المساعد الشخصي الرقمي

مشاهدة النسخة كاملة : قرض كبار الموظفين



roadrunner
07-04-2005, 01:58 PM
السلام عليكم ورحمة الله عليكم جميعاً ..


بالنسبة عن قروض كبار الموظفين ... مب المفروض انها تنزل هالأيام ؟؟ بتاريخ كم تنزل بالظبط؟؟؟
احترق قلبي ... ابي اشوف بعيني كم بينزل .. لأن في اشاعه قويه تقول القرض زاد من 600000 الى 800000 .. وفي ناس تقول ان القرض سوه مليون .... مادري ياجماعة ... في حد عنده خبر عن هالموضوع.




ودمتم سالمين

Euro_2005
07-04-2005, 02:04 PM
i Hope Its True

مغروور قطر
07-04-2005, 02:12 PM
مبرمجنا هل الاشاعه من سنه قالو عنها وقالو 900 الاف بس لو فيه زيادة بيطلع في الجرايد ماكو شي للحين

راعي البورصه
07-04-2005, 02:20 PM
الله يسمع منكم

العنان
10-04-2005, 09:51 AM
بس مافي خبر اكيد عن موعد نزول القروض , وهل بيكون هناك زياده بعد في قروض الجنير؟

KHALIFA
12-04-2005, 07:22 AM
الاسامي الاسبوع الجاي بإذن الله
شيك في الجرايد مع التفاصيل


ومافي زياده في قيمة القرض

عزيز
12-04-2005, 04:20 PM
يالربع ممكن اعرف كيف طريقه أخذ قرضه الجونير؟ وكم المبلغ ؟ وشلون اقدر اخذه ؟ انا توني اربع سنين من اشتغلت بس عمري ماسألت عن قرض الجونير

ممكن تفهموني وتعطوني الاخبار ياجماعه الخير؟؟ علما اني موظف في القطاع الخاص :)

وألف شكر مقدما :)

sulai6i
13-04-2005, 07:56 AM
اخ عزيز اعتقد انك تقصد الإنتفاع بمساكن شعبيه

اذا كانت عندك ارض وتبي تبني عليها قطعت نصف المسافه اما اذا ما عندك ارض فمشوارك طويل
روح على ادارة الإسكان اللي مقابلة الأولى للتمويل او مقابله مسجد ابو عبيده
وهناك في الإرشيف تقدر تقدم الطلب ..




شباب بخصوص قرض كبار الموظفين .. كل سنة نسمع انه بيزيد وترى كلها اشاعات
انا توني مستلم القرض من كم شهر والحين في مرحلة البناء .. نفس الشي 600 الف ما تغير
مع ان البناء يكلف الدبل !!!

Qatari 1980
13-04-2005, 08:01 PM
والله ما ندري من نصدق

لكن نتمنى يزيدون قرض كبار الموظفين

عزيز
14-04-2005, 02:11 PM
اخوي واذا الارض عندي؟؟شسوي بعد ؟؟ افدني افادك الله والله ماعندي خلفيه بهالسوالف

واكون شاكر لك اخي الكريم :)

تحياتي لكم :)

sulai6i
14-04-2005, 10:25 PM
اخوي عزيز ..
روح المكان اللي قلت لك عنه .. وقدّم طلب ( فتح ملف ) وهم هناك بيفيدونك ..

مدام عندك ارض , بيجيك الدور بسرعه .. حوالي سنة تقريبا

عزيز
15-04-2005, 08:55 PM
مشكور اخوي واحد في حاله والله ماقصرت كفيت ووفيت

بس اسمحلي ازيدك بالاساله والله تراني غشيم بهالسوالف

كم بيعطوني اخوي؟؟ وشلون بيكون التسديد كم بالمائه نسبه التسديد بتكون من الراتب ؟ وعلي كم سنه؟ واسمحلي اخوي طولت عليك ومشكور والله سواء رديت ولا لا ماقصرت بردودك الي قبل

تحياتي لك :)

sulai6i
15-04-2005, 09:58 PM
افا عليك اخوي عزيز ..

