المساعد الشخصي الرقمي

مشاهدة النسخة كاملة : :::المــــــــــــــــــــــــــــــــــــــــــــ ـوت:::


The Master
12-12-2009, 08:46 PM
بدون مقدمات....هالموضوع صار سنة 2005...

بوراشد...اب عنده 6 اولاد و6 بنات...تجاوز عمره الستين...
اكبرهم بنت 45 سنه...واصغرهم بنت 9 سنوات...له زوجتين...الاولى توفت(الله يرحمها)...رجال مصلي...خايف ربه...في حاله...
عمره ماضر حد...وعمره ماغلط على حد...من البيت للمسجد...ومن المسجد للبيت...

قبل رمضان بشهر...
الوو...هلا ومرحب النسيب...هلا بك بواحمد...معزوم على عرس ولد بنتك في الكويت...مايحتاج...حنا اهل المكان...وحنا اللي نعزم...

ها يبا نحجز لك بالطياره....لا لا ابد...باروح مع ولدي راشد...بالسياره...وناستي بالقعده معاه...ومنها اونسه عالطريق...ولغفل اصحيه...

يالله حيهم...شرفتوا...حيالله بوراشد...يحييك ويبقيك...العشا بكره...مايحتاج محنا بغرب...لا والله مايصير...تشرفنا هنا وماتبغي عشى...ابد...انت شيبتنا...

بوراشد حس انه تعبان...قال يمكن من السفر طريق بر...شهيته للاكل قلت...ويحس بآلام في المعده...قال يمكن الجو متغير علي ومن السفر...

بعد العرس ارجعوا الدوحه...الالم ماراح...وزود اسهال...وترجيع...
يبا قم نوديك المستشفى...لا لا توني جاي من المركز الصحي عطاني مسكن...ومادري وشو...قال يمكن نزلة معويه...

بوراشد وزنه قام يقل...ووجه صار شاحب...والمسجد ماعاد فيه حيل يروح له...يبا قم بنوديك نسوي لك تحاليل....لا لا ابد...رمضان قريب...لخلص رمضان يصير خير...خلوني اصومه...وبعدها يحلها الف حلال...

خلص رمضان...
وبوراشد...ضعف بزوود...وشهيته للاكل قلت...ونفس الحال...اسهال...وترجيع...وجهه صار اصفر...
قال فيني بوصفار...لازم اكوي...راحوا....وكوى...ووصاه لا تاكل الا سمك وعيش ابيض...
استمر على هالحال تقريبا شهر...
شاف مافي فايده...
خذاه راشد...للمستشفى...سوو له تحاليل...قالوا لازم نسوي له اشعه...
اطلعت نتايج الاشعه...في الحال...نادوا راشد...ابوك لازم يترقد عندنا...ليييه؟؟...بين من الاشعه عنده مشكله...وماراح نتأكد الا بالتحاليل...وتاخذ وقت...

ترقد بالمستشفى...طلعت التحاليل...قالوا لازم نسوي الاشعه الكامله...راشد...ابوك احتمال فيه سرطان...مب متأكدين...لكن احتمال...بنسوي التحاليل...وبنعطيك خبر...

علي...يقولون الدكاتره ان الوالد احتمال فيه السرطان...بس مب متأكدين...وعساهم يكونون غلطانين...امين يارب...

الزوجه(ام علي) مع بوراشد في المستشفى...تقوم فيه...وتشوف وش قاصره...وتبات...معاه...

ممكن اكلم الدكتور...ليه؟؟...انا ولد بوراشد علي اللي في الغرفه هذي...طيب دقايق...
دكتور...بغيت اعرف وش طلعت نتايج التحاليل...ليش محد كلمكم؟؟؟...لا ليه وش صاير؟....مع ان الدكتور فلان كان هو اللي لازم يكلمكم...طيب اخلص علي وش السالفه...ابوك فيه سرطان في الكبد..."صدمه"...لاحول ولا قوة الا بالله...ان لله وانا اليه لراجعون...
طيب وش الحل...والله مادري وش اقول لك...لكن الكبد عنده متضخمه...وميته ومغطيها الورم...وحنا مب عارفين لحد الحين هو كيف عايش...وكيف لحد الحين عايش!!...لان الكبد عنده ميته...من الورم الخبيث...
طيب الحل...امممم بنحاول نشفط المواد اللي مضخمه الكبد وبنشوف عقب...شنووو؟؟؟ طيب ليه ما تستأصلون الورم...مادري وش اقول لك...لكن الورم اكل الكبد كامل...وهو الحين في مراحل متقدمه جدا...وابوك كبير في السن...لكن بنحاول نشوف حل...واللي يرحم والديك يا دكتور دور على طريقه تشفي الوالد بعد الله سبحانه...

راح الدكتور...علي توه حس بالصدمه...خذ زاويه...وتم سرحان...مايعرف وش يسوي...اتصل ب اخوه الكبير...مب عارف...يكلم باقي اخوانه؟؟؟...لا لا ماراح يستحملون...والدكتور قال ان شاء الله في حل...فا ماراح اقول حق حد...وان شاء الله بتنحل المشكله...

ها يبا علي...شفت الدكتور...اي اي شفته يبا...وش قال...قال مافي شي ان شاء الله...بس يبغون يسوون تحاليل...وغيره...فا يبغي لك وقت في المستشفى...الله المستعان...

