المساعد الشخصي الرقمي

مشاهدة النسخة كاملة : :::الإكتئآآآآآآآآآآآآآآآآآآب...:::...احم


The Master
11-03-2010, 08:28 PM
احم احم...ثم احم


اكتئآآآآآآآآآآآآآآآآآآآب...من الاسم...تحس ان الشخص يقول آآآآآآآآآآآه
يعني هم...شقى...زعل...ضيقه...ملل...كره...مرض...زهق...

ومن ناحيه فلسفيه...جسديه...تعني...ضيق في التنفس...توقف العقل عن التفكير...الوسوسه...كثرة الامراض...قلة النوم...الانطوائيه...العصبيه...التفهي والسرحان...تمني الموت...غرق بدون ماء...


طيب ندخل في الموضوع...

قبل شهر...


صوت باب ينفتح...ها يمه بشر وش صار في التحليل؟...يمه خالد اكلمك...فيك شي؟؟؟...قالك الدكتور شي؟؟؟...مادري مادري...انزين قول تكلم خرعتني...شاف الدكتور التحاليل...وقال لي عندك تليف في الكبد...يعني وشو تليف؟؟...مادري عنه...يقول احتمال تموت الكبد...لاحول ولا قوة الا بالله...ويقول هي للحين مادخلت في مرحلة الخطر...لكن لازم احافظ على الاكل وانتظم في حياتي...واسوي ريجيم واخفف من الدهون والعيش والوجبات الدسمه...الحمدلله خرعتني يايمه...دام انها جات على الرجيم...مافي مشكله نسوي لك ريجيم واكل يصلح لك...

يمه خالد يالله تعال الصاله بنتغدى...مسوين لك غدى صحي لك...ليه وانتوا وش غداكم...مكبوس لحم...وانا وشو غداي؟؟...ربع دجاجه مشويه وسلطه وتوست واحد...نفس ماهو مكتوب في الكتيب اللي عطاك اياه الدكتور...

شيخوه...وش تاكلين؟؟...تعالي اشوف...كافي سنيكرس...اللي انت تحبه...بس انت الحين ماتقدر تاكل...ممنوع عنك...

ها خلود...بنروح انتعشى في فيلاجيو...تخاوينا؟؟؟...لا ماظن...افا ليييه؟؟...الدكتور مانعني من اني اكل اكلات دسمه...

مع الايام...

خالد حياك اليوم مجلسنا مسوين عشى الملكه حق اخوي...بالمبارك ان شاء الله...لكن اسمح لي ماقدر احضر...الدكتور مانعني...

ها خلود اليوم رايحين مطعم توه فاتحينه هندي...شكله مب صااااحي...قم غير جو معانا...لا لا ماقدر...الدكتور مانعني...

ها خالد ترا الشباب متجمعين في بيت الشعر...مر علينا بعد العشى...نسمع سوالفك وعلومك...من زمان ما جيتنا...ان شاء الله ان شاء الله...اي بس مر...مب نفس كل مره ان شاء الله وماتجي...الله كريم...

طق طق طق...خالد يمه...تعال الصاله تقهوى معاي وسولف شوي...قاعده لحالي...مالي خاطر اطلع...

بعد شهر...

اليوم قسنا ضغطك...مرتفع...شي غريب...لان من شهر كان طبيعي...
مادري يا دكتور...احس ان جسمي ينمل...خاصه لما يجي وقت النوم...اخاف فيني مرض
واصابع يدي تبرد...اخاف فيني مرض
احس بدوار كثير...اخاف فيني مرض
وصرت ماحب اقعد مع الناس...اتضايق...
واحيان كثيره...اخاف اروح انام...اخاف اني اموت...من الامراض اللي فيني...


اولا...
لازم تعرف ان محد جاب هالامراض والتفكير السلبي...الا انت نفسك...
وسبب ارتفاع الضغط هو التفكير الكثير...والمحاتاه...اللي مالها اي داعي...
واصابع يدك تبرد...من الاعصاب...وهي ناتج عن التفكير اللي انت تمر فيه...فا دورة الدم عندك تتغير...
وعن التنميل فا هو كذلك...
القصد...انت مافيك الا العافيه...وتفكيرك الزايد...والمحاتاه...هي جابت لك كل هالوساوس...
وابعدتك عن الناس...

صحيح ان عندك مشكله في الكبد...لكن الاعمار بيد الله سبحانه...وانت مش في مرحلة الخطر...تقدر تعالج بالرجيم...
لكن الرجيم وتغيير نمط الحياه...ومنعك من اشيا انت كنت تحبها...اكلات معينه...سبب لك قهر...وهالقهر جا معاه مرض...يعني منع بالقوه...
فا جاتك حالة الاكتئآب...
ولازم تؤمن ب اللي الله كاتبه لك..."قل لن يصيبنا الا ماكتبه الله لنا"...

ولو نرجع للي صار لك...من بداية الرجيم...فا نشوف اشيا كثيره*انت سببها...
انت خليت كل ما في الدنيا من جمال ووناسه...وركزت على الاكل...وخليته سبب في عزلتك عن الناس...
ترا بدائل الاكل كثيره...مثلا تحب البيبسي...اشرب دايت...
تحب سكر مع الشاي...اشرب ب سكر قليل السعرات الحراريه...
المكبوس...كل...يقللون من الدهن...ويشوون اللحم...ويكون صحي...
ولما تبغي تروح مطاعم...روح وغير جو مع ربعك...ولجا وقت الاكل...ترا اكثر المطاعم فيها منيو للريجيم...واذا مافي السلطات ترتيب...او شوف لك اكل صحي...

وفي العزايم...وجب الناس...واقعد معاهم...ولجا وقت العشى...كل سلطه ومشي امورك...

واذا شفت نفسك ضايق...سولف...تكلم...فضفض اللي في قلبك...لشخص عزيز عليك...ولا تكتم اللي في قلبك...لان هذا بيزيد الهم عليك...ويمرضك زود...

واذا جات على المرض...لازم تؤمن بالقدر...واعرف ان هذا اجر لك...ومحبة من الله لك انه يغسل ذنوبك بها...فا لازم تفرح بهالشي...
وان بغيت...شوف غيرك...من اللي الله ابتلاهم...
اذكر قصه قريتها...كتاب "استمتع بحياتك" للشيخ عبدالرحمن العريفي...
رجل كان يشتكي من بلاء صاده...وانه ما يستحمل...ومتضايق...وفي نفس الوقت جاه شخص وقال له بنروح نعزي فلان...قال ليه عسى ماشر...رد عليه...زوجته وبناته وعياله ال 8 توفوا في حادث...وماقال الا لاحول ولاقوة الا بالله...والحمدلله على كل حال...انا لله وانا اليه لراجعون...
هنا الشخص شاف مصيبته الهينه بمصيبة فلان...وعتب على نفسه...وقال الحمدلله الذي عافاني من ما ابتلى به غيري...

اي بس انا اصلي واخاف ربي...وما اعصيه...وقارئ للقرآن...

قال سبحانه..."ولنبلونكم بشيء من الخوف والجوع ونقص ‏من الأموال والأنفس والثمرات وبشر الصابرين..."


انتهت القصه...

طبعا هذا مثال لناس يوصلون لحالة الاكتئآب...
وفي اسباب اخرى...
منها الوظيفه...الحبيب...الصديق...الفقر...الحاله الاجتماعيه"طلاق...ترمل...موت عزيز"...
...وكذلك المعاصي قال سبحانه"ومن اعرض عن ذكري فإن له معيشة ضنكا"...الابتعاد عن الله...

لكن انا اخترت المرض...والتغيير في نمط الحياة...
اشوفهم اكثر الحالات تصير عندنا...وافضل من ناحية شرح وتوضيح...وتوصيل للفكره...

هالموضوع للي فيهم اكتئآب...
وحتى للي حولهم ناس يمرون بحالة الاكتئآب...يحاولون يقعدون معاهم...يسولفون...يخلونهم يفضفضون مافي قلوبهم...ويذكرونهم ب الله...
ويهدونهم كتاب استمتع بحياتك...احم


الموضوع ان شاء الله يكون شامل الحاله وحلولها...
طبعا الموضوع اجتهاد شخصي مني...فا ان اصبت فضل من الله وحده...وان اخطأت فا من نفسي ومن الشيطان...

فا كل اللي باوصله...

"عيش حياتك...بسهولتها...ترا احنا من يعقدها..."

ولاهنتوا...
مرتبش
11-03-2010, 09:56 PM
يعطيك العافية
فعلا موضوع شيق لاحد الامراض العصرية الله يبعدها عنا
ام السعف
11-03-2010, 11:05 PM
شنهي سالفة الإكتئاب ؟

اليوم كل كلامنا كان عنه ،، لدرجة من كثر ما كنا نتكلم عنه الصحون صادها اكتئاب على العشى ،،

اللهم يارب ابعد عنا شر هالمرض النفسي يارب،،
تسلم سيد احم على هالموضوع ،،
Petroleum
11-03-2010, 11:32 PM
بصراااحة موضوع في وقته

صار لي ثلاث ايام مكتأب بسبب الوظيفة

و الموضوع جا في وقته

تقبل تحياتي
The Master
12-03-2010, 01:27 AM
يعطيك العافية
فعلا موضوع شيق لاحد الامراض العصرية الله يبعدها عنا

هلا ومرحب اخوي مرتبش...
ويعافيك يارب...
تشكر على المرور الطيب...
وان شاء الله الناس تستفيد...

امين يارب...
يامرحبا بك
ولاهنت...
The Master
12-03-2010, 01:28 AM
شنهي سالفة الإكتئاب ؟

اليوم كل كلامنا كان عنه ،، لدرجة من كثر ما كنا نتكلم عنه الصحون صادها اكتئاب على العشى ،،

اللهم يارب ابعد عنا شر هالمرض النفسي يارب،،
تسلم سيد احم على هالموضوع ،،

هلا ومرحب اختي ام السعف...
امين يارب...
ومن قال سالم...

يامرحبا بك
ولاهنتي على المرور..
The Master
12-03-2010, 01:34 AM
بصراااحة موضوع في وقته

صار لي ثلاث ايام مكتأب بسبب الوظيفة

و الموضوع جا في وقته

تقبل تحياتي

هلا ومرحب اخوي Petroleum

الله يبعد عنك الاكتئآب وغيره...

