الى المسؤولين عن حديقة دحل الحمام مع التحية !!

[راعي البيرق]

الاخوة المسؤولين عن حديقة دحل الحمام السلام عليكم اما بعد :
بصراحة احب اشكركم اولا عالجهود اللي تقومون بها من اجل تنظيم وترتيب الاوضاع داخل الحديقة من اجل امتاع واسعاد الاهالي والاطفال واسال الله ان يجعل هالشي في ميزان حسناتكم
لانهم مايلاقون الا عطلة نهاية الاسبوع من اجل الترفيه فيها عن تعب وضنى 7 ايام عمل للاباء ودراسة للابناء .
بس في شغلة واحدة لاحظتها وللعلم مش المرة الاولى اللي الاحظها مطعم الحديقة والموجود بقرب البوابة الجنوبية (( المطعم معروف ومشهور )) الزحمة فيه لاتطاق والفوضى بداخله حدث ولاحرج فليش ماتخلون واحد يرتب الامور حتى لو من (( حماية )) لانه بصراحه صارت
الحريم تتدافع بينهم البين وتتزاحم لدرجة انهم وصلوا لشباك الرجال واختلطوا فيهم ؟!!
وبعد مو مكفيهم !!!
فليش هالفوضى ولاهي عاجبه اهل المطعم واهم شي الربح ترى هالشي مايجوز والواحد يخجل
من ذكر بعض التصرفات اللي تصير .
واخيرا ارجو ان تتقبلوا احترامي وتقديري وهذي الملاحظة من اجل ان نتعاون بتقديم خدمة
افضل للاهالي
وشكرا

[صلاتي]

دحل الحمام خطرة جدآ على المراهقين

انصح كل صاحب اسرة ان لا يترك اطفالة

في الحديقة ويتركهم :omg:

كثير منهم تعلم التدخين والسويكة وغيرها!!!

من الحديقة ولذالك لا تتركو اطفالكم وحدهم في الحديقة

فقد اعذر من انذر

[غانم 81]

حاميها حراميها شلت حمايه هي اكثر ناس اتحرش في البنات ريحتهم فاحت

[طريق سلوى]

ليش ما يفتحون اكثر من مطعم وموظفي حماية يكونون كبار في السن مش شباب مراهقين،،،،،،ماتدري وين تروح في الدوحة

[لولوتي]

بالفعل الحديقة للمراهقين المستهترين مكان غير مناسب،،، وبالأخص في غياب رقابة الاباء والامهات.

أما المطعم بالفعل اذكر ان حجم مبنى المطعم صغير ولا يستوعب الازدحام في الحديقه.

[ماريسا]

شكراً ع الموضوع و أتمنى صوتك يوصل لحد من المسؤولين و تنحل المشكلة

[darkuae]

من اسبوع طلبت من المطعم لبناتي
اولا: عقب ما دفعت قاللي مافي فلفل (حلاة الفلافل مع الفلفل) وقاللي مافي مخلل (بناتي اصلا ياكلون المخلل ويخلون السندويش)

المهم سكت وسلمت امري
ثانيا خذت الاكل ماحصلت مكان اقعد فيه داخل المطعم (كلهم طاولتين والريحة والزحمة ماتطاق) فرحت برع ادورلي مكان اكل فيه فماحصلت مكان مهيأ )

ثالثا وأخيرا واهم شي مافي مصلى للرجال (أنا وديت البنات من غير أمهم او الخدامة ووقت الصلاة اضطريت اطلع برع الحديقة والبنات يلعبون وقلبي معاهم :( )

اشكرك اخوي على فتح الموضوع وخليتني افضفض

[ولد الرياان]

حاميها حراميها شلت حمايه هي اكثر ناس اتحرش في البنات ريحتهم فاحت

:) السلام عليكم

اخوي الفاضل غانم كلام ما بطيب تقوله على شركة محترمه

اذا احد تحرش فيك هذا كلام ثاني :omg:

ولكن اذا في احد تحرش في هالك تقدر تشتكي عند مكتب الامن وبياخذ الغلطان جزاه

بس على العموم اتمنى مرة ثانية اننا نشكر رجال الامن سواء كان شرطة ولا حماية ولا اي شركة امنية

هم موجودين لتوفير الامن لنا

والله يعطيهم العافية موظفين وموظفات حماية على مجهودهم الواضح في الحديقة الله يقويهم

[نور اعيوني]

ما احب اروح الحديقه كلششششششششش ايام الويكند لانها زحمه واحس واااايد يمصخونها ايام العطلات سواء شباب او بنات الله يهديهم احب اروحها الايام العاديه وصج بخصوص الاكل مره رحتها ايام الويكند كان عندهم طبق خيري وصج شفت المطعم زحمه من قلب والوحده تفتشل تزاحم والله..لا واغلب الايام يقولون مافي خلص الشي الفلاني..

[Sharshooooor]

ليش ما يفتحون اكثر من مطعم وموظفي حماية يكونون كبار في السن مش شباب مراهقين،،،،،،ماتدري وين تروح في الدوحة

اللي سمعته اكثرهم خريجين سجون
واذا كانوا راعيين سوابق فالافضل تأهيلهم لهالشغلة ومحاسبتهم اول بأول

[الجزوع]

الجهات المسؤله ماتستعدل الا لما الواحد يشهر فيها فوق الخمس مرات ، وانا ملاحظه شكاوي في الفتره الاخيره ( جرايد + اذاعه) على دحل الحمام ،زين نفع فيهم التشهير

[راعي البيرق]

اولا اشكر كل من مر وسطر بالتعقيب او الرد وثانيا فعلا المنظر فعلا مايسر احد الحريم يتزاحمون لدرجة انهم
يزاحمون الرجال بعد ؟!!!
ارجو ان الموضوع يلاقي اذن تسمع او عين تقرا للمسؤوليين عن الحديقة اللي هم اخوانا اولا واخيرا وهذا الموضوع من باب التناصح والتعاون لا التشهير والعوايل هذي هي بعد امهاتنا واخواتنا وبناتنا فهل يرضيكم
اللي قاعد يصير يااخوان
ودمتم سالمين

[راعي البيرق]

الجهات المسؤله ماتستعدل الا لما الواحد يشهر فيها فوق الخمس مرات ، وانا ملاحظه شكاوي في الفتره الاخيره ( جرايد + اذاعه) على دحل الحمام ،زين نفع فيهم التشهير

حنا قلنا نبدا بالنصيحة وبعدين في الف طريقة لمعالجة الموضوع والتشهير ماراح يجيب حل
الا الاحراج وحنا نبيها تطلع من ذمتنا الى ذمتهم وهم بكيفهم عقب