اللي عنده (كاسكو) يدخل...

[almalika]

السلام عليكم و رحمة الله و بركاته
بدخل في الموضوع على طول......من كم يوم اخوي اشترى (كاسكو)بس ما عنده خبرة في تربيته او في تدريبه على الكلام...فاللي عنده خبرة ارجو انه يساعدني في تدريبه...و له دعاء بظهر الغيب..

[faisalqatar]

السلام عليكم ورحمة الله وبركاته

اختي الكاسكو اللي خذتوه فرخ ولا كبير؟
يصارخ( يجعر) اذا حد قرب منه ؟

والافضل انج اتحطين صورته او طرشي لي صورته ع الخاص وانا بساعدكم ان شاءالله

بس ضروري اعرف العمر

[مواطن]

السلام عليكم
اسف على المداخله بس ممكن اعرف اسعارهم الكاسكو الفرخ مفكر اشتري واحد

[almalika]

بسأل اخوي و برد عليك...
جزاك الله خير على هالمبادرة

[ahmed_qtr]

اذا كان فرخ بيكون تدريبه سهل بس مب سهل حق واحد ما عنده خبره ... خصوصا انه بيدخل الشتا الحين وبيتغير الجو وممكن يمرض في تغيير الجو بسهوله .. الافضل تودونه محل واحة الاحياء اللي في شارع المنتزه وتعطونهم اياه ويدربونه لكم عالحركات في اسبوع تقريبا .. لكن الكلام يبي له حظ + طولة بال وممكن يكمل سنه بدون مايتكلم وممكن ما يتكلم كلش .. وممكن يتكلم ويكون احسن من غيره في فتره بسيطه
اتمنى اكون افدتكم

[إعلامي قطر]

السلام عليكم
اسف على المداخله بس ممكن اعرف اسعارهم الكاسكو الفرخ مفكر اشتري واحد


بسوق واقف بين 1800 و2000 وتحمل تدفع أكثر..

وبالبحرين ب1500 ريال..

وأهم شي تاخذ صغير بين 3 لين 5 شهور عشان تقدر تعلمه..

وأخوي صاحب الموضوع يفضّل تعلمه كلمه ولا كلمتين
بالبدايه وأنصحك شارك بموقع امازون وبتستفيد من أعضائه
وأيضاً فيه حركه ناجحه عن تجربه إنك تسجل الجمله أو الكلمتين
إللي تبي تعلمه إياهم بالجوال وتنزلهم على اللاب توب مثلاً وتخلي
الريال بلاير إحذاه باليوم من 3 لين 6 ساعات يعيد الكلمتين وخلال
أيام بيكون فيه تقدم، وأهم شي حطه على ستاند وإنسى شي إسمه قفص
وشيله بإستمرار وعوده على الشيل ولا عقب بتتعب وياه إذا جيت تشيله..

موفقين إن شاء الله..

..

[faisalqatar]

تعقيبا عل كلام اخوي احمد قطر ^^^^

انا اختلف معاك في الراي بالنسبة لـ محل واحة الاحياء

خاصه سلسلة محلات واحة الاحياء وعالم الحيوان ولهم كذا فرع

لانهم يستغلون جهل الناس و قلة خبرتهم وياخذون فلوس على شغل اي واحد يقدر يسوي واحيانا ما يدربونه لك كله تضييع وقت وكلام فاضي

الطير اذا راعيه ما دربه ما بيتعلم ولا شي .. انا عندي مكاو أليف وامسح على جسمه كامل وادخل يدي في حلجه وما يعضني ابدا .. لكن خل حد ثاني يمسكه وشوف شلون يصير وحشي

شي معروف ان الطير يحب اللي يدربه ويحب راعيه .. فـ نصيحة لا تودون طيوركم هالمحلات لانها ما اتفكر الا في الربح وفي النهاية انت اتكون الخسران

انا ما اتكلم الا عن خبره في الببغاوات 10 سنين واعرف لهم عدل وربيت اغلب الانواع

-------------------------

بالنسبة للاخت صاحبة الموضوع .. اتمنى انج اتحطين لنا صورة الطير او ع الاقل اتحددين لي اذا الطير يصارخ اذا حد قرب صوبه ولا لا؟
عيونه أي لون ؟ سودة ولا رصاصيه ولا بيضه ولا صفرة

في حجل (حلق) في ريله ولا لا ؟

هالاشياء كلها تفرق في طريقة التدريب

وفري لي هالمعلومات وانا بساعدج في التدريب


واسمحوا لنا ع الاطالة

[هذلان]

السلام عليكم

اهم معلومه لازم تعرفينها ،، هل الكاسكو الي خذتو نثيا ولا ذكر (ماينعرف الا بفحص الدم) اذا ذكر راح تلاحظين انه بيتاقلم بسرعه مع البنات الي في البيت و اذا انثى راح تلقينه والف على الشباب في البيت .
افضل شي يدربه هو الشخص الي الكاسكو يرتاح وياه و تحسين لاقرب من القفص هذا الشخص الكاسكو يستانس و يسوي حركات ولا يتعلق في القفص يبي يطلع .

اهم شي ماتعاندينه ولا تجبرينه على شي وحاولي انه ياكل من اليد يعني انتو تاكلونه .

اذا كان داخل قفص لاتطلعونه نهائيا لانه اذا طلع من القفص كذا مره بيعصب اذا رجع للقفص و اذا كان على حامل ماتفرق (في القفص افضل)
راح تلاحظين انه بيحب نوع معين من الاكل او الفواكه .. مثلا الي كان عندي ذبحته العنب . اذا سوى شي حلو عطوه الفاكهه الي يحبها .. مثلا اذا صفر لاول مره ههههههه شبعوه عنب او اذا تكلم كلمه جديده عطوه عنب .

الاكيد يبيله صبر ولا تتوقعون نتايج قبل ٣ شهور على الاقل