اشلون الاجانب يوفرون<< لازم نتعلم

[الدكتور عزوز]

السلام عليكم ورحمة الله وبركاته


راح اعطيكم مثال لشي صار معاي كذا مره وقلت لازم اتعلم منهم ولله الحمد تعملت وطبقت

المثال هو اني كنت طالع سينما مع ربع الدوام وكان يوم خميس وكلهم اجانب 3 عرب و2 امريكان

وطبعا نظام امريكي كل واحد يدفع لنفسه


قبل الفلم بربع ساعه تقريباً اشوفهم قرروا يروحون كارفور يبون اغراض رحت معاهم

اشوفهم مروا صوب البيبسي وكل واحد خذله قوطي بيبسي قلتلهم ليش الحين بنشتري من السينما قالولي لا هناك ينصبون علينا البيبسي على 8 ريال وهنا البيبسي بريال

وانا اقولهم فشيله نشيله معانا احراج يعني قالولنا احنا جايين قطر نبي نوفر فلوس عشان نرجع بلادنا بفلوس مانبي نرجع مثل ما تركنا بلادنا نبي نرجع واحنا احسن وحالتنا الماديه احسن

المهم كل واحد يشتريله بيبسي وشبس وكافي يعني كل واحد خسر 4 او 5 ريال تقريبا

وانا سويت مثلهم

مجموع اللي خسرته معاهم هو 40 ريال منها 35 ريال قيمة التذكره و5 ريال قيمة البيبسي والشبس والكافي


يوم الاربعاء اليوم اللي قبله على طول كنت رايح مع ربعي ونظام امريكي بعد ولو فرضنا ان كل واحد يشتري لنفسه مجموع اللي خسرته هذاك اليوم هو60 ريال تقريباً منها 35 ريال قيمة التذكره + 8 ريال للبيبسي + 4 او5 ريال للشبس + 12 ريال للذره (حجم صغير) على فكره الفلم هندي عشان كذا قررت اكثر بالاكل لاني ماكنت متغدي يعني طالع من الدوام على السينما :shy:

وللعلم رواتبهم عاليه واعلى من راتبي

لو بنحسبها يعني 20 ريال زياده يعني 50% زياده وهذي زياده مب بسيطه ترى واجد 50%

انا بديت اسوي مثلهم الشهر اللي طاف ووفرت من راتبي 3000 ريال كانت تطير كذا بدون سبب وهالشهر صرت اوفر مثلهم وصار اني وفرت 3000 ريال

انا لله الحمد راتبي يكفني طول الشهر لاني مهب متزوج ولا عند عيال احاتيهم اللهم علي مصاريف البيت بحدود 5000 شهرياً طبعا ونص راتبي يروح على قرض السياره وعلى القرض الشخصي والباقي يطير بدون سبب على اشياء تافهه واهمها فواتير كيوتل اللي لين اليوم ماني فاهمها

يعني المهم بالعاده راتبي يكفيني لين نهاية الشهر لكن عمري ما كنت قادر اوفر كل شهر اقول الشهر الجاي بحاول لكن ما وفرت شي

الشهر اللي طاف وفرت 3000 ريال بشوف الشهر هذا كم بوفر


احنا الله يهدينا لما نطلع نروح نصرف يمين ويسار بدون حساب اول ما ينزل الراتب وبعدها بكم يوم نضرب روسنا بالطوف لان الراتب خلص


ربعي متزوجين ومهب قادرين على المصاريف يوم اقولهم اشلون راتبكم يطير يقولون ما ندري وللعلم رواتبهم زينه يعني مهب اقل من 15 الف




خلوا طلعاتكم نظام امريكي كل واحد يدفع لنفسه

وغير كذا سووا نفسهم يعني مثلا السينما لا تشترون من عندهم كل شي يعني روحوا كارفور وبتحسون بالفرق

صدقوني كل طلعه بتوفرون فوق 100 ريال واحسبوها انتو طول الشهر فوق 3000 ريال

طول السنه فوق 36 الف ترى حلوين ولو قدرتوا توفرون اكثر بيكون احسن

لو بتفكرون فيها ترى والله ممكن اي شي يصير لو قررنا نوفر

المهم مغزى كلامي ليش احنا ما نسوي مثلهم؟ دوم نقول ما نقدر نوفر!!! ترى فيه مجال قوي للتوفير مثلهم وانا جبت لكم مثال طلعتنا للسينما طبعا فيه طلعات ثانيه نطلعها واشوف حرصهم على التوفير بطرق ثانيه لو تبغون ممكن افيدكم فيها


سامحوني لاني طولت لكن لازم نبدأ نتعلم نوفر لأن مهب حاله هم يجون بلادنا ويوفرون وفي الاخير فلوسهم يطرشونها برا واحنا المساكين ما يجي كم يوم الا والراتب طاير على الديون وعلى الاشياء اللي مالها داعي

[كينيا]

صح كلامك 100%
المشكلة اكثر شبابنا وبناتنا يعتبرون هالشي بخل ( وزط )
وأنه يهز صورتهم

[الدكتور عزوز]

صح كلامك 100%
المشكلة اكثر شبابنا وبناتنا يعتبرون هالشي بخل ( وزط )
وأنه يهز صورتهم

والله انك صادق لكن للأسف انهم ما يهز صورتهم ان راتبهم يطير اول الشهر؟؟؟؟

مهب بخل ولا زط لو سووا كذا بالعكس الا بيوفرون عشان الايام السودا

[الـقـاسـي]

اخوي هذي عاداتنا وتقاليدنا الكرم جبلنا عليه ولله الحمد ..
اما سالفة نظام امريكي مابلعها ..
وبعدين ترى صبه رده يعني انا وياي اربعه من الشباب اغلب طلعاتنا ويا بعض
وكل مره نطلع طبعا واحد يحلف يدفع والمره اللي عقبها واحد غيره فلو حسبتها بدال ماتدفع حق نفسك كل مره كل مره واحد بيدفع

[الخفي]

(( نظام امريكي ))

[الدكتور عزوز]

اخوي هذي عاداتنا وتقاليدنا الكرم جبلنا عليه ولله الحمد ..
اما سالفة نظام امريكي مابلعها ..
وبعدين ترى صبه رده يعني انا وياي اربعه من الشباب اغلب طلعاتنا ويا بعض
وكل مره نطلع طبعا واحد يحلف يدفع والمره اللي عقبها واحد غيره فلو حسبتها بدال ماتدفع حق نفسك كل مره كل مره واحد بيدفع

اخوي مقصدي من الموضوع مهب انه ليش كل واحد يدفع لربعه بالعكس انا من الناس اللي احب دوم ادفع يمكن بحكم اني اكبر واحد في ربعي ويمكن بحكم العاده اني متعود دوم اني ادفع الا اذا طالع مع اجانب

مقصدي من الموضوع هو ان ليش ندفع للشي الغالي مع ان نفس السلعه موجوده بسعر ارخص؟؟؟؟


برجع لمثال السينما طيب

يعي مره اسولف لربعي عن هالاجانب وطريقتهم بالتوفير قالوا عجزانين نمشي لين كارفور لكن تعال واحنا بندفع على بالهم الموضوع موضوع


دفع واحد قال انا بدفع للكل ويجي ويدفع فوق 100 ريال بس لانه عجزان يروح كارفور مثلا لو راح كارفور كان بيدفع 20 ريال مهب اكثر

اتمنى فهمت المقصد يالغالي

[الدكتور عزوز]

(( نظام امريكي ))

(نظام امريكي) هالكلمه الوالد حفظنا اياها من يوم كنا صغار لما يجي يوصف لنا ان كل واحد يدفع لنفسه كان يقولنا ان كل واحد يدفع لنفسه هو نظام امريكي

وحفظتها بهذي الطريقه ما اعرف طريقه ثانيه اقولها فيها :shy:

لو فيه كلمه ثانيه بنفس المعنى ياليت تفيدني فيها يالغالي

[امـ حمد]

حنا أهل الكرم والجود

أي نظام الأجانب
هم في بلادهم عايشين على السندويتشات وهو راجع من شغله يأخذ سندويش ويروح بيته

[الدكتور عزوز]

حنا أهل الكرم والجود

أي نظام الأجانب
هم في بلادهم عايشين على السندويتشات وهو راجع من شغله يأخذ سندويش ويروح بيته

اختي طبعاً حنا هل الجود والكرم وانا ما قلت غير هذا الكلام بالعكس



اتمنى اختي انج تقرين الموضوع زين وتعرفين المغزى منه

[نورالهدى]

وانت صاج أخوي

[رجل الجزيرة]

طال عمرك هذا يسمى عندنا يا أهل قطر"مايزر"

[وحيد-الشوق]

كلامك صحيح بس ماعجبتني كلمة نظام أمريكي << يكره أمريكا

بعدين مب حلو تفكيرهم كل واحد يدفع بنفسه شدعوه للهدرجة فيهم بخل وأنانية انا حزات اطلع مع ربعي نروح مطعم وكل واحد فينا يقط مبلغ او احيانا انا ادفع او هم يدفعون مب مشكلة بس مثلا اذا تعشينا وطلع الحساب غالي كل واحد يقط من عنده طبعا بدون مانتفق من قبل يعني مب مشكلة في النهاية :)

انا اذا رحت السينما اشتري بوب كورن (فشار) بس وغرشة ماي اما خرابيط ثانية مااشتري بس فعلا يقهرون الي في السينما كل شيء دبل السعر عندهم لكن حزات الواحد يضطر

حلو التعاون اما سالفة كل واحد يدفع بنفسة قهرتني صراحه خخخخخ

يعطيك العافية عالطرح


حنا أهل الكرم والجود

أي نظام الأجانب
هم في بلادهم عايشين على السندويتشات وهو راجع من شغله يأخذ سندويش ويروح بيته