بعد كم يوم...
لازم نسوي حق الوالد عمليه...عملية وشو؟!...بنحاول ندخل هوز في الكبد عشان يمتص الورم والمواد اللي مسببه موت للكبد...ومانقدر نسوي عمليه...لان ابوك كبير في السن...ونخاف يصيده نزيف...اذا حاولنا ناخذ عينه من الكبد عشان نعرف وشو نوع الورم...
يعني حلكم بس وقتي؟؟؟...هذا اللي نقدر نسوي...

بعد العمليه...
بوراشد تعب بزياده...وقبل العمليه كان يسولف ويتكلم...لكن بعدها تعب...ويوم عن يوم حالته تسوء...والخبر عن مرضه...علي تكفل بقوله للاخوان والخوات واحد واحد...ماعدا الصغار...لعدم امكانيتهم تحمله...
كل يوم يزورون ابوهم...وكان بعضهم يروح شوي ويرجع...تلاحظ عيونهم حمر...حبهم لابوهم...وغلاته...ماطاقوا يشوفونه بهالحال...

بعدها ب اسبوع
...علي...ممكن...الدكتور يبغي يكلمك...حنا سوينا اللي علينا...ومانقدر نسوي شي خلاص...طيب يعني وشو؟؟؟...لازم يروح مستشفي الامل...وشو؟؟؟...تعرف يعني وشو مستشفى الامل؟؟...يعني الحالات اللي مالها علاج واللي ينتظرون موتهم...مب بيدي...كل شي بيد رب العالمين...وهناك الرعايه عندهم احسن...

ها يابوك وش قال الدكتور...يقول بيودونا مستشفى ثاني لان الرعايه هناك احسن...قالوا لك ان فيني ايدز ها؟...لا لا حشا يبا...مافيك الا العافيه...طيب ليه بيودوني هناك...بعيد عن الناس...كان خلوني هنا...لانهم خايفين اعديهم...علي منصدم...يبا...لو فيك هالمرض كان ماشفتنا حولك...يبا لو فيك هالمرض كان ما افحصك الدكتور بدون قفاز...


انت علي...اي نعم...انا دكتور من مستشفى الامل...وحبيت اسالك...الوالد عنده خبر انه مريض وانه.... لا لا محد قال له...طيب ليه...وليه اقول له؟؟؟...هو بليا شي وحالته صعبه ونفسيته منتهيه...اجي واقول له ان فيك كذا وكذا...وشي ثاني كل شي بيد رب العالمين...وان شاء الله ربي بيشفيه...بيده الامر كله...يقول له كن فيكون...

اليوم الاول في مستشفى الامل...
اسمعوا يا عيالي...هذي وصيتي...محد يدري اذا بيعيش لبكره ولا لا...سبحان الله كل شي بيد رب العالمين...لكن ابغيكم تاخذون ثلث مالي تسوون فيه اعمال الخير...

يبا اختي ام احمد...تقول ان شاء الله بكره الصبح بتمشي من الكويت وجايه مع عيالها...يبغون يتطمنون عليك...حياهم الله...

الاكسجين مركب...والنفس عنده ضعيف...وقليل يتكلم...ولما حد يقرا قرآن...وذكر اسم الله...رفع السبابه...ومن تقول له الشهاده رفع السبابه...

اليوم الثاني...مستشفى الامل...يوم الخميس...

بوراشد يغط ويصحى كثير...ويفزع...دكتور...ممكن سؤال...تفضل يا علي...كيف تعرف ان الواحد قرب موته...انه يهذي...ويقول كلام ماينفهم له...وعيونه تروح فوق...وتحس انه مضيع...ليه؟...بعد تسألني ليه؟؟؟...تشكر...

العصر...
هلا راشد...ها اخبار الوالد يا علي...انا متصل لك...ياريت لو تجون كلكم...احس ان الوالد تعبان...ان شاء الله..الحين جايين...

المغرب...
عائلة بوراشد...عياله ال 12...واعيال عياله...احفاده...كلهم حواليه...شافهم واحد واحد...وسلموا عليه كلهم...وكان يناديهم بالاسم عشان يشوفهم...

قبل صلاة العشا...
راشد...لبيه...بغيت العصير اللي تشتري لي اياه دايما...البرتقال...اي يابوك...انت بس اللي تعرفه...ان شاء الله يبا...

بعد العشا...
هذا العصير...باجيب لك عود...مايحتاج...ارفع السرير خلني اقعد...بس عليك الاكسجين وصعب تتنفس بدونه او حتى تتكلم...شيله...عشان اشرب...طيب...باشربك اياه...عطني انا باشربه بيدي...شرب...لحاله...
طيب بارتاح شوي... ها انزل السرير...لا لا خله...غمضت عينه...

الجميع في المستشفى...حواليه...عياله...عيال عياله...الجميع يدعي له...الجميع يترجى الله لشفائه...يقرون القرآن...حوله...الادعيه...الاذكار...

ليه للحين ما صحى...طول الوالد...يبا...يبا...يبا...رد علي...تنفسه صار بطئ...يبا...تسمعني...يبا...حركه يمكن نايم...يبا...يبا...نادوا الدكتور...
دكتور الوالد مايبغي يصحى...شيك عليه...قال...ان لله وانا اليه لراجعون...

