بعد تطبيق الخطوة في مواقف سوق واقف ..مواطنون ومقيمون يعارضون تحصيل رسوم

[كلاسيك قطر]

بعد تطبيق الخطوة في مواقف سوق واقف ..مواطنون ومقيمون يعارضون تحصيل رسوم




أجمع العديد من المواطنين والمقيمين على رفض ما يشاع من أخبار تفيد بجعل مواقف السيارات في المجمعات والأسواق التجارية العامة مأجورة، حيث أكد أغلب المستطلعة آراؤهم سلبية هذا الإجراء الذي لن يكون في صالح المجمعات التجارية، حيث إن النتيجة ستكون في عزوف الكثير من الرواد والمتسوقين عن زيارة هذه الأماكن كما هو معتاد والحل لن يكون في تحصيل رسوم إضافية وإنما في توسعة هذه المواقف لتستوعب الأعداد المتزايدة من السيارات بشكل مستمر خصوصا أن المجمعات التجارية باتت أماكن ترفيهية بامتياز وأن أي متسوق سوف يقضي ساعات عديدة داخل هذه المجمعات.


وعلى جانب آخر رأى البعض أن هناك طريقة فعالة لتحصيل الرسوم وذلك عن طريق فواتير الشراء فإذا قام زائر المجمع بالتسوق يعفى من دفع الرسوم ويتم إلزام من لم يقم بالتسوق بدفع رسوم التوقف.


السيد سالم شنين من المؤيدين لهذه الخطوة، فهو يرى أن تحصيل رسوم لقاء وقوف السيارة في مواقف المجمعات التجارية سيوفر الكثير من المواقف التي كانت تقف فيها سيارات لمدة طويلة دون أي مبرر حيث يقول: إن البعض مثلا يترك سيارته في مجمع تجاري بقصد السفر لعدة أيام أو البعض الآخر يركن سيارته في المجمع منذ الصباح ويقضي وقتا طويلا بين المطاعم والمقاهي والتجول في المجمع التجاري دون أي مبالاة خصوصا من فئة الشباب وذلك لشعورهم بالفراغ وإذا كانت هناك مجموعة من الأصدقاء نراهم يأتون بسياراتهم ويوقفونها لساعات طويلة بينما لو تم تحصيل رسوم مقابل ركن السيارة سوف نرى أن هؤلاء الأصدقاء سوف يأتون بسيارة واحدة إلى المجمع وهذا ما سوف يتيح المزيد من المواقف الفارغة التي تتسع للآخرين، إذ أصبحت المجمعات التجارية مأوى وملجأ للكثير من الشباب والأشخاص الذين لا عمل لهم فنراهم يزاحمون الآخرين على مواقف السيارات خصوصا أن البعض يريد أن يقضي أمرا ما في هذا المجمع مثل دفع فاتورة أو شراء بعض الأشياء ولا يجد موقفا للسيارة فيضع سيارته بطريقة مخالفة ما يعرضه لغرامة مالية في الوقت الذي لا يريد فيه أحد أن يخالف قانون المرور، ولذلك لا بد من إتاحة المواقف للذين يحتاجونها.




شرايكم .. ؟؟

[كلاسيك قطر]

وين ردودكم

[البنـدري]

موجودين بس لنا عوده :)

[هل الشمال]

الرسوم رمزيه ومعقوله واظن 5 او 10 ريالات شوي مو وايد

[خشوف]

انا اشوف عادي حتى لو ب50 الساعه !! تعقدنا من سوق واقف نروح حق شي ضروري مانلاقي مواقف بسبته هالشيش والمطاعم

[آل حامد]

ياليتهم سوو مواقف مثل الناس بس لي دخل السوبر ولا الموتر الكبير تورط

[شيزكيك]

الصراحه مع الرسوم ناس يصفون وينسون نفسهم في السوق واحنا مانحصل مواقف الحين

احسن

[عاشقة الأمل]

