المساعد الشخصي الرقمي

مشاهدة النسخة كاملة : @التدخين ( تصويـــــت )@


hemoud123
22-05-2010, 08:48 AM
من انجح واسهل سبل مكافحة عادة التدخين الضاره هي لجوء الدول الى فرض ضريبه على منتجات التبغ بهدف رفع اسعاره والحد من سهولة الحصول عليه , وكذلك منع بيعه في المحلات التجاريه واماكن بيع المواد الغذائيه وتحديد منافذ بيعه ,
الغريب انه مع الحملات الشرسه التي تشنها دول الخليج لمكافحة التدخين وذلك عن طريق منع التدخين في الاماكن الرسميه والعامه , الا انه في هذه الدول يعتبر سعر منتجات التبغ من ارخص الاسعار عالميا , فبمقارنه سريعه نجد ان سعر التبغ في بريطانيا مثلا يبلغ خمس اضعاف سعره في دول الخليج وفي امريكا حوالي ثلاث اضعاف السعر وكذلك معظم الدول الاوروبيه
فلماذا لا يتم فرض ضريبه حقيقيه على منتجات التبغ اذا كانت الحكومات حريصة فعلا على محاربة هذه الافه
Sharshooooor
22-05-2010, 11:31 AM
والله ياخوي اتمنى رفع قيمة المخالفة ليس 30 ريال فقط

انما 1000 ريال او اكثر اسوة بالمخالفات المرورية اللي لبستنا حزام غصبا عنا

المنظر اللي شفته يوم الاحد اللي طاف في الستي شي مخزي

كنت رايح مع العائلة مطعم شيليز وانتوا تعرفون وين مكانه

في ممر وقبلة في كوفيين واحد يمين والثاني يسار

مريت واقسم لكم بالله ماقدرت اتنفس من الحشرة اللي مسوينها لاحسيب ولا رقيب تقول يحششون موزقاير

والمشكلة اكثرهم من اشكالهم طلاب لاحيا ولا مستحى

واهم شي مو الرسوم اهم شي المراقبين المفروض يتواجدون في هالمناطق باستمرار

وابشرك علامات ممنوع التدخين ملزقة في كل مكان

بس المثل يقول اذا غاب القط العب يافاااااار
حبر سري
22-05-2010, 11:32 AM
يعطيك العافية ياحمود

لو يزيدون اكثر من خمسين بعد راح يكون افضل

شي محد مستفيد منه الا المجرمين مصنعين التبغ , والموردين
hemoud123
22-05-2010, 03:56 PM
يعطيك العافية ياحمود

لو يزيدون اكثر من خمسين بعد راح يكون افضل

شي محد مستفيد منه الا المجرمين مصنعين التبغ , والموردين

هذ الموت
الموردين اللي مخالبهم طوال هم المستفيدين وهم اللي ما احد يقدر يكلمهم
بواردي
22-05-2010, 04:12 PM
خله يزيدونه لمت اب

وبنصوت عليه
OTOsan
23-05-2010, 09:09 AM
ان شاء الله يرفعون الباكت ويصير بميه .. عشان نبطل ونوفر فلوس ..قبل لايجي اليوم اللي نبطل فيه (غصب) :)
عابر سبيل
23-05-2010, 09:20 AM
تم التصويييت...
بس..المشكلة..هل تبيهم يزيدون الضريبة
على (باكيتات) السجاير..
و لا على كل (تتن) او شيء (نتن)...

يعني..ما بتستثني
(الأرجيله) مدري (نرجيله)..
و (الشيشة) مدري (الفشيله)
و (الجراك) مدري (تمباك)
و حتى (القدو) اللي يحبه (القطو)!


بعدين..وين بيعمر (سوق واقف)
و قهاوي (المتسكعين)
في كل وادي و داعوس!

انت..انسان راعي (ضرر) كبير
على سعادة الناس الطيبين!

ينتطيح اجارات المحلات
من ورا اقتراحاتك يا حمود..
لا لا..يجب منع مثل هالافكار
و محاربة اصحابها:omg:
بنت سيف
23-05-2010, 10:13 AM
اعتقد زيادة ضريبة على المنتج .. شيء جيد ..
لكن لا أعرف ما هي النسبة ..

واعتقد فرض غرامة مالية .. على التدخين في الأماكن العامة .. مثل الأسواق وغيرها .. أمر مطلوب ..

وضروري .. فتح عيادات لمعالجة مدمني التدخين ..

كذلك دور الأسرة .. مهم في التوعية بالنسبة للأبناء في هذا الموضوع .. (طبعا تقولون مثالية)

بنت أخوي .. عمرها 8 سنوات ..
أبوها يخاف يدخن أمامها ..
لأنها كل ما دخن .. بكت .. تخاف عليه ..
والسبب شافت برنامج تلفزيوني ..
حاطين فيه صورة لرئة مدخن .. وصورة لرئة شخص غير مدخن ..
ومنظر التلف في رئة المدخن .. خلى البنت في قلق ..
فحكرت حق أبوها .. بالصياح ..

لكن للأسف .. لم يقطع التدخين ..
تصعيب الموضوع على المدخنين .. يمكن يساعد في إقلاعهم عن التدخين

ملاحظة :: الكلام لك يا أوتوسان ..
مع احترامي لكاتب الموضوع ..

