقدرون
اللي بين يداتهم

محد يعرف الدنيا اشلون تلف وتدور

ومحد حاله يظل نفسه
ربنا ينجي ناس ويختبر ناس ومحد يعرف وين ينحط مع اي فريق


واحنا شفنا صدام سبحان الله وين كان واشلون انقلب الحال عليه وعلى اهله

فكيف بالناس العاديين

ورأيي لازم الولد يتعلم قيمة الفلوس ووين يحطها بدال ما تنقلب عليه الدنيا وما يعرف يتصرف ساعتها

والدنيا من تنقلب على لفقير غنى مهب مشكله

بس من تنقلب العكس يصير الوضع مأساه

والله يكرم الجميع

[المجروح]

احسن طريقه الواحد يقول حق عياله ان بغيت تعال قولي واسئله ليش تبي الفلوس؟
اهني يحس بقيمة الفلوس
اما اذا تعطيه مصروف شهري اهني بيلعب بالفلوس وما تدري هالفلوس على شنو حطاها
يعني ان بغى مثلا 150 ريال قال ابي اشتري هالشي عطه 200 مو مشكله بس اهم شي يطلب

[تـاجر الـذهب]

المصروف الشهري حق

ولكن بعقل واتزان ومراقبة!!

هذا رايي

[عابر سبيل]

حنا يبيلنا وقت طويل جدا لين نعيد تأهيل انفسنا قبل تأهيل عيالنا


و انا معج 200% في هالكلمة..
و انا اشوف حالي مع اول و اخر اعيالي..
فرق...تعلمنا مع الايام..نعم..

بس الجهل..و احيانا "غرور" الواحد بنفسه

هو اللي ايخليه يعتقد ان حبه و تعلقه بعياله...كفاااية
و كل شي ايجي من ورى هالشي..
بيكون لهم الأخير و و الاصلح !

الاباء قد يكونون هم سبب الاشكال الحقيقي..
قبل لا نلوم الابناء..

(و حديث "كل مولود يولد على الفطره" هو اكبر دليييل)

منا من يتشدد من خوف لا مبرر له..
و منا من يرخي الحبل لين ما يضيع المركب بمن فيه من لعيال..

و منا من هو بين و بين..مثل مؤشر الـ"بورصه"..
حزات فوق و حزات لمت داون:anger1:

مراجعة الاباء لانفسهم و تعلم "الابوة" و اسس التربية
هي المعضلة التي لو "اصطلحت"
باذن الله تنصلح كثيير من امور تربية وتنشأة لعيال!

بارك الله بج يالهتان..حقيقة الموضوع كل ماله
يحلو و يزهى و نتعلم منه و تغزر علوووومه...
باثراءاتج و المشاركات الرااائعة و القيمة من الكل
ممن سبق و باذن الله من سيأتي تبعا..

و بهالمناسبة احب اشير لمن هو مهتم
لكتاب من اكثر الكتب القيمة
في مجال التربية..بعنوان " تربية الاولاد في الاسلام"

و مؤلفه هو /عبدالله ناصح علوان

تكلم به كثييير من التربويين و اثنوا عليه بشكل كبييير...
حتى مجلة (ولدي) الكويتيه كانوا يشيرون له كاحد
مراجعهم!.

و هو حيوي جدا جدا..خاصة لمن هم توهم في البداية
و ابنائهم اصغار..(و للكبار ايضا:))

و هنا روابط للكتاب...الاول لتنزيله PDF
و الثاني للاستماع

http://abdullahelwan.net/book.php

http://abdullahelwan.net/sound/1.php

http://www.iqrashop.com/images/liv-020810-024-1.JPG




اتوقع انه متوافر في كثير من المكتبات بالدوحه..
حقيقة انا شاريه من زمااان من مكتبة ابن القيم!

اتمنى ان ينفعكم الله به و يصلحنا و اياكم و ابنائنا جميعا!.

