أبي أغير شركة المقاولات اللي تبنيلي

[الشحانية يونايتد]

السلام عليكم ورحمة الله وبركاته

يا أخوان انا تلعوزت مع هالمقاول اللي عندي فأبي أغيره

وماني عارف شالإجراءات وهل تطول علماً بأن المقاول بيصب الدور الأول هالأسبوع يعني اللي بيكملي بيكمل الدور الثاني والملاحق والسور

والمقاول ماخذ مني مجمل الدفعات للحين 240 ألف على انه يخلص الدور الأول :(

تكفوووون النصيحة يا أخوان

[شموخ دائم]

,


,



السلام عليكم ورحمه الله وبركاته

اخوي الكريم

ما وضحت لنا سبب المشكله حتى ننهي العقد لازم المقاول يكون اخل ببنود العقد
مثل التاخير في الانجاز ؟ او ردائه العمل وعدم التقيد بالمواصفات واصول الصنعه ؟؟

من المفترض يكون عندك استشاري يقدم لك النصيحه
الاستمرار او فسخ العقد حتى لايقع ضرر عليك
وايضا لا نظلم المقاول في حال ما زال امامه الوقت الكافي لانجاز المشروع


اخوي الكريم طريقه فسخ العقد بطريقتين

1\ فسخ العقد ( بالتراضي ) من خلال تقدم كتاب برغبتك فسخ العقد وهي الطريقه المريحه
الاستشاري يقيم العمل ويقدم حساباته للمقاول
والمقاول ايضا يقدم حساباته للمشروع حتى المرحله الحاليه
وراح يكون رقمين
على سبيل المثال يقيم الاستشاري الاعمال ان لك 50 الف عند المقاول
والمقاول يقيم ان لك 20 الف مثلا
ويتم التوصل لحل وسط يرضي الطرفين

2\ فسخ العقد من خلال المحكمه وتقوم المحكمه انتداب خبير لتقييم المشروع حتى تفصل فيه
وفي هذه المرحله ممنوع تلمس شي بالمشروع او معدات المقاول ومواد البناء
حتى ينتهي الخبير من تقييم الوضع اذا لك فلوس يرجعها لك المقاول او هو يطالبك
بمبلغ اذا اشتغل اكثر من الدفعات والعمليه تحتاج شوي وقت وتكليف محامي من طرفك
حتى ترتاح من هذا الموضوع وراح يخلص باذن الله في حدود 6 شهور بالكثير


انصحك تخلص امورك بالطريقه الاولى بالتراضي اريح للجميع
واترك العمليه على الاستشاري منعا لحدوث احتكاك مباشر مع المقاول
لاسمح الله
اذا كان المقاول متعاون معك توكل على الله
اذا تشوف انه غير متعاون عليك بالطريقه الثانيه

نصيحه اخويه
لاتخلي العصبيه تقودك الى ظلم لاسمح الله
وجزاك الله خير



بالتوفيق لك والله يبارك لك وقريبا نشوفك منتهي من بيتك
ونبارك لك




,

,


اخوك


شموخ دائم

[RAHA]

ممكن التفاصيل
مثل ما قال شموخ
الأفضل تحل موضوعك معاه
بالتراضي

و يفضل انك تستشير اهل الخبره
و يقيم المشروع و مدى تضرر الطرفين

[الشحانية يونايتد]

جزاكم الله خير

المشكلة في الشركة التأخير ولا هم شغلهم حليو يعني ألحين صارلهم فوق الثلاث شهور وللحين ما صبوا سقف الدور الأول

بعدين صار عندهم سرقات داخل شركتهم وقاموا يأخذون المواد بالدين والعمال بالدين على امل الدفعه الجايه لأني رفضة اعطيهم ريال إلا في موعد الدفعة أما قبل موعدها قلتلهم معصي

فأنا خايف بعد ما اعطيهم الدفعه يروحون يسددون اللي عليهم ونرجع للمربع الأول مافي فلوس يكملون البنيان

فتوصلت معاهم لحل وسط انهم يعطوني شيك ضمان بقيمة دفعة وانا اكمل معاهم عادي كل دفعه بموعدها وهم تعهدوا انهم يشتغلون والله يستر