بنت سيف
hemoud123
23-05-2010, 10:28 AM
ان شاء الله يرفعون الباكت ويصير بميه .. عشان نبطل ونوفر فلوس ..قبل لايجي اليوم اللي نبطل فيه (غصب) :)

جبتها والله
عندما تم رفع سعر الباكيت الى سبعة ريالات سمعت الكثير من الشباب يهددون ويتوعدون بمقاطعة التبغ وكل مشتقاته لان عيالهم اولى بالفلوس اللي يصرفونها على التدخين , لكن مع الوقت هدات الامور وصارت السبع ريالات شي عادي ومقبول , لكن لو صار الباكيت بمئة ريال اعتقد الواحد بيفكر مرتين قبل يشتريه , وبنصير مثل باقي الدول اللي لو طلع الواحد باكيت في مكان عام يجيه عشرين واحد يقوله : ممكن زجارة:nice:
freespirit
23-05-2010, 11:37 AM
اللي كتب الموضوع اكيد انه مايدخن, ومعظم اللي صوتو هههههه

سؤال: هل تتضايق من التدخين؟

اذا جاوبت نعم, لاتمشي مع مدخنين الشيخ وفكنا من شرك

اذا الجواب لا, خلاص ماله داعي مواضيع ترفع الضغط

الشيخ يوسف القرضاوي لما افتى في التدخين قال اللي دخنو قبل لايدرون انه التدخين حرام, بما انه ادمان, مايعتبر حرام حرام عليهم :p

ومعظم اللي دخنو في قطر دخنو وهم صغار, لانه مابيدخن وهو كبير الا شخص مخفه للاسف

طيب تبون حلول حق المشاكل للاجيال المستقبليه؟ لاتدخلون في مخنا المدخنين من اكثر من عشر سنين وعندنا التزامات ماليه :shy:

اقول لكم الحل ببساطه,, راقبو عيالكم,,و مخالفات "ضخمه" على اي محل يبيع الدخان لناس اصغر من 22, لانه 18 الصراحه سن صغير والشباب عبالهم فله انهم يدخنون في هالسن ارفعو السن شوي وزيدو المخالفه

ملاحظه: ليش المدخنين الشريحه الوحيده من المجتمع اللي يتم ضدهم تصفيه عرقيه ومافيه ولا جماعه تدافع عنهم :fight:
هذي حريتي الشخصيه, ليش انا كمواطن قطري ادفع ضريبه كبيره على شي مسموح في كل دول العالم؟ بتقولون لي حرام؟ طيب حتى السعوديه يا مطاوعه تسمح بالتدخين وهي شعار الامه الاسلاميه؟ لو رفعتو سعر الدخان بنروح نشتري كروز من السعوديه وش علينا :shy:

تحياتي
hemoud123
23-05-2010, 12:14 PM
اللي كتب الموضوع اكيد انه مايدخن, ومعظم اللي صوتو هههههه

سؤال: هل تتضايق من التدخين؟

اذا جاوبت نعم, لاتمشي مع مدخنين الشيخ وفكنا من شرك

اذا الجواب لا, خلاص ماله داعي مواضيع ترفع الضغط

الشيخ يوسف القرضاوي لما افتى في التدخين قال اللي دخنو قبل لايدرون انه التدخين حرام, بما انه ادمان, مايعتبر حرام حرام عليهم :p

ومعظم اللي دخنو في قطر دخنو وهم صغار, لانه مابيدخن وهو كبير الا شخص مخفه للاسف

طيب تبون حلول حق المشاكل للاجيال المستقبليه؟ لاتدخلون في مخنا المدخنين من اكثر من عشر سنين وعندنا التزامات ماليه :shy:

اقول لكم الحل ببساطه,, راقبو عيالكم,,و مخالفات "ضخمه" على اي محل يبيع الدخان لناس اصغر من 22, لانه 18 الصراحه سن صغير والشباب عبالهم فله انهم يدخنون في هالسن ارفعو السن شوي وزيدو المخالفه

ملاحظه: ليش المدخنين الشريحه الوحيده من المجتمع اللي يتم ضدهم تصفيه عرقيه ومافيه ولا جماعه تدافع عنهم :fight:
هذي حريتي الشخصيه, ليش انا كمواطن قطري ادفع ضريبه كبيره على شي مسموح في كل دول العالم؟ بتقولون لي حرام؟ طيب حتى السعوديه يا مطاوعه تسمح بالتدخين وهي شعار الامه الاسلاميه؟ لو رفعتو سعر الدخان بنروح نشتري كروز من السعوديه وش علينا :shy:

