تركيا ( استفسارات)

[كركم]

بما أني نويت اسافر لتركيا هذي السنة لأول مرة حبيت استفيد من خبرات اللي سافروا لها..وأول استفسار هو عن الشغل الشاغل لكل مسافر الا وهي (( المصاريف ))

أسهل شي في السفر حجز التذكرة وحجز الفندق اذا كنت تتعامل مع مكتب سياحي محترم ومضمون...ولكن اذا كنت مسافر للأول مرة ممكن تسافر وتنصدم من الأسعار واقصد اسعار السلع وممكن تخليك تتردد في السفر لها...مثلا ..سألت واحد من الربع ذكر لي شي واحد ان غرشة الماي الباردة بـ 5 دولار يعني 18 ريال :eek5: ..وقيسوا على ذلك باقي السلع..

عاد الله لا يهينكم يا خبراء تركيا ياليت تفيدونا بالتالي :

1- متوسط مصاريف الشخص الواحد في اليوم الواحد في اسطنبول من تنقل ووجبات الغداء والعشاء في مطاعم جيدة ومصاريف الجولات السياحية.
2- وبالنسبة للجولات السياحية هل في مكاتب اتعامل معاها وكم متوسط اسعارهم وشنو افضل وسيلة للتنقل في اسطنبول؟


واجازة سعيدة للجميع

[jassem777]

السلام عليكم

اخوي بنسبه لتركيا واخص اسطنبول اهلها صعب التعامل معاهم النفسيه الله لايوريك

والديره بشكل عام غاليه

بنسبه لتاكسي غاليه جدا

اذا بتروح روح بورصه جوها احلى في خليجين في اماكن سياحيه مثل الشلاات والتلفريك

وسعر الرحله 100$ طبعا يوصلك للاماكن السياحيه وتتغدا فيهم وبعدها يوصلك اذا تبي

تتسوق وبعدها يرجعك للفندق يعني السايق من الساعه 9 صباحا الى الساعه 6 مساء

والمطعم تدفع فيه لشخصين ابتداء 60$ وانت صاعد

اسطنبول سوق الي عليه الاسم عندك شارع الاستقلال في منطقة تقسيم ومجمع جواهر

واذا بتسكن فندق اسكن في مرمره خمس نجوم اهوفي السنتر قليل ماتحتاج التاكسي

اذا سكنت فيه

اسمحلي بالقصور

[(عبدالله)]

مرحبا أخوي

:: كركم ::

أنا توني جاي من تركيا قبل 12 يوم قضيت في اسطنبول أسبوع واحد

بصراحة تركيا جميلة جداً جداً جداً بس للأسف اقتصرت على اسطنبول فقط ولا عندك بورصة ويلوا وأنطاكيا وغيرها..

الشعب

الشعب التركي طيب جداً، لكن اسطنبول غير كونها العاصمة التجارية وفيها من الأعراق والأجناس
المختلفة (أكراد، تركمان، عراقيين، ....إلخ)، فغالب اللي بتتعامل معاهم في الشارع
بيتعامل معاك بشكل مادي هذا إذا ماقص عليك أو تعامل معاك بجمود، حتى الشرطة تعاملهم جداً رسمي وأحياناً بطريقة جافة وبدون ابتسامة أو أخذ وعطا..
وفي الغالب الآخر بتتعامل مع ناس طيبين وخلوقين وشعبيين..

عموماً وبشكل عام خلك حذر في اسطنبول وخاصة في منطقة تقسيم ،خلك رسمي ومبتسم ومحدود التعامل لا تثق بأحد ثقة كبيرة وخاصة من اللي أصولهم عربية.

من المطار إلى الفندق والعكس

بدال ما سايق التاكسي يستخدم العداد اتفق معاه على سعر ثابت، لأنك نا بتضمن في حالة العداد هل بيلعب عليك ولا لا، أنا استخدمت هالفكرة من الفندق إلى المطار واتفقت مع السايق على 25 (يورو). طبعاً بالعداد بيطلع أقل وبالليرة لكن السايق مابيرضى بيطمع فإما بيلعب عليك أو بيطلب مبلغ أعلى.

المواصلات

أولاً
وقبل كل شي أرجو الاطلاع على الملفات المرفقة بتفيدك وايد

ثانياً
خذ من الفندق خريطة اسطنبول وتعرف على الأماكن اللي تبي تروح لها وسو حق نفس برنامج

ثالثاً
(1) أصحاب التكاسي خلك حذر منهم كثير منهم نصابين، يعني الطريج اللي يحتاج 10 كيلو، ممكن يطوله لك ويسويه 30 كيلو حتى يزيد العداد. لذلك إلمامك بخريطة اسطنبول ومعرفة وجهتك تخليك تعرف إن السايق يقص عليم ولا لا.
مثال: أنا صارت لي إني طلبت من السايق يوديني Minia Turk وشفته يعبر كذا جسر مع ان في الخريطة الطريق سيدة وما له داعي يمر عالجسور!!.

(2) خل عندك خردة دايماً، لأنك إذا عطيت سايق التاكسي مبلغ عادي انه مايرد لك الباقي، مثلاً إذا الحساب 12 ليرة (1 ليرة = 2.32 ريال قطري) وعطيته 15 أو 20 عادي جداً ما يرد لك الخردة.