هههههههههههههههه

[دلوعه امها]

شفيكم هجمتو عليه هو يبي يوعيكم توفرون بغض النظر من اللي يدفع واللي مايدفع هو قصده انك اخر الشهر يكون عندك مبلغ ووضح لكم شلون تقدر تشتري بيبسي بريال وبيبسي ب8 ريال والمكانيين جنب بعض وفعلن كلامه صحيح وانا فكرت فيها قلت الحين انا اشتري كافي من السينما ب5 ريال وكارفور بريال وجنب بعض يعني احنا مبذرين ومانعرف نتصرف

[ورقــة أمــل]

يعطيك العافية صح كلامك

[دكتورة روح]

وانت صاج اخوي هالكلام الي يريح القلب
وانشالله يكون مجرى حياتي القادم
تشكرات

[انا حره]

كلامك صح

احنا كنا مودبن العيال وعيال اختي كلهم 6 صراحه دفعنا فوق ال200 على خرابيط البيبسي والذره والكوافي وكل ساعه مرسلين الشغاله اتجيبلهم زياده

المره الي عقبها لا رحنا كارفور وقلت كل واحد ياخذ له كيس ويشتري له تشيبس وعصير وكوافي دفعت لكل واحد بالكثير 15 ريال بس بشي يستاهل
تقريبا دفعت 100 ريال يعني وفرت اكثر من 100 ريال

[ودي أكون]

يوم الاربعاء اليوم اللي قبله على طول كنت رايح مع ربعي ونظام امريكي بعد ولو فرضنا ان كل واحد يشتري لنفسه مجموع اللي خسرته هذاك اليوم هو60 ريال تقريباً منها 35 ريال قيمة التذكره + 8 ريال للبيبسي + 4 او5 ريال للشبس + 12 ريال للذره (حجم صغير) على فكره الفلم هندي عشان كذا قررت اكثر بالاكل لاني ماكنت متغدي يعني طالع من الدوام على السينما :shy:



شفت فلم شاروخوه :omen2:

انا معاك أخوي احنا كعرب وخاصه خليجيين .. تعودنا عالتبذير .. في كل شي .. واصبحت عادة .. من كثر الممارسه صارت اليد تبذر من غير مانحس للاسف !!

وهي ماجات عالطلعه .. حتى فالعزايم البسيطه .. :(

العزيمه حق 2 والاكل حق 10 ليش :omg:

مثل ماقلت لك صعبه الشخص يوفر .. وخاصه لو كان هالشخص وايد يطلع :)

احمد الله اني بيتوتيه :shy::victory:

[halcrow]

يعطيك العافيه اخوي واذا عن التوفير ليش مانصحت الواحد اللي يبي يشوف فلم في السنما ليش يشطح لسنمات المجمعات ليش مايروح سنما الخليج خبرك توفير نفس نظام البيبسي كل شي سعره في موقعه
ياليت اوضحت الصورة .

[الدكتور عزوز]

وانت صاج أخوي

بيض الله وجهج الشيخه

[الدكتور عزوز]

طال عمرك هذا يسمى عندنا يا أهل قطر"مايزر"

بيض الله وجهك يالغالي

[حنان الدنيا]

اوه حالتهم نفس حالتي بس الفرق اني اجيب الكافي معاي من البيت لان شنطتي ماتخلى منها :)

وعصير مب مشكله بس الماي ضروري واخذه من اي مطعم وبصراحه والله صج خسارة فيهم وحرام

ايه صح نسيت اقول اذا مرات خاطري في ذره بالسكر اخذ من عندهم ههههههههههه

[الدكتور عزوز]

كلامك صحيح بس ماعجبتني كلمة نظام أمريكي << يكره أمريكا

بعدين مب حلو تفكيرهم كل واحد يدفع بنفسه شدعوه للهدرجة فيهم بخل وأنانية انا حزات اطلع مع ربعي نروح مطعم وكل واحد فينا يقط مبلغ او احيانا انا ادفع او هم يدفعون مب مشكلة بس مثلا اذا تعشينا وطلع الحساب غالي كل واحد يقط من عنده طبعا بدون مانتفق من قبل يعني مب مشكلة في النهاية :)

انا اذا رحت السينما اشتري بوب كورن (فشار) بس وغرشة ماي اما خرابيط ثانية مااشتري بس فعلا يقهرون الي في السينما كل شيء دبل السعر عندهم لكن حزات الواحد يضطر

حلو التعاون اما سالفة كل واحد يدفع بنفسة قهرتني صراحه خخخخخ

يعطيك العافية عالطرح



هههههههههههههههه

الله يعافيج اختي

[الدكتور عزوز]

شفيكم هجمتو عليه هو يبي يوعيكم توفرون بغض النظر من اللي يدفع واللي مايدفع هو قصده انك اخر الشهر يكون عندك مبلغ ووضح لكم شلون تقدر تشتري بيبسي بريال وبيبسي ب8 ريال والمكانيين جنب بعض وفعلن كلامه صحيح وانا فكرت فيها قلت الحين انا اشتري كافي من السينما ب5 ريال وكارفور بريال وجنب بعض يعني احنا مبذرين ومانعرف نتصرف

وصلتي خير الشيخه


احنا مبذرين



بيض الله وجهج اختي

[الدكتور عزوز]

يعطيك العافية صح كلامك

الله يعافيك الشيخ

[الدكتور عزوز]

وانت صاج اخوي هالكلام الي يريح القلب
وانشالله يكون مجرى حياتي القادم
تشكرات

ان شاء الله اختي






بيض الله وجهج

[الدكتور عزوز]

كلامك صح

احنا كنا مودبن العيال وعيال اختي كلهم 6 صراحه دفعنا فوق ال200 على خرابيط البيبسي والذره والكوافي وكل ساعه مرسلين الشغاله اتجيبلهم زياده

المره الي عقبها لا رحنا كارفور وقلت كل واحد ياخذ له كيس ويشتري له تشيبس وعصير وكوافي دفعت لكل واحد بالكثير 15 ريال بس بشي يستاهل
تقريبا دفعت 100 ريال يعني وفرت اكثر من 100 ريال

شفتي الفرق اختي؟؟وفرتي اكثر من 50%


بيض الله وجهج

[الدكتور عزوز]

شفت فلم شاروخوه :omen2:

انا معاك أخوي احنا كعرب وخاصه خليجيين .. تعودنا عالتبذير .. في كل شي .. واصبحت عادة .. من كثر الممارسه صارت اليد تبذر من غير مانحس للاسف !!

وهي ماجات عالطلعه .. حتى فالعزايم البسيطه .. :(

العزيمه حق 2 والاكل حق 10 ليش :omg:

مثل ماقلت لك صعبه الشخص يوفر .. وخاصه لو كان هالشخص وايد يطلع :)

احمد الله اني بيتوتيه :shy::victory:

والله اختي انا ما كنت افكر اني مبذر لين ما جربت اسوي مثلهم واحاول اوفر وحزتها اكتشفت انا شكثر مبذر

ان المبذرين كانوا اخوان الشياطين


وبعدين الواحد يفكر ليش لما ال500 تنخرد تطير في نفس اليوم!!!!!!

صارت ال500 تكفيني اسبوع

[الدكتور عزوز]

يعطيك العافيه اخوي واذا عن التوفير ليش مانصحت الواحد اللي يبي يشوف فلم في السنما ليش يشطح لسنمات المجمعات ليش مايروح سنما الخليج خبرك توفير نفس نظام البيبسي كل شي سعره في موقعه
ياليت اوضحت الصورة .

يالغالي مهب معناته ان الشخص يبي يوفر يقوم يروح اماكن وصخه صح ولا لا؟



مهب معناته ان الواحد يبي يوفر يروح هناك؟؟ سينما الخليج مكان قذر ووصخ


اتمنى انك فهمت المقصد من الموضوع

[الدكتور عزوز]

اوه حالتهم نفس حالتي بس الفرق اني اجيب الكافي معاي من البيت لان شنطتي ماتخلى منها :)

وعصير مب مشكله بس الماي ضروري واخذه من اي مطعم وبصراحه والله صج خسارة فيهم وحرام

ايه صح نسيت اقول اذا مرات خاطري في ذره بالسكر اخذ من عندهم ههههههههههه

اختي احنا مجبروين نشتري الذره من عندهم لان محد غيرهم يبيعها لكن باقي الاغراض في كارفور وشوفي فرق السعر

[شيط ويط]

تصدق نفس بوفلان لا رحت معاه السينما اقوله خل ناخذ من كارفور بيبسي وشيبس وتسالي بس الرجال يقولي ماعندك سالفه .. :secret: يعني البوب كورن بروحه 8 ريالات في السينما .. ممكن تسوي شغل في كارفور وتبطر عمرك :rolleyes2:

عموما اشد على يدك في مسالة التوفير وكل واحد لازم يشوف له طريقة تناسبه للتوفير لان صراحه اغلبيتنا معدومة عنده ثقافة (التوفير) .. وصرنا نصرف بأسلوب مبالغ فيه وماله لزمه وعلى اشياء ما تستاهل ويمكن الاستغناء عنها .

[Dreams]

يعطيك العافيه خيووو

[بو خليفه 123]

اخوي نظريتك انا اتفق معاها مليون بالميه !
حب المظاهر هو اللي مودينا في داهيه
يجب كسر الروتين و اتباع انظمه اخرى للتوفير .

