>>>>>> ابوي نص كافر >>>>>....خواطر طالعه من فتاة في الابتدائية!! [الأرشيف]

مشاهدة النسخة كاملة : >>>>>> ابوي نص كافر >>>>>....خواطر طالعه من فتاة في الابتدائية!!

عابر سبيل

10-10-2009, 03:15 PM

قبيل اشهر قليلة..
جرت معنا هذه القصة الحقيقية...
من احدى مدارس البنات الابتدائية...

قصة عجيبة......و ما خلفها اعجب...
و هي عبارة عن حوار طفولي لا يتعدى الاسطر القليلة..

ابدا لكم من صباح ذلك اليوم الى نهاية احد الايام الدراسية..
*
*
،،

"
في الصباح...طلبت بنتنا انها تلبس الحجاب و الدفة فوق مريولها
(لبس المدرسة)
لانها كطفلة دون العاشرة من العمر...
تحب اتقلد لكبار..و كنا شاريين لها حجاب و دفة بناء على طلبها..

قلت لها:يبه.." بيلعوزج " و يمكن اتطيح الشيلة او "تتحنقلين"
او تتوسخ الدفه...
(و كنت انا في داخلي متحرج ان حد ايعيب عليها او ايفكر ان اهلها
متشدين...من الحين ملبسين هالبنت الصغيرة كل هالسواد!!!)

هي قالت يبى لا عادي..و اصرت و كانت فرحانه..
و سبحان الله الحجاب حزات كثييرة..
ايضيف هالة من الحسن و الجمال
على من تلبسه...و بالذات
مع البنيات الصغار...

المهم..البنت راحت للمدرسة...

و بعد ما جات....و انا جيت متأخر..
هي كانت قايلة قصتها حق امها..

القصة:
"
يمه رفيجاتي كانو فرحانين بلبسي
و اسالوني من وين شريت الدفه و الشيله..
قالت امها زين الحمد لله..الله ايبارك فيج..

قالت البنت..بس وحده من رفيجاتي قالت انها تبي تسوي مثلي
بس ابوها ما يخليها..
قالت ليش..
قالت هو حتى انه يتطنز على امها اللي تلبس نقاب..
و و و ...(سوالف يهال واسرار بيوت خطيرة؟؟؟!!!)
بنتي ما عرفت اترد عليها..

بس في الاخير البنت الثانية قالت..
تعرفين..احس ان
"ابوي نص كافر"؟؟؟!!!

ما يخلينا نلبس الحجاب و لا امي تلبس النقاب...

انا لما اكبر بلبس احجاب ودفة و نقاب..
"
،،
*
*

انتهى الاهم من الحوار والقصة..

بس حقيقة..هي كانت من اعجب ما سمعت
و بقت في ذهني عالقة..

لهالدرجة فيه ناس فاسدة و تفسد ابنائها و اي حد حولينها..
لهالدرجة ايكون تأثير الاباء على ابنائهم..

لهالدرجة ..جهالة باهمية رعاية الابناء و البنات بالذات..

تذكرت احاديث الرسول – صلى الله عليه و سلم-:
عن رعاية البنات و انه سبب دخول الجنة..
مثل قول رسول الله صلى الله عليه وسلم (( من كن له ثلاث بنات أو ثلاث أخوات فاتقى الله وأقام عليهن كان معي في الجنة هكذا وأوما بالسبابة والوسطى )) رواه أبو يعلى وصححه الألباني

و قوله (من ابتُلي من هذه البنات بشيء – وفي رواية فأحسن إليهنَّ - كُنَّ له سِتراً من النار)

ايعقل ان يكون في مجتمع مسلم ناس بهالجهل و الصلف و التمادي في
عناد اوامر رب العباد..لدرجة انه يمنع الخير حتى عن اغلى الناس
من اولاد له او بنات..

تنبيه...قد يستفيد منه
كل اب او ام او من يرعى له اخوة صغار او اخوات...

