فزعتكم أخواني أختكم متوهقه مع سيارتها...!!!!؟؟؟

[ذوق]

السلام عليكم ورحمة الله وبركاته..

أخواني بغيت منكم المشوره والنصيحه الأخويه,,,


الله يسلمكم أنــا دخـلت في شــبه وهقــه ،،

شريت سياره من سنه ونص للأسف بدون مشوره وأستعجلت فيها وااايد للأسف..

انفنتي فورويل Ex 35 موديل 2008
ماشيه حول 25 الف

وسعرها الأساسي في الشركه تقريبآ 170الف ولكن شريتها عن طريق الأقساط من الأولى للتمويل ب240 الف يعني فوايد خرافيه على 6 سنوات بدون دفعه اولى

واقساطها وايد مضيقه علي يعني3340 في الشهر

وسويت فيها حادث العام وتضرر الشاصي ولكن الحمدالله صلحتها في الوكاله والسياره فوق الممتاز وللحين بقراطيسها

والحين باقي من اقساطها 190 تقريبآ - وانا بصراحه ابي ابيعها باقساطها - ابي افتك
وابي اشتري سياره جديده باقساط اريح وأنا اولردي علي متاخرات الحين حول 13 الف بسبه ظروف تغير الشغل والأقساط زانطتني

وللاسف ان صعبه علي احصل لي حد يشتريها باقساطها على اساس ان سعرها عالي...

شنو شوركم علي عشان اصرفها؟

وماقدر ادخل سيارتي المعرض بحكم ان ماعندي سياره 2

ارجو رفع الموضوع ولو بكلمه طيبه أو دعوه




وشكرآ

أختكم

ذوق

[al-obaidly]

الله يكون في عونج

[ذوق]

تسلم يالطيب...للرفع ولو بكلمه طيبه

[*^*محمد*^*]

الله يعينس

خذي رقم المعارض وكلميهم يمكن عنهم حل

[قطر603]

الله يفرج همك

[الشهواني]

صج فوايد خرافيه مابقى شي وتقولين دبل قيمه السياره وان شاء الله الشباب يفيدونج

ونزليها بلموضوع المثبت فوق اللي فيه السيارات اللي تنباع باقساطها والله يوفقج ويعينج

وتصرفين السياره

[JCJJJ]

السلام عليكم/اختي اعرضيها في لوحة المجمعات التجارية في السنتر المول الاند مارك فميلي فود سنتر الي في النصر والمطاراوموقع كار سمسار لانه الأجانب يحبون الانفنتي الله يوفقج وتنباع في اقرب فرصة

[Gh2o]

اختي خلينا انتكلم بصراحه أولا سعر السياره واااااااااايد مبالغ فيه خصوصا انج ماعطيتيهم دفعه ومستحيل حد بياخذ السياره ب ١٩٠ لانها اغلى من سعر الوكاله لسياره جديده الحل عندج كالتالي ترجعين السياره على الوكاله وحسبونها لج دفعه اولى وتكملين الباقي يا كاش او اقساط هالحل الوحيد وضربه الشاصي تاثر بالسعر وايد والله يكون بعووووونج والسياره على فكره حلوه وايد ودلوعه استمري عليها وكملي اقساطها

[فتك العديد]

الحل الوحيد انج تدفعين شوي من المبلغ علشان تحصلين حد ياخذها لانه الي باقي عليها شي خيالي واكثر من سعرها في الوكاله بوايد ولا تخلينها عندج احسن من انج تدخلين نفسج في اقساط ثاني مره وحطي في بالج انها 2008 وسعرها نزل الحين والوكاله مسويه عرض على موديلات 2008 و2009 وانا توني سألهم عن ال fx 35 ال 2008 الي هي اكبر من ال ex واشوفهم منزلين سعرها من 185 الف لين 143 الف + تامين شامل

[الرادار]

الله يعينج :
في اغلب الاحوال لما السياره تكون مأمنه شامل وتندعم ويتعور الشاصي يحاول المالك يشوفله طريقه مع شركة التأمين ويكنسل الموتر ويتخلص من اقساط السياره.
اقترح عليج اختي تحطين اعلان في جريدة باللغه الاجنبيه ، لتأجير السياره على شركه بعقد سنوي يكون فيها الاجار يغطي قيمة القسط لغاية مايتعادل سعر الاقساط مع سعرها الفعلي في السوق وتتخلصين منها ،،
الله يوفقج ان شاء الله.