احييك على طرحك المتميز و منكم نستفيد

تحياتي

[متابع عن قرب]

التوفير ليس معناه البخل



فكم مبذر فقط على الشكليات ويوم تحتاجه قال ماعندي شي


وكم موفر وحريص ويوم تحتاجه يفتح لك الميزانية تأخذ اللي تبغي




ذاك الوقت تقول فلان اللي وفر معاه حق لأن المبلغ اللي يوفره استفدنا منه وبيض وجهه





لكن المشكلة





الين الحين ماقدرنا نطبق نظرية التوفير كل مايجي شهر تطلع مصاريف من تحت الارض ونقول بنخلي التوفير ابتداءا من الشهر القادم





وهكذا دواليك






لك الشكر دكتور

[بنت سلمان]

شفيكم هجمتو عليه هو يبي يوعيكم توفرون بغض النظر من اللي يدفع واللي مايدفع هو قصده انك اخر الشهر يكون عندك مبلغ ووضح لكم شلون تقدر تشتري بيبسي بريال وبيبسي ب8 ريال والمكانيين جنب بعض وفعلن كلامه صحيح وانا فكرت فيها قلت الحين انا اشتري كافي من السينما ب5 ريال وكارفور بريال وجنب بعض يعني احنا مبذرين ومانعرف نتصرف

:nice:


كلامك صح

احنا كنا مودبن العيال وعيال اختي كلهم 6 صراحه دفعنا فوق ال200 على خرابيط البيبسي والذره والكوافي وكل ساعه مرسلين الشغاله اتجيبلهم زياده

المره الي عقبها لا رحنا كارفور وقلت كل واحد ياخذ له كيس ويشتري له تشيبس وعصير وكوافي دفعت لكل واحد بالكثير 15 ريال بس بشي يستاهل
تقريبا دفعت 100 ريال يعني وفرت اكثر من 100 ريال


جزاك الله خير أخوي على النصيحة
وبيض الله وجهك .. أنا راح أتبعها في كل مكان .. مو بس السينما
ولو لقيت الفيلم موجود على سي دي بو 10 ريال بسويها

الله يرزقك ويرزقنا من حيث لانحتسب

[ANONYMOUS]

المرء على دين خليله..

اذا بتماشي ناس مبذره راح تبذر معاهم..
واذا بتماشي ناس وسط راح تصير وسط..
واذا تماشي ناس توفر .. راح توفر معاهم..
بغض النظر عن الجنسيه..

كل واحد يحط نفسه في المكان اللي يبيه..

[alsenator]

اذا تبي توفر صح افسخ الغترة وخلها في السيارة وانزل السوق واشتر الي تبية :nice:

لان الغترة والعقال اصبحت تتسبب بزيادة الاسعار بنسبة 20% :victory:


وشكرا ع الموضوع :nice:

[ماريسا]

كلامك صحيح و مافيها شي نتعلم من الغرب الصح و ننكر الغلط

[قناص الخليج]

عرب ومسلمين وكل واحد يدفع لعمره

[الخنجر]

المشكلة الناشوز ما تحصله بكارفور والبيبسي بصير ساخن ..

شلفايدة ..

[eXpert*]

الأ على الطاري : عيال عم ومعاهم اثنين شباب كانوا في مطعم للعشاء .

و يوم جاء وقت الدفع كانت معركة داحس والغبراء من اللي يدفع وكانوا يتدافعون على الكاشير .

في نفس الوقت كان أجنبي في جواري سألني : قال لي بما معناه ماراح تفرق بينهم .

أبتسمت

في الأخير "الكثرة أغلبت الشجاعة" أعيال العم امسكوا الاثنين الي وياهم واتركوا ولد عمهم يدفع الحساب .

كرم العرب جميل لكن بـ تهذيب .

[qatar-2022]

صج كلام اخوي خلنا نعرف نوفر على الأقل في الطلعات .ثم نطبق على باقي امور حياتنا.

[م. عبدالعزيز]

والله عجبني موضوعك وتكلمت على نقطه مهمه جدا يشتكي منها الكثير منا، وللاسف هالايام التبذير زايد ..

ولازم نتعلم نوفر ،، بس تدري تذكرت ايام زمان يوم كنا صغار ، كنا دوم نفكر بالتوفير .. سواء من طرفنا او حتى من الاهل .. ولاحظ انه الكبار هالايام يعرفون يوفرون اكثر منا ..

شكرا على الطرح الجميل

[Hamad7788]

انا لاحظت شي عالاجانب


اتلاقي الواحد منهم اذا كان راتبه 50 الف

يصرف 1000 في الشهر عالاكل


وياخذ له سياره عاديه عمليه ومب شرط فخمه


وملابسه جدا جدا عاديه ورخيصه


بس مستحيل اتحصل واحد منهم شايل تلفون او لاب توب قديم



دايما اتحصلونهم شايلين اجدد الموبايلات واحدث انواع الابتوبات

هم يدفعون عالشي اللي يكسبهم مال

بس يقتصدون في الشي اللي يخسرهم مال ومايعود عليهم بمنفعه ماديه ...

[عابر سبيل]

اخونا الكريم/ د.عبدالعزيز!
(ابي اكبرك اشوي:))

الموضوع ..و الفكرة الرئيسية فيه
احييك جدا عليها..و اسلوبك الكتابي يعد.

و الاسلوب لحسن صرف المال
و ادارة حياتنا او التوفير..
قد يختلف فيه انسان عن آخر..

لكني..اشوفك..
تدعو اخوانك انهم يكونون
على وعي بدخلهم و " خرجهم"!

عموما...انت شرحت بمثال فيه جدا تبسيط للمسألة
و هو اسلوب اعجبني لان كل من يقراه يقدر يفهمه..
و لو رحنا بعد في تعرية صرفنا على اللي ما يسوى..
اكثر و اكثر ..بتجيك العجايب اكثر..

ع العموم..التنويع و انا اخوك..زين
يعني..حزات الواحد يمشي على خطته 100%
بس الامهم..انه اذا حس انه واجد ..بدا يحاسب و ايوسوس
على مصاريفه و يمكن تخترب الميزانية او ما يوفر
المبلغ المستهدف..و و و

عندها...عليه انه يكسر هالشي..
الا و ايروح بالعاني
يصرف اشوي زود و يشتري الغالي..

الزبدة..ان الواحد لا يكون مرخي عالاخير
لين ما يصير باخر الشهر..صدق (فقير)
و لا ايشد لين ما يزنط عمره من الخوف
و بعدين يستكره من ربعه و اغلب هله..

التوسط..وان الواحد ما يهمل بيزاته
و لا ايصير عبد او (تجوري) لها!

اخيرا...ادعوك ان كنت تحب تسترسل
و تطور من قدراتك في هالمجال..لموضوع
كنت قد وضعته في فسم النقاش الاقتصادي
بالمنتدى على هالرابط..
http://www.qatarshares.com/vb/showthread.php?t=342455

اتمنى انك و البقية..تجدون فيه مزيدا من الافادة
و المتعة!

تحياتي و تمنياتي لك بالتوفيق في حياتك
يا دكتور عزوز

[doha_star]

دايما اتحصلونهم شايلين اجدد الموبايلات واحدث انواع الابتوبات


يا ريال خل عنك.. حدهم جوال نوكيا بو ليت نفس اللي عند هندي العنه لانه صج صج فيهم بخل مب طبيعي بس الواحد يكون معتدل ويعرف يصرف بعقل وهاي كل السالفه

[المخباط]

ذبحنا الكرم الحاتمي
فكرة حلوة نشتري من كارفور اوفر
ونعلم عيالنا على التوفير من الصغر
بارك الله فيك

[وحيد-الشوق]

الله يعافيج اختي



أختي :eek5:

وحيد يادكتور :tease:

[رجل الجزيرة]

بيض الله وجهك يالغالي

ووجهك أبيض يا الطيب.

[موضي قطر]

احنا تعودنا على الصرف بلا حساب ( ومنقود ) ان كل واحد يدفع عن نفسه

بس صاحب الموضوع سأل شلون الأجانب يوفرون ؟؟؟؟؟؟؟؟؟؟؟؟

اهم شي يتمتع براتب خياااااااااااااااااااااااااااااااااااالي

وعنده امتيازات :-

1- سكن على حساب جهة العمل أويصرف له بدل سكن .
2- تذاكر على حساب جهة العمل ؟
3- مدارس على حساب جهة العمل ( اذا عنده اولاد ) .

غصباً عليه بيوفر ويحاسب على الريال !!!!!!

[غزلان]

كلامك سليم 100%100 الى مخرب علينا الفشخره الى مالها داعي تقدر تقول مع الخيل ياشقرا

[صاحب حق]

و كي توفر أكثر لا داعي للذهاب للسينما بالأساس .

أتعلم لماذا ؟

توفير في حسابك لكسب الحسنات أكثر و ترك السيئات و طاعة رب البريات

و توفير في مالك لأن الله سيسألك عن ال35 ريال التي صرفتها ، فسوف تخجل من رب العالمين أن تقول بأنك
صرفتها في معصية .

فالحل أن تترك الذهاب للسينما نهائياً ، لأنني آراها لا تناسب الرجل المسلم فكيف يضيع وقته الذي هو عمره

و ماله في شيء لا يرضي الله عز وجل .

و من ترك شيئاً لله عوضه الله خيراً منه ، فتأكد أنك إن تركت السينما ليس لتوفير المال و إنما ابتغاء مرضاة الله عزوجل ، فصدقني سوف تأتيك الأرزاق من حيث لا تدري .