تحياتي

حياك الله يا freespirit
لا ما تضايقني رائحة الدخان لاني اصلا كنت مدخن والان ما ارد اذا عرضت على سيجاره من باب الكرم :)
ولا اني ضد المدخنيين , ولكن احيانا اشوف مناظر والله انها تغث
سياره فيها ثلاث بنات ما تتجاوز اعمارهم 18 سنه يوقفون امام الدكان ويضربون هرن ويطلبون , بعد شوي يطلع راعي الدكان وفي يده كيس فيه على الاقل اربع او خمس باكيتات , هذا صار جدام عيني الله يشهد
انا يا اخي الكريم ضد ان يكون التبغ متاح بهذا الرخص لاني اعتبره نوع من التشجيع غير المباشر على التدخين
انك تروح السعوديه تشتريه لانه ارخص اعتقد هذا شي طيب انا نصل الى هذه المرحله لان من اللي يقدر يروح السعوديه ويتعنى علشان السجاير؟ ما اعتقد انهم المراهقين والاطفال
لو تكرمت اقرا الخاص
وشكرا على المرور
شجرة الدر
23-05-2010, 12:18 PM
تم التصويت ،،

اقول لكل مدخن حراام عليك نفسك تغضب ربك وتخسر صحتك ،،

الله يهدي جميع المدخنين ،،
hemoud123
23-05-2010, 12:20 PM
تم التصويييت...
بس..المشكلة..هل تبيهم يزيدون الضريبة
على (باكيتات) السجاير..
و لا على كل (تتن) او شيء (نتن)...

يعني..ما بتستثني
(الأرجيله) مدري (نرجيله)..
و (الشيشة) مدري (الفشيله)
و (الجراك) مدري (تمباك)
و حتى (القدو) اللي يحبه (القطو)!


بعدين..وين بيعمر (سوق واقف)
و قهاوي (المتسكعين)
في كل وادي و داعوس!

انت..انسان راعي (ضرر) كبير
على سعادة الناس الطيبين!

ينتطيح اجارات المحلات
من ورا اقتراحاتك يا حمود..
لا لا..يجب منع مثل هالافكار
و محاربة اصحابها:omg:


اخوي عابر سبيل اعتقد اني فهمت وقرات ما بين السطور , وهو سلطه كل هامور وطرطور
السبب وراء عدم رفع اسعار التبغ اقتصادي , والناس تقول عادي , ومستشفى حمد ينادي , لان التجار في وادي ووزارة الصحه في وادي
والله المستعان وهو الهادي
freespirit
23-05-2010, 12:30 PM
حياك الله يا freespirit
لا ما تضايقني رائحة الدخان لاني اصلا كنت مدخن والان ما ارد اذا عرضت على سيجاره من باب الكرم :)
ولا اني ضد المدخنيين , ولكن احيانا اشوف مناظر والله انها تغث
سياره فيها ثلاث بنات ما تتجاوز اعمارهم 18 سنه يوقفون امام الدكان ويضربون هرن ويطلبون , بعد شوي يطلع راعي الدكان وفي يده كيس فيه على الاقل اربع او خمس باكيتات , هذا صار جدام عيني الله يشهد
انا يا اخي الكريم ضد ان يكون التبغ متاح بهذا الرخص لاني اعتبره نوع من التشجيع غير المباشر على التدخين
انك تروح السعوديه تشتريه لانه ارخص اعتقد هذا شي طيب انا نصل الى هذه المرحله لان من اللي يقدر يروح السعوديه ويتعنى علشان السجاير؟ ما اعتقد انهم المراهقين والاطفال
لو تكرمت اقرا الخاص
وشكرا على المرور

طيب وانا وش ذنبي اتعنى عشان فيه شخص ما يبغى يتابع عياله شيسوون,, سالفه البنات المدخنين هذي العن والعن, وكلها ترجع للرقابه

سالفه الناس اللي يدخنون في المجمعات,, الرقابه

سالفه الاطفال والمراهقين.. الرقابه

ندور ونرجع لنفس الموضوع, لو الباكيت سعره الف ريال, لو مافيه رقابه .. الباكيت بينشرى :)

وبعدين شفيكم شادين على علي بن علي ههههههه خله يسترزق اخرتها حرام :p وعبدالغني العن منه في امور حلال.. هذي بعد يبي لها حل.. اووه الحل موجود.. الرقابه

سبحان الله يعني لو احنا مجتمع ايجابي وكل شخص مسؤول عن رعيته, ما بنحتاج هالموضوع

للاسف احنا مجتمع سلبي.. يعني بس ننتظر الامور تتصلح و "ربك يسويها زينه" ودايما ندور للحلول السهله. مافيه حلول سهله. انا ادرس في استراليا وسعر الباكيت هنا 15 دولار ونص.. اضربها في 3.4 يعني 52 ريال قطري.. واشوف اطفال يدخنون في الشارع رايح جاي.. وانا ادخن مع انه نص راتبي.. مافرقت اللي بتسوونه انه بس انتو تبغون ميزانيه الدوله تنترس على ولا شي .. واخر شي يجي واحد ويسرق كم مليون ويشرد المكسيك وكله من فلوسنا المساكين :p

يعطيك العافيه يا كاتب الموضوع
بو خليفه 123
23-05-2010, 12:33 PM
اوجه سؤال للمدخنين :

ماهو شعورك عندما تعلم ان المرأه التي كانت تجلس خلفك مع ابنها بالمطعم الذي كنت تدخن فيه حامل بالشهر التاسع و ابنها ذو الاربع سنوات فيه مرض الربو ؟

شنهو شعورك لو كانت هذي زوجتك و ابنك و كان فيه واحد مشاهدهم يدخن ؟
freespirit
23-05-2010, 12:39 PM
اوجه سؤال للمدخنين :

ماهو شعورك عندما تعلم ان المرأه التي كانت تجلس خلفك مع ابنها بالمطعم الذي كنت تدخن فيه حامل بالشهر التاسع و ابنها ذو الاربع سنوات فيه مرض الربو ؟

شنهو شعورك لو كانت هذي زوجتك و ابنك و كان فيه واحد مشاهدهم يدخن ؟

التدخين في المطاعم ممنوع.. انت الحين كأنك تسأل يا ايها الشخص المغتصب .. وشرايك لو الشخص اللي اغتصبته كان مريض نفسي وفيه اكتئاب..

انت تسأل شخص يسوي شي غلط. ويدري انه غلط. ويدري انه ممنوع. هل بتحس بالذنب لو البنت اللي وراك في الشهر التاسع؟ اجل ليه ما حس بالذنب وهو يكسر القانون ويعطي مظهر غير حضاري لبلده ويقول للعالم بالفم المليان "لابو القانون لابو من ارثه"

خل العاطفه يخوي المفروض اللي مثل هذولا ينضربون بيد من حديد. انا ادخن من دهر و للحين ما ادخن في مجمع, ولا قريب من باب مجمع. هذولا المفروض السلطات تتعامل معاهم بس للأسف تلقى التحريات في المجمعات والمطاعم اصلا ربع المدخن ومايسوون له شي

تحياتي
بوخليفة3
23-05-2010, 01:06 PM
اولا الدولة تفرض ضريبه عاليه على منتجات التبغ

الشي الثاني بتلتهونا عقب الراتب كله حق الزقاير واللي بيستفيد الموزعين!!
يعني خربتوها زياده

شوف مثلا سعر المواد المخدره اكيد اسعارها مرتفعه اللي تؤدي بالتالي الى فقر متعاطيها والهلاك اخيرا
فا لما ترفع سعر الزقاير بتسبب فقر كبير ومشاكل اجتماعيه مالها اول ولا تالي
فا خلوا الامور مثل ماهي ابرك
بو خليفه 123
23-05-2010, 01:06 PM
التدخين في المطاعم ممنوع.. انت الحين كأنك تسأل يا ايها الشخص المغتصب .. وشرايك لو الشخص اللي اغتصبته كان مريض نفسي وفيه اكتئاب..

انت تسأل شخص يسوي شي غلط. ويدري انه غلط. ويدري انه ممنوع. هل بتحس بالذنب لو البنت اللي وراك في الشهر التاسع؟ اجل ليه ما حس بالذنب وهو يكسر القانون ويعطي مظهر غير حضاري لبلده ويقول للعالم بالفم المليان "لابو القانون لابو من ارثه"

خل العاطفه يخوي المفروض اللي مثل هذولا ينضربون بيد من حديد. انا ادخن من دهر و للحين ما ادخن في مجمع, ولا قريب من باب مجمع. هذولا المفروض السلطات تتعامل معاهم بس للأسف تلقى التحريات في المجمعات والمطاعم اصلا ربع المدخن ومايسوون له شي

تحياتي

اتفق معك اخي العزيز بخصوص الضرب بيد من حديد

و أنا لم استخدم العاطفه في مشاركتي , بل كان القصد من مشاركتي هي استخدام المدخن بالاماكن العامه "خياله الواسع" مما ترتب عليه من نتائج وخيمه من سؤالي ..

تحياتي لك
بـــــــنت النوخـّــــذه
23-05-2010, 01:12 PM
والله انا اقول يمنعون التبغ ابرك ونفتك من بيعه لا نرفع السعر ولا انخليه كما هو

والله مادري شهالاوادم الي يستحملون روحهم بهذي الريحه

امتنع عن التصويت الا اذا وجد بند يمنع تداوله ^_^<<<ادري تصويتي لابيودي ولايجيب
hemoud123
23-05-2010, 02:17 PM
تم التصويت ،،

اقول لكل مدخن حراام عليك نفسك تغضب ربك وتخسر صحتك ،،

الله يهدي جميع المدخنين ،،

جزاك الله الف خير
hemoud123
23-05-2010, 02:19 PM
والله انا اقول يمنعون التبغ ابرك ونفتك من بيعه لا نرفع السعر ولا انخليه كما هو

والله مادري شهالاوادم الي يستحملون روحهم بهذي الريحه

امتنع عن التصويت الا اذا وجد بند يمنع تداوله ^_^<<<ادري تصويتي لابيودي ولايجيب

احترم واتفهم قرارك يا بنت النوخذه
لكن اذا هم ماقدروا يفرضون على التبغ ضريبه مناسبه تعتقدين بيقدرون يمنعونه ؟ والله ما اعتقد
hemoud123
23-05-2010, 02:22 PM
التدخين في المطاعم ممنوع.. انت الحين كأنك تسأل يا ايها الشخص المغتصب .. وشرايك لو الشخص اللي اغتصبته كان مريض نفسي وفيه اكتئاب..

انت تسأل شخص يسوي شي غلط. ويدري انه غلط. ويدري انه ممنوع. هل بتحس بالذنب لو البنت اللي وراك في الشهر التاسع؟ اجل ليه ما حس بالذنب وهو يكسر القانون ويعطي مظهر غير حضاري لبلده ويقول للعالم بالفم المليان "لابو القانون لابو من ارثه"

خل العاطفه يخوي المفروض اللي مثل هذولا ينضربون بيد من حديد. انا ادخن من دهر و للحين ما ادخن في مجمع, ولا قريب من باب مجمع. هذولا المفروض السلطات تتعامل معاهم بس للأسف تلقى التحريات في المجمعات والمطاعم اصلا ربع المدخن ومايسوون له شي

تحياتي

يا ريت والله كل المدخنيين مثلك , كان الدنيا بخير
غزلان
23-05-2010, 02:33 PM
تم التصويت

وياريت يمنعون الدعايات الى تجذب المراهقين لهالمرض القاتل


يسلموا اخوي
Petroleum
23-05-2010, 03:17 PM
ايش سووو لكم المدخنين يعني ؟

و الله مضطهدين من الأجانب في بلادنا و مضطهدين من اهلنا بسبة التدخين

علموني وين نروووح ؟
مستر بن
23-05-2010, 03:23 PM
المشكلة مكتوووب ورا العلبة ان سبب رئيسي للسرطان
بس في نااس ما تفهم
مستر بن
23-05-2010, 03:31 PM
والناااس مسوينها رزه


ماركة دنهل

حشا ما بقا الا
زقارة بربري
ههههههههه
غابت الشمس~
23-05-2010, 03:38 PM
والله لو يخلونه بميه
بينثبرون الشباب اللي توهم طالعين من البيضه وكل واحد زقارته بيده اطول منه!!
hemoud123
23-05-2010, 03:44 PM
والله لو يخلونه بميه
بينثبرون الشباب اللي توهم طالعين من البيضه وكل واحد زقارته بيده اطول منه!!

وهذا بيت القصيد
هذه الفئه اللي لازم نستهدفها
الصراحه جبتها
freespirit
23-05-2010, 05:18 PM
والله لو يخلونه بميه
بينثبرون الشباب اللي توهم طالعين من البيضه وكل واحد زقارته بيده اطول منه!!

سؤال بالله.. ليش اهل قطر يشترون رنجات؟ لانه الموتر عملي؟ شكله عجيب؟ يتحمل لعنه مترس؟

لا. لانه غالي. ولانه ماركه ... انتو تبون تخلون التدخين نفس الشي.. هذا غالي.. لعيال العز بس.. الفقارى ما يدخنون هههههههههههه

والله العظيم لو ارتفع سعره ان تشوف ناس اكثر تدخن, بس عشان احنا عندنا فلوس وشوفنا هههههههههه

عدلو مفاهيم الشعب اول وعقب تعالو قولو اقطعو الدخان

بالنسبه للاخوات.. لاترفعون لي ضغطي؟ مكتوب على الباكيت يجيب السرطان؟ زين البيبسي يجيب القرحه.. الجوال يزيد فرصه سرطان المخ خمسين في الميه

ماشوفكم قطعتو الاثنينه؟ السمنه سبب رئيسي لامراض القلب.. والسكري... ماشوفكم قطعتو مكدونلدز؟ واللي رزقني ان نسبه بنات الدوحه المنتفخات اكبر من نسبه المدخنين من الشباب, صلحو عماركم وبعدين تعالو تشكو علينا

اشياء غريبه يشيخ.. وترفع الضغظ
الجني
23-05-2010, 05:23 PM
انا اتمنى زيادة الضريبة الى 100 ريال

و تسمى ضريبة مستشفى الأمل


يعني يا مدخن هذه الأموال نأخذها منك
لكي نعالجك بها عندما تصاب بالسرطان
hemoud123
23-05-2010, 06:37 PM
اعتقد زيادة ضريبة على المنتج .. شيء جيد ..
لكن لا أعرف ما هي النسبة ..

واعتقد فرض غرامة مالية .. على التدخين في الأماكن العامة .. مثل الأسواق وغيرها .. أمر مطلوب ..

وضروري .. فتح عيادات لمعالجة مدمني التدخين ..


بنت أخوي .. عمرها 8 سنوات ..
أبوها يخاف يدخن أمامها ..
لأنها كل ما دخن .. بكت .. تخاف عليه ..
والسبب شافت برنامج تلفزيوني ..
حاطين فيه صورة لرئة مدخن .. وصورة لرئة شخص غير مدخن ..
ومنظر التلف في رئة المدخن .. خلى البنت في قلق ..
فحكرت حق أبوها .. بالصياح ..

لكن للأسف .. لم يقطع التدخين ..
ملاحظة :: الكلام لك يا أوتوسان ..
مع احترامي لكاتب الموضوع ..