[أخت الغالي]

عن نفسي يوم كنت ايام الثانوية تقريبا من ثاني ثانوي ابوي صار يعطيني مصروف 500 فالشهر

واحيان لاء اذا بغينا نروح نقولة نبي فلوس ويقول كم تقريبا وفي شنو بتصرفونها

وكان المصروف ناخذة من تقريبا البنات ثاني ثنوي الصبيان ماعرف ^_^"

اما الاصغر ابوي وامي يودونهم معاهم ويشوفون اللي بخاطرهم ...

كنا والله نحاسب ونشوف الشي المهم وقنوعين الانشوف المبلغ واجد اما اللحين صدق الوقت تغير اقول
ال500 شتسوي ماتكفي !!؟
ياليت الوقت يرجع واخذ مصروف مثل قبل 500 او1000 عالاقل )=

ولجاني مبلغ كبير من الوالد واخواني اصرفة واقول ماعرف وين راح ؟؟!!

فكرة المصروف الشهري حلوة تعودهم على عدم الاسراف والتبذير ويفكرون عدل في وبشو يصرفونها بس لازم المتابعة وتعرفين في شنو يصرفونها ..


الله يطرح البركة فعيالج ويخليهم لج

[QATAR 11]

ما مفهوم الطفل الاستهلاكي؟

ما الذي يجعل الطفل استهلاكيا؟

كيف أرفع من وعي طفلي الاستهلاكي؟

هل يؤثر المصروف في توازن السلوك الاستهلاكي عند الطفل؟

البيت هو مدرسة الطفل الأولى الأهل الكلام والأخلاق والتعامل مع من حوله إلا أن هناك ناحية مهمة غالباً ما يهملها الآباء لسبب بسيط، وهو أنها لم تشكل أي مشكلة لأطفالهم قبل خروجهم من البيت ألا وهي المال.



الاستهلاك المرضي هو "إنفاق المال على سلع كمالية، وفي مناسبات غير ضرورية بقصد التباهي وحب الظهور وتعويض نقص اجتماعي معين، ويعد مرضاً اقتصادياً واجتماعياً لمخاطره وآثاره"ولا يتوقف ذلك على استهلاك المال فقط وإنما يمتد ليشمل نواحي أخرى من الحياة البشرية مثل الماء والطعام والكهرباء والوقت...إلخ)

وهناك عوامل عدة تساعد على أن يصبح الطفل استهلاكياً أهمها:

1. التقليد والمحاكاة، وتأثيره بالقدوة، وبخاصة سلوك الوالدين الاستهلاكي.

2. مستوى الدخل النقدي←هناك علاقة طردية بين زيادة دخل الأسرة وزيادة الاستهلاك.
3. وسائل الإعلام والدعاية←الإعلانات التجارية.
4. تعليم الأم للطفل، ومناقشتها إياه أثناء اتخاذ القرارات الاستهلاكية.
5. عامل الدين←ضعف الوازع الديني؛ فالمؤمن يتذكر دائماً أنه سيسأل عن ماله فيما أنفقه.
6. البيئة الاجتماعية←الأهل والأقران.
7. العوامل النفسية←الغيرة، الشعور بالنقص، وفقدان الحنان.
إن كل ما يعرفه الطفل في هذه السن المبكرة هو أنه يريد أن يمتلك أشياء جديدة دون أن يعي الفرق بين ما يحتاج إليه وبين ما يرغب في اقتناءه.


مهارات الاستهلاك:




فن حسن التدبير التعامل مع المال ضرورة لكل إنسان كي يكون ناجحاً في حياته الدنيوية والأخروية، فكم من إنسان أساء استخدام ما وهبه الله من نعمة المال، فكان ذلك ضياعاً له في الدنيا، وخسراناً في الآخرة، فمهارة التعامل مع المال، هي تراكمية وتحتاج لتدريب مبكر لاكتسابها ومن هنا كان على الوالدين دور مهم في تدريب الأطفال منذ نعومة أظفارهم على تلك المهارة وذلك من خلال:



الشريعة والمال:


- ولا تجعل يدك مغلولة إلى عنقك ولا تبسطها كل البسط فتقعد ملوماً محسوراً. الإسراء آية 29

- حتى ولو كان الوالدان من الأغنياء يفضل إظهار هذا الغنى للطفل أثناء التسوق.