علي علي...كلم ابوك قوله يصحى...راشد...شوف ابوك مايرد علي...بوراشد بوراشد...كلمني...كلمني...رد علي...لاتخليني وتروح...محتاجينك معانا...بوراشد بوراشد... بوراشد...

يبا يبا...رد علي...والله ماراح ازعلك مره ثانيه...والله ماراح اصارخ عليك...والله راح اطيعك...يبا ارجوك رد علي...كلمني...ابوس راسك...ابوس يدك...ابوس رجلك...رد علي...كلمني...افتح عينك...طالعني...نادني ب اسمي...قول لي اي شي...محتاجك يا يبا...رد علي...




الله يرحم بوراشد...يارب...ويجعل مثواه الجنه ويوسع على قبره ويجعله روض من رياض الجنه يارب...ويعينه يوم السؤال...امين يارب...وجميع موتى المسلمين يارب...



اهداف القصه...

اولها...تذكير بالموت...وهو الرادع لكل الذنوب...فا اكثروا من ذكر هادم اللذات...لان في النهايه مردنا القبر...وربي بيحاسبنا على اخطائنا...وحسناتنا...وبالتفكير بالموت...الانسان يخاف...ويفكر...ويحاسب على كل خطوه يسويها...
القصه الموت فيها لمرض...لكن لا تنسى الموت الفجأه...خاصه الحوادث...الله يبعدنا عنها يارب وحفظنا ويحفظ جميع المسلمين...

ثانيها...تقدير الوالدين...وماتعرف معزتهم الا اذا راحوا...وتتحسف طول عمرك انك ما قضيت عمرك معاهم...وكذلك الاشخاص العزيزين عليك...ماتدري يمكن بكره ماتشوفهم...

ثالثها...
ذكرت القصه بهالطول والطريقه...عشان تعيشون الحدث...وتقشعر ابدانكم...وتحسون بالناس اللي مرت في هالشي...وتقدرون من مات له قريب...او حبيب...كيف هو شعوره...

رابعها...
هالقصه واقعيه...صارت سنة 2005
وهالوقت من ذيك السنه لليوم...عدت 4 سنين بالضبط من وفاة بوراشد...الوالد...الله يرحمه...
كانت في قلبي...وحبيت اقول هالقصه...منها الناس تعتبر وتستفيد...ومنها شخصي...لعل اطلع شي من اللي شايله في قلبي...

اتمنى اني وفقت في ما طرحت...والسموحه ان كان به قصور...
وما نبغي منكم الا الدعاء للوالد بالرحمه وجميع موتى المسلمين...
ومنها العبره والموعظه...

اخوكم علي...


غزير الدمع بالعين سطا به
مالقى من يزيل هم غدا به

داوا جراح واليوم مالقى من يداوه
غدى مريض والناس مواجه بشبابه

ما ركن لحد ولا براضي علاجه
قوله
بعد صيام ربي إفعلوا أنا وفيت ربي كتابه

أصوم ولا أفطر وإن صمت بعباله
دواكم ماهو علاجي بل من سنا به

دنيتي أصوم وأصلي الفجر بجماعه
وأترفق بالمساكين وأرضى بالقدر وإن علقم شرابه

وإن طال دربي أو قسى أقضيه بطرف سبابه
هذا شخصه هذا وصفه محلا وصفه

بيومه جمع شمله ولبى خاطره وسمة نفسه
نور وجهه روح عن همن سطا لغيابه

يابوي يابوراشد
جعل مثواك صحبة الحبيب تغدي لبابه
وحنا معكم برحمة الرحمن سقفنا عرش سبحانه
شاهة
12-12-2009, 09:04 PM
الله يرحمه ويحسن إليه ويجعل مثواه الفردوس الأعلى آميييييين

ذكرتني بنفس قصة الوالد الله يرحمه ويجعله في الفردوس الأعلى نفس المراحل
ريــــــــان
12-12-2009, 09:10 PM
ياخوي الله ياجرك في مصيبتك

ويعوضك بالذريه الصالحه ومثواه الجنه يارب

وحلو انك تتذكر القصه للعبره

لكن قول اللهم لك الحمد

ان الوالد توفى بعد ماشافكم كلكم

وسلم عليكم

ووصى

وطيبت خاطره

وراعيته واهتميت فيه

هذا بروحه نعمه من الله

شوف ناس ثانيه ماتو فجأه او بحادث ولالحقو يشوفون اهلهم

اللهم نسألك حسن الخاتمه
The MooN
12-12-2009, 09:11 PM
الله يرحمو ويغمد روحه الجنة
ويرحم موتانا وموتى المسلمين

جزاك الله خير ونشالله تكون ارتحت اخي :)
بنـ الدحيل ـت
12-12-2009, 09:13 PM
الله يرحمه ويرحم جميع موتى المسلمين


القبر باب وكل الناس داخله ..
يا ليت شعري بعد الموت ما الدار ..؟
الدار دار نعيم إن عملت بما ..

يرضى الإله وإن خالفت فالنار ..
هما محلان لا للمرء سواهما ..
فاختر لنفسك أي الدار تختار ..
jo0ory.56
12-12-2009, 09:22 PM
الله يرحم الوالد ويغفر له ... ويجعل مثواه الجنة ...

