المساعد الشخصي الرقمي

مشاهدة النسخة كاملة : إستفسار عن أحسن وديعه؟؟



ذوق
02-11-2009, 09:47 PM
السلام عليكم ورحمة الله وبركاته

عساكم على القوه...

استفساري هو عن أفضل وديعه في البنوك الأسلاميه طبعآ...!! وشلون طريقتهم .. !!

ياريت تفاصل مفيده عشان الكل يستفيد..

وشكرآ

ذوق
02-11-2009, 10:16 PM
سبحان الله وبحمده

نيساني
03-11-2009, 12:20 AM
والله اختي انا قبل كنت حاط مبلغ وقدره 600000 تقريبا وكانت تسمى بوديعه تحت الطلب (يعني اي وقت تبينها تسحبينها )وفي الشهر احصل 5000 تقريبا ودارت الدنيا وكنسلوها والحين اقل وديعه اعتقد لاتقل عن المليون ويمكن اكثر.

وبالتوفيق:)

الكواري
03-11-2009, 02:22 AM
والله اختي انا قبل كنت حاط مبلغ وقدره 600000 تقريبا وكانت تسمى بوديعه تحت الطلب (يعني اي وقت تبينها تسحبينها )وفي الشهر احصل 5000 تقريبا ودارت الدنيا وكنسلوها والحين اقل وديعه اعتقد لاتقل عن المليون ويمكن اكثر.

وبالتوفيق:)
:omg:
:omg:
:omg:
:rolleyes2:
اي بنك ؟؟؟؟؟؟ ممكن اعرفه

عابر سبيل
03-11-2009, 08:28 AM
و عليكم السلام و رحمة الله..يا / ذوق

بداية..اعتقد ان هالموضوع مكانه الانسب
ربما في النقاش الاقتصادي..وقد يلقى
له تفاعل اكثر..

لكن...
اجابة على السؤال اقول:
من تجربتي مع 3 بنوك هي المصرف
و الدولي الاسلامي و الوطني الاسلامي

قبل لا اجيب عن افضلها اقول..
ان الوديعة لها عاملين ..هما المبلغ و المدة.

و البنوك اللي ذكرتها اعلاه كلها متشابهة في اقل
مدة..و هي شهر..
و اقل مبلغ و هو 10 آلاف ريال..
و ما اعتقد ان به حد اعلى..

و عندهم ودايع متوسطة المدة و هي
3 او 6 شهور.. ( و الوطني عندهم 9 شهور)
و بعدين تجي المدد السنوية..
كل هالبنوك عندهم ودايع سنوية ( سنة كاملة)
و بعديييين...

المصرف عنده ودايع ام 3 و 5 سنوات
و الدولي عندهم ودايع لمدة 1.5 سنه(18 شهر)
و ودائع لسنتين!

( و ماني متأكد ان كان
الوطني الاسلامي عنده مدد اكثر من سنه)

نجي للارباح التي توزع على هذه الودائع..

طبعا المدد القصيرة لها ارباح اقل من ودايع المدد الطويلة..

و النسب يتم تحديثها كل ربع...
لكن التغيير في الغالب طفيف..

اما عن توزيع الارباح على الودايع...
فكل البنوك المذكورة توزع ربح بنهاية كل ربع..
يعني في 1/4 (للربع الاول)
و في 1/7 ( للربع الثاني)
و في 1/10 ( للربع الثالث)
و في 1/1 ( للربع الاخير او نهاية السنه)

الوطني الاسلامي يوزع بحسب التواريخ اعلاه
و الدولي الاسلامي تقريبا باول اسبوع بعد نهاية
الربع..
لكن المصرف يتأخر و ما يوزع الا بعد اسبوعين
او ثلاث من نهاية كل ربع!


و اخيرا...
الافضل ...من وجهة نظري على حسب
التجارب الى قبل هذا اليوم ( لان في المستقبل قد تتغير)

الافضل من حيث النسب للمدد القصيرة
هما الوطني الاسلامي و الدولي و بعدين المصرف.