والنقطة الثانية قبل كانوا يصبون عندي من شركة المسند وألحين يقولون ما عندنا فلوس فبنجيب لك من شركة بتعطينا بالدين وانا اول مره اسمع بهالشركة فقلتلهم لا مابي وتوصلت لحل معاهم اني انا ارروح للمسند وادفع فلوس الصبيه وراح اخذ فواتير واخصم قيمتها من الدفعه الجايه


فهل اللي سويته صح عشان امشي شغلي ولا جبت العيد بدري الصراحة مدري

[RAHA]

جزاكم الله خير

المشكلة في الشركة التأخير ولا هم شغلهم حليو يعني ألحين صارلهم فوق الثلاث شهور وللحين ما صبوا سقف الدور الأول

بعدين صار عندهم سرقات داخل شركتهم وقاموا يأخذون المواد بالدين والعمال بالدين على امل الدفعه الجايه لأني رفضة اعطيهم ريال إلا في موعد الدفعة أما قبل موعدها قلتلهم معصي

فأنا خايف بعد ما اعطيهم الدفعه يروحون يسددون اللي عليهم ونرجع للمربع الأول مافي فلوس يكملون البنيان

فتوصلت معاهم لحل وسط انهم يعطوني شيك ضمان بقيمة دفعة وانا اكمل معاهم عادي كل دفعه بموعدها وهم تعهدوا انهم يشتغلون والله يستر

والنقطة الثانية قبل كانوا يصبون عندي من شركة المسند وألحين يقولون ما عندنا فلوس فبنجيب لك من شركة بتعطينا بالدين وانا اول مره اسمع بهالشركة فقلتلهم لا مابي وتوصلت لحل معاهم اني انا ارروح للمسند وادفع فلوس الصبيه وراح اخذ فواتير واخصم قيمتها من الدفعه الجايه

فهل اللي سويته صح عشان امشي شغلي ولا جبت العيد بدري الصراحة مدري

إلي فهمته
ان هذا العقد إلي بينك و بينه
لم يشرف عليه إستشاري
و ان مشروعك لا يوجد عليه استشاري مشرف
مجرد استشاري زائر لختم الأوراق

نصيحتي لك تعرض مشكلتك على احدى شركات الإستشارات الهندسيه
بحيث يقيم العمل و يحدد استمرارية المقاول او عدم استمراريته
و بشرح مفصل عن مسار العمل من البدايه حتى هذا اليوم
و في حالة موافقتك في استمرار المقاول
ضع نفس الإستشاري المشرف لمتابعة العمل و حساب نسب الإنجاز

[الشحانية يونايتد]

إلي فهمته
ان هذا العقد إلي بينك و بينه
لم يشرف عليه إستشاري
و ان مشروعك لا يوجد عليه استشاري مشرف
مجرد استشاري زائر لختم الأوراق

نصيحتي لك تعرض مشكلتك على احدى شركات الإستشارات الهندسيه
بحيث يقيم العمل و يحدد استمرارية المقاول او عدم استمراريته
و بشرح مفصل عن مسار العمل من البدايه حتى هذا اليوم
و في حالة موافقتك في استمرار المقاول
ضع نفس الإستشاري المشرف لمتابعة العمل و حساب نسب الإنجاز


لا الشيخ أنا عندي أستشاري وهو يجي يشوف الشغل واذا في غلط يعدله لهم وهو يستلم شغل الخشابين والحدادين اذا اوكيه ولا لأ

وبالنسبه للعقد غلطتي اني عطيته للإستشاري جاهز وما استشرته عند ابرام العقد

لكن القضيه هي السرقات اللي داخل شركتهم هي اللي لعوزتني معاهم لأنه ضاعت فلوس الدفعه اللي خذوها مني وقاموا يأخذون بالدين بعد ما رفضت دفع اي مبلغ قبل موعده

فأنا خايف انه اعطيهم الدفعه الجايه ويروحون يسددون اللي عليهم ونرجع للمربع الأول ويتأخر الشغل بحجة مافي فلوس

بس أنا أخذت منهم شيك بقيمة 120 ألف بتوقيع صاحب الشركة <<< فهل هذا يعتبر ضمان لو صار ما صار

أنا آسف يمكن ما عرفة اشرح المشكلة والله يعينكم علي ويجزاكم عني خير الجزاء

[شموخ دائم]

