منطقة المعموره تستنجد ( وا أشغالاااه ) .. زحمة مرورية خانقه وينكم يامرور وأشغال ..

[شموع قطريه]

السلام عليكم ..

تشهد منطقة المعموره اختناقا مروريا يوميا وفي كل الاوقات وعلى وجه الخصوص اوقات الذروة ابتداء من دوار مدماك وانتهاء بإشارات المعمورة ..

فبعد افتتاح تقاطع 22 فبراير اصبحت السيارات تتكدس بطريق رهيبه على دوار مدماك .. وبالتالي تلك السيارات تتكدس مرة ثانية على الاشارات ..

وبما ان الشارع الجانبي الواقع بين دوار مدماك واشارات المعموره ( شرق المدرسة الهندية ) يطل على ارض فضاء فلماذ لاتستغل هذه الاراضي لتوسعة الشارع وفتح طريق فرعي للمتجهين ناحية الاشارات التي تدخلهم على منطقة المعمورة وبالتالي سوف يخفف ذلك من الزحام الخانق ..

والنداء الثاني لادارة المرور حيث ان منطقة المعمورة تشهد تجاوزات كثير من السائقين لقوانين المرور فنرى يوميا ونحن نوصل بناتنا للمدارس التي في هذه المنطقة تعدي السائقين المتجهين شمالا ناحية اشارات المعموره على المسار المعاكس مما يعرقل سير السيارات القادمه من الاتجاه المعاكس وبالتالي تحدث ازمه مرورية ومشادات كلاميه بين السائقين .. لدرجة ان حتى السائقين الاسيويين اصبحوا يرتكبون هذه المخالفه ( ااستخدام المسار المعاكس ) ويحدثون عرقلة سير للقادمين من الجهة المعاكسة ..

اتمنى ان ارى رجال المرور ينظمون السير في هذه المنطقة وخصوصا وقت الدوام المدرسي او وضع حواجز فاصلة بين المسارين لاجبار السائقين بالالتزام المسار وعدم التعدي على المسار المعاكس وعرقلة السير للقادمين منه ..

واناشد اشغال بايجاد فتحة جانبية للمتجهين لمنطقة المعمورة لتخفيف الزحام ودمتم بخير ..

[بويعقوب]

:weeping:الله يعين لين افتحوا الهايبر ماركت

[ولد النواخذه]

ياريال صار لنا من 2006 نعاني من هالشارع واحنا رايجين الدوام ولا حياة لمن تنادي مشكلة وخلاص أصبحت شئ معتاد التجاوزات على هالشارع والاختناقات المرورية الله المستعان

[استغفرالله]

يبيلها حل هالمنطقة

وانا مع اقتراحك ان يوجدون طرق جانبيه للدخول للمعمورة

[شموع قطريه]

ياريال صار لنا من 2006 نعاني من هالشارع واحنا رايجين الدوام ولا حياة لمن تنادي مشكلة وخلاص أصبحت شئ معتاد التجاوزات على هالشارع والاختناقات المرورية الله المستعان

من الريّال :rolleyes2: انا وحده اخوي ..

لا ان شاءالله مع نداءاتنا ومطالباتنا الدائمه بيلتفتون للشارع وبيشوفون له حل لأن فعلا صار الوضع لايطاق في المعموره .. والله اذا شفت العفسه والتجاوزات احس اني في شارع من شوارع الحسا كلن يمشي على كيفه وماعليه من حد ..

[شنب]

المشكله مب في الشوارع .. المشكله في عدد المدارس اللي في المعموره!

كل يوم تزيد هالمدارس و تزيد الزحمه معاها

غير الشركات اللي موجوده و المراكز اللي تسبب ازاعج لأهل المنطقه

و ياليتهم يشلون تقاطع الهايبر ماركت او يشلون الهايبر ماركت بكبره..:anger1:

[شموع قطريه]

المشكله مب في الشوارع .. المشكله في عدد المدارس اللي في المعموره!

كل يوم تزيد هالمدارس و تزيد الزحمه معاها

غير الشركات اللي موجوده و المراكز اللي تسبب ازاعج لأهل المنطقه

و ياليتهم يشلون تقاطع الهايبر ماركت او يشلون الهايبر ماركت بكبره..:anger1:

اي والله بكره بيصير تجمع جماهيري كبير للهايبر ماركت والمدخل للمنطقه بس يكفي سياره وحدة .. اتمنى يتم توسيع المدخل وللمنطقة وايجاد مخارج ومداخل اضافية للمنطقة لان سكان المنطقة محاصرين ومقيدين بالخروج من شارع واحد الي فيه الاشارة وباقي المخارج كلها مسكره ..

[Doha Sun]

ذي المنطقة ترفع الضغط من الزحمة والاشارات

[شموع قطريه]

ذي المنطقة ترفع الضغط من الزحمة والاشارات

ياريت المسؤولين ينزلون للشارع ويشاهدون بنفسهم الازمه اللي تصير في المنطقه خلال ساعات الذروة ويفكرون في حل لهالمشكلة اللي تؤرق الجميع ..

[شموخ قطر]

اضم صوتي لج بالفعل نعاني من هالزحمه الخانقه

بهالمنطقه ...وعلى قولتج محاصرين من كل الاتجاهات

والله يستر علينا اذا انفتح هالهايبر ماركت :(

[شنب]

انا اللي باااط جبدي انه وانا رايح الدوام (طبعاً لازم امر على تقاطع الهايبر ماركت في طريقي) القاهم
بعض المرات يسجلون المخالفات على التقاطع نفسه!!

