بخصوص استمرار مخالفات الحزام ... إلى متى يا إدارة المرور ؟

[بـن عدوان]

السلام عليكم ورحمة الله وبركاته ...

شخباركم ان شاءالله طيبين .. ؟

يالغاليين كنت في الكورنيش، صوب راس الشوعه، ركبت السيارة وقلت بس شويات وأركب الحزام.

طلعت ع الشارع ووصلت الدوار الا أفراد الشرطة واقفين، واحد منهم قالي وقف، كتب رقم الموتر وعطاني الاستيكر وقالي امش !!!! :omg:

سؤال موجه لكم : ليش مايعتبر الحزام ضمن الحرية الشخصية .. ؟

انا داخل موتري، وشي راجع لي اذا بحط الحزام أو لا، اللي بيتأذى انا ومب أحد غيري !!

ولا إدارة المرور خايفين على سلامتنا .. ؟ !!!!!!

اوكي الردارات المخفية قلنا مشيناها وقلنا ماعليه، لانه الواحد يسرع ويمكن يدعم أحد غيره ( هني الغير بيتأذى ).




آآآرآآآئكم ..

[الحزين4800]

انا معاك

واتمنى الحزام يكون حريه شخصيه

[Realistic]

وتكون المخدرات بعد حريه شخصيه .. ويكون الخمر حريه شخصيه .. وتكون الافلان الاباحيه حريه شخصيه .. وتكون العلاقات المحرمه حريه شخصيه .. وتكون وتكون وتكون .. الخ :tease:

اخوي القانون موضوع لمصلحتك ومصلحة غيرك ..

الدوله من وظايفها انها تحمي مواطنينها.. والحزام وسيله من وسائل الحمايه ..

القانون واضح في هالمسأله .. لازم تربط حزامك قبل تحرك المركبه ..


صدقني.. هالقانون مانحط الا لسلامتك وسلامتي وسلامة باقي الناس ..

و الله يعوض عليك في فلوس المخالفه :)

[بـن عدوان]

الدوله من وظايفها انها تحمي مواطنينها..


صدقني.. هالقانون مانحط الا لسلامتك وسلامتي وسلامة باقي الناس ..





طويل العمر ..

سؤال بس: هل الخمر في الوقت الحالي ممنوع ولا لا .. ؟

[ســـهم]

صدقني هذا الشرطي جدا محترم

تعرف ليش

لان بعض المخالفات ياخذون رقم سيارتك وانت ماشي في حالك وماعندك خبر

وفي الاخير تلقى مخالفه

قبل 15 يوم مسدد لهم 4300 مخالفات مشكله وللأسف كلها لم تكن فوريه !

يعني اقصد مافيها استلم ايصال المخالفه

شي حزام امان

وشي تلفون

وشي رادار


!!

ياليتهم وقفوني مثلك كنت بتفاهم وياهم ويمكن اكسر خاطرهم ويمكن يدفعون المخالفه عني :(


الخلاصه دفعت لهم من بداية 2010

11 الف وشوي :(

وكلها حق دارفور !

[Realistic]

طويل العمر ..

سؤال بس: هل الخمر في الوقت الحالي ممنوع ولا لا .. ؟


على حسب علمي .. لا .. مب ممنوع .. بس في اماكن معينه مثل الفنادق ..

بس صدقني اخوي ماله علاقه .. الحزام شي .. والخمر شي ثاني ..

هل عدم منع الخمر يعني ان الدوله ماتضع قوانين صارمه على حزام الامان ؟


ياخوي لا سمح الله اول ماطلعت للشارع وقبل ماتربط الحزام دعمتك سياره .. وكانت الدعمه جامده ..
طبعا كلنا نعرف ان الاعمار بيد الله .. لكن بعد الانسان عليه اتخاذ اسباب السلامه والحذر

عدل كلامي وله انا غلطان ؟

و الله يحفظ الجميع ..

[ســـهم]

على حسب علمي .. لا .. مب ممنوع .. بس في اماكن معينه مثل الفنادق ..

بس صدقني اخوي ماله علاقه .. الحزام شي .. والخمر شي ثاني ..

