ظاهرة تعدد<<<السيارات>>> هي من التبذير و لا الضروريات..فيكم مأيدين و لا بيننا معترضين

[عابر سبيل]

ظاهرة تعدد السيارات هي من التبذير و لا الضروريات!

السلام عليكم...
في ايام قلة ذات اليد..و سلامة النفسيات..
كان البيت الواحد ما فيه الا
سوزوكي
و لا عراوي
و لا بونتياك

السوزوكي حق كل الاولاد ..كبيرهم و صغيره..و في البر هم تسوقه بعض البنات:omg:

و الاب "يشقل" الفجر بالعراوي ماchـلة البيت و صناديق الخضروات..

و بعد الشمس يوصل للمدارس كللللل الالاد و هم البنات
اما بالعراوي و لا اذا انه راهي.. بالبونتياك!

الحين...بعد ان صرنا تقريبا اغنى شعوب الارض حسب ما تتناقله
في الاخبار كل النشرات!

قطينا عتيجنا و صار البعض منا يتنكر ان ثوبه لوّل مرقع
و انه في عمره ما لبس لنعول الحساويات!

المهم...اليوم صارت السيارات في الدوحه...ما شاء الله...
ما تشوفها لا عند اهل نيويورك و لا بيجين و لا في اي من الجمهوريات!

مرسيدس ،لند كروزر، BMW و لا اللي مو بطران ما يتنزل لليوكن..
بس عنده 3 "بنتليات"!

الله ايحب ايشوف النعمة على عباده..و نعم بالله!
بس فيه ناس تقول ان الظاهرة صارت ماسخه و حزات تكون من
الاسراف و التبذير المنهي عنه في شرعنا بالذات!

اخوي اختي..اب/اخ/ عم/ولد
ولا ام /اخت/او بنت
هل من بيننا من يملك له اكثر من سيارة..
ايش الاسباب لهالشي..هي
ضرورة...
و لا حاجه...
و هل تشتري "السكندهاند" و لا ما ترضى بغير المقرطسات!
كم تبقى السيارة عندك..سنه..سنتين..اقل اكثر..و لا 10 سنوات!

و هل هالشي...له تاثير ايجابي على حياتنا و لا تسبب في شي
من مظاهر السلبيات!

من يبدأ بالجرأه ايقول...حقيقة..هو من الخوافين اللي ما عنده الا وحده
و لا هو من الصناديد و يملك بدل الجواري ا و الارع زوجات..

يملك عنده ثنتين..ثلاث... او ارررربع سيارات!

[Bu Rashid]

أخوي عابر سبيل
اذا كان مقتدر وعنده خير .... لما لا
الله يبارك له ويزيده وخله يستانس في فلووووووسه دام انه حي يرزق

[فراغ]

أنا أعتقد أن تعدد السيارات مثل تعدد النساء
فيه منها ضروره
وفيه منها بذخ

[~~ الدانـه ~~]

السلام عليكم


تعدد السيارات عند البعض لاهي تبذير ولا ضروريات بقدر ماهي وجاهه نقدر نسميها ورغبه في التغيير



اذا الله منعم على الانسان ليه يقتر على نفسه ؟؟؟


اذا انا البنت املك اكثر من سياره ......... ماديتي تسمح لي كل شهرين سياره (مش سكند هاند ! جديده )


فكيف بالرجال الي هوايتهم السيارات ، اذا قادر ليه لا خله يستمتع بحلاله واما بنعمة ربك فحدث


بس حقيقي ممكن الانسان ينحسد على سيارته ؟


ولا هذا من تخميناتك العجيبه :)

[عابر سبيل]

أخوي عابر سبيل
اذا كان مقتدر وعنده خير .... لما لا
الله يبارك له ويزيده وخله يستانس في فلووووووسه دام انه حي يرزق



هلا بو راشد...

كلامك صحيح...اللي عنده من حقه ان يوسع على عمره..

يعني اتشوف اللي عنده 3 سيارات...
اسعارها من 200 الف و لا 450 الف و لا 800 الف..

هاي يعني يبي يستانس بفلوسه...و ناسه ابمليون ريال!

و اشرايك اذا كانت اقسااط و سلف ع البنك....
و هو بعدين ايقول خل الدوله تتدخل عشان تسدد سلفياتنا
و لا خل ترفع معاشاتنا!

و بعدين..اذا الواحد بروحه عنده 3..
غير زوجته ( اذا انها تسوق) و الدريول
و يمكن حد من اعياله..
يعني البيت بو 4 افراد فيه 10 سيارات:eek5:

[هتـان قطر]

اخوي عابر سبيل حياتنا تبدلت وكل شي تغير..

قبل ماكان عند اهل الفريج الا سيارة ابوي الله يرحمه الفرت

وكانت نافعه الجميع..

الحين اللي كنا نشوفه من الكماليات اصبح من الضروريات

المدارس الصبح ما يكفيها سيارة وحدة ودريول واحد

مدرسة في الشرق والثانية في الغرب..

الاب له سيارته الخاصة..او يمكن تكون ثنتين ..وحدة للطرق المعبدة

ووحدة فورويل للبر والوعورة..

البيت محتاج سيارتين وسايقين اذا كانت العايلة كبيرة

العيال الشباب كل واحد يبي سيارة خاصة..


من الطبيعي في قطر انك تشوف الطبيلة من عاير البيت اليييين العاير الثاني..

وكل عايلة تعرف شاللي يناسبها ..

[فراغ]

والله أنا قطري وما عندي حتى بطبطه أجيب فيها الخبز

[nyzk]

هلا بو راشد...

كلامك صحيح...اللي عنده من حقه ان يوسع على عمره..

يعني اتشوف اللي عنده 3 سيارات...
اسعارها من 200 الف و لا 450 الف و لا 800 الف..

هاي يعني يبي يستانس بفلوسه...و ناسه ابمليون ريال!

و اشرايك اذا كانت اقسااط و سلف ع البنك....
و هو بعدين ايقول خل الدوله تتدخل عشان تسدد سلفياتنا
و لا خل ترفع معاشاتنا!

و بعدين..اذا الواحد بروحه عنده 3..
غير زوجته ( اذا انها تسوق) و الدريول
و يمكن حد من اعياله..
يعني البيت بو 4 افراد فيه 10 سيارات:eek5:

ابرك له من ان يقط لفلوس في البورصه او تجارة غير مضمونه ويضيع وقته وماله على الاقل بيكشخ وبيستانس فترة وعقب بيبيع السيارة وبترجع فلوسه
ولا تنسى ان الرواتب الحين عاليه و2000 او 3000 ماتئثر وحتى 4000 ماتاثر في اللي بياخذ مواتر بلاقساط

[عابر سبيل]

أنا أعتقد أن تعدد السيارات مثل تعدد النساء
فيه منها ضروره
وفيه منها بذخ

و اذا من تعدد هي من النسااء..

