بخصوص مخالفة غسيل السيارات داخل البيت = 10 الاف ريال

[الـخـور]

السلام عليكم ورحمة الله وبركاته


ياخوان .. صراحة هالمخالفة ازعجتني واحس مالها داعي !!

يعني شالفرق لما واحد يغسل سيارته في المغسله والا يغسلها داخل البيت

يعني غصب نربح المغاسل .. او نتظر بالدور واحيانا تظطر تخلي موترك

ياترى هل مكينة الغسيل لو شريتها بعد ممنوعة.

موضوع صراحة اتمنى ان يصل للجهات المختصة ويتم اعادة النظر في المخالفة

[خـــــــــاص]

اعتقد المخالفه تكون بسبب اهدار الماء أكثر من اللازم وفي هالحالة من وجهة نظري

يستحق المخالف هذه المخالفه ولكن ان كانت المخالفة على ((غسيل السيارة في البيت))

فأنا اوافقك الرأي

[ودي أكون]

معاك اخوي .. بس في هنود يبالغون فالغسيل !!

يعني الماي يهد هد وهو لا هامه .. مال بلاااش !!

وغير اللي عنده 3 او 4 سيارات فالبيت !!

وغير اللي يخلون لديول يغسلون السياره يومياً ..!! .. هاي احنا :shy:


بس غسيل عن غسيل يفرق .. يعني اللي يعرف اشلون يغسل غير عن اللي يهد الماي هد ويغسل الشارع من الماي!!:rolleyes2:



يعني انت دخل سيارتك داخل وسكر باب الحوش :shy: وخل الهندي يغسلها لك .. بس لا يستهلك ماي وايد ..:shy:

[كلاسيك قطر]

اشدعوه

وين وين مخالف اذا اتغسل السياره في البيت

يعني كل شي مخالفه الحين

[الصحراء]

ممكن حد يفيدنا عن غرامات الكهرباء الي طالعين لنا فيها هذي الايام التفاصيل شنهي انا شخصياً مدري عن القانون نرجو الافادة من الي يعرفون :weeping:

[كازانوفا]

بل 10000 ريال ليشششششششششش؟؟؟؟؟؟؟؟؟؟
كل هذا عشان نربح غصبا عنا المغاسل ههههههه

[Sharshooooor]

يعني مايصدرون تراخيص مغاسل ولا يبونا نغسل في البيت

عيل شنسوي :tease:

[patrol]

لا حول ولا قوة الا بالله
المشكله المفتشين يدوروون بيت القطري دواره عشان يعطونه المخالفه
في يوم كان في تسريب في الخزان في الليل وماكنت ادري عنه اكيد تسرب الماي للشارع يوم طلعت الصبح سكؤته واذا بالمخالفه على الباب 10000 ريال .
المصيبه ان في شخص غير قطري كل جمعه يغسل الرصيف اللي قدام بيته بالهووز والماي واصل لين اخر الشارع ولا احد يكلمه

[BURBERRY]

اخوي عادي غسل سيارتك في البيت و لكن لاتهدر الماي و تغسل الشارع :)

و بخصوص المكينه عادي تنباع في المحلات باحجام مختلفه و استخدمها من سنه

[سارا.]

اشوف انة قرار صايب لو الواحد بيغسل مرة في الاسبوع كان ممكن بس الي كل يوم مغسل سيارتة ومزعج الي حوالية بلماي الي مالي الشارع من اولة لين اخرة
اذا الواحد يبغي سيارتة تلمع ياخذ فوطة ويحط فيها ماء ويمسح سيارتة ماحد بقايل شي

[hamoor4ever]

اخوي لاتهدر الماي ودام ماراح يطلع بالشارع محد بيعرف شي والطريقه سهله

[CH Engineer]

لو يحطون سقف محدد للماء والكهرباء والكل يلتزم فيه ولايتعداه
واللي يزيد عن هالسقف يدفع فلوس..

