علاقة المدير بالموظف ...شلون تكون .بحدود وله ممكن تتعمق اكثر.؟؟!!

[bshayer]

السلام عليكم ورحمة الله وبركاته ..


احم بدخل بالموضوع على طول ..

علاقة الموظف بالمدير او اي مسؤؤل اعلى منه ...
هل ممكن تقوي هذي العلاقه وتتعمق ..وله لازم بحدود العمل فقط ..تقدر تتواصل معاه وتعزمه لبيتك او لعرسك او عرس احدى من اهلك ..وله فقط بالمناسبات والمسجات فقط ..واوقات الدوام السلام .فقط ..
وهل مدير لازم يكون جلف او غليط بالتعامل وشديد ..وله هو انسان عادي حاله من حال الموظف ...
ومن هو المدير المثالي ...واذا فيه مدير ممتمز وانسان كفو تعمق معاه وتاخذ وتعطي مثل اي زميل لك او لج ...وكلام الناس اذا شافوكم بمكان عام او علاقتك به بالمدير اكيد بتسمع انه انك انت تبي مصالحه من هالمديراو حت العكس:anger1: ..رااح تتاثر بكلام الناس:omen2::anger1: وله لا سواء المدير او الموظف ...



وسلامتكم ..:shy:

[عابر سبيل]

تحية على هالموضوع (الواقعي) جدا
و المهم يا اخت/بشاير..

انا على عجل..
بس قلت ابدا و باعود تالي- ان كان لنا عمر-

ابدأ
بنقطة شدت انتباااهي كثيير..
قولج
"
مثل اي زميل لك او لج

"

ما ادري ان كنتي تحبين توضحين جملتج..

بس انا اقول..
هالعلاقة..ممكن -نوعا ما- ايصير فيها
شي من التطور...
بس هي
تعتمد او تختلف...ان كان احد الطرفين..
المسؤول او الموظف اللي تحته..
احدهم رجل و الاخر امرأة!

خاصة في اماكن العمل المختلطة!

لنا-باذن الله عودة-

[دلوليانوز]

اذا صار نصيب

He is my boss

[ريم المدينة]

المشكلة ان في ناس تبيج اتطيحين الميانة وياها... يعني حسب اللي جدامج... جسي النبض ^^

[الوعب]

السلام عليكم ورحمة الله وبركاته ..


احم بدخل بالموضوع على طول ..

علاقة الموظف بالمدير او اي مسؤؤل اعلى منه ...
هل ممكن تقوي هذي العلاقه وتتعمق ..وله لازم بحدود العمل فقط ..تقدر تتواصل معاه وتعزمه لبيتك او لعرسك او عرس احدى من اهلك ..وله فقط بالمناسبات والمسجات فقط ..واوقات الدوام السلام .فقط ..(العلاقه في العمل لها حدود واحترام اما خارج العمل فلك ما تشاء )


وهل مدير لازم يكون جلف او غليط بالتعامل وشديد ..وله هو انسان عادي حاله من حال الموظف ...(يجب ان يكون محنك وحكيم , لا الغلظه ولا الترخي بل الوسطيه)

ومن هو المدير المثالي ... ...(الذي يعطي اكثر من موظفينه ويكون مثال في الصدق والامانه)

وهل يمنع ان يكون موظف عندي في العمل وفي نفس الوقت صديقي خارج العمل؟ طبعا لا
وهنا تأتي فن المعامله

وسلامتكم ..:shy:


المحبه والاخوه والايثار = اداره او قسم مميز

[nouar]

اكيد المهم عندي ولا غلطه ..

احسه بده ماكينه قدامه مب بني ادم من لحم ودم ..

[ودي أكون]

على حسب شخصية المدير :

فإذا كانت شخصية المدير قويه .. يعني عقلاني وقانوني .. فعادي ان يعمق علاقاته بموظفينه سواء داخل او خارج العمل ... لان شخصيه ماتعرف اتجامل او تخلط عاطفتها وصداقتها مع القانون ..

أما اذا كانت شخصية المدير .. عاطفي او ماعنده اسلوب القيادة .. فهذا يفضل انه يكون علاقته بالموظفين سطحيه جدا جدا .. لان راح يستغلونه الموظفين .. او راح يخلط علاقاته على حساب القانون ..


:)

[بـــــــنت النوخـّــــذه]

المدير ترى انسان مثلنا بشر يمر بافراح يباركوله ويمر باحزان يواسونه 0000 مايفرق بينه وبين الموظفين غير (درجه المنصب) 00000000000

[ضوى]

انا ومديرتي مثل الخوات تحس فيني واحس فيها وكل زميلاتي في الشغل نفس الشئ معاها مب بنفس الدرجة طبعا، لاني احس وايد انها قريبة مني وانا قريبة منها بس كل شئ كوم والشغل كوم ثاني يعني الشغل شغل وبس وماتدخل العواطف ابدا في هالشئ ، وهي وايد تحب تشاركني فرحي وحزني وانا بعد احب اوقف معاها بالفرح قبل الحزن يعني فيه علاقة انسانية بينا قبل العلاقة بين موظف ومديره

[ضوى]

علاقة الموظف بالمدير او اي مسؤؤل اعلى منه ...
هل ممكن تقوي هذي العلاقه وتتعمق ..وله لازم بحدود العمل فقط ..تقدر تتواصل معاه وتعزمه لبيتك او لعرسك او عرس احدى من اهلك ..وله فقط بالمناسبات والمسجات فقط ..واوقات الدوام السلام .فقط ..

