شباب ابي اسوي عملية ليزك

[الاستاندر]

شباب وين تنصحوني اسوي عملية الليزك انا خاطري اسويها في الدوحه
وماودي اسافر سمعت عن الدكتور خالد الشريف
وكنت بسافر حق الدكتوره هيفاء المحمود ولا فاطمه الدوسري بس مادري وين اسويها
وين تنصحوني وين احسن مكان
وابي اعرف كل شي عن العمليه
تكفوووون شجعوني هههههههههه

[حليتان*]

بالتوفيق


واتمنى حد يفيدك

[::Mo0on'hm::]

اهلن اهلن

انا اقول سوها فالبحرين وانت مغمض بعد هع

انا سويتها من سنتين عند الريفي فالبحرين

الصراحه شغل عدل وسعره زين كله كله الفحوصات والعمليه والدوا كلفتني 6000 ريال

ومب بس انا ماللي سويت انا وخالتي وريلها ومرت خالي والعيله كلها ناويه تروح

[شجرة الدر]

اغلب اللي اعرفهم مسويينها في البحرين ،،

وكلهم الحمدلله ،،

[mayoom]

دكتور مؤمن الريفي ممتاز..
أمي مسوية العملية عنده من عشر سنوات
والحمد لله أمورها طيبة ..
وعندك دكتورة هيفاء بعد ممتازة
كل العايلة يتعالجون عندها..
استخير وتوكل على الله

[بوخالد911]

سوويتها عند د خالد الشريف

شغل مرتب

التكلفة : 9000 ريال

سوووها ونت بالديرة أبرك لك

صج بالبحرين أرخص ب 3000 ريال

بس احسب التذاكر
الفندق
المشرب والماكل
طلعات ومجمعات ووووو


بتطلع عليك اكثر من 9000 ريال


والقرار لكم .........


تحياتي قبل أن أتخلص من نظاراتي


مسيوو / بوخالد911

[الاستاندر]

مرحبتين شباب والله ماقصرتوا على ردودكم
بوخالد والله انك طمنتني وانا حاب اسوويها هني
والدكتور خالد الكل يمدحه وانت اول واحد تقول سويت عنده شلون شغله وشلون العمليه

[بوخالد911]

مرحبتين شباب والله ماقصرتوا على ردودكم
بوخالد والله انك طمنتني وانا حاب اسوويها هني
والدكتور خالد الكل يمدحه وانت اول واحد تقول سويت عنده شلون شغله وشلون العمليه





شغله اووك

3 د لكل عين
او 4 دقايق بالكثير
وبعدها تقووم

سوويتها بالليل

وعندك مراجعات وياهم بمركز العيون التخصصي بعد اشارات السينما صووب مجمع الجبر لتكنولوجيا النظر



نصيحة : لو قررت ؛ خلااااص لا تسئل ناس
يجييك 1 ويخررب علييك

خلااص اعقلها وتوكل:victory::victory::victory:

مووفق

[الاستاندر]

الله لايهينك وانا عندي موعد عندهم فحص
وعقب انتظر الدكتور خالد يجي الدوحه
وانا الصراحه قريت له مواضيع واجد وثاني شي عنده لقاء في الام بي سي
وهو الحمد لله معروف
وان شاء الله بتوكل على الله وبسويها
وشكرا على المساعده

[نشميّه]

عيادة الدكتور يوسف بو ألفين
في دكتور زائر اسمه أسامه ابراهيم
ممتاز .. وانصحك فيه

[الاستاندر]

شكرا اختي نشميه بشوف ان شاء الله وبستخير
سمعت عنه الكل يمدحه

[هند88]

انا سويتها في البحرين تمام عند العرييض واختي سوتها في الدوحه عند خالد الشريف بعد تمام ...احسن لك سوها في الددوحة.. ماتدري يمكن تتعب شوي .. فااحسن في الدوحه ..