أسأل الله العظيم أن يزيدك من فضله و يرزقك من خيري الدنيا و الآخرة

[المهندس عبدالعزيز]

ليش ما تنزلون افلام من النت ببلاش وجي توفرون 35 ريال بعد

[Me&OnLy]

اشكرك على الموضوع والمغزى من الموضوع اني اوفر مبلغ وقدره ينفعني مستقبلا ولكن بعض الاخوه هنا يقولون احنا اهل الكرم واحنا اهل الجود مافيها شك ولكن بالمعقول نصير كرماء مهب كل يوم عزيمه علي صايديني الشباب في زاويه وانا داق الصدر يبلفيت اني البنك المتحرك لازم الانسان يوفر حق نفسه بكره وراك زواج وراك مستقبل تعيشه وراك مسؤوليه لازم تجمع وتوفر عشان ماتمر 9 سنين او 8 سنين وانت انت ماتغيرت على الاقل جمعت لك مبلغ وقدره من المال عشان تأمن مستقبلك ومستقبل عيالك تحياتي

[عليان قطر]

السلام عليكم ورحمة الله وبركاته


راح اعطيكم مثال لشي صار معاي كذا مره وقلت لازم اتعلم منهم ولله الحمد تعملت وطبقت

المثال هو اني كنت طالع سينما مع ربع الدوام وكان يوم خميس وكلهم اجانب 3 عرب و2 امريكان

وطبعا نظام امريكي كل واحد يدفع لنفسه


قبل الفلم بربع ساعه تقريباً اشوفهم قرروا يروحون كارفور يبون اغراض رحت معاهم

اشوفهم مروا صوب البيبسي وكل واحد خذله قوطي بيبسي قلتلهم ليش الحين بنشتري من السينما قالولي لا هناك ينصبون علينا البيبسي على 8 ريال وهنا البيبسي بريال

وانا اقولهم فشيله نشيله معانا احراج يعني قالولنا احنا جايين قطر نبي نوفر فلوس عشان نرجع بلادنا بفلوس مانبي نرجع مثل ما تركنا بلادنا نبي نرجع واحنا احسن وحالتنا الماديه احسن

المهم كل واحد يشتريله بيبسي وشبس وكافي يعني كل واحد خسر 4 او 5 ريال تقريبا

وانا سويت مثلهم

مجموع اللي خسرته معاهم هو 40 ريال منها 35 ريال قيمة التذكره و5 ريال قيمة البيبسي والشبس والكافي


يوم الاربعاء اليوم اللي قبله على طول كنت رايح مع ربعي ونظام امريكي بعد ولو فرضنا ان كل واحد يشتري لنفسه مجموع اللي خسرته هذاك اليوم هو60 ريال تقريباً منها 35 ريال قيمة التذكره + 8 ريال للبيبسي + 4 او5 ريال للشبس + 12 ريال للذره (حجم صغير) على فكره الفلم هندي عشان كذا قررت اكثر بالاكل لاني ماكنت متغدي يعني طالع من الدوام على السينما :shy:

وللعلم رواتبهم عاليه واعلى من راتبي

لو بنحسبها يعني 20 ريال زياده يعني 50% زياده وهذي زياده مب بسيطه ترى واجد 50%

انا بديت اسوي مثلهم الشهر اللي طاف ووفرت من راتبي 3000 ريال كانت تطير كذا بدون سبب وهالشهر صرت اوفر مثلهم وصار اني وفرت 3000 ريال

انا لله الحمد راتبي يكفني طول الشهر لاني مهب متزوج ولا عند عيال احاتيهم اللهم علي مصاريف البيت بحدود 5000 شهرياً طبعا ونص راتبي يروح على قرض السياره وعلى القرض الشخصي والباقي يطير بدون سبب على اشياء تافهه واهمها فواتير كيوتل اللي لين اليوم ماني فاهمها

يعني المهم بالعاده راتبي يكفيني لين نهاية الشهر لكن عمري ما كنت قادر اوفر كل شهر اقول الشهر الجاي بحاول لكن ما وفرت شي

الشهر اللي طاف وفرت 3000 ريال بشوف الشهر هذا كم بوفر


احنا الله يهدينا لما نطلع نروح نصرف يمين ويسار بدون حساب اول ما ينزل الراتب وبعدها بكم يوم نضرب روسنا بالطوف لان الراتب خلص


ربعي متزوجين ومهب قادرين على المصاريف يوم اقولهم اشلون راتبكم يطير يقولون ما ندري وللعلم رواتبهم زينه يعني مهب اقل من 15 الف




خلوا طلعاتكم نظام امريكي كل واحد يدفع لنفسه

وغير كذا سووا نفسهم يعني مثلا السينما لا تشترون من عندهم كل شي يعني روحوا كارفور وبتحسون بالفرق

صدقوني كل طلعه بتوفرون فوق 100 ريال واحسبوها انتو طول الشهر فوق 3000 ريال

طول السنه فوق 36 الف ترى حلوين ولو قدرتوا توفرون اكثر بيكون احسن

لو بتفكرون فيها ترى والله ممكن اي شي يصير لو قررنا نوفر

المهم مغزى كلامي ليش احنا ما نسوي مثلهم؟ دوم نقول ما نقدر نوفر!!! ترى فيه مجال قوي للتوفير مثلهم وانا جبت لكم مثال طلعتنا للسينما طبعا فيه طلعات ثانيه نطلعها واشوف حرصهم على التوفير بطرق ثانيه لو تبغون ممكن افيدكم فيها


سامحوني لاني طولت لكن لازم نبدأ نتعلم نوفر لأن مهب حاله هم يجون بلادنا ويوفرون وفي الاخير فلوسهم يطرشونها برا واحنا المساكين ما يجي كم يوم الا والراتب طاير على الديون وعلى الاشياء اللي مالها داعي





امس في الكافور
انجليزي
معطل الطابور
ومسبب زحمه
في الاخير
شاري
تفاحه وحده وموزه
ومدري
يمكن حبتين مانجو

كل هذا توفير
وتعال شوف راتبه
اعلى من وزير بمرتين

[ثاني]

مرة كنت في محطة بوهامور في مطعم سبارو حق البيتزا. رحت انا ورفيجي. عاد رفيجي قال شرايك اروح اشتري جبس قلت له طيب اروح اشتر
طلع وانا رحت ادفع الحساب طبعا حسابي وحسابه . قالي تبي تدفع انت بروحك ورفيجك بروحك. حسيت بحساس غريب. شلون ادفع حسابي انا بروحي واخلي رفيجي يجي واقولة روح ادفع حسابه يعني بالعقل مهب حلوة
قلت له بستغراب نونو كلهم مع بعض

[الدكتور عزوز]

تصدق نفس بوفلان لا رحت معاه السينما اقوله خل ناخذ من كارفور بيبسي وشيبس وتسالي بس الرجال يقولي ماعندك سالفه .. :secret: يعني البوب كورن بروحه 8 ريالات في السينما .. ممكن تسوي شغل في كارفور وتبطر عمرك :rolleyes2:

عموما اشد على يدك في مسالة التوفير وكل واحد لازم يشوف له طريقة تناسبه للتوفير لان صراحه اغلبيتنا معدومة عنده ثقافة (التوفير) .. وصرنا نصرف بأسلوب مبالغ فيه وماله لزمه وعلى اشياء ما تستاهل ويمكن الاستغناء عنها .

اي والله اغلبنا ما عندنا ثقافة التوفير وياليت نثقف نفسنا عن التوفير


بيض الله وجهك يالغالي

[الدكتور عزوز]

يعطيك العافيه خيووو

الله يعافيك

[الدكتور عزوز]

اخوي نظريتك انا اتفق معاها مليون بالميه !
حب المظاهر هو اللي مودينا في داهيه
يجب كسر الروتين و اتباع انظمه اخرى للتوفير .

احييك على طرحك المتميز و منكم نستفيد

تحياتي

بيض الله وجهك يالغالي

[الدكتور عزوز]

التوفير ليس معناه البخل



فكم مبذر فقط على الشكليات ويوم تحتاجه قال ماعندي شي


وكم موفر وحريص ويوم تحتاجه يفتح لك الميزانية تأخذ اللي تبغي




ذاك الوقت تقول فلان اللي وفر معاه حق لأن المبلغ اللي يوفره استفدنا منه وبيض وجهه





لكن المشكلة





الين الحين ماقدرنا نطبق نظرية التوفير كل مايجي شهر تطلع مصاريف من تحت الارض ونقول بنخلي التوفير ابتداءا من الشهر القادم





وهكذا دواليك






لك الشكر دكتور

انا اتفق معاك 100% التوفير غير والبخل غير

المشكله الناس اغلبهم يفكرون ان التوفير هو البخل وان الانسان اللي يوفر يكون بخيل وانا اتمنى هذي النظره للشخص الموفر تتغير


الايام السودا اللي تمر علينا اكثر من الايام البيضا واخوانا المصريين قالوها (القرش الابيض ينفع لليوم الاسود)

[الدكتور عزوز]

:nice:




جزاك الله خير أخوي على النصيحة
وبيض الله وجهك .. أنا راح أتبعها في كل مكان .. مو بس السينما
ولو لقيت الفيلم موجود على سي دي بو 10 ريال بسويها

الله يرزقك ويرزقنا من حيث لانحتسب

اللهم آمين واشكرج اختي الفاضله على مرورج المتميز

[الدكتور عزوز]

المرء على دين خليله..

اذا بتماشي ناس مبذره راح تبذر معاهم..
واذا بتماشي ناس وسط راح تصير وسط..
واذا تماشي ناس توفر .. راح توفر معاهم..
بغض النظر عن الجنسيه..

كل واحد يحط نفسه في المكان اللي يبيه..

