طريقة شراء الاسهم من الغير

[الغشمري]

كيف يستطيع الشخص شراء الاسهم من الغير مباشرة مثل الناقلات ؟ :confused:


امل الافادة مشكورا

[sulai6i]

هلا الغشمري

تقصد في السوق السودا ولا عقب لين تم التخصيص ؟؟

[الغشمري]

هلا اخوي في حااالة انا اقصد بعد ما يتم التخصص يعني والفترة الي ما قبل نزول سهم ناقلات الغاز

يعني بعد الاعلان عن كم سهم تخصص للجميع وما بين يعني تاريخ 1/3/2005م الى نزولها في السوق

[sulai6i]

هلا اخوي .. تقدر ليش لا .... بس يكون الشخص اللي بتشتري منه (( ثقه )) لا تشتري من حد ما تعرفه
او تقدر تشتري بشهادة محامي .. الله مكثر المحامين في البلد


ارجع واقول لازم يكون اللي بتشتري منه ثقه .. واذا كان واحد تعرفه يكون افضل بعد


وبالتوفيق يارب

[بورصة مان]

الله يوفقك اخوي الغشمري
وانا اايد اخوي واحد في حالة في كلامة وشكرا واحذر من النصابين ترى لسانهم ينقط عسل ومساكين وطيبين جدا ههههههههههههه

[الغشمري]

يعطيكم العافية شباب
في حاله و بروصة مان

صراحه في الامور هذي شوي حتى الثقة يمكن شوي تهتز خصوصا انه الشيك راح يطلع بأسم الشخص

يعني اقصد هل بمكاني مثلا أعمل تحويل ويكون شي معتمد او تنازل شخصي من الطرف الثاني ؟


عشان ما نطيح وتروح فلوسنا في الهوى وشكرا لكم

[sulai6i]

شوف اخوي الغشمري

اكتب ورقة بينك وبين اللي شريت منه الاسهم

مثال :

أقر انا ................................................ قطري الجنسية واحمل بطاقة شخصية رقم .....................
بأنني قد اقترضت مبلغ وقدره ..................... من السيد / .......................................
وأتعهد بأن اسدد المبلغ في تاريخ / ............................

وهذا إقرار مني بذلك



---------------


وخله يوقع على الورقه بشهاده محامي ( المحامي ياخذ 300 ريال )

يكون توقيعك وتوقيع الشخص اللي شريت منه وتوقيع وختم الشاهد اللي هو المحامي

هذي هي الطريقه اللي صارت في شراء البطاقات


جذيه تكون ضامن حقك


والله يوفقك

[هداف]

اخوي الغشمري بكل سهوله تقدر تتنازل عن الاسهم لمستثمر اخر بعد التخصيص يعني اذا كنت انت البياع تعمل تنازل با الاسهم
في سوق الاوراق الماليه للشخص الشاري وفقط لا غير

طبعا يفضل ان تكون استلمت حقك كاش وبعدها تعمل التنازل في سوق الاوراق الماليه بكل سهوله ويسر

[m_taha123]

تقصد في السوق السودا , بس يكون الشخص اللي بتشتري منه (( ثقه )) لا تشتري من حد ما تعرفه

[alnader2004]

لم أرى شيئا قانونيا في هذا الموضوع
يا أخوان نحن في دولة ولله الحمد تسير في خطى توجهها نحو دولة المؤسسات والقانون فعلينا إحترام توجه الدولة وعلينا إحترام القانون ولتعلموا أن أي عملية تداول لأي سهم خارج نطاق سوق الدوحة للأوراق المالية هو عمل غير قانوني ولاتسري عليه أحكام قانون سوق الدوحة للأوراق المالية ولا لائحته التنفيذية وبالتالي تسري على هذا العمل أحكام البطلان وفق القانون فيعاد المتعاقدين للحالة التي كانا عليها قبل إبرام الصفقة ، و إن وجدتم محامي يبرم لكم هذه الصفقات فهذه طامة كبرى أن ينتهك القانون برجال القانون فاحذروا يا أعزائي

[sulai6i]

اخوي النادر

كلامك سليم ولا غبار عليه

لكن وين تحصل اللي يطبق القوانين بحذافيرها ؟؟؟

[alkaabi]

السلام عليكم

ياجماعة البورصة وقفوا التنازلات بشكل نهاااااااااااااائي

حتى من الولد لابوه

واللي يبي يشتري من السوق فقط

اما في السوق السودا

مثل ماقالوا الشباب واحد ثقة وبس

والبورصة مشددة من قلب في هالموضوع

وكان فيه تنازل قبل بس الغوه

زبدة الكلام

مافيه طريقة ابد غير انك تشتريهم من السوق ( اذا تبي كل شيء رسمي )