هل عدم منع الخمر يعني ان الدوله ماتضع قوانين صارمه على حزام الامان ؟


ياخوي لا سمح الله اول ماطلعت للشارع وقبل ماتربط الحزام دعمتك سياره .. وكانت الدعمه جامده ..
طبعا كلنا نعرف ان الاعمار بيد الله .. لكن بعد الانسان عليه اتخاذ اسباب السلامه والحذر

عدل كلامي وله انا غلطان ؟

و الله يحفظ الجميع ..

اخي الكريم

حزام الأمان له ايجابيات

لكن

ايضا له سلبيات

هل تعلم ان هناك من الشباب بسبب حزام الأمان توفى بسيارته بالاحتراق

في حوادث الأنقلاب ترمي السياره بركابها خارجا ولكن بحزام الأمان لاترمي بهم

لذلك يحترق بعض الشباب في سياراتهم بسبب تسرب البترول

وقد حدث هذا الأمر كثيرا .

[رجل الجزيرة]

طيب تذكرون أظنه ولد العمادي - الله يرحمه - إلا مطلع نفسه من فتحة الجي وهو يستعرض وإلا إنقلب عليه الجي ومات في الحال، لو إنه كان قاعد ولابس حزام الأمان كان هو عايش الحين إذا الله سبحانه وتعالى كتب له الحياة.

[ســـهم]

طيب تذكرون أظنه ولد العمادي - الله يرحمه - إلا مطلع نفسه من فتحة الجي وهو يستعرض وإلا إنقلب عليه الجي ومات في الحال، لو إنه كان قاعد ولابس حزام الأمان كان هو عايش الحين إذا الله سبحانه وتعالى كتب له الحياة.


فسر لي شلون يطلع من الفتحه ويكون رابط حزام

لو رابط حبل باخرات مايفيده وهو طالع من الفتحه !

حزام الأمان لايمكنه الخروج لذلك هذه الحاله اسثنائيه لانها " أستعراض "


وليست سياقه عاديه .

[بـن عدوان]

ياخوي لا سمح الله اول ماطلعت للشارع وقبل ماتربط الحزام دعمتك سياره .. وكانت الدعمه جامده ..
طبعا كلنا نعرف ان الاعمار بيد الله .. لكن بعد الانسان عليه اتخاذ اسباب السلامه والحذر



صحيح، انا اللي اتخذ اجراء السلامة، بس مو أحد يجبرني على اتخاذها ويدفعني فلوس ااذا ماخذتها ..

و بما انه الخمر مصرح فيه، محد فكر انه اللي يشرب ممكن يطلع في الشارع ويدعم خلق الله .. ؟

ياما صاارت وكثييييييير !!

ليش مامنعوا الخمر ااذا السلامة لها خص بالسالفة .... ؟

[رجل الجزيرة]

فسر لي شلون يطلع من الفتحه ويكون رابط حزام

لو رابط حبل باخرات مايفيده وهو طالع من الفتحه !

حزام الأمان لايمكنه الخروج لذلك هذه الحاله اسثنائيه لانها " أستعراض "


وليست سياقه عاديه .

طيب لو إنه جالس ولابس حزام الإمان ماصار إلي صار له، الحين الصورة واضحة.

[حبر سري]

س : الى متى ياادارة المرور؟
ج : الى ان تربط الحزام

[ســـهم]

طيب لو إنه جالس ولابس حزام الإمان ماصار إلي صار له، الحين الصورة واضحة.

لا

ممكن يكون في غيبوبه وتحترق السياره بسبب تسرب البترول

بالعربي له ايجابيات وله سلبيات

اخوي العام كان بالقرب من سياره كويتيه منقلبه وتحترق بسبب تسرب البترول وفيها اثنان

الله يرحمهم وبسبب حزام الأمان الذي أنغلق عليهم لم يستطيعوا الخروج من السياره

وقد اصبحو رماد ..