يعني تقدر اتقول انه مثل تعدد "ازواج":omg:

شوف هاي كلمة الضروره شتعني بها...
يعني السيارة الوحده ما تقضي مشاغل الواحد و لا
البيت..

تدري يا فراغ...فيه ناس اصلا لانها تبي اتعدد..
بس ايتشيغل له بسيارة...ايونس عمره ( على قولة بو راشد)
و لا يمكن مرته تجيبها له "لعبه" تلهيه ابها..
هاي قصدك بالضرورات!

و لا لك راي ثاني في التفريق
بين الضرورة و البذخ؟؟

[فتك العديد]

السلام عليكم


تعدد السيارات عند البعض لاهي تبذير ولا ضروريات بقدر ماهي وجاهه نقدر نسميها ورغبه في التغيير



اذا الله منعم على الانسان ليه يقتر على نفسه ؟؟؟


اذا انا البنت املك اكثر من سياره ......... ماديتي تسمح لي كل شهرين سياره (مش سكند هاند ! جديده )


فكيف بالرجال الي هوايتهم السيارات ، اذا قادر ليه لا خله يستمتع بحلاله واما بنعمة ربك فحدث


بس حقيقي ممكن الانسان ينحسد على سيارته ؟


ولا هذا من تخميناتك العجيبه :)

اذا كل شهرين سياره جديده تبرعي حق العضو فراغ الي يقول انه ماعنده حتى بطبطه يجيب فيها خبز :tease::tease:

[البحار00]

الحمدلله كل واحد يمد ريوله على قد الحافه

وبعدين يا عابر سبيل تعبنا واحنا انجمع في هالفلوس على الاقل الواحد يبطر عمره شوي

طار الي طار مع البورصه والحمدلله على كل حال

محسوبك عنده كروزرات اثنين والاثنين استعمالي الخاص:):)

[فراغ]

اذا كل شهرين سياره جديده تبرعي حق العضو فراغ الي يقول انه ماعنده حتى بطبطه يجيب فيها خبز :tease::tease:
فتك العديد
أنا الحمد لله
قررت أشتري سيكل رنق 28 وأن شاء الله بتشوفه
والخبز بيوصل البيت قريب

[ناصح لكم]

الله عز وجل يقول (( وكلوا وأشربوا ولا تسرفوا )) صدق الله العظيم
إذا كان الأكل والشرب الذي لا تقوم الحياه إلا بهم أمرنا الله إلا نسرف فيهم
فما بالكم بالسيارات التي هي من الكماليات إذا كان عندك غيرها ، إذا دعت الحاجه لسياره ثانيه فلا بأس
ولكن ليس للتفاخر والمباهاه فالرسول صلى الله عليه وسلم حرم ثوب الشهره الذي يلبسه الشخص للمباهاه والتكبر ولا تنسون أن الأنسان سيسئل يوم القيامه عن ماله من أين أكتسبه وفيم أنفقه

جزاكم الله خير وهداني الله وأياكم لسواء السبيل

[فراغ]

و اذا من تعدد هي من النسااء..

يعني تقدر اتقول انه مثل تعدد "ازواج":omg:

شوف هاي كلمة الضروره شتعني بها...
يعني السيارة الوحده ما تقضي مشاغل الواحد و لا
البيت..

تدري يا فراغ...فيه ناس اصلا لانها تبي اتعدد..
بس ايتشيغل له بسيارة...ايونس عمره ( على قولة بو راشد)
و لا يمكن مرته تجيبها له "لعبه" تلهيه ابها..
هاي قصدك بالضرورات!

و لا لك راي ثاني في التفريق
بين الضرورة و البذخ؟؟

عابر سبيل
أخوي هذا التعليق الذي كتبته هو تعليق (ساخر) وهو نوع من علوم اللغة العربيه
حيث تربط موضوعين في موضوع واحد ومن خلاله تنبه على قضيه
وهو في صالح أختي القطريه حيث يوجد رجال يبدلون المرأة مثل ما يبدل سيارته وبعضهم بلغ معدل زواجه 40 مرأة خلال حياته (يعني يبدل المرأة مثل ما يبدل السيارة
وبعد علشان ما يسبونا فتايات الحي
لا يوجد رأي ثاني

[المتألم]

دام ربنا منعم على الواحد ويؤدي زكاة ماله ومايقصر على هله

خله يجيب اللي وده فيه

بس يظل بالعقل مب بس كذا يروي العالم

والناس بالنهايه رغبات وقناعات

والله يرزق اللي ما عنده

.
بالنسبة لي رأيي أن سيارة أو سيارتين بالكثير كافي وزياده
سياره مثلا للأمور العاديه وسياره إما كشخه أو أسبورت

بس الأمور ما تسمح
فسياره تكفي والحمد لله

[بوحارب]

عابر سبيل

انه عندي كامري وعراوي وفي اكس ار

وكل موتر له استخداماته ^ ــ ^

[هداف]

ماقدرنا انعدد في الزواج !!

حطينا حرتنا في السيارات وعددنا :)

[فراغ]

الله عز وجل يقول (( وكلوا وأشربوا ولا تسرفوا )) صدق الله العظيم
إذا كان الأكل والشرب الذي لا تقوم الحياه إلا بهم أمرنا الله إلا نسرف فيهم
فما بالكم بالسيارات التي هي من الكماليات إذا كان عندك غيرها ، إذا دعت الحاجه لسياره ثانيه فلا بأس
ولكن ليس للتفاخر والمباهاه فالرسول صلى الله عليه وسلم حرم ثوب الشهره الذي يلبسه الشخص للمباهاه والتكبر ولا تنسون أن الأنسان سيسئل يوم القيامه عن ماله من أين أكتسبه وفيم أنفقه

جزاكم الله خير وهداني الله وأياكم لسواء السبيل
أخو ناصح لكم
كلامك صحيح وعجبني
وأنا بقولك قصة حصلت لي مع واحد من أصدقائي ألي دايم أضحك معاهم
قالي صديقي أنت معزوم على العرس وكان عندهم عرس
قلت له
أنا ما أذهب حق عرس الشياطين
قالي شلون حنى شياطين
قلت له أن الله سبحانه وتعالى قال (أن المبذرين كانوا أخوان الشياطين)
وأعراس قطر كلها تبذير في تبذير
ضحك وقالي لا تخاف أنت تعال وبحطلك ديايه
هاه أتشوف فيه تبذير
أنا عاد سال لعابي
وقالت له أوكي

[ناصح لكم]