من حيث المدد المتوسطة..الوطني الاسلامي
و بعدين الدولي و المصرف تقريبا متساويين

من حيث المدد الطويلة...
الدولي الاسلامي هو الاول بلا منازع..
و بعدين الوطني و المصرف تقريبا متقاربين!


و قبل الختام...
للي عنده مبلغ نقدي فايض و ايحب يحتفظ
به كوديعة...
يفضل تقسيمه..اما لنصفين او 3 اقسام..
و ايحطهم بودايع متنوعة المدد..
عشان لو جد عليه جديد او طاري
ما يضطر يكسر الوديعة بكبرها...
عشان حاجته لجزء بسيط منها..

فمبلغ...بوديعة 3 شهور
(لان وديعة الشهر تعطي
ارباح نفس حساب التوفير)

و بعدين مبلغ بوديعة متوسطة..
و الجزء الاخير بوديعة سنوية او اكثر!

اتمنى اني اعطيت اجابة فيها شي من الافادة.


و السلام.

PoBox
03-11-2009, 08:53 AM
*

*


يعطيك العافية اخوي عابر على التوضيحات

مداخلة على الهامش

نفرض ان فلان
عنده مبلغ 1 مليون يبي يحطها وديعة

هل الافضل عمل 10 ودايع كل وديعة قيمتها 100 الف

ولا الافضل عمل 5 ودائع كل وديعة قيمتها 200 ألف
ولا وديعتين 500 و 500


لو فرضنا المصرف على سبيل المثال يعطي رقم افتراضي 5% على وديعة سنة

يعني حق المليون المحبوس سنة ( كمليون مفرد ) بيكون 50 ألف
هل المليون المجزء بالتقسيمات اعلاه لمدة سنة ايضا بيكون حقه 50 الف او اقل !

دايما اسال البنوك والموظفين يقولون " ايه " نفس الشي
لكن اعتقادي يقول هال "ايه " تصريفه والموظف مب عارف الحسبة عدل

اللي اعتقده (( واعتقادي ماله اي اساس مجرد تخمين )) ان في مبالغ فوايدها اكثر من غيرها ك ماعرف شسميها لكن

مثلا من 10 آلاف الى100 الف فايدة معينة
من 100 الى 500 فايدة معينة
من 500 الى مليون فايده معينة
فوق ال10 مليون فايدة معينة
فوق ال50 مليون فايدة معينة
وتزيد بزيادة المبلغ ؟؟

لكن هالتقسيمه ( ان وجدت ) ماتعلن مادري ليش
وفقط تعلن ان المدد الاطول نسبها تكون اعلى بدون تحديد المبالغ


عندي وديعتين (سنة ) حبستهم من فترة بسيطة نفس اليوم والدقيقة وبنفس المبلغ
في مصرف قطر الاسلامي
وفي مصرف الريان
وان شاء الله ان مانكسروا لحينه :rolleyes2:راح نوافيكم من الاكثر المصرف ولا الريان

مكنتوش
03-11-2009, 09:28 AM
والله اختي انا قبل كنت حاط مبلغ وقدره 600000 تقريبا وكانت تسمى بوديعه تحت الطلب (يعني اي وقت تبينها تسحبينها )وفي الشهر احصل 5000 تقريبا ودارت الدنيا وكنسلوها والحين اقل وديعه اعتقد لاتقل عن المليون ويمكن اكثر.

وبالتوفيق:)

متاكد 5000 في الشهر ؟
اي بنك هذا ؟

عابر سبيل
03-11-2009, 11:02 AM
*



اللي اعتقده (( واعتقادي ماله اي اساس مجرد تخمين )) ان في مبالغ فوايدها اكثر من غيرها ك ماعرف شسميها لكن

مثلا من 10 آلاف الى100 الف فايدة معينة
من 100 الى 500 فايدة معينة
من 500 الى مليون فايده معينة
فوق ال10 مليون فايدة معينة
فوق ال50 مليون فايدة معينة
وتزيد بزيادة المبلغ ؟؟

لكن هالتقسيمه ( ان وجدت ) ماتعلن مادري ليش
وفقط تعلن ان المدد الاطول نسبها تكون اعلى بدون تحديد المبالغ






تخمينك صحيح و موب صحيح..
لان حجيك " غير اسلامي"
او حجي شياب...فانت تقول
"فايدة"...