بنت سيف

نسبة الضريبه لازم تكون عاليه حتى تؤتي اكلها والفايده المرجوه منها , في بعض دول اوروبا يصل سعر العلبه الواحده قريبا من مئة ريال
قصة ابة اخيك فعلا تدعو الانسان للتفكير مرتين قبل ان يواصل التدخين وبالتاكيد فيه اشخاص لو تعرضوا لمثل هذا الموقف بيكون دافع قوي لهم لترك هذه العاده
على العموم انا ايضا معك اختي انتظر اوتوسان يعلق لنا على القصه
واشكر مرورك العطر
حليتان*
23-05-2010, 06:41 PM
اذا التدخين ممنوع في المحمعات ...عيل ليش يحطون طفايات زقاير في الزوايا



واعتقد ان الضريبه لو كانت 100% الي يبي يدخن بيدخن ...وفي ناس التدخين يمشي في عروقهم ولو تركوه ماتو
hemoud123
23-05-2010, 06:41 PM
انا اتمنى زيادة الضريبة الى 100 ريال

و تسمى ضريبة مستشفى الأمل


يعني يا مدخن هذه الأموال نأخذها منك
لكي نعالجك بها عندما تصاب بالسرطان

الله يكفي الجميع شر الامراض ان شاء الله
ولكن مئة ريال اقتراح معقول حتى نصعب الامر على شريحه من المجتمع هم الاطفال والمراهقين اللي ياخذون مصاريفهم من الام والاب
al-sadd
23-05-2010, 06:58 PM
سوؤال اوجه للمسوؤلين في اي دوله

الحشيش = الموت
المخدرات = الموت
التدخين = السرطان وثم الموت يعني تتعذب وبعدها تموت

شالفرق ؟
كلهم في النهايه ادوات للموت !
المخدرات امتنعت وصارت ممنوعه لانها تقتل الانسان
وكذالك الحشيش
فليش التبغ لليوم موجود "وبكثره"

هل لأن له مدخول يعادل مدخول ميزانية دوله كامله !
هل لأن لا أحد يتكلم !

وصراحه ادق تحيه لأندونيسيا
أول دوله بدة فـ منع التبغ
فـ البدايه امنعته على الشياب والاطفال ومن ثم على الشباب اقل من 18 واخيراً على الجميع ويمنع
منع باتاُ دخوله الدوله
دوله غير مسلمه ودوله نائيه لاكن عندها وعي
وصراحه خطوة كبيره لهم :-
اتمنى ربعنا يسمعون ويطبقون

ع العموم تسلم يا راعي الموضوع ع الموضوع الشيق
naklan
23-05-2010, 07:01 PM
تم التصويت بزياده 50 ريال شكراً لصاحب الموضوع على الطرح

موضوع التدخين موضوع خطير ويتبعه مشتقاته الشيشه اوالسويكا وكل وسائل الكيف

الي انا استغرب منه انه ناس اصيبو بمرض السرطان من السجائر وياخذ علاج كيميائي وما زال يدخن او اصيب

بالسرطان في فمه مكان وضع السويكا المعرفه بل ( السعوط او النسوار بالباكستاني )

وما زال تحت تاثير ادمانها الموضوع ادمان والمشكله ان صاحبه لا يعترف

بالادمان واي واحد تسئله يقول لك شوي وعلى خفيف وان واخواتها

ختام كلامي اقول لكل من لا يدخن ( اشكرك لانك لا تدخن )
Bu Rashid
23-05-2010, 07:10 PM
بارك الله فيك اخووووووي حموووود .. تم التصويت

يجب رفع الاسعار قدر المستطاع
يجب توسيع مناطق ممنووووع التدخين
توعية المواطن والمقيميين بان المدخنيين غير مرغوب فيهم للتوظيف كي تشجع هذه التوعيه
بان يمتنع الطلاب واليهالوا عن التدخين منعاٌ باتاٌ
منع التدخين خلال قيادة السياره وطبعا كما تعلم اخوي حمود لي موضوع بهذى الشأن

واتمنى للجميع الصحة والعافية ويبعد عنهم هذى السم القاتل المسموح وبالقانون
hemoud123
23-05-2010, 09:04 PM
اذا التدخين ممنوع في المحمعات ...عيل ليش يحطون طفايات زقاير في الزوايا



واعتقد ان الضريبه لو كانت 100% الي يبي يدخن بيدخن ...وفي ناس التدخين يمشي في عروقهم ولو تركوه ماتو

اكيد اللي بيدخن ما فيه شي بيمنعه
لكن على الاقل خلنا نمنع النشئ الجديد ما ينضم الى قافلة المدخنين
hemoud123
23-05-2010, 09:08 PM
بارك الله فيك اخووووووي حموووود .. تم التصويت

يجب رفع الاسعار قدر المستطاع
يجب توسيع مناطق ممنووووع التدخين
توعية المواطن والمقيميين بان المدخنيين غير مرغوب فيهم للتوظيف كي تشجع هذه التوعيه
بان يمتنع الطلاب واليهالوا عن التدخين منعاٌ باتاٌ
منع التدخين خلال قيادة السياره وطبعا كما تعلم اخوي حمود لي موضوع بهذى الشأن

واتمنى للجميع الصحة والعافية ويبعد عنهم هذى السم القاتل المسموح وبالقانون


تسلم اخوي بوراشد
والله انك جبت نقطه مهمه
في كثير من الدول في طلبات التوظيف توجد خانة هل انت مدخن ؟ في شركات التامين تجد نفس السؤال
اشكر مرورك العطر
hemoud123
23-05-2010, 09:10 PM
سوؤال اوجه للمسوؤلين في اي دوله

الحشيش = الموت
المخدرات = الموت
التدخين = السرطان وثم الموت يعني تتعذب وبعدها تموت

شالفرق ؟
كلهم في النهايه ادوات للموت !
المخدرات امتنعت وصارت ممنوعه لانها تقتل الانسان
وكذالك الحشيش
فليش التبغ لليوم موجود "وبكثره"

هل لأن له مدخول يعادل مدخول ميزانية دوله كامله !
هل لأن لا أحد يتكلم !