طبعا انت عارف ان الارزاق بيد دب العالمين...وانت ماعليك الا تتقن عملك...وتسوي اللي عليك...وتبري ذمتك...والباقي الله سبحانه...
واعرف ان ما اصابك ما كان ليخطأك وما اخطأك لن يصيبك...فا من هذا المنطلق...الانسان لازم يؤمن بالقدر...خيره وشره...

وكل اللي عليك الصبر...واهم شي روق...وعيش حياتك...ودور لك على اشيا تفرحك من حلوك...اشيا تحمسك من جديد...اهم شي لا تقعد فاضي...لان الفراغ بلاويه كثيره...

وماتشوف شر ان شاء الله...

ويامرحبا بك
ولاهنت على التواجد اخوي...
هبة ريح
12-03-2010, 01:55 AM
موضوع مفيد وجميل ,, طرى في بالي شي انه اغلب الامراض اللي تصيد الانسان اول علاجها
يكون علاج نفسي لانه النفسيه تنعكس على الانسان نفسه ,, اذا كان متضايق ومكتئب بتسوء حالته
واحتمال تصيده امراض اكثر من اللي فيه,, اما اذا كان مستانس ومرتاح نفسيا واهم شي واثق ومتوكل على ربه وراضي بقضائه وقدره بالتالي راح يخف عنه كل شيء ,, الله يحفظ الجميع ان شاءالله ويبعد عنهم الهموم والضيقه والاكتئاب وكل الامراض النفسيه اصعب شي الانسان يكون مريض مرض نفسي ترى ماله حل الا بتصيده امراض الدنيا فوق مرضه اللي هو فيه الله يستر ان شاءالله وكل الشكر لك اخوي على هالموضوع المميز
The Master
12-03-2010, 09:46 AM
اتمنى من الجميع قرآئه متأنيه...والمقال بكامله...
لان احس واتمنى احساسي خطأ...ان بعض الردود لم تقرأ...وانما اخذت بالعنوان...بدون اخذ الفائده من المقال او الموضوع...
اعتبروه لوم بسيط...واخذوه من باب اخوي...
لان في النهايه لما تعبت بطرحه...حبيت انفع به...
ولاهنتوا جميعا
ام السعف
12-03-2010, 10:09 AM
اتمنى من الجميع قرآئه متأنيه...والمقال بكامله...
لان احس واتمنى احساسي خطأ...ان بعض الردود لم تقرأ...وانما اخذت بالعنوان...بدون اخذ الفائده من المقال او الموضوع...
اعتبروه لوم بسيط...واخذوه من باب اخوي...
لان في النهايه لما تعبت بطرحه...حبيت انفع به...
ولاهنتوا جميعا

أوبيه يا مستر احم ،، بالنسبة لي قريته من بدايته لين نهايته حتى قريت وصلات
مواضيعك المعروضة في التوقيع و الخطوط الفاصلة ما بين المشاركات في الموضوع ،،

بس السؤال المهم :
اشلون حسيت ان اللي ردوا ركزوا على العنوان بس ؟
The Master
12-03-2010, 11:43 AM
أوبيه يا مستر احم ،، بالنسبة لي قريته من بدايته لين نهايته حتى قريت وصلات
مواضيعك المعروضة في التوقيع و الخطوط الفاصلة ما بين المشاركات في الموضوع ،،

بس السؤال المهم :
اشلون حسيت ان اللي ردوا ركزوا على العنوان بس ؟

هلا ومرحب اختي ام السعف
السموحه ماقريت ردك الا هسا
كنت مشغول مع موضوع الشسمه...احم
المحاضر يهذر وانا مع الجوال اشيك...لا باالله فلحنا...هذي مشكلة التكنلوجيا...محد مسيئ استخدامها الا انفسنا...احم

صادقه اختي ومافي ادنى شك...
بس كيف عرفتي اني اقصدك...احم...امزح معاك

كيف عرفت!!! اممممم
سر المهنه...( الا ماعنده شي يقول...احم)
يقولك المعنى في بطن الشاعر...اي خير ان شاء الله

تشكرين على المتابعه الطيبه...من طيبك اختي...

ويامرحبا بك
ام السعف
12-03-2010, 12:27 PM
هلا ومرحب اختي ام السعف
السموحه ماقريت ردك الا هسا
كنت مشغول مع موضوع الشسمه...احم
المحاضر يهذر وانا مع الجوال اشيك...لا باالله فلحنا...هذي مشكلة التكنلوجيا...محد مسيئ استخدامها الا انفسنا...احم

صادقه اختي ومافي ادنى شك...
بس كيف عرفتي اني اقصدك...احم...امزح معاك

كيف عرفت!!! اممممم
سر المهنه...( الا ماعنده شي يقول...احم)
يقولك المعنى في بطن الشاعر...اي خير ان شاء الله

تشكرين على المتابعه الطيبه...من طيبك اختي...

ويامرحبا بك

احمين ،، ما ادري ليش كنت واثقة انك ما تقصدني ،، لأني قريت الموضوع بكبره

بس بجد انت اشعرفك ان اللي ردوا ما قروا الموضوع ؟

شنهو اللي كنت منتظره مثلا من خلال الردود و ما لقيته فيها ؟
The Master
12-03-2010, 04:15 PM
احمين ،، ما ادري ليش كنت واثقة انك ما تقصدني ،، لأني قريت الموضوع بكبره

بس بجد انت اشعرفك ان اللي ردوا ما قروا الموضوع ؟

شنهو اللي كنت منتظره مثلا من خلال الردود و ما لقيته فيها ؟

الكل على العين والراس...وانا قلت احساسي...

بس خلني اوضح لج نقطه...تبين لج سبب احساسي...

الكاتب لما يحط موضوع او مقال...ينتظر وجهات نظر واراء...ونقاط معينه يتم ذكرها...

احتمال اني حطيت توقعات اكبر من اللزوم...او انا ماتوفقت في طرحه...او توصيل الفكره...

واحتمال ان الاعضاء ماقروا الموضوع عدل...

فا طبعا بما اني كاتب الموضوع اكيد باوقف في صفي...احم...

لكن لما انا كتبت احساسي...ماهو قصور بحد...ولا عيب...الكل له وجهة نظر...لكن قلت يمكن ويمكن...وكذلك للباقي اللي بيقرون الموضوع...
لان اخبر مره نزلت موضوع وانظلمت فيه...والسبب انهم ماقروا الموضوع كامل..."فا جات من تجربه...احم"...

واشكرك على اسألتك...ومتابعتك...احييك على البحث والمتابعه..."ترتيب"...

وبسسسس...
ام السعف
12-03-2010, 11:41 PM
الكل على العين والراس...وانا قلت احساسي...

بس خلني اوضح لج نقطه...تبين لج سبب احساسي...

الكاتب لما يحط موضوع او مقال...ينتظر وجهات نظر واراء...ونقاط معينه يتم ذكرها...

احتمال اني حطيت توقعات اكبر من اللزوم...او انا ماتوفقت في طرحه...او توصيل الفكره...

واحتمال ان الاعضاء ماقروا الموضوع عدل...

فا طبعا بما اني كاتب الموضوع اكيد باوقف في صفي...احم...

لكن لما انا كتبت احساسي...ماهو قصور بحد...ولا عيب...الكل له وجهة نظر...لكن قلت يمكن ويمكن...وكذلك للباقي اللي بيقرون الموضوع...
لان اخبر مره نزلت موضوع وانظلمت فيه...والسبب انهم ماقروا الموضوع كامل..."فا جات من تجربه...احم"...

واشكرك على اسألتك...ومتابعتك...احييك على البحث والمتابعه..."ترتيب"...

وبسسسس...

بالنسبة لي ( لأني حسب ما حسيت مثل ما انت حسيت بعد )
ان موضوعك مب ناقصه شي لإيصال الفكرة اللي حصلتها من خلال قرايتي للموضوع
فحبيت اشكرك على الموضوع لأن ما عندي اضافة أبدا فوفيت الموضوع و عطيته حقه
و بنفس الوقت جاء موضوعك مكمل لحديثنا عن الاكتئاب بشكل عام ،،

فانت بالنسبة لي تطرقت لنقاط كنت غافلة عنها ممكن اتسبب الاكتئاب
و بنفس الوقت عممت النقاط هذه على أمور ثانية قد توصلنا او توصل المحيطين فينا
إلى الاكتئاب لو تركناهم من غير نصح او تركنا انفوسنا اسيرة للأمور هذه ،،

من فترة مب بعيدة تقول اختي الكبيرة انها شاهدت برنامج نفسي يقول الدكتور
ان من يعاني من الضيق و الاكتئاب و النفسية التعبانة ،، عليه تطبيق ما يلي :

اجلسوا يا جماعة الخير في حلقة و اضحكوا بشكل هيستري مع تحريك اليديين والذراعين
الى الأعلى كأنهم اشجار تلعب فيها الرياح شمالا و جنوبا ،،

فمن خلال هالتصرف راح تشعرون بتجديد في الطاقة الحيوية ،،
عاد اول يوم قالت لنا اختي السالفة هذه ،، خذتها على انها عبط ،، وطبقت الطريقة مع البنيات الصغار و شاركتنا اختي تطبيق الطريقة لبضع من الثواني الطويلة و على طول وقفت واستحت من التصرف ذيه ،،

لو اقول لك الشعور اللي حسيت فيه يوم طبقت الطريقة هذه ،، حسيت كأن مادة كيميائية انفرزت من مؤخرة جمجمتي وانتشرت في رقبتي و كتوفي ،، ولحظات و بالفعل حسيت بحيوية و تفريغ للحالة النفسية التي كنت احس فيها وان ما كنت ابديها على ملامحي ،،

طبعا اليوم استكمالا لموضوع الاكتئاب اقترحت مرت اخوي انعيد التطبيق القديم
بالنسبة لي تشجعت و استانست اني بعيد الحركة ,, الا ان اختي اللي اصغر مني قالت
ارفض مثل هالتصرف لأنه يخالف شخصيتي اولا ،، ثانيا لازم ابحث عن بدائل اسلامية ،،
قلت لها البدائل الإسلامية ذكر الله و الاستغفار ،،
قالت لي هذه احسن من هالتصرفات المينونة :omg:
وفي لحظة دخولنا الى عالم التطبيق ،، صوت علي اخوي و قال لي تعالي ابوي يبيج
طلعت اجوف ابوي ،، الحلقة انفكت و كل راح في طريجه وفشلت العملية التطبيقية
لتفريغ حالات الضيق والشعور بالاكتئاب :(

ها اشرايك سيد احم ( هل اتحس ان هناك تجاوب مع موضوعك ؟ وان الفكرة وصلت ؟ ):(
تحداني
13-03-2010, 12:11 AM
.. يعطيك العافيه اخي الفاضل .. وبارك الله فيك ..
وجملك الله برضى الرحمن


مثل هذه الحالات التي يتعرض لها الانسان ..
اما لمرض او لحزن عميق او لموت او لفراق ..
او حتى لتجربه فاشله في الحياه ..
من الصعب ان يتعامل معها بروح مرحه .. او بإبتسامه عريضه ..



