مارايكم بتنكر مياه الشرب؟

[ام سعوود]

بسم الله الرحمن الرحيم

السلام عليكم ورحمة الله وبركاته


حبيت استشيركم اعزائي الكرام .. انا حابه اشتري تنكر لمياه الشرب .. هل له ربح مضمون وانه راح يمشي شغله لان عندي سواق وابشغله بهالمجال ...


ما هي سلبياته وماهي اجابياته؟

ياليت تفيدوني ولكم جزيل الشكر ..


وبنتظار ارائكم ؟

[كاتم المواجع]

هلا اختي....

انااا اعرف ناااس شغالين في هالمجال فيهم اللي مازال .... وفيهم اللي للاسف عزل ...

على حسب طريقه الايجار والطريقه الافضل ببيع الماء على الشركات بالدرهم مقابل الجالون.... لكن يبي لها ترتيب من اتفاق مع الشركات .... واغلب الشركات مايشترون الا من نفس جنسيتهم يفيدون ويستفيدون...

ومن راي اذا السائق امين ويخاف الله وله خبره في قطر تاجرين الدنكر عليه مقابل مبلغ كل شهر ويتحمل جميع المصاريف من محروقات واعطال وبيخااف على السياره لن يدري هو اللي بيصلحهااا وهذي الطريقه المتبعه من اغلب من هم في هالمجال...... مع الشكر

[برشلوني قطر]

موسم العنن قرب...والربح مضمون خصوصا ف سيلين..

وفي ناس مايشترون تنكر لا...يشترون جمس دبل تاير ويفصلون فالبدي خران الماي..

ع كلام واحد من الربع الشغله ربحها مضمون ان شاءالله

[ام سعوود]

جزاكم الله خير اخواني


طيب تنصحوني باي نوع من التناكر ؟ اخذه

[الأغر]

اهم شي اختي يكون السايق ابن حلال مش كل شوي يقولك التنكر خرب والتنكر بنشر وامورك راح تكون طيبه والله يوفقك ومشروع حلو وعندي صديق طلع تنكر مستعمل وبعد فتره طلع الثاني موفقه اختي

[البدع]

هذا المشروع مربح

ولكن مشكلته كثرت المنافسة

فصار مايربح مثل قبل

وبالتوفيق

[المنسى]

انتى لو تشوفين الزحمه الى عند محطات المياه بتهونين من هالشغله لان لدريول مب على كيفه يصف وياخذ ماى بالدور

[BuFaisal]

مع افتتاح شبكات المياه بالخور والذخيره .. الخ صار سوق التناكر اصعب من اول
واعرف ناس كثير وقف حالهم مؤخرا

[Breakaway]

أختي لازم تشوفين الجدوى من هذا العمل وذلك بالإتصال بقسم الصهاريج التابع لكهرماء وسؤالهم عن مدى حاجتهم لهذه الصهاريج وعن المناطق الأكثر طلبا للتناكر وطريقة إدخال التنكر في الخدمة وغير ذلك من الأمور، هذا إذا كنتي تيبن التنكر يخدم لكهرماء، وإذا بغيتي تلفون مباشر لشخص يقدر يفيدك عن هذا الأمر راسلني على الخاص

[خليفـة]

مداخلة برع الموضوع :

يقول لج مرة سألوا واحد من الشباب : من ترشح لاستلام جائزة نوبل للسلام ؟

قال أرشح الأخت صالحه بدون كلام الله يخليها ويطول بعمرها .

قالوا له : من صالحه هذي يا الغالي ؟؟ وشنو عنوانها ؟؟ وشنو افعال الخير الي تسويها ؟؟

قال : انا والله ما اعرفها معرفه شخصية .. لكني دايما اشوف اسمها على التناكر يكتبون :
مياه صالحه للشرب

الله يوفقج اختي بمشروعج الجديد

:nice:

[ريان]

انا اعرف 2 من الشباب باعوا سياراتهم يقولون مافيه شغل

ولكن اتوقع لو تمت الموافقه على استضافة كاس العالم بيتحرك السوق كله

وبالتوفيق