المسألة اكبر من التراخي و الاستهتار..
لان الصغار يفهمون و يتأثرون...

و ما خفي اعظم..
ستر الله علينا و على كل المسلمين
ذكورا و اناث!

رسالة..هالمرة للاباء و الامهات..
موب كل المشاكل تاتي من الاعيال..
ترى الاباء هم بعد مصادر للمشاكل الاخلاقية و الاجتماعية
و الدينية!!!

لله الحمد

10-10-2009, 03:35 PM

عقول مفهيّة

وناس تفكر بالمظاهر على حساب الدين

وناس مافيها غيرة على بناتهم

كله همه انه يطلع بمظهر اجتماعي راقي

دام يطلب من زوجته لا تتنقب وهي تبي تتنقب

الصراحه هذا مادري شأقول عنه

روح الاطلس

10-10-2009, 03:47 PM

وإذا كان رب البيت بالدف ضارباً ... فشيمة أهل البيت الرقص !!

هالنوعية من الآباء عندها خلل معرفي وضعف بالوزاع الديني ونزعة ليبرالية .. وبالنظر الى خلفية هالفئه نجدها كثيراً متأثرة بالموجة الانفتاحية على حساب المعتقد الديني

فينظرون إلى الحجاب على أنه تخلف ولا يتماشى مع ( الاستايل ) العصري

والله اني أصاب بغصة عندما اقرأ او اسمع عن مثل هذه الفئات في مجتمع إسلامي محافظ تربى وتعلم على قواعد وأسس اسلامية .. إذن فلا نلوم فرنسا ولا بعض الدول الغربية ان منعت الحجاب لأنه من بني جلدتنا من ينتهج الفكر ذاته وهو ينطق بأن لا إله الا الله !

* تذكرت مفتي الأزهر ومافعله قبل أيام بخصوص موقفه من النقاب :)

لا نقول إلا حسبنا الله ونعم الوكيل

مجرد انسان

10-10-2009, 03:48 PM

ما شاء الله عليك .. عابر سبيل

قصة مؤثرة جدا .. وفيها الكثير من العبر والدروس ...

سأحفظها .. ما دمت حيا ...

أشكرك أخي الكريم

مجرد انسان

الامانه

10-10-2009, 03:52 PM

دام يطلب من زوجته لا تتنقب وهي تبي تتنقب

الصراحه هذا مادري شأقول عنه
انا اقول عنه تخلف ديني
الله يصلح حالنا وحالهم واحوال المسلمين
اللهم امين

..الاميرة..

10-10-2009, 03:55 PM

سبحان الله ..

الله يكمل البنت بعقلها ويصبر امها على ما إبتلاهم من والي غير صالح ..

ويثبتهم على دينه .. ويصلح حال راعيهم ويهديه ..

عابر سبيل

10-10-2009, 04:22 PM

عقول مفهيّة

وناس تفكر بالمظاهر على حساب الدين

وناس مافيها غيرة على بناتهم

كله همه انه يطلع بمظهر اجتماعي راقي

دام يطلب من زوجته لا تتنقب وهي تبي تتنقب

الصراحه هذا مادري شأقول عنه

حياك الله اخوي/لله الحمد..
اتصدق اني كل هالمدة و الله ما جا على بالي
بالمرة..اللي قلته انت..
من صدقك..فيه ناس تهتم بالمظاهر على حساب
اوامر الله..
وفيه حد يعتقد ان الحجاب او النقاب موب من مظاهر الرقي..

يعني..فيه حد يبي (على قولتنا) " ايتزبّر" و "ايْجـِـخْ"
بوجوه بناته و لا زوجته او خواته!!!..

و ما عنده غيره عليهم..
هاي اللي ايسمونها (دياثه )و العياذ بالله و لا شي منها!!

