حوادث وتجارب....وحلول

[هتـان قطر]

اخواني واخواتي الاعضاء والقراء..اصبحت مواضيعنا المفيدة قلة قليلة بالنسبة لبقية المواضيع

لذلك دعونا نفيد ونستفيد بالتجارب التي حصلت لنا

موضوعي هذا ان شالله بيكون ذو فائدة ومرجع للجميع..

ماهي التجارب والحلول الناجعة التي مرت عليك ومررت بها..؟

لاسمح الله حدث حريق في بيتك..ماهي الطريقة السليمة لاخمادها

وما هو التصرف الذي اتبعته وتنصح به..؟

شخص يأكل وحدث انسداد في مجرى التنفس " غص " ما هي الطريقة

السليمة والاسعافات التي قمت بها وكان تصرفك سليما..؟

موقف اخر استفدت منه واردت ان تفيد غيرك به..

طريقة جديدة ومبتكرة قمت بها وكانت ناجحة..

نبي تفاعل ..نبي المشكلة وحلها ..

نبي مشاركاتكم

[تحداني]

.. بارك الله فيك سيدتي الفاضله ..
وكتبه الله في ميزان حسناتك ..


مثل هذه المواضيع..
بالطبع ستعود على الجميع بالنفع والفائده..

...............................................
.
.

حادثه حصلت معي..
ولم أكن أتوقعها يوما ما ..


من الامور المعتادين عليها ان يكون تجمع العائله ..
سويا في البيت ..
وخاصه يوم الجمعه عندنا ..
نظرا لتواجد اخي المتزوج خارج البيت ..


لي بنت أخ عمرها تقريبا سنتين ..
مره من المرات كنت برفقتها في حوش البيت ..


وعند كل جوله ..
لابد أن تكون هناك علبه حلويات .. بيدي ..
في هذه المره لم تكن لدي تلك المفاجأه ..


تذكرت ان لدي ..
بعض الحلويات احتفظ بها في سيارتي الخاصه .. وقمت برفقتها لاحضار مفتاح السياره من الطابق العلوي ..



المفتاح .. مجرد ان تلمسي الباب ..
يفتح مباشره ..
ومجرد ان تدخلي السياره يقفل اتوماتيكيا ..


دخلت بنت اخي السياره ..
ووضعت المفتاح .. مكان وضح الكوب ..
من اجل ان اعطيها .. بعض الحلويات ..


رجعت خطوتين فقط للوراء ..
من اجلب ان أحضر حذائها ..
واذا بالباب .. يقفل ..



طبعا هي ما تعرف ايش السالفه ..
تضحك .. وتلعب بالادوات ..


أحاول اعلمها كيف تفتح الباب مافي فايده ..
اقول لها جيبي المفتاح .. واضغطي على الزر مافي فايده ..



بدأت تشعر بالحر ..
ولا ابالغ ان قلت لك .
. خفت عليها من الاختناق ..



مع الخوف الواحد ما يعرف يتصرف ..
ويرتبك .. جلست أبكي .
. رحت اجيب شئ اكسر فيه زجاج السياره ..




سبحان الله .. من قربت من دريشه السياره ..
تذكرت ان عندي مفتاح إسبير .. " إحتياطي "


ولولاه لماتت .. " بنت اخوي " إسملى عليها ..
وما راح اسامح نفسي .. طول العمر ..



.. الحلول ..
يجب أن نحتفظ بالمفاتيح الاحتياطيه ..
فلا ندري ماذا ستكون الظروف ..


ويجب ان نكون حذريين .. ولا نترك الاطفال ..
لان من الممكن ان يفعلوا اي شئ في غمضه عين ..
وغير مدركيين .. العواقب ..






الله يحفظ الجميع .. ويجملكم برضى الرحمن ..

[ام السعف]

فكرة جيدة يا هتان ومثل هذه المواضيع تفيد كثيرا .
أحد ابنائي عندما كان في عمر ال خمس سنوات غص بقطعة حلاوة وهو يلعب في حوش بيت ابوي
وكنت حزتها في طريقي بطلع من البيت مع خواتي و الا نسمعهم يقولون يكذب يكذب ما فيه شي
و نلتفت الا ولدي ماسك صوب رقبته ومب قادر يتنفس ، في الحقيقة لولا احمرار ويهه كنت بقول انه يمثل
لأنه كان هادي جدا و ساكت ، لكن يوم شفناه خلاص ما كان يتجاوب مع ضحك اليهال ومتفرغ لنفسه
اهنيه اختي قالت لي الولد بيروح فيها ، رحت صوبه اقول له اشفيك اشفيك ما رد علي ، الا اخوه يقول لي يقص علينا انه غص بالحلاوة ، اهنيه تأكدت انه بالفعل الولد فيه شي ( كل هذا يا هتان صار في لحظات )
اضربته خالته على اظهره ما نفع خافت و وخرت وما اعرفت تتصرف و روعوني بتوترهم ما حسيت الا اني حاطة صبعي في حلجه ودعسته لين لهاته و فريته ولميته من اظهره وهوست صوب معدته والا يكح كحة تطلع الحلاوة من بلاعيمه .