ويرحم موتانا ( امي واخواني ) وموتى جميع المسلمين ...

فعلا فراق الاحباب صعب جدا ... وذكراهم لايمكن ان تفارق قلوبنا ...

تحدث مواقف كثيرة فتذكرنا بهم ... الاماكن تتحدث عنهم ...

لايمكن ان نفصل لحظات حياتنا عن تواجدهم بها ...

ولكن عزاؤونا انهم عند رب غفور رحيم وعفو كريم ...

اللهم اغفر لهم وارحمهم وعافهم واعفو عنهم ...

اللهم آآآآآآآآآآآمين
شويهينــه
12-12-2009, 09:22 PM
الله يرحم جميع موتى المسلمين

ذكرتني بجدي الله يرحمه

مات فجاه وبدون مقدمات

الله يرحمك ياجدي
ابوعلي
12-12-2009, 09:30 PM
جزاك الله خير أخوي والله يرحم الوالد ويجعل مثواه الفردوس

وان شاء الله عبره لنا بتذكر الموت والاحسان للوالدين وخاصة ان برهم باب من ابواب الجنة لنا

والله ياخوي مرينا بقصه مقاربه ولكن الحمدلله الله حفظ لنا الوالده لما سوت عملية في القلب والشريان التاجي ومرت علينا أيام صعبه والحمدلله رب العالمين على كل أمر

واشكرك للمرة الثاني أخوي على الموضوع الرائع
alrheeb2020
12-12-2009, 09:42 PM
الله يرحم ويغفر له ذنوبه ان شاء الله ..

ويهدي شباب المسلمين ..

وينصرنه على الكفار والمنافقين ..

والله يجزاك خير ويرحم والديك عالطرح المميز
ابن مانع
12-12-2009, 09:55 PM
جزاك الله خير
الله يغفر له ويرحمه
دلوليانوز
12-12-2009, 10:06 PM
جزاك الله خير أخوي والله يرحم الوالد ويجعل مثواه الفردوس

وان شاء الله عبره لنا بتذكر الموت والاحسان للوالدين وخاصة ان برهم باب من ابواب الجنة لنا
Mozanee
12-12-2009, 10:26 PM
الله يرحم الوالد ويغمد روحه الجنة ويحشره مع النيين والصالحين والصدقين والشهداء

وحسن أولئك رفيقا ويجمعكم معاه في جنات الفردوس عقب عمر طويل’’’

بصراحة لما وصلت عند كلمة العصر ما قدرت أكمل ,, شعرت بالحزن فعلا و؛ مثل ما ذكرت

عشان تعيشون الأحداث ’’ عشناها باحداثها وبآلامها ’’’

ومرض الموت يتم ماثل جدام الانسان ما ينمحي من البال’ يمكن تصير الصور والمواقف باهتة

في ذكرياتك وتعاني حتى تستحظرها بس لحظة الموت وقبلها ساطعة في بالك

وبالذات اذا كنت صغير وما تعرف تعبر وتشتكي ’’’

والرسول عليه الصلاة والسلام حث المسلم على ذكر هادم اللذات حتى نزهد في الدنيا ونقبل

على الآخرة بالأعمال الصالحة والتوبة وترك المعاصي والله يعفو عنا ’’’

وتسلم أخوي علي على الموضوع ’’رغم كم الحزن اللي فيه الا اني شعرت بسكينة غريبة

تقبل مروري
The Master
13-12-2009, 05:48 AM
الله يرحمه ويحسن إليه ويجعل مثواه الفردوس الأعلى آميييييين

ذكرتني بنفس قصة الوالد الله يرحمه ويجعله في الفردوس الأعلى نفس المراحل

هلا ومرحب شاهة
اجمعين يارب...والله يجزاك خير...
عسى الله يرحمهم جميعا...وموتانا وموتى المسلمين...

يامرحبا بك
ولاهنتي
The Master
13-12-2009, 05:54 AM
ياخوي الله ياجرك في مصيبتك

ويعوضك بالذريه الصالحه ومثواه الجنه يارب

وحلو انك تتذكر القصه للعبره

لكن قول اللهم لك الحمد

ان الوالد توفى بعد ماشافكم كلكم

وسلم عليكم

ووصى

وطيبت خاطره

وراعيته واهتميت فيه

هذا بروحه نعمه من الله

شوف ناس ثانيه ماتو فجأه او بحادث ولالحقو يشوفون اهلهم

اللهم نسألك حسن الخاتمه

هلا ومرحب اخوي ريان...
امين يارب...وبارك الله فيك...واحسنت...والله يجزاك خير...وفي جميع الاحوال..تقول...الحمدلله على كل حال...وانا لله وان اليه لراجعون...ولاحول ولاقوة الا بالله...

هذا من اسباب ذكري للقصه...اذا انسان تدري انه بيموت ومع ذلك تحزن لفراقه...فما بالك اذا كان فجأه بدون مقدمات...
هالاشيا تخلي الواحد يحاسب في تعامله مع الناس واللي حوله...وكيف لازم تحسن اليهم...ونفس الوقت تفكر في حالك...يمكن انت اللي بيجيك الموت فجأه...فا احسن الى ربك...لنجاة نفسك...

امين يارب...ولجميع المسلمين...