أخو ناصح لكم
كلامك صحيح وعجبني
وأنا بقولك قصة حصلت لي مع واحد من أصدقائي ألي دايم أضحك معاهم
قالي صديقي أنت معزوم على العرس وكان عندهم عرس
قلت له
أنا ما أذهب حق عرس الشياطين
قالي شلون حنى شياطين
قلت له أن الله سبحانه وتعالى قال (أن المبذرين كانوا أخوان الشياطين)
وأعراس قطر كلها تبذير في تبذير
ضحك وقالي لا تخاف أنت تعال وبحطلك ديايه
هاه أتشوف فيه تبذير
أنا عاد سال لعابي
وقالت له أوكي

أخوي فراغ جمعية قطر الخيرية جزاهم الله خير عندهم مشروع( حفظ النعمة)

سيارة تجي للأعراس والعزايم تجمع بقايا الأكل وتقوم بتوزيعه على الفقراء
يا ليتك قلت حق اللي عزمك أيسوي تيلفون لهم ويتفق معاهم

[عابر سبيل]

السلام عليكم


تعدد السيارات عند البعض لاهي تبذير ولا ضروريات بقدر ماهي وجاهه نقدر نسميها ورغبه في التغيير



اذا الله منعم على الانسان ليه يقتر على نفسه ؟؟؟


اذا انا البنت املك اكثر من سياره ......... ماديتي تسمح لي كل شهرين سياره (مش سكند هاند ! جديده )


فكيف بالرجال الي هوايتهم السيارات ، اذا قادر ليه لا خله يستمتع بحلاله واما بنعمة ربك فحدث


بس حقيقي ممكن الانسان ينحسد على سيارته ؟


ولا هذا من تخميناتك العجيبه :)


و اذا انحسد الواحد...
ممكن ينسدح هو بحدى هالسبيترات!
و سيارته ..تشليح في كراج "قاسم"
و لا تنحط في مصهر "قطر ستيل"!

اختي دانه..
جبتي شي مهم...
الوجاهه...
و خلينا نقول ..حب الشهوات..
لان كان لول في الخيل المسومة و القناطير المقنطرة..

اليوم في السيايير الفارهه!

يعني بالله عليج اختي...لو حد حب اتكون له مكانه
بين الناس...تهقين ان التقدير بيجيه من ورى هالسياره!

هاي تشوفينه احترام(ن) له و لا حق سيارته!

و الي عنده مثلج مقدره ما ينقال له لا توسع على عمرك..

بس يمكن هو اصلا مقصوص عليه "بالدعايات"
و لا شوية "نقره" من حد من ربعه و لا هله..
و لا الفراغ بعد له حكمه في التصنيقات!
(موب فراغ المنتدى بو سيكل:eek5:)

يعني حاجته الحقيقية هي موب للسيارة...
هي على قولتج للوجاهه...او بلغة هالايام
شوية "شو"!(ترانا ندردش اتمنى ما فيها زعل)

اهنيه يمكن فيها اشكال..ان كان موب من جهة
السلف و الاقساط و التبذير..
بس من جهة التفشخر و التحدي و المظاهر!

اختي كنت في فرنسا...سنه من لسنين..
و تعرفتلي على حد(ن) منهم...منصبه زييين..

كان عنده هو و مرته سياره وحده....
الصبح هو يروح للعمل بالقطار...
و الضحى زوجته يبدى عملها...تجي بالسياره
و اتخليها بالباركنج ....
و هو يرجع بالسياره للبيت....
و هي تلحقه تالي بالقطار!

هاي تسمينه تقتييير و لا شوية تحكم في الرغبات
و معرفة كيف التصرف "بالبيزات"!

و مرته هي اللي ساندته في هالشي ..
و صابره عليه...

يعني مثل حسينوه في سكتش مع سعاد حسين...
يوم انه ايقول:
( انا عايش على قدي...و عندي بيت..
و عندي موتر صغير..بيب بيب...و لا له ليت)!

يمكن لانهم بالكويت...و
لا احنا في قطر ما ناكل نامليت!.

[بوعلي2]

احنا سياره وحده بالبيت كروزر فقط

والحمد الله شايله البيت

لكن الي عنده لايبخل على عمره

اما الي ماعنده ياخذ شي على قده ويحافظ عليه ويحاول يبتعد عن الديون او يقللها قدر المستطاع

[عابر سبيل]

من الطبيعي في قطر انك تشوف الطبيلة من عاير البيت اليييين العاير الثاني..

وكل عايلة تعرف شاللي يناسبها ..

و الله انتي جبتيها عالعووق يا نجمة سهيل!

"فرت"..و ين عنه "لستوت"!

شوفي سيدتي الكريمه...
شاللي تغير و من تسبب فيه...

يعني انتي تقولين ان به ناس عاشوا
و انتي بروحج شفتيهم..
كانت بس سياره وحده شايله الفريج بكبره
من عايره الشمالي لين الجنوبي..
الشرقي لين الجبلي!

و الحين..بيت واحد طبيلته من العاير لين العاير
و موب شايله كل السيارات لان بعضها بالشارع..

يعني لول بلاهم شي..هم "ابخلا" ما يشتري له كل واحد سياره
و لا هم حابين بعض و كلن شايل(ن) قبل ولده..ولد جاره..

الحين..الله يكفينا شر الغنى...الولد ما يشيل امه
اللي تسع(ـة) اشهر في حشاها شالته..
ايقول عندج لدريول..و لا ولد اخوج و لا ولد اختج..

انا باروح حق ربعي عندنا كورس و امتحان في (اللاند مارك)
و لا (فيلاجيو)...ثرى هاذي اسامي كليات جديده راح تفتح صوب
الناصريه:secret:

لوليين بهم بلا..و لا اعيالنا اللي جاهم البلا!

مدري يالهتان...هاي تطور و لا تخلف للورا!

يعني سيارة وحده..تلفزيون واحد في البيت
سفره وحده للغدى و العشى و حتى الريوق..

(الجمعه كلنا كلنا ناكل بيض و بلاليط..كل قطر:omg:)

كل هذا بسبة الفقر...و الحين الغنى..خلانا نستغنى عن بعضنا!

و كل عايله تعرف شللي ايناسبها..
مختلفنا يا شيختنا...

بس يمكن... موب كل حد(ن) ايعرف
ايش اللي اصلح له!