ما طلبت شي ..

كم بيعطونك ؟ .. اعتقد قرض الإسكان الشعبي 380 الف .. والله مش متأكد واتمنى حد يصحح لي اذا غلطان
التسديد طبعا يكون على 15 سنة ( اعتقد ذلك ) وبدون فوائد طبعا .. كم بيكون القسط ما عندي فكره والله


ان مر عليهم يوم الأحد في الإرشيف تحت وان شاء الله بيقولون لك كل المعلومات ..


ويا هلاااا

roadrunner
15-04-2005, 10:32 PM
التسديد طبعا يكون على 15 سنة ( اعتقد ذلك ) وبدون فوائد طبعا .. كم بيكون القسط ما عندي فكره والله

عيل احنا بمؤسسة البترول مساكين ... ناخذها 600000 ... ونسددها حوالي المليون.

لأن الله يسلمك الدولة تعطينا 600000 .. وتاخذها 480000 ... بس المشكلة ان المؤسسة تخصم علينا قيمة القرض + نص بدل السكن تطيح علينا ... يعني ما سوينا شي..



الله يكون بالعون انشالله

sulai6i
15-04-2005, 10:42 PM
عيل احنا بمؤسسة البترول مساكين ... ناخذها 600000 ... ونسددها حوالي المليون.

لأن الله يسلمك الدولة تعطينا 600000 .. وتاخذها 480000 ... بس المشكلة ان المؤسسة تخصم علينا قيمة القرض + نص بدل السكن تطيح علينا ... يعني ما سوينا شي..

انتوا يخصمون منكم ( نص بدل السكن )

احنا علاوة بدل السكن كلها اتطير وفوقها 1800 ريال قسط القرض

اقصد بكلمة احنا ( موظفين الحكومة )

انزين يعطونكم ( منحة اثاث ) 50 الف عقب ما تاخذ آخر دفعة من القرض؟؟؟

عزيز
16-04-2005, 01:27 AM
مشكور اخوي واحد في حاله رحم الله والديك يالغالي ماقصرت وربي وان شاء الله براجعهم في اقرب وقت وراح ابلغك بالخبر ان شاء الله

واي خدمه حاضرين لك اخوي اذا تبي اسال لك عن قرض كبار الموظفين بالمره ;)

يعطيك العافيه والله تحياتي لك :)

حمد
16-04-2005, 04:09 AM
شباب لحد إيالف ترى .... قرض كبار الموظفين نفسه ... 600,000 مازادوا شي

هاي كلام مسؤول في القروض العقاريه ...

سألته امس وقالي هالكلام

وبالنسبه للقرض ...فرايي اذا انك تقدر تبني بدون القرض احسن لك ... لان لو تحسبها بتكون خسران ... مليون في الميه

احسب الخصومات الي عليك ... وشوف متى بتسدد وكم بتسدد ...

وسلامتك

حمد

عزيز
16-04-2005, 10:41 AM
مشكور أخوي حمد

بس الي ماعنده سيوله اخوي مضطر ياخذ قروض حكوميه

والعوض علي الله أخوي ;)

والي يقدر يفيدنا بتفاصيل أكثر اكون شاكر له

شاكر لكم مروركم الكريم ياخوان :)

تحياتي لكم :)

qshark
16-04-2005, 11:33 AM
يعني واحد يعطونه بدل سكن 3600 ، وأجر بيت بـ 4000 أو 5000 ويمكن شقة ، وبعد البناء بياخذ فيلا مو بيت أو شقة ويدفع النص ، مو أحسن له من الإجار ولا أنا غلطان ، إحسبوها صح وشوفوا من الربحان ، كنك شاري بيت بدون فوايد وتاخذ 50,000 ببلاش منحة اثاث ، وأرض ببلاش وعارفين الفاهمين كم اسعار الأراضي ألحين ، يعني بتدفع 480,000 حق بيت يسوى أكثر من مليون بسعر السوق وبدون فوائد ، وبعد مو عاجب ، الواحد يقول الحمدلله لأنه بوزعون 7000 أرض في خلال الـ3 شهور الجايه ، والعطيه قال لهم توصلون الخدمات في مدة لا تزيد عن سنة ونص ، والدوله مخصصة أكثر من 60 مليار للبنى التحتية ، وعمار يا قطر وحلاتها بشعبها والأمير اللي ما يتباها بإنجازاته وجهوده لتسريع الأمور والتقدم بالبلد لأنه أكبر من هالامور الصغيره ، بس مشكلتنا يالعرب انا ضعاف في الرياضيات !!!!!!!

