للي راح ماليزيا نبي أحسن برنامج لمده 14 يوم

[باشا البدو]

السلام عليكم

جماعه الخير اللي منكم راح ماليزيا نبي منه برنامج شهر عسل لمده 14 يوم

أنا أسمع من الناس يسولفون عن سن وي لاغون وودي اسكن فيه عالاقل 4 او 3 ايام

و يذكرون لنكاوي وبينانغ

وجنتنغ يقولون قريبه من كوالالمبور وما تستاهل حد يسكن فيها بس أنا ودي أسكن فيها لانه جوها على ما قالوا بارد

ياليت من اللي زاروا هالمناطق يعطينا فكره عنها ويذكر لنا اسامي الفنادق اللي سكنوها

وألف شكر للي بنتعبه معانا

[بوراشد 66]

كولالمبور : الماريوت و مندرين او الرتس وافضلهم مندرين

بينج كلها فنادق 4 نجوم وانت اختار هناك

جنتج فندقين : منهم في مجمع فيرست لك ليله وحده كفاية

لنكاوي جزر وفيها شاليهات

لكن في دول ثانية افضل بكثير من ماليزيا حق شهر العسل مادري ليش الناس مركزه عليها

مطر وحر الاجواء متقلبه

[راعي 2006]

حلووه ماليزيا حق شهر عسل صج الجو مايساعد بس شي يغطي على شي .. فيها كل انواع الترفيه

يعني تستوي طرزان وانت معرس ههههه


المهم

كولا لمبور : انصحك بفندق الماريوت وسعره تقريبا 700 ريال قطري وفخم جداً جداً خذلك 4 ايام

واليوم الخامس روح جنتق من الصباح وارجع المغرب لانها ملاهي واركب من طريق التلفريك .

انا ليش اقولك روح هذي المناطق من غير لاتسكن لان بصراحه شغلانه تنقل شناطك من فندق لين فندق


بيننج : روحها يومين لاتكثر لأنك بتمل واسكن في فندق قولدن سنت او هولدي ان .

لنكاوي صراحه مارحتها ..

نصيـــحه ::: وانت طالع من الفندق ورايح احد الجزر وبترجع نفس الفندق الي في كولالمبور خذ شنطه على قدك وخل شناطك في الامن وقولهم انك راجع لهم بعد الجزر لأن الطياره الي بتوديك هالجزر ياخذون وزن بس 10 كيلو للشخص وبيدفعونك الباقي

واذا رجعت منهم على كولا لمبور نفس الشي روح سان وي لاغون في نفس اليوم من الصباح لين المغرب ولا تنسى الشورت علشان السبوح خخخخ

ولين رجعت باقي الايام الاخير كولالمبور

عندك حديقة الحيوان

حديقة الزهور

حديقة الطيور

الاكواريوم

وطبعاً شارع العرب يومياً من اول ماتوصل ماليزيا لين ترجع هههه

والله يوفقك يارب

[باشا البدو]

مشكورين والله لا يهينكم ونبي من خبرات اعضاء المنتدى اكثر واكثر

[دوحة الجميع]

اخوي أنصحك تشوف الموقع الخاص بالسياحة الماليزية وبالتوفيق :
http://www.daleel-malaysia.com/

[al-buainain]

عن تجربه


في البداية اسكن صن واي لاقون وانت اختار الي يناسبك من غرف او اجنحه او فيلا خاصه

http://www.sunwayhotels.com/

وهذا موقع الملاهي الي بجانب الفندق

http://www.sunwaylagoon.com/

خذ لك من 3 الى 4 ايام فيه كل وسائل الترفيه

وعقب روح لنكاوي ارشح منتجع الشيراتون

http://www.langkawi-resorts.com/sheraton/

ممتاز وخدمه راقيه واسعار معقوله تاخذ لك غرفه مطله على البحر مع جاكوزي تقريبا 700 ريال واقعد من 4 الى 5 ايام ملاحظة جزيرة لنكاوي هادئه نوعل ما يعني للراحه النفسية ممتازة وفيه برامج كثيرة مثال استأجار الطائرة العمودية , رحلة المنقروف يوم كامل , التلفريك car cabel , حديقة التماسيح واشياء كثيرة جدا