[وكراوي]

السلام عليكم

اخوي نصيحه لوجه الله تعالى توكل على رب العالمين وسوها عند الدكتور خالد الشريف

زوجتي مسوية العملية عنده من اربع سنوات والحمدلله مرتاحه ماتشتكي من شي

اله يوفقك وييسر لك امورك ويقومك بالسلامه وتشوف مثل زرقاء اليمامه

تحياتي

[بوحارب]

ارفيجي مسويها في البحرين عند فاطمة الدوسري وامورة صارت اوكي

الله يشفيك يارب

[واقعي وصريح]

انا سويتها عند د خالد الشريف بصراحه ممتاز والعمليه ما تاخذ 10 دقايق

انا طلعت من العمليه على طول رحت الميلس العب ورقه :)

جد يده خفيفه ومتمكن من شغله

عسى الله يوفقك

[bshayer]

انا بعد ادرس الموضوع ..اسوي وله مااسوي ..:(
الي سواها عادي يستخدم النت والكمبيوتر وكم ساعه تجلس على الجهاز الكمبيوتر..:weeping:
وبعدين الي عنده فكره عادي استخدم العدسات الملونه ...وله راح انحرم منها يعني لوزم الكشخه والرزه ..:shy:

اخوي بشرنا بعدين ..
ابي اعرف التفاصيل اكثر

[ريومه]

مرحبا اخوي ’’

انا توني مسويه العمليه من شهر بس عند مأمون الريفي فالبحرين العمليه ماخذت مني عشر دقايق وبصراحه منتهى الذوق فالتعامل مع المريض والحمدالله الحين كل شي اوكي وتمام ’’ كلفتني 6540 ريال العمليه 6000 والفحص قبل العمليه 500 والعلاج 40 ولك مراجعه ثاني يوم واتكون مجانا ,, انصحك اتروح له وعادي تقدر اتروح اليوم واترد ثاني يوم بس اهم شي النظاره الشمسيه عليك بكل وقت على الاقل اول ثلاث ايام برا وداخل وبعدين برا بس ,, وهاي احسن وقت اتسوي فيه العمليه قبل الحر والغبار لان احتمال تلتهب العين بعد العمليه اذا ماحافظت عليها على الاقل اول شهر ’’

موفق انشالله

[البركان]

كل دكاترة العيون يلبسون نظارت ودى اعرف هم ليش مايسوونها

[وافق شنن طبقة]

عليك بالدكتورة هيفاء شغل نظيف تعامل راقي ..

واسال مجرب ..ومن ناحيه التكلفه ترى هذي عيون مب اي شي ثاني

انشالله تقط عليها 20000000 اهم شي راحت البال والشغل الزين وانصحك تسوينها عند هيفاء المحمود

[yousef545]

كل دكاترة العيون يلبسون نظارت ودى اعرف هم ليش مايسوونها

جبتها على الجرح :victory:

لو التقنيه هذي اوكي كان اول ناس سووها

يالربع اسألو قبل لاتسوون شي و انا اعرف ثلاثه سووها و بالمقابل

يمكن عشرين شخص مب راضيين ايسوونها

انا ماعندي خبره بهالسوالف بس اسالو الدكتور عن ماي العين لي كبر الانسان

على ماظن الماي الابيض و الماي الازرق و اسألو اذا جا هالماي اشبيصير حق

الي مسووين عمليه :omg: اتمنى اني وصلت المعلومه

( و حمدلله على سلامتكم كلكم الي مسووين عمليات و الي ماسوو لايستعيلون )

[حياة]

انا سويت عين وحده لان عندي طول وقصر في نفس الوقت
وسويتها في الدوحه وعند خالد الشريف وممتازه وايده خفيفه
توكل على الله وسوها في الدوحه
انا ان شاء الله في الصيف بسويها لبنتي

[شيط ويط]

دكتور مؤمن في البحرين .. الشباب مسوين عنده مضاريف العملية اظن في حدود 6 الاف لين 10 الاف ريال