لان حتما من يحمل هذه " الحاله " .. لا يدرك ابعاد تصرفاته ..
ولا يستطيع تغطيه تلك المشاعر التي تعتليه ..
يرى الدنيا بزاويه ضيقه جدا .. لا يستطيع استحضار تجارب الغير
.. حزن الغير .. بل حتى ألم الغير..


صاحب هذه الحاله لا يستطيع ان يخرج من دائره الاكتئاب بفتره وجيزه ..
مثله مثل الجرح يحتاج الى وقت حتى يبرى ..


هذا لا يعني ان يترك الامور كما هي .. الى ان تأثر على حالته ..
ولكن عليه ان يستوعب مابه .. اما ان يصحى سريعا من تلك الأزمه التي حلت به ..


او ان يمده الله بأهل .. واصدقاء يعينونه ..
على تلك المشقات ..


.
.
هذه الحاله اخي الفاضل حاله طبيعيه ..
في وقت او في زمن .. كل شئ يجري بسرعه ..

" ما يمديك تفرح الا خبر محزن تشوفه على اعتاب الطريق "

" ما يمديك تحضر زواج .. الا تشوف مجلس العزاء اصبح اقرب "
" ما يمديك تفرح ابنفسك الا تشوف .. هموم الدنيا قربت منك "


وكل انسان يشعر ما يمر به هو اكبر هم ..
واكبر غم .. واكبر تجربه فاشله ..


هكذا هم البشر ..



العلاج ..



يختلف من شخص الى شخص ..
منه من يستطيع تقبل المرض والتعايش معه .. والعيش مع الناس ..
منه من يعيش بمعزل عن البشر ..


الخساره .. منه من يستطيع ان يعوض تلك الاموال بأموال جديده ..
ويقف من جديد .. منه من يرى الدنيا تضييق عليه يوما بعد يوم ..


الخيانه .. ان كانت من الاصدقاء او الاحباب او الجيران ..
منهم مع مرور الايام يبحث عن بدائل .. ومنه من يحبس نفسه غي تلك التجربه ..


.
.
ان تطورت الحاله ..
فلا حل سوى طرق ابواب العيادات النفسيه ..
هذا ان اقتنع بالأمر ..


.
.
الله يبسعدك .. وينور طريقك ان شاء الله
The Master
13-03-2010, 12:47 PM
لنا عوده ان شاء الله...
The Master
14-03-2010, 08:22 PM
بالنسبة لي ( لأني حسب ما حسيت مثل ما انت حسيت بعد )
ان موضوعك مب ناقصه شي لإيصال الفكرة اللي حصلتها من خلال قرايتي للموضوع
فحبيت اشكرك على الموضوع لأن ما عندي اضافة أبدا فوفيت الموضوع و عطيته حقه
و بنفس الوقت جاء موضوعك مكمل لحديثنا عن الاكتئاب بشكل عام ،،

فانت بالنسبة لي تطرقت لنقاط كنت غافلة عنها ممكن اتسبب الاكتئاب
و بنفس الوقت عممت النقاط هذه على أمور ثانية قد توصلنا او توصل المحيطين فينا
إلى الاكتئاب لو تركناهم من غير نصح او تركنا انفوسنا اسيرة للأمور هذه ،،

من فترة مب بعيدة تقول اختي الكبيرة انها شاهدت برنامج نفسي يقول الدكتور
ان من يعاني من الضيق و الاكتئاب و النفسية التعبانة ،، عليه تطبيق ما يلي :

اجلسوا يا جماعة الخير في حلقة و اضحكوا بشكل هيستري مع تحريك اليديين والذراعين
الى الأعلى كأنهم اشجار تلعب فيها الرياح شمالا و جنوبا ،،

فمن خلال هالتصرف راح تشعرون بتجديد في الطاقة الحيوية ،،
عاد اول يوم قالت لنا اختي السالفة هذه ،، خذتها على انها عبط ،، وطبقت الطريقة مع البنيات الصغار و شاركتنا اختي تطبيق الطريقة لبضع من الثواني الطويلة و على طول وقفت واستحت من التصرف ذيه ،،

لو اقول لك الشعور اللي حسيت فيه يوم طبقت الطريقة هذه ،، حسيت كأن مادة كيميائية انفرزت من مؤخرة جمجمتي وانتشرت في رقبتي و كتوفي ،، ولحظات و بالفعل حسيت بحيوية و تفريغ للحالة النفسية التي كنت احس فيها وان ما كنت ابديها على ملامحي ،،

طبعا اليوم استكمالا لموضوع الاكتئاب اقترحت مرت اخوي انعيد التطبيق القديم
بالنسبة لي تشجعت و استانست اني بعيد الحركة ,, الا ان اختي اللي اصغر مني قالت
ارفض مثل هالتصرف لأنه يخالف شخصيتي اولا ،، ثانيا لازم ابحث عن بدائل اسلامية ،،
قلت لها البدائل الإسلامية ذكر الله و الاستغفار ،،
قالت لي هذه احسن من هالتصرفات المينونة :omg:
وفي لحظة دخولنا الى عالم التطبيق ،، صوت علي اخوي و قال لي تعالي ابوي يبيج
طلعت اجوف ابوي ،، الحلقة انفكت و كل راح في طريجه وفشلت العملية التطبيقية
لتفريغ حالات الضيق والشعور بالاكتئاب :(

ها اشرايك سيد احم ( هل اتحس ان هناك تجاوب مع موضوعك ؟ وان الفكرة وصلت ؟ ):(

هلا ومرحب اختي ام السعف...
ماشاء الله...شي طيب وجميل...اعجبتني السالفه...ترتيب اختي...
لكن...

شفتي هالضحكه الهيستيريه...وحركه الايادي العشوائيه بدون تركيز منج...

كلها ولدت فيج طاقه...وخلت القلب ينبض بسرعه عن المعدل الطبيعي...ومنها وصل للعقل...وحركه العشوائيه...خلت العقل عندج مضيع"confuse"...
فا كل اللي صار...ان تم تحريك الدم في جسمك وفي عقلك...بسرعه...وغير هذا تشويش العقل...فا فقدتي وش كنتي مركزه فيه...او الشي اللي في بالك...
فا عشان كذا حسيتي بشي جميل...لكن في الواقع ان هالشي خلاج تنسين انتي وش كنتي تفكرين فيه...
لكن تعالي بعد ما تركدين...وتريحين...بترجع لج الفكره من جديد...

الوكاد...
هالطريقه مجرد "temprary" وقتيه...يعني لمده معينه...ماهي علاج...
لان اذا انتي ماحاولتي تطلعين من ما على انتي فيه...ماراح ينفع هالشي...

فا اهم شي القناعات...وانج تحاولين تخلقين في بالج جانب مشرق...جاني يثق بالله سبحانه...جانب ايجابي في كل ماتمرين فيه من مشاكل ومصايب...

وكذلك الناس اللي حواليك...حاولتي تكلمين لك شخص تعرفين انه عاقل...ويعرف يتكلم...ويقدر مشاكل الناس..."في منهم من تشتكي له يزيدك هموم"...
فا اختاري من تفضفضين له...

واحسنت اختج في قولتها ب البدائل الاسلاميه...
منها الصلاه...صدقيني مافي احلى من لذتها...
خاصه...وانتي في اشد اكتئابج...وضيقتج...تقومين غصب...تتوضين...وتفرشين السجاده...وترفعين يدج تقولين الله اكبر...وبيدج المصحف...عقب الفاتحه...افتحي على اي صفحه...واقري من القرآن...وطولي...في القرآئه...
ووقت السجود ادعي لله سبحانه...

هنا هو الحل...هنا هو الشعور ب زوال الهم...بزوال الاكتئاب...بزوال مافي القلب من ثقل...
وكيف لا وانت منزل راسك في الارض...لرب العباد...

وربي يبتلي عباده...ويشوف من منهم يصبر...ومن منهم يقول الحمدلله على كل حال...ومن منهم يقول ليش ياربي ليش بس انا؟؟...

وموفقه اختي...
واحييك على مشاركتك القيمه...
والحمدلله ان الموضوع كان كافي ووافي...

ويامرحبا بك
ولاهنتي...على التواجد الطيب...
ع.م
15-03-2010, 08:39 PM
الموضوع رائع جداً.. ومقنع..

بس نا أوجه دعوة لكل من طالت فترة الضيقة عنده إنه مايهمل نفسه.. لأن الموضوع ممكن يشكل خطورة كبيـــــــــــــــــــــــــــرة..
cristal
15-03-2010, 09:38 PM
يعطيك العافيه على الموضوع

الحمد الله فى كل الاحوال

بس شالحل للي يقولون ليش احنا يارب ليش بس احنا ؟؟
المغروره
15-03-2010, 10:22 PM
بصراااحة موضوع في وقته

صار لي ثلاث ايام مكتأب بسبب الوظيفة

و الموضوع جا في وقته

تقبل تحياتي
والللللللللللله انا معج مكتبئه وابشرج اكل مهدئ سبه قطريه ظروفاها صعبه ودور شغل
بلادنا مو محصليين شغل
خليني اسكت خليني مكتبئبه نشوف شي مااااااايسر الخااااطر يعيين الله
The Master
16-03-2010, 09:28 AM
بنرجع لكم ونعقب على الردود...
شوي الجدول زحمه...فا نفضى ونرد بشموليه...
لاهنتوا...
الرويـس
16-03-2010, 09:48 AM
بنرجع لكم ونعقب على الردود...
شوي الجدول زحمه...فا نفضى ونرد بشموليه...
لاهنتوا...