,

,


مرحبا اخوي

الله يعطيك العافيه

التأخير الموجود الان بسيط مش تأخير كبير على اعتبار

الاساس اخذ تقريبا شهر ورفع الطابوق فوق الجسور قبل الصبيه اخذ شهر

والمشروع الان بالشهر الثالث قريب صبيه الدور الاول

و3 شهور ثانين راح يكون بيتك مخلص عظم في 6 شهور

وباقي المده للتشطيب راح تكون كافيه

لكن واضح الي مضايقك ان ماعاد مرتاح لوضع شركتهم

وهتزت ثقتك في وضعهم المالي

وهذا واضح في تعاملاتهم مع الغير ومن حقك تكون قلق لان الوضع ما يطمن

اعطائهم لك شيك ضمان هذا يؤكد تعاونهم وبنفس الوقت

يؤكد اهتزاز وضعهم المالي بالسوق لو كانت الشركه في وضع قوي ما بتعطيك شيك ضمان

بو سط العمل

عموما اخوي

اذا انت مو مرتاح وثقتك فيهم الان مهزوزه

وقف العقد دام انتوا في بدايه المشروع

صب الدور الاول واعمل تسويه معاهم

بالنسبه للدفع عند شركه الردي مكس هذا حل طيب

ولكنه مو الطريقه الصحيحه للعمل

تعاملكم اصبح مافيه ثقه

والاحسن توقف الشغل والله يعينك على التسويه

لكن ياخوي بقولك نقطه ضروريه

( لو بتجيب شركه مقاولات ثانيه راح يكمل بيتك بسعر مختلف وليس المبلغ المتبقي
ياريت تنتبه لهذي النقطه وتحطها في حساباتك قبل تتخذ قرار )

وعندك حل ثاني تكمل معاهم عظم لين صبيه الدور الثاني وتقدر توقف العقد
اذا انت ضامن ان الشركه راح توصل الى هذي المرحله بسلام

واذا انت مو مرتاح وقف العقد في اقرب فرصه بعد صبيه الدور الاول

وتطلع في أقل خساره ممكنه ومثل ما قال اخوي راحه

خل الاستشاري بالصوره بكل التفاصيل

بالتوفيق لك



,

,



اخوك


شموخ دائم

[بويوسف]

اخوي ثلاث شهور لي مرحلة صب الدور الاول مايعتبر تأخير كبير .. يعني الموضوع مثل مايقول اخوي شموخ اذا كملوا بوتيرة منتظمة خلال ست اشهر بيكونون مخلصين العظم ..

ولكن بما انك مش مرتاح معاهم وخايف انهم مايخلصون ممكن تسحب الشغل .. لاتنسى انك اذا سحبته عوار راس ثاني وبتبتدي من جديد في البحث عن مقاول زين .. خصوصا اذا كان شغلهم من الناحية الفنية ماعليه كلام .. فاعتقد ان الضمانات اللي عندك كافية ..

تقدر تروح البنك وتخلي الشيك اللي عطوك اياه مصدق .. اي بمعنى ان المبلغ يتم حجزه مدة معينة .. ويسمى (ضمان بنكي) بقيمة الشيك لمدة سنة مثلا او ستة اشهر .. وهذي شهادة تعطى للمالك وانت تاخذها منه .

[الشحانية يونايتد]

جزاكم الله خير على المشورة

وأبشركم اليوم صبيت الدور الأول من المسند بعد ما رحت امس ودفعة الفلوس من عندي ورااااح اخصمها من الدفعة القادمة

والله كريم ومالي إلا أني اكمل معاهم لأن المهم راح وما بقى إلا السهالات

لكن المشكلة أن قلبي بيظل خايف منهم بسبب فقدان الثقه فيهم

[RAHA]

جزاكم الله خير على المشورة
وأبشركم اليوم صبيت الدور الأول من المسند بعد ما رحت امس ودفعة الفلوس من عندي ورااااح اخصمها من الدفعة القادمة
والله كريم ومالي إلا أني اكمل معاهم لأن المهم راح وما بقى إلا السهالات
لكن المشكلة أن قلبي بيظل خايف منهم بسبب فقدان الثقه فيهم


هذا عين العقل
إذا انت مش مرتاح
ريح قلبك بمتابعة مشروعك
و هذا أفضل حاجه لتقليل الخسائر قدر الإمكان
و إن شاء الله يمر الموضوع بدون خسائر
اما تبديل المقاول انا ما انصح فيه
لأن المقاول الجديد يدخل على الشغل القديم بسعر اعلى

موفق أخوي