فهذا "ذبح غير اسلامي":omg:

تبي عيش و لحم عربي...و ذبح اسلامي
تقول " ارباح" طول الله عمرك..
ما شاء الله عندك وديعتين:eek5:

المهم..
في الوطني الاحمر ( العادي)
كلامك مطبق "بحذافيره"
و هو معلن ع الملأ
بالجدول اللي في هالرابط

http://www.qnb.com.qa/qnb/arinterest/displayInterestRates.jsp?DEP

و لاحظ..انه بعكس ما نتوقع بمنطقنا..
ان النسب تقل كلما زادت المبالغ و زادت المده:rolleyes2:

بس "الميّه تكدب الغطاس"!
و الواقع ايقول ان اصحاب الهمجات العدلة
ايروحون للبنوك و ايساومونهم على هالنسب
و دايما ايحصلون لهم سبشل "ريت"!

اما بالنسبة للوطني الاخضر ( الاسلامي)
فهالشي..غير مطبق..
يعني كل(ن) سواسية
بو 10 الاف ولا بو 100 مليون..
و شوف هالرابط لمن يهمه الامر
http://www.qnb.com.qa/alislami/innerIndex/index.jsp?currentPage=IslamiRate&LangPref=ar

لكن لكل قاعدة بنكية..استثناءااات!!

****

و عن التقسيم...
انا اشوف كل(ن) حسب اظروفه
و شخصيا ما افضل تقسيم المليون على 10 ودايع!

انا اشوف على حسب تقديرك لظروفك المستقبلية
يعني..انت لو بتجيك تصنيفة تسافر او
بالبورصة تغامر...

تبي 100 الف و لا اقل و لا اكثر..
من اهنيه تحط لك وديعة حق هالسوالف..
عشان ما تكسر 100 الف في نص المدة
و ما تحصل عليها ارباح...
و بعدين اتدش تشتري لك 200 سهم "الميرة"
اب 4 الاف او 10 الاف!!

و نفس الشي للطواري او التصنيفات..
سيارة جديدة و لا سفرة قصيره..
و لا "عينية" زواج حق عمرك اذا نويت
تكثر من صداع راسك..
اقصد حق حد من هلك او ربعك..بيتزوج!

السمعة جدام البنكرز (موظفين البنك) .." تخطيط قدام"..
تحسب احسابها اذا لك نوايا " تمويلية"
و الودايع و مدة بقائها و و و
تضيف لك " ريكورد" عشان
تحصل على شوية معاملة سبشل
لما تبي تسوي لك "فايننس" معين!

بوحارب
03-11-2009, 11:25 AM
اخوي عابر سبيل ممكن توضيح ولا عليك امر

لو احط 800 الف في الدولي لمدة سنه او سنتين

كم بينزلي كل شهر؟؟

واي بنك تنصحني احط فيه هالمبلغ !!!

وعطونا واحد كرك يالربع مع قرشه ماي باردة لخبيرنا الأقتصادي ^ ــ *

عابر سبيل
03-11-2009, 11:40 AM
كم بينزلي كل شهر؟؟





و لا اريال..
تبيني احلف ...

لك يا بو حارب و لا ريال بتشوفه كل شهر..
اقرا الكلام من اول و جديد و بتفهم!