بيض الله وجهك يالغالي

[الدكتور عزوز]

اذا تبي توفر صح افسخ الغترة وخلها في السيارة وانزل السوق واشتر الي تبية :nice:

لان الغترة والعقال اصبحت تتسبب بزيادة الاسعار بنسبة 20% :victory:


وشكرا ع الموضوع :nice:

عسى ما شر افصخ الغتره والعقال؟ يالغالي هالكلام صحيح لو رحت بعض الدول المجاوره لكن هنا لا وانا اعرف من وين اروح واشتري بدون ما يتم النصب علي



ما ننكر ان فيه بعض الاسواق تمشي بنظرية ان القطري يدفع بدون حساب لكن المكان اللي كذا احط عليه بلوك ولا امر صوبه مره ثانيه



انا عارف اسعار السلع اللي احتاجها بشكل دائم وبغض النظر عن بعض الاماكن لكن الاسعار اغلب الاماكن موحده

[الدكتور عزوز]

كلامك صحيح و مافيها شي نتعلم من الغرب الصح و ننكر الغلط

بيض الله وجهج اختي الفاضله

[الدكتور عزوز]

عرب ومسلمين وكل واحد يدفع لعمره

اخوي قناص الخليج من قال عرب ومسلمين وكل واحد يدفع لعمره؟ اخوي الغالي ياليت تقرأ الموضوع زين وتعرف المغزى من الموضوع

[الدكتور عزوز]

المشكلة الناشوز ما تحصله بكارفور والبيبسي بصير ساخن ..

شلفايدة ..

صح الناشوز ما يتوفر الا عندهم معنى كذا انك تاخذه من عندهم لو حبيت وحتى الذره بعد



انا يالغالي اتكلم عن بعض السلع اللي موجوده عندهم وموجوده في كارفور مثل البيبسي والشبس والكافي حرام والله فرق

[الدكتور عزوز]

الأ على الطاري : عيال عم ومعاهم اثنين شباب كانوا في مطعم للعشاء .

و يوم جاء وقت الدفع كانت معركة داحس والغبراء من اللي يدفع وكانوا يتدافعون على الكاشير .

في نفس الوقت كان أجنبي في جواري سألني : قال لي بما معناه ماراح تفرق بينهم .

أبتسمت

في الأخير "الكثرة أغلبت الشجاعة" أعيال العم امسكوا الاثنين الي وياهم واتركوا ولد عمهم يدفع الحساب .

كرم العرب جميل لكن بـ تهذيب .

اخوي الكرم اهم صفه فينا كعرب ومسلمين لكني اتكلم عن التبذير والتوفير وما اتكلم عن البخل والكرم

[الدكتور عزوز]

صج كلام اخوي خلنا نعرف نوفر على الأقل في الطلعات .ثم نطبق على باقي امور حياتنا.

اي والله انك فاهمني :nice: بيض الله وجهك

[الدكتور عزوز]

والله عجبني موضوعك وتكلمت على نقطه مهمه جدا يشتكي منها الكثير منا، وللاسف هالايام التبذير زايد ..

ولازم نتعلم نوفر ،، بس تدري تذكرت ايام زمان يوم كنا صغار ، كنا دوم نفكر بالتوفير .. سواء من طرفنا او حتى من الاهل .. ولاحظ انه الكبار هالايام يعرفون يوفرون اكثر منا ..

شكرا على الطرح الجميل

اخوي والله انك صادق الكثير منا يشتكي انه مب قادر يوفر ولو صارت له اي حاله طارئه يضطر انه يتسلف من ربعه والاغلب بيقول لك ماعندي لآن الاغلب ما يوفر ويضطر الواحد انه ياخذ قرض حتى لو كان مبلغ بسيط والبنك ما يقصر بيعطيه لآنه عارف ان لو صارتله اي ازمه ثانيه او اي شي طارئ بيرجع للبنك وبيقولهم سوولي جدوله والدين يزيد والواحد يدفع ويدفع ويدفع ولا ينتهي قرضه وولا تنتهي ديونه



بيض الله وجهك يالغالي

[الدكتور عزوز]

انا لاحظت شي عالاجانب


اتلاقي الواحد منهم اذا كان راتبه 50 الف

يصرف 1000 في الشهر عالاكل


وياخذ له سياره عاديه عمليه ومب شرط فخمه


وملابسه جدا جدا عاديه ورخيصه


بس مستحيل اتحصل واحد منهم شايل تلفون او لاب توب قديم



دايما اتحصلونهم شايلين اجدد الموبايلات واحدث انواع الابتوبات

هم يدفعون عالشي اللي يكسبهم مال

بس يقتصدون في الشي اللي يخسرهم مال ومايعود عليهم بمنفعه ماديه ...

والله انك صادق يالغالي انا اعرف واحد هو ceo لشركه كبيره وراتبه فوق 400 الف شهرياً وسيارته فورد فوكس!!!!!!!!!!! استغربت يوم شفت سيارته وسألته ليش هذي سيارتك وما تليق بوظيفتك وكذا قال انا ابي شي يوديني ويجيبني وش الفرق بين هذي والمايباخ الا ان هذيك برستيج والثانيه عمليه وكلهم يوصلون من مكان لمكان واحنا في بلادنا متعودين ناخذ سيارات ما تصرف بترول واجد لسببين الاول ان البترول غالي والثاني ان نبغي نحافظ على البيئه قد ما نقدر




صراحه كلامه مقنع






وجواله بلاك بيري بولد 9000

[الدكتور عزوز]

اخونا الكريم/ د.عبدالعزيز!
(ابي اكبرك اشوي:))

الموضوع ..و الفكرة الرئيسية فيه
احييك جدا عليها..و اسلوبك الكتابي يعد.

و الاسلوب لحسن صرف المال
و ادارة حياتنا او التوفير..
قد يختلف فيه انسان عن آخر..

لكني..اشوفك..
تدعو اخوانك انهم يكونون
على وعي بدخلهم و " خرجهم"!

عموما...انت شرحت بمثال فيه جدا تبسيط للمسألة
و هو اسلوب اعجبني لان كل من يقراه يقدر يفهمه..
و لو رحنا بعد في تعرية صرفنا على اللي ما يسوى..
اكثر و اكثر ..بتجيك العجايب اكثر..

ع العموم..التنويع و انا اخوك..زين
يعني..حزات الواحد يمشي على خطته 100%
بس الامهم..انه اذا حس انه واجد ..بدا يحاسب و ايوسوس
على مصاريفه و يمكن تخترب الميزانية او ما يوفر
المبلغ المستهدف..و و و

عندها...عليه انه يكسر هالشي..
الا و ايروح بالعاني
يصرف اشوي زود و يشتري الغالي..

الزبدة..ان الواحد لا يكون مرخي عالاخير
لين ما يصير باخر الشهر..صدق (فقير)
و لا ايشد لين ما يزنط عمره من الخوف
و بعدين يستكره من ربعه و اغلب هله..

التوسط..وان الواحد ما يهمل بيزاته
و لا ايصير عبد او (تجوري) لها!

اخيرا...ادعوك ان كنت تحب تسترسل
و تطور من قدراتك في هالمجال..لموضوع
كنت قد وضعته في فسم النقاش الاقتصادي
بالمنتدى على هالرابط..
http://www.qatarshares.com/vb/showthread.php?t=342455

اتمنى انك و البقية..تجدون فيه مزيدا من الافادة
و المتعة!

تحياتي و تمنياتي لك بالتوفيق في حياتك
يا دكتور عزوز

والله يالغالي انا ضد البخل والانسان البخيل ما احب رفقته خير شر

البخل شي والتوفير شي ثاني


البخل يعني ان الانسان يحرم نفسه من كل شي في الدنيا عشان خاطر الفلوس


والتوفير يعني تشتري اللي في خاطرك لكن لازم انك توفر في الشراء يعني مثلا البيبسي في السينما بـ 8 ريال ونفسه في كارفور بريال ليش ناخذ بو 8 ريال؟؟




اخوي عابر سبيل انت من الناس اللي اقدرهم كثير في المنتدى واعجابك بموضوعي شرف لي


والحين بمر على موضوعك يالغالي






بيض الله وجهك

[بوطويشم]

السلام عليكم

صج التوفير مطلوب

بس مب ممنوع ادخل فالسينما أكل من برع؟؟؟

[الدكتور عزوز]

ذبحنا الكرم الحاتمي
فكرة حلوة نشتري من كارفور اوفر
ونعلم عيالنا على التوفير من الصغر
بارك الله فيك

اي والله اخوي لازم نعلم عيالنا التوفير والاهم نعلمهم الفرق بين التوفير والبخل!!!!!! لازم ما يفهمون ان الانسان الموفر هو انسان غير بخيل لأن هذا اللي ذابحنا الحين وهذا المفهوم العام عندنا


بيض الله وجهك الشيخ

[الدكتور عزوز]

أختي :eek5:

وحيد يادكتور :tease:

افا يا ذا العلم افا بس افا

السموحه منك يالغالي كنت شابك النت من الجوال وما انتبهت زين وبين عندي ان النك وحيدة الشوق والسبب هو الشخطه اللي بين كلمة وحيد والشوق والخط كان صغير والله :shy:


السموحه منك يالغالي وخشمك :shy:


بيض الله وجهك

[القرنفل]

صح كلامك وصح الله لسانك احنه مسرفين ودائما ندفع للمظاهر وعشان ما ينقال عنا بخله او اقتصاديين ونستسهل دفع العشر والعشرين وبعدين نقول طارت فلوسنا لان ما حسبنها صح ،انا اعرف بعض الاخوات اللي الريال عندهن له قيمه وين وصلن الحين صاحبات املاك وعقارات .:nice:

[الدكتور عزوز]

احنا تعودنا على الصرف بلا حساب ( ومنقود ) ان كل واحد يدفع عن نفسه

بس صاحب الموضوع سأل شلون الأجانب يوفرون ؟؟؟؟؟؟؟؟؟؟؟؟

اهم شي يتمتع براتب خياااااااااااااااااااااااااااااااااااالي

وعنده امتيازات :-

1- سكن على حساب جهة العمل أويصرف له بدل سكن .
2- تذاكر على حساب جهة العمل ؟
3- مدارس على حساب جهة العمل ( اذا عنده اولاد ) .