[al7amadi]

السلام عليكم

اختي حل الوحيد انج اتشوفين سياره ثانية

وتبدلينها مكان سيارتج الاولى عندهم هذي الخدمه اتدخلين سياره مكان سياره بدون رسوم بس رسوم المرور

وممكن يسون لج جدوله فا شوفي حد يبادلج مع سياره انتي تبيها وتكون تقريبااا مقاربه للسعر

واسالي مجرب ولا تسالين طبيب

الله يوفقج

[المبرمج صلاح]

ربنا يفرج همك الاقساط مصيبة من مصائب هالزمن ربنا يعينك القسط وااايد غالي

http://thumbs.bc.jncdn.com/462a1627f5845568d5df62843321090b_lm.jpg

(( أَسْتَغْفِرُ اللَّهَ الَّذِي لا إِلَهَ إِلا هُوَ الْحَيُّ الْقَيُّومُ وَأَتُوبُ إِلَيْهِ ))

لا حول ولا قوة إلا بالله العلي العظيم

اللهم أغفرلي ولوالدي ولمن دخل بيتي مؤمناً وللمؤمنين والمؤمنات والمسلمين والمسلمات الأحياء منهم والاموات

بالتــــــوفيق للجمـــــيع ان شــــــاء الله في الدنيـــــا والاخــــــرة

[sos 12]

الحل انك تختار سيارة من احد الوكالات ... وتقولهم ابي ابدل بالسيارة الي عندك ... بيقيمون سيارتك ... وبالقيمة هذي تقدر تاخذ سيارة جديدة من عندهم اصفار... يااتك تستخدم السيارة وتتحمل نفس الاقساط ... او تبيع السيارة بسعر اقل من الوكالة بشي بسيط وتاخذ الكاش وشوي من عندك تدفع للاولى وتفتك من الاقساط ... وتاخذ سيارة ثانية باقساط مريحة ... او تعرض السيارة للبيع في المواقع قطر سيل .... الخ بحكم انك محتاج السيارة ... وتنتظر الشراي يايتحمل اقساطها ... او تبيعها كاش على حسب سعر السوق ... وتزيد عليها شوي وتحرر المبلغ الي عليك .

[المليونير الفقير]

الحل عندي جيبي السياره وابيعها لج كاش حتى لو مرهونه وطبعا الاقصاد بتم عليج بس بعد ماتبيعينها تقدرين تدفعين مبلغها للاولى وتنزلين من الاقصاد وتشترين سياره ثانيه

[المليونير الفقير]

الحل عندي جيبي السياره وانا ابيعها لج كاش حتى لو مرهونه وبقيمة الكاش تدفعين للاولى وتنزل عنج القصد وبعدها تقدرين تاخذين سياره ثانيه

[الجوكر90]

السلام عليكم
سوال
انتي ماتعرفين اذا الشاصي تعور لازم تكنسلين الموتر
وبالتوفيق ان شاء الله

[البجادي]

اللهم لا صعبا الا جعلته بامرك سهلا اللهم يسر امورها وفرج عنها كربتها امين

[نايم سهران]

حرام عليج كل شي قبل لا تسوينه استشيره فيه الناس الي ادرى ( ما خب من استشار )
الله يكون في عونج ويوفقج

[خيال شمر]

الله يعينج ويفرج كربج

[A.L.I]

الله يكون في عونج اختي

[بوطلال71]

الشيخه اتصلي في وكالة النيسان نفسها...قسم السيارات المسترجعه ..وقولي لهم عندي سيارتي ابي ارجعها وقيمتها يوم شريتها من عندكم بالسعر لفلاني ..اوكي..وابي اخذ من عندكم على سبيل المثال التيما بحكم ان سعر الالتيما مناسب في حدود 70 الف تفريبا ...في حال وافقو ياخذون سيارتج الحاليه ياترى بيرجعون لج المبلغ المتبقي من قيمة سيارتج الحاليه او لا ..في حال ماراح يرجعون لج جزء من قيمة ..مافي الا تأجرين لج سياره وتوقفين سيارتج في معرض ...وعلى فكره هالنوع من السيارات اللي عندج عليها طلب كبير من قبل الاجانب وسياره نسائيه مرغوبه برغم سعرها لكبير لكن صدقيني بتروح مهب مطوله في المعارض والله يوفقنا وياج