موب معصرة تاخذ ع الهنود عمولة كل اخر شهر..
و اتشربنا كرك على احسابهم يبلفيت
انك مسوي لنا عزيمه من جيبك..
موب علينا هالسوالف..
"غرشة ماي" بعد..ما شاء الله الكرم حده!
**

المهم..
دام انك راعي 800 الف ما شاء الله تبارك الله
(اشبايع؟؟؟)

شوف يا عويني..
على اللي اخبره انك المفروض
اذا بتحطها وديعة سنة
المفروض كل 3 شهور
تجيك من 10 - 11 الف ريال
( لاني موب متأكد من النسبة حق السنة في الدولي الاسلامي)

يعني في السنة من 40 الى 44 الف ريال
( 5-5.5%)

بس اذا بتحطها على 18 شهر او سنتين
كل 3 شهور المفروض انهم
يعطونك بحدود ال 12 الف ( زايد ناقص)
يعني 48-50 الف ريال سنويا ( زايد ناقص)

بحدود ال 6% و يمكن حزات اتصير 6.25%

خل نحسبها الحين شهريا عشانك
40 الف/ 12 = 3333 ريال
و 44 الف/ 12= 3666 ريال
و 48 الف/12= 4000 ريال..

***
تعبتني و انا احسب..
بسنا افلوس يا بو حارب..

لا تنسى..عمولتي 8 الاف من هال 800 الف:omg:
و لا تحسب ما جاني خبر:secret:

MP3
03-11-2009, 11:52 AM
تدرون الخليجي نسبة الأرباح توصل 13%

بس حرام ربى ليته اسلامي جان حطيت كل الي عندي

PoBox
03-11-2009, 11:55 AM
تخمينك صحيح و موب صحيح..
لان حجيك " غير اسلامي"
او حجي شياب...فانت تقول
"فايدة"...

فهذا "ذبح غير اسلامي":omg:

تبي عيش و لحم عربي...و ذبح اسلامي
تقول " ارباح" طول الله عمرك..
ما شاء الله عندك وديعتين:eek5:

المهم..
في الوطني الاحمر ( العادي)
كلامك مطبق "بحذافيره"
و هو معلن ع الملأ
بالجدول اللي في هالرابط

http://www.qnb.com.qa/qnb/arinterest/displayInterestRates.jsp?DEP

و لاحظ..انه بعكس ما نتوقع بمنطقنا..
ان النسب تقل كلما زادت المبالغ و زادت المده:rolleyes2:

بس "الميّه تكدب الغطاس"!
و الواقع ايقول ان اصحاب الهمجات العدلة
ايروحون للبنوك و ايساومونهم على هالنسب
و دايما ايحصلون لهم سبشل "ريت"!

اما بالنسبة للوطني الاخضر ( الاسلامي)
فهالشي..غير مطبق..
يعني كل(ن) سواسية
بو 10 الاف ولا بو 100 مليون..
و شوف هالرابط لمن يهمه الامر
http://www.qnb.com.qa/alislami/innerIndex/index.jsp?currentPage=IslamiRate&LangPref=ar

لكن لكل قاعدة بنكية..استثناءااات!!

****

و عن التقسيم...
انا اشوف كل(ن) حسب اظروفه
و شخصيا ما افضل تقسيم المليون على 10 ودايع!

انا اشوف على حسب تقديرك لظروفك المستقبلية
يعني..انت لو بتجيك تصنيفة تسافر او
بالبورصة تغامر...

تبي 100 الف و لا اقل و لا اكثر..
من اهنيه تحط لك وديعة حق هالسوالف..
عشان ما تكسر 100 الف في نص المدة
و ما تحصل عليها ارباح...
و بعدين اتدش تشتري لك 200 سهم "الميرة"
اب 4 الاف او 10 الاف!!

و نفس الشي للطواري او التصنيفات..
سيارة جديدة و لا سفرة قصيره..
و لا "عينية" زواج حق عمرك اذا نويت
تكثر من صداع راسك..
اقصد حق حد من هلك او ربعك..بيتزوج!

السمعة جدام البنكرز (موظفين البنك) .." تخطيط قدام"..
تحسب احسابها اذا لك نوايا " تمويلية"
و الودايع و مدة بقائها و و و
تضيف لك " ريكورد" عشان
تحصل على شوية معاملة سبشل
لما تبي تسوي لك "فايننس" معين!