لذلك الحزام من وجهة نظري يكون اختياريا وليس اجباريا لجلب المزيد من بنود المخالفات

ومن ثم الايرادات لأدارة المرور

والقهر انه تصلك مخالفه بعد شهر او شهرين انك لم ترتدي الحزام اثناء مرورك بالكورنيش

بتاريخ 21 _ 3 _ 1834
يعني الحين متى تتذكر علشان يكون لك حجه

هنا الثغره

( ايضا )

" اي "


انني فرضا رجل مرور ولدي معك ثأر قديم ولدي السلطه

فسوف اقوم بمخالفتك كل شهرين او سنه بهذه المخالفه بدون علمك

ولن تنكر ذلك لانك لن تعرف أين كنت في ذلك الوقت


( ايضا )

و

" اي "

انه المفروض ان تكون المخالفه فوريه لكي يكون بمقدورك ان تحاجج او تقتنع بمخالفتك

وتصبح على خير اخي الكريم ..

[ANONYMOUS]

الحزام اجباري لسلامة الافراد

وعشان ماتخسر الوف مؤلفه على الانفاق في العلاجات ---> هاي استنتاجي :)

اهنيه بتضطر الحكومه بدفع تكاليف علاج شخص لايلتزم بالقوانين ولا يعمل للدوله اي اعتبار

او بتضطر العائله الاقتراض على العلاج.. وبتطيح في الديون .. وبتكثر الشكاوي

الله يعز الحكومه اللي تعرف مصلحة الناس والناس ماتعرف مصلحتها

[جنوب الدوحه]

حزام الامان مفيد جدا يا الغالي .. اربطه وخلاص لسلامتك وسلامت هلك :)

اسال مجرب ترا حزام الامان مهم جدا .. تخيل لا قدر الله .. ان الله قدر ويصدمك حد من جانب السياره وانت على الدوار وما تكون منتبه في حاله انقلاب السياره تكون ثابت .. وفي حالات كثيره

لا تاخذ القانون انه غصب عنك .. خذه بنظره ثانيه هي سلامتك في المقام الاول .. :)

[bo_hamad]

زين انهم عطوك الاستيكر من يومين على اشارات المطار الشرطي واقف خلف الاشارة مثل الرادار وما يعطيك الاستيكر بس يالس يسجل الارقام بكل سرعه وانا سمعت انه اي شرطي ما يخالفك الا بعد اعطاءك الاستيكر ؟

[بوالفاروق]

اجراء روتيني كل سنة على شهر 4 و 5 .. تكثيف الدوريات :rolleyes2:

صكوني مخالفة رادار متحرك :weeping:

.
.
.

هالحزام والله يضايقني وخاصاً اني متين حبتين :shy:

بس حزات افكر .. اقول لا قدر الله كنت سرحان وجا واحد اهبل مب منتبه من وراي

شلون بيكون الوضع !!! فاستخدام الحزام :secret:

الله يحفظنا من كل شر

[مستثمر 999]

وتكون المخدرات بعد حريه شخصيه .. ويكون الخمر حريه شخصيه .. وتكون الافلان الاباحيه حريه شخصيه .. وتكون العلاقات المحرمه حريه شخصيه .. وتكون وتكون وتكون .. الخ :tease:

اخوي القانون موضوع لمصلحتك ومصلحة غيرك ..

الدوله من وظايفها انها تحمي مواطنينها.. والحزام وسيله من وسائل الحمايه ..

القانون واضح في هالمسأله .. لازم تربط حزامك قبل تحرك المركبه ..


صدقني.. هالقانون مانحط الا لسلامتك وسلامتي وسلامة باقي الناس ..

و الله يعوض عليك في فلوس المخالفه :)



ايش فايدة الجزام اذا لف عليك واحد وانت في الدوار او طالع من شارع فرعي

والدعمة جات من الجنب سواء من صوب السايق او العبري او الناس الي ورا


قبل الحزام لازم يفكرون في اشياء اهم من القانون

مثال

البارحه عند دوار الشيراتون مرت عليهم سياره عليها عازل 100% لدرجة ان الشرطي وقف
السياره وطلب من السايق ينزل الدرايش عشان يشوف الحزام وفعلا شاف الحزام وبس وعداها

سألته ازين المخفي مب ممنوع قال انا عندي اوامر اخالف على الحزام فقط

[رذاذ]

والله نفسك امس كنت ماار ع طريق الكرنيش الساعه ثلاث ونص

توني طالع من الدوام الا اشوف الشرطي يطالعني الين ما قربت ويكتب رقم الموتر .. جيت بكلمه الا يقول خلك بالموتر واصبر شوي .