(3) إذا ركبت التاكسي، تأكد إنه يصفر العداد (العداد يبدأ من 2.5 ليرة)، صارت لي للأسف خدعني سايق، وفي نهاية المشوار اللي يستحق 12-15 ليرة طلب مني 64 ليرة وقال لي شوف العداد (لأنه ما كان مصفره من الأول) صحيح انه كدرني بهالمقصة لكن حسبي الله ونعم الوكيل.

(4) تأكد لين تتعامل مع سايق تاكسي أو مطعم خاص أو أو أو أو هل عطيت 5 ليرة ولا 50، صارت لي مع السايق المخادع عطيناه 50 فقام بدله على طول ب5 وقال لي وين الباقي (لأن ألوانهم متشابهة)، لكن رفيجي زين شد معاه وحكر له لين رجع الخمسين.

(5) أنصحك إذا عددكم قليل (2-3 أشخاص) باستخدام المترو الللي يكلف على الشخص 1.5 ليرة، بس أحياناً وإذا عددكم أكثر والمسافة قريبة التاكسي بيكون أفضل فأنت احسبها.


المصاريف

(1) اسطنبول بشكل عام غالية جداً مقارنة بالدوحة بس مب بالدرجة اللي ذكرتها، مثلاً غرشة ماي 1.5 لتر من بقالة تقريباً 1.5-2 ليرة، والوجبات أغلى بشوي عن الدوحة مثلاً صحن مشويات لشخص ممكن 40 ريال، شاورما 12 ريال، المشروب الغازي المعلب بليرة وحدة تقريباً ،وجبة ماك دونالدز في الدوحة 16-18 ريال في تركيا تساوي تقريباً 24-30 ريال....إلخ. يمكن العصاير الفريش هي اللي تقريباً لقيتها مقاربة لأسعار الدوحة :shy:

(2) العملات المتداولة في اسطنبول هي الليرة التركية والدولار الأمريكي واليورو. وانت مسافر خل فلوسك دولار ولين وصلت تركيا شوف أقرب صراف في السوق واصرف ليرة تركية (لاتصرف في المطار لأنهم ياخذون 4% رسوم ولا في الفندق لأن التسعيرة غالية). في حالة السحب ببطاقة الصراف الآلي البنك في الدوحة بياخذ رسوم 15 ريال على كل سحبة (تجربتي مع بطاقة الوطني الإسلامي).:victory:

(4) عن تجربة، كانت عندي فلوس دولار ويورو، والعرف المتداول بين المحلات والتجار إن الدولار=1.5 ليرة واليورو=2 ليرة. لذلك أحياناً كنت أستخدم (اليورو) فتطلع لي الحسبة أرخص أحياناً.

البرامج والرحلات

الرحلات القريبة أنصحك بنفسك تروحها بدون مكتب سياحي (إذا كنت مهتم بالمعالم التاريخية والأثرية)، لأن المكاتب أسعاره خيالية وما تسوى.
أما الرحلات، فأنصحك بشركة حران السياحية بتحصل عنوانهم وطريقة التواصل معاهم في موقع المسافرون العرب.

هذا اللي عندي وإذا بغيت شي ما يردك إلا لسانك... بس أرجو إنك تطلع على الملفات المرفقة
أعدتها اخت من المسافرون العرب (أم فيصل) الله يجزيها خير. وأان سويت عليها تحديث بسيط بالأحمر.


:: (عبدالله) ::

:shy:

[biker]

انا باروح اتسيح واستانس والا رايح خايف وحذر من النصابين والمعاملة السيئه
غير وجهتك الى بلد ثاني افضل ما تخسر فلوسك ..مثلا النمسا حلوه وشعبها طييب وجو من احسن ما يمكن واشوف اسعارها معقوله ..

[راعي 2006]

والله احسنت الاختيــاار ..

توني من شووي امدحــها

وانا توني راجع منها

وعليك باسطنبول وفيها شارع تقسيم

ويلوووا

وبورصا


وبارسلك رقم سايق محترم وونيس وامين اهناك صدقني ماراح تحتاج لأي شي

وحتى لو تبغيه يحجزلك سكن سواء شقق او فنادق

وبالتوفيق يارب



اخوك

بومحمد

[كركم]

ماقصرتوا يالربع ..ورحم الله والديكم جميعا..

[البيت بيتك]

اخوي بنسبه لتركيا واخص اسطنبول اهلها صعب التعامل معاهم النفسيه الله لايوريك

والديره بشكل عام غاليه

[السني 73]

بلد اسلامي ذات طابع اوروبي
شتبي احلا من كذا

رحت لها مرتين .... بلاد روعه .... بس انصحك تدخل منتدى العرب المسافرون وتشوف المواضيع الي عن تركيا وبستفيد .... وخصوصا في عملية النقل .... لان استخدام القطارات اوفر بكثير من التاكسي
وبالتوفيق لك ..... وانا في ظني ان تركيا ومن خلال شعبها افضل من كل الدول العربيه في التعامل طبعا باستثناء اهل الخليج والحمدلله