موضوع للنقاش .. إنتشار ظاهرة ( البخشيش ) في محلات الحلاقه في قطر ظاهرة تحتاج للمحاربه

[بو ناصـ ـر]

السلام عليكم ورحمة الله وبركاته ..
وكل عام والجميع بألف خير وتقبل الله منا ومنكم صالح الأعمل ونقول للحجاج تقبل الله طاعتكم ..

=======================

الحقيقه أنا من سنين ما دخلت المنتدى .. وما جعلني أدخله اليوم هو رغبتي في توصيل هذه الرساله ( بحكم أن المنتدى يعتبر الأول في قطر .. وكثير من أصحاب الرأي والقرار يرتادونه ) وكذلك لوجود عقول نيره هنا بالمنتدى تبارك الرحمن ..

الموضوع كما هو واضح في العنوان ( ظاهرة التبخشش ) اللي اصبح يتعبها غالبية مرتادي محلات الحلاقه ( وبالتحديد الحلاقين الأتراك )
-هي ظاهر للأسف بدأت تتضح منذ سنتين وأكثر .. وهي أنا اسميها ظاهرة الجيل الجديد ..!
لأن من ابتكرها هم للأسف شباب الجيل الحالي ..! وبعض من الذين أنعم الله عليهم والتجاره ضربت معاه بشكل جيد ..

-نلاقي الشباب يدخل الواحد منهم الحلاق .. يحلق لحيته بـ ( 20 ريال ) اغلب الحلاليق بهالسعر صاروا .. يعطي الحلاق 100 ريال .. ويقوله خل الباقي عشانك ..! يعني بخشيش أغلى من سعر الخدمه المقدمه ..!

أولا ً : ما السبب في إعطاء الحلاق بخشيش .. ؟
قد يقول قائل .. 20 ريال سعر زهيد .. !! سعر زهيد بالنسبه لك .. بالنسبة له والبلد اللي هو جاي منها وبيرجع لها .. يعتبر سعر مناسب له .. وإلا كان هو بنفسه حط سعر أعلى من هذا .. <<< علما ً أن سابقا ً اللحيه كانت بــ 10 و 15 ولكن لأنتشار ظاهرة البخشيش ساهم ذاك بشكل مباشر في رفع السعر لأن الحلاق يشوف والله الشعب جالس يبخششني .. يعني هم وكأنهم يقولون لي يا ( الخداي ) السعر اللي انت حاطه اشوي ..!!

ثانيا ً : هذه خدمه هو يقدمها لك .. وياخذ أجر ( فلوس ) منك وأغلب الحلاليق تلاقي لستة الأسعار معلقه وواضحه .. فطيب ليش البخشيش .. اللي تحول وكأنه اصبح جزء من السعر .. لا يمكن أن يتم إغفاله من قبل الحلاق نفسه ..!

-هل هي عملية مفاشره ..! كسب رضى الحلاق ..! وإلا إيش بالضبط ..؟!
طيب معليش بخشش ولكن فكر في المردود السلبي لها بعد فترة ..!
بدأها شخص .. ثم آخر .. ثم آخر .. والآن أصبحت ظاهره .. لدرجة تروح الحلاق مره .. ومرتين .. وثلاث .. وما تعطيه بخشيش .. تلاقي المرات اللي بعدها يطنشك .. ولا يحلق لك .. يتهرب منك .. أو يحلق لك بدون نفس .. وهذه حقيقه .. لأنه يشوفك ما جالس تبخششه مثل الغير ..

قد يقول قائل .. يا أخي هذا كرم ..!!

يرد المنطق ويقول : طيب ليش بعد لما نروح مثلا ً وكالات السيارات ونطلع سيارة جديده سعرها بــ 200 ألف ليش ما نعطي الشركه ونتبرع لها بــ 10 آلاف ريال .. بخشيش ..!
وقس على ذلك أمور كثيره .. نروح مثلا ً نشترك في Gym ( صالة رياضية ) ونعطيهم بخشيش فوق السعر .. نروح بعد للطيران نحجز عشان نسافر .. ونعطيهم بخشيش فوق السعر اللي هم حاطينه .. نروح بعد الخياط نفصل ونعطيه بخشيش فوق السعر ...

أليس هذا كرم أيضا ً ...!

ثالثا ً : قد يقول قائل .. يا أخي أنا أبخششه عشان يحلق لي عدل ..!!
منطق غريب .. الحلاق فاتح محله في الأساس عشان يحلق لك عدل .. مو غلط ..!
لأنها إحدى طرق التسويق .. عشان تكسب زبائن لازم تعطي منتج جيد .. وهكذا .. في كل مجال .. فإذا هو بيحلق لك غلط .. هو الخسران في النهاية مو انت .. وإذا كل واحد فينا راح ينظر للأمور بمنظور ضيق .. ويقول أنا ببخششه عشان يحلق لي عدل .. بكره عيد وأخاف يخرب لي ويهي ..! على الدنيا السلام ساعتها .. معناتها نمشي بهالمبدأ في كل مجال ..!

===================

للأسف الظاهره لم تقف فقط عند محلات الحلاقه التركيه .. أيضا ً لمرتادي مثلا ً ( كرك النعيمي ) .. نفس الشي الشباب الله يصلحهم صايرين نفس سالفة الحلاقه .. يطلب مثلا ً كوب كرك .. طبعا ً الكوب بــ ريال واحد .. يعطي الهندي 10 ريال ويقوله خل الباقي عشانك .. أنا ما أدري بصراحه هل هو كرم .. أم عطف .. أم هي مسألة كسل مو قادر ينتظر الهندي يروح ويجيب لك الباقي ..!
ما أدري بصراحه .. والظاهره منتشره بشكل واضح .. جرب أخوي القاريء إذا انت انسان طبيعي وبالعاده ما تبخششهم .. جرب روح اطلب كرك .. وشوف الهندي هل يجيك وإلا يخليك تنتظر .. وشوف شخص آخر يبخششهم بالعاده .. شوفه كيف راح يركض له لما بس يشوفه من بعيد جاي ..!

طبعا ً أنا واحد ولله الحمد .. أصف الموتر وأنزل آخذ اللي أبيه وأحرك ..

====================

قد يقول قائل .. هذا شكله بخيل ..!!
القضيه ما هي قضية كرم أو بخل .. القضية أكبر من هذا الفكر الضيق .. الظاهره بدأت تنتشر بشكل كبير .. وأنا لا استبعد وصولها إلى حقول كثيره واكبر من مجرد حلاق أو معصرة .. وأن نتحول بعد سنوات كنسخه مطوره عن نظام البخششه في سوريا على سبيل المثال ..!
اللي من تدخل المطار وانت تبخشش ... وإلا عمرك ما راح تعدي ( دامك جاي من قـُطر خليجي معين ) .. فأنت تمثل بنك متنقل بالنسبة لهم ..!!!

والقضية الأكبر .. أننا صار لنا كم سنه نصرخ ونطالب الحكومه بتشكيل جهة لحماية المستهلك .. من تلاعب التجار .. في رفع الأسعار ..

واحنا للأسف اللي جالسين نضر بأنفسنا .. من خلال تصرفات البعض ..

لا تتصور عزيزي القاريء أنك لما تتعود تبخشش الحلاق أو المطعم .. أو أو أو الخ .. راح يكتفي .. لا .. ببساطه بيقول حق مدير المحل .. ترى 50 % من الشعب جالس يعطينا مبلغ فوق السعر اللي احنا حاطينه .. طيب ليش ما نرفع السعر ..

وقيسوا على ذلك حقول كثيرة ..
عصير المنجه سابقا ً في المعصرة بــ 2 ريال .. ثم شقح إلى 3 .. ثم 4 .. الآن وصل بــ 5
وبعض المعاصر أكثر .. هذا مثال فقط لحقل معين .. ترفع الأسعار فيه بدون سبب مباشر ..!

=======================

وللأسف الأخوه المقيمين ( بعقود عمل مثلا ً ) أو الزائرين .. يرون فينا كقطريين .. أن كل واحد فينا مليونير .. وان كل واحد فينا صاحب شركه .. هذه نظره حقيقيه هم ينظروها لنا .. البعض منهم يراها هكذا .. والبعض منهم عارف انها ليست حقيقه ولكن .. هو المستفيد ..!( رغم أن الراتب اللي يتقاضاه الموظف منهم في شركه أو مؤسسة أو إلخ - يعني بعقد عمل خارجي - أفضل من راتبك انت يالقطري في نفس المؤسسة أو الشركه وليس فقط ذلك .. أيضا ً يعطونه فله مدفوعة الأجار , سيارة . تأمين صحي , عياله يدرسون في مدارس خاصه مدفوعة الرسوم .. إلخ ..! ) وهذا ما يعرف بقانون الطبيعة .. المضحك المبكي <<< ما علينا :)

وللأسف نحن نساهم بتصرفاتنا في تكريس هذه المسأله الغير حقيقيه .. في عقل الغريب عن البلد ..!

انتشر أيضا ً قبل فتره في بعض محطات البترول .. أيدي عامله عربيه ( من بلد عربي معين )
لما تجي تصب بترول .. وهو عايش الجو .. وشايف أكثر من نسخه منا نحن القطريين وتصرفاتنا في المحلات .. إلخ .. ومسألة التبخشش .. إضافه إلى انه يسمعها من زملائه .. إلخ

فتلاقيه .. يجي يصب البترول وبعدين يجي يقول ( السعر كزا يا شيخ , السعر كزا سعدتك , السعر كزا يا باشا ) .. بطريقه وااااااااااضحه وضوح الشمس .. عطني بخشيش ..!!

والله من وراء القصد ..

[alrheeb2020]

فعلا ظاهره منتشره عندنا وخصوصا فالآونه الاخيره انتشرت بزود ..

ياليت في لجنه مخصصه اتوقفهم عند حدهم ..