الا كتب مخالفه حزام آمان ولا عطاني فرصه اتكلم همه يخلص الدفتر .

عطاني المخالفه وفوق هذا قلت له زين ليش توني طالع من الدوام وما خذت خط طويل ..
والا تكلم معي قالي حرررك ..

[@north_star@]

انا اشوف انه الحزام في داخل المدن والطرق الداخليه مب مهم لانه ما في هالسرعات خاصه بالزحمات الواحد كم بيمشي أما على الطرق السريعه فهو مهم وتقبل مروري

[مستثمر 999]

وانا اضم صوتي لصوتك اخوي

وللعلم والله لو نتضامن ونرفع قضيه على المرور نكسبها لان الطريقه غلط وخاصه عند الاشارات الي بشارع الوعب ... لان حسب اللوائح والقوانين لا يجوز مخالفة اي شخص والسياره واقفه والاشاره حمراء

الواحد ممكن حتى ينزل من السياره ولكن بسبب جهل رجال المرور او قلة الجامعيين المتخصصين

بأي حق تخالف الناس وتسحب سياراتهم وتحجزها بسبب المخفي والسيارات الخليجيه تسرح وتمرح

يعني التحشش او الفساد او اي كان السبب حلال عليهم وحرام علينا

[برشلوني قطر]

ايش فايدة الجزام اذا لف عليك واحد وانت في الدوار او طالع من شارع فرعي

والدعمة جات من الجنب سواء من صوب السايق او العبري او الناس الي ورا


قبل الحزام لازم يفكرون في اشياء اهم من القانون

مثال

البارحه عند دوار الشيراتون مرت عليهم سياره عليها عازل 100% لدرجة ان الشرطي وقف
السياره وطلب من السايق ينزل الدرايش عشان يشوف الحزام وفعلا شاف الحزام وبس وعداها

سألته ازين المخفي مب ممنوع قال انا عندي اوامر اخالف على الحزام فقط


والله شي..

ماشاءالله عليهم ذي الايام منتشرين ف كل داعوس..شسااالفه هل اسبوع المرور الحين ؟؟:rolleyes2:

امس كذا مكان شفتهم واقفين...واليوم الصبح اشوفه عند دوار القوس توه نازل من السياره

بدفتره ويتثاوب...شكله يصخن...وانا عند الدوار بس مادري شجل رقم موتري والا لا :(

[بـن عدوان]

وعشان ماتخسر الوف مؤلفه على الانفاق في العلاجات ---> هاي استنتاجي :)

اهنيه بتضطر الحكومه بدفع تكاليف علاج شخص لايلتزم بالقوانين ولا يعمل للدوله اي اعتبار

او بتضطر العائله الاقتراض على العلاج.. وبتطيح في الديون .. وبتكثر الشكاوي



اخوي ترى في اشياء ثانية مب ممنوعه وهي مضرة بالصحة، ليش ما امنعوها .. ؟

يمكن بتقول كلامي ماله خص، بس حبيت أرويك انه في تناقض !!

والمسألة مادية بحتة !!

[بـن عدوان]

اليوم كنت في مستشفى حمد الصبح، جفت دورية صوب المواقف ..

المهم في بنتلي صاف نزل الشرطي وجاف الموتر ومشى، قلت خلني أتاكد انا، نزلت وجفت انه الموتر مافيه استيكر مخالفة ولا استيكر معاقين، الشرطي جدم وجاف موتر عادي صاف عالرصيف صكاه مخالفة على طول.

وشوي مشى جدام الا في لكزس فوريل رقم سبشل صاف غلط، مشى وما خالف !!

ليش بعض الناس مرفوع عنهم القلم ... ؟

لين متى هالنظام بيستمر ..؟

[تحداني]

.. أنا مع الحزام وبشده ..
مهما كانت التبريرات والاعذار لا يمنع ذلك من ارتداءه ..
فهو في النهايه في مصلحه السائق ..
.
.


هذا الشرطي وايد زين :) .. اقصد وايد طيب ..
لو واحد ثاني كان عطاك ولا قال لك ..


