ارجوكم ..فالنتعلم الدرس..!!!!

[ابوعلي اليافعي]

التاريخ 12/3/2005

بو راشد موظف في احد الدوائر الحكوميه واثناء قيامه بعمله اليومي فالمكتب جاء اليه الاستاذ صابر زميله فالعمل ودار بينهم هذا الحوار

صابر:لو سمحت يابو راشد ممكن اطلب منك طلب ..
بوراشد:تفضل اخوي
صابر..صابر :والله يابو راشد انا عندي 80الف ريال وعاوز اشتري فيهم اسهم وزي منته عارف ان احنا الاجانب مش ممكن نشتري الا بعد اسبوعين لذالك انا عاوزك تشترلي باسمك
بوراشد: وليش ماتصبر اسبوعين وبعدين تشتري بسمك..
صابر:يابو راشد زي منته شايف الاسعار كل يوم بتزيد يعني ممكن اذا صبرت اكتر من كدا ماقدرش اشتري ..
بوراشد:انشالله ولا يهمك انت جيب لفلوس وانا بكره باشترليك ..
اليوم الثاني يذهب بوراشد للسوق للشراء ويقوم بشراء اسهم لصابر ب80الف ريال..

التاريخ 30/3/2005

..صابر:باقولك ايه يابو راشد.
.بوراشد:امر يا صابر..
صابر:انا عوزك يابوراشد تروح اليوم البورصه وتبيع الاسهم الي شتريتها لي قبل اسبوعين..
بوراشد :ليش مستعجل ياصابر خلها الاسهم جاعده تطلع..
صابر:لا خلاص كفايه كدا انا راضي بالربح الي بيجيني..
بوراشد :انشالله ياصابر ولا يهمك الحين اروح ابيعهم...
عند باب البورصه يصادف بوراشد صديق عمره بو خالد ويدور بينهم هذا الحوار..
بوخالد :هاه بوراشد شعندك ياي البورصه..
بوراشد:سلامتك يابوخالد بس جاي ابيع اسهم في شركة(ال..)..ونت شعندك هني..
بوخالد:والله انا جاي اشتري اسهم بنفس هالشركه يقولون ان الاسهم بطير يوم يفتحون للاجانب..ليش مستعجل بالبيع
بوراشد:اي والله يقولون بس انا محتاج لفلوس....
بوراشد يسجل امر بيع ..وبو خالد يسجل امر شراء..وبعد نص ساعه يتواجه مره ثانيه بوخالد وبو راشد عند مخرج البورصه ..وفي نفس الوقت ياتي ماسج لبو راشد
((تم بيع عدد520سهم في شركة ال.. لحسابكم رقم.. بسعر...))
وياتي مسج اخر لبو خالد
((تم شراء 520سهم في شركة ال..لحسابكم رقم ..بسعر..))..

بعد اسبوعين من دخول الاجانب للبورصه صابر يستعد بال80 الف والارباح لدخول البورصه من جديد..وبو خالد يستعد لدخول السجن بسبب عدم استطاعته تسديد الدين لان الاسهم الي اشتراها لاتسوى الان نص قيمتها..الطيبه الزايده واللا مبالاه جعلت بوراشد يضر صديق عمره بو خالد بدون ان يدري..هذا المشهد تكرر مئات المرات ..ولا وش رايكم..

[سهم عتيج]

أعتقد ان هذه القصة بالفعل قريبة جدا من الواقع,, وبالفعل قد يكون هناك ضرر كبير من سوء استغلال مثل هذه الظروف,, وان شاء الله الكل يتعلم من مثل هالدروس,, لأننا في النهاية نتعلم كل يوم من مثل هذه الدروس في الحياة..

ومشكور يابوعلي على هذه القصة,,

[المراقب]

أخوي بو علي قصة طيبية، ولكن أخوي لا أظن أن هذا هو السبب في النزول الساحق، يمكن حصل هذا، ولكن اللي قاعد يبيع الحين ويعرض مئات الألوف نحن.

ثاني شي كم واحد عمل شدي وكم واحد باع قبل 3/4؟

السبب الحقيقي برأي هي كثرة المعرض منا وخوفنا، وانظر مثلا ناقلات، مين اللي قاعد يعرض الملايين؟ كل يوم؟

[قطري]

قصة ظريفة يابوعلي
وفي نفس الوقت يؤخذ منها كثير من العبر
شكراً لك

[sulai6i]

السلام عليكم

نعم هذا هو الواقع فعلا .. صديق مقرب لي فعل مثل ما فعل بو راشد في هذه القصة , وعندما عرفت بما عمله
قلت له بأن هذا تستر .. ونهرته .. ولكنه قال هذا صديقي في العمل و ( مسكين ) !!

ربما صديقي يقرأ ردي هذا وسيعلم في قرارة نفسه بأن ما فعله خطأ


شكرا يا بو علي على نقلك لما حدث فعلا في قطر

[ابوسعود]

شكرا يابوعلي


ان الله يرزق من يشاء بغير حساب

والدنيا دروس وعبر ومواعظ

وكلمه اخيره

((فلا تكرهوا شراً لعله خير، ورب ضارة نافعة))".