- تدريب الطفل على ضبط شهوة حب الشراء والإسراف من خلال تعريفه بالقاعدة العمرية التي ذكرها عمر بن الخطاب رضي الله عنه قال: ( أو كلما اشتهيت اشتريت)

- بالإضافة إلى سرد بعض سير الصحابة والتابعين في ترتيب أولويات الإنفاق (سيرة قارون) وسيرة الخليفة أبو بكر الصديق).

- تدريب الطفل على التصدق أن المال أمانة ومسؤولية في أيدينا (إن المبذرين كانوا إخوان الشياطين).



عند اتخاذ القرار بالشراء:

- تدريب الطفل على مقارنة الأسعار مع المطلوب شراؤه وغيره من المنتجات مع مقارنة الجودة عند اتخاذ القرار بالشراء.
- مناقشة الطفل بالمبلغ الذي سيدفع، وهل هو مناسب مع حاجته وميزانيته الشهرية...
- مناقشة الطفل عن الوقت الذي ستعمر فيه الحاجة أو اللعبة التي يريد شراءها، وكم نسبة الاستفادة منها، وهل هي لسعادة لحظية أم مستمرة لوقت أطول؟



مصروف الجيب:

هو مبلغ بسيط من المال يعطى للطفل بالاتفاق معه على أن يكون يومياً أو أسبوعياً أو شهرياً حسب عمره، لشراء احتياجات بسيطة تشبع رغبته.
ومصروف الجيب ليس مكافأة للطفل على سلوكه الصحيح، والحرمان منه ليس عقوبة تقع عليه إذا أساء؛ فهو درس في السلوك له أهدافه المحددة، وينبغي تدريب الطفل على حسن استخدام النقود، وتحمل مسؤوليات التصرف فيها.
الهدف في إعطاء المصروف هو: أن يتعلم الطفل كيف يصنع قراراته، وأن يتحمل نتيجتها.



إيجابياتها:

- يتعلم تجربة الإنفاق.

- يعزز ثقته بنفسه.
- يتمكن من تلبية طلباته الصغيرة بنفسه عند حاجته إليها.
- يتعلم الاعتماد على نفسه.
- يعلمه كيف يضع لنفسه هدفاً صغيراً يتعلم من أجله التوفير من مصروفه الخاص.
- يعلمه مبادئ الحساب.
- يتعلم مبادئ الملكية الخاصة والعامة.


سلبياته:

- قد لا يؤدي الغرض المطلوب منه عندما لا يكون متناسباً مع المرحلة العمرية.


- قد يكون أداة لتعليمه التبذير والإسراف إذا زاد على حاجته.

- عدم وعي الأهل غرض من المصروف (إعطاء الطفل مصروفاً كلما طلب).


فلاش:

من الصعب على الأطفال في مرحلة ما قبل المدرسة فهم معنى الادخار الحقيقي من الممكن توضيح ذلك بقص صور للغرض الذي يدخر طفلك المال من أجل شرائه ووضعها في مكان واضح له.


المصروف الأسبوعي:

ما السن المناسبة لإعطاء طفلك مصروفه؟ وما مقداره؟
الأطفال ما قبل المدرسة:


- المصروف 20 ريالاً ينفق 10 ريالات ويدخر 10 ريالات.

- تجمع المدخرات مدة ثلاثة أشهر وبعدها يستطيع شراء ما يرغب فيه.




أطفال الصف الأول والثاني الابتدائي:

- المصروف 30 ريالاً ينفق منها 25 ريالاً ويدخر الباقي.
- تجمع المدخرات مدة 6 أشهر وبعدها يستطيع شراء ما يلزمه.


