اماكن التسوق في الاحساء ؟؟؟

[THE BOSS]

السلام عليكم ورحمة الله وبركاته
شباب الي يعرف احسن و ارخص الاماكن للتسوق للاطفال والنساء والادوات المنزلية و للذهب وين احصل المحلات الطيبة
خبركم اول مرة باتسوق من الاحساء(( كنت امر عليها مرور الكرام ))
والي يعرف اماكن محددة يدلني عليها ...................
وجزاكم الله كل خير

[qtr.wolf]

سوق القيصريه .. هو السوق الشعبي والمفرقعات الناريه

[الزيبق]

تحمل على سيارتك اهم شي ترى انا اعرف اثنين من ربعي اكسرو جزاز سيارتهم بغرض السرقه منها

[عاشق الشهادة]

المخازن الكبرى والعثيم وسوق القيصريه وشارع 100 وشارع الماجد وشارع النجاح هذه كلها للتسوق وعندك الذهب نصيحه روح المبرز عندهم سوق كبير بالقرب من الملعب ,
جبل القاره وعندهم حديقه حيوانات قريبه من جبل القاره عجييبه وفيها العاب وعندك العاب مائيه حديثه بالقرب سكه القطار وعندك شاطئ العقير جميل وفيه شاليهات على طول السيف ,
واذا تذكرت شي آخر بذكره لك ان شاء الله

[الفيصل]

العثيم=نساء+ اطفال

المبارك+ السرايا قريب منه تقريب ناسي من اسمه= للملابس النسائيه والاطفال (طريق الظهران بعد العثيم عند اول اشاره على اليسار )

رامز= للادوات المنزليه قريب من بنده شارع الظهران وكذلك قريب من المبارك كلهم على امتداد شارع واحد

وردة هجر( ادوات منزليه )= خلف سوق القيصريه

الحمرا (على طريق الظهران بعد النفق )

بس هذا الي متذكره :)

[@السفير@]

لقهوه والهيل وتبعاته ( القيصريه ) ملابس الأطفال والحريم ( شارع الماجد ) ومستواها جيد اماالملابس الراقيه والألعاب والمطاعم ( العثيم مول ) هذا بالنسبه للاحساء والله يحفظكم:nice:

[A.L.I]

العثيم مول



:nice::nice::nice::nice::nice:

[بوجاسم566]

المخازن الكبرى والعثيم وسوق القيصريه وشارع 100 وشارع الماجد وشارع النجاح هذه كلها للتسوق وعندك الذهب نصيحه روح المبرز عندهم سوق كبير بالقرب من الملعب ,
جبل القاره وعندهم حديقه حيوانات قريبه من جبل القاره عجييبه وفيها العاب وعندك العاب مائيه حديثه بالقرب سكه القطار وعندك شاطئ العقير جميل وفيه شاليهات على طول السيف ,
واذا تذكرت شي آخر بذكره لك ان شاء الله

المخازن سكروها فتحوا بندة مكانها :tease:

بخصوص اماكن التسوق

1- العثـيم مـول
2- شارع الماجد
3- القيصرية
4-البستان مول
5- بندة
6-اسواق هجر
7-شارع النجاح
8- شارع الملك عبدالله اذا تبي اكسسوارات للسيارت
بس هالاماكـن الى تقدر تتسوق منها

اما بخصوص الفنادق

اذا تبي فايف ستار :rolleyes2: مافيه الا الغزال و انتركونتال

اما الشقق الفندقية شارع قطر اول ماتدخل الاحساء في فوق الـ 20 عمارة نق واختار

تحياتي لك

[الـقـاسـي]

اخوي نصيحه الحسا معاد مثل قبل بضاعتهم تعبانه واسعارهم غاليه ومكان يسد النفس .. روح وراك للخبر والدمام واذا تبي اللي احسن وافضل روح للرياض مب بعيده واجد

[حنان k]