خذ راحتك طال عمرك
واعتبر الموضوع موضوعك
:p
بنت ذياب
16-03-2010, 09:53 AM
بالنسبة لي ( لأني حسب ما حسيت مثل ما انت حسيت بعد )
ان موضوعك مب ناقصه شي لإيصال الفكرة اللي حصلتها من خلال قرايتي للموضوع
فحبيت اشكرك على الموضوع لأن ما عندي اضافة أبدا فوفيت الموضوع و عطيته حقه
و بنفس الوقت جاء موضوعك مكمل لحديثنا عن الاكتئاب بشكل عام ،،

فانت بالنسبة لي تطرقت لنقاط كنت غافلة عنها ممكن اتسبب الاكتئاب
و بنفس الوقت عممت النقاط هذه على أمور ثانية قد توصلنا او توصل المحيطين فينا
إلى الاكتئاب لو تركناهم من غير نصح او تركنا انفوسنا اسيرة للأمور هذه ،،

من فترة مب بعيدة تقول اختي الكبيرة انها شاهدت برنامج نفسي يقول الدكتور
ان من يعاني من الضيق و الاكتئاب و النفسية التعبانة ،، عليه تطبيق ما يلي :

اجلسوا يا جماعة الخير في حلقة و اضحكوا بشكل هيستري مع تحريك اليديين والذراعين
الى الأعلى كأنهم اشجار تلعب فيها الرياح شمالا و جنوبا ،،

فمن خلال هالتصرف راح تشعرون بتجديد في الطاقة الحيوية ،،
عاد اول يوم قالت لنا اختي السالفة هذه ،، خذتها على انها عبط ،، وطبقت الطريقة مع البنيات الصغار و شاركتنا اختي تطبيق الطريقة لبضع من الثواني الطويلة و على طول وقفت واستحت من التصرف ذيه ،،

لو اقول لك الشعور اللي حسيت فيه يوم طبقت الطريقة هذه ،، حسيت كأن مادة كيميائية انفرزت من مؤخرة جمجمتي وانتشرت في رقبتي و كتوفي ،، ولحظات و بالفعل حسيت بحيوية و تفريغ للحالة النفسية التي كنت احس فيها وان ما كنت ابديها على ملامحي ،،

طبعا اليوم استكمالا لموضوع الاكتئاب اقترحت مرت اخوي انعيد التطبيق القديم
بالنسبة لي تشجعت و استانست اني بعيد الحركة ,, الا ان اختي اللي اصغر مني قالت
ارفض مثل هالتصرف لأنه يخالف شخصيتي اولا ،، ثانيا لازم ابحث عن بدائل اسلامية ،،
قلت لها البدائل الإسلامية ذكر الله و الاستغفار ،،
قالت لي هذه احسن من هالتصرفات المينونة :omg:
وفي لحظة دخولنا الى عالم التطبيق ،، صوت علي اخوي و قال لي تعالي ابوي يبيج
طلعت اجوف ابوي ،، الحلقة انفكت و كل راح في طريجه وفشلت العملية التطبيقية
لتفريغ حالات الضيق والشعور بالاكتئاب :(

ها اشرايك سيد احم ( هل اتحس ان هناك تجاوب مع موضوعك ؟ وان الفكرة وصلت ؟ ):(

هههههههههههههههههههههههههههههههههههههههههههههههههه هه

عجييييييبه انتي

احب الحركات المينووونه :tease:

يعني جذي؟؟ http://www.joriqtr.com/smiles/up/74.gif (http://www.joriqtr.com)

نفس هاذي ..

هههههههههههههه ونضحك بشكل هستيري؟؟


تعالي بطبق معاج .. والله فلللللله http://www.joriqtr.com/smiles/up/d8.gif (http://www.joriqtr.com)
بنت ذياب
16-03-2010, 09:56 AM
الاكتئاب شعور صعب .. مواي حد يقدر يوصفه الا اللي عاش كل تفاصيله المميتة !!

كان ودي اكتب تجربتي .. لكن .. السكوت اوسع اذا ضاق الكلام .. :nice:

يعطيك العافيه اخوي عليان ع الموضوع
هند88
16-03-2010, 10:49 AM
والله العظيم اخس شي الاكتئاب ..

الله لايبلي حد..

عندي اختك على طريف مع الاكتئاب.. جنه صداع
عادي تمر نمله احذاها تكتأب
ام السعف
16-03-2010, 11:26 AM
هههههههههههههههههههههههههههههههههههههههههههههههههه هه

عجييييييبه انتي

احب الحركات المينووونه :tease:

يعني جذي؟؟ http://www.joriqtr.com/smiles/up/74.gif (http://www.joriqtr.com)

نفس هاذي ..

هههههههههههههه ونضحك بشكل هستيري؟؟


تعالي بطبق معاج .. والله فلللللله http://www.joriqtr.com/smiles/up/d8.gif (http://www.joriqtr.com)

عليييج نووووووووور هذي هي هالحركة http://www.joriqtr.com/smiles/up/74.gif

امشي يالله انجربها مع بعض http://www.joriqtr.com/smiles/up/d8.gif

:looking:
متابع عن قرب
16-03-2010, 01:37 PM
الله يابوحسن


في وقته والله


انا من امس صايدني تفكير


اشتكي من صداع شديد بشكل متكرر للجهة اليسرى من الرأس وطنين في الاذن

الدكتور مخوفني من الفحص اللي سويته قبل اسبوع تبين فيه ان عندي مشكلتين

( الكوليسترول )

وهاذي بسيطة


والثانية الدكتور مادري ليه مكبرها

الا وهي ( التهاب المفاصل ) او مايسمى ( الروماتيزم )


ورحت اليوم وعدت الفحص على الله تكون النتيجه الاولية غلط

لأني تعبت من التفكير في الروماتيزم وعلاجه


عالعموم لن يصيبنا الا ماكتب الله لنا




المستر موضوعك خفف عن مافي نفوسنا من الهم والحمد لله


فغيرنا مصيبته اكبر عافاه الله وعافانا


ولك كل التقدير
بنت ذياب
16-03-2010, 03:40 PM
والله العظيم اخس شي الاكتئاب ..

الله لايبلي حد..

عندي اختك على طريف مع الاكتئاب.. جنه صداع
عادي تمر نمله احذاها تكتأب

عادي اختي

( اذا اشتكى منه عضو تداعى له سائر الجسد بالسهر والحمى ) ..

انا كنت .. الله لا يعيدها من ايام ..

احس بالم بخاصرتي .. مع يقيني التاااااام .. ان مافيني شي.. وهالالم مش موجود !!!

بس كنت احس بالم !!

فالاكتئاب يخليج تحسين بالالام مش موجودةة ..

وكنت بعد ماشوف !! مب اني مااشوف يعني ..لاااا بس .. احس ضباب ماشوف جدامي

اروح اغسل عيوني واغير العدسات.. والاحساس مثل ماهو ..

شعوور صعب صعب صعب ..

وكنت احس ان ابي حد يعطيني كفف على ويهي عشان اصحى

كنت بعالم ثاني !! احس كل شي ظلام !!لو اقعد اوصف هالشعور لباجر محد بيفهم

مابي استرسل واتذكر اللي مضى .. لان اللي جربته مب هين !

والحمدلله تخلصت منه بعد معاناة دامت سنه واكثر ..

بس حبوبة .. اذا عندج اي سؤال عن الاكتئاب والاعراض والادوية وكل شي

انا موجودة .. :nice:






عليييج نووووووووور هذي هي هالحركة http://www.joriqtr.com/smiles/up/74.gif

امشي يالله انجربها مع بعض http://www.joriqtr.com/smiles/up/d8.gif

:looking:

ههههههههههههههههههههههههه اي والله عجيبه الحركه

:nice:
ع.م
16-03-2010, 06:53 PM
وكنت بعد ماشوف !! مب اني مااشوف يعني ..لاااا بس .. احس ضباب ماشوف جدامي

اروح اغسل عيوني واغير العدسات.. والاحساس مثل ماهو ..

شعوور صعب صعب صعب ..

وكنت احس ان ابي حد يعطيني كفف على ويهي عشان اصحى

كنت بعالم ثاني !! احس كل شي ظلام !!لو اقعد اوصف هالشعور لباجر محد بيفهم




لا والله فاهمة عدل.. اللي مر بهالشي بيفهم..

إحساس متعب.. الأشياء اللي قبل كانت تونسج ماعاد تونسج.. الأكل ماله طعم، كل شي كان حلو يصير ماله قيمة..

وأسوأ شي.. إنج تحسين إنج ماتسوين شي.. وإن السعادة شي بعيييد و صعععب وإن مستحيل ترجعين نفس قبل..

أيام سودة صججج
بنت ذياب
16-03-2010, 08:20 PM
لا والله فاهمة عدل.. اللي مر بهالشي بيفهم..

إحساس متعب.. الأشياء اللي قبل كانت تونسج ماعاد تونسج.. الأكل ماله طعم، كل شي كان حلو يصير ماله قيمة..

وأسوأ شي.. إنج تحسين إنج ماتسوين شي.. وإن السعادة شي بعيييد و صعععب وإن مستحيل ترجعين نفس قبل..

أيام سودة صججج


صح صح صح صح بالضببببببببببببببط

هههههههههههههه شكلج مريتي بهالتجربه :weeping:

شفتي محد يفهم الا اللي مجرب .. :victory:
The Master
16-03-2010, 08:50 PM
احم...بخصوص الردود الطيبه...الله ينور

بغيت منكم طلب ولاتهونون...من المشاركين في الموضوع وكذلك الجميع...
بغيتكم تكتبون التجارب الي مريتوا فيها...او غيركم...
تذكرون الحاله واسبابها...واذا شفى منها ودي تذكرون كيف...واذا للحين ماتغير حاله...ودي تذكرون وش جرب ومانفع...

ودي في تجاوبكم...تفيدوني وتفيدون الناس...ولكم الاجر ان شاء الله...
وابشروا بشي طيب بنطلع به من هالموضوع ان شاء ربي...