كله عشان الناس تتلفت له و لهله..
ايش هالاعجاب بالنفس و حب الظهور المرضي..
و حتى بمعصية اوامر الله و مخالقة الشرع!

ا خوي/ لله الحمد..
كنت انا اتصور انه تهور من الرجال
او سوء فهم للدين..
او خلاف زوجي على امر ما..
بس ان فيه هالشي..
و عشان شلته او جيله او بيئته "الفاسدة"
ما يعيبون عليه...
ايغصب زوجته انها ماتلبس النقاب..

انا اعرف ان فيه حريم جدام ازواجهم يلبسون النقاب
و من وراه ما ايقطونه..

بس هاي اول حالة اتمر علي انها جدام زوجها تشيله..
و من وراه تلبس النقاب..

حقيقة كلامك عن هالنوعيات
ان كان صدق ( و انا ما اكذبك بس متعجب منه!!!)
فهو ايجيب المرض و يتعب الانسان..

و لا حول ولا قوة الا بالله!

عابر سبيل

10-10-2009, 05:02 PM

وإذا كان رب البيت بالدف ضارباً ... فشيمة أهل البيت الرقص !!

......

والله اني أصاب بغصة عندما اقرأ او اسمع عن مثل هذه الفئات في مجتمع إسلامي محافظ تربى وتعلم على قواعد وأسس اسلامية .. إذن فلا نلوم فرنسا ولا بعض الدول الغربية ان منعت الحجاب لأنه من بني جلدتنا من ينتهج الفكر ذاته وهو ينطق بأن لا إله الا الله !

* تذكرت مفتي الأزهر ومافعله قبل أيام بخصوص موقفه من النقاب :)

لا نقول إلا حسبنا الله ونعم الوكيل

حياج الله... و عودا حميدا يا روح الاطلس!!

No comments
على بيت الشعر!!!
رميتج بعيييدة و اهدافج دقيقة يا روح الاطلس..
و لا حول و لا قوة الا بالله.
*
*
،،

اما عن الغصة و القهر..
فانا من سمعت هالقصة..
موب قادر انساها...و ما اتمنى حتى اني
اعرف هالبيت..و حتى ما سألت البنت ايش اسم البنت
و ابوها..يعني اقدر اعرف..
بس موب حاب عشان ما تزيد الحسرة و الالام!!!
*
*
،،
اما عن فرنسا و لا تونس او تركيا..
و محاربتهم للحجاب..
احنا اذا ليش ما نقتدي بمثل هالبلدان
يوم انهم يسنون قوانين عشان ثوابتهم و معتقداتهم
الباطلة....
و في امريكا عندهم حق ان ياخذون الابناء من الاسره
اذا كان فيه ضرر ع الاطفال بسبب الاباء!!!

اعتقد مثل هالنوعية من الاباء..
موب مشكلة ان المجتمع ايطالب باخذ ابنائها
منهم و ان يتربون عند اسر صالحة ترعاهم..

مثل ما يسوون بالغرب...
اهناك عشان
ايحافظون على سلامة جيلهم المستقبلي..
و احنا بعد لازم نحافظ على الجيل القادم..
و اذا كان النشئ يتعرض لمثل هالمخاطر
من ابويه او احد منهما..يجب اهنيه التدخل..

*
*
،،

اما عن اللي في اخر كلامج..
انا احب اعرض و ابتعد عن هالشي و هالنوعيات
بابعد ما اقدر...فيه ناس تتكفل بالرد عليه.
اسلم للمسلم...
مهما كان..اي انسان يحمل قدر عالي من العلم
الشرعي في جوفه...احنا العوام و العاديين..
ما نخوض ابهم..احتراما
لاوامر الشرع نفسه:secret:

الأغر

10-10-2009, 05:27 PM

اللهم اعز الاسلام والمسلمين

عابر سبيل

10-10-2009, 07:02 PM

ما شاء الله عليك .. عابر سبيل

قصة مؤثرة جدا .. وفيها الكثير من العبر والدروس ...