الحلول
المحاولة دائما على ضبط النفس حتى نتمكن من التصرف بشكل سليم في حالة الغص مثل ما جفت في احدى البرامج الأمريكية يفضل لم المغصوص و الضغط على اسفل
القفص الصدري صوب منطقة المعدة عن طريق لم المغصوص من الخلف.
اما طريقة الوالدة ادعسي صبعج في حلجه والأمور كلها بتكون سهالات .

[شاهيناز]

تسلمين اختي هتان
فعلا المواضيع القيمه اصبحت قليله في المنتدى اغلب المواضيع عن المراه وش تحب وتلبس وين تشرب الكوفي

ان شاءالله نقرى مشاركات مفيده

وتسلمين مره اخرى

[روح-قطر]

ههههههههههههههههههههههههههههههههه تذكرت شي مره عازمه اختي ورفيجتي عالمطعم وانا ما اكل دجاج قلت خلني ابلع لي شيشه طاووقيه كلتها ولكن وقفت في بلعومي والربع كيكي كي وسوالف وكفج خخخخخخخخ وانا اتعافر مع هالقطعه ابيها تنزل وماعرفت معنى الغازات اللي بالسفن اب الا منها شربت سفن احس شي يطرقع خخخخخخخخخخخخخخخخخخخخ..

وفجاه تعطفوا علي من عقب ماشافوني سااااااااااااااكته وتهفني على ظهري وتطلع اللؤلؤه خخخخخخخخخخ..

عاد لو اقولج شنو بنصح بتضحكين انصح كل وحده تعلج الاكل عدل مو تبلعه على طول :)

[عاشق الشهادة]

اختي هتان قطر لي رجعة بإذن الله بعد ما اطلع من العمل واروح البيت لأن مزاجي الحين متعكر :rolleyes2: من العمل

[دلوليانوز]

ولا شي..

[هتـان قطر]

تحداني الزمن,,,ام السعف,,,شاهيناز,,,روح قطر,,,عاشق الشهادة..دلوليانوز

مشكورين على التجاوب مع الموضوع وعرض حالات مريتوا بها وتغلبتوا عليها




من الاحداث اللي مرت علي ..اتذكر مرة كان علينا يوم عيد وكانت بني البكر يمكن

عمرها 5 او 6 سنوات وكنت ملبستها دلاغ وجوتي لزوم الكشخة وبالصدفة

كانت وحدة من الخدامات مصخنة ماي حار في قدر وحاطته على الارض ما ادري

من اللي طلب منها هالشي..المهم دخل واحد من الرجاجيل يسلم على الاهل واحنا

داخل واطلعت بنتي تسلم عليه " واكيد الهدف العيدية" المهم سلمت وارجعت ورا

الا تطيح رجلها في القدر الحار..وتصرخ ذيك الصرخة ,, ما ادري ساعتها كيف جاتني

او انا رحت لها,, فكيت الجوتي وفصخت دلاغها وهي تصارخ الا جلد قدمها منشال:rolleyes2:

شي يعور القلب,,المهم الحل اكيد بستغربون اني ما وديتها المستشفى!!

عمتي الله يرحمها تعرف في الطب الشعبي قالت ان وديتيها بيزوغون قلبها بالقص

وراح تتألم ..اشسوت؟؟

اخذت شعير واحرقته واطحنته لين صار بودرة سودا وجابت زيت النارجيل الاصفر

ويوميا كنت اعقمها بماي وديتول وشوي ملح ,, وبعدين احط زيت النارجيل واحط

فوقه بودرة الشعير المحروق..والحمدلله شفت بسرعة والحين الاثر مايبين الا اللي

بيدقق عليه..

