قطريات على الكفاله الشخصيه

[قناص الخليج]

نعم قطريات على الكفاله الشخصية لمديرة المدرسة

طبعا هذا اعتقاد بعض صاحبات التراخيص للمدارس المستقله ، تعتقد بعض هولاء الفاضلات ان هذة المواطنة القطرية موظفة على الكفالة الشخصيه لمدرستها التي هي عباره عن ملكيه شخصيه وهذا نصيبها من ميراث العائلة ،توجه لها الاهانات وتهددها بانها الخدمات وخصم الراتب والمحاربه النفسية وربما لو كان الامر بيدها لهددتها بالغاء الاقامه والابعاد ولكن الحمدالله ان مب يدها ولا كان لم تقصر

عندما تكون صاحبة ترخيص فاضله واختها نائبتها وبنت عمتها مشرفه وبنت اخوها اداريه وبنت عمت جدتها سكرتيره اذا هي ملكيه شخصيه ومثل ماقالوا دهنا بمكبتنا ....

طبعا انا خصيت صاحبات التراخيص لان اكثر المشاكل مع المدرسات

سوالي لاخوانا بالمجلس الاعلى اين الامان الوظيفي للمدرسات في المدارس المستقله

[بنت سيف]

حقيقة .. وضع مؤسف ..

والعمل بهذه الطريقة والأسلوب يفتقر إلى آداب المهنة .. وحسن التعامل

الله يهديهم


بنت سيف

[جنوب الدوحه]

ممكن الجيل الجديد لا نرا فيه المدرسه القطريه والسبب استعبادها من قبل المدرسه المستقله ..

[ابوسعود]

قناص الخليج

مادخل الكفالات الشخصيه في التعسف

الله يهديك بس على الاثاره

[بوفصول]

السلام عليكم

تعتمد على حسب ادارة المدرسة ، وحسب طينة المديراو المديرة

شكرا على الموضوع بارك الله فيك

[سحابة]

احس انه جاي وقت ماراح نشوف فيه مدارس اصلا مو بس مدرسات .. الله المستعان
ياليت يرجع نظام المدارس الحكوميه القديم..

[شموع قطريه]

فعلا كلامك صحيح .. انا وحده من المتدربات في احد المسارات ومع الاسف مديرة المدرسه اللي نتدرب فيها تعاملنا كأن احنا عاله عليها وتبي الفكه منا وضيقت علينا بتعاملها الجاف معانا وعدم تقديرها لأي ظرف تمر فيه المدرسه لدرجة انه كان عددنا في المدرسه 11 متدربه الحين صرنا ثلاث .. ثلاث ارباعهم شردوا من المعامله السيئه اللي شافوها .. حتى وحده من المدرسات القطريات اللي يشتغلون في المدرسه قالت لنا ان المديره ماتبي قطريات تبي اجانب علشان تسويهم مثل الخاتم في صبعها تستغل حاجتهم وتتأمر عليهم لانهم مايرفضون اي اوامر من سيادتها حتى لو كانت على حساب بيوتهم وعيالهم وصحتهم وراحتهم .. مع العلم باننا يوم اشتكينا عليها في المجلس الاعلى قالوا لنا كتبوا كتاب بهالخصوص ووقعوا عليه كلكم وكتبنا كتاب ولين هاليوم ماشفنا اي رد منهم او اي تصرف حيالها ..

صدقوني المديرات في المستقلات ينفرون القطريات باسلوبهم ويعاملونهم كأنهم يشتغلون عندهم .. عكس السابق كنا نشعر بالامان والاستقرار لانا كلنا نشعر اننا سواسيه نشتغل في جهه وحده محد احسن من حد اما الحين فكل مديره تستعبد المدرسات وكأنهم يشتغلون عندها وأي غلطه تهددهم انها بتخصم عليهم او تعطيها اوراقها وتقول لها دوري مدرسه غير مانبيج عندنا .. الصراحه انا واللي معاي قدمنا على وزارة الاوقاف وننتظر الرد يجينا وننتقل لها كفايه علينا هالمهازل اللي كل يوم نشوفها من عقب هالسنوات اللي اشتغلناها وهذي اخرتها ..

[HIGHNESS]

ومن الاساس ليش المدرسة تكت عن حقها ؟؟؟
المفروض محد يسكت عن الظلم والحق لانهم كلهم موظفين عند الدولة .. بس الظاهر اصحاب التراخيص يحسبون الفلوس من جيبهم ويستخسرونها على المدرسة باللي فيها

[بوحارب]

اي والله قبل كم من يوم تقول لي وحدة من الأهل انه مب ضاااامنة نفسي وممكن اتفنش في اي وقت

كل شي بيد المديرة تفنش اللي تبي وتخلي اللي تبي !!!..

[بوحارب]

ووحده ثانية داومت يومين وعقب المديرة قالت لها خلاص بكرة لاتجين لين ما نتصل لج

بس هالبنت شريرة شوي =(

وردت على المديرة ( قولي لنا لاتييون وخلاص يعني ليش اللف والدوران )

مشكلة هالمستقلة

[الـقـاسـي]

لان والله مافيها واحد فيه خير يتابعهم ويصلبهم ..
لين متى بلادنا ضايعه كذا وكل واحد يلعب على راحته ..