سأحفظها .. ما دمت حيا ...

أشكرك أخي الكريم

مجرد انسان

ما به شي يستدعي الشكر..
شي حبيت اشارككم به..
او تقول هم اهمني و حبيت اظهره
ممكن حد يتعظ منه...

احفظها ..حلالك و انا اخوك ...
وعسا الله يحفظنا و اياك
من كل شر و من سوء المزالق و المهالك!

ما اخفيك..كنت اتمنى اني ما عرفتها اصلا..
لكن عسى الله ينفع ابها كل مسلم يقراها..
اباء او ابناء..

بنت^البحرين1

10-10-2009, 10:18 PM

عابر سبيل

10-10-2009, 11:55 PM

الله يصلح حالنا وحالهم واحوال المسلمين
اللهم امين
الهم آمين...

اي نعم يا/الامانة...
و نعم الدعوة دعوتك...
عسى الله يصلح احوال المسلمين
و ايحببنا بالايمان و طاعة الرحمن
و ايزينها في اقلوبنا..

جزاك الله خير..

ابن قطر

11-10-2009, 12:57 AM

البنـدري

11-10-2009, 02:06 AM

ابن قطر

11-10-2009, 02:46 AM

الله يوفق بنتك ويصلحها ويجعلها باره بك وبأمها

بيني وبينك ياعابر البنات اللي ذكرتهم للحين صغار وفي الابتدائي

ما بالك ببنات في الثانوي كانوا معاي أهلهم رافضين يتحجبون وفيه منهم بنات قبايل :secret:

ماقول الا الله يهديهم

والله المستعان

اختنا البندري استغرب لردج

لما تقولين بنات قبايل ؟؟؟؟

اشمعنى كلامج ممكن توضيح اكثر عموما قبايل او حضر او بدو او اهل فارس

الكل لازم يعلم ويربي اعياله احسن تربيه؟؟؟

بغض النظر عن موقعه بالمجتمع....

البنـدري

11-10-2009, 02:48 AM

اختنا البندري استغرب لردج

لما تقولين بنات قبايل ؟؟؟؟

اشمعنى كلامج ممكن توضيح اكثر عموما قبايل او حضر او بدو او اهل فارس

الكل لازم يعلم ويربي اعياله احسن تربيه؟؟؟

بغض النظر عن موقعه بالمجتمع....

أخوي انا بدويه

واللي اقصدهم هم بدو

فانا استغرب لما تطلع هالسالفه من بـدو..!

يعني نعرف تربية البـدو

وانا ما اقصد اني اتشمت باحد :)

براتزية برازيلية

11-10-2009, 08:55 AM

لا حول ولا قوة الا بالله

Miss

11-10-2009, 09:04 AM

لا حول ولا قوة الا بالله
في هالزمن الكل يخاف على عياله من شر هالزمن وهذا الشخص بايعها ولا همه..
هالبنات امهات اجيال المستقبل .. لازم تربيتهم احسن تربيه عشان الاجيال القادمه
الله يهديهم يا رب

بواردي

11-10-2009, 09:05 AM

والطامة الكبرى

شخصيات و اسماء معروفة في مجتمعنا

لا عباة ولادفة ولا شيلة

فاكيد البنات بيقلدونهم

جات على البنات اللي توهم ابتدائي
خلها على ربك

الخارجية

11-10-2009, 09:11 AM

موضوع حلو ...
أنا اعرف شخص أول ما تزوج قال حق مرته افصخي النقاب تبغين تفضحيني قاعدة جنبي في السيارة ومنقبه
وبعد في ناس يقولون حق الناس اللي بيخطبون عندهم من شروط الزوج ان مرته ماتلبس النقاب
ايش رايكم في هذا الموضوع