حمد
16-04-2005, 10:53 PM
اخوي ... تقدر تاجر بيت ابوك الي انت فيه ... يعني اتقولهم انا عندي بيت وبي استاجره ... وتجيب عقد ايجار من ابوك ...

بيخصمون منك ... 2200 بدل سكن ... وبيعطون ابوك كل 6 شهور 30,000 ... وقوله يعطبك اياها ... تطلع لك بربح زين .... ( ومب ياخذها )

واصلا بيعطونك ارض عادي ....

وبعد اول ماتستاجر بيت ابوك ... قولهم ابي بدل اثاث بيعطونك حدود ثلاثين الف

بس بايقيلك 600 الف ... مالت البنيان

وانا يوم قلت لتاخذها ... اخوي ( في حالة انك تقدر اتوفرالمبلغ فقط )

لان بيخصمون عليك

2200 بدل سكن .... هذا اذا ماكانت في مخصصاتك الماليه في عملك اكثر ...

وبيخصمون منك ... مبلغ 2000 او 1800 ... لين اتخلص الــ 600 الف

بس المشكله .. ان بدل السكن ( 2200 ) بتروح عليك على طووول لين اتموت حتى في راتب التقاعد .. ماراح اتشوفها
معاي

فانت اذا تقدر اتوفر الــ 600 الف فسو الي قلت لك عليه ...

اجر بيت ابوك ...وطلب بدل اثاث وان شاء الله امورك طيبه ....

انا الكلام الي اقوله ... من واحد في القروض العقاريه

وكل له وجهة نظر وراي يمشي عليه

فتوكل علىالله وشوف الي يصلح لك

حمد

عزيز
17-04-2005, 12:32 PM
السلام عليكم

والله فكره حلوه اخوي حمد ماقصرت والله جزاك الله ألف خير ياالغالي

والله فكره حلوه واقدر اسويها بس مافيه عواقب جانبيه ولا شي مانتبهت لها اخوي؟؟والي يسأل مايضيع :)

وبعد انا بتأكد من القروض العقاريه وباخذ منهم كل التفاصيل وبخبركم بالي يصير معاي ان شاء الله

يعطيكم الف عافيه شباب ومشكور علي ردك حمد رحم الله والدينك

تحياتي لكم :)

qshark
17-04-2005, 05:06 PM
وين ضمايركم يا شباب ، وين الدين ، لهالدرجة صرنا ما نخاف ربنا ، أوكي تلاعبتوا على القانون ، بس من يفكم يوم القيامة من الحساب ، اتمنى الواحد منكم يستشير أهل الدين ويقولون انه حرام ، حد يخلي عياله ياكلون حرام!!!!!!!!!!

أستغفر الله العلي العظيم من كل ذنب عظيم ، والله يغفر لنا ولكم ولجميع المسلمين ...

qshark
17-04-2005, 05:07 PM
تعقيب :

قلنا تشطروا بالرياضيات ، بس موب بالحرام !

sulai6i
17-04-2005, 06:18 PM
وين ضمايركم يا شباب ، وين الدين ، لهالدرجة صرنا ما نخاف ربنا ، أوكي تلاعبتوا على القانون ، بس من يفكم يوم القيامة من الحساب ، اتمنى الواحد منكم يستشير أهل الدين ويقولون انه حرام ، حد يخلي عياله ياكلون حرام!!!!!!!!!!