يامرحبا بك
ولاهنت
جرح الزمان
13-12-2009, 05:54 AM
الله يرحمه ويرحم جميع موتى المسلمين

جزاك الله خير
سداوي&مدريدي
13-12-2009, 06:13 AM
اللهم اغفر له وأرحمه وعافه واعف عنه واكرم نزلها ووسع مدخله

جزاك الله خير أخوي The Master
بوحمد1
13-12-2009, 06:36 AM
الله يغفر له :(
بوعمير
13-12-2009, 10:05 AM
اخوي على الله يرحم الوالد رحمة واسعه ويدخله فسيح جناته.

طرحك يدل على طيب اصلك ومرباك وبرك بوالديك، الله يبارك فيك وفي عيالك.

الله يرحمه ويرحم موتى المسلمين.
الصريحه
13-12-2009, 10:27 AM
لاحول ولاقوه الا بالله
الله يحسن خاتمه الجميع
شبح الصمت
13-12-2009, 10:42 AM
جزاك الله الف خير اخوي
والله يرحمه ويغفر له ويغمد روحه الجنه ويرحم جميع المسلمين والمسلمات الأحياء منا والأموات
اللهم استرنا فوق الارض وتحت الارض ويوم العرض
شجرة الدر
13-12-2009, 11:17 AM
الله يرحم بوراشد...يارب...ويجعل مثواه الجنه ويوسع على قبره ويجعله روض من رياض الجنه يارب...ويعينه يوم السؤال...امين يارب...وجميع موتى المسلمين يارب...

والله يرحم ابوي واخوي وجميع موتى المسلمين ،، ذكرتنا بفراق الاحبه ،،

جزاك الله خير ،، والله يرحمنا إذا النا إلى ماالو إليه ،،
مارسيلا
13-12-2009, 11:44 AM
الله يرحمه ويحسن إليه ويجعل مثواه الفردوس
جزاك الله خير اخوي
بلاهويـــــة
13-12-2009, 12:05 PM
الله يرحم جميع موتى المسلمين
ولد الشقب
13-12-2009, 12:17 PM
الله يرحمه ويرحم موتى المسلمين
Mozanee
13-12-2009, 01:31 PM
اذا سمحت لي أخوي عندي اضافة بخصوص ذكر الموت ’’’

ذكر الموت نوعين ؛ ذكر سلبي وذكر ايجابي ’’

السلبي هو الشعور بالموت بكل لحظة بالذات عند النوم ويتجدد عند موت أحد المقربين

فهو مجرد خوف من غير عمل أوتقرب من الله عز وجل ’’

وحتى يتخلص الانسان من هالسلبية يحاول يتقرب من رب العالمين ؛طبعا بالذكر والصلاة على

النبي والمحافظة على العبادات والفروض والسنن والنوافل ؛بالطريقة ذي راح ينشغل عن

التفكبر بالموت بطريقة سلبية ويصير كل همه رضى رب العالمين وتحقيق الهدف يبيله

صبر ومجاهدة وكسر النفس ورغباتها ’’’’
بنت سيف
13-12-2009, 01:41 PM
رحم الله والدك .. وغفرله .. وأدخله الجنة

**

أخي الماستر ..

من مر بخبرة موت قريب له من الدرجة .. أب أو أخت أو زوج ..
صدقني .. لن يستطيع نسيان الموقف ..

والموت حق علينا كلنا ..
اللهم اغفر لموتانا وموتى المسلمين ..

شكرا لك الموضوع ..

وللعلم .. لن أنسى ..


بنت سيف
The Master
13-12-2009, 06:47 PM
الله يرحمو ويغمد روحه الجنة
ويرحم موتانا وموتى المسلمين

جزاك الله خير ونشالله تكون ارتحت اخي :)

هلا ومرحب The MooN
امين يارب...وجميع المسلمين...

ويجزاك يارب...الحمدلله على كل حال...

يامرحبا بك
ولاهنت على المرور...
The Master
13-12-2009, 06:49 PM
الله يرحمه ويرحم جميع موتى المسلمين


القبر باب وكل الناس داخله ..
يا ليت شعري بعد الموت ما الدار ..؟
الدار دار نعيم إن عملت بما ..

يرضى الإله وإن خالفت فالنار ..
هما محلان لا للمرء سواهما ..
فاختر لنفسك أي الدار تختار ..

هلا ومرحب اختي بنت الدحيل

امين يارب...الله يجزاك خير...

اكيد دار الفردوس...ويارب يجمعنا وجميع المسلمين يارب...

يامرحبا بك
ولاهنتي علي المرور
ناصر30
13-12-2009, 07:30 PM
الله يرحم ابو راشد وجميع موتي المسلمين

ويسكنه فسيح جناته


والولد الصالح يدعو لوالده ويكثر من اعمال الخير في ثوابه


وكما قيل ( كفو بالموت واعظاا )
ابو ناصر
13-12-2009, 07:44 PM
الله يرحم موتى المسلمين جميعا
بارك الله فيك اخوي
الوووووعد
14-12-2009, 11:07 AM
الله يرحمه ويحسن إليه ويجعل مثواه الفردوس الأعلى آميييييين

عندي الوالده الحين في المستشفى قاعدين كل يوم روح لها وماعدنا الا القران والدعا له والباقي على الله سبحانه وتعالى وهي في غيبوبه وعندها نزيف في الراس وارجوكم ادعوا لها بالشفاء العاجل لانه هي كل شى في حياتى وادعوا من الله سبحانه وتعالى ان يشفيها ويخليها لنا امي امي الغاليه
biz-qtr
14-12-2009, 03:57 PM
جزاك الله الف خير ..