المشكله محد يوقفهم عند حدهم ويردعهم ..

شنقول غير لا حول ولا قوة الا بالله !!

ويعطيك العافيه اخوي بوناصر

[eXpert*]

وفي نهاية المطاف ،، فئة قليلة تخرب على فئة كثيرة مع الأسف .

[غير البشر]

والله اول مره ادري :rolleyes2:

لان عندي حلاق ماغيره اروح عنده او يجيني احلق وبس

لكن البخشيش خبر جديد بالنسبه لي :nice:

[alrheeb2020]

والله اول مره ادري :rolleyes2:

لان عندي حلاق ماغيره اروح عنده او يجيني احلق وبس

لكن البخشيش خبر جديد بالنسبه لي :nice:

:secret:

البقشيش مب بس فالحلاقه :omg:

في كل شي بخشيش وفي كل مكان

[بلوتنيوم]

مشكلة مايضبط الحلاقة الا اذا خذ بخشيش
ومايتصل لي يقول المكان فاضي الا اذا خذ بخشيش
وما يجيب لي غرشة ماي الا اذا خذ بخشيش
واذا ماخذ
المرة الى بعدها ينتقم مني شر انتقام :omen2:
بس عاد 80 ريال بخشيش مرة وحدة :eek5:

[الشامخ]

تدري السبب من بعض الشباب اللي يبخششون وهم اللي مخربين ، بعضهم تسأله ليش تبخششهم يقول لك عشان أول ما أتصل على الحلاق يقول تعال على طول ، ومغاسل السيارات نفس الشي يبخششهم عشان ينظفون سيارته عدل. وبعضهم يقول يأخي مسكين فقير يكسر الخاطر

والحل ان الشباب مايبخششوننهم.

وانا معاك الظاهرة انتشرت كثيراً حتى وصلت في الفراش اللي في الشغل لما تبخششه شوف الخدمة 5 نجوم

الله المستعان

[المتألم]

لا أدفع بخشيشا لأحد

لأن هذا يعوده على أن لا يجيد عمله إلا بالبخشيش

بل زد على هذا يصبح تعامله وقحا لو لم تعطه البخشيش وهذا
ليس له معنى إلا قلة الأدب معك وتسفيهك وتحقيرك ..

ولهذا أعطي من أريد أن أعطيه برغبة مني وخصوصا أؤلئك الذين يستحقون
حسب ما أرى

كباقي الخرده في محطة البترول << مساكين من شم البترول مهب صاحيين ..

وبعض الأماكن الأخرى وأعتبرها صدقة ..

كنت ممن يعطون بخشيشا في الكوفي شوبات ولكنني توقفت عن هذا

لأن السبب الأساسي يصبح الإحراج أكثر منه الرغبه ولهذا توقفت حقيقة وبلا خجل

بخلاف أنهم يحسمون مبلغا كضريبة خدمه
والسبب الحقيقي أنهم لا يستحقون الصدقه لأن هناك من يستحقها أكثر منهم

ولهذا لا أعطيهم وأحاول جاهدا أيضا أن لا أبقي بعض الخرده ولو ربع ريال
عند كاونترات الجمعيات لأنها تربح أكثر مننا والكرم لا يكون على من لا يستحق
بل على من يستحق وإلا فإنه يصبح سفها

ومن يبخشش على هؤلاء أعتبره سفيها أو ضعيف الشخصيه
يدفعه خجلا وخوفا من أن تلتصق به صفة البخل وغيرها من الصفات التي لا تناسب الموقف
ولكنها شأن من شؤون الغباء الإجتماعي ..

[doha1]

وفي نهاية المطاف ،، فئة قليلة تخرب على فئة كثيرة مع الأسف .

عشان كذا انا ابعد عن هالحلاليق

لان مافي رادع فالاساس

وكلام لوح في مسمار

الله كريم

[عبدالرحمن]

بيض الله وجهك يابو ناصر واشهد انك صادق في الكلام الي قلتة كلة وانا صارت معاي مواقف علمتني انهم اغلبهم مايستاهل نص ريال بخشيش بس سالفه يحلق ب20 ويعطيه 100 هذا شقح مستوى البطران صراحة
انا كنت اعطيهم فوق حقهم شي بسيط والوقت الي ماعندي خرده لهم اعطيهم مبلغهم الي طالبينه وبس تشوفة مب راضي وزعلان لانك عطيته حقه بس وكل شي ارتفع سعره واذكر انه الحلاق الي احلق عنده من اكثر من 10 سنوات كان يحلق اللحيه ب5 وعقب 10 وعقب 15 وبعدها 20 والحين 30 ومادري عقب كم بيوصل يمكن البعض يقول خلوه يولي وشوفه غيرة بس هذا يرسم التحديد رسم يعني نقدر نسميه فني حلاقه عشان هشكل تحصل اقبال عليه الله يعين ونتمنى تزول هالظاهرة الي طلعها لنا الجيل اليديد الله يهداه جيل صناعات قطر

[وطن]

ظاهرة غريبه الصراحة
فوق الـ 20 يعطيه 80 بخشيش !!
شدعوه

البخشيش عادة 10%
يعني على الـ 20 يعطيه ريالين او ازيد شوي
لكن فوق الدبل
قوية

الله يهديهم بس
بيخربون البلاد بهالحركات

[Realistic]

اكون صريح معاك اخوي .. انا من الناس الي يعطون "بخشيش"

لكن مب بالطريقه الي انت صورتها ..

يعني مثلا اذا رحت الحلاق وحلقت العارض والشعر وسويت بخار مثلا .. قول يطلع الحساب 90 .. فاقول حق الحلاق يخلي العشر له .. واكون ناوي فيها نية الصدقه

ومرات تكون عندي فلوس للصدقه .. فاعطيها الحلاق الي يحلقني .. واعطي باقي الحلاليق الي معاه فالمحل ..
فالاخير يعني هذيل ناس فقاره ومغتربين من بلادهم عشان الرزق .. فاتوقع انهم من الناس الي تستحق الصدقه


حتى في الكرك .. لما اخلي ريال وله ريالين وله حتى خمس للهندي .. فالقصد الصدقه مب انها بقشيش



واتوقع ان وايد من الشباب يكون قصدهم انها صدقه مب بخشيش

[العلم الوكاد]

انا احلق عند حلاق سعرة ثابت

ولا بخشيش ولا غيرة

وفعلا الفئة اللي ذكرتها تخرب على ناس

كثير...مع ان الاسعار يفترض انها ثابتة

وكل حلاق يكون عندة قائمة بالاسعار

[بو ناصـ ـر]

اكون صريح معاك اخوي .. انا من الناس الي يعطون "بخشيش"

لكن مب بالطريقه الي انت صورتها ..

يعني مثلا اذا رحت الحلاق وحلقت العارض والشعر وسويت بخار مثلا .. قول يطلع الحساب 90 .. فاقول حق الحلاق يخلي العشر له .. واكون ناوي فيها نية الصدقه

ومرات تكون عندي فلوس للصدقه .. فاعطيها الحلاق الي يحلقني .. واعطي باقي الحلاليق الي معاه فالمحل ..
فالاخير يعني هذيل ناس فقاره ومغتربين من بلادهم عشان الرزق .. فاتوقع انهم من الناس الي تستحق الصدقه


حتى في الكرك .. لما اخلي ريال وله ريالين وله حتى خمس للهندي .. فالقصد الصدقه مب انها بقشيش



واتوقع ان وايد من الشباب يكون قصدهم انها صدقه مب بخشيش

أولا ً شاكر ومقدر تفاعلكم شباب .. واسمحوا لي أعلق أولا ً على أخوي Realistic
وبعدين أرجع للبقيه تباعا ً .. متى ما سنحت لي الفرصه ..

أخوي صدقني كل الشباب اللي يبخششون نيتهم صادقه مثلك في نهايتها ..
لكن السؤال ليش نبخشش .. صدقه ..! يا جماعه هذا موظف لديه عمل .. وعمله هو مهنته .. يتكسب من ورائها .. فالصدقه لها أحكامها .. مانبي ندخل فيها لأنها ليست موضوعنا .. فلا نخلط الأمور .. هذا من ناحيه من ناحيه أخرى .. قلتها وأرد أكررها .. انت بنظرتك ترى أن السعر قليل وترى أنه فقير .. وأنه وأنه .. إلخ .. ولكن في المقابل السعر بالنسبه له هو زين .. لأنه هو مغترب جاي من برع .. والفلوس في ديرته وقوتها تختلف عن الديره هنا .. ولو أن هالسعر اللي ياخذه ( وهو محدده ) ما يفيده ما كان جا من الأساس ..
إذا المسأله بنقيسها بهذا المنطق .. إذاً معليش راح نمشي ونبخشش كل العالم ..
من ناحية أخرى .. قبل الواحد لا يقدم على أي عمل .. لازم يشوف توابعه .. فالنقطه هذي خلقت في المقابل أمور سلبيه كثيره .. منها :-

-رفع السعر .. لاحظ الحلاقين كانوا ع اللحيه ياخذون 10 .. بعدين صارت 15 وبعدين 20 في لمحة بصر .. ثم 25 و 30 وفي حلاليق أكثر ..
وهذه مسألة البخششه ساهمت فيها بشكل كبير ..

- أصبح الحلاق إذا ما تبخششه إذا ً انت شخص شاذ بين هالشعب .. إذا ً أنا ما راح أحلق لك عدل ..

ولاحظوا هالنقطه في مغاسل السيارات .. وأحد الأخوه هنا ذكرها بارك الله فيه .. نعم لاحظوها .. من كثرة البخششه .. صار العامل في المغسله إذا ما تبخششه يطالعك بنظره تقول وكأنك أكلت حلاله ..!
وما يغسلون سيارتك عدل إلا لو بتبخششهم .. وهذا كل جا من وين .. ؟
جاء من هذا الفكر .. اللي يقولك والله أنا نيتي بها صدقه .. وهذولي فقاره .. إلخ ..!