غصباً عليه بيوفر ويحاسب على الريال !!!!!!


اختي الفاضله موضي قطر



صحيح ان الاجانب رواتبهم اعلى من رواتبهم وعندهم سكن من جهة العمل ومدارسهم على جهة العمل لكن هم قاعدين يوفرون يعني ما يقول والله انا راتبي كبير وبصرف على الاشياء التافهه لا يقول بصرف على قد احتياجاتي وبوفر



احنا يجيج الواحد راتبه نقول مثلا 15 الف تلقينه ماخذله سياره سعرها فوق 200 الف ويدفع فوق 3500 ريال شهرياً وكل شهر يدخلها الوكاله تشييك وهالسوالف ويدفع مبلغ مهب اقل من 1000 ريال كل شهر وغير البترول اللي سعره صار اغلى واحنا ندفع فوق 700 ريال للبترول كل شهر طبعا انا سيارتي 8 سلندر وتصرف بترول

انا من الشباب اللي سيارتهم سعرها كان فوق 220 الف طبعا هذا غير فوايد الاولى للتمويل وانا الحين متحسف واقول لو اني ماخذلي كامري اقزر فيها مشاويري واجمع فلوس اجيب لي سياره بدون ما احتاج لبنك ولا غيره (السبب هو اني توني بديت سياسة التوفير من شهر فقط لاغير)

يجي الواحد يبغي يتزوج ومصاريف الزواج فوق 350 الف وكلها ديون ليش لآن ما فكرنا نوفر مبلغ للزواج

مصاريف السكن لين ما الواحد يطلع له سكن حكومي (واحد من الربع مقدم على سكن حكومي من 1998 توه بيته بيخلص)

للحين الواحد ما سدد ديون زواجه الا جايينه عيال ومصاريف العيال الكل عارفها



وين الواحد يبقاله راتب؟ رواتبنا ما تكفينا عشان كذا لازم الواحد يبدأ سياسة التوفير عشان ما تتراكم عليه الديون وعشان بعدين يعيش مرتاح ولو ان اكيد انه بيكون مديون بما انه قطري فعلى الاقل قيمة الدين تكون اقل





اختي واحد من جماعتنا عمره 21 سنه خذ له قرض شخصي من بنك الدوحه يبي يتزوج ويشتري سياره وهو ربي يهديه مخلي القرض على 20 سنه يمكن مبلغ القرض قبل الفوايد 400 الف وبعد الفوايد مليون و600 الف متخيله ان واحد عمره 21 سنه مديون بهذا المبلغ؟


لو انه صبر كم سنه يجمع فيها فلوس ويتزوج كان احسن له لكن ربي كاتب له يكون مديون بهذا المبلغ وهو بنفسه متحسف لكن الحمدلله زوجته زينه وتساعده على مصاريف الحياه وربي يخليهم لبعض



اختي ياليت ما نقارن نفسنا بالاجانب لأن وضعهم في البلد افضل من وضعنا بمليون مره كأن هم المواطنين وحنا المقيمين لكن موضوعي يتكلم عن التوفير الواحد يوفر عالاقل عشان ما يحتاج انه يتدين مبالغ خياليه ويورط نفسه


وعلى فكره انا انسان مديون وراح ابدأ سياسة التوفير عشان اسدد ديوني بأسرع وقت ممكن

[الدكتور عزوز]

كلامك سليم 100%100 الى مخرب علينا الفشخره الى مالها داعي تقدر تقول مع الخيل ياشقرا

بيض الله وجهج اختي غزلان

[الدكتور عزوز]

و كي توفر أكثر لا داعي للذهاب للسينما بالأساس .

أتعلم لماذا ؟

توفير في حسابك لكسب الحسنات أكثر و ترك السيئات و طاعة رب البريات

و توفير في مالك لأن الله سيسألك عن ال35 ريال التي صرفتها ، فسوف تخجل من رب العالمين أن تقول بأنك
صرفتها في معصية .

فالحل أن تترك الذهاب للسينما نهائياً ، لأنني آراها لا تناسب الرجل المسلم فكيف يضيع وقته الذي هو عمره

و ماله في شيء لا يرضي الله عز وجل .

و من ترك شيئاً لله عوضه الله خيراً منه ، فتأكد أنك إن تركت السينما ليس لتوفير المال و إنما ابتغاء مرضاة الله عزوجل ، فصدقني سوف تأتيك الأرزاق من حيث لا تدري .

أسأل الله العظيم أن يزيدك من فضله و يرزقك من خيري الدنيا و الآخرة

جزاك الله خير وجعله في ميزان حسناتك

[الدكتور عزوز]

ليش ما تنزلون افلام من النت ببلاش وجي توفرون 35 ريال بعد

وليش من الاساس ننزل الافلام من النت ترى النت بفلوس بعد ويستحسن ان احنا نكنسل اشتراك النت وبهالطريقه وفرنا 300 ريال كل شهر واصلا الافلام تنعرض في التلفزيون



اخوي السينما نروحلها عشان نغير جو فقط لا غير وانا ما قلت لازم الواحد يصير بخيل عشان يوفر انا قلت الواحد يقارن بالاسعار لنفس السلعه وياخذ الارخص بما انها نفس السلعه فقط لا غير وما يحتاج انه ياخذ زياده عن مستوى حاجته هذي هي سياسة التوفير

[الدكتور عزوز]

اشكرك على الموضوع والمغزى من الموضوع اني اوفر مبلغ وقدره ينفعني مستقبلا ولكن بعض الاخوه هنا يقولون احنا اهل الكرم واحنا اهل الجود مافيها شك ولكن بالمعقول نصير كرماء مهب كل يوم عزيمه علي صايديني الشباب في زاويه وانا داق الصدر يبلفيت اني البنك المتحرك لازم الانسان يوفر حق نفسه بكره وراك زواج وراك مستقبل تعيشه وراك مسؤوليه لازم تجمع وتوفر عشان ماتمر 9 سنين او 8 سنين وانت انت ماتغيرت على الاقل جمعت لك مبلغ وقدره من المال عشان تأمن مستقبلك ومستقبل عيالك تحياتي

هذا اللي ودي اقوله المشكله ان الاغلب يعتبرون التوفير بخل وهذي مشكله كبيره عشان كذا الواحد ما يفكر انه يوفر لآنه يحسب انه اذا بدأ يوفر بيصير بخيل والبخل صفه الكل يكرهها


لازم نغير مفهومنا عن التوفير عشان يبدأ الكل يوفر

بيض الله وجهك

[الدكتور عزوز]

امس في الكافور
انجليزي
معطل الطابور
ومسبب زحمه
في الاخير
شاري
تفاحه وحده وموزه
ومدري
يمكن حبتين مانجو

كل هذا توفير
وتعال شوف راتبه
اعلى من وزير بمرتين

ايه يالغالي توفير لآنه يشتري قد احتياجاته وعارف ان هذا يكفيه



احنا الله يهدينا اذا الواحد عنده عزيمه تلقاه شاري كراتين فاكهه وفي الاخير ينحط ربعها او حتى نصها والباقي في الثلاجه ومحد يقرب صوبه اياااااااااااام وفالاخير مصيره الزباله اكرمكم الله هل هذا الشي يرضي الله؟



اخوي احنا مالنا شغل برواتبهم اللي نقوله ان لازم الواحد يفكر ايش هو محتاج ويشتريه حرام الاكل ينقط فالزباله حرااااااااام هذا تبذير (ان المبذرين كانوا اخوان الشياطين)

[الدكتور عزوز]

مرة كنت في محطة بوهامور في مطعم سبارو حق البيتزا. رحت انا ورفيجي. عاد رفيجي قال شرايك اروح اشتري جبس قلت له طيب اروح اشتر
طلع وانا رحت ادفع الحساب طبعا حسابي وحسابه . قالي تبي تدفع انت بروحك ورفيجك بروحك. حسيت بحساس غريب. شلون ادفع حسابي انا بروحي واخلي رفيجي يجي واقولة روح ادفع حسابه يعني بالعقل مهب حلوة
قلت له بستغراب نونو كلهم مع بعض

طبعا يالغالي ما يصير تدفع لنفسك وهو يدفع لنفسه وانت في هذا الموقف اصلا عيب ومنقود عند العرب وهذا اصلا اسمه بخل وانا لو مكانك شي طبيعي اني بدفع لي وله


ياليت يالغالي تقرأ الموضوع زين وتقرأ الردود وبتعرف ايش قصدي بالضبط لآن التوفير لا يعني البخل

[sh50]

ناصح البدو غاشهم

[الدكتور عزوز]

السلام عليكم

صج التوفير مطلوب

بس مب ممنوع ادخل فالسينما أكل من برع؟؟؟

وعليكم السلام ورحمة الله وبركاته

والله يالغالي اللي اعرفه ان ممنوع تدخل اكل اكل يعني سندويشات والاكل اللي فيه ريحه عشان ما يوصخ ريحة المكان


انا صارلي شهر ادخل معاي كيس كارفور محد يكلمني :shy: يمكن لاني اروح وقت الزحمه وما ينتبهون ما ادري بس مرات اروح يعني ما يكون فيه زحمه وبعد محد يكلمني:shy:

[الدكتور عزوز]

صح كلامك وصح الله لسانك احنه مسرفين ودائما ندفع للمظاهر وعشان ما ينقال عنا بخله او اقتصاديين ونستسهل دفع العشر والعشرين وبعدين نقول طارت فلوسنا لان ما حسبنها صح ،انا اعرف بعض الاخوات اللي الريال عندهن له قيمه وين وصلن الحين صاحبات املاك وعقارات .:nice:

والله اختي الفاضله المشكله الكبيره هي ان مفهوم التوفير السائد عندنا هو البخل والناس اغلبهم يعرفون ان التوفير بخل لو مفهوم التوفير يتصلح بتنحل هالمشكله



بيض الله وجهج

[الدكتور عزوز]

ناصح البدو غاشهم

القصد اخوي؟

[sh50]

القصد اخوي؟

هذا مثل عند البدو يعني الرجال شاف موقف جميل من الاجانب في التوفير بغى ينصحكم قلبتوه بخل000يعني كليتوه بقشوره

[الدكتور عزوز]

هذا مثل عند البدو يعني الرجال شاف موقف جميل من الاجانب في التوفير بغى ينصحكم قلبتوه بخل000يعني كليتوه بقشوره

وانا بدوي يالغالي واعرف المثل زين

لكني ما فهمت قصدك من ورى المثل وفهمت شي ثاني وقلت خلني اتأكد من مقصدك :nice:

بيض الله وجهك يالغالي :nice:

[طلعة الروح]

يعطيك العافيه على الموضوع المفيد.