كل شئ بيننا مسجات وتلفونات وعزايم الحمد لله

وهل مدير لازم يكون جلف او غليط بالتعامل وشديد ..وله هو انسان عادي حاله من حال الموظف ...

بالعكس كل ماكان المدير ودود وبسيط مع موظفينه كل ماكان انجاز الشغل اسرع وجودة اكثر

ومن هو المدير المثالي ...واذا فيه مدير ممتمز وانسان كفو تعمق معاه وتاخذ وتعطي مثل اي زميل لك او لج ...وكلام الناس اذا شافوكم بمكان عام او علاقتك به بالمدير اكيد بتسمع انه انك انت تبي مصالحه من هالمديراو حت العكس ..رااح تتاثر بكلام الناس وله لا سواء المدير او الموظف ...

اذا على الناس مابتترك الناس في حالها المهم نظرتنا لبعض اشلون وهذا يكفي

[الهاشم]

موضوع الطرح رائع وواقعي .. ويحتاج مجلدات للكتابه فيه
بإخــــــــــــــــــــــــــــــتصـــــــــــــــ ـــــــار
على المدير او المسؤول .. ألّا يزيل الكلفه والحواجز مابينه وبين العاملين معاه .
ففي التعامل .. من الافضل مسك العصا من المنتصف (تعبير متعارف عليه)
مع الاهتمام بمبدأ الثواب والعقاب .
ولكن لا يجب ان تتحول العلاقه إلى صداقه بالعمل او خارجه .. وانصح بعدم اعطاء الموظف اسرار العمل او خارجه .. لأن من المحتمل ان تتوتر العلاقات
فيما بينهم ويقوم الموظف بكشف اسرار المدير .!
اما المناسبات الانسانيه .. فمن الافضل تلبيتها سواء بزواج او لا قدر الله احزان او وليمه اوغيره .
فالعلاقه يجب ان تكون في حدود العمل فــــــــــــــــــــــــــــــقط .!!

[!الشايمه!]

المدير الناجح....هو القائد الناجح...اللي قادر انه يوازن بين



احترافية العمل ( الجدية..اتخاذ القرارات الصحيحة...بدون مجاملة..العدل..عدم التفريق
بين الموظفين...بروز الشخصية القوية القادرة على التحكم بالموقف مهما صعب..الخ)....



وبين العلاقات الانسانية ( الاحترام اساسها..مراعاة ظروف الموظف واهتمام به..
تعامل فرندلي او اخوي يحسس الموظف بالأمان وتريحه في موقع العمل..
البعد عن التسلط والضغط على الموظف...الخ)


والثقة بالنفس هي اهم صفة تساعد المدير على هذا التوازن.....



متى ماقلت ثقته بنفسه....بحث عن التسلط لفرض رايه وابراز شخصيته بشكل غير واعي...

............



بالنسبة لي كموظفة....طريقة تفكيره......! واحترامه
لنفسه اولاً.........ثم لمن حوله......

تحدد لي طريقة التعامل معه بود وباحترام متبادل.....او ابقاءه بعيداً قدر المستطاع...!



تحية

[جاسم القطري]

موضوع وااايد حلووو

المدير الناجح هو اللي يعرف شلون يوازن بين شغله وحياته برا الشغل مع الموظفين

مب مشكله تكون العلاقه قريبه وقويه وهالشي ممكن يفيد المدير نفسه ويفيد الشغل

ساعات تمر اوقات في الدوام يكون في ضغط وشغل وايد وتكون هناك حاجه انه الواحد يضغط على نفسه ويشتغل زياده او يطول بالدوام شوي

في موظفين يشتغلون بحماس وما يتشكون ويوم تسأله ليش يقولك بكل بساطه مسئولي زين معاي ويقدرني


بس ساعات في ناس يفهمون السالفه غلط من يششوف المسؤل معاه اووكي

يقوم يتأخر عن الدوام وما يشتغل عدل

ولا قالب الشغل ميلس على اساس انه المدير صار واحد منن الربع

في النهايه هالشي يعتمد على الطرفيين :)

[ريم المدينة]

و الله في مدراء ما همها الشغل.. تبي السوالف و الضحك والحششش....

بالعربي الشغل مب من اولوياتها<< عيل ليش صايرين مدراء اذا ما يبون اللي يشتغل؟؟

الله اعلم..

[ع.م]

أحس أفضل تكون العلاقة بزنس وبس.. لأن إذا دخلت الشيمة في السالفة بيشغلني زيادة وبيعطيني أشيا مب مطلوب مني أخلصها..من باب الميانة وسرعة إنهاء الشغل.. وهقة,,،

مافي داعي يعرف أي شي عن حياتي الشخصية.. أهم شي الشغل يوصله متقن و أول بأول..