واخذت هاذي الطريقة لاي حرق حتى لو بسيط الله يكفينا ويكفيكم شر الحريق

[هتـان قطر]

من التجارب الغريبه اللي سمعت عنها..يقولون اذا فيه بقعة في ملابسك

ماتروح بالغسيل ..صب عليها غرشة بيبسي وخلها ناقعه لمدة ساعة

وبعدين اغسلها وبتروح..:omg:

[واحد ثقة]

من التجارب الغريبه اللي سمعت عنها..يقولون اذا فيه بقعة في ملابسك

ماتروح بالغسيل ..صب عليها غرشة بيبسي وخلها ناقعه لمدة ساعة

وبعدين اغسلها وبتروح..:omg:


حليب العُلب المركز فعّال أيضاً في مثل هذه الحالات ،،

متابعين لك ،،

[هتـان قطر]

حليب العُلب المركز فعّال أيضاً في مثل هذه الحالات ،،

متابعين لك ،،


نعم الحليب سمعت عنه ..حليب الكرك :)

ياليت اخوي محمد شفيق تقول لنا عن تجارب مرت عليك

خصوصا في الرحلات البرية.. واحنا على مشارف التخييم وارتياد البر

[E L L E]

خوش موضوع والله متابعه

[هتـان قطر]

خوش موضوع والله متابعه

ياليت ماتبخلين علينا ببعض التجارب اللي مرت عليك اختي ايللي

تابعينا وفالك طيب

[كازانوفا]

حلو الموضوع
اللى صار معاي كنت جالسه بعزاء ام صديقتي وبنت اخوها غصت بقطعة حلاوة وللاسف محد منتبه لها غير امها واطالعها بتشوف البنت لوين ممكن تتحمل الغصه وقاعده اطالعها بالصدفة طالعت البنت اتوقعت خلاص انها رايحه فيها وجت عيني على امها البااااااااااارده:anger1: وقمت من بين الموجودين واقلب البنت لانها طفله ما تعدت السنتين لازم ننزل الطفل يصير راسه للارض والضرب الخفيف على ظهره لحد ما اطلعت والكل انتبه على طريقة قومتى من مكاني والحمدلله انه ما صار عزيين بعد ما كان عزاء واحد :shy:
ومشكوره على الموضوع

[هتـان قطر]

من العلاج الشعبي اللي جربته القهوة المطحونه والكركم والملح

البعض يستعمل القهوة لوحدها والكركم لوحدة لكن انا خلطتهم مع بعض

هذا العلاج ينفع لوقف نزيف الدم اذا تعرض احد الاشخاص وغالبا الاطفال

الى قطع بالسكين او وقع على حد قاطع او شج راسة..او يده او رجله

توضع القهوة المطحونة او الكركم على مكان القطع ويتم الضغط علية

لفترة بسيطة عندها سيتوقف الدم ويعمل هذا العلاج على تلاحم الجرح بسرعة

بدل الغرز والخياطة..

[هتـان قطر]

حلو الموضوع
اللى صار معاي كنت جالسه بعزاء ام صديقتي وبنت اخوها غصت بقطعة حلاوة وللاسف محد منتبه لها غير امها واطالعها بتشوف البنت لوين ممكن تتحمل الغصه وقاعده اطالعها بالصدفة طالعت البنت اتوقعت خلاص انها رايحه فيها وجت عيني على امها البااااااااااارده:anger1: وقمت من بين الموجودين واقلب البنت لانها طفله ما تعدت السنتين لازم ننزل الطفل يصير راسه للارض والضرب الخفيف على ظهره لحد ما اطلعت والكل انتبه على طريقة قومتى من مكاني والحمدلله انه ما صار عزيين بعد ما كان عزاء واحد :shy:
ومشكوره على الموضوع


اما سالفة الغص حدث ولا حرج ..دايما يمرون عيالنا بهالحالة

والحمدلله رحمة الله واسعه ان احنا ننتبه لهم ,, لكن مثل ماقلتي

لازم نعرف الطريقة السليمة لاسعاف الشخص المتعرض للغص

ومشكله اذا كان الشخص كبير كيف بنتصرف ؟؟

[ضوى]

