افزعوا للغشيم

[الغشيم]

السلام عليكم
بصراحه انا جديد في البورصه يعني تقريبا لي فوق الشهرين او اقل لاني ماكنت ادري ان اصلا في بورصه في الدوحه الا العام هههههه لكن سمعت عن ارباح البورصه من الربع وقلت خل اجرب حظي وتصدقون لي حد الان وانا ربحان :) لا والربع يستشيروني لانهم كلهم غشماء مثلي هههههه المهم اني كنت افكر نفسي داهيه في البورصه واضارب واربح لكن من فتره انا كنت اتابع منتداكم واكتشفت اني اكبر غشيم في بورصة الدوحه بعد اللي قريته من تحاليل عندكم لاني عمري ماتابعت تحليل من قبل لكن مثل ماتقولون اتبع سياسة القطيع اذا شروا العرب شريت واذا باعوا بعت :D و اقول والله البورصه سهله يعني مايبيلها شي السهم نزل اشتر واذا ارتفع بيع لكن عقب ماشفت اللي صار في نكبة ابريل عرفت ان ربحي من الله ومهوب من ذكائي وقلت لازم افتح عيني على الاخر :eek: لاني سمعتكم تقولون ان الانسان لازم يقدر ارباح الشركات والقيمة السعريه للسهم والقيمة الدفتريه ,,,, ماتقولون لي وين طلعت لنا بعد هذي القيمه الدفتريه :rolleyes: حنا يالله عرفنا القيمه الاسميه ..... المهم انا عندي اسئله كثيره تدور في راسي وابيكم من فضلكم تجاوبون عليها بضمير والا بطيح طيحه ماعادني بقايم منها :p اولا كيف اعرف ان هالشركه تسوا قيمتها ثانيا اللي باطه جبدي القيمة الدفتريه كيف اعرفها وهل هي تاثر في سعر السهم او لا واذا ماتاثر لا تشرحونها لي لاني مابي ااتلخبط اكثر وبعدين وابي اعرف سهم الصناعات اشتريه بكره كان طلع وتهقون وين اقل شي بيوقف عنده يعني بيوصل 200 او اقل وبعدين البنوك الاسلامي والدولي متى يكون اقل سعر للشراء الحين او الصيف وبعدين اذا سالتوني انت مضارب او مستثمر مادري بصراحه يعني انا لي شفت الربح زين بعت يعني اضني مضارب هههههههه والله في راسي اسئله واااااااايد بس بخليها لوقت غير لانكم اخاف تهملون رسالتي من كثر اسأتي ......اتمنى تقبلوني صديق في منتداكم وشكرا اااا مقدما

[سهم عتيج]

والله يالغشيم ,, أول شي أشكرك كثيرا على صراحتك الكبيرة,, واللي هي بالتأكيد تعبر عن الكثيرين من الذين دخلوا السوق في الآونة الأخيرة,, وقد طرحت نقاط غاية في الأهمية,, وكيف ان الأرباح التي تحققت لك في الشهرين الماضيين لم تكن نتيجة تخطيط سليم,, ولكن نتيجة ارتفاع السوق بشكل عام,, لذلك فالكل كان ربحان في الشهرين الماضيين اذا اشترى أي سهم قبل ذلك التاريخ حتى لو لم يعرف أي شيء عن الأسهم

وبالنسبة لأسئلتك المهمة,, فممكن تاخذ لك جولة في منتدى البرامج والدروس,, وان شاء الله راح تجد بعض الاجابات اللي تهمك..

واسمح لي بتثبيت الموضوع لبعض الوقت حتى يطلع عليه الجميع,, لأنه بالفعل حالتك تعبر عن وضع الكثيرين من الناس اللي قرروا الدخول في السوق حديثا وأصبحوا مرجعا ومفتيين للغير ,, وهذا الذي نتمنى ان يستفيد منه الجميع.. وهو ان يعرف كل منا بعض الأدوات التي تساعدنا على اتخاذ قرارات الاستثمار في هذا السهم او ذاك..

واتمنى لك التوفيق

[الزقروطي]

السلام عليكم

اولا اكرر شكر الاخ سهم عتيج واشكرك على صراحتك
وثانيا تأكد انه محد راح يهمل رسالتك ابدا

تقبل تحياتي

الزقروطي

[الغشيم]

سهم عتيج والزقروطي شكلكم بس دخلتوا وتطمشتوا علي وضحكتوا لكن ماشوف فيه تعليمات فيا شباب او بنات اللي عنده خبره ارجوه الفزعه ويشرح بطريقه سهله ومبسطه لي اذا ماعليه كلافه ومشكوووووورين

[المراقب]

أخوي: العملية ليست بالسهولة التي أنت متصورها لحساب القيمة الدفترية، ففيها عوامل كثيرة تدخل في الحسبة.