عاشقة الجنه

11-10-2009, 09:24 AM

مداخله بسيطه
الصراحة فعلا الاطفال يتأثرون من الكبار
انا بناتي عادي عندهم يلبسون العباية وهم رايحين بيت اهلي
لكن ينحرجون لما يروحون بيت اهل زوجي مع ان عائلتهم ملتزمة
بس يخافون من التعليق وانا دايما امدحهم وهم لابسين
مثل ماقالت الاخت يطلعون حلوين وهم بالعباية
هذا شي من باقي الاشياء
الابناء يتأثرون كثيرا والله يحفظهم ويهديهم ويكونون احسن منا يارب

عابر سبيل

11-10-2009, 10:58 AM

سبحان الله ..

الله يكمل البنت بعقلها ويصبر امها على ما إبتلاهم من والي غير صالح ..

ويثبتهم على دينه .. ويصلح حال راعيهم ويهديه ..

و نعم اللفته يا اختي/ الاميرة...

نعم..دايما انشوف بالاعلام و المجتمع و المنتديات
ان الناس تلقي باللوم على الابناء او الامهات...

هالقصة..تبين بجلاء ان من الاباء..من هم "اكبر البلاء"
يعني هالبنت لولا انها تشوف امها تعاني ما كانت
هي تاثرت لهالحد...
و لا حول و لا قوة الا بالله!

من هالشكل...
التدقييييق الدقيق في اختيار
الزوج و الزوجة ..
مهم لليوم الاول و كل المستقبل...

و كثير حقيقة من البنات..قد تتساهل (او تتنازل ) بشيء
من امور الدين التي قد يكون بعض الخُطّاب مقصرين ابها...
بحجة انه من الممكن انها هي اللي تغيره او تصلح شأنه مع الايام..
و تقبل بالزواج و ربما تضغط على اهلها للموافقة...

لكنها تأتي على رؤوسهم في الاخير...

الدين هو راس مال الانسان لان كلن
في الاخير بيموت و بيتحاسب على عمله هو..
كفرد..ازوجا كان او زوجه!!
أكان الفعل من نفسة او طاعة عمياء لاخرين..

و يتناسى البعض القاعدة الشرعية
المعروفة

( لا طاعة لمخلوق في معصية الخالق)

و هنا قول بليغ قد يحتاجه البعض
ممن يجهله بالذات من النساء و اهالي النساء
الذين يجب علهم الدفاع لحفظ بناتهم من الشر..
حتى لوكان من ازواجهم

"
لا طاعة لمخلوق في معصية الخالق
الشيخ الدكتور سفر بن عبدالرحمن الحوالي
من محاضرة: الأسئلة

السؤال: بعض الرجال يجبرون زوجاتهم على الظهور سافرات أمام الرجال، فما الواجب على المرأة في هذه الحالة؟

الجواب: قال النبي صلى الله عليه وسلم: {لا طاعة لمخلوق في معصية الخالق }، وأمر الزوج هنا معارض لأمر الله جل وعلا، فيجب عليها أن ترفض ذلك وأن تنصحه، فإن قبل وإلا فلتشتكه إلى من تثق به، أو من يستطيع أن يقنعه، أو إلى أهلها، حتى ولو أدى الأمر إلى أن تشكوه إلى القاضي في النهاية، إذ لا يجوز لها أن تطيعه في معصية الله تبارك وتعالى.
http://www.alhawali.com/index.cfm?method=home.SubContent&ContentID=4204#Hadeeth7002076
"

عابر سبيل

11-10-2009, 01:19 PM

اللهم اعز الاسلام والمسلمين

اللهم امين...
و ان يستر علينا اجمعين...

و شكرا ع المرور و الدعاء الطيّب..

لا حول ولا قوة الا بالله

نعم..كل شي بيد الله..
نسأله ان يهدي الجميع...
و شكرا على المرور و التذكير الطيّب

عابر سبيل

11-10-2009, 01:44 PM

عادي جدا هالسوالف..