ومن جزيرة لنكاوي رووح جزيرة بينيغ عن طريق البحر فيه عباره وهذا موقعهم
http://www.langkawi-ferry.com/index.html
وانا اشوفها نوعا ما جيدة ولاكن عيبها شي واحد ما فيها كفاتريا او مطعم اعمل حسابك والرحلة تاخذ ساعه ونصف في البحر تجربة حلوة

جزية بينيغ في فندق اهناك ممتاز اسمه شنغريلا http://www.shangri-la.com/en/property/penang/rasasayangresort
خمس نجوم وله شاطئ خاص وفيه انشطة كثيرة والجزيرة تحتاج من 3 الى 4 ايام

ويعدين اتروح كولا لميور عن طريق الخطوط الماليزية http://www.malaysiaairlines.com/ افضل خطوط وراحة نفسية

في كولا الافضل انك تسكن فندق مندرين وتاخذ لك من 4 الى 5 ايام

http://www.mandarinoriental.com/kualalumpur/

ممتاز من جميع النواحي الا شي واحد الي هو الخدمة عندهم غالية شوي وموقع خيالي بجانب التوين تاور والمجمعات كلها قريبة يعني مشي توصل لها

وفي النهاية انت والي يعجبك يا الشيخ تحياتي لك وبالتوفيق انشاءلله

[ضوى]

اذا تبي نصيحتي قط فلوسك في النمسا ابرك واحلى واروع ورومانسية من قلب ، ماليزيا ماتسوى اللي ينصرف عليها

[العميد الركن]

اخوي البوعينين كفيت ووفيت ماعطيتنا مجال
على العموم البرنامج الي قاله اخوي البوعنين بيعجبك انا متاكد عن تجربه
الصن وي اكواخ خاصه حق المتزوجين بس لاتنسى ينكتب لك في الفوتشر من مكتب السفريات (شهر عسل) حق كل فندق
وكوالالمبور فندق المندرين خطييييييير
ولنكاوي الشيراتون خذلك فله خاصه فيك مع بركه سباحه مايفرق سعرها عن الغرفه وايد (اسمها فله وهي عباره عن حوش مستغل وبركه سباحه مطله على البحر وغرفه كبيره وصاله بس رووووعه)
واذا تبي رقم شخص هناك بينفعك وااااايد وبيرتب لك كل شي وامين وعلى مسووليتي وسيارته جديده وعربي مسلم انا حاضر
ومبرووووك وموفق

[باشا البدو]

دوحه الجميع, البوعينين, ضوى.

الله لا يهينكم

ريحتوني من حيرتي بين الفنادق مشكورين الف شكر

[باشا البدو]

العميد, الله لا يهينك بعد

ورقم الرجال ولا عليك امر

[al-buainain]

العميد الركن

باشا البدو

يا مرحبا لكم واسمحو لنا على القصور

[الســـهم]

السلام عليكم اخوي ..

انا بخالف الشباب ولا عليهم قصور بالنسبة للــ صن واي لاغون ..

بكل صراحة الفندق اثاثه قديم لما سكنته بسنة 2007 , سمعت عنه كثير بس لما جربته فعلا ندمت على اضاعة ليلتين فيه وهم اول ليلتين بشهر العسل , اعمل حسابك ان يوم الثلاثاء الحديقة المائية مسكرة , واعمل حسابك انك بعد الساعه 8 مساءا ماراح تلقى غير سوبرماكت مفتوح جنب الفندق , واهم شي اعمل حسابك انك راح تسكن فندق مستوى 3 نجوم اذا كثر ..

