خـدر في الشـق الأيمـن..حـد يفيـدنا!!

[دانـة قطـر]

السلام عليكم ورحمة الله وبركاته

رفيجتي عندها مشكله صار لها أكثر من سنه وهي الخدر الدائم فالشق الأيمن وخصوصاً يدها اللي تحس بالخدر فيها أكثر وخمول وتعب فاليد كامله

بس متى تجيها؟ بعد نصف ساعه من النوم مع العلم أنها ما تنام عليها ويوميا على هالحال

ما قدرت افيدها شنو حالتها وخصوصاً أنه ما كان فيها شي من سنه

هل مشكلتها فالاعصاب مثلاً؟

وأي دكتور تراجع؟

ويعطيكم العافيه :)

[الـقـاسـي]

الله يشفيها ان شاء الله .. انا ماعندي خلفية والله لكن لاتهمل نفسها ..

[العقل الحر]

اكيد انها معصبه على حد او هي عصبيه

[دانـة قطـر]

الله يشفيها ان شاء الله .. انا ماعندي خلفية والله لكن لاتهمل نفسها ..

آمين
ويعطيك العافيه عالمرور الطيب :nice:

[دانـة قطـر]

اكيد انها معصبه على حد او هي عصبيه

:secret:

بس شدخل العصبيه في هالشي ياليت توضح :rolleyes2:

[خوي الدرب]

نتمنى لها الشفاء من الله

سيدتي الفاضلة

بلغي صاحبتكِ أن تتوجه إلى طبيب عظام يجري لها صور اكس ري عادية من كل الجوانب على العمود الفقري
فربما أن هنالك ضغط لبعض فقرات المعود الفقري العليا

[وهم قطر]

اخوي نفس الحاله بس في الكتف الايسر دائما متخدر طايحه يده وكله يتكي على الايمن
ويحس بحراره بعد في الجنب نفسه مادري من الي شار عليه يتحجم في الكتف الايسر من الخلف
وسبحان لله اول ليله نام ومن قومته الصبح كأن مافيه شي مع العلم تم فيه حول سبوعين او اكثر الخدر
وان شاء لله ماتشوف شر ولاتهمل عمرها

[حياة]

يمكن عندها احتكاك فير فقرت الرقبه خل تشيك على نفسها والاهم من هذا كله خلها ترقي نفسها وتتحجم واذا تبون رقم وحده يدها خفيفه واحجامتها زينه قولي لي وبرسله لج
وماتشوفون شر

[الأصيلة]

السلام عليكم ورحمة الله وبركاته

اختي دانة قطر

الحل عند دكتور الأعصاب وليس العظام
والمشكلة قد تكون في فقرات الرقبة

فممكن تروح العيادة المسائية( أسرع )
للدكتور / أسامة العلمي
أو د. سعدات
وإذا لقت موعد قريب تروح مبكر للعيادة من الساعة 5 مساء
وتدخل عليه وتخليه يوقع لها حتى تاخذ موعد في نفس اليوم...
لأن حتى العيادة المسائية تتأخر المواعيد

مع تمنياتنا لها بالشفاء العاجل

[moonبنتnight]

هذا يسمونه متلازمة النفق الرسغي (بالإنكليزية: carpal tunnel syndrome) هي انضغاط العصب المتوسط في النفق الرسغي والذي ينتج عنه اعتلال هذا العصب. يظهر كألم في الرسغ ومن ثم تنميل في الأصابع وضعف في عضلات اليد في الحالات الوخيمة.

يكثرفي النساء بين 29-60 سنة من العمر أكثر من الرجال

غالبية الحالات لا يعرف لها سبب محدد وواضح ولكن الأبحاث الحالية تشير إلى وجود علاقة بين المتلازمة و:

بعض أمراض الغدد الصماد (كخمول في الغدة الدرقية)
العوامل الوراثية
الضربات المتكررة للرسغ
الإفراط في استخدام الحاسوب لساعات طويلة نتيجة لانضغاط العصب المتوسط في النفق الرسغي مما ينتج عنه آلام وتنميل في الاصابع وضعف في عضلات اليد.
الاستخدام المفرط للرسغ
الكسور (مثل Colle's fracture)

هذه الحالة جاتني فترة وحمدالله راحت 00 طبعاً ما احب العمليات لانه بيضطر الدكتور يوسع على العصب المضغوط عليه 00 بصراحة ما فتكيت منه لا لما سويت رجيم وشوي تمارين 00 لاني ما حب الدكاترة 00

[بو خليفه 123]

ما شاء الله لحقتوا تشخصون الحاله ؟

يا أخت دانه الله يهديها رفيجتج صار لها اكثر من سنه تعاني من هالشيء و توها طالبه منج تكتبين في منتدى عشان تسألين دكتور ؟

انصحيها ان لا تتهاون مع هذي الحالات ربما تتطور الحاله و تصبح ...... لا سمح الله .

المهم , انا ماشاركت بالموضوع عشان الوم حد , و لكن من حرقة قلبي بسبب تهاون بعض الشباب والشابات في الأمور الصحيه .


كما تفضل الأخت الاصيله الدكتور اسامه العلمي او الدكتور عبدالمنعم محمد عبدالحكيم
ابتدوا بالتشخيص ثم الفحوصات قبل العلاج


ماتشوفون شر و خطاكم السوء

[يحفظك ربي]

ماتشوف شر ان شاء الله والله يشفيها

خل تروح تفحص لا تتاخر كثير وتطلع العواقب غير حميده !

[(الفيصل)]

نصيحتي للأخت أمرين
1- عمل (شيك أب) اي فحوصات شاملة في مستشفى الأهلي مثلاً ، وعلى ضوء النتائج تذهب للطبيب المختص لتشخيص الحالة واعطاء العلاج المناسب.

2- القيام بالرقية الشرعية ، فمثل هذه الأعراض قد أصابت من بهم عين أو حسد أو مس
والله أعلم

وماعليها بأس ان شاء الله

[جوال 11]

هنالك أحتمالين
أولا زيادة الكلسترول في الدم ، يستدعي عمل تحليل دم بعد صوم أكثر من عشر ساعات .
ثانيا الأعصاب وخاصة الرقبة والظهر ، فيه دكتور أسمه علي رضا في حمد رئيس قسم الأعصاب أو دكتور أفريقي أعتقد أسمه فرانسيس في حمد أيضا.
أتحدث عن تجارب والله يشفيها

[كركم]

ماشاء الله .. ياكثر الأطباء في الشبكة :victory:
وانا رأي الله يسلمج ان الخمول في الشق الأيمن من الجسم مسؤؤل عنه الشق الأيسر من الدماغ الأفضل انها تروح عند دكتور اعصاب...ووقولي لها كركم يقولج سلامات وما تشوفين شر :nice:

[(الفيصل)]

ماشاء الله .. ياكثر الأطباء في الشبكة :victory:
وانا رأي الله يسلمج ان الخمول في الشق الأيمن من الجسم مسؤؤل عنه الشق الأيسر من الدماغ الأفضل انها تروح عند دكتور اعصاب...ووقولي لها كركم يقولج سلامات وما تشوفين شر :nice:

الاخت لم تقل عالجوني !! بل طلبت إستشارة بما يمكن لها أن تفعل ولأي طبيب تذهب ، فبعض الناس (يصيبه إرباك) عند المشكلات أو أتخاذ القرارات ويحب أن يرجع للناس في كل صغيره وكبيره .

وأتفق معك أن البعض في (المنتدى) يقوم بدور (الأطباء) :shy:

[جوال 11]

يمكن يوجد أطباء في المنتدى ولكن البعض يعرض خبرته في مثل هذه الحالات وما مر به من أعراض مشابهه

[همس الورد]

انا اتصيدني هالحالة ومازلت أعاني منها ورحت حق دكتور للأعصاب طلب مني عمل أشعة للرقبة طلع عندي دسك في احدى الفقرات والحل علاج طبيعي اماالتنميل في كف اليدعلاجه عملية صغيره لتخفيف الضغط علعصب بس انا رفضت وعطاني فيتامينات اتساعدعلتخفيف التنميل تابعي عندأطباءمتخصصين في جراحة الأعصاب وجربي الابر الصينية عند د.مسعود نوري في مستشفى الشفاء الجديد وراح ايفيدج باذن الله وانااتعالج عنده من اربع سنوات واستفدت منه وايد.

[الاركان]

سلامات وماتشوف شر

ولاكن الاخت صارلها سنه تعاني ولافكرت تاخذ مواعيد وكشوفات
هذا اكبر غلط ولابد الواحد يتابع نفسه اول باول

[روح الاطلس]

نفس الحاله من كم يوم اليد اليمنى والساق اليمنى تنميل خفيف

لكن اتوقع من الافراط في استخدام الحاسب والجلسه الغلط


بالنسبة لصديقتج انصحيها تروح لطبيب عام في البداية بيسوي لها اشعه اكس على السريع وان لقى شي بيحولها على الاخصائي المناسب لحالتها

[بنت قطر33]

يمكن من الغده خلها تشيك

[نورالهدى]

ساعات نقص فيتامين b12
يسوي تنميل في الاطراف
في ابر وفيتامينات وايد زينه بس الرجوع للطبيب افضل

[khaleeji]

وخروا جاكم الطبيب خليجي

اولآ ماتشوفين شر انتي ورفيقتك

وثانيآ عمي صاده نفس الشيء والسبب دسك الفقره كانت تضغط على الاعصاب وترقد يده

[مرحوم قطر]

الله يكون في عونها

انا عندي واحد من ربعي من النوع الي لين يرقد ما يتحرك ابد

و رقد و المكيف يظرب ويها وهو ثابت و الهوا ثابت عليه

تصدقين وصلت ان انطبو وجها ابصيخ من حرارته صاير اسود ولا حس بشي

انطورق به في المجلس ولا يحس ابشي


و لحد الحين مانعرف وشهو الحل وهو تكيف على الوضع




اما اذا السالفه سالفة خدر او على مافهمت تنميل


حتى انا يصيدني هذا اعتقد من الاعصاب او شي يسمونه تشابك الاعصاب

انا عن نفسي تكيفت مع الموضوع بس انا يتم معي دقيقه ما يطول

و تحياتي لج

[الحره]

امي كان فيها جذي وراحت للأعصاب وسولها اشعه طلع فيها دسك في الرقبه

وفي وحده كانت ريولها كامله تنمل من بعد عمليه في البطن سوتها ولما راحت لدكتور الاعصاب وسولها ستي سكان طلع ان الجراح الي سوالها العمليه قطع لها عرج بالغلط

شتنطر رفيجتج خل تروح المستشفى ولو ماتعرف وين تروح تروح لدكتور عام وهو بيحولها يعني مب مسأله كبيره^_^

بعدين بتخلين ناس يصدقون انهم دكاتره ههههه

[toomi9]

الله يشفيها ان شاء الله

[£عبدالعزيز£]

عضوة تسال عن دكتور جيد لعلاج حالة معينة

مافيها شي عادي

..

بس لو كل واحد صار فيها استشاري هني تصير كارثة الصراحة :telephone:


هذا يسمونه متلازمة النفق الرسغي (بالإنكليزية: Carpal tunnel syndrome) هي انضغاط العصب المتوسط في النفق الرسغي والذي ينتج عنه اعتلال هذا العصب. يظهر كألم في الرسغ ومن ثم تنميل في الأصابع وضعف في عضلات اليد في الحالات الوخيمة.

الله يهداج اختي بس على كيفج شخصتي الحالة ؟

مع احترامي لج شالمؤهلات اللي عندج عشان تردين هالرد ؟

حتى اكبر الدكاترة ما يشخصون الحالة من مجرد الوصف

مثلا : مب كل واحد راسه يعوره ياخذ حبتين بندول ويروح الصداع :telephone:

..

فالنهاية ما اقول الا الله يشفي المريضة

ولازم تروح لاستشاري خاص بمثل هالحالات باسرع وقت

وما عليها شر باذن الله

اسال الله العظيم رب العرش العظيم ان يشفيها
اسال الله العظيم رب العرش العظيم ان يشفيها
اسال الله العظيم رب العرش العظيم ان يشفيها
اسال الله العظيم رب العرش العظيم ان يشفيها
اسال الله العظيم رب العرش العظيم ان يشفيها
اسال الله العظيم رب العرش العظيم ان يشفيها
اسال الله العظيم رب العرش العظيم ان يشفيها

[باسكن روبنز]

قوليلها تو الناس عقب سنه ونص توها حست؟ ،
صج سوووووودااانيه رفيجتج ،:(

ماتشوف شر ،
وترا أعراض هالشي شفته في واحد من الربع وأمممم مابي أخرعكم بس أعتقد من أعراض الجلطه بعيد الشر ،






خل تتلاحق وماعليها شر بأذن الله دامه ببدايته ، :)