الصف الثالث والرابع:

- المصروف 40 ريالاً ينفق منها 30 ريالاً ويدخر 10 ريالات .
- تجمع المدخرات لمدة 7 أشهر وبعدها يستطيع شراء ما يرغب فيه.


أطفال من الصف الخامس والسادس:

- المصروف 50 ريالاً ينفق منها 40 ريالاً ويدخر 10 ريالات.
- تجمع المدخرات لمدة 6 أشهر وبعدها يستطيع شراء ما يرغب فيه.

,,,,,,,,,,,,,,,,,,,,,,,,,,,,,,,,,,,,,,,,
2
فلاش:



قد يقال أنه ليس من العدل ترك الطفل يتحمل مسؤولية أخطائه ولكن مواجهة هذه التجارب في الصبا قد تكون سبباً في نجاح حياته العملية في المستقبل.


,,,,,,,,,,,,,,,,,,,,,,

فلاش



تعويض الأهل على الطفل ما أضاعه لا يعلمه تحمل المسؤولية وقيمة المال.


,,,,,,,,,,,,,,,,,,,,

فلاش:



تدريب الطفل على استخدام محفظة للنقود ووضعها في مكان آخر للحفاظ عليها.


بوكس:

المكافآت المالية:



مبلغ من المال يقدم للطفل مقابل عمل محدد إضافي يكلفه به الوالدان، والهدف منها تعليم الطفل أن المال يكتسب بالعمل والجهد( لا تعد الأعمال المنزلية ضمن هذه الأعمال بل هي ضمن واجباته ويقوم بها بدافع المحبة لمساعدة الأسرة.
لا تقل لطفلك: ستحصل على مبلغ من المال لو ساعدتني على ترتيب الغرفة؛ فهكذا يتعلم أطفالنا أن يعملوا الخير ثم يمدوا أيديهم بعد ذلك ليحصلوا على الثمن. وهذا أمر مرفوض؛ لأننا نحولهم إلى مكتنزين وبخلاء إذا زرعنا في نفوسهم حب المال، وقد ندفعهم إلى أن يكونوا مسرفين إذا لم ندربهم على الإنفاق.


حساب البنك:


يعد الحساب البنكي طريقة مثلى لتعليم الطفل التعامل بالمصروف والمكافآت، كما يتعلم طريقة عمل البنك؛ فهي أكثر أمناً من حمل النقود في كل مكان، فهو يمكن أن يحصل عليه أينما ذهب من أي فرع للبنك، وهي البديل العصري للحصالة.
إن معظم البنوك لديها حسابات خاصة بالأطفال يمكنهم استخدامه بسهولة كما يتيح لهم الاستفادة من عروض التخفيضات في محال الألعاب الإلكترونية وغيرها.
يمكن اصطحاب الطفل للبنك مع أوراقه الرسمية مثل شهادة ميلاده، وتجعله يخوض تجربة فتح الحساب، فأول زيارةً له تكسبه خبرة جديدة ومن المهم توضيح كل الأمور التي ستعرض لها حتى لا يمر بمشكلات حينما يضطر إلى التوجه للبنك بمفرده في مرات قادمة.


أخيرا


- ولا ننسى قول الله تعالى:"كلوا واشربوا ولا تسرفوا.
- من المستحسن ألا تكرر الأم لازمة أنها تحلم بامتلاك شيء بعينه؛ لأن من شأن هذا الأمر أن يولد عند طفلها فكرة أن الأشياء المادية هي ما ستجعله سعيداً.
- النقود ليست كل شيء في الحياة؛ فهناك الكثير لا تستطيع النقود شراءه ولا يقدَّر بمال كالفضيلة والشرف والصدق وراحة البال.
- اليوم بيدنا وغداً سيكون بيد غيرنا، وأنه حتى لو كان المال قطعة معدنية صغيرة(خمسة قروش مثلاً)، فلابد من التقاطها من الأرض أمامهم.
إن تعويد الأبناء حسن التصرف والتدبير يحميهم من الاعتماد على الغير في المستقبل ويدربهم على اتخاذ القرارات، مصداقاً لقول أبي العلاء المعري
(وينشأ ناشئ الفتيان فينا على ما كان عوده أبوه)
فلا تتردد في منح طفلك مصروفه في مرحلة مبكرة من العمر؛ لأنك بذلك تؤهله إلى استقبال مشكلات الحياة وتعوده الاستقلال والاعتماد على الذات.

