اللي له في أســـواق البحـــرين ,,, يتفضل ،،،

[لمعة الالماس]

السلام عليكم ورحمة الله وبركاته


ابي اعرف اماكن ومحلات حلوة بالبحرين حق العبايات الكشخه ..

دوم نشوف معارض حلوة في قطر حق العبايات اللي من البحرين

وانا قلت لين رحت البحرين باخذ لي من عندهم

بس ما ادل

بغيت تدلوني على محلات راقية وبنفس الوقت تكون اسعارها مناسبة مب مبالغ فيها مثل الاسعار في الدوحة

وتسلموووون

[كازانوفا]

ان شالله رواد المنتدى يفيدونك ويفيدوني معاكي بالمره ههه:)

[doha70999]

up upppp

[لمعة الالماس]

تسلموون

وان شاء الله يجي حد ويفيدنا :)

[بنت^البحرين1]

لمعة الماس هلا بج وبباقي الخوات

عندج عبايات دار نجد في الرفاع، ذي انا اسوي عندها وعلى طول كله قطريات يفصلون عندها اسعارها عندنا فالبحرين وايد غالية بس بالنسبة لكم رخيصة، وتوها رادة " حسب كلامها" من قطر عارضة عبيها فالفورسيزون
.. انا افصل عندها وعلى فكرة لو بتدخلين بتلقين المحل كله الوان في الوان .. انا اختار العباية واقولها تفصلها على تطريز اسود باسود .. وانتي طبعا كيفج حسب ماتختارين هي تسوي.. وتطرش بعد لو حبيتي توصلها لج لي قطر
عندج عبايات زمرد ، ولها افرع فالستي والسيف والعالي والمطار بعد

عندج عبايات سيدتي فالمحرق " بعد وايد من هل قطر يروحون عندها"

ولو بغيتي العبي، تقدرين تدخلين شارع بوكوارة على طوله محلات عبي على كيفج لاتغرج الواجهة تلوع الجبد بس بعض المرات داخل المحلات في موديلات حلوة .. وعندج في نفس شارع بوكوارة عاليسار يم اسواق المنتزه كم محل بعد شغلهم وايد حلووو بس لانهم صايرين مب عالشارع العام محد يعرفهم وايد .. عندج بعد سوق المحرق .. محلات الدنيا والدين طول الشارع كله محل عبي واول ماتدخلين في محل بعد معروف اسمه مذهله بعد حلو ..

عندج بعد في سوق بوكوارة ، الاختيار الاول ومجابله بالضبط محل تركواز بعد حلوو .. وعندج محل ظبية الرفاع بعد حلو ..وعندج دنيا العبايات ، هذيلن كلهم في شارع بوكوارة .. انا نصيحتي ادخلي اي محل تشوفينه لاتهتمين للاسم مرات تلقين من محلات صغيرة اشياء راقية وحلوة

واذا حبيتي تروحين خبريني وان شاءالله بعطيج الوصف الدقيق للمحلات عشان تدلينهم

ان شاءالله اكون افدتكم

[لمعة الالماس]

بنت البحرين

ما شاء الله

كفيتي ووفيتي وعطيني اماكن وايد وخيارات متعددة

انا تعجبني عبايات البحرين لان الموديلات تنزل عندكم قبل وخاماتهم روووعه

ان شاء الله بمر على البحرين قريب وافصل لي

جزاج الله خير وكثر الله من امثالج :)

[غناتي1]

ما قصرت بنت البحرين الصراحه ----

بس عليس بشارع البوكواره وطبي وتنقي

ونصيحه تكلمي بحريني ولا تقولين لهم انس قطريه

[بنت^البحرين1]

ما قصرت بنت البحرين الصراحه ----

بس عليس بشارع البوكواره وطبي وتنقي

ونصيحه تكلمي بحريني ولا تقولين لهم انس قطريه


بالضبط ذي اللي حاصل.. بس يكتشفون انكم من قطر بيرفعون السعر.. لان صار معروف عندنا ان القطاره مايكاسرون يدفعون ويمشون .. خل تنزل بدون مايكون ريال معاها عشان مايصيدون اللبس ويعرفون ..

[لمعة الالماس]

معلومة جديدة

نفس الشي في السعودية من يعرفون ان احنا من قطر ارتفعت الاسعار

بس زين نبهتوووني :)

بارك الله فيكم خواتي