حلو الموضوع عجبني

السالفة انه بنتي يوم انها صغيرة اذا بغت شئ او عصبت تصيح صياح لين يزرق ويهها ويتوقف النسم عندها وتصير زرقا من قلب ، وانا من الخوف اسوي لها اللي تبي وترد الحمد لله بسرعة ، ومرة من المرات كنت قاعدة انا وامي رحمة الله عليها وبنت خالتي وبنتي بحضن بنت خالتي كان عمرها يمكن سنة وتعصب مدري على شنو وتصيدها الحالة وتخاف بنت خالتي عليها وتصيح وامي اصفر لونها وانا عادي ، والله من قهري من الخوف اللي شفته في عين امي رحمة الله عليها اللي سببته هالمفعوصة ضربتها كف على ويهها وصرخت فيها قلت لها تنفسي وسبحان الله ثواني ولا كانه فيها شئ ، وعقب هالكف اللي جاها حرمت تسوي لي هالحركة :) ،
العبرة لا تخافون من حركات اليهال تراهم يعرفون يمثلون :)

[بـــــــنت النوخـّــــذه]

اخواني واخواتي الاعضاء والقراء..اصبحت مواضيعنا المفيدة قلة قليلة بالنسبة لبقية المواضيع

لذلك دعونا نفيد ونستفيد بالتجارب التي حصلت لنا

موضوعي هذا ان شالله بيكون ذو فائدة ومرجع للجميع..

ماهي التجارب والحلول الناجعة التي مرت عليك ومررت بها..؟

لاسمح الله حدث حريق في بيتك..ماهي الطريقة السليمة لاخمادها

وما هو التصرف الذي اتبعته وتنصح به..؟

شخص يأكل وحدث انسداد في مجرى التنفس " غص " ما هي الطريقة

السليمة والاسعافات التي قمت بها وكان تصرفك سليما..؟

موقف اخر استفدت منه واردت ان تفيد غيرك به..

طريقة جديدة ومبتكرة قمت بها وكانت ناجحة..

نبي تفاعل ..نبي المشكلة وحلها ..

نبي مشاركاتكم


*لاسمح الله حدث حريق في بيتك..ماهي الطريقة السليمة لاخمادها

وما هو التصرف الذي اتبعته وتنصح به..؟تبين الصج والله مادري يمكن اصارخ اطقق البيبان في البيت استنجد بهم او اذا حريق قوي اتصل بالمطافي بس اهم شي اطلع الي موجودين وقلعه البيت يتعوض بس اشلون اطفيه للاسف اتمنى يتم تعميم على جميع المنازل خدمات للطوارئ كالحريق يعني اي بيت مافيه طفايات حريق مع ورقه تبين خطوات مواجه الحريق يسوون لهم غرامه 000 لان وايد ناس مايعرفون يدبرون عمرهم ومنهم (انا )

*شخص يأكل وحدث انسداد في مجرى التنفس " غص " ما هي الطريقة

السليمة والاسعافات التي قمت بها وكان تصرفك سليما..؟

اهاااااااااااااا هذي السالفه صارت جدامي في بيتنا الوالده الله يحفظها اشرقت وكالعاده مافي الا تانكي الماي يخر من عيني ماعرفت اسوي شي بس شفت اخوي يضمها من على بطنه من ظهرها ويضغط اسفل البط والحمد الله ارجعت تتنفس مادري اعتقد يبيلها جسم وبنيه تقدر تضغط وسرعه بديه0

عموما اختي للامانه بالمواقف ذي انا اعترف ماعرف ادبر عمري الا بالصياح والاستنجاد بشخص قريب <<< ياكثر ماتسندر الجماعه


والله انا مره كنت اشوف البرنامج الشهير 911 الاجنبي استعجب من هاليهالو الي عمرهم بو 2-3-4-5-6-7 سنوات اذا صار شي طارئ في بيتهم يدقون على الشرطه ويدلونهم البيت ويوصفون المكان مهب اعيالنا مايعرفون كوعهم من بوعهم 000

[هتـان قطر]

حلو الموضوع عجبني

السالفة انه بنتي يوم انها صغيرة اذا بغت شئ او عصبت تصيح صياح لين يزرق ويهها ويتوقف النسم عندها وتصير زرقا من قلب ، وانا من الخوف اسوي لها اللي تبي وترد الحمد لله بسرعة ، ومرة من المرات كنت قاعدة انا وامي رحمة الله عليها وبنت خالتي وبنتي بحضن بنت خالتي كان عمرها يمكن سنة وتعصب مدري على شنو وتصيدها الحالة وتخاف بنت خالتي عليها وتصيح وامي اصفر لونها وانا عادي ، والله من قهري من الخوف اللي شفته في عين امي رحمة الله عليها اللي سببته هالمفعوصة ضربتها كف على ويهها وصرخت فيها قلت لها تنفسي وسبحان الله ثواني ولا كانه فيها شئ ، وعقب هالكف اللي جاها حرمت تسوي لي هالحركة :) ،
العبرة لا تخافون من حركات اليهال تراهم يعرفون يمثلون :)


ضوى انتي متأكدة انها تمثل..يمكن كان عندها ضيق في القصبة الهوائية او شي؟؟!!