[ibrahem]

كلامك صحيح اخوي ابوعلي


واكبر دليل ان الشهر الأخير قفزت سيولة التداول من معدل 300 مليون ريال يوميا ووصلت بعض الايام حتى 700 مليون ريال ودخلت هاذي الأموال بالضبط مع اواخر ايام اكتتاب ناقلات الغاز


فعلا الأموال الزائده هاذي كلها اموال اجانب دخلت باأسماء قطريين وخرجو منها قبل دخول الأجانب بأيام معدوده


لأنهم طبقو اشتر عند الأشاعه وبع عند الخبر وبصراحه هم الي لعبوها صح


تحياتي

[ابوعلي اليافعي]

الاخوان..سهم عتيج..قطري..واحد في حاله..المراقب..البو سعود..ابراهيم..شكرا علمرور وابداء الراي..

[شاهيناز]

ابو علي

ضبطت معاك اللهجه :D

قصه قريبه من الواقع
ضرونا حسبي الله عليهم

الي بحسن نيه
والي بسؤ نيه باع اسمه بملايين

لناس مايستاهلون كان همهم الربح فقط


وللاسف بعضهم من الاغنياء لكن ولائهم لاهلهم الي خارج الحدود

اتمنى الدوله تشهر بهم حتى يكونون عبره للجميع

وسلامي

[الغشيم]

الاخت شاهيناز انا ادري انك ناقله توقيعك من منتدى او موقع معين لكن بيت الشعر تراه مكسور يعني ناقص شوي في الشطر الاخير وهي كلمة (اللي )يعني والكفه اللي راجحه لآل ثاني ...بغيت انوه وانا ادري ان الغلط مو منك من اللي كتبه قبلك .........وبعدين ياليت تعلميني كيف الطريقه اسوي لي توقيع ومشكوووووره

[شاهيناز]

اخي الغشيم

انا نقلت بيت الشعر من موقع شفته وسويت له توقيع

التوقيع عملته على الفوتو شوب

اذا تبغي اصمم لك بس عطني الكلمات
واللون والصور الي تبغيها

عذرا على مداخله في الموضوع

وسلامي

[موادع قطر]

مايدري انا في هاذي الحركه ضر بلاده وعيال بلاده وياليت كل الناس اتكون عندهم وطنيه


الله لايجازيهم خير.........وياريت اناس اتحس

[البرنس]

والله صار الي العن من كذا و السوالف كثيرة .. اقسم بالله اني لما اشوف الأشياء الي من النوع هذا يجيني ضيق و يرتفع الضغط و احس الدنيا ما بقى فيها خير و اشوف مناضر في البورصة اقسم بالله اني احس نفسي في الكزينو و المضاربين كنهم المقامرين الي في الكزينو ..

الله يهديكم ..

و تحية خاصة لخوي الغالي ابوعلي اليافعي و مشكور على القصة الحلوة ..

[مؤثر]

عن الحسد يابوعلي
ماودانا في ستين داهية الا الحسد
أعوذ بالله من الحسد

[ابوعلي اليافعي]

اخوي المؤثر وين الحسد الله يحفظك..لما كان المواطن يشتري للاجنبي قبل سنين او حتى اشهر محد تكلم وقلنا يالله مو مشكله خلهم يسترزقون ..لكن الشراء يكون قبل سبوعين من دخول الاجانب فهذي وبصراحه وبدون زعل اعتبرها حركه خبيثه من بعض الاجانب واستغلال لطيبة وعدم معرفة بعض المواطنين..ولا ليش ما ينطر هالكم يوم ويشتري على راحته..هذي مصيبه كبيره وديون وسجون ونت تقول عن الحسد...لاحول ولا قوه الا بالله

[البرنس]

عن الحسد يابوعلي
ماودانا في ستين داهية الا الحسد
أعوذ بالله من الحسد

حسبي الله عليك يا ابوعلي !

الظاهر و الله اعلم انك ضربت "مؤثر" على الوتر الحساس ، اعتقد انه هو ابوراشد ! ! !


الله يكون في عون الجميع ..

[ابوعلي اليافعي]

والله ممكن يكون بوراشد وممكن يكون صابر الله اعلم

[حسين ين عاقول]

اشكرك يا عزيز على هذى القصه الطيبه
بس انا اختلف معاك بو راشد ما ضر رفيجه كل الى صار
سوى تصرف من بو خالد او تقدر ا تقول الاساعات ا ثرت على بو خالد انه توقع مثل كل الناس ان الاسهم بترتفع
بعد دخول الاجانب و هذا الى احنا توقعناه تقدر التقول نصيب و قدر من الله ...

[السهم الاخضر]

أولا احييك يا بوعلي علي القصه الحلوه بعد ودي ان الكل يتعلم منها
بس احب اعلق تعليق بسيط هو صحيح الاخ ضر اهل بلاده وما عنده اي وطنيه
بس بعد احنا لازم نتعلم من صابر لانه ما طمع وايد اقتنع بالربح الي حصله ما صبر وايد وباع الاسهم
على عكسنا احنا فكرنا بالربح الكثير كل واحد فينا فكر بالبورش والحوت لين انكست علينا وطب السوق وقعدنا نصيح ونحط الي الصار على غيرنا صرنا مثل الي يطز عينه بصبعه