تبي ولدك يطلع { رجال } مب خداي ودلوع و جنس ثالث ومش قد المرجله ؟!!

[5ial al3lya]

السلام عليكم ورحمه الله وبركاته

.

طبعا كل واحد او كل وحده فيكم تحلم انها تتزوج الزوج الصالح ويعيش الحياه السعيده ويجلبون البنين والبنات
والاولاد تسميهم باسامي حلوه ويطلعون حلوين كل يوم انه طالع شبه مين .. ويبونه يطلع رجل فيه كل معاني الرجوله والشهامه والدين !!

لكن في النهايه
وفي هالعصر
يطلع خداي

راعي صرف .. لا شهاده .. هياته .. ويمكن زقاير وزنا ومحرمات بعيد عنكم وعنا !!
هاي اذا ما لبس لبس حريم وحط مكياج بعد !!

بتسإلون ليش ؟؟؟ احنا ما قصرنا ؟؟

لان احنا ننتقد ابائنا على شغلات اهم ما سوها لنا .. وبصوره غير مباشره نقصر في عيالنا واحنا في نظرنا ما قصرنا

.

انا ما راح استلم البنات

انا همي الاكبر .. الذكور
الرجال
الي صاروا عمله نادره جدا جدا جدا !!
لان مب كل من ربى شارب وطول ولبس ثوب وغتره رجال !!
الرجال اخلاق وطباع وشخصيه !!!
..

قريت مواضيع وايد في هالمجال .. وان شاء الله استفيد منها لما يجوني عيال
مثل ما انا قاعد افيدكم الحين !!!
وما ابي منكم الا الدعاء الصالح !!!
.

في شغلات لازم نطبقها... لانه ولد مب بنت !!!!!
وهالشغلات تبتدي من قبل ما يتعلم الكلام حتى احسن !!!
لان اول خمس سنوات من عمر الطفل اهي الي تحكم شخصيته بعدين واطباعه !!!
فحاسبوا على كل شئ !!
.....................................

""التكنيه

يعني .. بدال ما تنادونه "دودو" ولا "بوبو" ولا "حمادي" ولا " صلوحي "ولا "ميمو" ...الخ
نادوهم باساميهم وتنكياتهم "ابو محمد " , " ابو اليزيد" ,"ابو شهاب" ..الخ
لا تقولون ياهل وما ادري وشو ... لان بكره مع الكبر ما يحب اسمه قد ما يحب ينادونه "ميمو"
.
حتى سالفه "عبود","حمود","سلوم" هاذي شيلوها .. احترموه علشان يتعود على الاحترام ويتعلم يحترم نفسه اهو بعد !!

...............

"اخذه للمساجد والمجالس مع الكبار "

بتقولون لا بيلعوزنا وبيلعوز عمامه ولا خواله خليه يلعب بلي ستيشن ... لأأأأأأأأأ!!!!!!!!!
والمسجد ... لازم يروح مع ابوه كل يوم .. حتى لو على الاقل صلاه الجمعه لحد ما يتعلم الصلاه وياهم ولو نص نص !!!
خل يروح يتعلم ان في شئ اسمه عباده ومسجد ويتعلم احترام المساجد والصوات ويسمع الخطبه!!!
ولازم يعلمه ابوه الادب والقعده شلون اهناك !! هاي مسؤوليته !!!!

...............


"نحكي لهم القصص عن بطولات السابقين في المعارك الاسلاميه وغبرها "

بدال ما نقص عليهم عروس البحر والجميله والوحش !!!!

ما في احسن من قصص الانبياء والمجاهدين في سبيل الله والغزوات ..
ممكن تقصونها عليه باسلوب يناسب عمره .. وتبتعدون عن المصطلحات الصعبه !!
علشان يتعلم منها ويعيش جو الرجال والشجاعه وقوة الايمان !!
إذا كنت مب حافظ القصص اهي متعه وافاده اقروا قصص وثقفوا اعماركم في دينكم وحياتكم بالمره !!!!