هذي الحالة دايما تمر على الكثير من الاطفال ويسمونها السكرة..

امي دايما تحذرنا اذا بكى حد من عيالنا تقول لا تخلينه يسكر شيليه بسرعه

لكن صحيح ما نعرف شاللي يخلى طفل تجيه هالحالة وطفل لا..

اتمنى اللي عنده خلفية عن هالحالة او الاسباب اللي تؤدي لهالحالة

انه يفيدنا..

تسلمين ضوى ونطمع في تجارب اخرى وحلول لها

[هتـان قطر]

*لاسمح الله حدث حريق في بيتك..ماهي الطريقة السليمة لاخمادها

وما هو التصرف الذي اتبعته وتنصح به..؟تبين الصج والله مادري يمكن اصارخ اطقق البيبان في البيت استنجد بهم او اذا حريق قوي اتصل بالمطافي بس اهم شي اطلع الي موجودين وقلعه البيت يتعوض بس اشلون اطفيه للاسف اتمنى يتم تعميم على جميع المنازل خدمات للطوارئ كالحريق يعني اي بيت مافيه طفايات حريق مع ورقه تبين خطوات مواجه الحريق يسوون لهم غرامه 000 لان وايد ناس مايعرفون يدبرون عمرهم ومنهم (انا )

*شخص يأكل وحدث انسداد في مجرى التنفس " غص " ما هي الطريقة

السليمة والاسعافات التي قمت بها وكان تصرفك سليما..؟

اهاااااااااااااا هذي السالفه صارت جدامي في بيتنا الوالده الله يحفظها اشرقت وكالعاده مافي الا تانكي الماي يخر من عيني ماعرفت اسوي شي بس شفت اخوي يضمها من على بطنه من ظهرها ويضغط اسفل البط والحمد الله ارجعت تتنفس مادري اعتقد يبيلها جسم وبنيه تقدر تضغط وسرعه بديه0

عموما اختي للامانه بالمواقف ذي انا اعترف ماعرف ادبر عمري الا بالصياح والاستنجاد بشخص قريب <<< ياكثر ماتسندر الجماعه


والله انا مره كنت اشوف البرنامج الشهير 911 الاجنبي استعجب من هاليهالو الي عمرهم بو 2-3-4-5-6-7 سنوات اذا صار شي طارئ في بيتهم يدقون على الشرطه ويدلونهم البيت ويوصفون المكان مهب اعيالنا مايعرفون كوعهم من بوعهم 000





تبين الصراحة اغلبنا نفس حالتك..محتاجين توعية من قلب ومحتاجين نضبط انفسنا

ونكون هاديين ونعرف نتصرف في مثل هالمواقف..

وبالنسبة لطفايات الحريق الله لا يحوجنا لها..عندنا في البيت بس مثل الزينة

لا انا اعرف ولا خداماتي يعرفون ..

مرة من المرات كنت طالعة من البيت الا تتصل خدامتي تصارخ والحمدلله كنت

راجعة وقريبة من البيت..الا تقول كلمات متقاطعة ما فهمت الا حريقة مطبخ غاز

كنت بفقد اعصابي..ما همني الا عيالي..جيت الا هدوء وكل شي طبيعي

طلعت للمطبخ الخارجي الا اثار بودرة بيضا وما فيه حريقة :eek5: شالسالفة

انفلت الهوز المتصل بالغاز او تسرب المهم شبت حريقة في المطبخ

وبفضل من الله كان ولدي الكبير موجود لما سمع الصراخ اخذ طفاية الحريق

وبسرعة طفاها قبل يحترق اي شي..غالبا ما يكون الرجل يحسن التصرف

في مثل هالحوادث..الله يكافينا واياكم شر الحريق والحوادث

تسلمين بنت النوخذة وحاولي تتعلمين ضبط النفس << انصحي نفسك بالاول:secret:

[هاجر]

أختي هتّان بارك الله فيج والله يكثر من أمثالج
الصراحة افتقدنا :( مثل هالمواضيع المفيدة والممتعة
ألف شكر لج على اتاحة الفرصة لنا بمشاركتج هذا الموضوع القيم :)