وان كان كم سطر يكفي انك نفعتنا...
ولي رجعه للردود المشاركه...
ماريسا
16-03-2010, 09:20 PM
جزاك الله خير
bshayer
16-03-2010, 09:38 PM
شوف تقريبآ ...
..
تقدر تقول صايدني حالة من نفس هالعنوان واحس كاره نفسي والي حوالي يمكن علشان ضغـــــــــــــــظ الشغل سواءآ بالعمل والناس الي معاي
.(القيل وقال ومحد مخلي حد بحاله يعني حقد وحسد وغيره الإ من رحم ربي )
واني اكمله بالبيت ..واشياء وااجد وغير كذا ابي اطلع اغيرجو و او شي تشوف الزحمه الي مالها اي حل ...
تدري اقترحت عليها بالشغل يوفرون دكاتره نفسيآ ..:(>>من كثر ما صادني الاكتئاب جاني القولون العصبي ..:(

^^^

واذا على الحل ..تقدر تقول افضفض لاحد زميلاتي ..
يعني اكثر من وحده اكلمها بنفس السالفه الي معاي بعد مكتئبات .
وبعدين نوكل امرنا لله ....
بنت ذياب
17-03-2010, 08:24 PM
شوف تقريبآ ...
..
تقدر تقول صايدني حالة من نفس هالعنوان واحس كاره نفسي والي حوالي يمكن علشان ضغـــــــــــــــظ الشغل سواءآ بالعمل والناس الي معاي
.(القيل وقال ومحد مخلي حد بحاله يعني حقد وحسد وغيره الإ من رحم ربي )
واني اكمله بالبيت ..واشياء وااجد وغير كذا ابي اطلع اغيرجو و او شي تشوف الزحمه الي مالها اي حل ...
تدري اقترحت عليها بالشغل يوفرون دكاتره نفسيآ ..:(>>من كثر ما صادني الاكتئاب جاني القولون العصبي ..:(

^^^

واذا على الحل ..تقدر تقول افضفض لاحد زميلاتي ..
يعني اكثر من وحده اكلمها بنفس السالفه الي معاي بعد مكتئبات .
وبعدين نوكل امرنا لله ....

فديت قلبج .. ترى العمر يخلص والشغل مايخلص

اخذي اجازه اسبوع .. وارتاحي ترى اهم شي الصحه النفسيه

الدنيا ماتسوى تشيلين الشغل فوق راسج

شوفي وانتي رايحه الدوام ولا بساعات انتظار

كثري من الاستغفار

استغفري واستغفري واستغفري .. والله بيفرج همج يااااااااارب
The Master
20-03-2010, 02:48 PM
انشغلنا في الايام اللي طافت...ولنا عوده الليله ب اذن الله
The Master
20-03-2010, 09:20 PM
.. يعطيك العافيه اخي الفاضل .. وبارك الله فيك ..
وجملك الله برضى الرحمن


مثل هذه الحالات التي يتعرض لها الانسان ..
اما لمرض او لحزن عميق او لموت او لفراق ..
او حتى لتجربه فاشله في الحياه ..
من الصعب ان يتعامل معها بروح مرحه .. او بإبتسامه عريضه ..



لان حتما من يحمل هذه " الحاله " .. لا يدرك ابعاد تصرفاته ..
ولا يستطيع تغطيه تلك المشاعر التي تعتليه ..
يرى الدنيا بزاويه ضيقه جدا .. لا يستطيع استحضار تجارب الغير
.. حزن الغير .. بل حتى ألم الغير..


صاحب هذه الحاله لا يستطيع ان يخرج من دائره الاكتئاب بفتره وجيزه ..
مثله مثل الجرح يحتاج الى وقت حتى يبرى ..


هذا لا يعني ان يترك الامور كما هي .. الى ان تأثر على حالته ..
ولكن عليه ان يستوعب مابه .. اما ان يصحى سريعا من تلك الأزمه التي حلت به ..


او ان يمده الله بأهل .. واصدقاء يعينونه ..
على تلك المشقات ..


.
.
هذه الحاله اخي الفاضل حاله طبيعيه ..
في وقت او في زمن .. كل شئ يجري بسرعه ..

" ما يمديك تفرح الا خبر محزن تشوفه على اعتاب الطريق "

" ما يمديك تحضر زواج .. الا تشوف مجلس العزاء اصبح اقرب "
" ما يمديك تفرح ابنفسك الا تشوف .. هموم الدنيا قربت منك "


وكل انسان يشعر ما يمر به هو اكبر هم ..
واكبر غم .. واكبر تجربه فاشله ..


هكذا هم البشر ..



العلاج ..



يختلف من شخص الى شخص ..
منه من يستطيع تقبل المرض والتعايش معه .. والعيش مع الناس ..
منه من يعيش بمعزل عن البشر ..


الخساره .. منه من يستطيع ان يعوض تلك الاموال بأموال جديده ..
ويقف من جديد .. منه من يرى الدنيا تضييق عليه يوما بعد يوم ..


الخيانه .. ان كانت من الاصدقاء او الاحباب او الجيران ..
منهم مع مرور الايام يبحث عن بدائل .. ومنه من يحبس نفسه غي تلك التجربه ..


.
.
ان تطورت الحاله ..
فلا حل سوى طرق ابواب العيادات النفسيه ..
هذا ان اقتنع بالأمر ..


.
.
الله يبسعدك .. وينور طريقك ان شاء الله

هلا ومرحب اختي تحداني...

تشكرين على هالاثراء الطيب...
والكلام الجميل...عسى الناس تستفيد منه...
وعسى الله يشفي مرضانا ومرضى المسلمين يارب...

يامرحبا بك...
ولاهنتي على المداخله الطيبه...اثريتي الموضوع اختي...
The Master
20-03-2010, 09:24 PM
الموضوع رائع جداً.. ومقنع..

بس نا أوجه دعوة لكل من طالت فترة الضيقة عنده إنه مايهمل نفسه.. لأن الموضوع ممكن يشكل خطورة كبيـــــــــــــــــــــــــــرة..

هلا ومرحب ع.م

الروعه في تواجدك ومشاركتك...
والفضل من رب العالمين...

اكيد...والاهم انه مايحبس نفسه...ويطلع...ويشوف الناس...لان هالشي بيخليه ينسى الهم اللي هو فيه...
اطلع فرفش توننس...دق ارقبه"احم"...
اهم شي لا تحبس عمرك...ولاتسكر على نفسك...

قل لن يصيبنا الا ماكتبه الله لنا...
وما اصابك ماكان ليخطأك...وما اخطأك ما كان ليصيبك...

فا اقنع بما انت فيه...وارضى بما قسمه الله لك...

وسهل الدنيا...وراح اتسهل...

ويامرحبا بك...
ولاهنت...
The Master
20-03-2010, 09:34 PM
يعطيك العافيه على الموضوع

الحمد الله فى كل الاحوال

بس شالحل للي يقولون ليش احنا يارب ليش بس احنا ؟؟

هلا ومرحب cristal

ويعافيك يارب...الحمدلله وحده...

امممم...بخصوص هذول عندج كم نوع منهم...

منهم من يقول هالكلام عشان يكسر الخاطر...وتواسيه...يعني يحبون يلعبون او يكونون دور الضحيه...

ومنهم من يقولها عشان يطلع من مشكله...

ومنهم من يقولها...سبب مشكله...او ضائقه يمر فيها...

طبعا اخر فئه...لازم ترضى بما قسمه الله لها...
وربي سبحانه هو العادل...
ولو وخزتك ابره...لكتب لك اجر وخزتها...يعني المها في رجلك...
فما بالك في المصائب...والامراض اللي تصيبك؟؟...
اكيد اجرها ماراح يضيع عند ربك سبحانه...

فا انت اصلا لازم تفرح باللي يصيدك...
لان هالشي يمحي سيئاتك...ويزيد حسناتك...
وان دل..فا انما يدل على رضى ربي عليك...وهو بتخفف ذنوبك وسيئاتك...
وكذلك ربي يبغي يسمع مناجاتهم له اخر الليل...وفي الصلوات...يبغيهم يتقربون له...بالدعاء انه يشفيهم...

فا بدال لا يقولون ليش احنا...
خلهم يشكرون ربي على النعمه اللي هم فيها...
ويكثرون من الصدقات...
فا الصدقه تطفئ غضب الرب...

وسبحان الله...
الامراض والمصايب...احيان كثيره تعلم الانسان اشيا ماكان يعرفها...او تجي على باله...
واحيان كثيره كانت تغير من طبايع وتصرفات ناس...للاحسن...
وتغيير مفاهيمهم في الحياه...


والله يعينا على الخير...يارب...

ويامرحبا بك...
لاهنت...
The Master
21-03-2010, 09:09 AM
والللللللللللله انا معج مكتبئه وابشرج اكل مهدئ سبه قطريه ظروفاها صعبه ودور شغل
بلادنا مو محصليين شغل
خليني اسكت خليني مكتبئبه نشوف شي مااااااايسر الخااااطر يعيين الله

الدنيا سهالات...وربك الكريم...
الصبر هو مفتاح الفرج...قالوها الاولين...وكل شي يجي بعد تعب يكون طعمه حلو...ونمسك فيه عدل...

والله يوفقكم دنيا واخره...
والامور بتتيسر...مافي شك...ان بعد العسر يسرا...وكله في رصيدكم عند ربي ان شاء الله...
The Master
21-03-2010, 09:16 AM
خذ راحتك طال عمرك
واعتبر الموضوع موضوعك
:p

اخبارك بس...احم
تسلم...فيك الخير...
اخبار الفقع معاك...احم
The Master
21-03-2010, 09:18 AM
الاكتئاب شعور صعب .. مواي حد يقدر يوصفه الا اللي عاش كل تفاصيله المميتة !!

كان ودي اكتب تجربتي .. لكن .. السكوت اوسع اذا ضاق الكلام .. :nice:

يعطيك العافيه اخوي عليان ع الموضوع

هلا ومرحب اختي بنت ذياب...

اكيد وصادقه...الله يبعده عن امة محمد يارب...

براحتك اختي...واهم شي القناعه...وعساك ماتواجهين شر ابد يارب...