................

"تعليمه احترام الكبار والادب معهم"انه يحب راس الكبار في السن وشلون يسلم على امه وابوه ويحب يده وراسه ودق خشم
وان لو في حد كبير دخل المجلس يقوم من مكانه ويوسع له ويسنع له ويخدمه ويقهويه من واهو صغير ويصير سنااافي!!

وان طاف على حد يسلم .. وان دخل على مجلس يسلم ..الخ

................

"اعطاء الابناء قدرهم في المجلس"

يعني في ناس يستهينون به كونه ياهل
بدال ما يعاملونه ككبير علشان يصير كبير فعلا ورجال يفهم !!
فيطردونه او يسخرون منه وكذا .. وهاي غلط !!!
خل كل ابو يحترم ولده ويقدره ولا يرضى عليه انه ينهان في المجلس حتى من قبل جده او عمامه !!!
ولا بيظل طول عمره منهااان !!!!

.................

"تعليمهم الرياضات الرجوليه"

مب كمبيوتر و خرابيط << وين المرجله في الموضوع ؟؟
القصد فيها الرمايه .. ركوب الخيل .. السباحه... القتال ..

هاي الشغلات الي تبني الرجال !!!

مب واحد داشلي المجلس يفتخر ان ولده شاطر في الكمبيوتر
شنو بكره ان احتاجوه في الشده بيقعد يقل مثل المخدين اقراص على اعدائه ؟ خخخخخ

الرسول صلى اله عليه وسلم وصى بهالشئ بعد!!

وكانوا قبل الامرا ء والملوك وساده القبيله
اول شئ يتعلمه الولد : القرآن .. بعده الرمايه والسباحه وركوب الخيل والقتال !!!

مب الحين .. بالدز يادوب كوره ومدرسه !!

................

" تجنيب الابناء اسباب المياعه "

الحياه مب مدرسه وجامعه وبعدها يدور على الوزارات يالله بالواسطه وظيفه حكومه !!

لأ

خل من اهو صغير يجرب الحياه يروح مكتب ابوه يشتغل في الصيف ووقت الفراغ ..
ينتج شئ مب سفرات ومولات !!

في امهات واباء يضحكون لما يشوفون اولادهم يرقصون او يتمايلون حتى من اهم صغار
هاي غلط
ما في شئ اسمه "لا صغير ياحليله ما يفتهم"

وبعض الامهات اذا الصبي حلو شوي يلبسونه شباصات ويحطون له مكياج وثياب بنات بلفيت مزحه !!
وهاي حرام .. لاتقولون ما يفتهم !!!!!!!!!!

.........................

" تجنب تهينه جدام حد ثاني .. حتى جدام خواله او عمامه "

قوا شخصيته جدامهم.. تفاهم وياه بعيدن بينك وبينه والاب لا يتولاه بس مب جدام حد
وايد امهات واباء اشوفهم اذا فشلوه جدام حد يعني بيتعلم .. وهاي ممكن يتجنب فيها الفعل الي هاوشتيه عليه لكن انتوا ا تدمرون شئ ثاني انتوا مب شايفيه !!!

........................

"عدم احتقار افكاره .. وتشجيعه على المشاركه وتحسسيه بقدره واهميته"

هاي ما يحتاي افصل فيها .. مفهومه ..
انا شفت هالشئ من اباء وامهات ومن خوات واخوان بعد .. وهاي غلط كبير كبير!!!!!!

لازم تحسسونه بقدره واهميته في المجلس وفي البيت !!!

علشان يحس انه مسؤول ويتعلم المسؤوليه ويدير باله على نفسه وعلى الي حواليه ويفكر بعقل اكبر .. بدال ما يتكل على غيره ولا مبالي بشئ في حياته!!

ممكن كبدايه تسلمونه مسؤوليات بسيطه تناسب سنه !!