أنا من المؤيدين للموضوع وبشده لأنها فعليا حلت مشكلة الزحمة في سوق واقف أعتقد إذا في متضررين يمكن يكونون الموظفين أو أصحاب المحلات لأنهم يستخدمون نفس المواقف إلا إذا تم تحديد أماكن خاصه لهم أما بالنسبة لمرتادي المجمعات فالأسعار من وجهة نظري رمزية وراح تقلل من عدد الي يزاحمون الناس وهم ماعندهم شغله :nice: :nice: :nice:

[làst çhàncè]

المفروض المواطنين ابلاش والمقيم بفلوس

[rashid alkubaisi]

ياليت لو القانون يوصل للمجمعات

لان بصراحه مافي احسن من هذا الحل

قبل نروح المطار مافي موقف وتلف ودور وبعد موت تحصل موقف

ونفس الشي سوق واقف

لكن اللحين اي وقت تروح تحصل موقف بدون تعب مايلف الواحد 50 مره

الفال حق الاند مارك والستي وفيلاجيو

لكن ياليت المجمعات يسون مواقف مجانيه ومواقف بفلوووس افضل للكل

[كلاسيك قطر]

مشكوووووووورين والله

بس اتوقعون كم تبون من الرسوووم

انا ابي الرسوم : ريال

[وطن]

خطوة الدفع على الموقف وايد حلوة
ونتايجها بتكون ملموسة خصوصا في السيتي سنتر
الواحد يروح الصبح ما يلاقي موقف !!

واقتراح ان من يتسوق يبرز فاتورة الشراء ويعفى من رسوم الموقف هم حلوة
بس يبي لها دراسه
ممكن واحد يروح يشتري شي بمبلغ معين بس يقضي ساعات بالمجمع بعدها
وواحد ثاني ياخذ شغله ع السريع ويطلع

[ANONYMOUS]

ياريت يخلون المواقف الساعه بألف ريال..

عشان بس كذا ملل

[عاشقة الأمل]

السعر الرمزي هو المطلوب يعني لويكون من 2 إلى 3 ريال في الساعة وتزيد ريال مع كل ساعة إنتظار إظافيه
وحتى لو قلنا 5 ريالات في الساعة ونفس الزياده السابقة بالنسبة لي سعر منطقي جدا حتى لو بتطول في السوق أو المجمعات حدك 6 ساعات بعد ماراح يطلع المبلغ كبير هذا طبعا بالنسبة للي يروحون للتسوق والترفيه مره في الاسبوع لكن الي كل يوم والثاني رايح على الفاضي أكيد الحسبة بتكون ضاربه معاه

[مضاد]

مع الرسوم .

للحد من الغلفج .

[مضاد]

ياريت يخلون المواقف الساعه بألف ريال..

عشان بس كذا ملل



هههههههههههههههههههههههههههههههه


ملل ولا نحاسة .؟

[الخير كله]

مع الرسوم .

للحد من الغلفج .
ككككككككككككك

[abn qatar]

انا مع فرض الرسوم على المواقف لان صراحه الاغلبيه مصخوها تقعد تدور ربع ساعه او

نصف ساعه ماتحصل موقف

اذكر ان كان هناك مشروع في بعض شوارع الدوحه لتركيب اجهزه رسوم على المواقف مثل

شارع الكهرباء حتى اذكر تم وضع بعض الاجهزه بس ايش صار بعدين في الموضوع ؟؟؟؟

[ريد قطر]

انا بس مريت في المواقف ما نزلت ودفعوني 3 ريال ليشششششششششششششش ؟؟؟؟؟؟؟

[سماء الرياض]

الصرحة فكرة حلوة للتخفيف من الزحمة

[محمد11]

انا ايد هذه الفكره لتقليل الزحمه .. ف المواقف ( الداعوس )
المبلغ رمزي 4 ريال للساعه الواحده ...