أستغفر الله العلي العظيم من كل ذنب عظيم ، والله يغفر لنا ولكم ولجميع المسلمين ...

السلام عليكم

اخي الكريم .. ان كنت تقصد في كلامك رد الأخ حمد عندما ذكر عن تأجير بيت عن طريق الإسكان فالأصح ان توجه الكلام له شخصيا ولا تجمع ..

ثانيا .. لا تحرم إلا ببرهان من الكتاب او السنة .. إن لم تجد فأحضر لنا دليلاً بالتحريم من فتوى صادرة من عالم معروف ...

((( الدين النصيحة )))

حمد
18-04-2005, 10:42 AM
اعتقد كلام واحد في حاله صح ... اذا ماعندك شي يثبت ان الي قلته حرام ... فرجاء لتفتي

وبعدين انا ساكن في بيت ابوي ... يعني لو ماكنت ساكن معاه شي ثاني

والدولة ماعطاتني فرصه ان هي اتأجر لي فشلغلط ....

حمد

qshark
18-04-2005, 12:34 PM
إقتباس من كلام حمد :

" اخوي ... تقدر تاجر بيت ابوك الي انت فيه ... يعني اتقولهم انا عندي بيت وبي استاجره ... وتجيب عقد ايجار من ابوك ...

بيخصمون منك ... 2200 بدل سكن ... وبيعطون ابوك كل 6 شهور 30,000 ... وقوله يعطبك اياها ... تطلع لك بربح زين .... ( ومب ياخذها ) "

لو إنك أجرت البيت وساكن فيه بروحك أوكي ، وأبوك يأخذ الايجار أوكي ،
بس إن راعي البيت ابوك وبيكون انك قاعد في بيته مو اهو قاعد في بيتك ، لا ، وتاخذ فلوس الإيجار بعد ، ؟؟؟

ما أدري انتوا شلون حاسبينها بس لا تفهموني غلط ، أنا ابي مصلحتكم ، ومصلحة الواحد مو في الفلوس وبس ، وآخرته بعد ، وأذكركم ، أنا قلت
" اتمنى الواحد منكم يستشير أهل الدين ويقولون انه حرام ، حد يخلي عياله ياكلون حرام!!!!!!!!!!

أستغفر الله العلي العظيم من كل ذنب عظيم ، والله يغفر لنا ولكم ولجميع المسلمين ..."

إتصلوا في الدعوة والارشاد ، أنا مو قاعد مفتي وأحط في ذمتي ، بس الدين النصيحة ، واتصل وعطنا خبر ايش قالوا لك ، وأي تلاعب على قوانين الدولة أصلاً ينافي ما أمرنا الله به من اطاعة أولو الأمر منا ، في طاعة اللة طبعاً والله من وراء القصد وصلوا على خير الهدى ، محمد وآله وصحبه أجمعين إلىيوم الدين .

sulai6i
21-04-2005, 08:53 AM
السلام عليكم

هذا موقع ( إدارة القروض )

http://www.qnb.com.qa/personal/loans/land.jsp

كل المعلومات متوفرة للراغبين في الحصول على قرض كبار الموظفين


ويا هلاااا

khaleel
16-03-2006, 07:59 PM
عيل احنا بمؤسسة البترول مساكين ... ناخذها 600000 ... ونسددها حوالي المليون.

لأن الله يسلمك الدولة تعطينا 600000 .. وتاخذها 480000 ... بس المشكلة ان المؤسسة تخصم علينا قيمة القرض + نص بدل السكن تطيح علينا ... يعني ما سوينا شي..



الله يكون بالعون انشالله

الحين مؤسسة البترول ما يخصمون ولا بيزه بس تدفع القسط وفقط والعلاوات كلها تنزل كما هي وتحياتي

ملكة البورصة
19-03-2006, 12:03 AM
ياجماعه يعطيكم العافيه بادش عرض بس ابي الافاده .................

وين الاحسن والارخص الواحد يبني او ياخذ جاهز