ولازم تحترمونه .. بانكم تسلمون عليه وتستشيرونه فيما يخصه وفي بعض الشغلات المنزليه

ممكن تعلمونه كتمان الاسرار بانك تكتمه على سر بسيط معين علشان يحس بقدره وانه مهم لان امنته على هالسر!!

...............................

" تعليمه الجرائه في الشغلات الصح "
لان في فرق بين الجرائه والوقاحه
والله بالخير ياكثر الوقحين في الشارع .. صاير الذرب مثل الفقع في الصيف !!
ممكن تعلمونه فن الخطابه وشلون يتكلم نيابه عن ربعه او عن مشكله او في المدرسه
بدال ما يستحي ويضحك على ربعه الي يتكلمون واهو منخش ورى الكرسي !!

............................

"الاهتمام بالحشمه في ملابسه وتجنبه الميوعه في الازياء وقصات الشعر والحركات والمشي وتجنبه لبس الحرير الذي هو من طبائع النساء"

...........................

"تجنيبه الدلع وحياه الكسل "

اشغليه بالمسؤوليات .. اعطيه مهمات .. ولازم الاب يتولاه ويعلمه شغلات جديده في الحياه !!!

............................

" تجنيبه القعدات البطاليه والغنائيه لانها ما تزيد للرجوله ذره.. الا تنقص منها "

.........................

" استقصوا عن اصحاب واصدقاء ابنائكم "

اعرفوا من يرافج بتعرفون شلون بيصير !!!!!!!!
وهاي مسؤوليه الاب 100 %

............................
.................
.

وفي النهايه
اتمنى اني افدتكم


واقولكم مع احترامي

التربيه صعبه لكن

الي مب كفوا تربيه لا يجيبون عيال احسن ههههههه

لان فعلا البلد مب ناقصه ههههههه

[سنافي قطر]

كلام جميل واسلووب جميل الكل محتاجه لتربيه جيل اليوم ( الصعب) والعنيد و( الدلوع )


افكار حلوه تنفع الكل واتمنى الكل يطبقها ...

الله يجزيك خير آآخووي

[بن موسى]

شكرآ لك على هذا الموضوع بارك الله فيك الله يرحم شيابنا اللي قالوا المجالس تعلم الرجال

[لولوتي]

جزاك الله خير

اسجل حضوري في الموضوع عشان ارجع اكمل قرأته بعدين،،، لأنه بالفعل يستحق القراءة وأخذ النصائح منه

وشكرا :)

[جرح الزمان]

جزاك الله خير

محتاجين لمثل هذه المواضيع

اضيف لهذه النقاط نقطه هامه وهي

تعويدهم على تحمل المسؤليه بحسب اعمارهم

ولي عوده

[العصامي]

موضوع فيه الكثير من الفائده ..


بارك الله فيك .. وشكرا لمجهودك ..

[qtrose]

ما شاء الله ، نصائح حلوة بارك الله فيكم .

[بوسعد 55]

كلام جميل يوحي برجل فاهم عنده تجربه واكيد كبير في السن مشكور وما قصرت وانا من سني احين اشوفها ممتازه ولو الواحد مشي ابها واخذ ابها اضمن اعياله بيطلعون بعد توفيق الله رجال وابي منك يالاخ العزيز بعد تكتب عن البنات وطريقة تربيتهم لانهم بعد مهمين لان الام مدرسه اذا اعددتها اعددةشعب طيب الاعراق ومشكور مره ثانيه

[عاشق السفر]

أعتقد أن أهم الأشياء التي تجعل الطفل يكون مميزاً هو زرع المسؤولية فيه وعدم توفير كل شيء له بحيث هو يبذل مجهوداً مضاعفاً للحصول على مايريد، كذلك إعطائه الفرصة في التعبير عن رأيه وإستشارته في صغائر الأمور حتى يثق في نفسه، وعدم التفرقة بينه وبين إخوانه.