وللعلم اكثر زوار السوق هم من ( نسبة 80 % من السكان قطر )

[مرت محمد]

استنزاف لأموال المواطنين كل شي صار عندنا بفلوس الله وكبر يالدنيا حتى المواقف صارت بفلوس وين

صارت ولا في اي مكان بالعالم حتى مصر الي هي مصر وعلى كثر زحمتها ما عندها مواقف بفلوس وللناس

الى عندها ستعداد تدفع اقولهم اتقوا الله الي ايده في الماء البارد مو مثل الي ايده في الماء الحار .... ليش بدل

ما يخلونا ندفع رسوم ليش مايسوون مواقع اضافيه ليش بدل مايكبرون السوق يسوون مواقف العكس اهم

جذي بيخسرون المطاعم بيخسر السوق كله

[nouar]

غالي ليه مب حرام اكل اموال الناس بالباطل ..

بالنسبه للشباب والبنات المفروض انهم يمنع فيز الخدم لانهم خربوا كثير ..

[براتزية برازيلية]

احسن حل
و عقبال السيتي

[عضو المنتدى]

استنزاف لأموال المواطنين كل شي صار عندنا بفلوس الله وكبر يالدنيا حتى المواقف صارت بفلوس وين

صارت ولا في اي مكان بالعالم حتى مصر الي هي مصر وعلى كثر زحمتها ما عندها مواقف بفلوس وللناس

الى عندها ستعداد تدفع اقولهم اتقوا الله الي ايده في الماء البارد مو مثل الي ايده في الماء الحار .... ليش بدل

ما يخلونا ندفع رسوم ليش مايسوون مواقع اضافيه ليش بدل مايكبرون السوق يسوون مواقف العكس اهم

جذي بيخسرون المطاعم بيخسر السوق كله



والله معاك حق

التخطيط متخلف واحنا ندفع الضريبه والرسوم !

الله عزوجل موسع علينا في الأراضي

والمسؤولين عندنا يسوون أبراج بدون مواقف أو مواقف ضيقة

وشوارع ضيقة

ومواقف لمباني وزارية ضيقة

وأسواق بدون مواقف محترمة .

ويبغون يأخذون فلوس منا لسوء مخطاطاتهم

[أحساس]

أنا أيد الفكره بشدة
وأتصلت بجريدة الشرق وسألتهم
كيف عرفتوا أن جميع من في قطر معارض؟ للرسوم
المشكله . الكاتب أجنبي مقيم +الذين معمول معاهم القاء مقيمين؟
و60 % من رواد سوق واقف أجانب . أو المقيمين الذين يعملون بسوق
أتمنى تطبيق رسوم المواقف على جميع الاسواق ؟

[HIGHNESS]

اؤيد وبشدة ...
بتخف الزحمة ... وبتخف الاشكال اللي مالها داعي .. المعزبين الي مخلين السواقين ينتظرونهم بيطرشونهم البيت.. والريال مع زوجته او اهله اللي يقعد ساعتين يدور بيلقى موقف ...
بس يا اخواني اللي معترضين عالرسوم ماعتقد اللي يدش المجمع ومستعد يدفع اللآف على التسوق مايقدر يدفع كم ريال خصوصاً ان الرسوم راح تنحسب من قيمة المشتريات ..
يعطيكم العافية

[The Watcher]

من المؤيدين لهذه الخطوة، فهو يرى أن تحصيل رسوم لقاء وقوف السيارة في مواقف المجمعات التجارية سيوفر الكثير من المواقف التي كانت تقف فيها سيارات لمدة طويلة دون أي مبرر




هذا رأيي بالضبط

[مساهم عادي]

يعني الحين الناس تروح تصرف اقل شي بالمئات لما يرحون الأسواق... ومستخسرين 4 ريال رسوم!!!

اغلب المنتقدين يتخذون هذه المواقف كمكان لركن سياراتهم والذهاب الى بيوتهم او حتى السفر....

انا مؤيد لفرض الرسوم على مواقف السيارات....

[حليتان*]

زين ماسوو

[طارق]

انا مع تحصيل الرسوم في الفتره المسائيه فقط لأن الصباح يأتون الناس المشترين وليس المتسكعين

[ANONYMOUS]

مع الرسوم .

للحد من الغلفج .


للحد من الجحلّط