اما بالنسبة للنكاوي فكفاية عليها ليلتين الى ثلاث ليالي بالكثير , لأنك ممكن تخلصها بيوم او يومين , بس الحلو فيها هدوؤها وناسها طيبين يعني للريلاكس مايحتاي , وبالنسبة للسكن ناس تمدح الشيراتون وناس تمدح بيلانجي بيتش , وعد نفسك انك من بعد المغرب بتكون بالفندق لأنها تصير هادية ليلا ومافيها اي نشاطات الا بالنهار ..

بيننغ احلا من لنكاوي من حيث النشاطات , وحياتها لغاية الفجر فيها سوق ليلي وفيها مطاعم كثيرة , وانصحك ماتسكن بغير فندق شنغريلا راساسيانغ , لأنه الافخم والاحلى موقعا وله شاطئ خاص وكل شي حولك (مطاعم - سوبرماكت - السوق الليلي - البحر) ، تحتاج فيها من 3 الى اربع ليالي تقريبا والجدول السياحي بتلقاه بالفندق وشوف اللي يعجبك ونفس الشي بالنسبة للنكاوي ..

بالنسبة لكوالالمبور فعندك فندق المندرين ويبعد 10 دقايق مشي عن شارع العرب والمجمعات التجارية والمطاعم , وعندك فندق الماريوت او الويستن على شارع العرب والويستن احدث واجدد من الماريوت وبينهم سكة , يعني خطوتين وانت بالماريوت والريتز يكون بظهرهم بالزاوية , اما بالنسبة لجنتنغ فانصحك تروحها الصبح وترجع المسا ولا تسكن هناك لان فنادقها تعبانة , وخذ رحلة كاميرون ايلاند اذا تحب الطبيعة والخضرة ..

اذا تبغي مزيد من الآراء مع الصور فتقدر تشوف موقع العرب المسافرون لأنك راح تتعب وانت تقرا التقارير عن ماليزيا وسياحتها ..

[الحجاجي]

ذكرتني كنت مسوي جدول سياحي لهشر العسل حق رفيجي ..

وما شاء الله استانس ..

بشوف لك الجـدول موجود عندي بملف جاهز ..

تحياتي لك .. والف مبروك

[بوفاطمه]

السلام عليكم ورحمة الله وبركاته.............
اجازه سعيده.
تروح وترجع بالسلامه

[نايف قطر]

اخوي انا رحت لها مرتين مع الاهل ومب متحسف عليها لانها صج عائليه وامنه ونظيفه وشعب محترم ومحد يتعرض لك وناس طيبين وطبيعتها واااااااااايد حلوه وروعه وفيها ملاهي للاطفال وحدايق الزهور والفراشات والطيور والفواكه والتلفريك ورحلات بحريه فالجزر وعالم ماتحت البحار احواض فيها كل انواع السمك وملاهي للاطفال ومدينه مائيه
وجوها زين انا رحت شهر 5 تقريبا كل يوم مطر في جزيرة لنكاوي

من المناطق اللي رحت لها:
جزيرة بننق:-((سكنت بفندق بارك رويال)) فيها حدايق مثل حديقة الفراشات والزهور والفواكه وفيها رحلات بحريه
جزيرة بننق :-((سكنت بفندق الشيراتون)) جنه الصراحه -احلى من بننق-فيها رحلات بالقارب-تلفريك-عالم ماتحت البحار-حديقة الطيور-سكوترات-هليكوبتر واشياء كثيره
بعدين رجعت العاصمه كوالمبور
رحت سن وي لاجون:-((سكنت بفندق سن وي لاجون))هذي الله يسلمك مجموعة فنادق حول بعض وامامهم حديقة العاب مائيه وحديقة حيوانات والعاب كهربائيه ومجمع كبير
بعدين رحت العاصمه((سكنت بفندق بارك رويال)) ومن العاصمه رحت بتاكسي لجنتنق هذي الله يسلمك فنادق والعاب كهربائيه فوق الجبل اتروح لهذي المنطقه عن طريق التلفريك
والعاصمه تقدر تسكن بشارع العرب فيه مجمعات كثيره ومطاعم عربيه
\