ويعافيك يارب...وعسى الناس تنتفع به...وناخذ اجر...احم

يامرحبا بك
ولاهنتي على المرور...
The Master
21-03-2010, 09:24 AM
والله العظيم اخس شي الاكتئاب ..

الله لايبلي حد..

عندي اختي على طريف مع الاكتئاب.. جنه صداع
عادي تمر نمله احذاها تكتأب

هلا ومرحب اختي هند

امين يارب...

بالنسبه لاختك...امممم...مادري صراحه...
لان الاكتئاب هو التفكير...والمحاتاه...وضيق السبل...

اما انها تشوف نمله تكتئب...هذي غريبه...اللهم اذا كانت تتذكر شي لما تشوفه...
لان في احتمال انها من النوع المزاجي...اي شي يعكر مزاجها...
فا فيها فرق...

لكن لو حاولتي تقنعينها...باللي ذكرناه في الردود...بيكون شي طيب...خاصه لها...وحتى لك انتي...

لان هذي قناعات...واساس الدين...وهي بالفطره...
لكن مشاكل الحياه تنسينا اياها...فا لما تضيق بنا الدنيا...مانعرف نفكر...فا لازم بوجود حد يذكرنا ابها...
وهنا فايدة انك تكون حوالين ناس يعزونك...ويغلونك...
فا حاول تفضفض اللي في قلبك...وقول ولا تسكت...
وان شاء الله ربي يفك عوقك...

ويامرحبا بك اختي...
ولاهنتي على المرور...وماتشوفون شر يارب...
قطرية فذة
22-03-2010, 11:29 AM
الرضى بما قسمه الله

هذا مجمل الأمر

التسليم

والله سبحانه قال ( فأتبع سببا )

صحبه صالحه تستلك من داخل الدائره
لتريك النور من جديد وتزيح عنك ماعبش على عيناك

الامور النفسيه علاجها صعب
فكم من نفوس عولجت بالحب ( صبراً ) على البلاء

يقول الله سبحانه في خواتيم سوره البقره

رَبَّنَا لا تُؤَاخِذْنَا إِنْ نَسِينَا أَوْ أَخْطَأْنَا
رَبَّنَا وَلا تَحْمِلْ عَلَيْنَا إِصْرًا
كَمَا حَمَلْتَهُ عَلَى الَّذِينَ مِنْ قَبْلِنَا
رَبَّنَا وَلا تُحَمِّلْنَا مَا لا طَاقَةَ لَنَا بِهِ
وَاعْفُ عَنَّا وَاغْفِرْ لَنَا وَارْحَمْنَا
أَنْتَ مَوْلانَا
فَانصُرْنَا عَلَى الْقَوْمِ الْكَافِرِينَ

تأتي الضروف احياناً اكبر من حجمها على الانسان
فما لنا الا الدعاء (( ربنا ولا تحملنا مالا طاقه لنا به ))
فليس الله سبب لهذا كله ان يحمله على العبد لا حشاه سبحانه الرحمن الرحيم

بل ليعلمنا سبحانه كيفيه الدعاء بالإستعانه على مانحن فيه

يارب لاتحملنا مالاطاقه لنا به

وهو سبحانه اعلم بعبده بصبره على البلاء

فا اللهم الثبات

ان الذي يكون ناتج من الهموم
التقصير بالصلاه
يعلم الله بعبده وهو اقرب من حبل الوريد
ويذكرهم من رحمته

يقول لهم


حَافِظُوا عَلَى الصَّلَوَاتِ وَالصَّلَاةِ الْوُسْطَى وَقُومُوا لِلَّهِ قَانِتِينَ


ويذكر سبحانه

وَاسْتَعِينُوا بِالصَّبْرِ وَالصَّلَاةِ وَإِنَّهَا لَكَبِيرَةٌ إِلَّا عَلَى الْخَاشِعِينَ


يَا أَيُّهَا الَّذِينَ آَمَنُوا اسْتَعِينُوا بِالصَّبْرِ وَالصَّلَاةِ إِنَّ اللَّهَ مَعَ الصَّابِرِينَ



فكم زانت رحمته ان طيبت النفوس

والاكتئاب ان وقع فلا يقع الا ان ينقص مابالنفس من ايجابيه الى سلبيه

ولا يزاح الا بالكلمه الطيبه والتذكير والتغير والتعليم وجبر الكسر

فإن كان فيك الاكتئاب فجاهده بالعلم والتعلم والصحبه الصالحه

فإن الاكتئاب غمامه استظلت فوق رأسك

كما غيمه سوداء

همتك واستعانتك بربك واخذك بالاسباب

هي المفتاح لباب الخروج منه

حفظكم الرحمن وانار دروبكم
The Master
24-03-2010, 06:49 AM
الله يابوحسن


في وقته والله


انا من امس صايدني تفكير


اشتكي من صداع شديد بشكل متكرر للجهة اليسرى من الرأس وطنين في الاذن

الدكتور مخوفني من الفحص اللي سويته قبل اسبوع تبين فيه ان عندي مشكلتين

( الكوليسترول )

وهاذي بسيطة


والثانية الدكتور مادري ليه مكبرها

الا وهي ( التهاب المفاصل ) او مايسمى ( الروماتيزم )


ورحت اليوم وعدت الفحص على الله تكون النتيجه الاولية غلط

لأني تعبت من التفكير في الروماتيزم وعلاجه


عالعموم لن يصيبنا الا ماكتب الله لنا




المستر موضوعك خفف عن مافي نفوسنا من الهم والحمد لله


فغيرنا مصيبته اكبر عافاه الله وعافانا


ولك كل التقدير

هلا ومرحب اخوي متابع عن قرب...

خطاك الشر يارب...
وماجور ان شاء الله...

وماعليك شر...وكل شي مقدر...ومكتوب...

واسمح لي عن دكاترة هالزمن...بصراحه...اغلبهم ماعنده ذرة في علم النفسيات..صحيح دكتور..لكن مبرمج...اي شي حافظه يتبعه...

يعني مايقدر المريض اللي قدامه...وكيف يقول له او يشرح له حالته والمرض اللي صاده...وكيف يتم علاجها...

تلقاهم يخرعونك يابالفيت عشان توقف عن الاشيا اللي تؤثر على صحتك...لكن مايفكرون في العواقب...والحاله النفسيه اللي راح تمر فيها...ناس بلا احساس...

لبغيت المقارنه...روح ل اخصائي غذائي...وشوف المقارنه في المعامله وشرح النطام الغذائي...تحس يرحب فيك ويكلمك بكل طيبه واسلوب حسن ونفسي...

على العموم...ماعليك شر يارب...واجر وعافيه...

وان شاء الله الامور بتتحسن...وكل شي ينحل بالصبر...

وربك المستعان...عساه خير...تتقرب من الله سبحانه...

ويامرحبا بك...

"اسمح لي على التأخير في الرد...انشغلت مع الجامعه...ولا كان بودي ارد عليك من فتره..."
The Master
24-03-2010, 08:08 AM
جزاك الله خير

ويجزاك يارب...يامرحبا بك
The Master
24-03-2010, 08:12 AM
فديت قلبج .. ترى العمر يخلص والشغل مايخلص

اخذي اجازه اسبوع .. وارتاحي ترى اهم شي الصحه النفسيه

الدنيا ماتسوى تشيلين الشغل فوق راسج

شوفي وانتي رايحه الدوام ولا بساعات انتظار

كثري من الاستغفار

استغفري واستغفري واستغفري .. والله بيفرج همج يااااااااارب

الله يجزاك خير اختي بنت ذياب...
وتشكرين على الردود الطيبه...وفي ميزان حسناتك يارب...
موفقه دنيا واخره يارب...
The Master
25-03-2010, 08:02 PM
الرضى بما قسمه الله

هذا مجمل الأمر

التسليم

والله سبحانه قال ( فأتبع سببا )

صحبه صالحه تستلك من داخل الدائره
لتريك النور من جديد وتزيح عنك ماعبش على عيناك

الامور النفسيه علاجها صعب
فكم من نفوس عولجت بالحب ( صبراً ) على البلاء

يقول الله سبحانه في خواتيم سوره البقره

رَبَّنَا لا تُؤَاخِذْنَا إِنْ نَسِينَا أَوْ أَخْطَأْنَا
رَبَّنَا وَلا تَحْمِلْ عَلَيْنَا إِصْرًا
كَمَا حَمَلْتَهُ عَلَى الَّذِينَ مِنْ قَبْلِنَا
رَبَّنَا وَلا تُحَمِّلْنَا مَا لا طَاقَةَ لَنَا بِهِ
وَاعْفُ عَنَّا وَاغْفِرْ لَنَا وَارْحَمْنَا
أَنْتَ مَوْلانَا
فَانصُرْنَا عَلَى الْقَوْمِ الْكَافِرِينَ

تأتي الضروف احياناً اكبر من حجمها على الانسان
فما لنا الا الدعاء (( ربنا ولا تحملنا مالا طاقه لنا به ))
فليس الله سبب لهذا كله ان يحمله على العبد لا حشاه سبحانه الرحمن الرحيم

بل ليعلمنا سبحانه كيفيه الدعاء بالإستعانه على مانحن فيه

يارب لاتحملنا مالاطاقه لنا به

وهو سبحانه اعلم بعبده بصبره على البلاء

فا اللهم الثبات

ان الذي يكون ناتج من الهموم
التقصير بالصلاه
يعلم الله بعبده وهو اقرب من حبل الوريد
ويذكرهم من رحمته

يقول لهم


حَافِظُوا عَلَى الصَّلَوَاتِ وَالصَّلَاةِ الْوُسْطَى وَقُومُوا لِلَّهِ قَانِتِينَ


ويذكر سبحانه

وَاسْتَعِينُوا بِالصَّبْرِ وَالصَّلَاةِ وَإِنَّهَا لَكَبِيرَةٌ إِلَّا عَلَى الْخَاشِعِينَ


يَا أَيُّهَا الَّذِينَ آَمَنُوا اسْتَعِينُوا بِالصَّبْرِ وَالصَّلَاةِ إِنَّ اللَّهَ مَعَ الصَّابِرِينَ



فكم زانت رحمته ان طيبت النفوس

والاكتئاب ان وقع فلا يقع الا ان ينقص مابالنفس من ايجابيه الى سلبيه

ولا يزاح الا بالكلمه الطيبه والتذكير والتغير والتعليم وجبر الكسر

فإن كان فيك الاكتئاب فجاهده بالعلم والتعلم والصحبه الصالحه

فإن الاكتئاب غمامه استظلت فوق رأسك

كما غيمه سوداء

همتك واستعانتك بربك واخذك بالاسباب

هي المفتاح لباب الخروج منه

حفظكم الرحمن وانار دروبكم

هلا ومرحب وتين الورد...