العثيم مول .. الحمرا .. البستان مول .. السويق تحديدآ شارع الماجد .. سوق الديرة بالمبرز فيه محلات الذهب بكثره .. المبارك .. الصالة الكبرى .. الصالح بلازا .. القيصرية .. شارع النجاح .. جزيرة التوفير .. مجمع الجبر .. في مجمع بالهفوف ناسية والله اسمه هو قريب من أدارة التربية والتعليم للبنات وجامعة الملك فيصل .. في مجمع ثاني بعد مضيعه اسمه للأمانة باتسر أن شاء الله أكلم أهلي أخليهم يذكروني باسمه .. شارع الظهران بالمبرز .. مجمع الأحساء .. في سوق عند مستوصف الشاوي بالمبرز .. مركز عدنان <<< محلات ملابس نسائي ورجالي وأطفال وفيها كل شي

الأدوات المنزلية : العياضي بالهفوف تحديدآ البندرية .. رامز .. جوهرة هجر (( منوع كل شي فيها )) .. أسواق هجر ..

بنده بالمبرز واللي عند سكة القطار .. هايبر بنده بالهفوف .. أسواق المزرعه .. الحفيز

المطاعم : مروش .. أبازير .. جومان (( بس عزاب مافي عوائل بس أكله لذيذ , والنت مجانا )) .. في مطاعم كثير طيبه تعتمد ع الحس الذوقي لكل شخص

الكافيات : نابلي عند البستان مول .. مدينة القهوة عند ماكدونالدز بالمبرز قباله (( عزاب )) .. في بسعد الدين للحلويات كافي وعوائل اللي بمجمع الجبر بالمبرز

أماكن الترفيه للأطفال : العثيم مول .. أسوا المزرعه .. الحكير .. في ملاهي جديدة تو فاتحه عند مجلس أسرة ال ملحم قبل مدارس الأنجال الأهلية .. جبل القاره في حديقة حيوان هناك .. وفي حديقة حيوان بالطرف .. جبل الشعبة فيه دبابات بس للشباب طبعآ .. حديقة الملك فهد بالهفوف .. عندك محاسن أرامكوا كلها حدائق بس عوائل .. مدينة الألعاب بمحاسن .. العقير

لـ أثاث المنزل : عندك دام وبس تووووب رااائع قليل فيه وكل الجلسات بالتفصيل بس راقي جدآ فخامة ويستاهل يندفع فيه الريال بالهفوف بحي المحمدية عند مستوصف نور الهدى .. شارع الظهران فيه أرينا .. بوسبيت .. في محل بالهفوف وناسية والله اسمه من فترة كنت فيه أثاثه حلو مودرن تصلح تاخذ منه كنبه وتحطها بزاوية الغرفة عند النافذة أو بالبلاكونه زي كذا بس أثاثه حلو للأمانة مودرن كثير .. دار هجر للسجاد والمفروشات شارع صاهود قريب من الحمرا مفروشاته طيبه

الفنادق وأماكن السكن مافيني أفيدك لأني ماني بحاجتهم الحمد الله بس عندك فندق الأنتركونتننتال .. فندق الهفوف .. في فندق ثاني بالمبرز وقريب منه أسواق قريب من رامز مره

إذا تبغى أسواق شعبية ولك مويل للأشياء القديمة مثل التحف عندك سوق الخميس يوم الخميس

وفي تسأل بعد عن موعد الأسواق الشعبية كل منطقة أو قرية لها سوق شعبي بيوم معين ممكن يكون الصباح وممكن المسا

عندك الشارع الملكي بالهفوف لأمور السيارات من إلى ((( شارع الرجال )))

حاليآ أفتتح مهرجان حسانا فله ... وأتوقع بعد فترة يفتتح معرض الأحساء لكن منيب متأكدة متى والله



في محلات تكون متفرقة وبأماكن ثانية مثل : بعد مستشفى الموسى ومستشفى بن جلوي بيكونوا ع يدك اليمين أمشي لنهاية الطريق بيجي ع يدك اليمين محل (( مهاوي للأزياء النسائية )) للأمانة ما دخلته لأنه بعيد عني بس من الشكل الخارجي فيه فساتين سهره حلوه هو بالمبرز كأنك رايح راشدية ج