نيتك بها صدقه .. في مجالات كثيره للصدقه .. فهناك ناس ماهي لاقيه تاكل .. مش ما هي لاقيه شغل .. هذا ع الأقل عنده وظيفه .. ويستلم راتب .. وهو لو مش مرتاح جان ما قعد في البلد ..

النقطه هذي هي منبت للفساد .. لأن هذي تعتبر رشوه بطريقه أخرى .. أنت ترشيه عشان يضبط لك المسأله .. والمسأله مشكلتها أن الكل جالس يسويها .. أو الغالبيه .. فهنا الخطوره ..

أنا بضرب لك مثال عزيزي Realistic على مسألة أن هم مغتربين والفلوس اللي ياخذونها أشوي .. إلخ .. كنت اسولف مع هندي .. فيقولي انت القطريين شيوخ .. عندكم فلوس إلخ .. فالحقيقه ذبحني بكلامه لأنه جالس يعمم ..! وهذا للأسف فكر الغالبيه من المقيمين أو الزائرين .. قلت لحظه لحظه ..
ليش تشوفنا أن احنا أغنياء :-
1- قالي مثلا ً احنا نروح الخضار نشتري طماطتين .. تفاحتين .. موزتين .. القطريين يدشون ياخذون صندوق تفاح .. صندوق طمام إلخ ..

قلت ممتاز .. بعد .. قالي نفس الشي الجمعيه .. السوق .. إلخ
قلت له ممتاز ..

أنت لما تروح تشتري تفاحتين .. تشتريهم حق منه .. كم واحد عندك في البيت مسؤول انت عنه .. ؟ قالي أنا بس .. قلت ممتاز .. احنا كقطريين .. تدري كم واحد في البيت .. يعني انت لما تشوف الأب أو الأم تدش الجمعيه وتشتري أو الخضار .. هي ما جالسه تشتري لنفسها بس .. عندها في البيت قطاوه ما شاء الله :shy: أحنا الأسره الوحده تلاقي فيها 8 أشخاص ..

فلا تعتقد أن بهالطريقه احنا مليونيريه .. وما عندنا مشاكل ماديه ..
قالي زين انتوا ما شاء الله كل قطري عنده سياره .. قلت طيب السياره جايته هديه ..!
السياره هو شاريها .. عن طريق بنك .. يعني سلفه جالسه يسددها .. ولي جا بيتزوج المهر وتاكليف الزواج تقص ظهره .. انتوا في الهند العروس تدفع لكم .. جلس يضحك ..
وبتدأ يتفهم الوضع .. قال بس لأن الناس كلها تقول .. نفر قطري كلش في فلوس ..

قلت له الفلوس اللي عندنا وفي نظركم وايد .. هي بالنسبه لطبيعة عيشتنا ما تساوي شي ..

فالشاهد هنا .. لا نحكم ع الأمور من منظورنا فقط .. كل بلد ولها طبيعتها وتكاليفها ..
فالخادم عندك اللي يستلم 1000 .. انت تشوفها أشوي .. تطلع معاه في ديرته تشيخه هالــ 1000 اللي انت تشوفها اشوي بنظرك ..

[السامـي]

حلاقة مع التنظيف خمستعش+خمسة أكرامية،المجموع عشرين أسبوعياً.
ويا سلام.:)

[The MooN]

تسلم ايدك اخي بوناصر
وتسلم انك فتحت الموضوع
والشباب اللي ردو عالموضوع او ما ردو واكتفو بالقراءة لازم يتخذو هم الاجراءات المناسبة وما ينتظرو شي لجنة لتراقب الحلاقين والبياعين وال........................ الخ

لأنو هاد الموضوع لو كبر سيندم الكل ويتحسف عالأيام اللي كانت وقت لا يفيد الندم
رح اذكر مثال تدمع عيناي له بس شي ولا بد منه وعلى سبيل المثال لا الحصر
عندما تذهب لـ سوريا:
تبدأ المعاناة من وطأة قدمك للمطار، من الزبال (اسفة عالتعبير) يريد بخشيش لأنو مسح الطريق امامك خطوتين مرورا بأمن المطار لأنو قالك الحمد لله عالسلامة وهلم جرة :(
ناهيك عن سواق التاكسي الميكرو البياع بالشارع وبالأسواق والجرسونات بالمطاعم والحلاقين والمكوجية و و و و و و و :(
هذا نقطة في بحر ولا تتهاونو بالموضوع يا جماعة رجاءا
الله سبحانه وتعالى خلق الدنيا والناس مستويات وخلق عندنا الشعور بالرضا
كل واحد عندو شغلتو وواجب عليه ان يتقنها ويقوم بها على اكمل وجه ورضيان فيها ، لا تخربو هي الموازين من فضلكم
بين الكرم والاسراف شعرة فلنحافظ عليها
واسفة على الاطالة :)

[الموضوعي]

كلام صحيح المشكله بعض الجيل الجديد خاصه اللي شغالين عساكر وتلقاه حتى مابلغ سن الرشد عنده اهتزاز في الشخصيه والبخشيش احدى الوسائل اللي يثبت رجولته فيه

[بوخالد911]

السعر هو 15 ريالا قطريا


لا بخشيش ولا تشييش

[بو ناصـ ـر]

فعلا ظاهره منتشره عندنا وخصوصا فالآونه الاخيره انتشرت بزود ..

ياليت في لجنه مخصصه اتوقفهم عند حدهم ..


المشكله محد يوقفهم عند حدهم ويردعهم ..

شنقول غير لا حول ولا قوة الا بالله !!

ويعطيك العافيه اخوي بوناصر

ربي يعافيك أخوي .. شاكر مرورك وتفاعلك .. وترى المسأله ما هي محتاجه لا قانون ولا رادع .. لأن العيب فينا وليس في الحلاقين .. عيالنا وشبابنا جالسين يبخششونهم بدون معنى ..!



وفي نهاية المطاف ،، فئة قليلة تخرب على فئة كثيرة مع الأسف .

يا هلا فيك أخوي .. للأسف الفئه لم تعد قليله بل أصبح نصف الشباب يبخششون ..
البعض لما تكلمه يقولك .. يا أخي اعتبرها صدقه ..!
وهو في الأساس ما أعطاها الشخص إلا عشان يحلقه بضمير .. يعني رشوه ولكن مغلفه ..!!


والله اول مره ادري :rolleyes2:

لان عندي حلاق ماغيره اروح عنده او يجيني احلق وبس

لكن البخشيش خبر جديد بالنسبه لي :nice:

الله يديمه معاك .. يجيك البيت بعد وبدون بخشيش .. من جد الله يديمه معاك ..
يمكن لأنك تحلق في البيت .. عشان جي ما سمعت بالأمر .. رغم أنه منتشر قبل واكثر من فايروس h1n1


مشكلة مايضبط الحلاقة الا اذا خذ بخشيش
ومايتصل لي يقول المكان فاضي الا اذا خذ بخشيش
وما يجيب لي غرشة ماي الا اذا خذ بخشيش
واذا ماخذ
المرة الى بعدها ينتقم مني شر انتقام :omen2:
بس عاد 80 ريال بخشيش مرة وحدة :eek5:

عزيزي الحلاق ما تغرب من وجا هني إلا عشان يلاقي له عمل مناسب ومردود مادي مناسب .. وهو يعلم تماما ً أن ما راح يحصل هالشي إلا إذا تميز في عمله .. لأن عدم تميزه يعني عدم استمراره في العمل اللي حصل عليه .. وهذي قاعدة العمل .. في كل مجال .. تسويق .. فأنت عندما تتميز بعملك فأنت تسوق لنفسك وللمنتج اللي تقدمه .. فبالطبيعي هو راح يحلقكك عدل .. ولكن احنا نخربهم ونحولهم لمسألة البخشيش .. بعطيك بس ضبطني ..!
يعني كأنه هو في باديء الأمر ما كان راح يضبطك ..!!
أما مسألة النقاط الأخرى اللي ذكرتها ( غرشة الماي , الإتصال .. ) .. فلا تعليق عليها ..!


تدري السبب من بعض الشباب اللي يبخششون وهم اللي مخربين ، بعضهم تسأله ليش تبخششهم يقول لك عشان أول ما أتصل على الحلاق يقول تعال على طول ، ومغاسل السيارات نفس الشي يبخششهم عشان ينظفون سيارته عدل. وبعضهم يقول يأخي مسكين فقير يكسر الخاطر

والحل ان الشباب مايبخششوننهم.

وانا معاك الظاهرة انتشرت كثيراً حتى وصلت في الفراش اللي في الشغل لما تبخششه شوف الخدمة 5 نجوم

الله المستعان

صدقت والله والله أخوي .. حتى في المغاسل , العمل .. للأسف في مجموعة من الناس .. فكرها غريب .. تمشي على مبدأ بخشش بتحصل خدمة زينه ..!
وما ينظرون لعواقبها .. عندما يتعود الشخص اللي تبخششه على هالنقطه ..



لا أدفع بخشيشا لأحد

لأن هذا يعوده على أن لا يجيد عمله إلا بالبخشيش

بل زد على هذا يصبح تعامله وقحا لو لم تعطه البخشيش وهذا
ليس له معنى إلا قلة الأدب معك وتسفيهك وتحقيرك ..

..

اسمح لي عزيزي بتلوين ما خطته اناملك .. وهذا هو لب الأمر .. واتفق معك 100%
وللأسف اللي يبخششون .. غير واعين للأمر .. كل همه نفسه .. !! إن جاز لي التعبير أنانيه بصورة غباء ..!