[عزووز قطر]

اختي ذوق
انتي في كل الحالات خسرانة خسرانة ..
رايي في الموضوع انج تنطرين على السيارة لين شهر 10 مع بداية العام الدراسي الجديد وتبيعينها بسعر أقل من سعر السوق علشان تتخلصين منها بسرعة .. والمبلغ تشترين فيه سيارة صغيرة جديدة والباقي تدفعينه دفعه للأولى للتمويل ..

لأن بيع السيارة في هالفترة صعب موسم اجازات والناس مسافرين .. بس مع بداية العام الدراسي الكل يدور سيارة مستعملة للدوام ..
والله يعينج ويوفقج

[سهم طايح]

اختي في حل بسيط عشان تقدرين تبيعين السيارة

الحل انج تحطين مبلغ في يد اللي بيتحمل الاقساط

[دنهل]

بيعيها كاش بعد الاتفاق مع جهة الاقساط وبعدين ادفعي الاقساط كاش حتى لو ماكفت بيبقى شي بسيط يخفف القسط وبينزلون من الفايدة بعد الدفع كاش

[البيت بيتك]

الله يكون في عونج

[A bin M]

اختي رجعيها الشركه وشوفي بكم يقيمونها لج

[الكاسب]

ملك حل إلا أن تعلنين في الوسيط ببيع السيارة بأقساطها....مع دفع مبلغ كهدية للمشتري مثلا 20،000ريال.وهذه الطريقة هي أبسط وأسرع حل.

[oldqtr]

هل الملكيه مرهونه أم حرّه؟

[المليونير الفقير]

:telephone::telephone::telephone:

[_QTR_]

اذا السيارة مأمنة تامين شامل

خلي حد يدعم فيها دعمة محترمة ويكنسلونها لج التامين

هههههههههههههههههه .. الله يكون في عونج بس ردود عجيبة من الشباب والله

[بويعقوب]

الله يعينج وييسر امرج

وقدر الله وما شاء فعل

[اكاديمي]

بالتوفيق

[صحاري الفكر]

الله يعينج
بس ان شاء الله ماتستعجلين على اتخاذ اي قرار بالمستقبل
وياريت بعد تستشيرين اللي حواليج في اي حاجة بتاخذينها اوبتسوينها
تحياتي

[فيصل الشمري]

الله يعينك!
المشكلة وضعك ما يساعد ولا كان قلت لك ادفعي دفعة من المبلغ عشان تنقص الأقساط وثم اعرضيها للبيع
أسئل الله ان يفرج همك ويبعد عنك الربا,,,

[شغموم]

السلام عليكم...

عندي فكرة يمكن تخفف عليج عبء الأقساط، وهو تأجير السيارة على شركات التأجير وتحصلينهم في الوسيط أتصلي وإن شاء الله تحصل السيارة نصيبها في الإيجار بشرط تدفعين إيجار السيارة للأقساط على أساس تخففين أقساطها.

وبالتوفيق،،

[محاسب]

السلام عليكم...

عندي فكرة يمكن تخفف عليج عبء الأقساط، وهو تأجير السيارة على شركات التأجير وتحصلينهم في الوسيط أتصلي وإن شاء الله تحصل السيارة نصيبها في الإيجار بشرط تدفعين إيجار السيارة للأقساط على أساس تخففين أقساطها.