صدق عشتها ... الله يرحمه يارب وجعله ف ميزان حسناتك ..

ويالله بحسن الخاتمه
The Master
18-12-2009, 10:35 PM
الله يرحم الوالد ويغفر له ... ويجعل مثواه الجنة ...

ويرحم موتانا ( امي واخواني ) وموتى جميع المسلمين ...

فعلا فراق الاحباب صعب جدا ... وذكراهم لايمكن ان تفارق قلوبنا ...

تحدث مواقف كثيرة فتذكرنا بهم ... الاماكن تتحدث عنهم ...

لايمكن ان نفصل لحظات حياتنا عن تواجدهم بها ...

ولكن عزاؤونا انهم عند رب غفور رحيم وعفو كريم ...

اللهم اغفر لهم وارحمهم وعافهم واعفو عنهم ...

اللهم آآآآآآآآآآآمين

هلا ومرحب اختي jo0ory.56
اشكر لك تواجدك الجميل والطيب...امين يارب وجميع المسلمين...
اكيد اكيد...ودايما احسن الظن بالله...وعسى ربي يرحم الجميع...الانسان يدخل الجنه برحمة الله...

ويامرحبا بك
ولاهنتي على المرور اختي...وعسى ربي يصبر الجميع يارب...
The Master
18-12-2009, 10:38 PM
الله يرحم جميع موتى المسلمين

ذكرتني بجدي الله يرحمه

مات فجاه وبدون مقدمات

الله يرحمك ياجدي

هلا ومرحب اختي المريشه...
امين يارب...

ويامرحبا بك
لاهنتي
The Master
18-12-2009, 10:44 PM
جزاك الله خير أخوي والله يرحم الوالد ويجعل مثواه الفردوس

وان شاء الله عبره لنا بتذكر الموت والاحسان للوالدين وخاصة ان برهم باب من ابواب الجنة لنا

والله ياخوي مرينا بقصه مقاربه ولكن الحمدلله الله حفظ لنا الوالده لما سوت عملية في القلب والشريان التاجي ومرت علينا أيام صعبه والحمدلله رب العالمين على كل أمر

واشكرك للمرة الثاني أخوي على الموضوع الرائع

هلا ومرحب اخوي بوعلي...
الله يجزاك خير...وعسى ربي يحفظ الوالده من كل شر...وياجرها يارب...ويجعلكم من البارين لها يارب...ومن المحسنين لها...

وعن الوالدين هو من اساسيات هالموضوع...وتقديرهم واحترامهم وبرهم...دامهم يتنفسون...مهما سوو وافعلوا...خير او غيره...يبقى البر موجود...والاحسان اليهم...

يامرحبا بك
ولاهنت اخوي بوعلي...
The Master
18-12-2009, 10:46 PM
الله يرحم ويغفر له ذنوبه ان شاء الله ..

ويهدي شباب المسلمين ..

وينصرنه على الكفار والمنافقين ..

والله يجزاك خير ويرحم والديك عالطرح المميز

هلا ومرحب اخوي الرهيب...
امين يارب...
ويجزاك يارب...وبارك الله فيك...ووالديك...لاهنت...

ويامرحبا بك
The Master
18-12-2009, 10:48 PM
جزاك الله خير
الله يغفر له ويرحمه

هلا ومرحب اخوي علي12221
ويجزاك يارب...
امين يارب...وجميع المسلمين...

يامرحبا بك
The Master
18-12-2009, 10:50 PM
جزاك الله خير أخوي والله يرحم الوالد ويجعل مثواه الفردوس

وان شاء الله عبره لنا بتذكر الموت والاحسان للوالدين وخاصة ان برهم باب من ابواب الجنة لنا

هلا ومرحب دلوليانوز
ويجزاك يارب...ووالديك وجميع المسلمين...يارب...

احسنت وبارك الله فيك...

ويامرحبا بك
ولاهنت
The Master
18-12-2009, 11:01 PM
الله يرحم الوالد ويغمد روحه الجنة ويحشره مع النيين والصالحين والصدقين والشهداء

وحسن أولئك رفيقا ويجمعكم معاه في جنات الفردوس عقب عمر طويل’’’

بصراحة لما وصلت عند كلمة العصر ما قدرت أكمل ,, شعرت بالحزن فعلا و؛ مثل ما ذكرت

عشان تعيشون الأحداث ’’ عشناها باحداثها وبآلامها ’’’

ومرض الموت يتم ماثل جدام الانسان ما ينمحي من البال’ يمكن تصير الصور والمواقف باهتة

في ذكرياتك وتعاني حتى تستحظرها بس لحظة الموت وقبلها ساطعة في بالك

وبالذات اذا كنت صغير وما تعرف تعبر وتشتكي ’’’

والرسول عليه الصلاة والسلام حث المسلم على ذكر هادم اللذات حتى نزهد في الدنيا ونقبل

على الآخرة بالأعمال الصالحة والتوبة وترك المعاصي والله يعفو عنا ’’’

وتسلم أخوي علي على الموضوع ’’رغم كم الحزن اللي فيه الا اني شعرت بسكينة غريبة

تقبل مروري

هلا ومرحب اختي موزاني...
نورتي وشرفتي...بارك الله فيك...والله يجزاك خير...تشكرين على الدعاء الطيب...