[بو ناصـ ـر]

ظاهرة غريبه الصراحة
فوق الـ 20 يعطيه 80 بخشيش !!
شدعوه

البخشيش عادة 10%
يعني على الـ 20 يعطيه ريالين او ازيد شوي
لكن فوق الدبل
قوية

الله يهديهم بس
بيخربون البلاد بهالحركات

لو أقولك مواقف صارت قدامي .. تحط إيدك على راسك .. 80% بخشيش .. هاي موقف بسيط يعتبر من ضمن المواقف الكثيره .. خلني ساكت بس .. هذا مثال فقط .. عشان ما أعور قلوبكم



بيض الله وجهك يابو ناصر واشهد انك صادق في الكلام الي قلتة كلة وانا صارت معاي مواقف علمتني انهم اغلبهم مايستاهل نص ريال بخشيش بس سالفه يحلق ب20 ويعطيه 100 هذا شقح مستوى البطران صراحة
انا كنت اعطيهم فوق حقهم شي بسيط والوقت الي ماعندي خرده لهم اعطيهم مبلغهم الي طالبينه وبس تشوفة مب راضي وزعلان لانك عطيته حقه بس وكل شي ارتفع سعره واذكر انه الحلاق الي احلق عنده من اكثر من 10 سنوات كان يحلق اللحيه ب5 وعقب 10 وعقب 15 وبعدها 20 والحين 30 ومادري عقب كم بيوصل يمكن البعض يقول خلوه يولي وشوفه غيرة بس هذا يرسم التحديد رسم يعني نقدر نسميه فني حلاقه عشان هشكل تحصل اقبال عليه الله يعين ونتمنى تزول هالظاهرة الي طلعها لنا الجيل اليديد الله يهداه جيل صناعات قطر

وجهك أبيض وانا اخوك .. وفي تصوري الحلاق انت تقدر تخليه يضبط حلاقتك .. من خلال الملاحظات اللي تقولها لأ .. مثلا ً لا والله نزل هالجهه أشوي .. لا هني سو السكسوكه أشوي دائريه .. وهلم جرا .. وأكيد في النهايه حلاق عن حلاق يفرق .. هذي أمور طبيعيه .. فأختلاف البشر طبيعي ..


انا احلق عند حلاق سعرة ثابت

ولا بخشيش ولا غيرة

وفعلا الفئة اللي ذكرتها تخرب على ناس

كثير...مع ان الاسعار يفترض انها ثابتة

وكل حلاق يكون عندة قائمة بالاسعار

تعجبني ..


حلاقة مع التنظيف خمستعش+خمسة أكرامية،المجموع عشرين أسبوعياً.
ويا سلام.:)

السؤال عزيزي .. الإكراميه .. وش هدفها ..؟!
في النهايه هي رساله له تقوله .. عشان المره الجايه لي جيتك تضبطني .. نفس الشي ما عملنا شي .. هو حاط لك السعر 15 يال .. طيب الإكراميه هذي ليش .. يعني انت جالس تقوله تراك أنت يا حلاق ( لوح ) ما تعرف تسعر خدمتك ..!
هو حاط لك السعر .. الإكراميه عشان شنو .. هو لو واحد يسويها , اثنين فقط .. المسأله تهون .. إنما العملية صارت عاده - ظاااااااااااااااااهره - الكل جالس يتعبها .. وهذي الطامه .. يا جماعه فكروا في عواقبها بعدين .. ونتائجها السلبيه لما يتعود كل عامل , موظف , أيا ً كانت الخدمه اللي يقدمها للجمهور .. لما يتعود على شي إسمه بخشيش ( إكراميه ) كلها مثل بعض عنبر أخو بلال ..


تسلم ايدك اخي بوناصر
وتسلم انك فتحت الموضوع
والشباب اللي ردو عالموضوع او ما ردو واكتفو بالقراءة لازم يتخذو هم الاجراءات المناسبة وما ينتظرو شي لجنة لتراقب الحلاقين والبياعين وال........................ الخ

لأنو هاد الموضوع لو كبر سيندم الكل ويتحسف عالأيام اللي كانت وقت لا يفيد الندم
رح اذكر مثال تدمع عيناي له بس شي ولا بد منه وعلى سبيل المثال لا الحصر
عندما تذهب لـ سوريا:
تبدأ المعاناة من وطأة قدمك للمطار، من الزبال (اسفة عالتعبير) يريد بخشيش لأنو مسح الطريق امامك خطوتين مرورا بأمن المطار لأنو قالك الحمد لله عالسلامة وهلم جرة :(
ناهيك عن سواق التاكسي الميكرو البياع بالشارع وبالأسواق والجرسونات بالمطاعم والحلاقين والمكوجية و و و و و و و :(
هذا نقطة في بحر ولا تتهاونو بالموضوع يا جماعة رجاءا
الله سبحانه وتعالى خلق الدنيا والناس مستويات وخلق عندنا الشعور بالرضا
كل واحد عندو شغلتو وواجب عليه ان يتقنها ويقوم بها على اكمل وجه ورضيان فيها ، لا تخربو هي الموازين من فضلكم
بين الكرم والاسراف شعرة فلنحافظ عليها
واسفة على الاطالة :)

لن أزيد على كلامك عزيزي .. فأنت ضربت كبد الحقيقه .. وهذا اللي أبي الكل يستوعبه ..
بارك الله فيك

[امل الحب]

:(

موضوعك في وقته ..

امس كان عندي مناسبة ومتصلة وماخذه موعد ومتصلة امس قبل لااطلع ااكد الموعد قالت لي كل شي اوكي :( وصلت قبل موعدي بربع ساعة فجأة دخلت ودخلت وحدة وقالت لها تبي وتبي وتبي موضوع ساعة ونص :rolleyes2: قلت لها انا ماخذة موعد :weeping: طلعت 200 ريال وعطتها قالت لها هااي لج :weeping: كلمت الادارة وقلت لهم .. قالت شنسوي لج يعني نطرد الزبونة .. :eek5: قلت لها لا تعبين نفسج ولاتزعلين موظفاتج .. وقالت لي لاتزعلين بنخلصج بس عقب ساعة ونص وقعدي .. قهرتني :anger1: قلت لها سكري حلجج لان لو كثرتيها يمكن تشوفين الي مايسرج انتي وياها وانا طالعة :weeping:

200 ريال عشان تطوفين موعد والموعد ماخذته قبل 3 ايام عشان مالقى لي حجج او اعذار او تقول انها مب فاضية :weeping:واخرتها ولانفع الموعد ولا شي .. تبي الصج احترق دمي ..

وصلنا للمستوى هذا نقط الفلوس قط وبهالمبالغ عشان تخلصني قبل !!!.. غير مبلغ الخدمة الي بيندفع .. فتحوا لنا ابواب مسكرة .. :rolleyes2:

[Bin Hood]

اخوي موضوووووعك وااااااايد حلو واسلوبك احلى

شخصيا كنت اروح حلاق والحلاقة بـ 500 فلس ( 5 ريال ) , مرة عجبتني حلاقته عطيته 500 فلس زيادة ( شعنده حاتم الطائي ) , بعدين الحلاق تعود عليها بس حلاقته ما تعجبني !!! فغيرت الحلاق ولليوم ما قط عطيته بخشيش ولو اني مرات افكر .

[هذلان]

السلام عليكم ورحمه الله و بركاته

ياشيخ موضوعك مهم و في خاطري انزل الموضوع من فتره بكل امانه .
غير البخشيش فيه امور اخرى .

خل نتكلم في البخشيش اولا .
للامور الي الواحد يعجب منها تسمع عن حلاق مشهور و تروح له ماتلقى في محله اي شي من مقومات الحلاق الناجح
مثلا حلاق صغير من داخل قمه القذاره ولا حلق لك الحلاق شميت ريحته تجيب المرض و المصيبه وهو يحلق تجيه اتصلات و يوقف حلاقه و يرد على المتصل و المصيبه الحقيقيه اني والله سمع اذني كلمه شخص عميل و كان يتغشمر و يسبه سب في العرض و الشرف و الي يقهر زياده و اعتبرها استخفاف بالعقل يقولك حلاق فنان اصلا هذا حلاق الشيخ الفلاني :omen2:
و هو ماشاف الشيخ ولا يدري عنه واحد من ربعي كان صديق مقرب للشيخ المذكور و سالته قالي ولا مره شفت هالحلاق عنده بالعكس عنده حلاق خاص على كفالته .
كل هذا مقابل ايش . يحلق لي عدل ؟؟ ياخي هذا شعر بعد اسبوع راح تحتاج تحلق مره ثانيه .
فيه حلاق كان سابقا في سوق واقف اعتقد كثيرين يعرفونه تصدقون انه شخص حلق عنده و بعد ماخلص قط ٥٠٠ ريال على الطاوله و طلع ؟؟
و تدرون ان هالحلاق صار له فتره طويله من هدمو المحلات يعني الـ ٥٠٠ كانت في ذاك الوقت مبلغ وقدره .
من الاشياء الي سمعتها في حديث مع مجموعه من الشباب حول نفس الموضوع انه حلاق تركي يسولف مع واحد من ربعي بتفاخر عن علاقته مع الشباب القطريين وانه يروح ويجي معاهم لدرجه انه قاله تصدق انه الاندر وير الي انا لابسه الحين هديه من عند واحد من زبايني (اجلكم الله)
و انا عندي صديقه قطريه .. ياشيخ مافيه حميه على بنت بلادك على الاقل انهر الحلاق بس شكل عشان يخاف و مايذكر هالسوالف عند كل احد .
هالكلام يمسنا كلنا و اكيد ينعكس بالتعامل علي وعليكم و على اهل قطر كلهم ولا توقعون شالفكره الي ماخذينها عنا .
ترى الغلط فينا للاسف .

هل معقوله وصلت التفاهه و اللدرجه هذي .
وانا و اعوذ بالله على يقين ان ماخفي اعظم فيما يخص الحلاقين .