وبارك الله فيكم وفي اولادكم

[أخت الغالي]

qatar 11

الموضوع حلوو واعجبني الرد

[هتـان قطر]

افضل شيء يا اختي هتان
بان يتم اعطاء كل واحد فيهم مبلغ شهري ليتصرف به ويكون الصرف في حدود المبلغ الحاصل عليه ولا يتعود على التبذير
كانت المرحومه الله يرحمها عودتني بانه لي مبلغ شهري وانا طالب في المدرسه
كل شهر مبلغ ثابت وهذا الكلام كان في عام 98
وكانت دائما تنصحني بان اتصرف بعقلانيه وعدم تبذير الاموال في الاشياء التي لا تعود بالنفع
وكانت تقول باستمرار اعرف تتصرف في الفلوس الشهرية لانه لين اخلصت قبل الوقت تحمل نتائج الصرف اذا كان على امور ما تسوى


جزاك الله خير اخوي فهد لاثرائك الموضوع بوضع تجربتك

والله يرحم ميتكم واموات المسلمين اجمعين

في البداية شي طبيعي بتواجهنا صعوبات لان العيال مهب متعودين

على هالنظام ..لكن ان شالله نتحمل ونحصل على النتيجة المرجوة

تحياتي لك اخوي فهد

[هتـان قطر]

والله ياخت هتان اذا الكبار مبذرين شلون شباب في سن المراهقه الله يحفظهم

اذا تعود شخص على شي ما

فصعب انه يتأقلم على رتم جديد وخاصة اذا كان مثل الشباب اللي عندتس .. :)

بالاضافه اننا نعيش في زمن الغنى

يعني اذا قصرتي عليهم راح يسمونج شحيفان :)



اشحفاان القطو ..؟؟:eek5:

سهم ان شالله مابكون شحفان والا ابوهلال..:nice:

بس ودي يتعلمون كيف يتعاملون مع الفلوس

وفي وين ينفقونها وعلى ايش ..

عيالنا عاشوا الرفاهية بما فيه الكفاية..ولابد من وضع حد

لكل شي..بكرة لما يفتحون بيوت ويكونون اسرة..بيلوموننا حنا الاهل

لانا ما عودناهم على الاعتماد على انفسهم والتحكم في مصروفاتهم

وكيف يديرون اموالهم صح..

[هتـان قطر]

موضوعج روعه
وايضا دعينا من خلال موضوعج نجعله عام
لانه حقيقه بعض الكبار ايضا يتصرفون بالاموال كطريقة الانسان الذي لا يعلم ما الذي يفعله في المال ويرميه يمين ويسار
فافضل طريقه ايضا
لهذا النوع من الناس
1-يتم تجزئة المبلغ الشهري او المداخيل السنوية ويحدد كل شخص من خلال مدخوله الشهري اهداف يصل اليها الى صورة ايجابيه ان شاء الله
وبالنسبة للمدخول السنوي واقصد به عوائد لا تاتي سوى مره واحد في السنه مثل البورصة او الارباح البنكية
دعينا نذكر على سبيل المثال
600 الف مدخول سنوي
يتم تقسيمه على الشكل الاتي:
150 الف للسفر
250 الف يتم اعادة استثمارها و200 الف تبقى في البنك للحاجة
حقيقه موضوع يشجع
واهنيج عليه يا هتان قطر
تسلم يمينج
أخوج فهد


" الهدف " نقطة مهمة اخوي فهد ..يجب وضع هدف وخطط لحياتنا

والا استمر معنا التخبط الى نهاية حياتنا..