مثل بعض الناس .. ادخلوا مواقف المول عطوهم مخالفه ..
اطلعو من مواقف المول عطوهم مخالفه ..
والسبب ثواني تفصل بين تحريك السياره وربط حزام الامان ..




جملك الله برضى الرحمن

[ANONYMOUS]

اخوي ترى في اشياء ثانية مب ممنوعه وهي مضرة بالصحة، ليش ما امنعوها .. ؟

يمكن بتقول كلامي ماله خص، بس حبيت أرويك انه في تناقض !!

والمسألة مادية بحتة !!


لا أستطيع ان افيدك اب هالخصوص

ولكن معروف عالميا ان الحزام ضروري وتتخالف عليه

يمكن بعض الدول لاتتشدد فيه

ولكن في الدول المتقدمه ومش عارف ايش على ماقال داوود حسين

ربط الحزام اجباري وتتخالف على تركه

خلونا نكون من الدول المتقدمه بارك الله فيكم

[قطر501]

انا اتوقع ان رواتب افراد الداخلية من مخالفاتنا انا اشوف المخالفات تكثر اول الشهر واخره خخخخخخخ

[QaTaR_OnE]

اللي يقهر صج المخالفه في الاسواق والمجمعات .. تحصل دوريه واقفه وتخالف على الحزام

ابي اعرف الواحد كم يقدر يمشي في مواقف الاسواق والمجمعات ؟؟؟ بيطوف 40 مثلاً ؟؟

والخطوط الخارجيه السريعه ماتلقى فيها ولا دوريه .. مادري شهالتناقض اللي عندهم

[كاتم الاسرار]

اللي يقهر صج المخالفه في الاسواق والمجمعات .. تحصل دوريه واقفه وتخالف على الحزام

ابي اعرف الواحد كم يقدر يمشي في مواقف الاسواق والمجمعات ؟؟؟ بيطوف 40 مثلاً ؟؟

والخطوط الخارجيه السريعه ماتلقى فيها ولا دوريه .. مادري شهالتناقض اللي عندهم

يعطيك العافيه يا راعي الموضوع

اما يالغالي انت صدقت في كلامك احنا ما قلنا يخففوون المخالفه بس اتكون مش في فرجان او في الاسواق اتكون في الشوارع الرئيسيه والخطوط الخارجيه على قلولتك ولا قطو بس قاعدين لنا في الشوارع الداخليه والي متخشش بين الاشارات يتحبل اشدعوه لهدرجه اوصلت والمشكله انا اتحدى اي واحد يقولي ان القطري الي يخالف اكثرهم اعتقد الكل يعرف من هم ومن اشكالهم قاعدين لنا احنا بضبط اتقول عداوه علينا الله يعز قطر ويحفظها ويحفظ بومشعل وين اووووووووووووووول ربعنا ماشاءالله عليهم راحوا

ومخليييييييييييييييييييييييييييييييييييييين الشاحنات في حالهم خاطري مره اشوووووووووووف دوريه في الصناعيه او بوهامور ولا مره شفتهم والمشكله يفتشوووون العصر خلهم يفتشوووون الظهر واليوم اقسم بالله الساعه 4 العصر شفت حادث شنيع شاحنه داخله في منبر المسجد والله والحادث يخرع الله يحفظ السائق الله يستر منهم والي قريب في شارع الريان جنب البحث والادله يشووف بعييينه

الله كريم

[بو شاهين]

على حسب علمي .. لا .. مب ممنوع .. بس في اماكن معينه مثل الفنادق ..

بس صدقني اخوي ماله علاقه .. الحزام شي .. والخمر شي ثاني ..

هل عدم منع الخمر يعني ان الدوله ماتضع قوانين صارمه على حزام الامان ؟


ياخوي لا سمح الله اول ماطلعت للشارع وقبل ماتربط الحزام دعمتك سياره .. وكانت الدعمه جامده ..
طبعا كلنا نعرف ان الاعمار بيد الله .. لكن بعد الانسان عليه اتخاذ اسباب السلامه والحذر

عدل كلامي وله انا غلطان ؟

و الله يحفظ الجميع ..