انا معاك انه التوفير مطلوب جدا خصوصا وانه احنا في زمن ارتفاع الاسعار
ومايدري الواحد متى يحتاج لمبالغ التوفير وقت الطوارئ والازمات...

انا لاحظت انه اكثر رواتب الموظفين رايحه على اكل المطاعم فنلاحظ انه يوميا الواحد يتعشى من بره وساعات يتغدى من بره وهاي اشوفه ماله داعي
ولازم الواحد يبتدي ينظم بهالمسألة اكثر ..

قروض السيارات غالية السعر نفس الشي ليش ما الواحد يوفر وياخذ الموتر الارخص مع جودة المستوى وبالتالي يوفر له كمن الف شهريا تفيده فهذي النقطه اللي يقع فيها غالبية الشباب اليوم

بس انا مع ان الواحد يوفر شهريا ويصرف بس على الاشياء الضرورية في الحياة وفي نفس الوقت مايحرم نفسه من الطلعات الاسبوعيه في حدود المعقول..

[تغلبية]

شكرا دكتور على الموضوع ..




واجب علينا التوفير مب على النظام الأمريكي .. لآ ..

على النظام الالاهي اللي يفرض علينا الحمد والشكر على النعمة وليس بالكلام فقط وإنما بالفعل .. " وبالشكر تدوم النعم "

من حطيت هالفكرة فــ بالي وأنا فعلاً أوفر من راتبي في بعض الأشهر 3000 ريال ... ومرات 5000 ريال

من غير بخل ولا تقتير على النفس .. كل شي بارهوة .. لكن بعقل والحمدلله ..




أزيدك من الشعر بيت :)



الأجانب لهم أساليب كثيرة للتوفير والاستمتاع بحياتهم بشكل أفضل

فيه شي يوفر عليهم بالهبل خاصة وإن حياتهم دوم برا .. ... مجمعات ..سينمات .. مطاعم .. طول يومهم ياكلون !!!!

فيه كتالوغ كوبونات توفير .. يشترونه من مكتبة جرير وأكاد أجزم إن مايدري عنه إلا 1% من القطريين ..هذا إذا دروا عنه !!

واصلاً إذا رحت تطلبه من جرير أو تشتريه الكاشير يبطل عينه مستغرب إن قطري وش عرفه بهالكتالوغ !!

اسمه Entertainer Qatar

هو عبارة عن كوبونات توفيرية خاصة بالمطاعم بمختلف درجاتها والكافيهات والملاهي وبعض الأندية الصحية والصالونات التجميلية

الفكرة قائمة على ان الكوبون الواحد في أحد مطاعم الدرجة الأولى .. يعطيك main cours مجاني في حال طلبك واحد ..

اذا كان المين كورس بــ 120 ريال فانك تحصل على آخر مجاني .. يعني توفر 50% من القيمة ..


بقدر ان هذي الكوبونات توفيرية ..

ممكن تقترح عليكم أماكن تقضون فيها وقت مع الأصدقاء أو الأقارب اذا احترتوا وين تروحون ..

وخاصة للناس اللي يحبون يقضون وقتهم برا البيت أكثر ..

ومن جهة ثانية ممكن يساعد على الصرف أكثر ..

فيه أنواع ثانية من هذا الكتالوغ .. فيه خاص بالعائلة وفي أنواع ثانية ماتحضرني أسمها الحين

أنا جربت شريت بالكوبونات بيتزا .. كان الحساب 160 .. احسبو لي بــ 90 ريال 4 بيتزات كبار !

اظنه على المدى البعيد نظام توفيري جيد جداً

وهذي صور له ..

http://up.souqaldoha.com/get-3-2010-6fiyx2sh.JPG (http://up.souqaldoha.com)

كوبونات لمطعم في الماريوت
http://up.souqaldoha.com/get-3-2010-g53aeeqr.JPG (http://up.souqaldoha.com)

[Mr.Mohammad]

كلامك صحيح 100%


الله يبارك لك في خيرك..

وان شاءالله بتم احاسب اكثر و افكر عدل قبل لا اصرف ..

يعطيك الف عافيه..

[الطيبة كلها]

بحاول اطبق كلامك خاصه بالنسبه لعيالنا ماشافوا العاب الا يبغون يشترونها وعلشان نسكتهم ونراضيهم دايما نشتري لهم حلويات بس بخفف هذي الطبايع معاهم اما الدفع صعبه كل واحد يدفع لنفسه مب حلوه

[عابر سبيل]

امس في الكافور
انجليزي
معطل الطابور
ومسبب زحمه
في الاخير
شاري
تفاحه وحده وموزه
ومدري
يمكن حبتين مانجو

كل هذا توفير
وتعال شوف راتبه
اعلى من وزير بمرتين


بعد اذن صاحب الموضوع د. عزوز..
ابي ارد على هالرياني المدريدي:omg:

و الله انك طريت علي بكلامك..ابوي الله يرحمه
و روحته لسوق الخضره..و كان هالشي ايسويه اكثر
شيبان قطر..فقيرهم و شيخهم بعد

بعد الفجر...و عندنا بيكم (حمر)
في الاسبوع مرة وحدة نروح لسوق الخضرة
و السمك بعد...

انا لحقت عليهم باخر ايامهم لما كانوا في سوق واقف
او قريب منه..
(مدري انكان بالمنتدى حد من هالوطر)
و بعدين انقلوه للسوق المركزي الحالي..

عموما...
كان البيك اب..موي عراوي..
شفر..يعني ايشيل عفش بيت!

ايجي متروس صناديق خضرة من كل شي..
طماط و خس و اخيار و جزر و و بقية انواع
الخضرة حسب المتوافر بالسوق..

بيتنا ( العود) ..
يكفيه من كل شي صندوق
و لا بالكثير اثنين..

الباقي شيصير فيه...
حق ( الجسام)...
احنا لعيال و الصبيان..
مهمتنا نوزع على حسب
اوامر وزارة الداخلية
(امي الله يشفيها)

هذا حق بيت افلان..
و هذا حق بيت علان
و هذاك..حق ام افلان
و ما تجي الساعة 9 الضحى..
الا كل شي مخلص..
و نرجع..الا انحصل بعد بيت افلان..
عندهم طراد..مطرشين لنا سمك و لا قباقب..
و يوم ثاني..بيت عمي و لا عمتي..
تحصلهم بعد مطرشين لنا خضرة و لا و لا!

و في كل حزة لين حزة..الفرجان اللي حوالينهم شيوخ
(طول الله باعمارهم)..اتلف عليهم سيارات
توزع من محاصيل مزارعهم..و لا توزع لبن
من حليب البقر اللي عندهم!

و الكل عاش هالشكل...
و الكرم الحاتمي يا مدريدي
على كيف كيفك

***
الحين..يا عليان..
اشرايك..لا احنا هالايام..
صرنا مثل هالانجليزي
رفيجك اللي معطل الطابور..

و لا احنا مسكنا (سَلْم) شيباننا اللي
كان على فقرهم و حاجتهم ..كرمهم
موب حاتمي...الا اسلامي باصوله
من اول جار..لين السابع.. و ما بعده!

فيا خوي...
القصد اللي انا افهمه من الموضوع
موب تقليد الانجليز و لا التقتير و لا اي شي..

لكن ..الحكمة و الوعي لمصاريفنا...

اما التبذير في اللي ما يسوى..هو تبذير
و للمال تضييع..و في الاخير..الشاب اللي معاشه
10 ألاف..ايصيح..انا فقير..و هو ما عنده
الا راسه..و لا زوجة ولا اعيال..
و لا شايل هم اقصراهم
و هامه حتى حال اخوانه و خواته
اللي عايشن في نفس البيت معاه!

ما نبي حد ايشيل هم الجيران!

شيبان قطر..كثير منهم عاشوا و ماتوا(رحمة الله عليهم)..
و ما كان يدخل عليهم طول الشهر حتى 3-5 الاف...
و عنده يمكن زوجتين و امه معاه...
و ع الاقل 6 اعيال و 4 بنات..
و فاتجح مجلسه بيوميا بعد!!

و هذي سوالفهم في الكلام
اللي قلت لك اياه اعلاه!

اجل ليش هالايام..و رغم كثرة
المداخيل و ترهل المعاشات..
الناس..و الشباب بالذات
اتصيح..هل من مزيد..
و يا حالتاه .. و وا فقراه!

