+++ البحـث الجنـائي يضبط عـدد من المتسـولات +++

[jajassim]

http://www.moi.gov.qa/site/arabic/resources/images/2010/03/17_16066.jpg


تمكنت " إدارة البحـث الجنـائي " من القبـض على (5) متسولات من إحدى الجنسيات العربية أثناء قيامهن بممارسة التسول في أماكن تجارية بالدوحة ، وذلك في إطار حملاتها المستمرة للقضاء على هذه الظاهرة الدخيلة على المجتمع القطري .

وكانت إحدى دوريات الإدارة أثناء تغطيتها للمنطقة الـواقعـة خلف " سوق الـذهب " بمنطقة الغانم اشتبهت في قيام امرأتين تقومان بالتسول من مرتادي السوق، حيث حاولتا الهرب عند ملاحظة مراقبة الشرطة لهما فتم إلقاء القبض عليهن بحضور الشرطة النسائية .

كما تم إلقاء القبض على إحدى النساء أثناء قيامها بالتسول وطلب المساعدة المالية من مرتادي " سوق الديـرة " أما الأخريات فتم القبض عليهما وهما تقومان ببيع آيات قرآنية بقصد التسول وجمع المساعدات المالية من مرتادي أحد المجمعات " بمنطقة بن عمران " .

وبالتحقيق معهن اعترفن بأنهن حضرن إلى البلاد لبيع مستلزمات هامشية وطلب مساعدات مالية .وتم إحالة المتسولات للجهات المختصة تمهيداً لإتخاذ الإجراءات المناسبة في مثل هذه الحالات .

وتناشـد " إدارة البحث والمتابعـة " الجمهـور الكريم التعاون معهـا من خـلال الإبـلاغ عن أي حـالات تسـول في البلاد عن طريق التواصل مع " قسم مكافحة التسول " على الهواتف ( 4714220و4823455 )


المصدر (http://www.moi.gov.qa/site/arabic/news/2010/03/17/21627.html)

[كازانوفا]

ليش ما يتم ذكر الجنسيه؟؟؟؟
ومشكور على الخبر

[w.qatar]

فيه وحده بسوق واقف تبيع وهي تتمشى وامي معطتها وجه تشتري منها مع انها تخالف القوانين تقول لي تكسر الخاطر مسكينه قهرتني

[ريان]

المهم ليس بالقبض عليهم

المهم هل هم فعلا ضعوف ومحتاجين !!!!!

[ماريسا]

طيب في هنود يتسولون عند المطاعم يعني صج يعورون قلبي الله اعلم اذا صادقين محتاجين او بس يستغلون زباين المطعم يشترون أكل و حرام مايعطون؟ اش الحل معاهم نعطيهم و نحتسب الاجر عند الله او نبلغ عنهم؟؟

[الجزوع]

فيه بعض المتسولين صدق محتاجين بس عيال الحرام ماخلوا لعيال الحلال شي، وماعاد قدرنا نميز صادقهم من كاذبهم..

يسلمو ع الخبر

[ودي أكون]

المتسولات تطور اللحين .. مايروحون الاسواق بس ..لا


يجونا لين شغلنا :rolleyes2:


الله المستعان والله ..

[SomeOne]

ما شاء الله عليهن

صحة وعافية ،

[عسولة]

ليش مايذكرون الجنسية شو الحكمة في اخفاء هاي الشي

[eXpert*]

السؤال كـ التالي : هل قسم مكافحة التسول يعمل على مدار فترتين صباحاً ومساءً أم فقط يستقبل البلاغات في الفترة الصباحية فقظ ؟

المحتاج عادة يكون محتاج طعام وشراب ،، أما اذا كان قصده الحصول على المال الواجب عدم اعطاءه . <== وجهة نظريّ الشخصية :)

[خفوشه]

قسم مكافحة التسول " على الهواتف ( 4714220و4823455 )...

سؤالي هو : هل بيردون علينا بسرعه؟؟ ولا بينقعونا ؟..


حالهم حال خدمه العضيد.....

[بو خليفه 123]

اذكر من 3 سنين رن جرس بيتنا في عز القايله الا وحده متنقبه قالت لي وين الوالده ؟
على طول فكرتها وحده من جيرانا جايه تزور الوالده .. قلت لها تفضلي المجلس و الحين بناديها .. ادخلت المجلس و اقعدت و يوم ناديت الوالده قهوتها و اقعدت معاها الا اطلعت طراره تبي منها فلوس !!

[عزووز قطر]

لازم نكافح هالظاهرة بكل الطرق
الواحد خاطره يتمشى بأمن وطمأنينة
وهالناس ينشبون للواحد

اذا صج محتاجين عندهم الجمعيات والمؤسسات الخيرية
والمتسولين العرب شلون ماعندهم فلوس وهم مسافرين وتذاكر وسكن وحالة السالفة كلها نصب في نصب

ومجهود جبار من وزارة الداخلية والله يقويهم

[هذلان]

قواهم الله ... بصراحه الواحد يصير بين نارين .. مايدري هم محتاجين فعلا ولا نصب.

الوكاد العتب على الي خرب البلد وخلا فيزه الزياره لكل من هب و دب

[بوجاسم 75]

حسبي الله ونعم الوكيل فيهم 0

[دانة قطر]

طيب واللي يدخلون البيوت والله احسبها مسيرة علي وبعدين تطلع طرارة لا وبعد كاشخة
في الأخير ماتبي عيش وأكل تبي فلوس 500 وطالع واذا عطيتها طرشت اليوم الثاني رفيجتها لا وبعد ايلفون الفريج بسيارة
خووووووووووووش اطرارة

[استغفرالله]

جزاهم الله خيرا البحث الجنائي

[qtr.wolf]

يستحون يذكرون الجنسيه .. خبرك بويمن ولا مصريات

كل وحده تقول لك لاتفهمني غلط ..

[ريد قطر]

لاحظت شي جديد من فترة عمال البلدية الي ينظفون الشوارع عند الاشارات يزيد تنظيفهم لين وقفت الاشارة لا ويمدون يدهم يبون فلوس
كنت اشوف هالظاهرة في مصر للأسف انتقلت عندنا
يبيلهم حد ينتبه لهم

[SomeOne]

يستحون يذكرون الجنسيه .. خبرك بويمن ولا مصريات

كل وحده تقول لك لاتفهمني غلط ..

يرجى عدم ذكر الجنسيات ، :telephone:

[SomeOne]

لاحظت شي جديد من فترة عمال البلدية الي ينظفون الشوارع عند الاشارات يزيد تنظيفهم لين وقفت الاشارة لا ويمدون يدهم يبون فلوس
كنت اشوف هالظاهرة في مصر للأسف انتقلت عندنا
يبيلهم حد ينتبه لهم

اطلعت موضة

[ماريسا]

طيب واللي يدخلون البيوت والله احسبها مسيرة علي وبعدين تطلع طرارة لا وبعد كاشخة
في الأخير ماتبي عيش وأكل تبي فلوس 500 وطالع واذا عطيتها طرشت اليوم الثاني رفيجتها لا وبعد ايلفون الفريج بسيارة
خووووووووووووش اطرارة

ههههههههههههههه