أي معلومات زود أنا بالخدمة لا يردك إلا لسانك

[عاشة]

كل اللي أعرفه وعرفته لخصته كالتالي
الحمرا (على طريق الظهران بعد النفق)
العثـيم مـول =نساء+ اطفال للملابس الراقيه والألعاب والمطاعم
المبارك+ السرايا = للملابس النسائيه والاطفال
الصالح بلازا
المبارك
الصالة الكبرى
أسواق المزرعه الحفيز
الريال بالهفوف بحي المحمدية عند مستوصف نور الهدى
العياضي بالهفوف البندرية= الأدوات المنزلية
الشارع الملكي بالهفوف= أمور السيارات
البستان مول
بنده بالمبرز واللي عند سكة القطار
جبل القاره قريبة منه حديقه حيوانات
جزيرة التوفير
دام وبس= لـ أثاث المنزل
رامز جوهرة هجر أسواق هجر = للادوات المنزليه
سوق القيصريه= القهوه والهيل وتبعاته
سوق الذهب سوق الديرة = المبرز
سوق الخميس يوم الخميس= أسواق شعبية وللأشياء القديمة مثل التحف
شارع 100
شارع الماجد= ملابس الأطفال والحريم
شارع النجاح
شارع الملك عبدالله= اكسسوارات للسيارت
معرض الأحساء
مركز عدنان= محلات ملابس نسائي ورجالي وأطفال وفيها كل شي
مجمع الجبر
مهاوي للأزياء النسائية
هايبر بنده بالهفوف
وردة هجر( ادوات منزليه )= خلف سوق القيصريه

[Diamond]

مشكوووووووووووورين

[طاش]

مشاء الله كل هاذي خبرة ههههههههههههه

[عليان قطر]

سوق القيصريه .. هو السوق الشعبي والمفرقعات الناريه



تذكرت جاري
كلمته من فتره
عن المفرقعات
ما شاء الله على عياله عنهم مفرقعات تطيح حزر

[THE BOSS]

ياشباب العثيم مول تكون المحلات مفتوحة فترة الظهيرة والي يعرف ساعات العمل يفيدنا
وشكرااااااااااااااااااااااااااااا

[مجنون قطر]

ياشباب العثيم مول تكون المحلات مفتوحة فترة الظهيرة والي يعرف ساعات العمل يفيدنا
وشكرااااااااااااااااااااااااااااا

السلام عليكم
اخوي المحلات تفتح من الساعة 10 الصبح لحد صلاة الظهروفيه محلات تفتح بعد الصلاة مثل بيبي شوب ومذكر كير وبي اتش اس ، وتفتح من الساعة 4 العصر الى منتصف الليل عندك الالعاب للساعة 2 الفجر

[باسكن روبنز]

ايش الي يهمك من اسفره ؟ ،
وضح لنا وراح نفيدك ان شاء الله ،

[دانتيل~]

في العثيم مول والاحساء مول البستان
في شارع الماجد هو سويق
في القصيريه
هذولي اغلب الاسواق تحصل كل شيء فيها
تبي اشياءالرجاليه عندك القصيريه وعمارت السبيعي وهو الشارع اللي قبل شلرع الماجد

في الجبر في المبرز كذا محل فقط

[دانتيل~]

ياشباب العثيم مول تكون المحلات مفتوحة فترة الظهيرة والي يعرف ساعات العمل يفيدنا
وشكرااااااااااااااااااااااااااااا

اخوي مايفتحون من الجمعه الى الثلاثاء الدوام من 9 الى صلاة الظهر وبعض الحلات تنعد على اليد اللي تفتح ثم من 4 الى 11

والاربعاء والخميس تفتح المحلات فترة الظهر ^^

واي سؤال حاظره انا من سكان الاحساء

[السهم السريع]

ماشاءالله تبارك الله
البنات غطوا على الشباب
أذكروا أماكن أكثر من الشباب وأحسن من القارمن بعد

والله ياخوك عقب هالمحلات والأسواق اللي انذكرت مالك عذر عن الروحه
الله يحفظك