*


*

عاد ارباح فايدة المقصود ان المعنى واحد
واختلفت العقود والكيفيات
واحد يوديك باب الجنة
والثاني يوديك باب ابوزعبل


ماتشوف البورصة نزلت هاليومين !
كله من تاثير هالوديعتين omenomen ههههههههه
وان شفت ارباح المصرف والريان في العلالي
فاعرف ان بسبب هالوديعتين ايضا
خزاين البنك ماكفت الفلوس
اجروا لهم قطعة من مواقف سوق النجادة حاطين فيها الفلوس :app2:


بس ليش تقول انك ماتقضل تقسم المليون عشر اقسام
دام الارباح وحده انا شخصيا افضل التقسيم
صحيح انت بتخطط لمدى سنة وشتبي ولا وش ماتبي
لكن ماتدري عن الظروف " اللاارادية "
فترفع السماعة وتكلم الكول سنتر وتقوله اكسرلي 6 ودايع مثلا وتاخذ 600 الف
بدل ماتكون تبي 600 الف وتكسر وديعة المليون !
وتطلع من المولد بلا حمص !

بوحارب
03-11-2009, 12:04 PM
و لا اريال..
تبيني احلف ...
ياخي يوم قريت هالكلمتين مت من الصياح هههههههههههههههههههه :weeping:

لك يا بو حارب و لا ريال بتشوفه كل شهر..
اقرا الكلام من اول و جديد و بتفهم!
ياخي انت ماتخلي سوالفك هههههههههههههههههههههه

موب معصرة تاخذ ع الهنود عمولة كل اخر شهر..
و اتشربنا كرك على احسابهم يبلفيت
انك مسوي لنا عزيمه من جيبك..
موب علينا هالسوالف..
"غرشة ماي" بعد..ما شاء الله الكرم حده!
**
غيرك يمتنى الكرك مني بس بدون الماي وانت ماتبي ولا شي منهم :weeping:
المهم..
دام انك راعي 800 الف ما شاء الله تبارك الله
(اشبايع؟؟؟)
مممممم عابر سبيل المبلغ اللي جاني فوق ال 1 مليون بفضل الله

وانه الحين مابي اخلي المبلغ عندي في البنك عشان ماتزوج ال 2 ومابي اخذلي مرسدس واضيع الفلوس في شي ما منه فايدة:(

عشان كذا قلت بقطه في الوديعه ابرك لي ^ ـ ^

شوف يا عويني..
قول فديت عيونك

على اللي اخبره انك المفروض
اذا بتحطها وديعة سنة
المفروض كل 3 شهور
تجيك من 10 - 11 الف ريال
( لاني موب متأكد من النسبة حق السنة في الدولي الاسلامي)

يعني في السنة من 40 الى 44 الف ريال
( 5-5.5%)
حلو الكلام :)

بس اذا بتحطها على 18 شهر او سنتين
كل 3 شهور المفروض انهم
يعطونك بحدود ال 12 الف ( زايد ناقص)
يعني 48-50 الف ريال سنويا ( زايد ناقص)
ماعندي مشكلة بحطها سنتين :victory: والأرباح اشوفها حلوة

بحدود ال 6% و يمكن حزات اتصير 6.25%
اي بنك هاي اللي يعطي 6.25% اليوم بروح له ههههههههههه

يعني اروح للدولي خلاص؟؟؟؟؟؟؟:telephone:


خل نحسبها الحين شهريا عشانك
40 الف/ 12 = 3333 ريال
و 44 الف/ 12= 3666 ريال
و 48 الف/12= 4000 ريال..
بو 4000 ريال شهريا حلوة وايد :shy:

السموحة تعبتك معاي :shy:

***
تعبتني و انا احسب..
بسنا افلوس يا بو حارب..

لا تنسى..عمولتي 8 الاف من هال 800 الف:omg:
و لا تحسب ما جاني خبر:secret:

كم عمولتك :eek5: ماااااسمع ههههههههههههههههههه

ابشر ما طلبت شي بس انطرني في قسم الشعر مع القصيدة الجاية ^ ــ *

انت ما ينخش عليك شي يالشرير مادري من وين توصلك الأخبار :):)


