اللي دايم يجون لهم ضيوف من الخليج ايش اكثر شي يشدهم

[saranay1]

جاين لي ضيوف من الكويت
وين الاماكن السياحية اللي ممكن اخذهم لها
اعتقد انهم مالين من الاسواق ..
غير فلاجيو والستي
واللؤلؤه .. وسوق واقف

الشي الثاني ايش ممكن ياخذون مهاهم هدايا
ليما نروح الكويت مثلا ناخذ الدرابيل والرهش
ايش عندنا

اللي دايم يجون لهم ضيوف من الخليج ايش اكثر شي يشدهم ؟

واشي ياخذون معاهم ؟
شكرا لكم

[دلوليانوز]

اسبـــــــــــــــــــــــــــاير

[HIGHNESS]

في واييد اماكن حلوه بقطر غير المجمعات ... مثلا فريج شرق ..وايد ناس اعرفهم جو واستانسوا على قطرنا :) ... بس شنو ياخذون عاد شوف اللي بخاطرهم ومو موجود بديرتهم ... عندك مثال بسيط ... بنات خالتي لما يجون من الامارات ياخذون بفك قطر ويطخون منه وااااايد ...يحبونه...

[alrheeb2020]

ان شاء الله الاخوان بيفيدونج

[doha1]

سيلين والبحر والسينما والكورنيش والمتحف الاسلامي وسوق واقف وحديقة اسباير

او طلعات للبر تأجير شاليه او مرزعه

وبالنسبه للمشتريات اعتقد سوق واقف يكفي وويوفي من حلويات ورهش ولحية الشايب

[Riku3]

اسباير :] ..

جو عندي ناس من السعودية من كم يوم وخذتهم سباير صراحه انبهروا وكانوا جايين من دبي وابوظبي قبل الدوحة وكانوا منحبطين ان الدوحة مافيها شي وكانوا يبون ملاهي ماحصلوا والمجمعات الستي والاند وفيلاجيو كانوا دون المستوى بعد ماشافوا دبي ..

اخذتهم تعشينا في مطعم المجلس في السد وبعدها سباير تمشينا كم ساعة صدقني قالوا من افضل لحظات سفرهم وقرر يرجع الدوحة الشهر الجاي علشان يجيب اهله اسباير بس ! .

[شيزكيك]

احنا ييونا من البحرين يحبون ياخذون اكياس من الساقو والرهش الي في سوق واقف

والاماكن الاسواق واكثر شي حبوه واقف

[{راشد}]

على حسب الضيوف

[musel999]

انا جوني ضيوف استانسو اكثر شي على السلين وعلى اسباير
انا من رى لو جاك بيوم جمعه مر بهم السلين
وهدايا يمكن اقولك شي وتستغرب ترى لو توديهم سوق العلي يفصلون ثياب قطريه بيستانسون
خصوصا لو كانو من السعوديه يحبون ثياب قطر

[yosif1]

سوق واقف
كان عندنا مؤتمر خليجي
الربع مطيحين عند راعي الخبز الايراني بالمياوه

[وليف قطر]

كـ شباب

اكثر شي يسإلون عنه [ الستي / اللاند / سوق واقف / سيلين ]

مادري ليش ما يبون المتحف نفس قبل :(

[saranay1]

ترى ضيوفي حريم
بس كنت ناسيه اسباير
مشكورين

[الوعد2016]

ينتبهون من المخالفات المروريه اهم شي عشان ما تجيهم اكراميتنا لهم في الكويت

[هذلان]

اللي دايم يجون لهم ضيوف من الخليج ايش اكثر شي يشدهم ؟


التحويلات و الحفريات :rolleyes2:

[clouds]

الكويتيات يحبون اقمشتنا ويحبون عباياتنا وايد لان عبايات الكويت قماشهم يختلف..وديهم المتحجبه بيستانسون..

