اثقلي يا مرة !

[ع.م]

السلام عليكم..

حبيت أفتح موضوع حق الزوجات الخفاف :tease:

ياخي اثقلوا:anger1: >>>>> حلفي عاد..


كثيراً ما تشتكي الزوجة من ابتعاد زوجها عنها.. وتظل تلاحقة بالاتصالات والمسجات والأسئلة و اللوم.. والنتيجة أنه يبتعد أكثر وأكثر.. بمعنى آخر يشرررد..


ومن يقعد معاج شوي هات ياطللبات.. طلعني سفرني خل نتعشى بره خل نروح مادري وين.. وانتي بس ماعندج إلا هو مافي شي يسعدج فالدنيا إلا نويصر..؟

ليش تنطرينه كللل مرة هو اللي يوديج السوق و الخياط والمستشفى و الصالون..إلخ.. ليش ماتضبطين أمورج بحيث تخففين عليه المشاوير وفي نفس الوقت تظمنين تخلصين مشاغلج في وقت أسرع بدون ماتضغطين عليه.. وبالمرة خل يشوفج حلوة ومايكون هو اللي موديج الصالون.. خل يقول يه شهالزين شعندج خخخ بدون مايكون ناطر هالشي..

ليش ماتقرين كتب تثقفين نفسج وتطورين مهاراتج الحياتية.. ليش ماتسولفين مع رفيجاتج القدامى و تضحكين من قلبج نفس قبل بدون ماتحاتين ريلج ليش تأخر وليش مارد عالجوال و مايحبني و و و..

ليش لما يدخل البيت تلاحقينه من غرفة لين غرفة وهو يشرد لاشعورياً.. ليش لما يدخل عليج البيت ماتكونين مشغولة تقرين كتاب أو تحطين مناكير أو تطبخين أو تلعبين عيالج أو ترسمين.. ليش بس طول الوقت مرتزة ومتأهبة تنطرين دخلته البيت وماتنجزين شي طول اليوم غير إنج تنطرينه..ماتنلامين لين انقهرتي إذا ماعطاج ويه لأنج معتبرته الانجاز الوحيد في يومج.. حتى قرآن ماتقرين.. اشدعوه يبه ماصار ريل الله يعين لو ماعطج ويه اشبتسوين ..

لين جفتيه رايق ويبي يقعد معاج أوكي عامليه بحب وطيبة.. بس إذا جفتيه متكدر احترمي رغبته في السكوت ولاتضيقين عليه .. هو الحين متضايق مب ناقص إلا وحدة تجابله وتطيح فيه أسئلة اشفيك متغير، احلف مافيك شي،طالعني مالاحظت شي متغير؟، ليش ماتحبني، الله يرحم أيام شهر العسل...إلخ!!.. لوول من صجج يعني.. ماتحسين إن هالتصرفات غبية.؟ لا صج صج ماتحسين إن هالأسلوب كل ماله يخرب عليكم؟ خخ لا صج صج صج (اشتطيت هه) صج الحين كم سنة وانتي على هالحالة صج للحين مااستوعبتي إن لازم تغيرين أسلوبج اللي مايجيب إلا النتائج الززفت عليج وعليه؟ بال لاتقولين ماتحسين خلج ذكية يابنت الناس واثقلي.. حتى حريم أول كانوا يعرفون قيمة الثقل

إنزين هو عنده ربعه و وناسته و طلعاته وسفراته ورياضاته.. ليش ماتتعلمين منه اشلون يستانس وتطبقين هالشي بما يتناسب مع وضعج كزوجة..حطي في حياتج نوع من الغموض خليه يستانس عليج و يحس إنج مثقفة وعندج أشياء مايدري عنها خليه يشتط ويبدا يتعرف عليج من أول.. عندج نشاطات تسوينها ..وناس وايد ..يسألون عنج وتتونسين معاهم..

أنا ماقوللج لاتعطينه ويه أو طنشيه.. أنا أقول لازم يكون فيه مساحة من الوناسة في حياتج ماتتمحور حوله.. لازم تخلينه على راحته وماتأذينه.. خليه يستانس بحياته وانتي استانسي بحياتج.. ولين اجتمتوا استانسوا مع بعض..