لو نقدر ننسى...كان ماتذكرنا عقب 4 سنين...

مرورك متقبل...وبارك الله فيك...واحسنتي على الرد الجميل...

يامرحبا بك
ولاهنتي خيتو...
نورالهدى
19-12-2009, 01:56 AM
الله يرحمه
أحداث مؤلمه
وبالذات إذا كنت فقدت عزيز لديك مسبقا
أولها أخوي
وثانيها أبوي
وثالثها أمي الله يرحمهم

قلبي حرقني عليها ماتت بالسرطان وبعد أيام بتكمل سنه على وفاتها
اخر العنقود
19-12-2009, 02:48 AM
اللهم اغفر لحينا وميتنا , وصغيرنا وكبيرنا , وذكرنا وأنثانا , وشاهدنا وغائبنا , اللهم من أحيته منا فأحيه على الإسلام ومن توفيته منا فتوفه على الإيمان
The Master
22-12-2009, 09:04 AM
الله يرحمه ويرحم جميع موتى المسلمين

جزاك الله خير

امين يارب...الله يجزاك خير اخوي...
يامرحبا بك
The Master
22-12-2009, 09:06 AM
اللهم اغفر له وأرحمه وعافه واعف عنه واكرم نزلها ووسع مدخله

جزاك الله خير أخوي the master

هلا ومرحب اخوي مدريدي

امين يارب...بيض الله وجهك على الدعاء الطيب...ولاهنت ياخوي...

ويجزاك يارب...

يامرحبا بك
The Master
22-12-2009, 09:07 AM
الله يغفر له :(

امين يارب...الله يجزاك خير
شموخ وبس
22-12-2009, 09:10 AM
الله يرحمه ويعطيج العافيه على هالقصص الحلوه
The Master
22-12-2009, 09:11 AM
اخوي على الله يرحم الوالد رحمة واسعه ويدخله فسيح جناته.

طرحك يدل على طيب اصلك ومرباك وبرك بوالديك، الله يبارك فيك وفي عيالك.

الله يرحمه ويرحم موتى المسلمين.

هلا ومرحب اخوي بوعمير...
امين يارب...الله يجزاك خير على الدعاء...

ماعليك زود اخوي...ولك بالمثل يارب...ولجميع المسلمين...

يامرحبا بك
لاهنت...على الكلام الطيب...
The Master
22-12-2009, 09:15 AM
للتنويه...

السموحه ان تاخرت في الردود...
الحمدلله وصلنا الدوحه...
فا مشغولين...شوي...احم...اعذرونا ان تاخرنا في الرد...

ولاهنتوا على مشاركاتكم...وبيض الله وجيهكم...
The Master
27-12-2009, 03:29 AM
لاحول ولاقوه الا بالله
الله يحسن خاتمه الجميع

امين يارب...
يا مرحبا بك...
The Master
27-12-2009, 03:33 AM
جزاك الله الف خير اخوي
والله يرحمه ويغفر له ويغمد روحه الجنه ويرحم جميع المسلمين والمسلمات الأحياء منا والأموات
اللهم استرنا فوق الارض وتحت الارض ويوم العرض

هلا ومرحب اخوي شبح الصمت...
ويجزاك يارب...
امين يارب...

بارك الله فيك
ويامرحبا بك
ولاهنت
The Master
27-12-2009, 03:38 AM
الله يرحم بوراشد...يارب...ويجعل مثواه الجنه ويوسع على قبره ويجعله روض من رياض الجنه يارب...ويعينه يوم السؤال...امين يارب...وجميع موتى المسلمين يارب...

والله يرحم ابوي واخوي وجميع موتى المسلمين ،، ذكرتنا بفراق الاحبه ،،

جزاك الله خير ،، والله يرحمنا إذا النا إلى ماالو إليه ،،

هلا ومرحب اختي شجرة الدر...
ووالديك يارب...اجمعين...
الله يجزاك خير على الدعاء الطيب اختي...ولك وللجميع يارب...

ويجزاك يارب...
امين...يارب

يامرحبا بك اختي
ولاهنتي...
The Master
27-12-2009, 03:52 AM
الله يرحمه ويحسن إليه ويجعل مثواه الفردوس
جزاك الله خير اخوي

ويجزاك يارب...
اجمعين ان شاء الله...

يامرحبا بك
The Master
02-01-2010, 11:02 PM
الله يرحم جميع موتى المسلمين

امين يارب...
The Master
02-01-2010, 11:02 PM
الله يرحمه ويرحم موتى المسلمين

امين يارب...لاهنت
The Master
02-01-2010, 11:13 PM
اذا سمحت لي أخوي عندي اضافة بخصوص ذكر الموت ’’’

ذكر الموت نوعين ؛ ذكر سلبي وذكر ايجابي ’’

السلبي هو الشعور بالموت بكل لحظة بالذات عند النوم ويتجدد عند موت أحد المقربين

فهو مجرد خوف من غير عمل أوتقرب من الله عز وجل ’’

وحتى يتخلص الانسان من هالسلبية يحاول يتقرب من رب العالمين ؛طبعا بالذكر والصلاة على

النبي والمحافظة على العبادات والفروض والسنن والنوافل ؛بالطريقة ذي راح ينشغل عن

التفكبر بالموت بطريقة سلبية ويصير كل همه رضى رب العالمين وتحقيق الهدف يبيله

صبر ومجاهدة وكسر النفس ورغباتها ’’’’





هلا ومرحب اختي موزاني...