سمعت مرة الدكتور صلاح الراشد يقول ان لم يكن لك هدف في الحياة

فتأكد انك من ضمن اهداف الاخرين...

[جرير]

المصروف الشهري شي جميل

او ممكن يكون مصروف يومي او شبه يومي

واحيانا يختلف في الويكاند

ويعتمد على حسب الاعمار طبعا

ومصروف البنت يختلف عن مصروف الولد

[هتـان قطر]

انا اقول صعبه الحين تعودينهم على مبلغ معين يلتزمون فيه وخصوصا اذا كانوا صغار
لان الاطفال بطبيعتهم متطلبين ويبون كل شي
انا اقول جربي اسبوع اذا ضبطت ضبطت واذا لا شيلي الفكره من رأسج وانا استبعد ان يتقيدون
الحين في المولات على العاب وسينما ومطعم الصرف يكون مو اقل من الف الله المستعان


اختلف معك ام لولوه..هذا احنا طول الوقت نتعامل مهم بهات وخذ ..على طول اليوم

ومصروف اسبوعي يمكن يكون جيد كبداية للتعود على المصروف الشهري..

اما بالنسبة للالعاب والمولات..عيالي قليل ما يروحون لهالاماكن..

يحبون طلعات البر اكثر..يعني ان شالله اقدر اسيطر على الوضع :)

[هتـان قطر]

يعطيج العافيه اختي هتان على الموضوع القيم

صديقي استخدم هذه الطريقه مع جميع اعياله
ويقول النظام حلو ولكن للاسف بدؤا يبخلووون على انفسهم
ولهذى يحتاج بعض التعديل او تصحيح افكار الاطفال من ناحيه كيفيه الصرف ومتي يصرفوا




والله يجوز انهم يبخلون على انفسهم..وهنا بنطيح في مشكلة ما عملنا حسابها

طيب ممكن اخوي بوراشد تسأل صديقك ما هو التعديل اللي فرضه للتغلب

على هالمشكلة..

احنا نبيهم يطبقون هذه الاية الكريمة

" والذين اذا انفقوا لم يسرفوا ولم يقتروا وكان بين ذلك قواما "

[هتـان قطر]

يعطيج العافية أختي على الموضوع

وعن تجربه في المصروف الشهري وكنت اعطي العيال مبلغ حسب العمر ولاحظت

الولد اخر العنقود طلع نصاب لأنه ياخذ من والدته ويحط على فلوسه اذا انقصت ويبين انه ما يصرف الا في المفيد

وواحد منهم يصرفهم على طول وخاصة في الأمور الترفيهيه وبعضها مالها داعي

والبنات وحده كانت تمسك فلوسها والثانية صرفها حسب الحاجة والمفيد

والله يستر عليهم وعلى اعيالكم والله يوفقنا ويقدرنا على حسن تربيتهم

سبحااان الله ..هنا بتبين شخصية كل واحد منهم..:)

كل الشكر لك اخوي بوعلي على عرض تجربتك..

اللهم آمين زاك الله خير على الدعوة الطيبة

[هتـان قطر]

من تجربه شخصيه ومستمره

فتح حسابات توفير بالمصرف الأسلامي
تحويل مبلغ 500 شهريا لكل واحد
صرف بطاقة سحب آلي لكل واحد وحفظها مع الأم

الصرف من المبلغ يكون في الأمور التي لا تدخل ضمن نطاق مسئوليتهم
كوجبات المدارس والملابس والأحذيه والكتب والقرطاسيه الأساسيه كوني أتكفل بها وطبعا الجمعيه

طبعاً راح تتفاجئون أن منهم الذي سيصرف فلوسه أول بأول ومنهم من سيوفر ومنهم من سينافس الآخر يما عنده في البنك ومنهم من سيسلف الآخر ومنهم من سيشتري وجبه من المطعم بفلوسه في حالة ما عجبه أكل البيت

لكن اللي لاحظته أن الجميع يستخدم فلوسه عند السفر لشراء ما يرغب فيه من أكسسوارات أو أغراض غير ضروريه