شلون ماله علاقة يعني شرع الله معليه نتغاضى عنه وقانون الانسان لازم نمشي عليه
الا اخوي هم ماكالوا اربطوحزام ولا بنخالفكم الاعلشان الفلوس وازيدك من الشعر بيت روح وقف جدام ادراة المرور وشوف الشرطة وهم داشين وطالعين اكثر من نصهم مب رابطين حزام والي داش بسيارة وتلفونه على خده والي يسالف في البي بي بس ما يتخالف لان ربعة ما بيخافونه
وانا اخبر السنة الي طافت كن اغير في محطات الرادو عطوني مخالفة انشغال بجهاز الكتروني اثناء القيادة يلا مب بطة جبد

[لوسيل]

الموضوع بكبره موضوع سحب الفلوس من مخابينا

أغلب الدول الحزام يكون في الطرق السريعة الخارجية فقط أما داخل المدن ماظن له داعي

وموضوع ثاني قاهرني ألا وهو موضوع النقاط وسحب الليسن :(

ليسني مسحوب الحين من اسبوعين بسبة النقاط ... مجمعين لي نقاط سنتين وصاروا 14 نقطة .. يعني الحين بذمتكم مب سايق الموتر إذا الرخصة أنسحبت ؟؟؟ أركب كروة ولا الباص عشان اقضي مشاويري واروح دوامي .... وإذا صادوني السالفة فيها مخالفة وحجز موتر ويقولون سجن بعد :)

شاسوي الحين يعني ... 3 شهور من غير ليسن أيش هالقانون

[حليتان*]

انت لما تكون مركب الحزام تكون نسبة اصابتك اقل من لما تكون ما مركبه

وفي ناس واايد الحمد لله الحزام من بعد الله حماهم


والسيارات الجديد الايرباق مايشتغل اذا الحزام مش مركب <<<بعيد الشر


الزبدة ...انت لما ماتركب الحزام ممكن اذا صار حاث بسيط تطير وتطلع برع السيارة واتظرب في القزاز

وبعدين بتترقد في المستشفى وبتستقل سرير غيرك احوج له ...

اتمنى عرفت اشرح لك ...لاني ماعرف اشرح عدل :)

[بدون]

أأيد كل اللي دافعوا عن أهمية الحزام ... لأن الأسباب صحيحة و هو المقصود منه الحفاظ على سلامة الركاب في السيارة لحمايتهم من الارتطام بقوة في حال حصول حادث لا قدر الله.
لكن عندي نقطتين أبغي أتسائل عنهم: :discuss:
الأولى: لماذا تكون هناك أوامر بمراقبة الالتزام بحزام الأمان في المواقف، و صارت لي في مواقف مركز المعارض،، السيارات يالله يالله تحبي و الشرطي جاي يقول ليش مب حاط حزام بس الله يجزيه خير ما خالفني لما قلت له السيارات تقريبا واقفة ما تمشي ،،و خلاني وراح .
النقطة الثانية: موجهة للاخت رياليستك: شلون الخمر (شي ثاني). لعلمج اختي أن معظم اللي يشريون هالسم الهاري يطلعون من الفنادق و البارات و يسوقون سيارات !! يعني (درايفينج أندر ذا إنفلونس)و هذا في البلدان المتقدمة فيها عقوبات صارمة جدا جدا، فكيف ممكن تقارنين بين الشيئين.:eek5:
أنا أسوق و ملتزم بالسرعات المحددة في الشارع، و ما أحب ألف على الناس أو أسوي حركات يهال، بس الحزام بعض الأحيان يضايقني،،،
فهل سواقتي أنا بدون حزام أمان تعتبر أكثر خطرا من اللي يسوق و هو شارب أو تتساوى مع الجرائم الأخرى اللي ذكرتيها.:omg: أعتقد إنج خلطتي الأوراق واااايد .