تعلمي الثقل أيتها الزوجة الخفيفة.. اتصلتي مرة ما رد عليج اشغلي نفسج بأي شي ثاني.. لين مايرد.. إذا مارد لاتحرقين جواله اتصالات ومسجات. تبينه يشتاق حق شوفة رقمج على شاشة جواله ولا تبينه يكشر كل ماشافه ويقول أوهوووه اشعندها هذي..؟ جاوبيني:anger1: إذا تبينه يستقبل اتصالاتج بأوهوووه وهو يتأفف ومكشر استمري على أسلوبج.. وإذا تبينه لاشاف رقمج تمتم في قلبه بـ يا لبيــــه والابتسامه شاقه الحلج..تعرفين شتسوين:victory:

وياريته يرد البيت حق شي عدل.. الوقت اللي كنتي تلاحقينه فيه الله لايهينج كان استغليتي الوقت في الاهتمام بجمالج.. عالأقل تكونين حلوة ومايعطيج ويه أحسن من ان تكونين شينه و مايعطيج ويه.. يعني وحيدة و مب جميلة فنفس الوقت؟.. مب شي..




أتمنى أقرا إضافات بخصوص الخفة والثقل خل الحريم يتعلمون يصيرون حلوين وثقال ومايشردون رياييلهم..

[ضوى]

تعلمي الثقل أيتها الزوجة الخفيفة.. اتصلتي مرة ما رد عليج اشغلي نفسج بأي شي ثاني.. لين مايرد.. إذا مارد
لاتحرقين جواله اتصالات ومسجات. تبينه يشتاق حق شوفة رقمج على شاشة جواله ولا تبينه يكشر كل ماشافه ويقول أوهوووه اشعندها هذي..؟ جاوبيني إذا تبينه يستقبل اتصالاتج بأوهوووه وهو يتأفف ومكشر استمري على أسلوبج.. وإذا تبينه لاشاف رقمج تمتم في قلبه بـ يا لبيــــه والابتسامه شاقه الحلج..تعرفين شتسوين

الصراحة موضوع خفيف ومسلي ، شخصياً لما اتأخر في اتصالي به ساعة بس يتصل هو يقول اشفيج اشوفج ماتصلتي تسالين عني !!!!!!!!!!!!!

[JN000N]

اثقلي بس مب بزياده

الله يرحمها يدتي علمتنا هالشي واللي تزوجو يطبقونه

تتصلينله وتسالين عنه عشان يحس ان في وحده مهتمه فيه ومشتاقتله بس لين اتصلتي لا تستلعنين

تنطرينه لين ايي عشان مب لين يا يحصلج لاهيه عنه وهو راجع يبي وحده تجابله وتريحه بس لين رجع لا تكدرين عليه بالمشاكل

لين شفتيه مستضيق لا تشلين شلايلج وتقومين عنه،، لا قعدي معاه وخذي بخاطره وشوفي شيحتاج يكن يبي حد يسمعه

لين بتطلعين مكان بيني حاجتج له تبينه هو يوديج عشان يتعود انه ملزوم بمره يداريها بس لاتضيقين عليه كل يو طلعات والشغل مايخلص

وخلها تتصل له عشان يطمنها لو تحاتيه لان لو اتصلتي مره وعقب ماسألتي ماراح يحس ان في وحده مهتمه يمكن لا سمح الله فيه شي تطمني عليه بين فتره وفتره بس مب بلعانه ولا تضيقين عليه


كل اللي قلتيه من خفيه بس تخدي يمكن لان هالاشيا لازم تسويها المره بس بطريقه ماتخليه يطفش منها
ولاتنسين الريال يمل بعد لو شاف اللي عنده شايله عمرها وتنغلى وتتثيقل عليه لين متى؟

[ع.م]

مرحبا أختي ضوى.. إضافة جميلة وتجربة حلوة..

أختيjn00n كلامج صح وأهم شي التواااازن لاإفراط ولاتفريط.. بس موضوعي هذا موجه حق الزوجة الخفيفة لأن في وحدة أعرفها أبيها تقرا الموضوع وتثقل بالذات إن ريلها مايحب المرة الخفيفة بس على الله تفهم!!

[ظبيــღــه]

ومنكم نســـــــــتفيد:pardon:

[حراير قطر]

يعطيج العافيه

بس فيه ناس نوعيتهم الله يكون بالعون

اتصلتي يتسندر ما تصلتي زعل ليش ما تتصلين تسألين

واذا واحد حارم زوجته من طلعات حق رفيجاتها وما اتكلمهم بالتلفون

ومن ومن ومن مواهبها ومن النت ومن كل شيء ...

