استفسار عن افضل و أأمن طريق من قطر للخبر و البحرين ..

[قلم محايد]

شباب انا ابي استفسر من خلال خبرتكم و معرفتكم عن افضل طريق من دولة قطر الى الخبر و البحرين .. بحثت في جوجل و لقيت عدة مواضيع و بعضها يقول اذا تدخل الاحساء تضيع و لازم تسأل.. و بعضها يقول فيه طريق ثاني اسمه طريق سلوى العقير و هو مختصر و لكنه خراب و مكسر .. و مافيه محطات .. و البعض يقول فيه طريق تمر بالقرب من الاحساء و تاخذ طريق مختصر جديد و زين ..


انا الحقيقة ابغي طريق يهمني بالدرجة الاولى يكون مزفلت بشكل جيد (مايخرب السيارة) مايكون مكسر يعني (يفضل فيه محطات) و رغم ان السفر بيكون بسيارة دفع رباعي ان شاء الله لكن بعد الطريق المكسر مايصلح و ماودي اتفاجئ فيه .. و الشيء الثاني من المحتمل السفر يكون في الليل .. اخوكم بحريني و حاليا اسافر عن طريق الجو للبحرين وودي اجرب الطريق البري و لكن ابغي اتاكد منكم يالطيبيين .. الصراحة انا لدي خبرة في السفر عن طريق البر من البحرين عبر السعودية وصولا للكويت و الطريق كان سيدة و سهل رغم بعض التحويلات و تكسيرات قليلة .. لكن من قطر للبحرين او من البحرين لقطر لحد الان ماجربت و اتمنى تفيدوني .. و هل بينفعني الجارمن لو اشتريت جارمن خاص للسيارة ؟! لان الجارمن بالتلفون مو دايما يشبك اعتقد يحتاج للانترنت على طول .. لكن مادري عن الجارمن الخاص بالسيارة اشلون طريقته ..


و يعطيكم العافيو .

[rashid-1]

السلام عليكم

أخوي واكب العصر وأشتر لك جارمن حق المدن ب 900 أو جي بي أس وريح مخك حتى الأماكن والخدمات موجوده في الجهاز وتغني عن سؤال اي شخص وعلى فكره إستخدامه أسهل مايكون

ورحلة سعيده

[مستثمر 999]

بسيطه الله يسلمك

بعد ما تدخل السعوديه

اول دوار يوديك الامارات وعمار كمل الى الدوار الي بعده

كمل طريقك الى السجن المركزي خذ من عنده يمين
وتمر على الاسواق الشعبيه تمر على بقيق ومن ثم الى الدمام وبعد ساعتين تقريبا ولا انت واصل الى تقاطع البحرين

بس اخبر اللوحه الاخيره طايحه خلك على اللوحات الي معلقه فوق

[الســـهم]

السلام عليكم اخوي قلم محايد ..

الطريق من قطر للإحساء واحد ومافي غيره باتجاه مركز بوسمره ومن ثم سلوى ومن سلوى للإحساء ..

نعم في طريق جديد مسفلت لم يفتتح بشكل رسمي موجود قبل الوصول للإحساء بـ 15 كم تقريبا باتجاه اليمين عند اول تقاطع للجسر الجديد عالطريق , يختصر عليك مسافة 20 الى 30 كم تقريبا ونهايته ببداية طريق الإحساء الدمام , يعني ماتمر بمركز محافظة الإحساء نهائيا وممكن تستخدمه اذا كنت مسافر بالنهار لأنه بالليل يكون مظلم جدا ومافي عليه اي خدمات , بصراحة ماجربته لأن اوقات السفر دائما تكون مساءا بس اللي جربوه بالنهار يمدحونه كثير ويختصر الوقت نص ساعة تقريبا (اذا حاب تسلك هالطريق بتصادفك عالجسر براميل عاليمين موضوعه كحواجز ، بنهايتها تلقى فتحه تدخل فيها وانت مكمل طريقك) ..

اذا حاب تسلك الطريق من خلال مركز المدينة بمحافظة الإحساء وهي الاسلم للسفر بالليل , فخلك عالطريق باتجاه الاحساء (الهفوف) ، راح تمر على دوارين تتعداهم باتجاه الاحساء لين توصل لثاني اشاره بطريقك تاخذها يمين , وبعدها تعدي اشارتين باتجاه سوق القيصريه والاشاره الثالثة بعد السوق خذها يسار , وبعدها بتجيك اشاره تاخذها يمين وبعدها اشارتين عند الثانية تاخذ يسار , وبعدها اشارة تاخذها يمين وتسلك هذا الطريق وتتعدا كل الاشارت اللي عليه باتجاه الدمام ( لايمين ولايسار ) وبتلقى نفسك على خط الدمام , وطبعا الخط الحين مريح جدا لأن معظمه صار اربع مسارات بالاتجاه الواحد , خلك على هذا الطريق لين تصادفك محطة بترول على الشارع المعاكس اسمها (مجمع الجابرين) وبتكون وقتها مشيت 110 كم تقريبا على هالخط , بنهاية هالمحطة راح يصادفك مخرج عاليمين تطلع عليه وبنهاية هالطريق راح تكون بإذن الله وحفظه عند بوابة جسر الملك فهد ..

الله يسهل امورك ويبعد عنك شر الطريق ولا تنسى دعاء السفر ..

[دنهل]

السلام عليكم اخوي بعد مركز سلوى بحوالي 110 كيلو تجيك محطة بترول يمين الخط اسمها السيح بعد لفت السيح على طول وبعد المحطة بحوالي 2 الى 3 كيلو يجي جسر جديد ويتجة الطريق شوي يسار انت مع الجسر لف يمين فية طريق يمر من شرق الحسا يوديك الى طريق الحسا بقيق وطولة 40 كيلو مايخليك تدش الحسا وزحمتة هذا اذا انت ماتبي الحسا وبعدها تروح سيدة اول ما تركب الخط اللي يوديك طريق بقبق وبعد بقبق 110 كيلو الى الخبر ومن الاحساء الى بقبق حوالي 40 كيلو مع الطريق الجديد تروح وترجع بالسلامة انشاء الله.

[قلم محايد]

مشكوورين مشكوورين ماقصرتوا والله استفدت كثيرا من معلوماتكم ..