--------

و لان الشعر يطريج اخذي هديه من حدى لوليين
هالكم(ن) بيت:

يا راعي الشفر السبعـه وخمسيـن
يـا مقتفـي ليلـن طريقـه تخطـاه

امسيت ذكرا في عسـام السباحيـن
كم شايبـن يطريـك وكلـن توحـاه

وقتن مضى وصفك سواة الشياهيـن
الله مـن قرمـن تشيلـه وتـرفـاه

واليوم اشوفك بين حمـر الشعافيـن
تذرا عليـك مـن الـذواري بلفحـاه

منولـن مثلـك حبـيـب الملايـيـن
كلـن تهقوابـك بيسـره وعجـفـاه

وهالحين مثلك مثل طعـج الجواليـن
منثـور باحزومـن وكلـن تـعـداه

ملفـا الدجـاج وملعبـه للوغاديـن
كلن كتـب فيـك الدعايـه وذكـراه

صديت ولقيت اللي شافـك شكاميـن
افرك لنا المقدم وخلـك مـن اقفـاه

[ام لولوه]

عندي تعليق واحد بس
وأما بنعمة ربك فحدث

[نشميّه]

الحمدلله ع النعمه
الحين الشباب حتى الكروزرات مايبونها ..
يقولون لا الشارع ترس جيات ؟
احنا سيايرنا على عدد بيتنا بنات وصبيان مع ان احنا البنات والوالده ماتسوق
موتر الجامعه والطلعه غير وموتر البر والزرع غير .. وسوالف الجمعيه الدريول بعراويه
الحمدلله لا نبي نسوي شو ولا شي .. بس انا وجهة نظري دام ربي منعم ع الانسان
ليش مايكشخ ؟ وبيقولون والله عنده ملايين وموتره جيي ؟ انزين لكزس ياخوي ؟
صح ولا لا ؟ يعني الناس والعقليات تختلف ..
الاول يدودنا لعبوا بالفلوس والمواتر هم وعيالهم يوم سألته ليش ؟ قال مانبي نخلي على عيالنا قاصر
لين كبروا يصيرون قنوعين وشبعانين من هالسوالف .. بس صج اشوف نظرية جدي الله يرحمه
نفعت ..

عسانا نقنع باللي عندنا .. ويخف الزبو في البلاد ..

[doha70999]

كل واحد على حسب ميزانيتة ومب شي ان الواحد يضسيق على عمره لو عنده

السيارة لو كانت من الماركات الغالية حلاتها بقراطيسها واعتقد عمر السيارة بالنسبة لي من 2-3 سنوات على حسب اذا نزل شي جديد بالسوق يناسبني وينافس موتري...

وطبعا كل واحد يسوق لازم يكون عنده موتر لان محد فاضي يوصل لحد وكل واحد عنجه مشاويير خاصة



بالتوفيق ،،،

[تـاجر الـذهب]

اشوف ان تعدد سيارات البيت الواحد ظاهرة بالفعل

واشوف انها اصبحت ضرورة في وقتنا الحالي


وهي ينتيجة للبحبوحة الي يعشونها سكان الخليج بشكل عام

نتيجة الاستقلال المادي والحمد لله


ولكن ان كان تعدد السيارات بغرض الزينة والوجاهه وتعدد المشاوير فاعتقد انها
مش ايجابية وانها تدخل بالتبذير

[عنيده]

أنا أعتقد أن تعدد السيارات مثل تعدد النساء
فيه منها ضروره
وفيه منها بذخ

سامحك الله على التشبيه:secret:

[عابر سبيل]

والله أنا قطري وما عندي حتى بطبطه أجيب فيها الخبز


و محد نشدك عن البطابط و لا السياكل..
احنى قلنا كم "عربية" عندك!
عاد عندك يابانيه و لا "ركشا" هنديه...
المهم..شكلك موب هيّن يا فراغ
و كلامك محشي بالدسم من بين كل حرف و حرف
بينهم شوية "فراغ"!.

بنشوف يا فراغ تجي
و اتقول الصدق و لا بتستحي
لان بس عندك موديل الفين و احطبه.."بنتلي":telephone:

[فراغ]

و محد نشدك عن البطابط و لا السياكل..
احنى قلنا كم "عربية" عندك!
عاد عندك يابانيه و لا "ركشا" هنديه...
المهم..شكلك موب هيّن يا فراغ
و كلامك محشي بالدسم من بين كل حرف و حرف
بينهم شوية "فراغ"!.

بنشوف يا فراغ تجي
و اتقول الصدق و لا بتستحي
لان بس عندك موديل الفين و احطبه.."بنتلي":telephone:
أنا والله قلتلك الصدق والصحيح أنا شخص قطري لا أمتلك سيارة لكني عندي سيارة الأهل أحيانآ أستعملها وهي عراوي قديمه لكن الشباب في الشارع ما يحترمونك يلفون عليك وبعضهم يصيح الهرن ويبط أذنك (صحيح الناس مضاهر) وأذا تحب تجرب أركب سيارة قديمه وشوف بنفسك وممكن أنت من الناس الي مروا علي ولفوا بعد علي
المهم
أنا في النقاش حاب أطرح نقطه جوهريه
ما تشوفون معاي أن البذخ وكثرة السيارات في البيت وعدم وجود ضابط من الأهل بأن هذه السيارات أصبحت تقع في أيدي أولادهم الصغار ومنها الى أبو هامور
فيه ناس يقولون خل عيالنا يستانسون والحمد لله الفلوس وايد وهو يعطي أبنه كفنه بيده ويكون هو أي الأب السبب في وفاة أبنه لأنه سلمه ألة قاتله وهي السيارة والولد أو الطفل للحين ما ملك عقله وهو طايش وشايف الدنيا كلها تحته
أنا أشوف يهال والله عندهم سيارات يديدة ويحفص ويستعرض واليهال في الشارع يشجعونه
هذا ما حبيت أقوله عن كثر السيارات والبذخ وعدم معرفة قيمة السيارة

[وطن]

استانس بفلوسي
واشتري لي سيارات اتمتع فيها
احسن من اني اكنزها ولا اضيعها في سوالف ثانيه "البورصة مثلا"


:)

وتعدد السيارات بالنسبة لي
من حب التغيير
مره كوبيه ومره فور ويل
ويا حبذا المكينه قوية
:shy:

الخطط المستقبليه ع الـ SL ان شاء الله اذا الله قدرنا :secret:

[فراغ]

سامحك الله على التشبيه:secret:

أختي أنا قلت أن هذه النقطه في صالح الفتاة حتى تحذر على مستقبلها
والله فيه رجال أنهم يتزوجون بقصد المتعه والطلاق والتاريخ شاهد وأنتم تعرفون ناس أخذوا الكثير من النساء وطلقوهم تحت بند الترف والفلوس الزايدة والله مرهي عليه وعنده وعنده
ولكنني لا أعم فيه رجال يكتفون بزوجه أو زوجتين ولا يظلم أذا طلق وفيه من يتبع الشرع يعني أربع
لكن ألي أخذ أكثر من عشرين في حياته هذيه شتسميه(ما تفاهم معاهم)
في النهايه فيه من يعامل المرأة مثل ما يعامل السيارة وهذا أختي شذوذ عن القاعدة

[وطن]