[بنت^البحرين1]

احلى شي احبه لين اروح قطر

سوق واقف ( بس مب مثل اول زيارة في شهر ثمانية ، تسبحنا وطلعنا من سوق واقف ) :(

بالنسبة لنا كبنات ، حبيت فيلاجيو والستي واللؤلؤة واللاند مارك

وبعد الكورنيشششششش ، لان عندنا في البحرين اللي يروح قطر ومايمر الكورنيش كنه ماسافر قطر ،، ذي المكان لابد من روحته

واهمممممم شي ... الرهش القطري( ذي وصوني عليه بنات الدوام) .. شي رهيييييييييييب


وان شاءالله الباقين يفيدونج

[عاشقة الطاووس]

بالنسبه للاماكن ماشاء الله الاخوان والخوات ماقصروا قالوا لج اللي كنت ابي اقوله ،،

بس بالنسبه للاغراض اقترح عليج تدشين سوق المنتدى وتشوفين الحريم اللي عندهم شغلات

يسوونها بيدهم وتنفع تكون صوغه مثل "الجوكلت والحلويات، تصاميم العبايات و الجلابيات ،

تركيب كريستالات على الموبايل ، البخور ، والعطور ، ملابس المواليد ، تغليف الهدايا... الخ "

عالاقل بتكون صناعة قطرية بإبداعات وأيدي وطنية100% ومب متوفرة عندهم :nice:

[الشاااهين]

احلى مكان تودينهم الشاليهات ويأجرون بطابط من عند المصري والا اذا ما يخافون فيه سيارات شركات سياحيه يطعسون فيهم بيستانسون بس الحامل لاتروح.

[وتبقى الدنيا حلوه]

انشالله يفيدونك الاعضاء

[المقهوره]

احنا يجونا من السعوديه والامارات بصراحه اتفشل ماادري وين اوديهم

اخر ما زهق اوديهم سباير طيب هذا اول يوم

وثاني يوم وين اوديهم احتار


خاصه انهم عائلات مايبون مجمعات يبون شي لعيالهم ملاهي مائيه ولا ملاهي بريه ولا جويه الي هو بس مافيه للاسف

اقعد اقول لهم تبون مجمعات فيها العاب يقتنعون بسبب الحنه من عيالهم واوديهم

واذا كان الجو بارد وحلو نفس الحين اوديهم البر او سيلين بس ما يكون ويك اند على شان زحمه الشباب

بس ان جاوا الخميس والجمعه مستحيل يروحون


خاصه ان الشاليهات دائما بالحجز وزحمه وان حصلنا هم غاليه.


اما قصه تأجير البطابط فهذه صار لنا موقف فيها وتبنا منها كلشششششششششششش
خاصه عقب ما طاح ولدهم وانشل بعيد الشر عن الكل

[المقهوره]

الكويتيات يحبون اقمشتنا ويحبون عباياتنا وايد لان عبايات الكويت قماشهم يختلف..وديهم المتحجبه بيستانسون..

الكويت عندهم شي ماشفته بقطر بصراحه بخصوص العبايات والقماش والجلابيات والفساتين اذااحنا نروح على شان نشتري من الي عندهم

[zeknon]

احنا مانوديهم مكان لاجاونا كلة جالسين في المجلس وكلة مفاطيح
واذاحبوا يشوفون الدوحة اوديهم الكورنيش وسوق واقف
بس لاتكثرين المراويح

[cristal]

ركبيهم العباره خل يجوفون هالابراج والجو روعه هالايام

[@north_star@]

وديهم صوب السوفيتيل علشان يشوفون البنغال خخخخخخخخخخخخخخ
والسموحه على التعليق وان شاء الله الباقي يفيدونج

[بنت الصقور]

وديهم الهايد بارك ورى فيلاجيو دام الجو حلو

[saranay1]

شكرا لآرائكم
ننطر آراء الباقين

[العلم الوكاد]

وديهم الحديقة المائية

والا اخذي فيهم فره في المترو

والا اطلعو على التلفريك

واقعدوا شوي في المقاهي فوق بعدين انزلوا

وروحوا متحف الشمع

والا حديقة الفراشات

والا المدينه الترفيهية


معقولة محتارة وين تودينهم

الله يهديج

[محمد اليهري]

من الأماكن الروعة ... متحف الشيخ فيصل بن قاسم آل ثاني في منطقة الشحانية، وبالمرة ممكن تزورون محمية الدوسري وميدان سباق الهجن... وبحر دخان جميل جدا.

