بغيت رايكم...شنو الاحسن ؟؟

[متفائلــه]

مرحبا بكم جميعا :)

بغيت رايكم ونصيحتكم :)

رفيجتي محتاره بين 3 وظايف الأولى في المجلس الاعلى للصحه والثانيه في وزارة البلديه والتخطيط العمراني والثالثه في جوازات المطار..

برايكم وش الاحسن من كل النواحي ؟؟

ومشكوورين مقدما :shy:

[شعنونة قطر]

البلديه اريح

خل تعطيني وحده من هذيلا

[ريماس الغلا]

مادري انا اشوف وأقرر على حسب الامتيازات وطبيعه العمل ومكان العمل وريستي المباشره وطبيعه الدخول والخروج من المكتب وووووو


بس ملاحظه انهم مختلط : صح ؟


والله يوفقج

[ريماس الغلا]

جوازات المطار

[متفائلــه]

هلا شعنونه :)

هي ناويه تقدم وحاطه في بالها هالاماكن الثلاثه بس..يعني محد ناداها لحد الحين :)

[قطرية7]

تستخير وتستشير ربها بقراية دعاا الاستخارة وربي بيوفقها للانسب لها

[لاجئ عاطفي]

جوازات المطار شفتات وكونها بنت ماعتقد هالشغله تنفعها

[البدع]

لو مكانها بختار بين الصحة وبين البلدية

وبفضل على حسب:

1. الراتب

2. القرب من البيت

والله يوفقها

[BURBERRY]

البلديه راحه

الجوازات احسن من حيث الراتب و الامتيازات

[بوخالد2]

جوازات المطار شفتات ومايناسب بنت

اما الباقي فهم ثابت صبح واحسن لها

[متفائلــه]

ريماس الغلا .. قطريه 7 .. لاجئ عاطفي .. البدع .. بربري .. بوخالد2 :)

مشكورين على الرد :) وجزاكم الله خير :)

طيب بين المجلس الاعلى للصحه وبين وزارة البلديه والتخطيط العمراني..شنو الاحسن ؟؟
والراتب اظن تابع لقانون الموارد البشريه يعني نفس الشي

[شجرة الدر]

وزارة البلديه اتوقع احسن شي حق بنت ،،

في خصوصيه في المكااتب والاختلااط محدود جداً وشغلها اييها لين مكتبها اتخلصه واتطرشه ،،

الله يوفق لها ان شاء الله ،،

[monatee]

قوليلها خل تبعد عن المطار

1 - ادارة فاشلة بكل المقايس
2 - كرف كرف كرف لين ماتموت ع الكونتر بعد يبونها تكرف
3 - اجازات بطلعة الروح تطلعها لان دايما كرف ونقص بعدد الموظفين
4 - يتحدد موعد الاكل والصلاه على حسب الركاب اذا في زحمه مب كفو تقوم من كونترها
5 - في عز اذان المغرب في رمضان بتقعد تكرف ساعتين جدام لين ماتقوم اتفطر ونفس الشي بالنسبة للسحور
6 - هالنقاط كلها كتبتها لهم يوم كنت اشتغل هناك
7- احلى لحظات عمري يوم سمعت منهم ( تمت الموافقة على طلب الاستقالة )
8 - لو اكتب فيهم لين بكره ماراح اخلص من سلبياتهم

وماعرف شي عن البلدية والصحه بس اللي اعرفه ان راتب المطار بيكون اعلى من هالمكانين

والله يوفقها

[صمت 1]

البلديه احسن من وجهه نظري

مافي اختلاط

والصحه الراتب احسن وشبه اختلاط على حسب المكان

[بوخالد911]

الافضل هي تسئل عن كل شي

الرواتب
والامتيازات
التامين الصحي
بدل التعليم

خلووها تسال الموارد البشرية بكل جهة

[بوعبدالله779]

كل الوزارت نفس الشي بس الجوازات تفرق في الرواتب والباقي نفس الشي يعني عليها بالمكان اللي فيه الاختلاط مش موجود

[استغفرالله]

خل تقدم كمن مكان وبعدين يعطونها اوفر وتشوف اللي يناسبها

[شغموم]

السلام عليكم....