وصراحه ادق تحيه لأندونيسيا
أول دوله بدة فـ منع التبغ
فـ البدايه امنعته على الشياب والاطفال ومن ثم على الشباب اقل من 18 واخيراً على الجميع ويمنع
منع باتاُ دخوله الدوله
دوله غير مسلمه ودوله نائيه لاكن عندها وعي
وصراحه خطوة كبيره لهم :-
اتمنى ربعنا يسمعون ويطبقون

ع العموم تسلم يا راعي الموضوع ع الموضوع الشيق

بالتاكيد اخوي ان الدافع اقتصادي بحت , ومعروف ان شركات التبغ لديها اقوى اللوبيات هي وشركات الاسلحه , يعني بالعربي شركات الموت
اشكرك على المعلومه القيمه واحيي اندونيسيا على القرار الشجاع
وتسلم على المرور
freespirit
24-05-2010, 10:04 AM
سوؤال اوجه للمسوؤلين في اي دوله

الحشيش = الموت
المخدرات = الموت
التدخين = السرطان وثم الموت يعني تتعذب وبعدها تموت

شالفرق ؟
كلهم في النهايه ادوات للموت !
المخدرات امتنعت وصارت ممنوعه لانها تقتل الانسان
وكذالك الحشيش
فليش التبغ لليوم موجود "وبكثره"

هل لأن له مدخول يعادل مدخول ميزانية دوله كامله !
هل لأن لا أحد يتكلم !

وصراحه ادق تحيه لأندونيسيا
أول دوله بدة فـ منع التبغ
فـ البدايه امنعته على الشياب والاطفال ومن ثم على الشباب اقل من 18 واخيراً على الجميع ويمنع
منع باتاُ دخوله الدوله
دوله غير مسلمه ودوله نائيه لاكن عندها وعي
وصراحه خطوة كبيره لهم :-
اتمنى ربعنا يسمعون ويطبقون

ع العموم تسلم يا راعي الموضوع ع الموضوع الشيق

اندونيسيا فيها اكبر عدد مسلمين في دوله واحده في العالم شلون تقول ماهي مسلمه؟ هههههه

وبعدين دوله نائيه؟ اندونيسيا تصنع سيارات.. احنا نحفر في الارض ونطلع بترول ونبيع معظمه بدون تكرير.. شفت الفرق؟

الحين نجي حق كل شي يخليك تموت.. حبيبي اركب موترك.. يمكن تموت.. روح اكل.. يمكن تغص وتموت..

من لم يمت بالسيف مات بغيره .. تعددت الاسباب والموت واحد


بدال ما انتو شادين حيلكم علينا في شي اصلا مقبول اجتماعيا في قطر.. حتى الشياب ماينقدون عليك لو تسويه.. روحو شدو حيلكم وسوو استطلاع منع خمر ومراقص وبنات يمشون مفاصيخ على الكورنيش

مهتمين في الاشياء اللي تأثيرها غير مباشر عليكم ابدا ابدا ابدا. لو انا اسابق في الرالي.. بتقول لي الشيخ لا تسابق يمكن تموت؟ وشلقفك؟

لو انا اسابق في الفروسيه.. شكثر يطيحون تحت خيل ويموتون.. ليش ماتمنعونهم؟

للعلم هالشيئين نسويهم ومالهم اي فايده ابدا ابدا ابدا. وشفايده سواق الرالي؟ وشفايده اللي يسابق على حصان؟ نفس الشي الدخان.. لا وهالهوايتين يكلفون اكثر


مثل ما قال لك بندر بن سرور الله يسلم

حسبي على الدخان لو هو مضري...له حزه عند احتكام المصيبه

تحياتي
OTOsan
24-05-2010, 11:29 AM
فري سبيريت ... انا ادخن .. بس الفرق بيننا اني اشوفك متحمس وايد للتدخين :)


باقولك شغله .. اللي ينصحك تترك التدخين قول له (جزاك الله خير وماقصرت) وترك التدخين شي يرجع لضميرك..
اما اللي مسوي فيها ملاك منزه عن الخطأ ، ويعتقد ان المدخن شيطان وان فيه وفيه ولازم نبتعد عنه ويظن انه احسن منك لانه مايدخن .. فقول له (فرقاك عيد ) وعطه الاذن الصمخى !!
واصلامحد يجبر حد على انه يمشي مع مدخن !!