بيض الله وجهك يالغالي على التوضيح وأن شاء نخدمك في الأيام الجاية :)

عابر سبيل
03-11-2009, 06:44 PM
بس ليش تقول انك ماتقضل تقسم المليون عشر اقسام
دام الارباح وحده انا شخصيا افضل التقسيم
صحيح انت بتخطط لمدى سنة وشتبي ولا وش ماتبي
لكن ماتدري عن الظروف " اللاارادية "
فترفع السماعة وتكلم الكول سنتر وتقوله اكسرلي 6 ودايع مثلا وتاخذ 600 الف
بدل ماتكون تبي 600 الف وتكسر وديعة المليون !
وتطلع من المولد بلا حمص ![/SIZE]



اول شي..
من ورا ودايعك هذي حتى سوق العقار بيقب..
تذكر مسلسل ديوان السبيل...
هاي عاد بنك الريان و المصرف بيسونها سالفه على ودايعك..
الاراضي و الوظايف و كل شي بسبة هالوديعتين...

بعدين بنكمل المسلسل...
***

المهم..

شوف يا بوكسنج (اسمك العتيج احلى)..
انت جنيت على نفسك بهالمقولة اعلاه..
ز جايتك معلقة من المعلقات العشر...
*
*
،،

انا ما اختلفت معاك في تقسيم المبلغ
على عدة ودايع..
بس كم عددها و ايش حجمها..
و المهم...مدة كل وديعة...
هذا هو مكان اختلافنا..

اقول لك ليش هالفلسفة؟
ايقولون...في علم " البزنس"
ان الكاش ..
تقدر تصوره في اهميته و اهمية
الحفاظ على توازنه في سير
البزنس/الاستثمار حقك...

تصوره تماما مثل الدم للجسم!
يعني..
جسم..براس وبكل مكوناته...
و قلب و صدر...و اريول
و كل ما تبيه..كامل المواصفات..

بس اشخانته بلا دم...
و ايش بيصير فيه لما تضطرب الدورة الدموية حقه..
و اشخانته اذا ارتفع الضغط..
و الا جا للواحد فقر دم...

كل هالاشياء..اللي يتسبب بها الدم..
غير اللي انعرفه انه يوصل الغذاء
و الاكسجين حق كل خلية..
و غير عمليات المقاومة ضد الامراض و غيره كثييييير
با بوكسنج..

اذا تخيل المرء ان الكاش حق "البروسس"
لاستثماره/ تجارته ادخاره...اي شي تسميه..
هو تماما مثل الدم..
مهم تواجده...
و مهم المحافظه على توازنه...
و مهم قياس معدلات التدفق..
و سيره من الى...و و و

من اهنيه بيقول لك كل هذا..
ان جملتك الاخيرة
بخصوص اتصال بسيط حق
" الكول سنتر" و تقوم تصرف بيزاتك
و اتكتت ال"كاش" باسرع من البرق..
هالامر...
يدعوا للمطالبة بايقاع حظر على من هذا سلوكة
و ان واحد مثلي يكون قايم على تصريف شؤونك
و ايدير لك اموالك:omg:

اسف اسف...
ما قصدت بس الحجي يطلع..

القصد يا عزيزي..
ان الواحد خاصة اذا انه شقى و تعب
في توفير الكاش..
و خاصة بعد المطبات و ما مرينا به من ازمات
خلال العدد القليل من السنوات الماضية..
عليه انه حقيقة ما يتسرع في صرف"كل" الكاش...
يعني..من المهم ان الواحد يدخر شيء من ممتكاته
على شكل سيولة...
لانه ببساطة
" في الليلة الظلماء يفتقد الكاش"!

و الليلة الظلماء محد ايخطط لها و لا يدري متى بتجيه!

من هالشكل..
انا اقول ان الواحد ايخشش له فلوس
كاش و ايحطها على شكل وديعة كبيرة..
يتأنى دايما في تحريكها...
هالشكل اوتوماتيكي..ترى الانسان ايتخوف
او يتردد انه يصرف له مبلغ اكبير مره وحده..