البلدية الراحة الأبدية...
وخصوصاً إنها بنت يعني حق العيال والمدرسة أسهل في الخروج والأستئذان من العمل،،،

وبالتوفيق،،

[تحداني]

.. إن كان الخيار واقع على الناحيه الماديه .. فعليها النظر لكل الوظائف من
هذا الباب .. أما ان كان الخيار واقع على نوعيه العمل
وساعات العمل
وظروف العمل


أعتقد المطار متعب للغايه كونها فتاه " وشفتات "
الا ان كان لها وجهه نظر أخرى


الله يوفقها ان شاء الله
وينور طريقها .. ويفتح عليها باب رزق من حيث لا تعلم


.
.
جملك الله برضى الرحمن

[متفائلــه]

شجرة الدر .. monatee .. صمت 1 .. بوخالد911 .. بوعبدالله779 .. استغفرالله .. شغموم .. تحداني الزمن

مشكورين على النصيحه وجزاكم الله خير :)

خلاص كنسلنا الجوازات...بس محتارين في الصحه والبلديه لانهم نفس الشي تقريبا..وان شاء الله خير :)

[انسان]

في البدايه صلي استخاره وان شاء الله بيوفقك في احد المكانين.

و بغض النظر عن الراتب . هناك اعتبارت اخرى تخلينها في بالك عشان المقارنه بين الجهتين.
_ منها طبيعة العمل للوظيفه بمعنى الواجبات الوظيفيه اللي بتقوميين فيها .
_ وكذلك "الجو العام للعمل " هل هناك انسجام بين الموظفات ويعملون بروح الفريق او العكس

_ مكان العمل ومد ى قربه من المنزل

_ هل هناك اختلاط او لا

_ هل هناك مجال للتطوير الشخصي " اكتساب خبره تنفع مستقبلا "
بعد ذلك يمكن ان تقارنين بين المكانين .يفضل استخدام الورقه و القلم للمقارنه

و الله يوفق الجميع بايجاد وظيفه

[ولد النواخذه]

انا اقول وزارة البلدية الاختلاط فيه محدود بس طبعا يعتمد على كيفية تقبل الأخت لهالأمر واذا ماكان مشكلة يظل بين البلدية والمجلس الاعلى للصحه من وجهة نظري الشخصية وبالتوفيق...

[تحداني]

.. بين الصحه والبلديه ..
إن كانوا يتبعون لائحه الموارد البشريه .. إذا المرحله الأخيره ان تتوكل على الله
وتذهب لماهي مرتاحه منه .. والحظ يلعب دور كبير
إما ترزق بفريق عمل رائع .. وبيئه عمل صالحه
وإما " لا " لا سمح الله


.
.
إيش رايك تقولين لها تجي عندي
راح أحطها في عيوني :)




جملك الله برضى الرحمن

[سـ ع ـود]

موفقه

[متفائلــه]

في البدايه صلي استخاره وان شاء الله بيوفقك في احد المكانين.

و بغض النظر عن الراتب . هناك اعتبارت اخرى تخلينها في بالك عشان المقارنه بين الجهتين.
_ منها طبيعة العمل للوظيفه بمعنى الواجبات الوظيفيه اللي بتقوميين فيها .
_ وكذلك "الجو العام للعمل " هل هناك انسجام بين الموظفات ويعملون بروح الفريق او العكس

_ مكان العمل ومد ى قربه من المنزل

_ هل هناك اختلاط او لا

_ هل هناك مجال للتطوير الشخصي " اكتساب خبره تنفع مستقبلا "
بعد ذلك يمكن ان تقارنين بين المكانين .يفضل استخدام الورقه و القلم للمقارنه

و الله يوفق الجميع بايجاد وظيفه

هلا أنسان :)
من ناحية الانسجام هذا ممكن يتحدد بعد بدء الدوام وهاذي مشكله لانها خلاص بتكون اختارت الشغل ومافي مجال للاختيار..من ناحية مكان العمل والاختلاط كلهم نفس البعد والاختلاط
والتطوير الشخصي نفس الشي اعتقد لانهم يتعبون الموارد البشريه

شكرا على الرد :)

[متفائلــه]

انا اقول وزارة البلدية الاختلاط فيه محدود بس طبعا يعتمد على كيفية تقبل الأخت لهالأمر واذا ماكان مشكلة يظل بين البلدية والمجلس الاعلى للصحه من وجهة نظري الشخصية وبالتوفيق...

هلا ولد النواخذه :) مشكور على ردك :) والاختلاط رفيجتي ما عندها مشكله :)

[بـــــــنت النوخـّــــذه]

جوازات المطار شفتات ومايناسب بنت

اما الباقي فهم ثابت صبح واحسن لها

اتفق معاه والاحسن بعد من الصحه هو التخطيط العمراني الصحه متبهدلين برواتبهم والزيادات مثل مانقرى بالجرايد 000 وعموما ماخاب من استخار وموفقه زميلتج ^_______^

[متفائلــه]

.. بين الصحه والبلديه ..
إن كانوا يتبعون لائحه الموارد البشريه .. إذا المرحله الأخيره ان تتوكل على الله
وتذهب لماهي مرتاحه منه .. والحظ يلعب دور كبير
إما ترزق بفريق عمل رائع .. وبيئه عمل صالحه
وإما " لا " لا سمح الله