طبعا محد غيره بيكون شاغلها الوحيد

وغايه الناس لا تدرك ...

وفيه ناس عايشين مع بعض ومحد يدري عن الثاني

وحلو الرخى والشده بس مو في كل شيء

وكلن لها حياة خاصه فيه ويبي يستغل وقته ويمتع نفسه

واذا هو من حقه يطلع ويكلم ويسوي ويرفه عن نفسه

يسمح لزوجته ويتم الاتفاق من بينهم بوقت محدد لها عشان ما تنشغل

عنه وعن العيال والبيت ،،،

ومشكوره على الطرح

[بوحارب]

المرأة من طبعها الحنه والرنه :(:)

[بو الجوري]

:eek5:

الصراحه :.. كلام رائع :.. و جنه صاير بـنسبة 90% مع واحد أعرفه :.. :D

يعطيج العافيه أختي :.. و ترى في بعض الحريم يسوون هالشي مب حباً في الزوج:.. :anger1:
تلاقينها تسوي جي :.. لأنها مقهوره إنه ليش هو برع مستانس وهي لأ :.. :nice:
وتبدأ تنكد عليه :.. :weeping:
أو تخاف إنه يخونها و يجرحها :.. و كرامتها ما تسمح :.. :)

عالعموم الله يحنن قلب الزوج على الزوجه :.. والعكس :..
والله يخليهم لبعض :.. :)

[بو الجوري]

المرأة من طبعها الحنه والرنه :(:)

أنا أشهد :.. :telephone:

وينك ماتسأل عني :.. :weeping:

[ع.م]

واذا واحد حارم زوجته من طلعات حق رفيجاتها وما اتكلمهم بالتلفون

ومن ومن ومن مواهبها ومن النت ومن كل شيء ...

طبعا محد غيره بيكون شاغلها الوحيد





صدقييييني المرة الشاطرة بتقدددر تتصرررف مهما كان الزوج متسلط..

اللي تتكلمين عنها تقدر تحط لها جدول تحفظ قرآن أو تجيها وحدة البيت تحفّظها..

تقدر تشتري روايات وتقراها..

تقدر تسوي رياضة..

تقدر تتفنن بالطبخ و تطرش حق الناس بعد..

تقدر تهتم بجمالها و صحتها أكثر..

وجدول يومي تمشي عليه.. تحدد كل ساعة شبتسوي.. عشان يصير عندها روتين تمشي عليه..

تقدر تحط أهداف يومية صغيرة و تحققها..

وشوي شوي بتكبر الأهداف..

وشوي شوي.. تقدر بطريقتها تخليه يعطيه مساحة أكبر من الحرية..

[ع.م]

ومنكم نســـــــــتفيد:pardon:

:nice:

[ع.م]

:eek5:




و ترى في بعض الحريم يسوون هالشي مب حباً في الزوج:.. :anger1:
تلاقينها تسوي جي :.. لأنها مقهوره إنه ليش هو برع مستانس وهي لأ :.. :nice:
وتبدأ تنكد عليه :.. :weeping:
أو تخاف إنه يخونها و يجرحها :.. و كرامتها ما تسمح :.. :)


:.. :)


شوفوا يالحريم الرياييل صادوكم.. دروا إن المرة اللي تسوي جي لأن ماعندها ثقة في نفسها وخايفة من الريل يشوف غيرها، أو محترة منه إنه مستانس وهي لأ..

صراحة رد راااائع وفي صميم موضوعنا.. ياريت الكل يقراه عدل..

[ع.م]

المرأة من طبعها الحنه والرنه :(:)


نسبة كبيرة صحيح.. بس مب الكل..

وبإذن الله يتخلص الجميع من هالطبع..

مع إن الحنة لابد منها أحياناً..

قريت مرة:

((يفسر الرجال تكرار أي طلب من زوجاتهن بال"حنة" لأن ذلك يبرر لهم التهرب وعدم الاستجابة،سهل عليهم أن لا يلحّوا لأن أمرهم بيدهم، أما المرأة فتضطر للإلحاح لأن أمورها بيد الزوج الذي إن تجاهلها لا يعتبر مهملاً لاحتياجاتها وإنما تعتبر هي "حنانة"))