يعني احنا ناقصين؟؟

[قطرية7]

لاازم يكون زحمه لانهم مكدسين المدارس كلها هناك والي بيتنا يدفع الثمن :secret:

[بوخالد911]

كلامك صحيح
100 %%%

واللي يقهر هو : للحين الشارع اللي يمتد من الدوار الصغير بقرب مدرسة الايمان للبنات سابقا والمتجه الى اشارات المعمورة ؛ للحين هالشارع مسار 1 بس !!!

وبعدين شووف الزحمة على أصوولها لما بيفتحون مجمع المعمورة الجديد اللي يتكون من 3 طوابق
واللي غالبا بيفتح بشهر 8 الجااي

لابد من توسعة هالشارع وذلك بتصغير حجم الرصيف اللي ع اليمين

تحياتي قبل أن يأخذوا باقتراحاتي

[غير البشر]

والله انا معاج اختي قطر في قلبي
وكذا مره كنت اتكلم في ردودي عن هذا الموضوع
لان السيارات تكون جايه من طريق سريع وعددها كبير
وتصتدم في اشاره او دوار
واهني تحدث المشكله
يارين لو يشوفون لنا حل جذري للمشكله في جميع انحاء الدوله
ولو ان اشوف صعبه يحصلون حلول مع احترامي للجميع هههههههههه

[ســـهم]

ياجماعه انتم ماترحمون المرور يعني ماعندهم شغله الا تسهيل حركة المرور !!

الجماعه لاهين عند الاشارات اللي منظمه السير في الأصل لجمع اكبر عدد من مخالفات حزام الآمان .

[شنب]

كلامك صحيح
100 %%%

واللي يقهر هو : للحين الشارع اللي يمتد من الدوار الصغير بقرب مدرسة الايمان للبنات سابقا والمتجه الى اشارات المعمورة ؛ للحين هالشارع مسار 1 بس !!!

وبعدين شووف الزحمة على أصوولها لما بيفتحون مجمع المعمورة الجديد اللي يتكون من 3 طوابق
واللي غالبا بيفتح بشهر 8 الجااي

لابد من توسعة هالشارع وذلك بتصغير حجم الرصيف اللي ع اليمين

تحياتي قبل أن يأخذوا باقتراحاتي


الله يعينا على الزحمه اللي بتيي عقب ما يفتحون
المدرسه اليديد اللي هي مكان مدرسة الايمان القديمه:weeping:

[شموع قطريه]

شكرا على ردودكم جميعا وان شاءالله يلقون حل سريع لهالمنطقة

[مساهم عادي]

هذا ان دل على شي فأنما يدل على ان تصاميم مشاريع الجسور والانفاق فاشلة بامتياز مع مرتبة الشرف...

[شموع قطريه]

هذا ان دل على شي فأنما يدل على ان تصاميم مشاريع الجسور والانفاق فاشلة بامتياز مع مرتبة الشرف...

:victory::victory::victory:

[بيانو]

الـــــمــــــعـــــــــمـــــــــــــوره

للأسف كل شوارع المعموره مكسره وزحمه علطول ولا يوجد صيانه ولا رقابه على هذه المنطقه التى هى من المفترض ان تكون افضل من كده

[شنب]

اتمنى انهم يطبقون نظام الباصات على كل الطلاب و على جميع المدارس
و خاصه المدرسه المصريه و الكامبردج اللي في شارع المعاضيد
عشان تخف هالزحمه

[شموع قطريه]

اشوف الزحمة زادت هاليومين شسالفه فيه شارع تسكر ؟؟!!

مايحطوني اخطط الشارع والله باسوي لكم تخطيط للشارع لاصار ولا استوى وبدون مقابل بعد :) <<<< طل يخلون مواطنه تخطط لهم الشوارع والاجانب وين يروحون عقب :(

[almaf1a]

الشارع هذا غريب
الي جايين من الدوار على الاشارات ينقعون تنقيعه عدله
لان الي طالعين من المعموره يدخلون على الشارع
والي يزيد الطين بله ان الاشارة ماتعطي وقت كافي لخروج عدد كبير من السيارات

هذي من سوء الدراسة ومن مضار الهاي وي الجديد الممتد من دوار التظامن والعبيدلي الا الشمال
انه فصل المناطق الشرقيه من الغربيه وكان من الاجدر وجود جسر لان المنافذ السابقه كله اغلقت وصار الشارع فاصل بين المنطقتين
والمعبر الوحيد هو تقاطع المعموره
عقليات غيربه عندنا في هل البلاد

[شموع قطريه]

الشارع هذا غريب
الي جايين من الدوار على الاشارات ينقعون تنقيعه عدله
لان الي طالعين من المعموره يدخلون على الشارع
والي يزيد الطين بله ان الاشارة ماتعطي وقت كافي لخروج عدد كبير من السيارات

هذي من سوء الدراسة ومن مضار الهاي وي الجديد الممتد من دوار التظامن والعبيدلي الا الشمال
انه فصل المناطق الشرقيه من الغربيه وكان من الاجدر وجود جسر لان المنافذ السابقه كله اغلقت وصار الشارع فاصل بين المنطقتين
والمعبر الوحيد هو تقاطع المعموره
عقليات غيربه عندنا في هل البلاد

صحيح كلامك الاشاره اللي تودي لدوار التضامن والعكس ماتطوف الا تقريبا ست سيارات مع ان يكون السيد غالبا متكون فيه فوق العشرين سيارة .. يعني بعض السيارات تنتظر الاشاره تصير خضراء في ثالث مره علشان تعديها

[شموع قطريه]

يرفع الموضوع لعل وعسى يتذكرون المسؤولين هالمنطقه ..

[بنت ابوها 19]

المشكله مو بس بالمعموره المشكله حتى بجسر الجديد

تخيل من دوار التضامن لين داخل الفريج يعني شارع لامسي القديم لين المخرج للجسر لين مدخل السد


صج الوضع الصبح لايطاق