بالنسبة لتجاربي الخاصة فالله الحمد والمنه مامرت علي حالات طارئة جدا غير حوادث اليهال
والنزيف :weeping: الخفيف من الأنف واللثة ومناطق الجسم الأخرى نتيجة المعافر واللعب الخشن الله يحفظهم إن شاء الله
فلما تصادفني مثل هذي الحالات ومثل كثير غيري أول شيء نسويه نجيب ثلج وعلى مكان الإصابة ونلاحظ أنه الدم مايوقف :rolleyes2:
لحد ماسمعت عن القهوة العربية المطحونه :) تاخذين شوي منها وعلى المكان المطلوب ويوقف على طول بإذن الله
ويبرى الجرح بسرعة طبعاً ما أقصد النزيف الحاد وإنما الجروح السطحية الطفيفة.

http://www.botanical.com/products/bulkherb/graphics-c/curry_powder.jpg





وفي حادث عرضي صار لولدي لما كان يلعب مع أخوه الصغير وقام الأخير وبط عينه :omg:
وتم ولدي يصيح ومو قادر يفتح عينه وأنا سويت المعتاد حطيت له الكمادات الباردة وثلج بعدين طهرتها بقطرة وجل معقم للعين :eek5:
وظل يتألم ويصيح ومافي فايدة فقلت أصير دكتورة كم دقيقة :shy: وفتحت عينه
http://www.majaless.com/up/get-12-2009-2zxb2vyb.JPG (http://www.majaless.com/up)

إلا أشوف البؤبؤ رايح فيها ومتعفس وعلى طول طيران على الطوارئ بعد لفه عقيمة وروع من المستشفيات الخاصة :(


والحمدلله إنه الشرخ كان سطحي ولكنه كبير جداً :(
والله يجزيها خير الدكتورة بنت بلادي ماقصرت الصراحة اهتمام وشرح وتوضيح الله يوفقها يارب


النصيحة:
عند حدوث أي حادث أول شيء لازم الواحد يمسك أعصابه ويهدي نفسه قدر المستطاع عشان يعرف شنو اللي ممكن يسويه.
ومثل حوادث الحروق واصابات العين والكسور طبعاً مافي شيء اسمه طب شعبي طب بديل أحاول أخفف الإصابة نعم،
ولكن ما أهمل الشخص وأقول سويت اللي علي وبعدها نندم العمر كله
لا في مستشفيات وفي أطباء وطبيبات فيهم كل الخير :)




هذي تجاربي واسمحوا لي على الإطالة
والشكر الجزيل لج أختي هتّان مرة ثانية
:)

[هتـان قطر]

أختي هتّان بارك الله فيج والله يكثر من أمثالج
الصراحة افتقدنا :( مثل هالمواضيع المفيدة والممتعة
ألف شكر لج على اتاحة الفرصة لنا بمشاركتج هذا الموضوع القيم :)




النصيحة:
عند حدوث أي حادث أول شيء لازم الواحد يمسك أعصابه ويهدي نفسه قدر المستطاع عشان يعرف شنو اللي ممكن يسويه.
ومثل حوادث الحروق واصابات العين والكسور طبعاً مافي شيء اسمه طب شعبي طب بديل أحاول أخفف الإصابة نعم،
ولكن ما أهمل الشخص وأقول سويت اللي علي وبعدها نندم العمر كله
لا في مستشفيات وفي أطباء وطبيبات فيهم كل الخير :)




هذي تجاربي واسمحوا لي على الإطالة
والشكر الجزيل لج أختي هتّان مرة ثانية
:)

الحمدلله على سلامة ولدك اختي هاجر وشي اكيد ان الحالات الطارئة والحرجة محتاجة

الذهاب للمستشفى ولكن هناك اسعافات اولية محتاجين نتعلمها قبل لا يوصل الشخص

المصاب وهو في الطريق للمستشفى..

لابد من معرفة تجارب الاخرين يقولون اسأل مجرب ولا تسأل طبيب :)

[هاجر]

الحمدلله على سلامة ولدك اختي هاجر وشي اكيد ان الحالات الطارئة والحرجة محتاجة

الذهاب للمستشفى ولكن هناك اسعافات اولية محتاجين نتعلمها قبل لا يوصل الشخص

المصاب وهو في الطريق للمستشفى..

لابد من معرفة تجارب الاخرين يقولون اسأل مجرب ولا تسأل طبيب :)





الله يسلمج عزيزتي من كل شر
ونعم هذا المطلوب تخفيف الالم والإصابة لحين الوصول للمستشفى
والله يحفظ الجميع صغار وكبار من كل شر ومكروه اللهم آمين


ورفع للإستفادة
:)