شرايكم في حملة الهدى للحج والعمرة

[القناص]

إن شاء هالسنة بنروح مع حملة الهدى للحج والعمرة
بغيت إنطباع الي راحو مع هالحملة في الأعوام الماضية
1427-1428-1429. من حيث الخدمة - السكن في منى
المواصلات- الإداريين .

أدعو لنا بالتوفيق وإن شاء الله نشوفكم بعد الحج

[لطيف الروح]

الله يوفقك و الي معاك و حج مبرور و ذنب مغفور و اهم شي فكر في ادا مناسك الحج و استغل كل وقتك في العبادة و الذكر و خاصة في منى و عرفات وتذكر انك في اراضي مقدسه امام مالك الملك

[sara_qatar]

احسن حمله منظمه وايد

وراحه


ومكانهم مرتب وهادي ونضيف


وملتزمين بالمناسك ماراح تتلخبطوووون وياهم


حج مبرووور وذنب ممغفووور

[اعالي الجنان]

ماعليهم كلام حمله ممتازه وخدماتهم روعه الله يجزاهم خير

[إنتعاش]

تفضل اخوي

آراء الاعضاء لحج السنة الماضية 1429 هـ
http://qatarshares.com/vb/showthread.php?t=225353


وهذا ايضا موضوعنا لما قبل الحج لهذه السنة ..

http://qatarshares.com/vb/showthread.php?t=313902

عموما ً من خلال الآراء والمشاورات ستجد ان هنالك 3 حملات تقريبا تأخذ مديحا ً كبيرا ً
الفرقان والهدى وحاتم

وبقية الحملات ايضا فيها خير

لكن هالثلاث المذكورة هي اللي اكثر الناس تمدحها وجربتها


ومن باب الانصاف حملة الهدى تتميز طوال 5 سنوات ماضية بأن الشيخ نبيل العوضي من احد افراد الحملة
ليس فقط ياتي ليلقي محاضرة لا لا .. فكل الحملات تعمل وترتب ذلك ..
لكن الهدى من 5 سنوات والشيخ نبيل العوضي يحج معها وايضا الدكتور احمد الحمادي والدكتور يوسف عبيدان
فقد تكون ميزة للهدى لمحبي الشيخ نبيل العوضي والشيخ احمد الحمادي ليكونو معهم بنفس العماره وبنفس الاجواء والباصات

الله يوفقكم وييسر لكم اموركم ، اسأل الله عز وجل أن يتقبل منا ومنكم صالح الاعمال

[خالد_قطر]

أخوي ما عليهم كلام من أحسن الحملات

بس على فكرة الي يتشكون من الحملات على بالهم رايحين يصيفون مهب يحجون

[لله الحمد]

انا العام حجيت مع الاقصى .. واحسن حملة كانت ..


بس الهدى جابوا فتوى ان عادي المبيت في العزيزية

وفعلا كانوا يقعدون ليي الساعه 11 الليل في منى

وعقب يروحون العزيزية يباتون هناك ..

[مسكين]

دامك بعيد عن الأنصار فانت بخير

[روح الشمال]

روح وانت مقمض وعلى ضمانتي واسأل مجرب
انا الثلاث سنوات اللي مضت حجيتها والحمدلله ومرة حجيت معاهم بصراحة مايحتاي ارقد وآمن كل شي مرتب سواء لك او حق عائلة لاتشيل هم

وحج مبرور وذنباً مغفور بأذن الله

ولا تنسانا بالدعاء

[أبوبروك]

انا حجيت مع حملة الركن الخامس وكانت من احسن الحملات وهذا الكلام مو من العام بس الا من كم سنه وهم ياخذون درجة الامتياز في خدمة الحجاج
\تحياتي

[سوق واقف]

أخوي إنتعاش ما قصر

نعم حملة ممتازة

[الطيبة كلها]

انا بعد باروح بنفس الحمله الكل يمدحهم والغرف حطوا صور لها واسعه وشرحه ويقولون عندهم مفاجأه لنا بتميزهم عن كل الحملات مافيني صبر ابغي اعرفها

[المتضرعه لله]

رحت معهم من ست سنوات

بيض الله وجهه

ماوجدنا شي نعيبه كل شي فوق الممتاز خدمة خمسة نجوم مواصلات حتى وانت ترمي الجمرات الناس يشتكون وانت بمجموعه ترمي وكنه العيد

توكلي على الله واختيار موفق

[المشط]

حجيت معاهم العام حمله ممتازه ومرتبه وبيض الله وجيهم وربي يشهد انهم ما قصرو

[مزايين]

بالنسبة لي أحسن حملة

حجيت معاهم مرتين وكل مرة يكونون أحسن بعد من اللي قبلها

ناس محترمين ومتعاونين الى آخر درجة ويوفرون لك كل اللي تحتاجه وعلى أعلى مستوى

[القناص]

شاكر لجميع من صوت في الإستطلاع
ومن شارك في الموضوع
الله يجزاكم كل خير

[أم وضحى]

حجيت معاهم قبل 12 سنه :nice:


ماشاء الله عليهم متعاونيين وفوق الممتاز بعد ..


حج مبرور ان شاء الله

[العلم الوكاد]

يستاهلون

من افضل الحملات

الله يوفقهم لخدمة زوار بيت الله

[سحر الليالي]

نظام ترتيب وماعليها كلامولا قصور
العام كنت فيها بصراحه روووعه مالقيت عيب فيهاا

[معيذر جنوب]

تم التصويت
بالتوفيق يالقناص