.
.
إيش رايك تقولين لها تجي عندي
راح أحطها في عيوني :)




جملك الله برضى الرحمن

هلا وغلا اختي تحداني الزمن :)
رفيجتي كاسره خاطري والله .. هو صج شي يحير بين الصحه والبلديه
لو خذيتيها عندج بتكونين سويتي خير وريحتيها من التفكير :).... وخذيني انا معها بعد :shy:

مشكوره والله اختي تحداني الزمن وجزاج الله خير :)

[متفائلــه]

اتفق معاه والاحسن بعد من الصحه هو التخطيط العمراني الصحه متبهدلين برواتبهم والزيادات مثل مانقرى بالجرايد 000 وعموما ماخاب من استخار وموفقه زميلتج ^_______^

يعني رايج البلديه أحسن :)

مع ان المفروض الرواتب موحده لانهم يتبعون الموارد البشريه

[حنان الدنيا]

خليها تقدم ويصير خير ان شاء الله

وماانصحها بالجوزات المطار كللللش

[الصحراء]

المجلس الاعلى للصحة والبلدية جهات تتبع قانون الموارد البشرية وليس هناك فرق من ناحية الرواتب اذا كان المهم الراتب :weeping:


جوازات المطار على حسب السكن اذا كانت من اهل الوكره والهلال مع الاستفسار منهم عن مواعيد الدوام لان ممكن تكون شفتات وفي ها الحالة ما اظن بيصلح للبنت تشتغل بنظام شفتات والراتب على ما اظن بيكون احسن من الجهات الاخرى اذا المقصود جوازات المطار الجديد :anger1:


والنصيحة انصح بوزارة البلدية لان ممكن يكون فيها تنظيم اكثر من الصحة الكل بيشتكي من وزارة الصحة حتى الموظفات بيشتكون من قلة الرواتب و بعضهم تشتكي ان لهم علاوات حسب قانون الموارد الا ان لم يصرف لهم شئ


والنهاية اهم شئ تجتهد في البحث والاختيار ونصيبها بيجيها والله اعلم

[تحداني]

هلا وغلا اختي تحداني الزمن :)
رفيجتي كاسره خاطري والله .. هو صج شي يحير بين الصحه والبلديه
لو خذيتيها عندج بتكونين سويتي خير وريحتيها من التفكير :).... وخذيني انا معها بعد :shy:

مشكوره والله اختي تحداني الزمن وجزاج الله خير :)



خليها تتوكل على الله
ورب العالمين صدقيني غاليتي سيسهل عليها الأمور
هي أهم شئ لا إتحاتي
ولا تقلق من الإختيار

.
.

الصحه والبلديه مكانين ملائمين
اما الراحه النفسيه فهذا يكمن في فريق العمل
والأجواء العامه .. أحيانا الشخص يكون رائع وتحفر له الحفر
وأحيانا يكون خبيث .. وترسل له باقات الشكر والثناء

.
.
الشكر لله دائما وأبدا .. وكلكم على العين والراس


جملك الله برضى الرحمن

[المقهوره]

اذا منقبه ومتزوجه او غير متزوجه

الصحه والبلديه بالنسبه لها اوكي


اما اذا عادي ماتلبس ومب متزوجه فكلها مناسب .

بس المطار ماانصحها .

[wadha-qa]

خليها تجي عندنا بالبلديه و الله يوفقها الصحه و المطار ابعدوا عنهم

[رمــش الغلا]

المجلس الاعلى للصحة شغلهم متعب جداااااا

مانصحها صراحة

لو انا افضل البلدية او الجوازات
واموفقه ان شاء الله ،،

[فلفل حار]

ماشالله على حظهـا ....:)

[ام خليفة]

اي والله ماشاءالله على حظها :)

انا تمنى مكان واحد بس مب مختلط وع طوووول بوافق حتى لو كان باخر الدنيا :(

الله يوفقها ويكتب لها اللي فيه الخير لها ،،

[NMN]

البلديه اريييح دوام 7 و12ونص طالعه

[متفائلــه]

حنان الدنيا ... الصحراء ... تحداني الزمن ... المقهوره ... wadha-qa ... رمش الغلا ... فلفل حار ... أم خليفه ... NMN

جزاكم الله خير :) .... ومشكورين على رايكم ونصيحتكم :)

والأخت تقول خلاص بتقدم ع الصحه لان البلديه على قولتها رواتبهم ضعيفه ومافيها بدلات مثل بدل الهاتف وساعات العمل الإضافيه ..

[أم نوره]

متفائله شلونج حبوبه
منوره المنتدى عزيزتي والله وحشتيني وااااااااااااااايد