الله يجزاك خير على المشاركه والرد الطيب المثري للموضوع...
بيض الله وجهك...
واحسنتي في ماذكرتي...وان شاء الله تعم الفايده للجميع...وفي ميزان حسناتك يارب...موفقه دنيا واخره...


ويامرحبا بك...وشرفتي...
ولاهنتي على التواجد اختي...
ع.م
26-03-2010, 12:41 AM
بغيت أضيف نقطة.. ملاحظتها عن طريق التجربة مب القراية.. مع العلم إني قريت وبحثت كثير عن الاكتئاب اللي يعتبر مرض عقلي ترى وليس نفسي وهنا تكمن خطورته القصوى.. فليس كل حزين مكتئب..

الشخص الحزين ممكن يوصل مرحلة مايبي يعالج نفسه.. يكون مستسلم للوضع لدرجة بتقوله قوم اقرا قرآن مارح يقرا.. مايبي يسوي شي.. بس كذا مبقق عينه ومايحس بشي.. ومايبي يحس بشي.. لو بتكلمه هو مب معاك ومارح يسمعك.. ممكن في هالمرحلة يدمن المهدئات أو الحبوب المنومة.. والحل معاه مب انك تعطيه محاضرة في التفاؤل.. الحل إنك تسبر أغوار نفسه وتعرف السبب اللي ورا هالحالة وغالباً يكون خيبة أمل وإحباط شديد من موضوع معين مايبي يواجهه.. لازم ينحل الموضوع عشان يرجع طبيعي.. أو يقتنع إن الموضوع مب سيء.. المهم يتصالح نفسياً مع الوضع أو يغيره.. لايتجاهل جذور المشكلة..
ام السعف
26-03-2010, 12:35 PM
بغيت أضيف نقطة.. ملاحظتها عن طريق التجربة مب القراية.. مع العلم إني قريت وبحثت كثير عن الاكتئاب اللي يعتبر مرض عقلي ترى وليس نفسي وهنا تكمن خطورته القصوى.. فليس كل حزين مكتئب..

الشخص الحزين ممكن يوصل مرحلة مايبي يعالج نفسه.. يكون مستسلم للوضع لدرجة بتقوله قوم اقرا قرآن مارح يقرا.. مايبي يسوي شي.. بس كذا مبقق عينه ومايحس بشي.. ومايبي يحس بشي.. لو بتكلمه هو مب معاك ومارح يسمعك.. ممكن في هالمرحلة يدمن المهدئات أو الحبوب المنومة.. والحل معاه مب انك تعطيه محاضرة في التفاؤل.. الحل إنك تسبر أغوار نفسه وتعرف السبب اللي ورا هالحالة وغالباً يكون خيبة أمل وإحباط شديد من موضوع معين مايبي يواجهه.. لازم ينحل الموضوع عشان يرجع طبيعي.. أو يقتنع إن الموضوع مب سيء.. المهم يتصالح نفسياً مع الوضع أو يغيره.. لايتجاهل جذور المشكلة..

اعجبني ردك كثيرا ،، فشكرا لك :nice:
The Master
27-03-2010, 12:19 PM
بغيت أضيف نقطة.. ملاحظتها عن طريق التجربة مب القراية.. مع العلم إني قريت وبحثت كثير عن الاكتئاب اللي يعتبر مرض عقلي ترى وليس نفسي وهنا تكمن خطورته القصوى.. فليس كل حزين مكتئب..

الشخص الحزين ممكن يوصل مرحلة مايبي يعالج نفسه.. يكون مستسلم للوضع لدرجة بتقوله قوم اقرا قرآن مارح يقرا.. مايبي يسوي شي.. بس كذا مبقق عينه ومايحس بشي.. ومايبي يحس بشي.. لو بتكلمه هو مب معاك ومارح يسمعك.. ممكن في هالمرحلة يدمن المهدئات أو الحبوب المنومة.. والحل معاه مب انك تعطيه محاضرة في التفاؤل.. الحل إنك تسبر أغوار نفسه وتعرف السبب اللي ورا هالحالة وغالباً يكون خيبة أمل وإحباط شديد من موضوع معين مايبي يواجهه.. لازم ينحل الموضوع عشان يرجع طبيعي.. أو يقتنع إن الموضوع مب سيء.. المهم يتصالح نفسياً مع الوضع أو يغيره.. لايتجاهل جذور المشكلة..

هلا ومرحب ع.م

نقطه جدا جميله...واحييك عليها...

اهم شي البعد عن الحبوب والادويه...الي مالها لزمه مجرد حل مؤقت...

اثراء جميل منك...واحسنت...
وان شاء الله القراء ينتبهون لهالنقطه...ويركزون عليها..ويحاولون يطورونها على حسب الحاله اللي عندهم...واهم شي هو كيف الدخول للشخص...وجعله يركز...

الله يجزاك خير...
ويامرحبا بك...
ولاهنت على الاثراء المميز...
The Master
27-03-2010, 12:20 PM
اعجبني ردك كثيرا ،، فشكرا لك :nice:

:waiting: احم
:pic:
The Master
14-04-2010, 08:05 PM
مرحبا بكم جميعا من جديد...
اليوم حبيت اجدد في الموضوع...بوضع قصه صارت لاحد العضوات في المنتدى...وارسلتها لي عالخاص...
وحبيت اني اطرحها لكم...عسى ربي ينفع ابها ناس يمرون في نفس الحاله...ويجزينا ويجزي صاحبه القصه بالخير يارب...
مانطول عليكم...
تفضلوا القصه...
طبعا هو اقتباس كوبي بيست...بدون اي تعديل...مثل ماجاتني...
الجزء الاول...
وهي مسميه القصه ب "تجربتي"


بالبداية.. احمد ربي على نعمة الصحة والعافية وفعلا الانسان لولا الصحه مستحيل يعيش بسعادة ..

تجربتي مع الاكتئاب.. جدا مريرة .. والحمدلله الف مرة اني قدرت اتخلص من هالمرحله الصعبه

اول شي باتكلم عن بدايتي ..
بدى التعب شهر 2 .. وكنت قاعده في حال سبيلي الساعه 2 الفجر ع المسن

وييت ابي ارقد .. ماقدرت.. تقلبت مني ومناك وبعد ماقدرت ارقد

مع اني نعسانة خلاااص ابي انام .. بس ماقدرت ارقد .. استغربت

حسيت بصعوووبة بالنوم بشكل اول مرة احس فيه .. طنشت قلت يمكن ارق

جا اليوم الثاني.. حاولت ارقد .. بعد ماقدرت .. يعني بدايتي كانت مع النوم !!!

واحاول مني ومناك .. مافي فايده .. رحت بعدها افتح النت وادور على علاج للأرق .. وصرت اداوم وانا سكرانه .. ابي انام

لاني صرت انام اول ماتطلع الشمس بعد محاولات دامت 3 4 ساعات

طنشت اسبوع .. اسبوعين والحاله تسوء اكثر واكثر..ومن كثر ما انا تعبانه مع النوم .. قعدت اصيييح .. ابي اعرف شفيني مب عارفه

وبعد طنشت نفسي.. وحالتي للاسف تزداد سوءا هالمرة مو بس ع النوم

بديت شوي شوي .. ماقدر اعيش حياتي طبيعيه .. وخصوصا بالدوام مع الربع .. قبل انسى نفسي معاهم .. اما الحين احاول اعيش الجو معاهم ماقدر .. في شي مضايقني !! وكاتم على صدري

اقولهم يالربع زهقانه متملله مافي شي حلو بلدنيا .. مع ان كانت وسالفهم تونس .. واحاول اندمج معاهم .. مااااااقدر ..
ماوعيت الا انا منهاااااارة واصيح .. واللي يقهر انك مب عارف شفيك
صرخت وقلت لهم مابي حد يلحقني.. مع انييييييي من النوع اللي لاتضايقت لازم 50 وحده معاي .. واتم افضفض .. بس لاول مرة احس اني ابي اقعد بروحي

ابتعدت عنهم وقعدت بروحي اصيييح وطبعا لبست النظارة عشان محد ينتبه علي .. اتصلت ف امي قلت لها رديييني .. وامي كانت عارفه بوضعي هالاسبوعين .. بس اللي صار اني كل مالي اتعب زياده ..

ولين الحين وانا ماعرف شالاسباب .. واتصلت باخصائي اجتماعي قلت له , قالي لا مافيج شي .. والمكتئب يقعد بروحه ومايبي اي شي بالدنيا بس انتي قاعده تسعين وتشوفين شالاسباب وهاي كله مساله وقت .. واقتنعت بس حالتي كانت تسوووء

لدرجه اني وصلت مرحله ماقدر ارقد بروحي .. فقمت اسحب امي ترقد معاي ! وتمت تقرى علي كل يوم .. وقالت ارقدي بوديج المستشفى باجر

اقولها لا يمه انا خلاص بموت .. وامي تصيييح معاي ..

رحت المستشفى .. وعطاني الدكتور حبوب مسكنه قالي اخذي نص الحبه بس لمده يومين !! وفعلا خذتهم وارجعت صحتي مثل قبل

ولكن بعد اسبوعين .. رجعت نفس قبل واسووووء !!!

وصرت مااحس باي شي حولي خلاص !!