يعني لكل مواطن كمية من الكهرباء والماء محدده كل شهر.. على حسب عدد افراد الاسرة
واللي يزيد عن هالكمية يدفع من جيبه

[ممنوع اللمس]

هههههههههههه قانون عجيب
يقولون في مخالفه جديده
اذا عطسـت من غير ماتقول الحمد لله حجز الخشم 6 شهور مع غرامه 10 الاف ريال

[Qtrstyle]

هههههههههههه قانون عجيب
يقولون في مخالفه جديده
اذا عطسـت من غير ماتقول الحمد لله حجز الخشم 6 شهور مع غرامه 10 الاف ريال


:tease:

[محمد11]

المفتشين رادين الصراحه ..

وانا مع المخالفه


القطريه مايدفع فلوس للماء

لكن المغسلة تدفع

وانا عند بيتنا كل يوم اشوف الهندي يغسل الفريج كامل والمفتشين راقدين

[ابوصالح1]

حط حاجزللماء وريح نفسك

[وهم قطر]

لو يحطون سقف محدد للماء والكهرباء والكل يلتزم فيه ولايتعداه
واللي يزيد عن هالسقف يدفع فلوس..

يعني لكل مواطن كمية من الكهرباء والماء محدده كل شهر.. على حسب عدد افراد الاسرة
واللي يزيد عن هالكمية يدفع من جيبه

معليش لله يخليك جالسين في غزه وشرايك يوزعون مطاطير 5 لتر اعتقد تكفي خلنا كذا احسن

الصراحه انا مع المخالفه وبشده لاني اشوف دريوليه ماسكين الهووز ويسولفون والماي واصل نهايه الشارع
ياخي بأمكانك تغسل السياره والماي خله في كلك (جرك) وأفرك بالشمليذر ( الفوطه)
وبخصوص الكهرباء لله يعين الي ليتات بيته مولعه لين الساعه 7 صباحا
يبيعون جهاز صغير كبر الكف على الطاقه الشمسيه من تطلع الشمس يطفي الكهربا الي على السور ومن يضلم الليل يشغل الكهربا هذا الي بيقهر المفتشين

[الـخـور]

مشكورين على الردود والمشاركات

صراحة انا ماقاهرني الا المبالغ الخيالية الي يحطونها للمخالفات

قطع الاشارة اقل شي 6000 ريال .. ياخي اذا عندي دريول وسهى او بالغلط شقح .. من وين يدفع 6 الاف ريال !!

والحين حطو مخالة الماي 10 الاف ..

ما استبعد بالسنوات الجاية نشوف مخالفة قيمتها مليون ريال

[مساهم عادي]

اتوقع انهم نزلوها الى الف ريال او حتى اقل

[qtr qtr]

الصراحه انا مع قانون المخالفه والاسبااب
هدر المياه لين يوصل للفريج الثاني
وتسبب الحفر فالشوارع ويقولون وين البلديه الشوارع كلها حفر وهم اللي بتسببينها لان الماي يضر الاسفلت
وبعدين الموضوع بسيط حط احواض زرع برع البيت وسوي فتحه للزرع على الاقل الماي ما يروح هدر
وللي عندهم شبكة الصرف الصحي كرمكم الله يسوي له صرف للشبكه ومكينة الغسيل جيده متصرف ماي وايد ثلاث ارباعها هوا والربع ماي وعطو الدريوليه والخدامات درس عن توفير الماي
والامور طيبه
والمخالفه 10000 ريال في حالة رفض المخالف دفعها تحول النيابه العامه على ما اظن
واعتقد ما تزيد عن 5000 ريال

[ANONYMOUS]

كل واحد يركب desalination unit في البيت وتنتهي المشكله

بس لازم يكون البيت قريب البحر

:)

[heavy duty q]

مالك الا تغسل بالاند ولا الستي

[مضاربه]

نزين بسالكم اذا عندنا حشيش برع البيت وخليت الدريول يغسل السياره في وسط الحشيش ممنوع والا مسموح