في نقطة بعد نسيت اقولها

عشان لما تروح وحده من السيارات تتعالج في الكراج
يكون في سيارة سبيير
ما اضيق عليهم باستخدام سيايير البيت
ولا اسوم ويهي لحد

;)

[فراغ]

في نقطة بعد نسيت اقولها

عشان لما تروح وحده من السيارات تتعالج في الكراج
يكون في سيارة سبيير
ما اضيق عليهم باستخدام سيايير البيت
ولا اسوم ويهي لحد

;)
الله يزيدك من نعيمه

[شاهيناز]

عابر سبيل كم سياره عندكم في البيييت

[وطن]

الله يزيدك من نعيمه

ويزيدك ان شاء الله
:victory:

[(الفيصل)]

المقياس صعب بقولاً مطلق ياصديقي عابرسبيل
فممكن تكون عندي سيارتين (ويعد ذالك تبذير)
في حين قد أملك خمسة سيارات ولا يعد ذالك تبذير
فكل أسرة وظروفها الإجتماعية والإقتصادية كذالك
تحياتي لك

[عابر سبيل]

عابر سبيل كم سياره عندكم في البيييت

صاروخ ارض جو مقصود
رياني يبي يهز شباك الملك القطراوي:omg:

ايقولون انا ما عرف اكتب كلمتين...
مرتين في حياتي كنت من المعددين!
و مع البورصه و مشاكل البنيان!
قطيتهم هم الثنتين...انجليزية و يابانية!

الحين انا و الحمد لله عندي يابانية موديل الفين و ثمانيه!
و الباك اب عند امي..ون..تو.. و العراوي ايصيرون ثلاثه!
و احلى شي ان امي ( الله يحفظها) عندها تصريح للويل شير..

يعني حق الزحمه... ما نحتار!

طاب الخاطر...(1- صفر)

يالله..قولي انتي تأيدن التعدد ..و لا No Way:anger1:




(ليعذرني البقية على التشقيح...
هاي معركة من الموسم الماضي...
حامض على بوزهم اي كاس او درع او اي شي Gold:)
واحنا انجهز لاستقبال الريانيين عندنا في الدفنه
يوم 12 من الشهر الجاري:telephone:)

[شاهيناز]

صاروخ ارض جو مقصود
رياني يبي يهز شباك الملك القطراوي:omg:

ايقولون انا ما عرف اكتب كلمتين...
مرتين في حياتي كنت من المعددين!
و مع البورصه و مشاكل البنيان!
قطيتهم هم الثنتين...انجليزية و يابانية!

الحين انا و الحمد لله عندي يابانية موديل الفين و ثمانيه!
و الباك اب عند امي..ون..تو.. و العراوي ايصيرون ثلاثه!
و احلى شي ان امي ( الله يحفظها) عندها تصريح للويل شير..

يعني حق الزحمه... ما نحتار!

طاب الخاطر...(1- صفر)

يالله..قولي انتي تأيدن التعدد ..و لا No Way:anger1:




(ليعذرني البقية على التشقيح...
هاي معركة من الموسم الماضي...
حامض على بوزهم اي كاس او درع او اي شي Gold:)
واحنا انجهز لاستقبال الريانيين عندنا في الدفنه
يوم 12 من الشهر الجاري:telephone:)


الدوري السنه رياني ان شاءالله:)

والله يخلي لك الوالده وعيالك الريانيين
قلنا لكم 90%مثلي

المهم انا ضد التبذير

المجتمع الحين تغير وصرنا طبقات وصار الفرق بين الطبقات واضح
وتحت بند الله منعم علي لازم انعم على نفسي واسرتي
صار الكل يحاول يكون منعمينلى نفسهم ومدلع نفسه حتى بالاقساط

اعرف خوات حالتهم الماديه متوسطه ولا يسوقون سياره مثل حالي:weeping:
كل حده ماخذه قسط ومطلعه سياره
وحاطه لها سايق اقول لهم ليش مايكون في دمج

يقلون لا نحب الاستقلال ماسوت علينا المدارس المستقله

انا مع الاعتدال في كل شئ حتى الي الله معطيهم
لان النعمه زواله والي اليوم تبذره بكره بتحتاج له

[PoBox]

*
*
*


الموضوع نسبي حسب الشخص

يعني اللي رصيده في البنك 100 ألف وراتبه مشلوخ سلفيات
ويشتري سيارة بحدود 400 ألف نقدر نسميه " أحمق "


ولكن من في رصيده 500 مليون
ويشتري سيارة بحدود 400 ألف قد يسمى " قنوع او متواضع "


وبين ال2 درجات ولكل حالته وظروفه
*
*


لو الشخص الله منعم عليه
مافي مانع من سيارتين او ثلاثة
من فئات مختلفة ( صالون ، سبورت ، فورويل )


صحيح ان الكل راح يادي الغرض لو الغرض مواصلات
مثل مالماي يروي العطش ايا كان نوعه
ماي حنفية ، او ماي مسافي او ماي ايفيان اوماي قدو :D
لكن قد يختلف غرض شراء كل سيارة

منا من يشتري السيارة له
ومنا من يشتري السيارة للناس :omg:
وهنا مكمن الفرق بين صاحب الراس من المحتاس

*
*

لكن في النهاية المطلوب ان الواحد يمد "رجله " على قد " راتبه "
ولو كان الموضوع تقسيط
مايعدي القسط 10% من راتبه او حدودها

عن نفسي املك سيارة وحده
واحب ابدل كل 4 سنوات ، ان تيسرت
منها تجديد ومنها الابتعاد عن دوشة بداية الاعطال في السيارة وتماسك القيمة السوقية " نوعا ما "
حيث العمر الافتراضي لاي سيارة بدون اي عطل في هالحدود من وجهة نظري


ويعطيك العافية اخونا عابر سبيل على الموضوع الجميل

[جرير]

موضع جيد

واشكرك اخي عابر سبيل على اثارتك هذا الموضوع

وجهه نظري ممكن اكون صائب فيها او ممكن تكون خاطئه

اسمع

تبي الصراحه احنا شوي دلوعيين وايد نهتم بالمظاهر

واحيانا نهتم بمظاهرنا اكثر من اهتمامنا بعقولنا

نحب نمتلك كل شي سواء كنا في حاجته او مالنا حاجه فيه

وعلى سبيل المثال لا الحصر عندك السيارات

اي موديل جديد من السيارات نزل وشفنا الناس تشتريه

قمنا وشريناه وياهم لدرجه ان قائمه الانتظار تطول

او بالاصح تطول لسته الانتظار في الوكالات والسبب

لان كل الناس طايحه في هالسياره (مع الخيل يا شقرا)

تعال وكدس المواتر في البيت ! انزين ليش كل هذا

هل انت محتاج هالسياره هل بتستعملها في مشاويرك

بس تعال ومن دون ادنى تفكير احجز والعربون ما يقصر

وفي النهايه ترد الناس وتقول ليش ارتفع سعر هالشي

الاسعار مرتفعه وتذمر من الكل ! انزين من سبب هذي

كله طبعا احنا اللي عطيناهم مجال حق اللعب بالاسعار

ليش ؟ حبنا لتملك اشياء احنا في غنى عن حاجتها

[عابر سبيل]

وبترجع فلوسه



الاخ/نيزك...
اي فلوس اللي ترجع..
انت خذ سيارة من الوكالة يوم واحد...
و رجعها للوكالة شوف كم لفلوس اللي بتروح عليك...