و بالمرة اهي اتدر عليه عوايد معقولة من خلال
الارباح البنكية!

و ايحط له ودايع باحجام اصغر..
من الممكن ان يكسرها بسهولة
وباتصال تلفوني على قولتك..
حق اي فرصة سانحة...
او تصنيفة "طارئة" ..

بهالاسلوب..
ايقولون و العهدة ع الراوي..
ان الانسان و على مدى متوسط الى طويل..
يقدر يتوصل الى تنوع في ممتلاكاته و استثماراته
شي بشكل عقار
و شي اسهم..
و جزء منها سيولة..

و هو سلطان امره دامه راعي كاش...
و حتى البنوك تراها تفرح به
و اتعامله بشكل غير..و اسال
البانكرز و هل الفايننس..
و عندنا في المنتدى منهم بس
من ينشد عنهم!.

اما التدرعم كل مرة..
كل املاكه عقار..
و ينطق على راسه.
.
و لا كل حلاله في البورصة..
و ينلعب بالمؤشر و به..
و لا بعد كل حلاله بيزات و لو هي
ودايع..بعد ايضيع على نفسه فرص
و ايحط نفسه في مخاطر انفلونزا الكاش...

هذي من الاخطاء الاستثمارية..
و حطيت لك فلسفة "ادخارية"
او تنويع للاصول ..
و مع المدة...
و الصبر و مراجعة الخطط..
باذن الله الواحد يحصل على نوع اكبر
من الاستقرار الاستثماري!

و بهالشكل يقدر انه ايفكر
بتقاعد غير اضطراري
متى ما طقت في راسه و تعدى
عمره الستين سنه!

ذوق
03-11-2009, 07:13 PM
مشكورين يالغوالي على التوضيح وماقصرتوا

أم وضحى
03-11-2009, 09:59 PM
استفسار لو سمحتوا ..


الحين الوطني الاسلامي هو اللي تابع لقطر الوطني ؟
يعني حلال ولا حرام الوديعه فيه ؟

Citizen
03-11-2009, 10:43 PM
وعليكم السلام ورحمة الله وبركاته
أحببت أن أفيدكم عن تجربتي الشخصية في البحث عن أحسن بنك للوديعة في قطر وهو بنك قطر الدولي الإسلامي الفرع الرئيسي حيث يعطي 6.75 % في السنة للوديعة المربوطه لمدة سنتين فعلى سبيل المثال:
عند ربط وديعة بمبلغ 1000.000 ريال فإن الأرباح كل ثلاث أشهر تكون 16870.5 ريالاً يعني 5620
ريال شهري ولا يوجد فرق في التقسيم حيث أنني مقسم بعضها على 50.000 ريال والبعض الاخر على 10.000ريال هذا والله أعلم ولا تنسوني من الدعاء الصالح

القناص
03-11-2009, 10:46 PM
وعليكم السلام ورحمة الله وبركاته
أحببت أن أفيدكم عن تجربتي الشخصية في البحث عن أحسن بنك للوديعة في قطر وهو بنك قطر الدولي الإسلامي الفرع الرئيسي حيث يعطي 6.75 % في السنة للوديعة المربوطه لمدة سنتين فعلى سبيل المثال:
عند ربط وديعة بمبلغ 1000.000 ريال فإن الأرباح كل ثلاث أشهر تكون 16870.5 ريالاً يعني 5620
ريال شهري ولا يوجد فرق في التقسيم حيث أنني مقسم بعضها على 50.000 ريال والبعض الاخر على 10.000ريال هذا والله أعلم ولا تنسوني من الدعاء الصالح

صح كلامك أخوي بس سؤالي هل هذي النسبة ثابتة لسنة 2008 و 2009
في توزيع شهر سبتمبر 2009 هل تم التوزيع على نسبة 6.75%

Citizen
03-11-2009, 10:47 PM
في رأيي طالما هناك البنوك الأسلامية الرئيسية متواجودة مثل الدولي المصرف الريان فلم أروح لبنوك غير واضحة مثل الوطني الإسلامي هذا والله أعلم ولا تنسوني من الدعاء الصالح

Citizen
03-11-2009, 10:52 PM
نعم هذا ما أستلمت منهم بسبتمبر 09 بس في السنوات الماضية كانت أقل بكثير يعني الدولي الاسلامي هو الاعلى في قطر حتى يومنا الحاضر هذا والله أعلم ولا تنسوني من الدعاء الصالح

بوحارب
04-11-2009, 12:03 AM
Citizen تنصحني اروح للدولي يعني ؟؟؟

عابر سبيل
04-11-2009, 08:51 AM
استفسار لو سمحتوا ..