أما مسألة المجالس فلا أرى أنها مجدية لأني لا أرى أن هذه المجالس قد أنتجت لنا مفكرين ومميزين، هي تنتج مجموعة من المقلدين الذين يحرصون على التصرف كما تصرف الأجداد.
والدليل أن الغرب لايوجد لديهم مجالس ولكنهم أنتجوا رجالاً يقودون العالم اليوم.

[^امـ نواري^]

ماشاءالله موضوع رائع وكلام جميل ..

ربي يجزيك كل خير ان شاءالله ويقر عينك بابنائك ويحفظهم لك وجميع ابناء المسلمين

صج التربية مسئوليه كبيرة وعظيمة ملقاة على عاتق الام والاب .. فلازم ما نتهاون عنها

وكل الشغلات اللي ذكرتها وايد مهمه واساسية في التربية الصحيحه للابناء ..

[biz-qtr]

موضوع حلو واسلوب سلس

حطيت موضوعك فالفيف وبعد اذنك ابي انشره فالايميل لو ممكن ...

وايد ناس غافله .. ووايد ناس ما تعرف تربي .. وبالنسبه لي التربيه مهمه .. ابي عيالي لين اكبرو يرفعون راسي مب يفشلوني ..

ماعندي اولاد ولكن اذا الله رزقني بالمستقبل وربيتهم تربيه صالحه بدعي لك

وجزاك الله الف خير وجعله ف ميزان حسناااااتك

[الخير كله]

الشغل ........
لازم اعيالكم يشتغلون
الاول كان الياهل يودونه الغوص (تباب)
وعقب كان الجيش يضم اليهال في الصيف
الحين وين اتشغلهم؟؟؟؟؟؟؟؟

[ابو عبد الله]

جزاك الله كل خير

موضوع جدا جميل ومفيد ورائع

الله يحمي ابناءنا وكل ابناء المسلمين

[ام السعف]

أعتقد أن أهم الأشياء التي تجعل الطفل يكون مميزاً هو زرع المسؤولية فيه وعدم توفير كل شيء له بحيث هو يبذل مجهوداً مضاعفاً للحصول على مايريد، كذلك إعطائه الفرصة في التعبير عن رأيه وإستشارته في صغائر الأمور حتى يثق في نفسه، وعدم التفرقة بينه وبين إخوانه.

أما مسألة المجالس فلا أرى أنها مجدية لأني لا أرى أن هذه المجالس قد أنتجت لنا مفكرين ومميزين، هي تنتج مجموعة من المقلدين الذين يحرصون على التصرف كما تصرف الأجداد.
والدليل أن الغرب لايوجد لديهم مجالس ولكنهم أنتجوا رجالاً يقودون العالم اليوم.


نص العمى و لا العمى كله ،، مجالس الكبار فيها من الأخلاق و الأداب و الصفات الطيبة
التي قد لا تجدها في مجالس المقاليع و الصحبة الشينة اصحاب العلوم البطالية ،،

في العصور التي كان يتزود طالب العلم بالسفر كي يحصل علمه ،، كان يحرص
على الذهاب الى مجالس العلماء و الفقهاء و اصحاب المكانة العلمية و الأدبية
فيجالسهم و يكتسب منهم العلوم العديدة ،،

حتى افلاطون و جماعته الذين ابهروا العالم بفلسفتهم كانت لهم مجالس خاصة
فيوم نقول مجالس يجلسون فيها الأطفال ،، ما يكون القصد منها مجالس
فيها الحش و العقار و المغازل و قلة الأدب و لعب الورقة ،،


فلو انت اليوم يا عاشق السفر لو فتحت لك مجلس للحديث عن العلوم التطبيقية و التنظيرية
باطرش لك عيالي الذكور ( يمكن البنات حتى ) يقعدون معاك ينهلون منك العلوم ،،
اما لو بتفتح لي مجلس بيكون جل كلامك عن مساوئ مجالس الأجداد ،، بشمّع لك مجلسك بالشمع الأحمر القاني ،،