و السموحه على الاطاله و ماذكرت ، انا مقهور من هالموضوع و بفضل الله متى ما احتجت احلق صفيت عند اقرب حلاق و علمته شيسوي و مشيت . ولا خلط خير يا طير الاسبوع الي وراه بعدله .

[بوخالد911]

للعلم



للحين في حلاليق ياخذون عشر ريال بس للحية

[..الاميرة..]

للأسف دائماً الخراب منا وفينا إحنا إلي نجيب لنفسنا الغلا بطرق غير مباشره ..

وحتى الصوالين النسائية فيها نفس الفكره عاد تعال شوف اسعارهم الحين اصبحت لا تعقل بصراحه وعلى اشياء بسيطه جداً ..

وإذا السالفه سالفة انه مسكين وفقير ومستحق ترى عندك الفقير إلي تصادفه في الشارع

او الكناس إلي تصادفه عند الاشاره او الحمال إلي في سوق واقف هم احق بالبغشيش وتلقى من وراه اجر ..

بدال ما تعطيه لموظف الحلاقه أو الصالون وإلي يكون المقصد من وراه اعطيك تعطيني خدمه افضل ..

[abn qatar]

صارت معاي من فتره حلقت عطيته 20 ريال استغرب طلب مني 100 قلت له شنو 100

قلت له ماتبغي اعشرين رجعها سكت واخذها

[حمد]

الاتراك ... لوبي في قطر .. لهم اتفقياتهم مع بعضهم .... على مستوى المطاعم ... والحلاليق .... والله اعلم بالخافي

لاحظوا ارتفاع الاسعار في المطاعم التركية .... والحلاليق ..... كلهم يرفعون مع بعض ... في وقت واحد

واضح جدا ان هناك اتفاق

صراحة هذه الجنسية بالذات مابخششها لو ايش

انتظروا قصتي مع عامل باحد اشهر المطاعم التركية في قطر.... واستهزائة بكسل القطريين

[dammaj77]

لاتعود نفسك تعطي بخشيش ولا بعدين يصير داء ما له علاج بنفسك (تصير شيخ على حساب راحتك)

عود نفسك عدم التحدث مع الحلاق لو تودد لك بالحديث كثيرا لو استدرجك للحديث (لو انت من الشخصيات الخجوله او ضعيف الشخصيه)

اطلب منه القصه للشعر او تضبيط العارض او الشنب فقط
للغرض الذي جئت من اجله واسئله مسبقا عن السعر بالبدايه ولاتخجل منه لو اول مره تزور المحل

كذا انت ارتحت نفسيا وفكريا :)

[BuNooR]

يرد المنطق ويقول : طيب ليش بعد لما نروح مثلا ً وكالات السيارات ونطلع سيارة جديده سعرها بــ 200 ألف ليش ما نعطي الشركه ونتبرع لها بــ 10 آلاف ريال .. بخشيش ..!
وقس على ذلك أمور كثيره .. نروح مثلا ً نشترك في gym ( صالة رياضية ) ونعطيهم بخشيش فوق السعر .. نروح بعد للطيران نحجز عشان نسافر .. ونعطيهم بخشيش فوق السعر اللي هم حاطينه .. نروح بعد الخياط نفصل ونعطيه بخشيش فوق السعر ...

أليس هذا كرم أيضا ً ...!



اخي العزيز في فرق بين الخدمه والسلعه

انت تجازيه على حرفه امتهنها واعجبتك ولو ما اعجبتك ما كنت بتعطيه ريال زياده

[احساس غريب]

الصراحه موضوعك ف وقته انا امس كنت ف حلاق طيبه ميلانو وفيه نيبالي متين نقعني تقريبا نص ساعه من عقب ماخلص قلتله حلقني قالي في نفر يجي يسوي تلفون ومن حظي ان اللي متصله واحد من الربع يقول هاي النيبالي يحلقك اذا تبخششه واذا ماتبخششه يقولك انا مافي معلوم قلت بنطر رفيجي لين خلص قلت ها يحلق قالي نفس كلام رفيجي المهم اني خليته يحلقني عقب قلتله كم؟؟ قالي 20 ريال قلتله ليش قال بابا انت شيخ عطيته 15 والله عقبها شقالي قالي بابا انت اول وين يحلق حلق مناك وبكل وقاحه وانا الصراحه قانوني وابي اتخذ معاه اجراء قانوني ياليت تعطوني طريقه ..

[سنطره]

حتى في مدرسة السواقة اذا عطيت بخشيش حق المدرب عشان يدرب دريولكم راح يهتم فية ويدربه زين وراح ايطلعة بالشارع وايد0000اما اذا ماعطيته والله مايدربونة زين ويطلعونة بالشارع اشوية والباقي داخل المدرسة وبعدها يسقط الدريول
وبعد حتى في صالونات النساء نفس سالفة الحلاق

[الـقـاسـي]

والله ياخوي انت قلت اللي فالخاطري .. انا صراحة تقهرني سالفة البخشيش هذي ..
صارت أسياسيه في كل مكان المشكله انا عجزت وانا اقول للربع غلط اللي تسوونه يقولون هذولا فقارى مساكين ..
والله انهم يعطون ناس وهم اغنى منهم ..
انا حلاقي احلق عنده من 10 سنين تقريبا من اول يوم حلقت فيه لين اليوم والله ماعطيته ريال زياده ويحلق لي عدل وكل اموري ماشيه اهما بيحاولون يطلعون منك البخشيش غصب بس المفروض احنا نطنش لهالموضوع ..

فيه ناس المشكله تحصله حافي منتف لكن يحب يهايط ..
مره كنت ويا واحد من الشباب في قهوه في سوق واقف والرجال اعرفه ديون لين راسه وعلى قد حاله وعقب مادفعنا الحساب وخلصنا قام يوزع على كل اللي يشتغلون فالقهوه اهما 9 يمكن كل واحد يعطيه 50 او 100 ريال قلت له ليش سويت كذا قال انا دايما متعود اسوي لهم كذا بس شوف اول ماجيهم يرتبون لي المكان ويجيبون الشيشه على طول ..
اللي استنتجته من كلامه انه انسان يحس بالنقص يكذب على نفسه انه البطران وراعي الملايين او يكذب على اللي يشتغلون هناك مب عارف بالضبط لكن بصراحة طاح من عيني ..
المشكله مش فالدوحه وبس في كل مكان صار البخشيش اللي يدفعه القطري اعلى من غيره ..
في سوريا مثلا كنت في الحدود ولما عطيته الجوازات وانا ادري انه يبي فلوس وحاط في بالي اني ما اعطيه شي ابدا قام يمدح ويقول انتو القطريين ومن هالكلام ويقول تصدق دايما القطريين كرماء اكثر من غيرهم يدفعون 5الاف او 10 الاف ليره
قلته له والسعوديين قال لا مايدفعون ولما سئلته عن الدول الخليجيه اكثرهم مايعطون واذا عطوا مبلغ بسيط اما القطريين معروفين بحب المهايط ..

اتمنى من هالفئه من الناس انها تعقل شوي ومايقعدون يهايطون ويضرونا احنا ..

[رنج سبورت]

بخشيش ليش !!!!

وايد عليه ال20 ريال اللي ياخذها لايكون بيصنع موتر !!

[رنج سبورت]

للعلم



للحين في حلاليق ياخذون عشر ريال بس للحية



وين مكانهم :nice:

[بوحارب]

بالنسبة لي البخشيش ماله اي موقع في حياتي

انه ابخشش نفسي بس

والحلاق صرت ماعرفة من 3 سنين والحمدلله

افتكيت من الحلاقين ومن يدهم الوصخة

ياخي ماتخيل نفسي احلق عند واحد يحلق ل 1000 واحد غيري

تعلموا الحلاقة في البيت تراها سهلللللللللة ^ ـ ^

[هذلان]

افتكيت من الحلاقين ومن يدهم الوصخة

ياخي ماتخيل نفسي احلق عند واحد يحلق ل 1000 واحد غيري

تعلموا الحلاقة في البيت تراها سهلللللللللة ^ ـ ^

كلامك صحيح لكن حاولت كذا مره اني احلق لعمري ماظبطت الموضوع كلش كلش و اخذ وقت طويل . لو فيه مكان يعلم الحلاقه رحت بدون تردد ولا تروح حلاق و تنطر مثلا او يكون حلاق مش نظيف

[بوحارب]

كلامك صحيح لكن حاولت كذا مره اني احلق لعمري ماظبطت الموضوع كلش كلش و اخذ وقت طويل . لو فيه مكان يعلم الحلاقه رحت بدون تردد ولا تروح حلاق و تنطر مثلا او يكون حلاق مش نظيف

هذلان يبه

تدرب على وجهك شوي

ترى اول الأيام بتسوي شوارع في وجهك

وعقب بتكون احسن من حلاق ريجنسي:victory:

انه كذا بديت والحين اعجبببببببببك

حتى ربعي كلهم ما يصدقون لما يشوفوني مرتب العارض يقولون لي انت جذاب ومحلق في الحلاق:(

[كاتم الاسرار]

الصراحه واااااايد عليهم 20 ريال
اول تحلق لحيتك وشعرك وتنظيف بعشرين واتزيد بعد اما الحين الله يعيييينا منهم كل بخشيش وبالحجز وكل شي ارتفع سعره

[السامـي]

السؤال عزيزي .. الإكراميه .. وش هدفها ..؟!
في النهايه هي رساله له تقوله .. عشان المره الجايه لي جيتك تضبطني .. نفس الشي ما عملنا شي .. هو حاط لك السعر 15 يال .. طيب الإكراميه هذي ليش .. يعني انت جالس تقوله تراك أنت يا حلاق ( لوح ) ما تعرف تسعر خدمتك ..!
هو حاط لك السعر .. الإكراميه عشان شنو .. هو لو واحد يسويها , اثنين فقط .. المسأله تهون .. إنما العملية صارت عاده - ظاااااااااااااااااهره - الكل جالس يتعبها .. وهذي الطامه .. يا جماعه فكروا في عواقبها بعدين .. ونتائجها السلبيه لما يتعود كل عامل , موظف , أيا ً كانت الخدمه اللي يقدمها للجمهور .. لما يتعود على شي إسمه بخشيش ( إكراميه ) كلها مثل بعض عنبر أخو بلال ..

