موضوع يهمني رايكم فيه ... تعالوا نتناقش

[reem-qatar]

السلام عليكم ورحمة الله وبركاته


اخباركم ؟؟


اول موضوع اطرحه في منتدى للحوار ومادري اذا مكانه صحيح ولا لا

وحبيت اعرف رايكم فيه

هو يمكن البعض يشوفه عادي بس هم ابي اعرف راي هالطرف ليش يشوفونه امر بسيط

يعني احنا نعرف ان الحامل لما تدري انها حامل ماتقول لاحد لفتره ويكون افضل اذا

كملت 3 اشهر عشان يثبت الجنين

بس في ناس يفضلون انهم اول مايدرون بالحمل على طول يقولون للاهل والاصدقاء


السؤال ؟؟؟ ايهما تفضل ؟؟؟ (ولماذا)

[Sharshooooor]

ماتقول احسن والعين حق :nice:

[الـقـاسـي]

هو كل شي بيد الله طبعا .. لكن الافضل انه مايقولون لين بعد فتره ..

[شبح الصمت]

صراحة اختي

العالم تخاف من العين هالايام

صج العين حــق

لا وما تقول الي في بطنها بنت والا ولد

يمكن وحده تجي عينها صاروخ
:shy:

[بو خليفه 123]

عندي موظفه مادريت انها حامل الا يوم وصلت الشهر السادس !!


اما بالنسبه لوجهة نظري الشخصيه :

لا مانع بان يتكتم الازواج بالربع الاول من الحمل و ذلك تجنباً من الحسد , ربما من شدة الفرحه الأم تخبر امراأه عقيمه و "يحز في خاطرها" و تحصل ردة فعل عكسيه ..

[ودي أكون]

اتقول .. حق امها واخواتها .. ونفس الشي الزوج يبشر هله .. المقربين جدا جدا .. يعني بيتهم بس ..


اما عقب مايثبت الحامل عقب شهور يوم الدبَه تبدأ تطلع خلاص اتقول حق اهلها انشروااا:shy:

[اسعاف]

تخبر اهلها المقربين (المحبين لها)فقط

[@فهد@]

تخبر اهلها المقربين (المحبين لها)فقط

+


ضروري من ذكر الله دائم علي لسانهم وكلمة ماشاء الله تسمعها دائم منهم

وتحرص من الي مب متزوجين او ماعندهم عيال .. (البعض )

العين حق والحذر واجب ..

وياكثر من راحوا فيها بسبة العين وعدم ذكر الله

الا بذكر الله تطمئن القلوب

[reem-qatar]

اي بس انا من وجهة نظري ان ينسكت عن الموضوع افضل

بس استغربت ان بعض الشباب يطلبون من زوجاتهم انهم يخبرون الاهل بهدف انهم يبون يفرحون مع الكل

وهذا شي سلبي من وجهة نظري لان الزوجه مارفضت الا خايفه من الي حولها وخايفه من العين والاشياء الي

تسمعها من الحريم فلانه سقطت وفلانه مادري شصار فيها وفلانه ماعلمت ..... الخ

[عزووز قطر]

العين حق
والافضل التكتم على الخبر حتى الشهر الرابع او الخامس ..

والافضل مايقولون ولد او بنت .. حلاتها مفاجأة

[missperfect]

من الوناااسه انشر الخبر بكل مكان بس انا الي دفعت الثمن :weeping::weeping:

[reem-qatar]

الله يعوضج يارب وانا بعد سقطت من فتره بسيطه واول ماعرفت قلنا انا وزوجي للكل من الفرحه

بس فالنهايه الله يعوض الكل وان شاء الله خير ماتدرين يمكن الولد عاق ولا مشوه .....الخ

[ســـهم]

أختي هذا السؤال يختص به النساء فقــــط


لم نجرب الحمل نحن معشر الرجال وأخفائه عن اقراننا :shy:

[بدوي]

لاتقولين لهم ولا شي

اللي بيشوف بطنج ، بيدري وبيبارك لج

خليها ماشيه عالبركه

:victory:

[بـــــــنت النوخـّــــذه]

اهههههههههه بس زوجها والباقي خلهم يكتشفون بنفسهم التغيرات ^____^

احس احراج اتقول يايمه تراني حامل يالربع تراني حامل :shy:

[بن داوود]

احسن شيىء الوحده ما تقول انها حامل حق حد وبعد الولاده ان شاء الله ما تقول انه الطفل لها وذا حد سئلها تقول ( طفل الجيران )