اعرف وحده تحجبت واحنا في الجامعة،تقولي لبسته قبل نهاية الكورس والصيف قرروا يسافرون لندن.. امها قالت لها افصخيه اهناك بتتوهقين ماتقدرين تلبسين بكيفج لازم كل شي طويل عشان الحجاب.. ورفضت وعقب الابو (حسب كلامها) طالعها وهي كاسرة خاطره ، وقالها افصخيه ولين رجعنا ردي البسي، الحين استانسي !!

الحمدلله البنت مستمرة في حجابها

بس في اهالي رايحين في داهية واهم شي عندهم الكشخة والبرستيج لايخترب:weeping: فوق اي كلام

سبحان الله..عشان سفر للسياحة
ايسوون هالمخالفات...
شاستفادوا..دنيا و لا اخره!!؟؟
بلاها من هالسفرات اذا يتخلي
بنات المسلمين...
"سافرات"!
*
*
،،
شكرا يا بنت البحرين على هالاضافة
رغم ما بها من شي ايكدر بسبب جهل بعض الاهالي او الاباء
و قيامهم بمثل هالتصرفات الضارة
و الاثمة...لهم و لعيالهم...

إلا ان احسن شي في القصة ان البنت استمرت
في التزامها باوامر الله و هي متمسكة بحجابها..

عسى الله يهدي امها و ابوها و كل من هم
على هالقدر من الجهل باوامر الله!.

عابر سبيل

11-10-2009, 10:23 PM

هلا اخوي عابر سبيل ..,,

نعم قصة ليست عابرة بل معبرة لنا جميعا نعم...

بداية نعم التربية بأذن الله والله يوفقهم دنيا وآخره

والبنات زينة الاسرة وتربيتهن امانه علينا وانت نقلت هذه الامانه...

عموما ارى ان بعض الاسر يسرقهم الوقت والبعض والله يرى ابنته صغيره مهما بلغت من عمر

وانا من الناس الي اتفق مع النصيحه والبعد عن الضغط المباشر وترك الفتاة وتهيئة الجؤ لها لتختار

الصالح ..

وتسلم اخوي عابر سبيل على الموضوع المميز

اهلا و مرحبا بك يا ابن قطر و كلامك
يا خونا لكبير.. تاج ع الراس...

اعجبتني لفتاتك اللي ظللتها اعلاه بالاحمر..

و اكثر شي لفت انتباهي هو مسالة استصغار الاعمار
من قبل الاهل.. سواء الوالد او الوالده...
حتى لو الوحدة صارت طول ..او اطول من امها!

و هالشي باين بالذات في السماح
بالاليق او ما لا يليق من اللبس
بحسب اعمارهم!

وازيدك بعد..امهات الاول في الغالب
كانو احرص و ما يخلون البنت تحط المساحيق
او الزينه دامها بنت..
بس انشوف الامهات المتعلمات..الامهات المودرن..
قاموا يتساهلون في هالشي بشكل ملفت...

ما ادري...ليش الناس ما تتمسك بالعادات
القيمة لاساليب التربية
الاولية عندنا!.

دعوتك للبنت غالية..عسا الله يتقبلها منك...
و عسا الله يستر على بنياتنا و ابنياتكم..
و كل بنات المسملين..الصغيرات منهم و الراشدات!.

butterfly qatar

11-10-2009, 10:43 PM

الله يهديه ان شاءالله

شكله متخلف ه الأبو ومايفكر الا في المظاهر الحين النقاب صار يضحك

؟؟

عابر سبيل

11-10-2009, 11:53 PM

الله يوفق بنتك ويصلحها ويجعلها باره بك وبأمها

بيني وبينك ياعابر البنات اللي ذكرتهم للحين صغار وفي الابتدائي

ما بالك ببنات في الثانوي كانوا معاي أهلهم رافضين يتحجبون وفيه منهم بنات قبايل :secret:

ماقول الا الله يهديهم

والله المستعان

جزاج الله خير على الدعوات الطيبة حق
اخويتج لصغيرة يالبندري..
و عساها اتعم كل
البنيّات!