((بننق)) تكفيها يومين وانصحك اتروح للنكاوي احلى بوايد
((لنكاوي)) تكفيها 4 ايام
بعدين ترجع العاصمه
اتروح
((صن وي لاقون))تكفيها 3 ايام
((العاصمه)) تكفيها 4 ايام
ومن العاصمه تاخذ تكسي اي يوم وتروح لجنتق

واي استفسار انا حاضر بخصوص ترتيب الرحله او السفريات

[al-buainain]

السلام عليكم اخوي ..

انا بخالف الشباب ولا عليهم قصور بالنسبة للــ صن واي لاغون ..

بكل صراحة الفندق اثاثه قديم لما سكنته بسنة 2007 , سمعت عنه كثير بس لما جربته فعلا ندمت على اضاعة ليلتين فيه وهم اول ليلتين بشهر العسل , اعمل حسابك ان يوم الثلاثاء الحديقة المائية مسكرة , واعمل حسابك انك بعد الساعه 8 مساءا ماراح تلقى غير سوبرماكت مفتوح جنب الفندق , واهم شي اعمل حسابك انك راح تسكن فندق مستوى 3 نجوم اذا كثر ..

والله يا الشيخ انا اختلف معاك شوي في هذا الفندق
خبرك قديم بالفندق الغرف والاجنحة والفلل من اروع ما يكون الاثاث راقي والخدمة اكثر من ممتازة وانا توني جاي من شهرين سكنت في جناح على الطراز الاسلامي روعة لااااا والجناح ما فيه اي زر في الطوفه التحكم كله عند راسك سواء ان الليت المكيف الابجوره التلفزيون وحولك المجمع فاتح معاك الين الساعة 9 ونص لان اغلب المحلات في ماليزيا اتسكر 10 المساء


اما بالنسبة للنكاوي فكفاية عليها ليلتين الى ثلاث ليالي بالكثير , لأنك ممكن تخلصها بيوم او يومين , بس الحلو فيها هدوؤها وناسها طيبين يعني للريلاكس مايحتاي , وبالنسبة للسكن ناس تمدح الشيراتون وناس تمدح بيلانجي بيتش , وعد نفسك انك من بعد المغرب بتكون بالفندق لأنها تصير هادية ليلا ومافيها اي نشاطات الا بالنهار ..

بيننغ احلا من لنكاوي من حيث النشاطات , وحياتها لغاية الفجر فيها سوق ليلي وفيها مطاعم كثيرة , وانصحك ماتسكن بغير فندق شنغريلا راساسيانغ , لأنه الافخم والاحلى موقعا وله شاطئ خاص وكل شي حولك (مطاعم - سوبرماكت - السوق الليلي - البحر) ، تحتاج فيها من 3 الى اربع ليالي تقريبا والجدول السياحي بتلقاه بالفندق وشوف اللي يعجبك ونفس الشي بالنسبة للنكاوي ..

بالنسبة لكوالالمبور فعندك فندق المندرين ويبعد 10 دقايق مشي عن شارع العرب والمجمعات التجارية والمطاعم , وعندك فندق الماريوت او الويستن على شارع العرب والويستن احدث واجدد من الماريوت وبينهم سكة , يعني خطوتين وانت بالماريوت والريتز يكون بظهرهم بالزاوية , اما بالنسبة لجنتنغ فانصحك تروحها الصبح وترجع المسا ولا تسكن هناك لان فنادقها تعبانة , وخذ رحلة كاميرون ايلاند اذا تحب الطبيعة والخضرة ..

اذا تبغي مزيد من الآراء مع الصور فتقدر تشوف موقع العرب المسافرون لأنك راح تتعب وانت تقرا التقارير عن ماليزيا وسياحتها ..

تحياتي لك يالشيخ