كل هذا من التبذير
و سوء السلوك مع الامانة
اللي الله بيسالهم عليها...
ايش جاك من بيزات..
و اشسويت فيها!



شكرا على اتاحة الفرصة
للكلام يا عليان
و قبلك مضيفنا...الدكتور عزوز..

اسفين على الاطالة

فمان الله!

[بوطويشم]

فيه كتالوغ كوبونات توفير .. يشترونه من مكتبة جرير وأكاد أجزم إن مايدري عنه إلا 1% من القطريين ..هذا إذا دروا عنه !!

واصلاً إذا رحت تطلبه من جرير أو تشتريه الكاشير يبطل عينه مستغرب إن قطري وش عرفه بهالكتالوغ !!

اسمه entertainer qatar

هو عبارة عن كوبونات توفيرية خاصة بالمطاعم بمختلف درجاتها والكافيهات والملاهي وبعض الأندية الصحية والصالونات التجميلية

الفكرة قائمة على ان الكوبون الواحد في أحد مطاعم الدرجة الأولى .. يعطيك main cours مجاني في حال طلبك واحد ..

اذا كان المين كورس بــ 120 ريال فانك تحصل على آخر مجاني .. يعني توفر 50% من القيمة ..


بقدر ان هذي الكوبونات توفيرية ..

ممكن تقترح عليكم أماكن تقضون فيها وقت مع الأصدقاء أو الأقارب اذا احترتوا وين تروحون ..

وخاصة للناس اللي يحبون يقضون وقتهم برا البيت أكثر ..

ومن جهة ثانية ممكن يساعد على الصرف أكثر ..

فيه أنواع ثانية من هذا الكتالوغ .. فيه خاص بالعائلة وفي أنواع ثانية ماتحضرني أسمها الحين

أنا جربت شريت بالكوبونات بيتزا .. كان الحساب 160 .. احسبو لي بــ 90 ريال 4 بيتزات كبار !

اظنه على المدى البعيد نظام توفيري جيد جداً

وهذي صور له ..

http://up.souqaldoha.com/get-3-2010-6fiyx2sh.jpg (http://up.souqaldoha.com)

كوبونات لمطعم في الماريوت
http://up.souqaldoha.com/get-3-2010-g53aeeqr.jpg (http://up.souqaldoha.com)

صج اول مره أدري عنه يبيله تجربة

مشكور/ة على المعلومة

واسمحلي على المداخلة دكتو ومشكور على الموضوع

[موضي قطر]

شكرا دكتور على الموضوع ..




واجب علينا التوفير مب على النظام الأمريكي .. لآ ..

على النظام الالاهي اللي يفرض علينا الحمد والشكر على النعمة وليس بالكلام فقط وإنما بالفعل .. " وبالشكر تدوم النعم "

من حطيت هالفكرة فــ بالي وأنا فعلاً أوفر من راتبي في بعض الأشهر 3000 ريال ... ومرات 5000 ريال

من غير بخل ولا تقتير على النفس .. كل شي بارهوة .. لكن بعقل والحمدلله ..




أزيدك من الشعر بيت :)



الأجانب لهم أساليب كثيرة للتوفير والاستمتاع بحياتهم بشكل أفضل

فيه شي يوفر عليهم بالهبل خاصة وإن حياتهم دوم برا .. ... مجمعات ..سينمات .. مطاعم .. طول يومهم ياكلون !!!!

فيه كتالوغ كوبونات توفير .. يشترونه من مكتبة جرير وأكاد أجزم إن مايدري عنه إلا 1% من القطريين ..هذا إذا دروا عنه !!

واصلاً إذا رحت تطلبه من جرير أو تشتريه الكاشير يبطل عينه مستغرب إن قطري وش عرفه بهالكتالوغ !!

اسمه entertainer qatar

هو عبارة عن كوبونات توفيرية خاصة بالمطاعم بمختلف درجاتها والكافيهات والملاهي وبعض الأندية الصحية والصالونات التجميلية

الفكرة قائمة على ان الكوبون الواحد في أحد مطاعم الدرجة الأولى .. يعطيك main cours مجاني في حال طلبك واحد ..

اذا كان المين كورس بــ 120 ريال فانك تحصل على آخر مجاني .. يعني توفر 50% من القيمة ..


بقدر ان هذي الكوبونات توفيرية ..

ممكن تقترح عليكم أماكن تقضون فيها وقت مع الأصدقاء أو الأقارب اذا احترتوا وين تروحون ..

وخاصة للناس اللي يحبون يقضون وقتهم برا البيت أكثر ..

ومن جهة ثانية ممكن يساعد على الصرف أكثر ..

فيه أنواع ثانية من هذا الكتالوغ .. فيه خاص بالعائلة وفي أنواع ثانية ماتحضرني أسمها الحين

أنا جربت شريت بالكوبونات بيتزا .. كان الحساب 160 .. احسبو لي بــ 90 ريال 4 بيتزات كبار !

اظنه على المدى البعيد نظام توفيري جيد جداً

وهذي صور له ..

http://up.souqaldoha.com/get-3-2010-6fiyx2sh.jpg (http://up.souqaldoha.com)

كوبونات لمطعم في الماريوت
http://up.souqaldoha.com/get-3-2010-g53aeeqr.jpg (http://up.souqaldoha.com)

تصدقين اختي اول مرة ادري عنه مشكورة

[Tiamo]

لو الواحد يقعد مع نفسه شوي ويحسب مصاريفه و يحط 10% من الراتب كإحتياط والباقي دويعة صدقوني بيوفر وهو مرتاح البال

انا ماشي على هالطريقة وكل سنه أطلع بربع مليون - 300 الف والله الحمد من قبل وبعد

[لولو80]

كلامك صحيح بس السنيما عندنا محتكرة هالشي ومانعه دخول اي اكل من برا فكيف دخلته
لانه الاكل اللي موجود بالسنيما استغفر الله ما تشفق عليه ومع ذلك مانعين تجيب من برا

بالنسبة لطلعاتي انا وصديقاتي حتى خواتي كل مرة على حد عرفت لانه بقطر خاصة بالمطاعم ماعندهم هالثقافة اللي عند الغرب اللي متعودين اساسا على هالعادة ويعرفون اللي يشتغلون بالمطعم هالكلام

لكن هني جرب وقولهم ابي احاسب هذا الطلب بروحه بيفتح لك حلجه وهو ولا فاهم شي هههههههه مستغرب ليه تدفع هذا بروحه وهذا بروحه
ومرات اخذ اغراض لي واغراض لبيت ابوي بس افصل الخرايط واقوله حط هذا على جنب لا تخلطه مع ذيه تعال شوف التسبه ههههههههههههههههههههه

يعطيك العافية

[HENRY]

هذااا نظام امريكي هذا نظام بنجالي
لان في بلدنهم كل شي له ضريبه تلقى الواحد بالاسبوع يتسبح مره وحده علشان مايدفع تكرمون ضريبة المجااري (الصرف الصحيي) تلقااه مجرب والقمل مليان في جفونه ورموشه غصب عنه يوفر في بلاده وبرع بلاده
بس الحمدالله أهل قطر فيهم الخير والبركه من غير مجامله لو شافك قطري بالمطعم بالصدفه مره او مرتيين او ثلاث والله انه يلزم عليك علشان يدفع فاتورتك
الحمدالله على الخير الي أحنا فيه

[كينيا]

اي والله اخوي لازم نعلم عيالنا التوفير والاهم نعلمهم الفرق بين التوفير والبخل!!!!!! لازم ما يفهمون ان الانسان الموفر هو انسان غير بخيل لأن هذا اللي ذابحنا الحين وهذا المفهوم العام عندنا


بيض الله وجهك الشيخ

اللي صاير الحين شي عجيب غريب
عائلة تطلع من بيتها وترح لها مجمع بتونس العيال
الاتفاق سينما
قبل لايدخلون السينما طبعا بوب كورن وبارد وتشوكليت يبتدي الفلم عادهم مادخلوا
( شدعوه تشتري من كارفور زطي انت ):secret:
زييين خلص الفلم
اطلعوا عقب الاكل اكثر من مشاهدة الفلم يبون مطعم طبعا مايصير (بخيل انت وتخليها في خاطر عيالك ) يبون مطعم ماكفاهم الاكل اللي هو اكثر من مشاهدة الفلم
خلصوا من المطعم يبون الألعاب شوي ( لاتقول لا بخيل انت )
وطبعا يبون لعبة ولا تشوكليت وبارد وتشيبس
اخلصوا هااااا يبون من راعي الايس كريم لااااازم ( زطي انت )

يبون ويبون ويبون العالم قاعده تعلم عيالها شي يتعبهم مستقبلا
مش كل عائلات قطر بنفس المستوى ( احسبوا تكلفة واحد من العيال بس بالحسبة اللي صارت فوق ) وشوفوا التكلفة على 3 أو 4 لا واذا مطلعين حد بعد ممن العيله :rolleyes2:
ليش اعلمهم ثقافة غريبة اخترعناها احنا من باب الكرم والجود
خلاص نعلمهم نطلع من بيتنا ونتفق على شي واحد
يعني لو كانت هالسالفه مره كل راس شهر معليه تعويض لهم عن طول الشهر وعلى فكرة بيقدرون الطلعة عدل
المشكلة اعرف ناس مش اقل من 3 مرات في الاسبوع ونفس التيتي في ذالمجمعات
لعنبوه لو جبل فلوس خلص
الزمن القديم والكرم مش مثل الحين جاك ضيف تل خروف واذبحه واعزم الجماعة وخلصنا
لاااا تغيرت الحياة
لو بتكلم وش بقول وش بخلي
تعبت:shy: