حد عنده فكره عن اسعار تركيب الرخام

[r07]

واسعار الجلي للمتر المربع...وكل كم سنه يحتاج الرخام للجلي...وشكرا

[شموخ دائم]

,

,



مرحبا اخوي الكريم

اتمنى ردي يكون ذو فائده للجميع ان شاء الله


بالنسبه للتركيب الرخام يختلف على حسب جوده العامل وحسب جنسيه العامل

العامل الهندي غير التركي غير المعلم المصري غير الفلبيني الدقيق
كل مستوى وله السعر
وحسب الطريقه والاسعار بدون المواد

تركيب للارضيات

بتلاقي سعر 55 ريال للمتر المربع
بتلاقي 60 ريال للمتر المربع

اذا العمال شاطرين زياده وفناننين

بيعطونك 80 ريال او 90 ريال

بالنسبه للحوائط الخارجيه
( تركيب ديناميكي ) بالبراغي وتثبيت سلك معدني وغراء خاص بالرخام

السعر 100 ريال بالمتوسط تقريبا


تركيب الخطوط ( البوردر )

35 ريال تقريبا بالمتوسط

تركيب النعلات

30 ريال للمتوسط السعر وممكن 25 ريال ( التركيب بالغراء الخاص بالرخام )


اذا قلنا عامل شاطر نقصد

اخذ ارتفاع الارضيه ووضع علامه ( مستوى) في بدايه وفي نهايه المكان
وتنسيق المساحه وعمل خريطه للارضيه بالمقاسات الدقيقه

تركيبه يكون على قياسات ( ليفل ) يحط مقياس الماء على كل بلاطه وتطلع مساويه للبلاطه الي جنبها ولا تقل سماكه الرخام عن ( 2 سم ) للارضيات بدون السلم

تقطيع الرخام في المصنع وممنوع التقطيع في المنزل ( لجوده التقطيع بالمصنع وفنش نظيف ) وعدم توسيخ الحوش بالبودره الصعبه الازاله

التركيب بطريقه ( زيرو ) بدون فراغات بين الرخام

(فرز الرخام واستبعاد الالوان الشاذه او الفاتحه بزياده او الغامقه بزياده )

عمل الدرج سماكه الرخام 3 سم ( اجباري ) مع نهايات نحاس

التركيب مع المواد

150 ريال بالمتوسط والمحلات المعروفه بقطر اسعارها 160 ريال الى 180 ريال
شامل المواد


واسعار الجلي للمتر المربع

اول ما تركب الرخام وقبل السكن تعمل جلي كامل للرخام
لان العمال الي يركبون سيئين والناس تجيبهم بسعر رخيص والمشاكل معروفه
فراغات بين الرخام ولون وسخ ويوجد صمغ على الحواف
التركيب غير متساوي بلاطه ارفع من بلاطه والفرق واضج وتحتاج جلي حتى
نسوي الرخام بنفس المستوى
تقطيع الرخام بمكينه ( الصاروخ ) سيئه جدا ولها حواف غير مستقيمه

بالنسبه للسعر
تقريبا السعر من 40 ريال للمتر الى 80 ريال للمتر على حسب نظافه المكان
وشكثر يحتاج جلي يوم او بيقعد اسبوع في الموقع على حسب الشغل المحتاجه بعد معاينه المكان يختلف من فيلا الى فيلا

الجلي يعمل على 3 مراحل

خشن
متوسط
تلميع ناعم

واستخدام ماده الكريستال الايطالي

وينصح بعمل الجلي كل 3 سنوات مره تقريبا

ملاحظه مهمه

لا تخلون الخدم تستخدم مواد تنظيف للرخام اي مواد كيماويه او حتى ( الديتول ) يترك بقع كبيره لونها رمادي على الرخام وراح يخرب

تنظيف الرخام فقط بالماء وقليل من الصابون فقط لا غير ولا نحتاج اكثر من ذلك
حتى يتم محتفظ بجماله ولمعانه على طول العمر ان شاء الله

تحياتي لك


,

,


اخوك



شموخ دائم

[Chambray]

^^^^^^^^
دائما ردودك كافيه ووافيه يعل عمرك طويل انت والاخ راحة ماتقصرون في الردود الي تبيض الوجه

[r07]

مشكور اخ شموخ على الرد الوافي والكافي...ماودي اكثر عليك بالأسئله...بس بغيت اعرف اذا في شي ثاني غير الرخام والجرانيت ممكن استخدمه للدرج..لونه درجات البيج ويكون مطفي بدون لمعه؟؟(لو في محلات تعرفها بعد زين)
انا اللي مرددني بعد عن الرخام هو السعر لأأني اذا باحط لازم يكون من النوع الزين+تركيب ممتاز وجلي يعني لازم مايقل سعر المتر عن 350 او 400 +الصيانه او الجلي كل 3سنوات. والأرضيات اللي احتمال يكون فيها رخام جنبها على طول باركيه ويمكن الجلي يخرب اطراف الباركيه...
الحين افكر احط بورسلان بس ودي ببورسلان يكون شكل الرخام ويكون بدون فواصل يعني زيرو جوينت(بعد لو تعرف محلات عندهم اشكال حلوه يا ليت تفيدنا) وشكرا...

[Almossafer]

مشكور اخ شموخ على الرد الوافي والكافي...ماودي اكثر عليك بالأسئله...بس بغيت اعرف اذا في شي ثاني غير الرخام والجرانيت ممكن استخدمه للدرج..لونه درجات البيج ويكون مطفي بدون لمعه؟؟(لو في محلات تعرفها بعد زين)
انا اللي مرددني بعد عن الرخام هو السعر لأأني اذا باحط لازم يكون من النوع الزين+تركيب ممتاز وجلي يعني لازم مايقل سعر المتر عن 350 او 400 +الصيانه او الجلي كل 3سنوات. والأرضيات اللي احتمال يكون فيها رخام جنبها على طول باركيه ويمكن الجلي يخرب اطراف الباركيه...
الحين افكر احط بورسلان بس ودي ببورسلان يكون شكل الرخام ويكون بدون فواصل يعني زيرو جوينت(بعد لو تعرف محلات عندهم اشكال حلوه يا ليت تفيدنا) وشكرا...

هلا اخوي

تبي محل يبيع سيراميك زيرو جوينت 60 نفس الرخام قريب منه جديد يعني تقول من كم شهر واصل عندهم ع 70

عندك محل قبل داور سوق الخميس والجمعه جنب صيدلية الضحي

اما بالنسبه للرخام برسلك محل ع الخاص اسعاره حلوة وشغله نظيف

بالتوفيق