اما ردا على صاحب الموضوع ،، الموضوع حلو و جميل لولا الضحك اللي ما منه فايدة
في نهاية الموضوع ،، واعتراضي الوحيد على نقطة الكمبيوتر ،، الدنيا تطورت و ممكن
الطفل ينهل من الكمبيوتر في تواجد والدينه معاه امور صعب يكسبها من المجالس ،،
وعلى سبيل المثال ،
نعود الى عاشق السفر لو كانت مواضيعه فيها من المعلومات و التطور اللي منبهر فيه
عن الغرب ،، كنا بنستفيد من مشاركاته أكثر من الطعن في افكار الأجداد ،،

فالمهم نعرف كيف نساهم في التطوير ،، مب بس ننتقد و نضحك على الناس ،،
حتى وان قدمنا نصائح ثمينة ،،

[ماريسا]

ممتاز جداً

[بدون]

طرح جميل و نصائح قيمة

جزاك الله خير

[هل الشمال]

جزاك الله خير

نصايح مفيدة وقيمة ونتمنى الكل يلتزم فيها ويطلعون عيالنا رجال

الله يهديهم ويصلح حالهم

[عليان قطر]

الف شكر
كلام جميل

[Rosy]

يالله سترك

كلامك يا خوي بمنته الحكمه .. بس شتقول لما الوالدين مايقصرون بالتربيه ويجيك رفيقه ويخربه؟!

قال النبي الكريم في شان رفقة السوء: "إنما مثل الجليس الصالح والجليس السوء، كحامل المسك ونافخ الكير، فحامل المسك إما أن يحذيك، وإما أن تبتاع منه، وإما أن تجد منه ريحاً طيبة، ونافخ الكير إما أن يحرق ثيابك، وإما أن تجد منه ريحاً خبيثة".

ومن ضرر رفقاء السوء: أن يُؤخذ الإنسان بجريرتهم، فيُساء به الظن، وتتلوث سمعته، ولو لم يعمل عملهم

إنها قضية جوهرية في حياتنا، فنحن لا نستغني عن الصاحب، والإنسان لا يعيش بمعزل عن الناس، فعلى المؤمن الحصيف أن ينظر في شأن صداقاته وأهل مجالسته، وأن يعيد النظر، فلا يصاحب ويخالل كل أحد يلقاه؟!.

إنّنا نعلم قدر الصحبة في حياة الناس وخاصة الشباب، ونشعر بتأثيرها في مسيرتهم، ومع هذا فعليهم ألا يغتروا بالمدح، وبالكلمات المعسولة، والضحكات الرنانة من ثلة ضائعة، لأخلاقها بائعة، فليست المصالح في الدنيا فحسب، فمصالح الآخرة أعظم وأهم.

وإن العاقل يحكّم دينه لا نزوته، وعقله لا شهوته. فساعات الأنس في لعب الورق والمشاهدة، والسفر والمسامرة، واللقاء والمنادمة، هي ساعات من العمر الذي سيُسأل عنه العبد، والأيام التي عليها سيحاسب.

وما قول بالنهايه يــاما تشوف فلان قدامك رجال وماعليه كلام ومن وراك بيطلع شي ثاني :(
ومب كل من لبس ثوب وغتره وله شنب رجال !

واسمح لي على الاطاله.

[حياة]

كلام جميل ارجوا تطبيقه
والله يصلح عيالنا وعيال المسلمين
ااااااااااااامين

[عيون Qatar]

يعطيك العافية على هذا الموضوع


بارك الله فيك

[meme~qatar]

اسلوب راقي في الطرح

وافكار عملية سهلة التطبيق

واشياء كثيرة كنا غافلين عنها


واخر مرة انادي ولدي بـــ حمود

[رنج سبورت]

بيض الله وجهك عالموضوع

[الفولاذ]

جزاك الله خير

[حبة خال]

التربية صعبة في زمن كثرة فيه الوسائل المؤثرة على الابناء يعني ما تبني من صوب الا وتحصل حد يهد من صوب

مشكورة على الموضوع

[بنت المزن]

الله يجزاك الف خير عنا وعن عيالنا خير الجزاء......
جمعت فعلا معظم المؤثرات الايجابية على حياة العيال في موضوع واحد... ومبين من كتابتك انك فعلا حظيت بتربية قوية... الله يعطيك العافية.. والصراحة نصايحك لا تقدر بثمن... وحفظتها عندي في المحفوظات...