وبالتوفيق،،

بس للأسف بتبهدل السيارة عندهم إلا إذا كان بعقد طويل يغطي نص مدة الأقساط ع الأقل وبشرط الصيانه
الحل الثاني
أرضي فيها وصبري وهي زينه ومناسبه وبتوصلج وبتيبج
والي بيتبع خاطره بيفلس ولايشبع خاطرة
والحمدالله على سلامة ــ

[الحـ(درب)ـب]

والله مصيبه وضربه بالراس

اولا تعرفين لو سعر السيارة جديد بـ 160 ومشيتي فيها 1000 كيلو ودعمتي وانضرب الشاصي

لو عرضتيها للبيع مارح تجيب 100 الف وكلن بيقول الشاصي مضروب حرام احط فلوسي بشاصي مضروب

وسيارتج صارت 2008 يعني سعرها الحين بالسوق 100 إلى 115 الف تقريبا

يعني لو فحصوها وشافو فيها شاصي يعطونج فيها 50 الف :(

ولو ماخذه السيارة عن طريق بنك اسلامي هنا المصيبة لانهم ماينزلون ريال اذا عطيتيهم كاش
تدفعين 190 يعني تدفعين 190

يعني الحين الحل واحد فقط

هو انج تستحملين على السيارة لين تتحسن ضروفج
واقتنعي بالقضاء والقدر
وخليها لين 10 سنين وبيعها

والأقساط مالج حل غير انج تدفعينها


في جمله دايم ابوي يرددها
اذا عندك مبلغ سيارة فليس بالضرورة انك تستطيع اقتناءها

درب الحب

[الـخـالـدي]

الله يكون في عونج ويفك ضيقتج

اذا بتصرفينها يمكن بتروح بـ 100 .. على اللي فيها .. والله يكون في عونج

[LionFish]

في رأيي مافي حل الا انج تخلين السيارة وكل ماتجيج فلوس اتسددين الاقساط والديون...

وانشالله الله يفرجها عليج قريب... واستعيني بالصبر والصلاة :)

[بوعدي العنزي]

عندج موقع قطر سل صور الموتر وعرضيه
100 ريال الاعلان
والموتر عندج

[مستر بن]

الله يعينج



او طرشي يوم الاربعاااء الصبح حق الوسيط

بس طبعا ال 70 حرف ب 30 ريال
واكتبي التواصل ع رقمج او رقم احد يقربلج

ويقول عن الاقساط

بس لازم الاربعاء الصبح عشان رسالة الموافقة تجي الليل او العصر

وبعرضونه الاحد

يوم تجيج نفس الرسالة طرشي لهم رسالة فاضية


طرشي ع 92838

[ذوق]

تسلمون أخواني على الردود ... لكـن للأن مالقيت الحـل الي يبرد الخاطر للأسف

[qatar1111]

الله يعينج والله

وبالتوفيق عزيزتي

[السد]

شوفي اختي اذا تقدرين ادخلينها الورة في اي وزارة
( مكتب المنظمة )

[$$كلنا قطر$$]

تسلمون أخواني على الردود ... لكـن للأن مالقيت الحـل الي يبرد الخاطر للأسف

ولا راح تلقين الرد الي يبرد خاطرج
لان موضوعج ماله حل
كاش وما عندج وسعر السياره فووووق ومضروب الشاصي
وين تبين حل بعد
الله يسر امورج

[راعي النيسان]

شوفي اختي جدامك هذه الحلول واختاري المناسب منها :

1- اذا كنتي تقدرين تشترين قيمة القرض اللي بالاولى وتحولينه على البنك اللي انتي فيه فهو افضل شي تسوينه لانك راح تحررين السيارة وتقدرين تبعينها بالسعر اللي يرضيج والسيارة راح تكون حرة ..

2 - لو ما قدرتي تسوين هذه الحركة ،، من الافضل انج تشوفين لج احد من الاهل تبعين عليه السيارة (بيعه صوري) ويكون هالشي عن طريق الدولي الاسلامي لانه نسبه الارباح عندهم بسيطة والملكية راح تكون حرة نفس الشي ،، مع مراعاة انه سعر البيع يكون نوعا ما مناسب علشان الامور تمشي عادي .. وبعدين تتحملين انتي قيمة الاقساط الباقية ... ونفس الوقت تقدرين تبعين السيارة على راحتج باعتبار انه ملكية السيارة حرة ..