نرجو من إدارة المرور تحديد الأماكن التي يكون فيها الحزام أكثر أهمية من مواقف المجمعات و ما شابهها و توجه رجال الشرطة لمراقبتها من أجل الحفاظ على أرواح الناس و لرفع الإحساس بالظلم عنهم.و شكرا:)

[Qtrstyle]

وتكون المخدرات بعد حريه شخصيه .. ويكون الخمر حريه شخصيه .. وتكون الافلان الاباحيه حريه شخصيه .. وتكون العلاقات المحرمه حريه شخصيه .. وتكون وتكون وتكون .. الخ :tease:

اخوي القانون موضوع لمصلحتك ومصلحة غيرك ..

الدوله من وظايفها انها تحمي مواطنينها.. والحزام وسيله من وسائل الحمايه ..

القانون واضح في هالمسأله .. لازم تربط حزامك قبل تحرك المركبه ..


صدقني.. هالقانون مانحط الا لسلامتك وسلامتي وسلامة باقي الناس ..

و الله يعوض عليك في فلوس المخالفه :)



:nice: حلووووه كثر منها أقول !؟! الحين الحزااام صار يتقااارن بالخمر والمخدرات؟ ههههههههههههه
ولا بس تحاول تقص على عمرك مثلا؟

[Qtrstyle]

والله لو عذرناااهم وقلنا يبون مصلحتنا وسلااامتنا (( مع اني اشك انهم يبون شي ثاني p=)

مخالفه الحزام على الشارع الريئسي بنمشيها !
في الشوارع الفرعيه .. وبنقول ماعليه !! يبون سلامتنا !

في مواقف اللاندمارك؟ والستي سنتر ؟!

سخافه ؟!

[إنسان عادي]

الصراحة نعم ماعندهم سالفة

[الدوحي7]

الموضوع بكبره موضوع سحب الفلوس من مخابينا

أغلب الدول الحزام يكون في الطرق السريعة الخارجية فقط أما داخل المدن ماظن له داعي

وموضوع ثاني قاهرني ألا وهو موضوع النقاط وسحب الليسن :(

ليسني مسحوب الحين من اسبوعين بسبة النقاط ... مجمعين لي نقاط سنتين وصاروا 14 نقطة .. يعني الحين بذمتكم مب سايق الموتر إذا الرخصة أنسحبت ؟؟؟ أركب كروة ولا الباص عشان اقضي مشاويري واروح دوامي .... وإذا صادوني السالفة فيها مخالفة وحجز موتر ويقولون سجن بعد :)

شاسوي الحين يعني ... 3 شهور من غير ليسن أيش هالقانون

حسبي الله ونعم الوكيل الله يعينك اخوى على هذه البلوه الضاره بناس ولحد يتكلم ولحد يقول،،

[راعي ال VXR]

انا امس رايح لقيت واحد واقف على الدوار لابس له جاكت اخضر نفس الشرطه اللي فيه عاكس ابيض واسسسسسحب ع الحزام بقوووه اول ما اقرب صوبه ولا طلع هندي مال البلديه .....

[بووليد11]

واللي كان راقد فسابع نومه وقام لقا رسالة من مطراش تقول عليك مخالفة حزااام !!!
ليكون كنت أحلم اني أسوق بدون حزام وصادوني ...

القانون مادي بحت ولا فيه ثنتين

[الدوحي7]

واللي كان راقد فسابع نومه وقام لقا رسالة من مطراش تقول عليك مخالفة حزااام !!!
ليكون كنت أحلم اني أسوق بدون حزام وصادوني ...

القانون مادي بحت ولا فيه ثنتين

الحمد لله تيلفوني مقطوع ولا كان سمعت على مخالفه هههه،اخرتها بيجون البيت يطقون علينا عليك مخالفه ههههه،،زين اربط لحزام وانت راقد ههههه،

[بـن عدوان]

والله لو عذرناااهم وقلنا يبون مصلحتنا وسلااامتنا (( مع اني اشك انهم يبون شي ثاني p=)

مخالفه الحزام على الشارع الريئسي بنمشيها !
في الشوارع الفرعيه .. وبنقول ماعليه !! يبون سلامتنا !

في مواقف اللاندمارك؟ والستي سنتر ؟!

سخافه ؟!


هاي ويهي يبون سلامتنا !!!!!

اخواني احنا لازم نسوي كتاب ونقدمه بخصوص الحزام

يخلونه في الشوارع السريعه، ماله داعي في الفريج او في الاماكن العامة !!!!!!!