الحين الوطني الاسلامي هو اللي تابع لقطر الوطني ؟
يعني حلال ولا حرام الوديعه فيه ؟


تحية يا اخت/ ام وضحى..
اعتقد ان الانسب طرح هالسؤال على المختصين
لان احنا هنيه نقاشنا من ناحية مالية/استثمارية
بحته...

فاما توجيه هالسؤال لقسم الشريعة عندنا في المنتدى
و لا الافضل طرحه مباشرة على من تعرفينهم من اهل الاختصاص.

لكن..باحط لج معلومات و من موقع البنك اللي سالتي عنه
علها توضح شي..و في الاول و الاخير
الانسان يبني رايه بنفسه موب على ما ينقال:
1) اعضاء هيأة الرقابة الشرعية لفرع الوطني الاسالمي:
أعضاء هيئة الفتوى والرقابة الشرعية
* سماحة العلامة يوسف القرضاوي (رئيس الهيئة)
* فضيلة أ.د علي القره داغي (نائب رئيس الهيئة ورئيس لجنتها التنفيذية)
د .سلطان الهاشمي (عضو الهيئة وعضو لجنتها التنفيذية)
http://www.qnb.com.qa/alislami/innerIndex/DocIndex.jsp?currentPage=IslamiShariaBoardMembers&LangPref=ar

2)للتواصل او اخذ الاستشارات الشرعية من الهيأة نفسها
http://www.qnb.com.qa/alislami/innerIndex/DocIndex.jsp?currentPage=IslamiCustomerShariaConsu ltations&LangPref=ar

3)قواعد/تعليمات مصرف قطر المركزي بشأن انشاء
فروع اسلامية من قبل البنوك العادية:
http://www.qnb.com.qa/csportal/BlobServer?blobcol=urlarabicdoc&blobtable=IslamiDocs&blobkey=id&blobwhere=1189571426824&blobheader=application%2Fpdf

و نلاحظ البند 1/2/2/3 بخصوص الفصل بين البنك و فرعه الاسلامي
في المحاسبة و السجلات المالية..الخ


4) النظام الاساسي الداخلي للفرع الاسلامي للبنك الوطني
http://www.qnb.com.qa/csportal/BlobServer?blobcol=urlarabicdoc&blobtable=IslamiDocs&blobkey=id&blobwhere=1190266814177&blobheader=application%2Fpdf

و نلاحظ بالتحديد المادرة رقم 3
تلتزم إدارة البنك بالضوابط الآتية للفرع الإسلامي :
-1 أن يكون للفرع كيان مستقل من الناحية المحاسبية والمالية .
-2 أن يكون للفرع رأس مال قدره ( 100.000.000 ) (مائة مليون ريال قطري) من خلال
منحه قرضا حسنا من البنك على أن يتم استثماره عن طريق الفرع .
-3 عدم خلط أموال الفرع بأموال البنك .
-4 أن يكون للفرع إدارة مستقلة.
-5 تنفيذ كافة المعاملات بالفرع وفقا للشريعة الإسلامية وتحت إشراف هيئة الفتوى والرقابة
الشرعية .

***

هذي بس معلومات..و الاهم ان الانسان يتعنى
بنفسه و يتحرى عن الحلال ..

و الله اعلم

عضو المنتدى
04-11-2009, 09:43 AM
شكرا على الأفادة

Citizen
07-02-2010, 01:24 PM
توكل على الله يابوحارب والله يبارك لك في مالك وأهلك