:: من راح اسبانيا ::

[مــــلاك]

سؤالي واضح .... من سافر اسبانيا في الصيف

يعني شلون الجو في شهر 7 و8

وشنهي افضل المناطق ولو في ترتيب معين ممكن تساعدوني فيه

ناوين عليها هالصيف مع اهلي ان شاء الله

والنت فيه مواضيع وايد بس حابه اسمع اقتراحاتكم خاصه للي زاروها

[ع.م]

أضم صوتي لصوتج.. وننتظر الردود..

[سهم طايح]

حرررررررررررر لا يطاق

نهارهم طويل

[مــــلاك]

حرررررررررررر لا يطاق

نهارهم طويل



ليييييييييييييش ؟؟؟؟ متى سافرت لها

عطنا رايك فيها وشنو الي ماعجبك غير الجو الحار

في انتظار رااايك

[rashid-1]

السلام عليكم

كل اوروبا نهارها طويل وليس مقصور على اسبانيا فقط

بالنسبه لأسبانيا فهي غالية جدا

وماأنصحج في السفر لها

الأفضل للعوائل إذا معزمين على اوربا هي النمسا لأنها بلد عائلية وأرخص من أسبانيا

ولاتغترين في اسبانيا على شان الأسم

ومايميز النمسا هو وجود الخليجيين السياح بكثره والواحد يطمن أكثر

[مــــلاك]

انا معاكم ان كل اوروبا نهارها طويل .. جربت السفر للنمسا وكانت رائعه وسويسرا بعد
كنت افكر هالسنه في ايطاليا او اسبانيا .. بس ايطاليا عيبها الجو الحاااار
فخفت اسبانيا تكون مثلها
بصراحه جاني احبااط

[مــــلاك]

يعني محد راح اسبانيا من رواد المنتدى ؟؟؟؟؟؟؟؟

[شقردي]

انا في شهر 8 /2007 طلعت مدريد بلد حلوه صحيح انها حاره بس مو مثل عندنا في قطر يعني درجة الحراره ان كثرة 38 طبعا في النهار بالضل عادي تجلس ونت مرتاح في الليل الجو حلو بس حسب معلوماتي احلا شي عندج ماربيا في الصيف وعلى العموم اسبانيا بلد حلوه وفيها مناطق سياحيه واثريه بس للاسف انا تميت في مدريد ولي روحه لها انشاء الله في الصيف هاذا

[مــــلاك]

جزاك الله خير اخوي ...ان شاء الله السفره بتكون موزعه بين مدريد وبرشلونه وماريبا

[قطري طموح]

اختي ملاك اذا كان الجو من الامور الهامه لكم فانصحك بعدم السفر الى اسبانيا وخصوصا في الصيف لان الجو فيها لايطاق وهناك بدائل اخرى افضل واضمن لكم في اوربا .

[مــــلاك]

اختي ملاك اذا كان الجو من الامور الهامه لكم فانصحك بعدم السفر الى اسبانيا وخصوصا في الصيف لان الجو فيها لايطاق وهناك بدائل اخرى افضل واضمن لكم في اوربا .



جزاك الله خير اخوي ...

ماهي البدائل ..؟؟

مع العلم جربت السفر لفرنسا وبريطانيا وسويسرا ..والنمسا ( فيينا وسالزبورج وزيلامسي ) والمانيا (ميونخ ) تركيا اسكوتلندا

[بو خليفه 123]

رحت برشلونه , مدريد , فالنسيا في شهر ديسمبر من سنة 2008 (كل سفراتي في شهر ديسمبر)

الجو بارد و بديع , الاسعار معروفه لأنها باليورو .

برشلونه : اسلوب معماري متميز و طبيعه لا بأس بها .. لكن المدينه تموت بعد الساعه 8 مساءً


"لارامبلا" هو الشارع الرئيسي في المدينة والقلب النابض لها. سلسلة من المطاعم والمقاهي والنوادي الليلية تمتد على مدى الشارع وهو ايضاً ممشى يتمشون فيه الناس هناك .

فيها متاحف كاتالونيه حلوه اذا حابه العيال يستفيدون و ياخذون نبذه عن التاريخ الكاتالوني .. او اذا كانوا من محبين الكوره طبعاً برشلونه غنيه عن التعريف :)



مدريد : معناها بالعربي مجر النهر .. مادري ليش قلت لج المعنى لكن في خاطري اقوله :tease:

مدريد عباره ايضاً عن متاحف .. قهاوي .. قصور ملكيه .. و كانت تنقلاتي عن طريق المترو و في كل محطة مترو تلقين كٌتيب عن المدينه يشرح لج فيه عن كل الاماكن المعروفه في مدريد .

ملاهي اسمها Park attractions تناسب جميع الاعمار .. يعني ممكن تركبين قطار الموت مع عيالج :victory:

التلفريك (لازم تركبين) يكون مرتفع على ارتفاع يخليج تشوفين معالم مدريد والناس كلها تحتج .. بالذات اذا كان الجو بارد تحسين بشعور جداً رائع لا يوصف .

ملعب سنتياجو برنيابيو (ملعب ريال مدريد) اذا ابو العيال او العيال يحبون الكوره



فالنسيا : فنادقها حلوه و اسعاره مناسبه جداً ..

افضل شوارعها اسمه خوسيه انطونيو .. و فرناندو الكاثوليك .. و شارع كولومبوس .. هذي الشواره فيها ايضاً قهاوي و مطاعم

لازم تزورون قلعة الجبلين وبقايا أطلال حصن المنارة .


و بما انكم رايحين بالصيف ..

هذي المدينه لآآآآآآآآآآآزم تزورونها الا وهي :

ماربيا (يالبى ماربيا بذمتي)

ماربيا مهما كتبت عنها بكون مقصر في حقها لكن هذي اروحها في شهر 7 .. اما باقي المدن المذكوره اعلاه رحتها في ديسمبر ..

اختي الفاضله .. انا ماودي اقولج لا تروحين اسبانيا و حرام فيها الخساير .. بس انا كنت حاجز لمدة 15 يوم و اقتصرت الرحله على 9 ايام لأني مالقيت الحافز اللي يخليني اقعد هالمده في اسبانيا و لكن من المحبين للأستكشاف فـذلك حسبتها سفره .

اذا عندج اي استفسار آخر انا حاضر و بالخدمه

اخوج الصغير / بو خليفه 123 :shy:

[Index Signal]

بو خليفه ما قصر ..

و أحب أضيف على على كلامه شي واحد ..

بخصوص مدريد .. جربي هالفندق و إدعيلي :

http://www.hoteles-silken.com/hotel-puerta-america-madrid/en/

السكن فيه بحد ذاته متعه .. الفرع الوحيد بالعالم ولا في فندق يشابهه في أي بلد .

[مــــلاك]

يزاكم الله خير اخواني ...

هونت عن السفر في الصيف لان اجازتنا قصيره والجو حار في اسبانيا :(