[saranay1]

شكرا للجميع
جزاكم الله خير

[الـقـاسـي]

والله انا صرت اتضايق لما يكلموني الربع يقولون لي بنجيك من الامارات ولا الكويت ولا السعوديه ..

احتار وين اوديهم مافي مكان سوق واقف الاند مارك الستي اسباير وعقب كل مايجون يعني بنوديهم نفس المكان ..

الحين الربع بيجون فالعيد بوديهم سوق واقف بس وباقي الايام فالعنه والله ماوديهم غيرها ..

[بو الطيب]

سوق واقف -- الغاريه -- سوق العلي -- الوكره القديمه -- السيلين -- الخليج الغربي ومنطقة الأبراج -- اعشيهم في طريق سلوى عن المطاعم الشعبيه -- عقب اوديهم البر وهذا احسن شي يكيفون فيه -- برج برزان -- وبعض المناطق الاخرى

[سماء الرياض]

اختي انا زاروني الاهل في عيد الفطر
وديتهم الكورنيش _سوق واقف_فيلاجيو _الستي _الشاليهات_استراحة الريم لاتفوتكم صدقيني بتعجبهم

بحر دخان _الفرضه رحنا لها الصبح على الساعة 7 ونص وبس

[مستقلة]

شارع النصر
سوق الديرة
مطاعم كريق سلوى
السلام
بوتيك زي
بوتيك عايدة
المطعم اللبناني على الكورنيش
فندق السلطان في الخور
فندق ال ًw
هاذي بعض الاماكن اللي ماذكروها

[saranay1]

استراحة الريم لاتفوتكم صدقيني بتعجبهم


شكرا للجميع
بس وين استراحة الريم

[export]

دام جاين لك هذي بحد ذاتها وناسه لهم والاماكن عاد الخيار يرجع لهم

[باشا البدو]

كورنيشنا ماكو مثله بالعالم كله

[saranay1]

كورنيشنا ماكو مثله بالعالم كله

بالفعل كورنيشنا ...
لكن الاجانب خربوا علينا كل شي

[HAYA]

أستغرب من البعض ممن ينحرج من ضيوفه في دوحتنا الجميلة !!!!!...
ظروف قطـــر وبقية الخليج متشابهة تقريبا ، حتى في بقية الدول الخليجية السياحة عادة ما تكون في المجمعات والفنادق والأسواق الشعبية ..ونحن ضيوفنا غالبا من السعودية والبحرين ، وهم معجبون بقطرنا العزيزة لذا فهم يكررون زيارتها سنويا .
ولدينا الكثير من الأشياء التي ننفرد بها ولكننا لا نعلم ، مثلا بالصدفة وأنا في المملكة الشقيقة عرفت بأنهم يفضلون شراء الساقو وطحين العيش والبلاليط أبو بطة من قطـــر بالإضافة للرهش الأبيض ( لحية الشايب ) والمنتوجات الإيرانية لدى محل الحلويات الإيرانية كالهردة السمراء والرمان المجفف .
لا تستهينوا بما لديكم ... فلدينا الخير الكثير ، ونحن محسودون على النعم الكثيرة التي من الله بها علينا .

[Chanel]

واقف أكثر شيءيعجبهم
فندق شرق
الكورنيش

[مستر قطر]

اكثر شي يعجبهم سيلين وخاصة هلايام وسوقف واقف واهم شي كرك النعيمي