[مع الناس]

الموضوع روعة وبتبع هالاسلوب مع إخواني الصغار

بارك الله فيك

[بوذياب]

والله اني اندمجت ههههههههههههههههههههههههههه
وضحكت وحسيت بكلامك يالذيب

وازيـد علـى كـلامك شــي بسيـــط انت ماقصــرت وبيـض الله وجهــــك

ان الانسان يزرع في ولده حب القرآن وتعلم القرآن لان القرآن سبحان الله يربي الطفل من وعاده صغيــر
وانـك تخلـي الـولد يهتـم فـي مركـز التحفيــظ اكثــر من المدرسه .. تدرون ليـش ؟؟
لان القرآن اهم من كــل علــم نتعلـمه ونقــراه .. وهو دوره اساسي في حياة الصحابه والخلفاء وشيبانا ..

هذي مداخلاتي ولا انت انشهد انك سويت اللي عليك والله يرزقك بدرزن عيــال

ولاتنسى تسمــي بأســـم ذيــاب هاااااه تراني علمتــك


تحيـاتــي ابـو ذيـــــــــاب

ولاهنت ياعاشق البنت ياللي ماتبي الا انت :)

[ورقــة أمــل]

شكرا لك اخووووي

المشكلة لو الام والاب مب متربين عدل وين يقدرون يربون عيالهم التربية السليمة

[سارا.]

موظوع جميل واسلوب احلى اللة ينفع بة ويرزق صاحبة ومن قراة بذرية الصالحة-ويبارك للي عندة ويعينا على تربيتهم على الشكل الصحيح-هذي المواظيع الموفيدة -

[ودي أكون]

بارك الله فيك عالموضوع الممتاز اخوي .. :)

بارك الله فيك

[شـعـشـبـونـه]

الله يجزاك خير.. شكرا عالموضوع المفيييد بصراحه

[وطن]

كلام جميل
الله يعطيك العافية

[بندرصالحي]

الله يجزاك خير

[alrheeb2020]

مب كمبيوتر و خرابيط << وين المرجله في الموضوع ؟؟
القصد فيها الرمايه .. ركوب الخيل .. السباحه... القتال ..

هاي الشغلات الي تبني الرجال !!!

مب واحد داشلي المجلس يفتخر ان ولده شاطر في الكمبيوتر
شنو بكره ان احتاجوه في الشده بيقعد يقل مثل المخدين اقراص على اعدائه ؟ خخخخخ


الموضوع تحفه ما شاء الله عليك

بس هالنقطه ماكان لها داعي ..


وعلى فكره اذا كان شاطر فالكمبيوتر ممكن يفيد المسلمين في اشياء كثيره ..

ليش عديتها من السلبيات ؟

ويعطيك العافيه

[5ial al3lya]

مشكورين ويعطيكم العافيه على الرد على الموضوع
اسف على انقطاعي عنكم بسبب سفري الطارى مع الوالده للعلاج

جزاكم الله خير

[مابدل العادات]

الله يجزاك خير يالغالي على الموضوع الجميل والمفيد

وان شاء الله الكل يستفيد منه

ماقصرت والله :)

[G0LD]

صدقت والله موضوع راقي جدا ومفيد

جزاك الله خير

والتربيه هي الأساس

وصح حنا مش ناقصين الصراحه

بارك الله فيك

[الجزوع]

مشكور على الموضوع ، وعسى ربي يصلح عيالنا ويطرح فيهم البركه ويصلح حال الامه بكبرها