الله يهداك يا بو ناصر،أنت هالحين شايف اللي حاط 80 ريال بخشيش والحلاقة بـ 20،
ومتكاثر الـ 5 ريال،وبعدين هو يتظاهر إنه أهتم زيادة بخدمتي:)،فأضطر أني أكرمه.

[امل الحب]

الصراحه موضوعك ف وقته انا امس كنت ف حلاق طيبه ميلانو وفيه نيبالي متين نقعني تقريبا نص ساعه من عقب ماخلص قلتله حلقني قالي في نفر يجي يسوي تلفون ومن حظي ان اللي متصله واحد من الربع يقول هاي النيبالي يحلقك اذا تبخششه واذا ماتبخششه يقولك انا مافي معلوم قلت بنطر رفيجي لين خلص قلت ها يحلق قالي نفس كلام رفيجي المهم اني خليته يحلقني عقب قلتله كم؟؟ قالي 20 ريال قلتله ليش قال بابا انت شيخ عطيته 15 والله عقبها شقالي قالي بابا انت اول وين يحلق حلق مناك وبكل وقاحه وانا الصراحه قانوني وابي اتخذ معاه اجراء قانوني ياليت تعطوني طريقه ..

ههههههههههههه والله قليل ادب .. جان خذت فلوسك وطلعت وقلت له بروح احلق هناك واعطيه فلوسه المرة الياية ..

[بو ناصـ ـر]

:(

موضوعك في وقته ..

امس كان عندي مناسبة ومتصلة وماخذه موعد ومتصلة امس قبل لااطلع ااكد الموعد قالت لي كل شي اوكي :( وصلت قبل موعدي بربع ساعة فجأة دخلت ودخلت وحدة وقالت لها تبي وتبي وتبي موضوع ساعة ونص :rolleyes2: قلت لها انا ماخذة موعد :weeping: طلعت 200 ريال وعطتها قالت لها هااي لج :weeping: كلمت الادارة وقلت لهم .. قالت شنسوي لج يعني نطرد الزبونة .. :eek5: قلت لها لا تعبين نفسج ولاتزعلين موظفاتج .. وقالت لي لاتزعلين بنخلصج بس عقب ساعة ونص وقعدي .. قهرتني :anger1: قلت لها سكري حلجج لان لو كثرتيها يمكن تشوفين الي مايسرج انتي وياها وانا طالعة :weeping:

200 ريال عشان تطوفين موعد والموعد ماخذته قبل 3 ايام عشان مالقى لي حجج او اعذار او تقول انها مب فاضية :weeping:واخرتها ولانفع الموعد ولا شي .. تبي الصج احترق دمي ..

وصلنا للمستوى هذا نقط الفلوس قط وبهالمبالغ عشان تخلصني قبل !!!.. غير مبلغ الخدمة الي بيندفع .. فتحوا لنا ابواب مسكرة .. :rolleyes2:

وهذا هو سبب من اسباب طرحي للموضوع .. لكشف خبايا هذا الظاهر .. وما خفي كان أعظم
لأن للأسف الناس ما هي قادره تستوعب مسألة الأثار السلبية اللي راح تنتج من اتباعهم لنظام البخششه أو كما يزينه البعض بإسم ( إكراميه ) .. والبعض يضعه تحت بند ( الصدقه ) ..!
والأمر في الأساس هو لتضبيط أموره ..!
وأتمنى من كل قلبي أن تتبنى الصحافة الموضوع .. ويتم مكاشفته وطرحه للعلن .. ويتم في توعية الشعب على أبعاد مثل هذه الأمور .. وأين ممكن أن نصل ساعتها لو استمر عليه الأمر ..

شكرا ً لج أختي على تفاعلج مع الموضوع ..


اخوي موضوووووعك وااااااايد حلو واسلوبك احلى

شخصيا كنت اروح حلاق والحلاقة بـ 500 فلس ( 5 ريال ) , مرة عجبتني حلاقته عطيته 500 فلس زيادة ( شعنده حاتم الطائي ) , بعدين الحلاق تعود عليها بس حلاقته ما تعجبني !!! فغيرت الحلاق ولليوم ما قط عطيته بخشيش ولو اني مرات افكر .

وجودكم وتفاعلكم مع الموضوع هو الأحلى عزيزي :shy:
وشيل فكرة انك تبخششه من باكل عشان ما يصيح البكس بيني وبينك :D


السلام عليكم ورحمه الله و بركاته

ياشيخ موضوعك مهم و في خاطري انزل الموضوع من فتره بكل امانه .
غير البخشيش فيه امور اخرى .

خل نتكلم في البخشيش اولا .
للامور الي الواحد يعجب منها تسمع عن حلاق مشهور و تروح له ماتلقى في محله اي شي من مقومات الحلاق الناجح
مثلا حلاق صغير من داخل قمه القذاره ولا حلق لك الحلاق شميت ريحته تجيب المرض و المصيبه وهو يحلق تجيه اتصلات و يوقف حلاقه و يرد على المتصل و المصيبه الحقيقيه اني والله سمع اذني كلمه شخص عميل و كان يتغشمر و يسبه سب في العرض و الشرف و الي يقهر زياده و اعتبرها استخفاف بالعقل يقولك حلاق فنان اصلا هذا حلاق الشيخ الفلاني :omen2:
و هو ماشاف الشيخ ولا يدري عنه واحد من ربعي كان صديق مقرب للشيخ المذكور و سالته قالي ولا مره شفت هالحلاق عنده بالعكس عنده حلاق خاص على كفالته .
كل هذا مقابل ايش . يحلق لي عدل ؟؟ ياخي هذا شعر بعد اسبوع راح تحتاج تحلق مره ثانيه .
فيه حلاق كان سابقا في سوق واقف اعتقد كثيرين يعرفونه تصدقون انه شخص حلق عنده و بعد ماخلص قط ٥٠٠ ريال على الطاوله و طلع ؟؟
و تدرون ان هالحلاق صار له فتره طويله من هدمو المحلات يعني الـ ٥٠٠ كانت في ذاك الوقت مبلغ وقدره .
من الاشياء الي سمعتها في حديث مع مجموعه من الشباب حول نفس الموضوع انه حلاق تركي يسولف مع واحد من ربعي بتفاخر عن علاقته مع الشباب القطريين وانه يروح ويجي معاهم لدرجه انه قاله تصدق انه الاندر وير الي انا لابسه الحين هديه من عند واحد من زبايني (اجلكم الله)
و انا عندي صديقه قطريه .. ياشيخ مافيه حميه على بنت بلادك على الاقل انهر الحلاق بس شكل عشان يخاف و مايذكر هالسوالف عند كل احد .
هالكلام يمسنا كلنا و اكيد ينعكس بالتعامل علي وعليكم و على اهل قطر كلهم ولا توقعون شالفكره الي ماخذينها عنا .
ترى الغلط فينا للاسف .

هل معقوله وصلت التفاهه و اللدرجه هذي .
وانا و اعوذ بالله على يقين ان ماخفي اعظم فيما يخص الحلاقين .

و السموحه على الاطاله و ماذكرت ، انا مقهور من هالموضوع و بفضل الله متى ما احتجت احلق صفيت عند اقرب حلاق و علمته شيسوي و مشيت . ولا خلط خير يا طير الاسبوع الي وراه بعدله .

يا هلا وغلا فيك أخوي .. شاكر لك تفاعلك مع الموضوع .. وكلام في محله ..

شباب كثار ما يكتفون بالخشيش كفلوس .. أيضا ً تصل الأمور إلى هدايا أو بلاش نمسيها هدايا عشان البعض ما يزعل .. إنما تكون كــ عطية .. يعني عندي جوال زيادة .. أروح أقطه ع الحلاق .. الغرض في النهاية ليس لأن زايد عندي .. لا .. الغرض هو أني أقوله بطريقه غير مباشرة ضبطني عدل .. يعني لي اتصلت فيك .. ضبط لي موعد زين بدون زحمه .. اهتم فيني .. إلخ هالأمور .. وهذا للأسف حاصل بكثرة .. وارد وأقول .. ما خفي كان أعظم ..!

وأنا عن نفسي عدتي معاي .. متى ما حسيت إني أبي أحلق وقفت عند أقرب حلاق نظيف .. وقلت يبه سو كذا وكذا .. وعطته حسابه وقلت له شكرا ً .. لا ابخششه عشان يضبطني وأدمر المجتمع على المدى البعيد ولا هم يحزنون


للعلم

للحين في حلاليق ياخذون عشر ريال بس للحية



أكيد فيه .. طبعا ً هاذولي الحلاقين الهنود , الباكستانيين .. خصوصا ً اللي في الفرجان القديمه



للأسف دائماً الخراب منا وفينا إحنا إلي نجيب لنفسنا الغلا بطرق غير مباشره ..

وحتى الصوالين النسائية فيها نفس الفكره عاد تعال شوف اسعارهم الحين اصبحت لا تعقل بصراحه وعلى اشياء بسيطه جداً ..

وإذا السالفه سالفة انه مسكين وفقير ومستحق ترى عندك الفقير إلي تصادفه في الشارع

او الكناس إلي تصادفه عند الاشاره او الحمال إلي في سوق واقف هم احق بالبغشيش وتلقى من وراه اجر ..

بدال ما تعطيه لموظف الحلاقه أو الصالون وإلي يكون المقصد من وراه اعطيك تعطيني خدمه افضل ..