[الدوحي7]

هاي ويهي يبون سلامتنا !!!!!

اخواني احنا لازم نسوي كتاب ونقدمه بخصوص الحزام

يخلونه في الشوارع السريعه، ماله داعي في الفريج او في الاماكن العامة !!!!!!!

اي يدرون عنك،، الخرجي عزايم وذباح وراتب ولايدري عنك والعساكر كل واحد راتبه وين واي مخالفه محذوفه قبل لاتدخل الكمبيوتر والموضوع سهلات عندهم ،،ومجلس الشورى مايهمه ال ناس عندهم فلوس والحياه ماشيه ،،يعني انت مب مهم 500 او 1000 او 2000الف عادي، ليكون انت على بالك في دوله تسمع مواطنيهاا ،تدفع وتسكت،، معا احترامي لك اخوي،،

[بـن عدوان]

اي يدرون عنك،، الخرجي عزايم وذباح وراتب ولايدري عنك والعساكر كل واحد راتبه وين واي مخالفه محذوفه قبل لاتدخل الكمبيوتر والموضوع سهلات عندهم ،،ومجلس الشورى مايهمه ال ناس عندهم فلوس والحياه ماشيه ،،يعني انت مب مهم 500 او 1000 او 2000الف عادي، ليكون انت على بالك في دوله تسمع مواطنيهاا ،تدفع وتسكت،، معا احترامي لك اخوي،،


ياخوي انا مافهمت ردكــ

ممكن توضيح

[الدوحي7]

ياخوي انا مافهمت ردكــ

ممكن توضيح

ان شاء الله بدور لك مترجم يترجم لغتي الانجليزيه ويحولها من اللغه العربيه الى اللغه العربيه القطريه ،،

[M!$s ĀŁ!eN]

احب اعقب على الموضوع الحريه الشخصيه ..
لا ياا خوي الغالي مهب حريه شخصيه دام ف الشارع ..
لان ربط الحزام مجبور انك اتسويه
والله اهم حاظين 500 هذا بسيط لو يحطونها مليون احسن
عشان امثالك من المتهورين ما يتطاولون على القوانين
اهم لما حطوما هب عبث ولا لعب ..
لاجل سلامتك ياا الطيب ..
يعني لا سمح الله بعيد الشر عنك .. صااار لك حااادث .. الاحزام اهو اللي بخفف الاضرار عليك
لو ما تبي تربط خلي جيبك حساب مفتوح لمخالفات .. الحزام


اذا ما تخاااف على نفسك فكر في امك ابوك وخواتك واخوان اللي ينطورونك
ف البيت ترجع لهم .. لو متاخر بس اهم يبونك معاهم
هب تقول حريه شخصيه .. مااادري شنوو
عيب عليك انت انسان كبير وعاااقل هب تقول الكلام اللي تقوله
ماتبي تربط ادفع .. غرامه ..

[بـن عدوان]

عشان امثالك من المتهورين ما يتطاولون على القوانين




:eek5:

:eek5:

بخصوص .. !!

ليش جايفة اني متطاول على القوانين ؟ ولا أسرع .. ؟

الحمدلله والشكر بس :rolleyes2:



عيب عليك انت انسان كبير وعاااقل هب تقول الكلام اللي تقوله


وين العيب في السالفة :rolleyes2:

[بـن عدوان]

ان شاء الله بدور لك مترجم يترجم لغتي الانجليزيه ويحولها من اللغه العربيه الى اللغه العربيه القطريه ،،


خلاص يايبه ماله داعي المترجم ، فهمتك :nice:

بس اللي يقهر انه العزايم والذبايح من مخالفاتنا :weeping:

[qtr.wolf]

مشكووور عالموضوع

الحزام اذا صار حريه شخصيه الداخليه راح تخسر و تفقد مصدر دخل لها

مثلا انا عند اشارات رمادا اسولف مع اللي معاي الا شوي طلع لي شرطي قال لي اربط الحزام وراح عقب ماراح فتح الحزام استغربت منه الشرطي تدرون ليش لان طلع هنـــدي لو انه قطري عالطول مخالفه و كيفك ..