[جوال 11]

لا ننسى تمرد بعض المدرسات بعد تحويلهن من المدارس الحكومية إلى المستقلة وإدعائهن بكثرة عدد الحصص ولا يرغبن في الأنضباط والألتزام بالدوام ، حيث في المدارس الحكومية حصولهن على خمس حصص في الأسبوع أو أقل والراتب 18000 ريال ، بمعنى أقل من خمس ساعات عمل في الأسبوع والراتب 18000 فماذا تنتظر منهن

[ANONYMOUS]

تبي الصراحه اصحاب التراخيص ماينلامون

طالما فاتحين مؤسسه بأسمائهم

والمدرسه تعتبر من املاك المؤسسه

وهي صاحبة المؤسسه

وصاحبة الترخيص

ومديرة المدرسه

اكيد راح يشعرون بأن كل ماينتمي لهالمدرسه ملك خاص

وبيلطشون في اللي يبون

والله المستعان

[الأصيلة]

موضوع المدارس المستقلة والمجلس الأعلى يجب ألا يهمل أبدا
ولازم نكون وراها لحد ماتتصلح الأمور ويتغير الحال...لأنه اهم موضوع اعتقد بما انه يمس عيالنا فلذات أكبادنا...

أولا : هناك صاحبات تراخيص فعلا يلمون اهلهم في الإدارة بنت العم وبنت الخال وغيرها وهم اصلا
مش كفاءة فقط لصلة القرابة....
وين المجلس الأعلى عنهم وهل هو راضي عن هذا الوضع...
ثانيا : اسلوب بعض المديرات جاف مع المدرسات ويذلونهم بها الراتب والعلاوات ...
ويهددونهم
قديما كانت تتدرج المدرسة حتى تصير مديرة وتاخذ لها سنوات تتدرب على أيدي مديرات كفء
فتتعلم كيفية التعامل مع المدرسات..
أما الآن فهي جك بك من مدرسة عادية إلى مديرة في يوم وليلة...
مهما كانت المدرسة ناجحة في مادتها ومبدعة
لكن يبقى للإدارة علم وفن وإبداع من نوع آخر...
فكيف تقدر تتعامل مع المدرسة وهي ماتتقن فنون الإدارة
ومهما كان مستحيل بدورة والا دورتين في فن الإدارة تقدر تلم بالموضوع...
لذلك المدارس المستقلة الناجحة هي اللي أصحاب تراخيصها
كانوا مديرات قديمات ومتمرسات في فنون الإدارة والتعامل مع المعلمات والإداريات...
ثالثا : نعم بعض المدرسات ملولات وغير واثقات من انفسهن ويبغون الراحة...ومايستحملون التعب
لازم يعرفون ان كل شي تغير وتبدل ويكيفون نفسهم مع الوضع الحالي...
ويحاولون كسب الإدارة ويتعلمون قدر استطاعتهم طرق التدريس بفنونها...
اعتقد المدرسات اللي قضوا اكثر من 15 سنة بالتدريس يصعب عليهم التكيف مع الوضع مالم يكن لها رغبة...
ف
ت لازم المديرات يحاولون ما يخسرونهم ويسايسونهم حتى يتعودون لأنهم كفاءات وما تعيض عنهم الأجنبية مهما كان
فلازم المديرة تشوف مصلحة الطلاب لا مصلحة الإدارة ...

عندي امل يتحسن الوضع وتتغير الأحوال مع الفوج السابع...
ويصير المجلس الأعلى جناح رحمة ومحبة للعملية التعليمية ...
مو شبح يستنزف خوف وقلق العاملين فيه...
من صار هالمجلس ولا احد راضي بأي شي منه ..
يعني الخطأ فيه مو في المدارس والمعلمات...
لأن التعسف هو سمة المجلس وعدم المرونة
والقرارات المجحفة التي لاتقبل تغير ولا تبديل...
ياليت للكفاءات والكوادر القديمة رأي في اختيار بعض القوانين والقرارات
وعدم الإعتماد على من ليس لها باع في العمليات التربوية الحساسة...

[ماريسا]

لا تعليـــــــــــق

[بوسلمان 2010]

وللاسف ان الدراسه سارت ماديه اكثر من هي تعليمه والله يعين اعيلنا

[cristal]

واللي يقهر حاطه النائبة بنت اخوها
نائبة جاهله كلمتين انجليزي ماتعرف غجريه ماعندها فن التعامل مع الاخرين
حتى الكمبيوتر ماتعرف تستخدمه اسلوب همجي الحمد الله والشكر مع الموظفات والاهالي

المجلس الاعلى للحين راقدين مادرى متى بيصحون
واللي يبط الجبد
فى الشهر تسوي لك 3 معسكرات
يقصون على الطلاب يقولون لهم جيبو اكل من بيوتكم
ويبيعونه عليهم والفلوووس فى مخباها
غير الخرابيط اللى بالرونق على نص وربع ريال ويبيعونهم على 10 و5 ريال


ولو نكتب من اليوم لى باجر ماخلصنا من بلاويهم

[قناص الخليج]

اشكركم جميعا على التفاعل مع الموضوع واحترم جميع الاراء

اليوم وانا اسمع برنامج وطني الحبيب لفت انتباهي المتصله ام خلف وهي تعرض مشكلة ابتها المدرسه
في احد المدارس المستقله ومحاربه المديره لها محاربه نفسيه لاجبارها على الاستقاله وفعلا وصلت لما تهدف اليه هذة الفاضله

سوالي اين دور الموارد البشريه بالمجلس الاعلى لمحاسبة المخطى وانصاف المظلوم؟؟؟