طبعا مصروف المدرسة لا يدخل ضمن ميزانيتهم بل يتم التكفل به

أنا أعتبر هذا تمرين عملي طويل لتعليمهم التعامل مع المال

الأولاد والبنات إذا عرفوا يتعاملون مع الفلوس فلن يسبب لهم ذلك مشكله حين يبدؤون في العمل وستعطيهم خبرة متراكمه منذ الصغر في كيفية الأنفاق خاصه كم قلت أن البطاقات عند الأم

الفكره لا زالت تحت التجربه وأرى أنها مفيده لجعلهم يفكروا في تنظيم الميزانية الخاصه بهم

شكرا


جزاك الله كل خير على النصيحة..وفعلا اسم على مسمى

تجربتك رااائعة وان شالله نستفيد منها جميعا


كل الشكر اخوي ناصح لكم

[حياة]

بالنسبه لي عيالي ياخذون مصروف اسبوعي وفيه تعبئه الجوال والمطعم اذا يبون ونادر مايطلبون لان اغلب اللي يبونه موجود في البيت
وبالنسبه للبنات الكبيره في الجامعه وعندها مصروف شهري وخواتها صغار واذا يبون شي يروحون معاي وياخذون اللي يبون
ولله الحمد عيالي انا اشوف انهم احسن من غيرهم بكثير وانا اشوف عيال عمهم كل واحد بلاك بيري حتى بو 9 سنين ومصاريف يوميه بالهبل لو تفتحين بوكه تلاقين فئات 500 واذا فيه خرده من فئه الـ 100
وطلعات يوميه وسفرات لحالهم بدون الاهل وهم توهم 14 الى 17 سنه ويمكن اصغر بعد
بس انا مفهمه عيالي ان مش كل اللي عند غيرهم لازم يكون عندهم وبعد هم الله يحفظهم قنوعين ومالهم في الطلعات والمجمعات يعني يمكن كل اسبوعين يروحون يشوفون فيلم
وماشاء الله عليهم عارفين يصرفون مصروفهم وخاصه في رمضان
وفي البدايه ترى بيطيرون المصروف بس اذا انحرموا راح يتعودون يحافظون على مصروفهم وانا اشوف ان المصروف يعودهم على الاعتماد على انفسهم

[هتـان قطر]

اختنا الكريمة/هتان..
بارك الله بج و اعانج الله على امور التربية..

للاسف كثييير من الاباء مخلينها على عواهنها
و ما ينتبهون لسلوكهم اللي في الاخير هو ما يؤثر على ابنائهم.

المسألة شائكة و صعب ان يوجد لها معادلة..
اعتقد انها تعتمد على التجربة...يعني نجرب..ان صابت
و لا نغير من النهج!

هالمسألة اخت/هتان انا سمعتها في احدى حلقات
برنامج "بيوت مطمإنه"...
(لو تحبين هو على هالرابطhttp://www.qatarshares.com/vb/showthread.php?t=283803)

تصدقين ان الضيف قال ان به بيوت (في بلدهم) قدرتها
على الحد...و يعطون بنتهم ريال واحد يوميا و هي جامعيه!

القصد..ان كل بيت و بيئه لها احكامها...
و الاباء مسؤوليتهم ما تنتهي يالتوفير...
لا بد من تتبع التأثير...ان كان ايجابي و لا لا بد التغيير.

عن نفسي اختي هتان....اذا سمح لي المقام للاختلاف...
انا استغرب حقيقة ان به اعيال ياخذون بلاك بيري!

في احدى جهات العمل...و في اكثر من اداره...
المسؤولين تلاحق بعض الموظفين بالبلاك بيري
و هم رافضينه...يعني عارفين شرباكته و اهلاكه للوقت
فما بغوه!

اسف يمكن هاي تدخل في شي خاص..بس القصد ان احنا مو بس
ننتبه على كم بيزات نعطيهم...ايش اللي نوفره لهم
و بايش بينفعهم او بيضرهم هاي هم بيأثر على
كثير من حياتهم و و حجم مصروفهم!