بس لو تبي نتكلم بصراحه المفروض ما نتحمس وايد للسجاير ونشجع عليها .. يعني يافري سبيريت جزاك الله خير لاتدافع عن شي ..الا اذا انت متاكد انه صح 100% !!
freespirit
24-05-2010, 06:45 PM
فري سبيريت ... انا ادخن .. بس الفرق بيننا اني اشوفك متحمس وايد للتدخين :)


باقولك شغله .. اللي ينصحك تترك التدخين قول له (جزاك الله خير وماقصرت) وترك التدخين شي يرجع لضميرك..
اما اللي مسوي فيها ملاك منزه عن الخطأ ، ويعتقد ان المدخن شيطان وان فيه وفيه ولازم نبتعد عنه ويظن انه احسن منك لانه مايدخن .. فقول له (فرقاك عيد ) وعطه الاذن الصمخى !!
واصلامحد يجبر حد على انه يمشي مع مدخن !!

بس لو تبي نتكلم بصراحه المفروض ما نتحمس وايد للسجاير ونشجع عليها .. يعني يافري سبيريت جزاك الله خير لاتدافع عن شي ..الا اذا انت متاكد انه صح 100% !!



فديت خشمك والله يبين عليك انسان تعرف تناقش بأسلوب حضاري..

انا مو متحمس للتدخين. انا اشوف هالموضوع الوحيد اللي الناس كلهم يحاولون يقيدون حريه الشخص فيه.. والمشكله انهم ماينصحون شوف الاخ تبع مستشفى الامل.. ولا الاخ اللي يبينا نقتدي بأندونيسيا.. ما شاف انه اندونيسيا رئيسه وزرائها حرمه.. والدوله فقرها مدقع.. وكل شي فيها تبن الا العاصمه وكم جزيره تصلح للسياحه,

بس الموضوع هنا انهم يحاولون يفرضون ضريبه على شي انا حر لو اسويه؟

انا انسان مكفوله لي حريتي دامها ما تتعارض مع حريه غيري .. فعشان كذا انا انسان محترم ما امشي في المجمع وادخن واقول انا انسان حر..

بس في نفس الوقت انا مرتاح بحريتي حاليا.. ومستعد ادافع عنها قدام اي شخص يشوف انه اوكي انا اسلب حريه غيري .. بس المفروض غيري ما يتعدى علي..؟

بكره بيقولون لك بنمنع المدخن يتزوج ولا يخلف عيال.. وممنوع التدخين في الدوامات.. وممنوع تدخن في موترك وانت تمشي لانه الجوال ممنوع اشمعنى الزقاره.. معظم اللي دخلو هنا دخلو على جهل وحماسه زايده وما راعو حاله الناس اللي الحين مدمنين

شنو سوت الدوله عشان تحارب التدخين؟ ولا شي .. مافيه دعايات.. مافيه هوت لاين.. لو تروح للدكتور في قطر تقول له بقطع الدخان يقول لك بالتوفيق.. ماعندهم الحلول المتوفره عند غيرهم حق اللي من البدايه يدخن.. بس اللي عبالهم فله.. الله لو رفعنا الفلوس بيخفون المدخنين ههههههه

يعني الله يسلمك نقاشي كله مو ترويج لمرلبورو... لا بس سالفه مبدأ

تحياتي
hemoud123
24-05-2010, 06:55 PM
الاخ اوتوسان والاخ فريسبيرت , الصراحه انا معجب باسلوبكم الراقي
بس ابغي اقول شي
الفكرة من فرض ضريبه ليس لمنع حمود من التدخين او الحد من حرية فريسبيرت او التدخل في شئون اوتوسان طبعا لا
ولكن الهدف منها بيكون منع ابن حمود من الوقوع في الفخ وكذلك ابن اوتوسان وابن فريسبيري
يعني بالعربي الستهدف بيكون الجيل الناشئ
freespirit
24-05-2010, 07:06 PM
الاخ اوتوسان والاخ فريسبيرت , الصراحه انا معجب باسلوبكم الراقي
بس ابغي اقول شي
الفكرة من فرض ضريبه ليس لمنع حمود من التدخين او الحد من حرية فريسبيرت او التدخل في شئون اوتوسان طبعا لا
ولكن الهدف منها بيكون منع ابن حمود من الوقوع في الفخ وكذلك ابن اوتوسان وابن فريسبيري
يعني بالعربي الستهدف بيكون الجيل الناشئ

انا فاهم اخوي انها بتصعب على الصغار.. انا مشكلتي مع الكبار ههههههههههه تحديدا نفسي

خمسين ريال في اليوم تقريبا.. يعني الف وخمس ميه ريال في الشهر .. ترا واجد؟

انا يا الشخص الراشد اللي وقعت في هالفخ من زمان.. وماعندي القدره الصراحه اطلع منه.. ليش المفروض اتعاقب على شان الهنود اهل الدكاكين يدورون الربح السريع ويبيعون الدخان على الاطفال

انا رجال بعارض هنا في استراليا يوم اطلب باكيت.. مرات يقولون لي طلع بطاقتك.. لما كان عمري 14-18 والله العظيم ولا مره انطلب مني بطاقه في دكان في قطر

الحل اخوي زياده الرقابه على المحلات.. والله لو اني في حمايه المستهلك والبلديه لالعن مترس الدكاكين كمين كل يوم .. ادز عليهم ولد صغير يشتري الدخان ولو باعو غرامه ههههههههه