وحتى بيمعاتنا .. قمت بس اقعد واطالعهم .. وف عيوني مليون دمعه
شي ظلام .. عالم اسود .. مو قادرة اتاقلم كلش.. وهالاحساس اكد لي
اني مب طبيعيه ..
وحتى قمت اشوف الناس اقول شلون يقدرون يضحكون .. شلوووون؟؟
اي دنيا هم عايشينها .. ليش انا جذي.. ليش انا ماعدت الاوليه ..
وحتى الاكل ماقدر اكل .. من كثر ما ضايقه فيني الدنياا
بس كنت اقعد واصيح .. واحساس الخوف ماكان يفارقني كللللش
كنت كله خايفه .. واحس اني مب ف أمان .. احس بخوف ورهبه
تشوفون رهبة الامتحان .. شعور انك خايف من شي
والاخس من هالخوف انك ماتعرف اشمنه خايف وليش ؟

بس ماسكت عن نفسي.. قلت انا فيني بلااا .. ورحت اتصلت ف الاستشارات العائليه وحجزت لي مووعد باجر الصبح

مالقيت الاخصائية اللي ابيها .. قلت لهم ابي اي حد اي شي..

رحت لوحده لبنانيه وكنت منهااااااااااااااااره واصييييييح
قالت شفيج شصاير اقولها ماعرف بس ابي اموت تعبانه ماقدر اعيش اكثر من جذي

قامت تهديني قالت خلاص خلاص اليوم ضروري اتجيني الساعه 7 العشا

قلت لها اي اكيد بيي..اهم شي اتخلص من اللي فيني

طبعا امي ماقصرت وصلتني ع الساعه 7 .. ودخلت ع الدكتور

وشرحت له كل اعراضي:
خوف
قلق
عدم القدرة على التركيز
عدم القدرة على الاستمتاع بالنشاطات المعتاده
عدم القدرة على ممارسة الحياة بشكل طبيعي
صعوبة بالنوم وبالاكل وارق
بكاء بدون سبب
الخوف من شي مجهول
وااكثر

طبعا اتكلم شوي واصيح ..

شرح لي.. وقالي في نوعين من الاكتئاب

مسبب .. وغير مسبب

والمسبب يكون في سبب معين يعني بعد حالة وفاة ولا صدمة ولا بعد ضيقه ولا شي معين

وغير مسبب : بدون سبب فجأه جذي .. بس يكون غالبا ناتج عن تراكمات السنين

وانا كان غير مسبب !! بدون سبب واضح ..

قالي ان حالتج يبيلها علاج كيميائي يعني حبوب

قلت له مااابي .. عالجني بالكلام

قالي انتي صغيره بالسن .. وفوق هاي مابتتحملين كل هالتعب وتحتاجين علاج عشان عالاقل تقدرين ترقدين وتاكلين

وتم يقنعني .. وفعلا انا كانت حالتي ماتسمح اي اتم فترى اطول لان العلاج بالكلام يحتاج 7 الى 8 شهور.. وفكرت فيها قلت يمكن خلال هالفتره يصير بعقلي شي واستخف

قلت له : ليش انا شفييني؟؟ قالي اكتئاب

وحسيت حد صب علي ماي بارد .. لاني عرفت اني مصابة بـ ( سرطان الامراض النفسية وهو الاكتئاب )

الجزء الثاني في رد منفرد
The Master
14-04-2010, 08:18 PM
الجزء الثاني... "تجربتي"




صرف لي العلاج .. وقلت له دكتور انت تقص علي ؟ انا مابتعالج ؟؟ انا انتهييييييت ..

قالي انتي لانج يائسة من كل شي حولج تقولين جذذي.. قالي استمري وشوفي النتايج

وفعلا استمريت عالعلاج .. وطبعا المفعول جا بعد شهر من العلاج ..

لانه ياخذ وقت .. وو كنت احس باعراض الاكتئاب للحين وكنت كل يوم لازم ارقد عند امي .... مب امي ترقد عندي

لاني كرهت غرفتي وكرهت كل شي حولي.. فصرت اتهرب من الواقع واروح ارقد بغرفة امي او غرفة اختي .. المهم مااشوف غرفتي اللي بدت معاناي فيها ..

وكنت للحين احس بخوف وضيقه .. وظلام .. وكل شي سىء
وحيانا كنت احس بالالام بجسمي ولما اتصل للدكتور يقولي

هاي شي طبيعي من الاكتئاب تحسين بتعب عام وبكل شي

وكنت احس بالم بخاصرتي مثل ماتفضلت اختنا بنت ذياب واحس ابي اشيل كليتي من جذورها.. احاسيس قاسية جدا

وكنت ادور ف عالم النت وادخل مواقع نفسيه واشوف هل في حد تعالج

وللاسف المواقع ماتبشر بالخير ووالاغلبيه يقولون ماله علاج وهالمرض صعب جدا

اكتئبت وقلت خلاص انا انتهيييت ,, وكل ماستجد معاي شي .. رحت وخذت لي موعد واقعد املق عالدكتور..

اقوله دكتور اكيد بتشافى .. اكيد برجع نفس قبل؟؟ يقولي اي صدقيني اي وهالحالات وايد مرت علي

وقام يقولي قصص مرت عليه .. وكنت بس ابي اسمع تجربه اي حد واتطمن اني بتشافى .. وكنت اقول انا مستعده اتحمل كل هالتعب بس ابي حد ياكد لي اني برجع مثل اول

تقريبا بعد العلاج بشهر شهرين 3 4 5 .. احيانا احس اني بخير وخلاص تشافيت وماحس بشي وانقز .. واحيانا يرجع لي الشعور

يعني ماكانت حالتي مستقره .. وهاي شي ايجابي .. ان الاعراض بالبدايه كانت دائمة وبعدها قامت تجي وتروح ليين ماتختفي نهائيا من جذورها

تقريبا بعد علاجي ب سنه .. اختفت كل الاعراض مابقى الا شي واحد

وهو الخوف .. من المجهول.. يعني الشعور اييني ويروح ..

وكنت فعلا اتضايق لانه هالشي الوحيد اللي ماراح عني

بس كنت اصبر نفسي.. واتوكل على الله ..وكل مارجعت لي الاعراض

افرش السجاده وادعي ربي انه يشفيني

وعودني المرض هذا .. اني كل ماروح مكان وشفت صندوق التبرعات او اي شي

اروح واتبرع .. وادعيلي وادعي لكل مريض بالشفاء العاجل

وبعد ماكملت سنتين .. راحت الاعراض الحمدلللله

بعد معااناة طويلة

لكن الاخطاء اللي صارت معاي

اني ماكنت التزم بوقت الحبوب خصوصا يوم تماثلت للشفاء

ف هالشي اثر علي وانتكست حالتي

والشي اللي قلب حالتي فوق حدر

اني كنت اعاني من جيوب انفيه ومن اعراض الدواا الجانبيه

انه يسبب هالشي وانا اوردي فيني

فكنت كل فتره اتعب من الجيوب.. غير ان نفسيتي كانت بالحضيض

لا والاخس من جذي

ان علاج الجيوب والحبوب اللي اتسخدمها كانت تتعارض مع علاجي

لانه حبوب الجيوب تسبب اكتئاب وقلق

وحبوب الاكتئاب تسبب جيوب

ف قمت اتحمل صداااااااع الراس بسبت الجيوب عشان الاكتئاب

عشت مراحل صعبه جداً


الخلاصة من هالكلام:

قال تعالى : (( وعسى ان تكرهوا شيئا وهو خيرا لكم ))

وفعلا كان هالمرض مثل صفعه لي عشان اقوم من سباتي

لاني كنت انطوائيه وكله قاعده ف البيت ولا اقوم باي نشاط غير الدراسه

وكله صاكه على نفسي الباب

والحمدلله بعد الاكتئاب عرفت قيمة الحياة وقمت اطلع واروح واجي وكونت علاقات طيبه مع الناس ووكل شي

حسيت ان لحياتي معنى

الاكتئاب غيرني 180 درجه .. وبالنسبة لي كان هالمرض هدية ! من ربي

وانا من قبل كنت اعاني من القولون العصبي.. قبل الاكتئاب يعني

وكان القولون وايد مضايقني ومطين عيشتي وكنت كارهه حياتي

بس بعد ما عشت الاكتئاب .. ادركت وعرفت ان القولون ولا شي جدام هالمرض.. وتلقائيا شفيت من القولون

لاني استصغرته بعيني.. وصرت اشوفه ولااشي

وبعد .. قمت اشوف الدنيا بعين ثانيه

كنت مستهتره وكنت اهتم بالمظاهر

صرت ولله الحمد انسانة ثانيه .. انسانة قوية .. مب ذيك الضعيفه المهزومة

والاهم من ذي كله .. تقربت من ربي سبحانه
وعرفت ان ..

(( امور المؤمن كلها خير ان اصابته ضراء صبر.. وان اصابته سراء شكر ))





اولا... الله يجزاها خير على مشاركتها لنا بتجربتها...والله يثبتها على دينه...وياجرها في مامرت فيه ويعينها على ذكره وحسن عبادته...

ثانيا... ان شاء الله الاعضاء يستفيدون من التجربه او القصه...ويقارنونها بحالهم اذا كان هو مصاب...ويلازم يعرفون ان هم مش الوحيدين اللي فيهم بلا...الكل...لكن الذكي هو من يصبر ويبتغي الاجر من الله سبحانه...

ثالثا... تعليقي على موضوع او قصه الاخت...
انا اشهد انها مرت في تجربه صعبه عليها خاصه في عمرها...والحمدلله والفضل له والمنه تخطتها...
وطبعا الاسباب او غالبا هي في حكر نفسها بالدراسه والتعليم...ازياده عن اللزوم...كل انسان لازم ما يجبر نفسه على شي اكبر من طاقته...اي نعم يجتهد...ويشد حيله...لكن في حدود المعقول...بدون الحكر والانطوائيه والحبس عشان درجات عاليه...

فا نصيحه للاهالي...هالله هالله في اعيالكم وارفقوا في حالهم...ولا تضغطون عليهم...وتجبرونهم على اشيا اكبر من طاقاتهم...اي نعم شجعوهم وشدوا من حيلهم...لكن لا تزودونها...او تخلون عليهم عبء اكبر وأثقل من قدراتهم...

اتمنى رسالتي اوصلت...
الحمدلله اختنا محنتها عدت على خير...لكن هل تظمنون اعيالكم بيعدون على خير؟؟؟

الله المستعان...

"عندي تعليق على حبوب للاكتئاب...انا ضد العلاج الكيميائي...ودائما وابدا افضل العلاج ب العقل والفلسلفي او الديني..."

وبس...

ولاهنتي يا راعية القصه...