هاي اخوي...معادله ما اوافقك ابها..
تقارن السيارة..خاصة اللي يبيها الواحد زود على زود
و لا رفاهية على انها بديل لاي استثمار او ادخار...
انه ايقط فلوسه في سياره..

هاي المضيعه بعينها و علمها..

و انا اتحدى اي حد ايقول انه (موب شريطي) و ياخذ له
سيارة و ايبيعا باكثر من السعر اللي اشتراها..

على فكره...شخصيا من كم سنه ما اشتري شياره كاش..
كله ع البنك..لان الحسبه من ناحية السيولة
و توفرها لاقتناص فرص بورصوية/عقارية..
تطلع للقناص احسن..

اما الاسهم..لو هي اليوم نازله...بس مردها توزع ارباح...
و اللي ما يعرف متى يشتري اسهم و اشلون ايكون محفظه
استثمارية...ايدورله حد ايديرها له...
فيه وسائل عديدة متاحه..عن طريق لبنوك بالذات...

بدل ما يقط فلوسه في سيارات....تشفط البيزات
خاصة الغالية منها..تأمينها (شي تول)
و صيانتها ..الدشه .. بألفين ثلاث (للايل و البريكات)
و الحسابه بتحسب..

خل الواحد ايجخ..و ايرفّه على عمره..
بس خل اول ايقوي ظهره و عنده دخل متنوع جيد..
بعدين السيارات (الزايده) في منتصف سلم الاوليات!

[ابن قطر]

وسيلة ام غاية ؟؟؟؟

وعموما اهل الخليج فلوسهم كلها بالسيارات


وانا واحد منهم للاسف ؟؟؟

وقد تكون العملية هواية بعض الشي

وشكرا اخوي عابر على الموضوع المميز

[عابر سبيل]

محسوبك عنده كروزرات اثنين والاثنين استعمالي الخاص:):)


ماخذ خوات..ما يجوز يالبحار..
هامورتين بيبلعونك الثنتين..و انت راعي بحر يعني:)

ايقولون و انا اخوك...فيه مثل اسمه (من كل بستان زهره)

شخصيا....للي الله مقدره و عنده
500 ملطوووش ( على قولة بوكسنج)

ياخذ له سياره فورويل و الثانيه صالون..

اهااااه..
شكلك انت ما تبي تفرط لطعوس..
تروح بسيارة للنقيان..
و الثانية في سيلين!

شايفين الجمعه سيارتينك بالمكانين:rolleyes2:

له له..انا باخذ ثلاث "جيّات"
الثالث حق لعديد!
بس هالشكل يبيلي 3 زوجات:victory:

[عابر سبيل]

الله عز وجل يقول (( وكلوا وأشربوا ولا تسرفوا )) صدق الله العظيم
إذا كان الأكل والشرب الذي لا تقوم الحياه إلا بهم أمرنا الله إلا نسرف فيهم
فما بالكم بالسيارات التي هي من الكماليات إذا كان عندك غيرها ، إذا دعت الحاجه لسياره ثانيه فلا بأس
ولكن ليس للتفاخر والمباهاه فالرسول صلى الله عليه وسلم حرم ثوب الشهره الذي يلبسه الشخص للمباهاه والتكبر ولا تنسون أن الأنسان سيسئل يوم القيامه عن ماله من أين أكتسبه وفيم أنفقه

جزاكم الله خير وهداني الله وأياكم لسواء السبيل


ناصحنا و شاعرنا اخوي/سلطان...

اشوفك اتشيير من بعيد لمبدأ(ن) هااام..

شنهو الاسراف و هو في كل شي و لا بس في
زود الطعام..

مهنه بقصور بكل كلامك...و انا اعندي اضافة لو تسمح لي يا سلطان..

الناس ماتعرف انه حتى في الماااي للوضوووووء...
الرسول نها عن الاسراااف..

اي بالله...اللي يصرف ماي زياده على وضوءه عده الشرع انه من الاسراف..
هالكلام قاله لاحد كبار الصحابه...تذكر معي هالحديث يا ناصحنا:

" أن النبي صلى الله عليه وسلم مر بسعد وهو يتوضأ ، فقال : ما هذا السرف يا سعد ؟ قال : أفي الوضوء سرف ؟ قال : نعم ، وإن كنت على نهر جار

"
لله درك و بابي انت و امي يا رسول الله..(صلوا عليه)

في المدينة و مع قلة الماء..
و يتكلم عن المسرفين في ماء الوضوء و ممن عندهم
نهر يجري...
اليوم ممكن الناس تقول احنا عندنا الخير و الحكومه ما تقصر
و ايكتتووون الماي على غسييل الحوش و 10 سيارات
واقفه و مغبره...غير السيارات اللي تحت الاستخدام..

الوضووء..فيه اسراف منهي عنه للماي

(يعني للي ايحب...
اذا توضأ و مسح راسه (او راسها) و الاذنين...
ايسكّر الحنفيه -منعا للاسراف- و يرفع رجله
و بعدين يفتح الحنفيه...و نفس الشي
للرجل الثانيه...بس عشان ما يكون مسسسرف)!

عاد هاي كلام الشرع في الوضوء حق الصلاة يا سلطان..
شلون باللي ما يحسب احساب "تكتّت" البيزات
لا بشراء السيارات و لا بتذاكر شحنها بالطيارات (للتمشي)
في لندن و لا القاهره او بيروت:secret:

[عابر سبيل]

المقياس صعب بقولاً مطلق ياصديقي عابرسبيل
فممكن تكون عندي سيارتين (ويعد ذالك تبذير)
في حين قد أملك خمسة سيارات ولا يعد ذالك تبذير
فكل أسرة وظروفها الإجتماعية والإقتصادية كذالك
تحياتي لك



مطوع بريده...هالشكل بيقولون عنك اخوي (الفيصل):omg:

طيب...شلون شخص وااحد عنده 5 سيارات و مو مبذر..
انتو يالرياييل (هالشكل بيقولون النسوان) حق اعماركم كل شي
فيه تعدد زين..سيارات ..نسوان..مجالس..و لا منتديات..

