+++ تحذير +++

[jajassim]

حذر (( العميد محمد عبد الرحيم معرفية رئيس قسم التخطيط والسلامة المرورية والرادار بإدارة المرور )) بعض الأشخاص الذين يضعوا المطبات أمام منازلهم بدون ترخيص؛ حيث ستتم إزالة المطبات ومخالفة واضعها بغرامة قدرها 12 ألف ريال، مشيرا إلى أن لجنة الإغلاقات تختص بالأماكن الخطرة والمطلوب إغلاقها والفتحات التي تسبب الحوادث، وإعداد الرسومات واقتراحات التخطيط لعمل فتحات في بعض الشوارع أو إغلاق فتحات موجودة تشكل خطورة.


:omg::omg:

[هبوب الشمال]

طيب بس فيه شوارع واااااايد تحتاج مطبات واليهال لين لعبوا قدام بيوتهم او في الفرجان هم الضحايا

ليش ما ييسرون الامور عشان الناس ما تخالف

[alqtri]

انا اخبر اللي بيسوي مطب قدام بيته بحسابه الخاص بيحط المطبه فوق طبقة القار يعني مافيه تحفير او شي

هذا اول شي وثاني شي وش استفيد انا ان شالو المطبه وثاني يوم اندعم واحد من اليهال اللي يلعبون او طلع من البيت بالغلط ودعمته السياره بيرجع الولد صاحي ؟؟

اخبر اللي يبي يسوي مطبه قالو تبلغ في اقرب مركز شرطه نبي مطب هنا في المكان الفلاني

ويتاخرون عليك لين مايحطون المطب اخبر صارة قدام مجلس واحد من الربع

والسبب الشباب اللي يسرعون قدام المجلس بعد المطبه مافي حد من المسرعين يمر بسرعه غصب عنهم بيخف :)

[مطيع الله]

عقوبة 12000 ريال على أي قانون وعلى أي بند في الميزانية؟
هل ننتظر المزيد من هذه العقوبات؟

اللهم ارحم عبادك الصابرين

[bo_hamad]

يجب على الجميع اتباع القوانين وعدم مخالفتها .

وفي حال طلبكم لذلك عليكم مخاطبة الجهة المختصة بذلك.

ويعطيك الف عافية سعادة العميد محمد معرفيه .

[عبد الوهاب]

انا مع المطبات الطبيعية الى اتحد من السرعة خصوصا بين البيون والفرجان . بس الله ايهديهم بعض المطبات اتكون مبالغ فيها وغير مطابقة للشروط. واحد حط مطبة جدام بيتة والله ان حول المرور بسببها .

[Riku3]

اتمنى يكون في اجراء تحذيري قبل فرض العقوبة .. كأن يتم اعطاء المخالف اشعار رسمي بمهلة شهر تسلم باليد لازالة المطب وبعدها اذا اصر ولم ينصاع يتم مخالفته .. وليس التصيد لان والله ملييييييييييينا من الدفع على الطالع والنازل وكأن المرور تحولت لشركة ربحيه .

ويعطيك العافية جاسم :) .

[hamoor4ever]

ليش زعلانين ياناس ، حتى الشوارع تبونها تصير لكم مره بتحطون بورت كبن ومره بتحطون مطبات ، اخاف باجر يطلع لنا واحد مسكر الشارع يقول مسوين لي السيارات ازعاج بمرورهم جنب بيتي ، اللي يبغي يقدم طلب بالطرق القانونيه ولا يزعل والعقوبه مبلغها جيد بس ياليت التطبيق وماتدخل الواسطات في هالسوالف

مشكور جاجاسم

شكرا

[إينشتاين]

شلون يعرفون من الي حط المطبه ؟؟

باجيب لي عمال ويسوون المطبه ،، ولا من شاف ولا من دري،،

باقول مالي خص،، مادري من الي حطها

[الرويـس]

واللي حاط مطب وهمي يشمله التعميم ؟ :secret:

اللي يشوفه غصباً عنه يوقف :eek5:

[سمو]

وآنا اقول ليش شالوا المطبات الي مسوينها عند المدرسة البريطانية إلي في الخيسه بس والله حرام عليهم هالمدرسة وايد مكانها خطر وقريب من الشارع مهب كفاية البنت الي راحت في المدرسة اللبنانية يعني الحين الماده صارت أهم من ارواح الناس

من كم يوم شفت اليهال طالعين من الحديقة الي مقابل مدرسة ام القرى بالدفنه ورايحين مدرستهم (نيوتن )وطبعا لازم يعبرون الشارع ولا فيه مطبات ولا شي الله يستر بس لا تصير مصيبه من روحتهم للحديقة والعالم تشخط في هالشارع ومسابق بين لدريوليه ..والله لو يحصلي أحط مطبه في شارعهم واخذ أجر في هالبزران ونطرتهم القايله لين حد يتعطف ويتكرم ويوقف لهم ويسمح لهم المدرس بعدها يعبرون

[yosif1]

المطبة مش حل لتخفيف السرعة
المطلوب اعادة تصميم طرف الفرجان
حيث يلاحظ ان هناك طرق رئيسية او شبة رئيسية تفتح اما منازل يجب
ان تكون طرق فرعية هي التي تمر على المنازل