مثال جميل أختي الأميره وفي محله تماما ً .. وبالفعل اللي يبي يتصدق في مجالات كثيره بإمكانه يضع صدقته فيها .. ما تكون وبال على المجتمع في المستقبل
لأن نظام البخشش والإكراميات .. راح يحول مجتمعنا بعد سنوات إلى شعب مرتشي .. ولنا عبرة في بعض الدول العربية الأخرى .. واللي يعاني فيها المواطن قبل الغريب من سألة تسليك أموره في حتى الدوائر الحكومية بالرشاوي .. واللي بدأت بمسمى ( إكرامية , بخشيش .. إلخ )
شاكر مشارتج الفعاله .
ومعضمنا زار هذه الدول وعانا الأمرين منذ دخوله المطار إلى خروجه من البلد ..


صارت معاي من فتره حلقت عطيته 20 ريال استغرب طلب مني 100 قلت له شنو 100

قلت له ماتبغي اعشرين رجعها سكت واخذها

خخخخخخخخخخخخخخ تعجبني :nice:

[بو ناصـ ـر]

انتظروا قصتي مع عامل باحد اشهر المطاعم التركية في قطر.... واستهزائة بكسل القطريين

بالإنتظار عزيزي


لاتعود نفسك تعطي بخشيش ولا بعدين يصير داء ما له علاج بنفسك (تصير شيخ على حساب راحتك)

عود نفسك عدم التحدث مع الحلاق لو تودد لك بالحديث كثيرا لو استدرجك للحديث (لو انت من الشخصيات الخجوله او ضعيف الشخصيه)

اطلب منه القصه للشعر او تضبيط العارض او الشنب فقط
للغرض الذي جئت من اجله واسئله مسبقا عن السعر بالبدايه ولاتخجل منه لو اول مره تزور المحل

كذا انت ارتحت نفسيا وفكريا :)

شاكر مرورك وتفاعلك مع الموضوع عزيزي

اخي العزيز في فرق بين الخدمه والسلعه

انت تجازيه على حرفه امتهنها واعجبتك ولو ما اعجبتك ما كنت بتعطيه ريال زياده

ممتاز عزيزي .. ولكن ألا تتفق معي .. أن هو دامه امتهن هالمهنه .. إذا مطلوب منه أن يبدع فيها .. في النهاية إبداعه وتفانيه .. هو تسويق لنفسه ..
وأيضا ً ألا تتفق معي .. أن عندما تصبح البخششه ظاهره الغالبية جالسين يتبعونها .. ندخل ساعتها في نفق مظلم .. يقودنا إلى عالم من الرشاوي .. وعطني بخشيش ( إكرامية ) راح أضبطك .. إلخ .. يا عزيزي ترى والله العظيم لنا في دول عربية ( بدون ذكر أسامي ) عبره .. والله تدخل مطارهم .. من أكبرها رتبه إلى أصغر عامل في المطار .. لازم تبخششه .. عشان تمر وأمورك تكون طيبه .. يا جماعة الأمر خطير .. أصحوا بارك الله فيكم .. أنا أقولك من أكبرها رتبه .. تخيل واحد بدريسه وبنجوم وتيجان على كتفه .. والله ما تعدي إلا لما تبخششه ..
طيب كيف وصلوا لهذا الوضع المزري .. أصحوا يا عالم .. والله راح تعضون اصابع الندم لما نوصل لهذه الحاله وراح نوصلها والله أعلى وأعلم لو استمرينا على مبدأ البخششه ( الرشاوي بتعبير أصح وأدق ) .. وترى مسلسل ( يوميات مدير عام ) للمثل أيمن زيدان .. يحكي واقع مرير .. ما هو جاي من فراغ .. الآن أسمع أن الرئيس الحالي .. جالس يحارب هالأمور المستفحلة بكل ما أوتي من قوة في ديرته وجالس يجري إصلاحات كثيرة .. ويحارب مسألة البخشيش والرشاوي إلخ ( الله يساعده ) .. فاصحوا يا عالم ..

وبعدين أسمح لي وخل نكون صادقين مع أنفسنا .. اللي يعطي بخشيش للحلاق على سبيل المثال .. والله ما هو جالس يعطيه لمجرد صدقه .. أو اعجب بحلاقته .. كل هذه أغطيه .. نقص فيها على أنفسنا .. الحقيقه إنك تعطيه بخشيش .. تقوله سواء بصورة مباشرة أو غير مباشرة .. اهتم فيني كزبون .. وتهيئة لمسألة إنك لو اتصلت فيه .. يقولك حياك تعال ما عندي حد بحلقك على طول وعشان يضبط أيام المناسبات والزحمه عشان ما تنطر وتنقع .. ويضبط لك الحلاقه ..! وكأنه هو في الأساس لو جيته راح يخرب لك ويهك .. وراح يطردك !!
والبعض الآخر مثل ما ذكر بعض الأخوه .. أنه البخشيش اللي يظهره للحلاق هي مسألة نقص في الشخصيه .. ويبي يكسب ود الحلاق .. وعملية ( زبو , و امفوشر ) لا اكثر ولا أقل ..


الصراحه موضوعك ف وقته انا امس كنت ف حلاق طيبه ميلانو وفيه نيبالي متين نقعني تقريبا نص ساعه من عقب ماخلص قلتله حلقني قالي في نفر يجي يسوي تلفون ومن حظي ان اللي متصله واحد من الربع يقول هاي النيبالي يحلقك اذا تبخششه واذا ماتبخششه يقولك انا مافي معلوم قلت بنطر رفيجي لين خلص قلت ها يحلق قالي نفس كلام رفيجي المهم اني خليته يحلقني عقب قلتله كم؟؟ قالي 20 ريال قلتله ليش قال بابا انت شيخ عطيته 15 والله عقبها شقالي قالي بابا انت اول وين يحلق حلق مناك وبكل وقاحه وانا الصراحه قانوني وابي اتخذ معاه اجراء قانوني ياليت تعطوني طريقه ..

نعم هذه للأسف أمور تحدث .. ومثل ما ذكرت سابقا ً أن للأسف هم يعتقدون ان دامك قطري .. معناتها انت مليونير , عندك شركة , بمعنى آخر أنت بنك متنقل قدامهم .. وهذا واقع للأسف
ونحن نساهم فيه .. وبعض مسؤولينا أيضا ً يساهمون فيه بشكل مباشر .. من خلال الضحك على الذقون بــ مانشيتات ( القطري هو أعلى دخل فرد في العالم ) .. ما أدرى على أي مقياس قاسوها .. أعتقد مقياس رختر ..!
أعلى دخل فرد في العالم .. والأجنبي في نفس العمل ياخذ أكثر منه .. ويعطونه فله مدفوعة الأجار , وعياله يدرسون في مدارس خاصة مدفوعة التكلفة , وتأمين صحي .. إلخ . ومع ذلك يقولك القطري أعلى مدخول فرد في العالم .. شفتوا المضحك المبكي ..!!

[شيط ويط]

ظاهره مره وحده ؟؟ :)

اول مره اسمع بهالسالفه .. ابي اعرف وين تحلقون انتوا ؟؟ :)

10 ريال (تضبيط العارض) وتخب عليه هذا اللي ناقص

[روح الشمال]

شلة البطرة مشكلة

وعاد عندنا حدث ولا حرج لان المخ طبل من داخل فاضي

تقبل مروري

[مساهم عادي]

حلق بنفسك في البيت وريح بالك...

[بوخالد911]

بالنسبة لي البخشيش ماله اي موقع في حياتي

انه ابخشش نفسي بس

والحلاق صرت ماعرفة من 3 سنين والحمدلله

افتكيت من الحلاقين ومن يدهم الوصخة

ياخي ماتخيل نفسي احلق عند واحد يحلق ل 1000 واحد غيري

تعلموا الحلاقة في البيت تراها سهلللللللللة ^ ـ ^



بو حروووبي


باجيييييك

تحلقني:nice::tease::nice:



وبعطيييك دلتين كرررك
:victory::victory::victory:

ها؟!؟

:eek5::omg::eek5:

[بوخالد911]

وين مكانهم :nice:




بالمعمورة
:nice::nice::nice:

حلاق بجنب كافتريا بو نايف اللي تقابل غراند شوبنغ

[رنج سبورت]

بالمعمورة
:nice::nice::nice:

حلاق بجنب كافتريا بو نايف اللي تقابل غراند شوبنغ



بيض الله وجهك

وتسلم الغالي:nice:

[بوناصر1]

بالمعمورة
:nice::nice::nice:

حلاق بجنب كافتريا بو نايف اللي تقابل غراند شوبنغ



الله يهديك بس وش هالحلاق اللي اتروح له أقسم بالله لو ابلاش مارحت له وصخ بمعنى الكلمه

روحو شوفوه بنفسكم وطريقة تعاملهم ووصاختهم... مكانهم محطة بترول المعموره بجنب كفتيريا بونايف ...

[بو ناصـ ـر]

ظاهره مره وحده ؟؟ :)

اول مره اسمع بهالسالفه .. ابي اعرف وين تحلقون انتوا ؟؟ :)

10 ريال (تضبيط العارض) وتخب عليه هذا اللي ناقص

يا هلا فيك أخوي



شلة البطرة مشكلة

وعاد عندنا حدث ولا حرج لان المخ طبل من داخل فاضي

تقبل مروري

طبعا ً هاي ( البطره ) أحدى اهم الأسباب .. !


حلق بنفسك في البيت وريح بالك...

القضية وانا أخوك ما هي قضية تحلوقه .. القضية أكبر من جي .. القضية أن لو استمر الوضع والشباب ما توعوا أن اللي يسوونه خطأ كبير وتمادوا باللي هم يسوونه .. راح تمر علينا سنين .. تدخل دايره حكوميه عشان تخلص معامله لك .. راح يقولك الموظف عطني إكراميه ..!