[سهم عتيج]

بالعكس يالغشيم,, أتمنى انك ماتكون فهمتني خطأ بقدر ماأعجبتني صراحتك في الطرح,, حيث ان الكثيرين من المتعاملين بالأسهم حالتهم تشبه حالتك,, ولكنهم يخشون ان يقولوا الحقيقة,, لذلك فانك بهالموضوع كشفت واقعا موجودا لايريد الكثيرين الخوض فيه,, ولكني أيضا معجب بك لأنك بالفعل تريد ان تعرف الأدوات الأساسية للتحليل حتى تستطيع تقييم أي سهم,, ويمكن انك ما انتبهت حق كلامي يوم قلت لك يمكنك الذهاب الى قسم البرامج والدروس حتى تجد ضالتك هناك,, ولكني سأجيبك على بعض النقاط,, لأنها تحتاج الى صفحات كثيرة للشرح,,

بالنسبة للقيمة الدفترية وكيفية حسابها فدعني أول شيء أذكر بعض الامور

أولا يجب ان نعرف ان هناك 3 قيم للسهم وهي مهمة جدا..
1- القيمة الاسمية.. وهي القيمة التي ينص عليها القانون التجاري لأي دولة,, حيث تمثل القيمة الاسمية القيمة الأصلية التي يدفعها المساهم للسهم عند الاكتتاب,, لذلك فقد يدفع المكتتب عند الاكتتاب نصف القيمة الاسمية,, وبعدها يدفع الباقي على أقساط كلما دعت الشركة الى دفع تلك الأقساط.. وقد تكون القيمة المدفوعة للسهم 100% ,, او 50% كحالة أسهم ناقلات ومواشي,, او أي نسبة تصل اليها القيمة المدفوعة من القيمة الاسمية..

وأهمية القيمة الاسمية للسهم تكمن في ان الشركة تكون ملتزمة بدفع الأرباح أو طلب القسط بناء على القيمة الاسمية للسهم,, فمثلا لو قررت الشركة دفع 10% كأرباح للسهم,, فهذا معناه ان النسبة ستكون بناء على القيمة الاسمية للسهم,, وستكون ريالا للسهم,, وهذا مايقع فيه الكثير من الناس,, حيث ان البعض يعتقد ان الأرباح تدفع بناء على القيمة السوقية التي سنعرفها لاحقا,, وهذا خطأ يقع فيه الكثيرين..

2- القيمة السوقية,, وهي القيمة التي يتداول بها السهم في السوق المالي,, وقد تكون القيمة السوقية أكبر أو أقل من القيمة الاسمية بناء على حسب العرض والطلب,,

3 القيمة الدفترية,, وهي القيمة التي تعكس القيمة الفعلية المدونة في الدفاتر لكل سهم,, وقد تكون القيمة الدفترية أقل أو اكثر من القيمة الاسمية,, ويتم احتساب القيمة الدفترية للسهم بقسمة حقوق المساهمين على جميع الأسهم الكلية للشركة,,

وتكمن أهمية القيمة الدفترية للسهم حينما تعلن الشركة انتهائها او تصفيتها أو بيعها للغير,, بحيث يحصل السهم الواحد على القيمة الدفترية المدونة في سجلات الشركة بعد خصم الديون والالتزامات ان وجدت,,

تقريبا هذا كلام مختصر عن سؤالك عن القيمة الدفترية وأتمنى اني أكون قد أفدتك في الموضوع,, وان شاء الله في مناسبات أخرى سنتكلم أكثر حول مثل تلك المواضيع الهامة,,

والله الموفق

[الغشيم]

سهم عتيج الله يمسيك بالخير .... انا من شفتك رديت علي مرتين هذا يعني انك مهتم بموضوعي بغض النظر عن مدى فهمي للموضوع او لا ومشكور يا طويل العمر وماقصرت والله يجعلك ذخر لنا واشكر بعد المارقب والزقروطي مع اني والله مافهمت وش يعني الزقروطي ههههههه مشكور ين كلكم

[المراقب]

أخوي الغشيم، إذا أردت أن تعرف القيمة الدفترية لأي شركة في السوق، فيمكنني أن أعطيها لك.