كا عادتك اثريتي الموضوع ب نقطه مهمه...

اضيف على اللي قلتيه...الجمعه مع الناس والقعده معاهم وفضفضه اللي في القلب...تنفع...

بارك الله فيك اختي...بصراحه رايك جميل ونقطه مهمه...
الله يجزاك خير...

يامرحبا بك
لاهنتي
The Master
02-01-2010, 11:19 PM
رحم الله والدك .. وغفرله .. وأدخله الجنة

**

أخي الماستر ..

من مر بخبرة موت قريب له من الدرجة .. أب أو أخت أو زوج ..
صدقني .. لن يستطيع نسيان الموقف ..

والموت حق علينا كلنا ..
اللهم اغفر لموتانا وموتى المسلمين ..

شكرا لك الموضوع ..

وللعلم .. لن أنسى ..


بنت سيف

هلا ومرحب اختي بنت سيف...
امين يارب...ووالديك وجميع موتى المسلمين...

صادقه اختي...خاصه ان كنت ملاصق ودايما متواجد في المكان...تبقى الذكريات...لكن اهم شي يبقى الدعاء...

امين يارب...
العفو اختي...

يامرحبا بك
ولاهنتي على التواجد خيتو...
The Master
02-01-2010, 11:23 PM
الله يرحم ابو راشد وجميع موتي المسلمين

ويسكنه فسيح جناته


والولد الصالح يدعو لوالده ويكثر من اعمال الخير في ثوابه


وكما قيل ( كفو بالموت واعظاا )

هلا ومرحب اخوي ناصر30
امين يارب...
اكيد...عسى ربي يقدرنا ويعينا على الخير...والدعاء...
احسنت اخي...والله يجزاك خير...

يامرحبا بك
ولاهنت...
The Master
02-01-2010, 11:30 PM
الله يرحم موتى المسلمين جميعا
بارك الله فيك اخوي

امين يارب...
وفيك يارب...
يامرحبا بك
The Master
02-01-2010, 11:35 PM
الله يرحمه ويحسن إليه ويجعل مثواه الفردوس الأعلى آميييييين

عندي الوالده الحين في المستشفى قاعدين كل يوم روح لها وماعدنا الا القران والدعا له والباقي على الله سبحانه وتعالى وهي في غيبوبه وعندها نزيف في الراس وارجوكم ادعوا لها بالشفاء العاجل لانه هي كل شى في حياتى وادعوا من الله سبحانه وتعالى ان يشفيها ويخليها لنا امي امي الغاليه

هلا ومرحب اخوي الووووعد...
امين يارب...الله يجزاك خير...

الله يشفيها يارب...ويقومها بالسلامه...
اجر وعافيه يارب...وعسى ربي يعينها ويعينكم...

يا مرحبا بك
The Master
02-01-2010, 11:40 PM
جزاك الله الف خير ..

صدق عشتها ... الله يرحمه يارب وجعله ف ميزان حسناتك ..

ويالله بحسن الخاتمه

هلا ومرحب اختي biz-qtr
ويجزاك يارب...
امين يارب...وجميع موتى المسلمين...

امين يارب...

تشكرين خيتو على المرور...

يامرحبا بك
ولاهنتي خيتو...
The Master
02-01-2010, 11:44 PM
الله يرحمه
أحداث مؤلمه
وبالذات إذا كنت فقدت عزيز لديك مسبقا
أولها أخوي
وثانيها أبوي
وثالثها أمي الله يرحمهم

قلبي حرقني عليها ماتت بالسرطان وبعد أيام بتكمل سنه على وفاتها

هلا ومرحب اختي نور الهدى...
امين يارب...
الله يصبركم يارب...ويعينكم...ويرزقهم الفردوس الاعلى يارب...

الله يرحمهم ويرحم موتانا وموتى المسلمين...

يامرحبا بك
The Master
02-01-2010, 11:45 PM
اللهم اغفر لحينا وميتنا , وصغيرنا وكبيرنا , وذكرنا وأنثانا , وشاهدنا وغائبنا , اللهم من أحيته منا فأحيه على الإسلام ومن توفيته منا فتوفه على الإيمان

امين يارب...
الله يجزاك خير...
The Master
02-01-2010, 11:47 PM
الله يرحمه ويعطيج العافيه على هالقصص الحلوه

امين يارب...
ويعافيك يارب...
تشكرين على المرور

يامرحبا بك
The Master
02-01-2010, 11:49 PM
تم التعليق على جميع الردود...
السموحه على التاخير في الرد...

انشغلت برجعتي للدوحه...ولما وصلنا خبركم انشغلنا من قلب...احم

واشكركم على دعواتكم الطيبه...ومشاركتكم...لاهنتوا جميعا...
sh50
03-01-2010, 12:01 AM
الله يرحم والدك ويغفرله00قصة مؤثره وفيها عبره لنا