مشكلتنا في ثقافتنا .. دائما ً نرى الأمور الصغيره على أنها أمور تافهه .. ولا تعنينا في شي..!
وهي في الواقع اساس كل تطور ونهظة أي مجتمع .. أو في المقابل تكون اساس تدهور وانحاط المجتمع ..
توماس أديسون .. مخترع المصباح .. الرجل الذي يعود له الفضل بعد رب العالمين .. في إضاءة هذا العالم وفي أمور كثيرة تندرج تحت إسم الكهرباء .. اخترع اختراعه من فكره تافهه بمفهومنا السطحي الساذج ..! شوفوا كيف ونحن الآن نعيش ونستمتع بالحياة وبكل ما يتم ابتكاره تحت وطأة الكهرباء .. من فكره بسيطه .. يعني لو ما كان في شخص اسمه أديسون .. كنا الآن لا في لا نت ولا غيره .. وجان جالسين الله اعلم تحت ضوء القمر ما تدري من اللي حواليك .. وحياه بسيطه وبدائيه .. هذه هي قيمة الأمور البسيطه ..!

فالغرض من الطرح .. ليست الحلاقه فقط .. الغرض المبدأ نفسه .. مبدأ التبخشش , الإكراميات كما يحلو للبعض تسميتها .. أو إن جاز لي التعبير مره أخرى أن اسميها ( رشاوي ) ولكن على مستوى يعتقد البعض أنه صغير وبسيط ..!

[بوخالد911]

الله يهديك بس وش هالحلاق اللي اتروح له أقسم بالله لو ابلاش مارحت له وصخ بمعنى الكلمه

روحو شوفوه بنفسكم وطريقة تعاملهم ووصاختهم... مكانهم محطة بترول المعموره بجنب كفتيريا بونايف ...

هلا


والله ما اروح له وااايد

عندك اللي بعد قريب المغسلة
شكلهم نظاف


وانا احلق بمكان ثاني

صووب ش سلوى
اودي موتري للغسيل : مغسلة لا هور او الراجحي

وفي حلاق قريب منهم


منها اغسل موتري

ومنها أحلق


:nice::nice::nice:

[السندان]

هذلان يبه

تدرب على وجهك شوي

ترى اول الأيام بتسوي شوارع في وجهك

وعقب بتكون احسن من حلاق ريجنسي:victory:

انه كذا بديت والحين اعجبببببببببك

حتى ربعي كلهم ما يصدقون لما يشوفوني مرتب العارض يقولون لي انت جذاب ومحلق في الحلاق:(

اي والله انك صادق .. بلا وصاخة هالحلاق ولا الانتظار اللي يرفع الضغط

انا مثلك يابوحارب مكينة وموس ومقص وأطلع خط على الصاطر :nice:

[بوحارب]

بو حروووبي


باجيييييك

تحلقني:nice::tease::nice:



وبعطيييك دلتين كرررك
:victory::victory::victory:

ها؟!؟

:eek5::omg::eek5:

تعال :)

اذا ما اسوي في وجهم شخابيط انه مب ولد باباتي :(




اي والله انك صادق .. بلا وصاخة هالحلاق ولا الانتظار اللي يرفع الضغط

انا مثلك يابوحارب مكينة وموس ومقص وطلع خط على الصاطر :nice:

تعجبني وصدقت انه وصاخة والله :)

بس انه ماستخدم الموس من طلع لي عارض

الله يخلي مكينه التنعيم :nice:

كفو عليك يالسندان :victory:

[مساهم عادي]

فالغرض من الطرح .. ليست الحلاقه فقط .. الغرض المبدأ نفسه .. مبدأ التبخشش , الإكراميات كما يحلو للبعض تسميتها .. أو إن جاز لي التعبير مره أخرى أن اسميها ( رشاوي ) ولكن على مستوى يعتقد البعض أنه صغير وبسيط ..!

على سالفة التبخشش ... بعض الموظفين في الدوام خربوا علينا الفراشين من كثر هالبخاشيش ... حتى صاروا ولا يردون علينا..

تخيل انه في موظف زميل يعطي الفراش في الشهر قد معاشه ... ومخليه كأنه صبي خاص فيه...

[بدون]

لو يقول لي عطني زيادة باشلخ ويهة بالموس اللي في يده
علي أعطيه حقه و بس و الزيادة بكيفي
بس الفراريش هذول سالفة ثانية ،، حتى المكاتب صاروا ما ينظفونها عدل
يبيلهم مشعاب و بعدها بيستعدلون :)

[تغلبية]

على سالفة التبخشش ... بعض الموظفين في الدوام خربوا علينا الفراشين من كثر هالبخاشيش ... حتى صاروا ولا يردون علينا..

تخيل انه في موظف زميل يعطي الفراش في الشهر قد معاشه ... ومخليه كأنه صبي خاص فيه...

واحنا عندنا الموظفات الحنونات (يحليلهم!) يمشون راتب عينية للفراشين بالدور كل شهر لواحد منهم بما يعادل راتبه مرتين !! وبدون مايكونون فراشين خاصين لهم ...وبدون طلب من الفراش نفسه ولا انه شكا لهم الحال !!!! .. أنا شفت الشرهة طار قلبي عليها :nice:

[مساهم عادي]

واحنا عندنا الموظفات الحنونات (يحليلهم!) يمشون راتب عينية للفراشين :nice:

عاد مثل هالموظفات الحنونات مب خربوا الفراشين وبس... الا خلوا مكاتبهم صندوق الزكاة..
كل كم يوم تطب طرارة منقبة وتبدأ تشكي لهم الحال عقبها تنهال عليها الميات والخمسينات... والمشكلة انه نفس الطرارة تمر على نفس الموظفات بعد فترة ولا حد ينتبه لها لأنها منقبة ... وتبدأ تقول لهم قصة مأساوية ثانية مقتبسة من احد مسلسلات رمضان وتقص عليهم وتاخذ فلوسهم....وهلم جرا

[بوحارب]

على سالفة التبخشش ... بعض الموظفين في الدوام خربوا علينا الفراشين من كثر هالبخاشيش ... حتى صاروا ولا يردون علينا..

تخيل انه في موظف زميل يعطي الفراش في الشهر قد معاشه ... ومخليه كأنه صبي خاص فيه...

هذي مشكلة البطرانين اذا حطوهم مع اللي مب بطرانين :)

[تغلبية]

عاد مثل هالموظفات الحنونات مب خربوا الفراشين وبس... الا خلوا مكاتبهم صندوق الزكاة..
كل كم يوم تطب طرارة منقبة وتبدأ تشكي لهم الحال عقبها تنهال عليها الميات والخمسينات... والمشكلة انه نفس الطرارة تمر على نفس الموظفات بعد فترة ولا حد ينتبه لها لأنها منقبة ... وتبدأ تقول لهم قصة مأساوية ثانية مقتبسة من احد مسلسلات رمضان وتقص عليهم وتاخذ فلوسهم....وهلم جرا

لا الله يسلمك .. المعادلة بهالشكل ما تضبط .. مراة + مراة = قرادة !
هم حنونات بس مع الفراشين الله يهديهم
يجون شؤون الأفراد يبون يعدلون وضعهم .. علشان يسلمون عمل إشرافي
يجيك الفراش يقول : لأ مش عاوز .. أنا وضعي كده تمام !!
يعني قبل بالراتب الضعيف من الحكومة والقوي من العينية !!!!!

[بو علي]

السلام عليكم جميعا. انا أتفق تماما مع الاخوان اللي تكلمو عن السلبيات الكثيره لهذي الظاهره. بس استوقفني موضوع الصدقه اللي فسر به بعض الاخوان سبب اعطاء البخاشيش.

أقول ومن واقع ما شفته, الحلاق لما يعرف ان زبون معين يعطيه بخشيش راح يبديه على غيره. وصارت قدامي واحد مسكين بو عيال ناطر الدور ولما جا دوره الهندي قعد واحد من الشباب الدفيعه !

في هذي الحاله اظن والله أعلم انها اتصير نوع من الرشوه مب صدقه. لأن حقوق ناس ثانيه تضيع بسببها.

هاي باللإضافه لعشرات السلبيات الثانيه اللي تفضلو اللإخوان بذكرها.

[هذلان]

بو علي

اي صدقه الله يرضى عليك
هذيلا ماتحل عليهم الصدقه
شتقول في حلاق سنه ١٩٩٤ عنده vxr موديل ١٩٩٢ ارجع بالذاكره ورى بتعرف ان الفي اكس ار مش اي حد يقدر يشتريه .
شتقول في حلاق تركي عنده بو عيون جديد .
و كل ليله سهره في ستار بوكس لين الفجر ؟
وينهم و وين الصدقه

[طلعة الروح]

ماا اؤيد الصدقه او البخشيش في صالونات الحريم او الحلاقين لانهم ببساطه مايستحقونها.......
واللي يعطون هالاكراميات شي راجع لهم بس المشكله انهم بجذي قاعدين يخربونهم ويبطلون عيونهم على اشياء ماكانوا يحلمون فيها...
انا اقول اللي يبي يتصدق يحط الصدقه في مكانها الصحيح مو بجيوب الحلاقين والحفافات..

[الكلاسيكي]

في دولة مثل الصين الشعبية

يمنع بها العاملين من اخذ اي إكراميات (بخشيش)
وحتى لو اعطيتهم بخشيش لا ياخذونه منكم
من اعلى موظفي في الجمهورية لديهم إلى ادني موظفي عندهم.

[بوالفاروق]

عن نفسي ما لاحظت هالشي وما سمعت
يمكن لاني ما احلق عند اتراك ..

انا يمكن من ثلاث سنين عند نفس الحلاق
واعطيه زيادة عشر ولا عشرين فوق الحلاقة وقت العيدين
لانه ضغط عليه وما يقصر معاي فاعطيه ..

لكن ما معوده على هالشي وهو اصلاً ما يطلب

تحياتي

:)