اجل كيف لو الوحده تبي تعدد في اطقم الالماسات..
مو حق كل مناسبه و لا كل اسبوع...طقم حق كل شهر؟؟
و بعد...تبي اتعدد في عدد الخدامات..
يعني وحده لكل مطبخ...و خدامه حل كل مجلس
و خدامه حق تنظيف كل طابق...و عليك الحسبه
دامك بو 5 سيارات...اجل اكيد عندكم (ما شاء الله) 5 صالات:)

اشرح لي يالفيصل و انا اخوك لصغير...
كيف واحد بو سيارتين و لا ثلاث (مثل بوحارب اعلاه) ايكون
مسرف..و و احد لانه مطوع و راعي دين مثلك و بو 5 سيارات
و ما يكون من اخوان (.....)!.

[رجل تعليم]

حلو اخي عابر انك طرحت هذا الموضوع عشان نعرف اصدقاءنا اللي عندهم سيارات اضافية


ناوي استأجرها من عندهم اذا وفقني ربي للهجرة الى قطر وانت ادرى الناس بهذا الموضوع


عموما سيارتي هنالك على حسابك .... تدبرها بأي وجه كان هههه


مرسي

[~~ الدانـه ~~]

و اذا انحسد الواحد...
ممكن ينسدح هو بحدى هالسبيترات!
و سيارته ..تشليح في كراج "قاسم"
و لا تنحط في مصهر "قطر ستيل"!


يسامحك ربي

تفاول علي ياعابر ؟؟!
اذا سيارتي في المصهر تظن انا وين باكون ......... في ثلاجة سبيتار !


يعني بالله عليج اختي...لو حد حب اتكون له مكانه
بين الناس...تهقين ان التقدير بيجيه من ورى هالسياره!

هاي تشوفينه احترام(ن) له و لا حق سيارته!


انا قلت هالكلام ؟؟؟

الله يحاسبني دنيا قبل اخره ان كانت معتقداتي توصل لهالانحطاط والدونيه

لا ياخوي انت مخطي بهالتفكير انا مو جذيه .


بس يمكن هو اصلا مقصوص عليه "بالدعايات"
و لا شوية "نقره" من حد من ربعه و لا هله..
و لا الفراغ بعد له حكمه في التصنيقات!


حتى اكون صادقه انا فعلآ تأثر فيني الدعايات

بذمتك انت ماتأثر فيك لما تشوف نازل شيء جديد ؟


يعني حاجته الحقيقية هي موب للسيارة...
هي على قولتج للوجاهه...او بلغة هالايام
شوية "شو"!(ترانا ندردش اتمنى ما فيها زعل)


لا مابه زعل

دام خاطرك طيب بهالكلام هذا الي يهم

وتعبير ( شـو ) الله يسامحك عليه.........زين حنا بنات اغلب يومنا بالبيت ( شـو) لمن ؟؟؟

واذا تقصد هلي انا مدري ماسألتهم

اهنيه يمكن فيها اشكال..ان كان موب من جهة
السلف و الاقساط و التبذير..
بس من جهة التفشخر و التحدي و المظاهر!


انا وضحت لك الي مقتدر يعيش حياته بالشكل الي يبي طالما مايمس غيره بالأذى هذا اهم شي

انا بعيش مره وحده الا اذا انت تؤمن بتناسخ الارواح وانك ممكن تعيش اكثر احتمال انت صح بعد انا احترم وجهات النظر مهما تباينت !

سمه تبذير وتفشخر ومظاهر ....... رايك على عيني احترمه

اختي كنت في فرنسا...سنه من لسنين..
و تعرفتلي على حد(ن) منهم...منصبه زييين..

كان عنده هو و مرته سياره وحده....
الصبح هو يروح للعمل بالقطار...
و الضحى زوجته يبدى عملها...تجي بالسياره
و اتخليها بالباركنج ....
و هو يرجع بالسياره للبيت....
و هي تلحقه تالي بالقطار!

هاي تسمينه تقتييير و لا شوية تحكم في الرغبات
و معرفة كيف التصرف "بالبيزات"!


اكيد اسميه تقتير وسؤ تصرف ، ومافهمت اتحكم بالرغبات يعني ايش ..... اتصوف ولا كيف ؟

خلني انا المريضه بالتبذير ....... انت انت ياعابر ترضى على نفسك ومن معاك بهالحياة ؟

هذيلا امه تنعدم عندهم الوسطيه الي علمنا اياها دينا ...(.و لا تجعل يدك مغلولة إلى عنقك ولا

تبسطها كل البسط ) من الخطأ ان نجعل المال يتسيد علينا وحنا عبيد عنده


و مرته هي اللي ساندته في هالشي ..
و صابره عليه...


اي مرته امهبوله مثله !


يعني مثل حسينوه في سكتش مع سعاد حسين...
يوم انه ايقول:
( انا عايش على قدي...و عندي بيت..
و عندي موتر صغير..بيب بيب...و لا له ليت)!

يمكن لانهم بالكويت...و
لا احنا في قطر ما ناكل نامليت!.


اظنتي النامليت ينشرب الا اذا تثلج ممكن:)



الآراء لابد تختلف لان لكل منا حياة تختلف عن الثاني

انا ماجبر صديقتي تكون نفس شخصيتي لو انها خطأ هذا سلك وتربيه مش بالساهل اغيرها

واحتمال اذا انا اشوفه خطآ غيري يشوفه صح وانا غلطانه .

[فهد الخاطر]

تحياتي لك يا عابر
وشكرا
بالنسبة لي
سيارة فورويل وافكر في صالون
والحمدلله لكن اولويتي للبيت الي ببنيه افضل من مليون سياره وبعدها السيارات مب السياره
مطلوب انه الواحد يرهي على نفسه وعلى اهله ولكن بالصوره المعقوله
ياما شفنا ناس يملكون مئات الملايين ولكن اتشوفه بخيل على عمره وعلى اعياله
شفايدة مئات الملايين عنده عيل

[(الفيصل)]

مطوع بريده...هالشكل بيقولون عنك اخوي (الفيصل):omg:
طيب...شلون شخص وااحد عنده 5 سيارات و مو مبذر..
اشرح لي يالفيصل و انا اخوك لصغير...
كيف واحد بو سيارتين و لا ثلاث (مثل بوحارب اعلاه) ايكون
مسرف..و و احد لانه مطوع و راعي دين مثلك و بو 5 سيارات
و ما يكون من اخوان (.....)!.