3- ما انصحج ترجعين السيارة على وكالة النيسان لانهم راح يقطون سعرها في الارض .. احسن الوكالات اللي يعطونج افضل سعر في الشراء عن الاستبدال حسب ما سمعت الفردان والمانع للفورد ومن بعدهم الهوندا واخر شي التويوتا .. رجعي السيارة واخذي سيارة رخيصة من عندهم واخذي الفرق وقطيه في القرض ،، ورجعي بيعي السيارة الثانية ونفس الشي اخذي قيمتها وقطيها في القرض ،، راح تلاقين عمرج كذا سددتي ما يقارب من 60 بالمئة من قيمة القرض ..

4 - بعض الاخوان قال انج تعرضين السيارة للبيع في المجمعات والوسيط ،، انا اتفق معاهم انه هالسيارة يحبونها الاجانب وايد ،، لكن العلة انه السيارة في ضربة في الشاصي واذا دروا بالشي هذا راح يقطون قيمتها في الارض ،، واحتمال كبير ما يشترونها الا برخص التراب وراح تكون خسارتج كبيرة ..

بالنهاية اختي انا اشوف اقرب حلين مناسبين لج من ناحية المنطق والواقع همه الحل الثاني والثالث اللي اقترحتهم لج ... والله يفرج همج وويسر لج امرج ...

وانا دوم اقول وانصح كل الشباب اذا حبوا يشترون سيارة من الافضل انهم يشترونها عن طريق قرض شخصي لانه يقدر يبيع السيارة في حالة الضرورة بسعر السوق بدال ما يخسر فيها حزة الحاجة ويصير معاه نفس الموقف اللي صاير معاج ...

[al-vtc]

بالتوفيق يا رب

[ذوق]

جزاكم الله خير على الحلول...ولا زلت ابحث عن افضل الحلوووول

وللعلم اني ذكرت ان الشاصي تضرر ولكن للاسف ان خاني التعبير - الصدام الي تعور مب الشاصي

وانا اسفه لسوء الفهم

[ذوق]

للرفع

[ريان]

الحمدلله مادام الصدام المسئله بسيطه ان شاء الله

اعرضيها باقساطها والله يعوض عليج .

او تقدر تعرضينها في الشركه اللى تبين تاخذين منها سياره ثانيه .

وهم بيثمنونها وبتدفعين فرق السعر

[عـ العبيدلي]

الصدام الي تعور مب الشاصي
لو الصدام بس بدون الشاصي
بسيييطه اتوقع مثل الحادث العادي بتكون !!

والله يكتب الي فيه خير

[شيط ويط]

الحل من وجهة نظري كالتالي :

1- تعرضين السيارة للبيع سواء في الجريدة أو في المنتدى اهنيه او في موقع قطر لييفينغ .. وتنطرين كم ممكن تجيب لج السيارة .. فرضا جابت لج ( 100 الف ) بيعيها بهالمبلغ

2- الحين عندج ( 100 ألف ريال قيمة بيع السيارة ) .. عندج خطوتين :

أ- تشترين بهالمبلغ سيارة كاش بدون أقساط .. وتستمرين في دفع اقساط السيارة اللي بعتيها لين الله يفرجها عليج

ب- بشرط يكون عندج مبلغ متواضع تشترين فيه سيارة متواضعه .. وتسددين بهالمبلغ ( أقصد مبلغ بيع السيارة اللي هو 100 ألف ) جزء من مبلغ الأقساط ويتبقى لج من الاقساط ( 90 الف على 26 شهر تقريبا في سنتين بتخلصين من هالهم ) .


هذا اللي عندي وبالتوفيق إن شاء الله

[الحـ(درب)ـب]

جزاكم الله خير على الحلول...ولا زلت ابحث عن افضل الحلوووول

وللعلم اني ذكرت ان الشاصي تضرر ولكن للاسف ان خاني التعبير - الصدام الي تعور مب الشاصي

وانا اسفه لسوء الفهم

ممكن سؤال عشان عملية الرفع؟؟؟؟

انتي تتوقعين حد من الأعضاء بيطق صدرة وبيشتري السيارة ؟؟؟

قلتي الشاصي وقلنا اللي عندنا

الحين تقولي صدام والشاصي مافيه شي عقب 50 رد من الأعضاء وكلن يعطيج حله

سوري ممكن مايعجبج كلامي

بس ياأما تعرضي السيارة للبيع بموضوع منفصل

او مايحتاج ترفعي الموضوع


مع السلامة :telephone:

[Gh2o]

أنا عرفت شتبين الحل عندي
بيعي السياره ب 200 الف وشوفي لج واسطه بالبنك يطيحون عنج الدين وخذي مرسيدس إس 65 ابيض صوته نغم
ومبروك عليج مقدما

كل الحلول ماعجبتج لانها واقعيه واعتقد حلي الخيالي هو الأنسب

[بعيد الدار]

أختي الله يعينج والله أنا لو مكانج بسوي هالحل

أخذي 50 ألف من البنك

وسوي أعلان خذ لك سياره بأقساطها ومعها هديه 50 ألف في يدك


وكذا راح تفتكين من السيارة والأقساط الــ 190000 ألف وما يبقى عليج إلا الخمسين تسددينها على راحتج

[ذوق]

أختي الله يعينج والله أنا لو مكانج بسوي هالحل

أخذي 50 ألف من البنك

وسوي أعلان خذ لك سياره بأقساطها ومعها هديه 50 ألف في يدك


وكذا راح تفتكين من السيارة والأقساط الــ 190000 ألف وما يبقى عليج إلا الخمسين تسددينها على راحتج

فكــره نوعـآ مـا جيـده...جـاري الدراسه :telephone:

لكـن للأسف ان صعب علي اني اخذ قرض لأني اشتغل في بنك ومب مثبته للحيــن:shy: يعني ريضه لين اتثبت

[رايح جاي]

اختي حاولي تأجرينها اذا ممكن

[somo]

اختي انا عندي حل
اول شي صلي ركعتين لله عز و جل
و ادعي دعاء فرج الكرب
لا اله إلا الله الحليم الكريم .... لا اله إلا الله العلى العظيم .... لا اله إلا الله رب السماوات السبع ورب العرش العظيم
و ان شاء الله بيسرلك امرك

و بعدين قبل لا تتخذين اي قرار بخصوص السيارة سواء قررتي تبيعي السياره او تخلينها
صلي صلاة استخاره و ربنا بوفقك و بخليكي تسوي الشي الصح
تفضلي هاي دعاء الاستخاره

( اللَّهُمَّ إنِّي أَسْتَخِيرُكَ بِعِلْمِكَ , وَأَسْتَقْدِرُكَ بِقُدْرَتِكَ , وَأَسْأَلُكَ مِنْ فَضْلِكَ الْعَظِيمِ فَإِنَّكَ تَقْدِرُ وَلا أَقْدِرُ , وَتَعْلَمُ وَلا أَعْلَمُ , وَأَنْتَ عَلامُ الْغُيُوبِ , اللَّهُمَّ إنْ كُنْتَ تَعْلَمُ أَنَّ هَذَا الأَمْرَ (هنا تسمي حاجتك ) خَيْرٌ لِي فِي دِينِي وَمَعَاشِي وَعَاقِبَةِ أَمْرِي أَوْ قَالَ : عَاجِلِ أَمْرِي وَآجِلِهِ , فَاقْدُرْهُ لِي وَيَسِّرْهُ لِي ثُمَّ بَارِكْ لِي فِيهِ , اللَّهُمَّ وَإِنْ كُنْتَ تَعْلَمُ أَنَّ هَذَا الأَمْرَ (هنا تسمي حاجتك ) شَرٌّ لِي فِي دِينِي وَمَعَاشِي وَعَاقِبَةِ أَمْرِي أَوْ قَالَ : عَاجِلِ أَمْرِي وَآجِلِهِ , فَاصْرِفْهُ عَنِّي وَاصْرِفْنِي عَنْهُ وَاقْدُرْ لِي الْخَيْرَ حَيْثُ كَانَ ثُمَّ ارْضِنِي بِهِ . (وَيُسَمِّي حَاجَتَهُ ) ثُمَّ رَضِّنِي بِهِ

وبالتوفيق ان شاء الله

[@فارس@]

الله يوفقج اختي ويفك ضيقتج


واسال الله انه يسهل لج امورج

[Qatarianes]

الله يعينج
انا بسوق بطبطه ام خمسين قبل لا اقسط لموتر

[العاشق]

الله يسهل امرج