عالعموم...انا اشوف لعيال في الابتدائي غالبا
صعب تسيير امورهم بالمصروف الشهري...
مصروف يومي مثل مصروف المدرسه( و اذا به حاجه
لزود...ينزاد في يومها)...
و لو بتساويينهم باللي اكبر منهم...بتكون بطره..
بزر بو 6 سنين تعطينه كم(ن) امية ريال عشان
ايصير مثل اخوه اللي بالاعدادي و لا الثانوي؟؟.

و اخيرا....المصروف ع البنت و الولد..
متساوي و لا به فرق؟؟؟

همممممم ..خلني :secret::secret: احسن!



لا ما نبيك تسكت اخوي عابر سبيل..بالعكس نبي نستفيد من خبرتك في هالمجال

انا معك ان كل بيت له ضروفه الخاصة وميزانيته الخاصة

احنا ما زلنا نتخبط..مرة نرهي عليهم..ومرة نمسك عنهم

ففكرة المصروف راح تحل الاشكالية اللي بينا وبين العيال


عيالنا تعودوا على الترف وتعودوا كل شي يبونه يسوونه لهم الاهل

احنا نبي جيل واثق من نفسه ع..عنده القدرة على التصدي لظروف

الحياة المتقلبة..

يوم لك ويوم عليك...مقولة لابد ان يعيها عيالنا عدل..

شرفني مرورك وتعقيبك اخوي عابر سبيل

مع اني اشك انك ما خلصت كل اللي عندك

ومازال في جعبتك المزيد..:omen2:

[ابن قطر]

اختي هتان يعتمد الامر على السن ؟؟؟

وان كنت ارى الراتب الشهري لن ينفع بل يضر..

[هتـان قطر]

اختي هتان يعتمد الامر على السن ؟؟؟

وان كنت ارى الراتب الشهري لن ينفع بل يضر..


ممكن اخوي ابن قطر تقول لنا كيف ممكن المصروف الشهري

يصبح ضار على ابنائنا..مع العلم ان العيال بدوا يمسكون عقولهم

اثنين في الثانوية العامة وواحد نهاية الاعدادية..؟؟

[هتـان قطر]

فكرة المصروف ممتازة ،، خصوصاً في الدول العربية نفتقر لمادة تسمى الادخار والاستثمار ،،

فالدول الغربية يتم تدريس الطالب على ان افضل وسيلة للاستثمار هي الادخار وكيفية تقليل المصاريف الشهرية بل و أحيانا اليومية.

من رأيي خصص لكل طفل مصرف سواء يومي / شهري ولكن لا تسلميه للطفل كاملاً انما يكون معك ، ويتم اعطاء الطفل على حسب الحاجة .

اجلسي معه بين فتره واخرى واشرحلي له مال له وما عليه و كم بقى له من مصروف لهذا الشهر وكم صرف منها . ليعلم مقدار المال المتاح له لبقية الشهر ،، و شهراً بعد شهر ستجدينه يتحسن من نفسه و يقلل من مصاريفه شيئاً فشيئاً كي يستطيع ان يوازن بين مصروفه و الـ 30 يوم في الشهر .

اطفال هذا الجيل نبهاء ولكن يحتاجون من يأخذ بيدهم ،، لاتعاملون الطفل على انه طفل بل على انه فرد واعٍ يمكن الاعتماد عليه وتحمل المسؤولية ،، وبأذن الله ستجنون حصاد زرعكم في المستقبل .




eXpert اعجبني ردك وخصوصا اللي باللون الاحمر..

فعلا عيالنا مازلنا نعاملهم على انهم صغار وما عندهم عقل

بعكس اهلنا الاوليين من يصير الولد عمره 12 سنه..عدوه مع الرجال

واصبح رجل ..وكان عون لوالده..

كلامك جدا مؤثر وان شالله نستفيد منه..جزاك الله خير