صدق البنات في هالسالفه بالابتدائي
و هاي الشي اللي بعد زاد الغرابة..
يعني الصغار يفهمون و ايعرفون
ايميزون الخطأ من الصواب!

وهاي اعتقد انه رد على اللي شفتيهم انتي
بالثانوي و موب متحجبات..
يمكن هم جدامكم ايتحججون ان اهاليهم رافضين..
لانكم ما تعرفون راي اهاليهم اصلا!!

و لا غريبة اللي تقولينه ان كان صدق
( ما اكذبج بس استنكره من غرااابته و الله)
لانه هذي مصيبة كبرى..
حد ايجيب حق عمره و من ايعولهم
الشر.. ابمعصية ربه!

ما انقول الا حسبنا الله و نعم الوكيل
و عسى الله يهدي الكل و ايحببهم في الدين
و ايزينه في اقلوبنا و اقلوبهم..
*
*
،،
تحية
اختي البندري

هتـان قطر

12-10-2009, 12:03 AM

الله يحفظ لك بناتك اخوي عابر سبيل ويسترهم دنيا وأخرة

نفس السالفة حصلت مع بنتي اللي في الثانوية

جاتني يوم وهي مذهوله ..تقول يمه تصدقين معانا بنات ما يعرفون

اي شي عن الصلاة؟!!!!

وحده من البنات تقول اذا ولا احد في البيت يصلي ..كيف تبيني اتعلم..

اقسم بالله شي يعور القلب وهالسالفة من العام ولين الحين افكر فيها

معقولة ام واب ما يصلون ..كيف ينصحون عيالهم ويوجهونهم..؟؟

اللهم لا حول ولا قوة الا بالله..

تقول بنتي يمه قعدت اعلمها اول شي الوضوء ..لانها اساسا ما تعرف

وبعدين بدت اتصلي..ومدرستهم ولله الحمد مركزين على الصلاة في المدرسة

الله يجزيهم الف خير..مادام الاهل غافلين ..نسأل الله انه يوفق مدارسنا

لتحمل المسؤولية وتغرس القيم الايمانية في نفوس ابنائنا وبناتنا

المتضرعه لله

12-10-2009, 01:28 AM

ياحلوا ابهاتنا وعيالنا وبناتنا شارعنا كله من الكبيره للصغيره اللي عمرها عشر كلهم سواد في سواد

حتى خداماتنا صاروا يلبسون العبي

الله يستر كل مسلمه فوق الارض وتحت الارض ويوم العرض

امين

jo0ory.56

12-10-2009, 01:57 AM

يارب ترحمنا برحمتك ياأرحم الراحمين .. وتستر علينا وعلى بناتنا وبنات المسلمين .. واحنا مع البنات توجيه عدلي حجابك .. غطي شعرج طالع .. ويالله نلحق .. شلون لو اهملناهم ... والحمدلله مع الوقت يلتزمون بالحجاب المضبوط .. ومن بعده النقاب ان شاء الله .. أما أن نمنعها من الحجاب أونتركها لحد ما تقتنع فهذا مومن حقها لانه فرض من رب العالمين وأول من بيتحاسب احنا والدينها .. والله يعين الجميع على تربية أولاده التربية التي يرضاها الله سبحانه وتعالى .. اللهم آآآآآآآمين .

عابر سبيل

17-10-2009, 11:42 PM

لبقية الاخوة والاخوات ممن
شارك واثرى الموضوع اعلاه
و لم يتم الرد عليه..(بليا حصر)..

جزاكم الله خير..
و عسى الله يهدي الجميع..

اسف للانقطاع لظروف خاصة...
ما حبيت اني ما اشكركم على هالمداخلات القيّمة!..

عسى الله ينفع ابها كل من يقراها.