تحذير من بنك

[qatar-uae]

السلام عليكم
والله فيه موضوع وودي الناس تدري فيه عشان مايتوهقون

الموضوع فيه واحد من الربع كان في بنك الريان وصارله شهرين عندهم وحب يغير البنك وقالهم وشو المطلوب قالو تسدد المديونيه كامله مع الارباح وبعدها نرجعلك %90 من الفائده الى خذناها منك لانك ماكملت سنه عندنا الريال راح البنك الثاني وقالهم الموضوع اطلبو عليه شهادة مديونيه من البنك الى اهو فيه وجابلهم الشهاده بالمبلغ كامل وبعد ماسددو له المبلغ جاهم بعد 3 ايام وقالهم وين الي بترجعونه %90 من الارباح قالوله مالك شي عندنا الغريب من ذلك انك اذا كلمت الكول سنتر للبنك يقولولك انا بنرجع لفلوس وبعد ماتتوهق ماتحصل شي

وذا احد عنده خلفيه في هالمواضيع ويقدر يساعد الريال بيكون مشكووووور

[ماريسا]

لا حول ولا قوة الا بالله
ان شالله تلقى اللي يفيدك

[مشتاقة لقطر]

غريبة ؟؟

خل يتابعهم ويظهر الاثباتات ويطلب القوانين ويشوف وضعه

[Gh2o]

يشتكي عليهم ولا يتاكد من شروط البنك لان في حدود معينه للمبلغ
يعني مثلا لو السلفيه اقل من ٥٠ الف مايرجعون له يمكن هو دفع على اقساط وهالمشكله صارت لي مع المصرف
طبعا المبلغ الي ذكرته مثال

[ام السعف]

المفروض ما يعتمد على كلام شفهي ،، يطلب ما يثبت كلام الموظف بخطاب من البنك
لأن بعض الموظفين ما يدرون وين الله قاطهم ،،

[ابن مانع]

على ماعتقد القانون يسمح له انه مايرجع المديونيه
بس لهم استثناء بس له شروط هذا على كلام المصرف الاسلامي

[qatar-uae]

مشكورين كلكم على الردود والرجال بيحاول مع البنك المركزي ولا اعتقد بيشتكي عليهم لان المبلغ الفائده الى ماخذينها 180 الف رال من غير القرض

[البدع]

انا نفس الشيء سواها فيني بنك اسلامي

قالوا لي ادفع وبنرجع لك ارباح

ويوم سالته قال 50% الى 60%

وفي الصدق هو اقل من هذا

رجعوا اقل من 20%

على العموم الحساب يوم الحساب

[bo_besht]

مرحبا اخوي
البنك يرجعك مكافاة تسديد في حالة انك سددت الدين من حسابك الخاص
اما في حالة بنك اخر سددت المديونية ماراح يرجعلك وله ريال
حتى ادا اشتكيت عند المصرف المركزي لانه البنك المركزي مايلزم البنوك الاسلامية انهم يرجعون جزء من الارباح او الارباح كلها

[VIP-QATAR]

مرحبا اخوي
البنك يرجعك مكافاة تسديد في حالة انك سددت الدين من حسابك الخاص
اما في حالة بنك اخر سددت المديونية ماراح يرجعلك وله ريال
حتى ادا اشتكيت عند المصرف المركزي لانه البنك المركزي مايلزم البنوك الاسلامية انهم يرجعون جزء من الارباح او الارباح كلها

كلامك صحيح
يسمونها مكافأة بس بشرط اذا رجعتها كاش مب عن طريق بنك ثاني مثل ماسويت
بس مفروض كانو يبينون لك هاذي النقطة قبل كل شي والله يعوض عليك

[الدوحاتي]

اخوي تقدر تكلم مسوول في البنك وتعطيه التاريخ اللي كلمت فيه الكول سنتر - لان جميع المكالمات مسجله واذا لك حق راح يرجع لك باذن الله

[طلعة الروح]

الظاهر افلس سوقهم

[barod]

يعني وش الفرق سوى دفع كاش او البنك الثاني سدد عنه صج انهم نصابين

[bo_besht]

عشان يحدون على الناس مايغيرون البنك الي اهما فيه

[صــادق النية]

ابشركم توني اليوم ماخذ اخلاء طرف من بنك الدوحه ابركها من ساعه بعد عناء طويل معهم الحمد الله اني افتكيت من البنك الربوي
الغريب ان الموظف الي عطاني اخلاء طرف قالي فيه مبلغ في حسابك قلتله ايه هذا راتبي قال اسحبه قدام يخصمون منه قلت له ليش مالكم اي متطلبات عندي قال تعرف هذا بنك الدوحه يعني حتى الموظفين دارين ان فيه سرق , اول ماطلعت رحت الصرافه علشان السحب المبلغ كامل واتفاجئ انهم عاملين حجز على المبلغ رجعت لهم استفسر ويش السبب قالوا مهب من عندنا البلوك, شيك معا فرعك رحت فرعي وامري لله, بعد انتظار ساعه ونصف افتحوا احسابي .
وانا اتمنى كل من له حساب في البنوك الربويه ان لايتوانى عن تغير حسابه الى بنوك اسلاميه ليبعد نفسه عن الشبهات

[جوال 11]

الله يهديه يعتمد على كلام موظف في البنك والمفروض يطلب كتاب يثبت أرجاع 90% من الفوائد من البنك ، البنوك تضع القوانين الداخلية لها وتنفذها نراكض وراء كل ما هو أسلامي والناس تحب التعامل مع النظام الأسلا مي لكن الظاهر الأسم هو الأسلامي فقط والمعاملات خارج نظام الأسلام والأمثلة كثيرة البنوك شركات التأمين وغيرها

[القبقب]

شوف اخوي اذا دفعت الفلوس كاش يردون لك ال 90%

لاكن اذا دفعها لك بنك ثاني الحسبه تختلف

الكلام هذا اكيد

بس كان المفروض يوضحون لك النقطه هاذي

تحياتي