أنا أقول لك كيف يكون ذالك بكل بساطه بارك الله فيك
شخص دخله السنوي لايقل عن مليون ومائتين الف
(هذا هو الجانب الاقتصادي)
أما الجانب الاجتماعي له:
فعنده أمه ساكنه معاه بالبيت (متكفل بها)
وأخ أو أبن مقعد (تكفل به )
ولديه من الأطفال (ماشاء الله)
وغرفة بها عدد (3) سائقين .
فعندك الحسبه:
1-سيارة له ولزوجته.
2-سيارة لأمه.
3-سيارة لأخيه أو أبنه (المقعد)
4-سيارة (لتوصيل الأطفال المدارس).(مع الضوابط الشرعيه)
5-سيارة للسائق (لإحتياجات المنزل العاجله)وفي نفس الوقت(اسبير لباقي السيارات اذا تعطلت احداها)

لهذا قلت لك تختلف المسئله من حاله إلى اخرى بالنظر للجوانب الاجتماعية والاقتصادية لكل رب أسره

ولاعلاقة لذالك بالدين اطلاقاً فالأمر لايحتاج (لالمطوع بريده .. ولالمطوع مكه)!!! بارك الله فيك.

** بقى أن نذكر أنه كما يوجد تبذير عند البعض .. يوجد ايضاً تقصير عند البعض الاخر بالنظر للجوانب التي أسلفت.(الاجتماعية والاقتصاديه).
** فمن غير المعقول شرعًا أو عقلاً:
أن شخص لديه دخل سنوي مليون ومائتين الف وأكثر ووضعه الاجتماعي كما أسلفت وليس في بيته الا سياره واحد!!! ... هذا بإختصار شديد (بخيل وقحي والله يعينه على نفسه ويعين ويصبر هله عليه).

الخلاصة :
الاعتدال في كل شيء مطلوب فلاافراط ولاتفريط

[شيخة الجزيرة]

هي اسمها سياره خاصه... تضمن لنا عملية التنقل.

وإلى يومك هذا لم أفهم نظرية الكشخه بالسيارة!!!!!

ومتى ما أدت الي عليها واكثرت أعطالها رخصناها وخذنا غيرها.

واشوف الكروزر نافعه للفصول الأربعه وللبر والبحر والشوارع.

[Cat-R]

يعطيك العافيه

[عابر سبيل]

** فمن غير المعقول شرعًا أو عقلاً:
أن شخص لديه دخل سنوي مليون ومائتين الف وأكثر ووضعه الاجتماعي كما أسلفت وليس في بيته الا سياره واحد!!! ... هذا بإختصار شديد (بخيل وقحي والله يعينه على نفسه ويعين ويصبر هله عليه).

الخلاصة :
الاعتدال في كل شيء مطلوب فلاافراط ولاتفريط



لا يالفيصل مو بس مطوع بريده...
الا مليونير الدوحه:omg:...

اخوي...ما قلنا شي للي عنده سيارات
له و لعياله حسب الحاجات اللي اشرت لها
و يمكن اكثر بعد... يعني اللي اعيالهم كبار
و كل(ن) يبيله سياره...

انا اتكلم عن وااحد...كان مليونير و لا هو مهرته
بواب او غفير!...و مكوّد له من هالسيارات...لاستخدامه
هو...و يمكن مو متزوج اصلا...او ما عنده الا بزر
بو سنتين و نص!
يعني مثل هذا يالفيصل...شالقول فيه!

يعني اذا انه راهي و دخله عالي...يتفهم الواحد انه
عنده سيارتين مثلا...
اما هو سيارتين و بطبتين و سكوترين..
و مرته (تسوق او للسايق حقها) هم سياره او اكثر...
و البنات الي في الجامعه كل(ن) بسايقها و سيارتها...
و الشباب اللي في الابتدائيه او لعداديه...طول اليوم
ادواره مع لدريول و شلة ربعهم من مول لين مول!

و هالايام الـ"ـزبو" و لا الـ"ـشو" بعد حده...
يعني غير السيارات لسبورت و الكشخه اللي كل(ن)
بمئات الالوووف..
حاطله بعد سيارة "انتيك" موديل الخمسينات و لا الستينات..
بس حق التمشي ابها في الاسبوع ثلاث ساعات...
(شوووو فوووو ني) هالشكل ايقول!.

هذا اللي احنا ننشد عنه....عقلا..و قبل ذلك شرعاً
يا مطوّع المنتدى:telephone:

[العثماني]

السلام عليكم

والله يأخوي مثل ماقلو الأخوان
الموضوع يختلف من شخص لشخص
يعني في ناس دخلهم يسمح لهم بأخذ أغلى السيارات ثنين وثلاث بعد ومراح يأثر فيهم ويبدل من فترة لفترة الموضوع كله على الدخل مستحيل تقارن دخل واحد 100 ألف أو أكثر بواحد 10 أو عشرين:omen2:

ممكن في وجهت نظرك تبذير لكن عند غيرك لا

لكن المصيبة إلي يحط نفسة في الديون علشان ياخذلة أكثر من سيارة:omg:

[بوحارب]

استانس بفلوسي
واشتري لي سيارات اتمتع فيها
احسن من اني اكنزها ولا اضيعها في سوالف ثانيه "البورصة مثلا"


:)

وتعدد السيارات بالنسبة لي
من حب التغيير
مره كوبيه ومره فور ويل
ويا حبذا المكينه قوية
:shy:

الخطط المستقبليه ع الـ SL ان شاء الله اذا الله قدرنا :secret:

خذي لج ميزراتي وراح تدعين لي :nice:

[alrheeb2020]

على حسب الحاجه ..

[عابر سبيل]

موضع جيد

واشكرك اخي عابر سبيل على اثارتك هذا الموضوع

وجهه نظري ممكن اكون صائب فيها او ممكن تكون خاطئه

اسمع

تبي الصراحه احنا شوي دلوعيين وايد نهتم بالمظاهر

واحيانا نهتم بمظاهرنا اكثر من اهتمامنا بعقولنا

نحب نمتلك كل شي سواء كنا في حاجته او مالنا حاجه فيه





حياك الله يا جرير...
و الله انت صراحتك دايما عجيبه و في الصميم...و لطيفه بعد!

يعني هل الخليج دلوعين..و لا يمكن "ولوعين"!
و لا هم بالدعايات مغترين!

المظاهر...يعني مو بس بشكل السيارة او نوعها او سعرها..
يعني به ناس "تتمظهر" بعدد السيارات اللي معها!

تعتقد ان به ناس هدفها هالشي..
طبعا باين ان (حسب الكثير من الردود في هالموضوع)
به ناس لهم اسباب عملية منطقية في تملك اكثر من سيارة...

بس هالنوعية اللي تبي تحط لها مظهر براق او صورة عند الناس..
شيسمونها....
و ما به حد (من الاهل او الاصحاب) ايعقلهم؟
و لا وازع (ديني او حتى مادي) يردعهم؟